໕. ສງ຺ຄາຣວສຸຕ຺ຕໍ

໑໑໗. [ອ. ນິ. ໑໐.໑໖໙] ອຖ ໂຂ ສງ຺ຄາຣໂວ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ສງ຺ຄາຣໂວ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ກິໍ ນຸ ໂຂ, ໂຠ ໂຄຕມ, ໂອຣິມໍ ຕີຣໍ, ກິໍ ປາຣິມໍ ຕີຣ’’ນ຺ຕິ? ‘‘ມິຈ຺ຉາທິຏ຺ຐິ ໂຂ, ພ຺ຣາຫ຺ມຓ, ໂອຣິມໍ ຕີຣໍ, ສມ຺ມາທິຏ຺ຐິ ປາຣິມໍ ຕີຣໍ; ມິຈ຺ຉາສງ຺ກປ຺ໂປ ໂອຣິມໍ ຕີຣໍ, ສມ຺ມາສງ຺ກປ຺ໂປ ປາຣິມໍ ຕີຣໍ; ມິຈ຺ຉາວາຈາ ໂອຣິມໍ ຕີຣໍ, ສມ຺ມາວາຈາ ປາຣິມໍ ຕີຣໍ; ມິຈ຺ຉາກມ຺ມນ຺ໂຕ ໂອຣິມໍ ຕີຣໍ, ສມ຺ມາກມ຺ມນ຺ໂຕ ປາຣິມໍ ຕີຣໍ; ມິຈ຺ຉາອາຊີໂວ ໂອຣິມໍ ຕີຣໍ, ສມ຺ມາອາຊີໂວ ປາຣິມໍ ຕີຣໍ; ມິຈ຺ຉາວາຍາໂມ ໂອຣິມໍ ຕີຣໍ, ສມ຺ມາວາຍາໂມ ປາຣິມໍ ຕີຣໍ; ມິຈ຺ຉາສຕິ ໂອຣິມໍ ຕີຣໍ, ສມ຺ມາສຕິ ປາຣິມໍ ຕີຣໍ; ມິຈ຺ຉາສມາຘິ ໂອຣິມໍ ຕີຣໍ, ສມ຺ມາສມາຘິ ປາຣິມໍ ຕີຣໍ; ມິຈ຺ຉາຎາຓໍ ໂອຣິມໍ ຕີຣໍ, ສມ຺ມາຎາຓໍ ປາຣິມໍ ຕີຣໍ; ມິຈ຺ຉາວິມຸຕ຺ຕິ ໂອຣິມໍ ຕີຣໍ, ສມ຺ມາວິມຸຕ຺ຕິ ປາຣິມໍ ຕີຣນ຺ຕິ. ອິທໍ ໂຂ, ພ຺ຣາຫ຺ມຓ, ໂອຣິມໍ ຕີຣໍ, ອິທໍ ປາຣິມໍ ຕີຣນ຺ຕິ.

‘‘ອປ຺ປກາ ເຕ ມນຸສ຺ເສສຸ, ເຍ ຊນາ ປາຣຄາມິໂນ;

ອຖາຍໍ ອິຕຣາ ປຊາ, ຕີຣເມວານຸຘາວຕິ.

‘‘ເຍ ຈ ໂຂ ສມ຺ມທກ຺ຂາເຕ, ຘມ຺ເມ ຘມ຺ມານຸວຕ຺ຕິໂນ;

ເຕ ຊນາ ປາຣເມສ຺ສນ຺ຕິ, ມຈ຺ຈຸເຘຍ຺ຍໍ ສຸທຸຕ຺ຕຣໍ.

‘‘ກຓ຺ຫໍ ຘມ຺ມໍ ວິປ຺ປຫາຍ, ສຸກ຺ກໍ ຠາເວຖ ປຓ຺ຑິໂຕ;

ໂອກາ ອໂນກມາຄມ຺ມ, ວິເວເກ ຍຕ຺ຖ ທູຣມໍ.

‘‘ຕຕ຺ຣາຠິຣຕິມິຈ຺ເຉຍ຺ຍ, ຫິຕ຺ວາ ກາເມ ອກິຎ຺ຈໂນ;

ປຣິໂຍທເປຍ຺ຍ ອຕ຺ຕານໍ, ຈິຕ຺ຕກ຺ເລເສຫິ ປຓ຺ຑິໂຕ.

‘‘ເຍສໍ ສມ຺ໂພຘິຍງ຺ເຄສຸ, ສມ຺ມາ ຈິຕ຺ຕໍ ສຸຠາວິຕໍ;

ອາທານປຏິນິສ຺ສຄ຺ເຄ, ອນຸປາທາຍ ເຍ ຣຕາ;

ຂີຓາສວາ ຊຸຕິມນ຺ໂຕ [ຊຸຕີມນ຺ໂຕ (ສີ.)], ເຕ ໂລເກ ປຣິນິພ຺ພຸຕາ’’ຕິ. ປຎ຺ຈມໍ;