໗. ຕຕິຍອຘມ຺ມສຸຕ຺ຕໍ

໑໗໓. ‘‘ອຘມ຺ໂມ ຈ, ຠິກ຺ຂເວ, ເວທິຕພ຺ໂພ ຘມ຺ໂມ ຈ; ອນຕ຺ໂຖ ຈ ເວທິຕພ຺ໂພ ອຕ຺ໂຖ ຈ. ອຘມ຺ມຎ຺ຈ ວິທິຕ຺ວາ ຘມ຺ມຎ຺ຈ, ອນຕ຺ຖຎ຺ຈ ວິທິຕ຺ວາ ອຕ຺ຖຎ຺ຈ ຍຖາ ຘມ຺ໂມ ຍຖາ ອຕ຺ໂຖ ຕຖາ ປຏິປຊ຺ຊິຕພ຺ພໍ.

‘‘ກຕໂມ ຈ, ຠິກ຺ຂເວ, ອຘມ຺ໂມ, ກຕໂມ ຈ ຘມ຺ໂມ; ກຕໂມ ຈ ອນຕ຺ໂຖ, ກຕໂມ ຈ ອຕ຺ໂຖ? ປາຓາຕິປາໂຕ, ຠິກ຺ຂເວ, ອຘມ຺ໂມ; ປາຓາຕິປາຕາ ເວຣມຓີ ຘມ຺ໂມ; ເຍ ຈ ປາຓາຕິປາຕປຈ຺ຈຍາ ອເນເກ ປາປກາ ອກຸສລາ ຘມ຺ມາ ສມ຺ຠວນ຺ຕິ, ອຍໍ ອນຕ຺ໂຖ; ປາຓາຕິປາຕາ ເວຣມຓິປຈ຺ຈຍາ ຈ ອເນເກ ກຸສລາ ຘມ຺ມາ ຠາວນາປາຣິປູຣິໍ ຄຈ຺ຉນ຺ຕິ, ອຍໍ ອຕ຺ໂຖ.

‘‘ອທິນ຺ນາທານໍ, ຠິກ຺ຂເວ, ອຘມ຺ໂມ; ອທິນ຺ນາທານາ ເວຣມຓີ ຘມ຺ໂມ… ກາເມສຸມິຈ຺ຉາຈາໂຣ, ຠິກ຺ຂເວ, ອຘມ຺ໂມ; ກາເມສຸມິຈ຺ຉາຈາຣາ ເວຣມຓີ ຘມ຺ໂມ… ມຸສາວາໂທ, ຠິກ຺ຂເວ, ອຘມ຺ໂມ; ມຸສາວາທາ ເວຣມຓີ ຘມ຺ໂມ… ປິສຸຓາ ວາຈາ, ຠິກ຺ຂເວ, ອຘມ຺ໂມ; ປິສຸຓາຍ ວາຈາຍ ເວຣມຓີ ຘມ຺ໂມ… ຜຣຸສາ ວາຈາ, ຠິກ຺ຂເວ, ອຘມ຺ໂມ; ຜຣຸສາຍ ວາຈາຍ ເວຣມຓີ ຘມ຺ໂມ… ສມ຺ຜປ຺ປລາໂປ, ຠິກ຺ຂເວ, ອຘມ຺ໂມ; ສມ຺ຜປ຺ປລາປາ ເວຣມຓີ ຘມ຺ໂມ… ອຠິຊ຺ຌາ, ຠິກ຺ຂເວ, ອຘມ຺ໂມ; ອນຠິຊ຺ຌາ ຘມ຺ໂມ… ພ຺ຍາປາໂທ, ຠິກ຺ຂເວ, ອຘມ຺ໂມ; ອພ຺ຍາປາໂທ ຘມ຺ໂມ….

‘‘ມິຈ຺ຉາທິຏ຺ຐິ, ຠິກ຺ຂເວ, ອຘມ຺ໂມ; ສມ຺ມາທິຏ຺ຐິ ຘມ຺ໂມ; ເຍ ຈ ມິຈ຺ຉາທິຏ຺ຐິປຈ຺ຈຍາ ອເນເກ ປາປກາ ອກຸສລາ ຘມ຺ມາ ສມ຺ຠວນ຺ຕິ, ອຍໍ ອນຕ຺ໂຖ; ສມ຺ມາທິຏ຺ຐິປຈ຺ຈຍາ ຈ ອເນເກ ກຸສລາ ຘມ຺ມາ ຠາວນາປາຣິປູຣິໍ ຄຈ຺ຉນ຺ຕິ, ອຍໍ ອຕ຺ໂຖ.

‘‘‘ອຘມ຺ໂມ ຈ, ຠິກ຺ຂເວ, ເວທິຕພ຺ໂພ ຘມ຺ໂມ ຈ; ອນຕ຺ໂຖ ຈ ເວທິຕພ຺ໂພ ອຕ຺ໂຖ ຈ. ອຘມ຺ມຎ຺ຈ ວິທິຕ຺ວາ ຘມ຺ມຎ຺ຈ, ອນຕ຺ຖຎ຺ຈ ວິທິຕ຺ວາ ອຕ຺ຖຎ຺ຈ ຍຖາ ຘມ຺ໂມ ຍຖາ ອຕ຺ໂຖ ຕຖາ ປຏິປຊ຺ຊິຕພ຺ພ’ນ຺ຕິ, ອິຕິ ຍໍ ຕໍ ວຸຕ຺ຕໍ, ອິທເມຕໍ ປຏິຈ຺ຈ ວຸຕ຺ຕ’’ນ຺ຕິ. ສຕ຺ຕມໍ.