໓. ສາຣິປຸຕ຺ຕສຸຕ຺ຕໍ

໓໓. ອຖ ໂຂ ອາຍສ຺ມາ ສາຣິປຸຕ຺ໂຕ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ສາຣິປຸຕ຺ຕໍ ຠຄວາ ເອຕທໂວຈ – ‘‘ສໍຂິຕ຺ເຕນປິ ໂຂ ອຫໍ, ສາຣິປຸຕ຺ຕ, ຘມ຺ມໍ ເທເສຍ຺ຍໍ; ວິຕ຺ຖາເຣນປິ ໂຂ ອຫໍ, ສາຣິປຸຕ຺ຕ, ຘມ຺ມໍ ເທເສຍ຺ຍໍ; ສໍຂິຕ຺ຕວິຕ຺ຖາເຣນປິ ໂຂ ອຫໍ, ສາຣິປຸຕ຺ຕ, ຘມ຺ມໍ ເທເສຍ຺ຍໍ; ອຎ຺ຎາຕາໂຣ ຈ ທຸລ຺ລຠາ’’ຕິ. ‘‘ເອຕສ຺ສ, ຠຄວາ, ກາໂລ, ເອຕສ຺ສ, ສຸຄຕ, ກາໂລ ຍໍ ຠຄວາ ສໍຂິຕ຺ເຕນປິ ຘມ຺ມໍ ເທເສຍ຺ຍ, ວິຕ຺ຖາເຣນປິ ຘມ຺ມໍ ເທເສຍ຺ຍ, ສໍຂິຕ຺ຕວິຕ຺ຖາເຣນປິ ຘມ຺ມໍ ເທເສຍ຺ຍ. ຠວິສ຺ສນ຺ຕິ ຘມ຺ມສ຺ສ ອຎ຺ຎາຕາໂຣ’’ຕິ.

‘‘ຕສ຺ມາຕິຫ, ສາຣິປຸຕ຺ຕ, ເອວໍ ສິກ຺ຂິຕພ຺ພໍ – ‘ອິມສ຺ມິຎ຺ຈ ສວິຎ຺ຎາຓເກ ກາເຍ ອຫງ຺ກາຣມມງ຺ກາຣມານານຸສຍາ ນ ຠວິສ຺ສນ຺ຕິ, ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານານຸສຍາ ນ ຠວິສ຺ສນ຺ຕິ, ຍຎ຺ຈ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ອຸປສມ຺ປຊ຺ຊ ວິຫຣໂຕ ອຫງ຺ກາຣມມງ຺ກາຣມານານຸສຍາ ນ ໂຫນ຺ຕິ ຕຎ຺ຈ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ອຸປສມ຺ປຊ຺ຊ ວິຫຣິສ຺ສາມາ’ຕິ. ເອວຎ຺ຫິ ໂຂ, ສາຣິປຸຕ຺ຕ, ສິກ຺ຂິຕພ຺ພໍ.

‘‘ຍໂຕ ຈ ໂຂ, ສາຣິປຸຕ຺ຕ, ຠິກ຺ຂຸໂນ ອິມສ຺ມິຎ຺ຈ ສວິຎ຺ຎາຓເກ ກາເຍ ອຫງ຺ກາຣມມງ຺ກາຣມານານຸສຍາ ນ ໂຫນ຺ຕິ, ພຫິທ຺ຘາ ຈ ສພ຺ພນິມິຕ຺ເຕສຸ ອຫງ຺ກາຣມມງ຺ກາຣມານານຸສຍາ ນ ໂຫນ຺ຕິ, ຍຎ຺ຈ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ອຸປສມ຺ປຊ຺ຊ ວິຫຣໂຕ ອຫງ຺ກາຣມມງ຺ກາຣມານານຸສຍາ ນ ໂຫນ຺ຕິ ຕຎ຺ຈ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ອຸປສມ຺ປຊ຺ຊ ວິຫຣຕິ; ອຍໍ ວຸຈ຺ຈຕິ, ສາຣິປຸຕ຺ຕ – ‘ຠິກ຺ຂຸ ອຈ຺ເຉຈ຺ຉິ [ອຈ຺ເຉຊ຺ຊິ (ສ຺ຍາ. ກໍ. ກ.)] ຕຓ຺ຫໍ, ວິວຕ຺ຕຍິ [ວາວຕ຺ຕຍິ (ສີ. ປີ.)] ສໍໂຍຊນໍ, ສມ຺ມາ ມານາຠິສມຍາ ອນ຺ຕມກາສິ ທຸກ຺ຂສ຺ສ’. ອິທຎ຺ຈ ປນ ເມຕໍ, ສາຣິປຸຕ຺ຕ, ສນ຺ຘາຍ ຠາສິຕໍ ປາຣາຍເນ [ປາຣາຍເຓ (ສີ.)] ອຸທຍປຎ຺ເຫ –

‘‘ປຫານໍ ກາມສຎ຺ຎານໍ, ໂທມນສ຺ສານ ຈູຠຍໍ;

ຖິນສ຺ສ ຈ ປນູທນໍ, ກຸກ຺ກຸຈ຺ຈານໍ ນິວາຣຓໍ.

‘‘ອຸເປກ຺ຂາສຕິສໍສຸທ຺ຘໍ, ຘມ຺ມຕກ຺ກປຸເຣຊວໍ;

ອຎ຺ຎາວິໂມກ຺ຂໍ ປພ຺ຣູມິ, ອວິຊ຺ຊາຍ ປເຠທນ’’ນ຺ຕິ [ສຸ. ນິ. ໑໑໑໒; ຈູຬນິ. ອຸທຍມາຓວປຸຈ຺ຉາ ໑໓໑]. ຕຕິຍໍ;