໗. ຈຕຸມຫາຣາຊສຸຕ຺ຕໍ

໓໗. ‘‘ອຏ຺ຐມິຍໍ, ຠິກ຺ຂເວ, ປກ຺ຂສ຺ສ ຈຕຸນ຺ນໍ ມຫາຣາຊານໍ ອມຈ຺ຈາ ປາຣິສຊ຺ຊາ ອິມໍ ໂລກໍ ອນຸວິຈຣນ຺ຕິ – ‘ກຈ຺ຈິ ພຫູ ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕີ’ຕິ. ຈາຕຸທ຺ທສິໍ, ຠິກ຺ຂເວ, ປກ຺ຂສ຺ສ ຈຕຸນ຺ນໍ ມຫາຣາຊານໍ ປຸຕ຺ຕາ ອິມໍ ໂລກໍ ອນຸວິຈຣນ຺ຕິ – ‘ກຈ຺ຈິ ພຫູ ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕີ’ຕິ. ຕທຫຸ, ຠິກ຺ຂເວ, ອຸໂປສເຖ ປນ຺ນຣເສ ຈຕ຺ຕາໂຣ ມຫາຣາຊາໂນ ສາມຎ຺ເຎວ ອິມໍ ໂລກໍ ອນຸວິຈຣນ຺ຕິ – ‘ກຈ຺ຈິ ພຫູ ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕີ’’’ຕິ.

‘‘ສເຈ, ຠິກ຺ຂເວ, ອປ຺ປກາ ໂຫນ຺ຕິ ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕິ. ຕເມນໍ, ຠິກ຺ຂເວ, ຈຕ຺ຕາໂຣ ມຫາຣາຊາໂນ ເທວານໍ ຕາວຕິໍສານໍ ສຸຘມ຺ມາຍ ສຠາຍ ສນ຺ນິສິນ຺ນານໍ ສນ຺ນິປຕິຕານໍ ອາໂຣເຈນ຺ຕິ – ‘ອປ຺ປກາ ໂຂ, ມາຣິສາ, ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕີ’ຕິ. ເຕນ ໂຂ, ຠິກ຺ຂເວ, ເທວາ ຕາວຕິໍສາ ອນຕ຺ຕມນາ ໂຫນ຺ຕິ – ‘ທິພ຺ພາ ວຕ, ໂຠ, ກາຍາ ປຣິຫາຍິສ຺ສນ຺ຕິ, ປຣິປູຣິສ຺ສນ຺ຕິ ອສຸຣກາຍາ’’’ຕິ.

‘‘ສເຈ ປນ, ຠິກ຺ຂເວ, ພຫູ ໂຫນ຺ຕິ ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕິ. ຕເມນໍ, ຠິກ຺ຂເວ, ຈຕ຺ຕາໂຣ ມຫາຣາຊາໂນ ເທວານໍ ຕາວຕິໍສານໍ ສຸຘມ຺ມາຍ ສຠາຍ ສນ຺ນິສິນ຺ນານໍ ສນ຺ນິປຕິຕານໍ ອາໂຣເຈນ຺ຕິ – ‘ພຫູ ໂຂ, ມາຣິສາ, ມນຸສ຺ສາ ມນຸສ຺ເສສຸ ມຕ຺ເຕຍ຺ຍາ ເປຕ຺ເຕຍ຺ຍາ ສາມຎ຺ຎາ ພ຺ຣຫ຺ມຎ຺ຎາ ກຸເລ ເຊຏ຺ຐາປຈາຍິໂນ ອຸໂປສຖໍ ອຸປວສນ຺ຕິ ປຏິຊາຄໂຣນ຺ຕິ ປຸຎ຺ຎານິ ກໂຣນ຺ຕີ’ຕິ. ເຕນ, ຠິກ຺ຂເວ, ເທວາ ຕາວຕິໍສາ ອຕ຺ຕມນາ ໂຫນ຺ຕິ – ‘ທິພ຺ພາ ວຕ, ໂຠ, ກາຍາ ປຣິປູຣິສ຺ສນ຺ຕິ, ປຣິຫາຍິສ຺ສນ຺ຕິ ອສຸຣກາຍາ’’’ຕິ.

‘‘ຠູຕປຸພ຺ພໍ, ຠິກ຺ຂເວ, ສກ຺ໂກ ເທວານມິນ຺ໂທ ເທເວ ຕາວຕິໍເສ ອນຸນຍມາໂນ ຕາຍໍ ເວລາຍໍ ອິມໍ ຄາຖໍ ອຠາສິ –

‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ;

ອຸໂປສຖໍ ອຸປວເສຍ຺ຍ, ໂຍປິສ຺ສ [ໂຍປສ຺ສ (ສີ. ສ຺ຍາ. ກໍ. ປີ.)] ມາທິໂສ ນໂຣ’’ຕິ.

‘‘ສາ ໂຂ ປເນສາ, ຠິກ຺ຂເວ, ສກ຺ເກນ ເທວານມິນ຺ເທນ ຄາຖາ ທຸຄ຺ຄີຕາ ນ ສຸຄີຕາ ທຸພ຺ຠາສິຕາ ນ ສຸຠາສິຕາ. ຕໍ ກິສ຺ສ ເຫຕຸ? ສກ຺ໂກ ຫິ, ຠິກ຺ຂເວ, ເທວານມິນ຺ໂທ ອວີຕຣາໂຄ ອວີຕໂທໂສ ອວີຕໂມໂຫ.

‘‘ໂຍ ຈ ໂຂ ໂສ, ຠິກ຺ຂເວ, ຠິກ຺ຂຸ ອຣຫໍ ຂີຓາສໂວ ວຸສິຕວາ ພ຺ຣຫ຺ມຈຣິໂຍ ກຕກຣຓີໂຍ ໂອຫິຕຠາໂຣ ອນຸປ຺ປຕ຺ຕສທຕ຺ໂຖ ປຣິກ຺ຂີຓຠວສໍໂຍຊໂນ ສມ຺ມທຎ຺ຎາ ວິມຸຕ຺ໂຕ, ຕສ຺ສ ໂຂ ເອຕໍ, ຠິກ຺ຂເວ, ຠິກ຺ຂຸໂນ [ຕສ຺ສ ໂຂ ເອຕໍ ຠິກ຺ຂຸໂນ (ສີ. ສ຺ຍາ.), ຕສ຺ສ ໂຂ ເອວໍ ຠິກ຺ຂເວ ຠິກ຺ຂຸໂນ (ກ.)] ກລ຺ລໍ ວຈນາຍ –

‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ;

ອຸໂປສຖໍ ອຸປວເສຍ຺ຍ, ໂຍປິສ຺ສ ມາທິໂສ ນໂຣ’’ຕິ.

‘‘ຕໍ ກິສ຺ສ ເຫຕຸ? ໂສ ຫິ, ຠິກ຺ຂເວ, ຠິກ຺ຂຸ ວີຕຣາໂຄ ວີຕໂທໂສ ວີຕໂມໂຫ’’ຕິ. ສຕ຺ຕມໍ.