໘. ທຸຕິຍປຈ຺ໂຈໂຣຫຓີສຸຕ຺ຕໍ

໑໒໐. ‘‘ອຣິຍໍ ໂວ, ຠິກ຺ຂເວ, ປຈ຺ໂຈໂຣຫຓິໍ ເທເສສ຺ສາມິ. ຕໍ ສຸຓາຖ… ກຕມາ ຈ, ຠິກ຺ຂເວ, ອຣິຍາ ປຈ຺ໂຈໂຣຫຓີ? ອິຘ, ຠິກ຺ຂເວ, ອຣິຍສາວໂກ ອິຕິ ປຏິສຎ຺ຈິກ຺ຂຕິ – ‘ມິຈ຺ຉາທິຏ຺ຐິຍາ ໂຂ ປາປໂກ ວິປາໂກ – ທິຏ຺ເຐ ເຈວ ຘມ຺ເມ ອຠິສມ຺ປຣາຍຎ຺ຈາ’ຕິ. ໂສ ອິຕິ ປຏິສງ຺ຂາຍ ມິຈ຺ຉາທິຏ຺ຐິໍ ປຊຫຕິ; ມິຈ຺ຉາທິຏ຺ຐິຍາ ປຈ຺ໂຈໂຣຫຕິ. ມິຈ຺ຉາສງ຺ກປ຺ປສ຺ສ ໂຂ ປາປໂກ ວິປາໂກ… ມິຈ຺ຉາວາຈາຍ ໂຂ… ມິຈ຺ຉາກມ຺ມນ຺ຕສ຺ສ ໂຂ… ມິຈ຺ຉາອາຊີວສ຺ສ ໂຂ… ມິຈ຺ຉາວາຍາມສ຺ສ ໂຂ… ມິຈ຺ຉາສຕິຍາ ໂຂ… ມິຈ຺ຉາສມາຘິສ຺ສ ໂຂ… ມິຈ຺ຉາຎາຓສ຺ສ ໂຂ… ມິຈ຺ຉາວິມຸຕ຺ຕິຍາ ໂຂ ປາປໂກ ວິປາໂກ – ທິຏ຺ເຐ ເຈວ ຘມ຺ເມ ອຠິສມ຺ປຣາຍຎ຺ຈາຕິ. ໂສ ອິຕິ ປຏິສງ຺ຂາຍ ມິຈ຺ຉາວິມຸຕ຺ຕິໍ ປຊຫຕິ; ມິຈ຺ຉາວິມຸຕ຺ຕິຍາ ປຈ຺ໂຈໂຣຫຕິ. ອຍໍ ວຸຈ຺ຈຕິ, ຠິກ຺ຂເວ, ອຣິຍາ ປຈ຺ໂຈໂຣຫຓີ’’ຕິ. ອຏ຺ຐມໍ.