໓. ມິຈ຺ຉຕ຺ຕສຸຕ຺ຕໍ

໑໐໓. ‘‘ມິຈ຺ຉຕ຺ຕໍ, ຠິກ຺ຂເວ, ອາຄມ຺ມ ວິຣາຘນາ ໂຫຕິ, ໂນ ອາຣາຘນາ. ກຖຎ຺ຈ, ຠິກ຺ຂເວ, ມິຈ຺ຉຕ຺ຕໍ ອາຄມ຺ມ ວິຣາຘນາ ໂຫຕິ, ໂນ ອາຣາຘນາ? ມິຈ຺ຉາທິຏ຺ຐິກສ຺ສ, ຠິກ຺ຂເວ, ມິຈ຺ຉາສງ຺ກປ຺ໂປ ປໂຫຕິ, ມິຈ຺ຉາສງ຺ກປ຺ປສ຺ສ ມິຈ຺ຉາວາຈາ ປໂຫຕິ, ມິຈ຺ຉາວາຈສ຺ສ ມິຈ຺ຉາກມ຺ມນ຺ໂຕ ປໂຫຕິ, ມິຈ຺ຉາກມ຺ມນ຺ຕສ຺ສ ມິຈ຺ຉາອາຊີໂວ ປໂຫຕິ, ມິຈ຺ຉາອາຊີວສ຺ສ ມິຈ຺ຉາວາຍາໂມ ປໂຫຕິ, ມິຈ຺ຉາວາຍາມສ຺ສ ມິຈ຺ຉາສຕິ ປໂຫຕິ, ມິຈ຺ຉາສຕິສ຺ສ ມິຈ຺ຉາສມາຘິ ປໂຫຕິ, ມິຈ຺ຉາສມາຘິສ຺ສ ມິຈ຺ຉາຎາຓໍ ປໂຫຕິ, ມິຈ຺ຉາຎາຓິສ຺ສ [ມິຈ຺ຉາຎາຓສ຺ສ (ປີ. ກ.)] ມິຈ຺ຉາວິມຸຕ຺ຕິ ປໂຫຕິ. ເອວໍ ໂຂ, ຠິກ຺ຂເວ, ມິຈ຺ຉຕ຺ຕໍ ອາຄມ຺ມ ວິຣາຘນາ ໂຫຕິ, ໂນ ອາຣາຘນາ.

‘‘ສມ຺ມຕ຺ຕໍ, ຠິກ຺ຂເວ, ອາຄມ຺ມ ອາຣາຘນາ ໂຫຕິ, ໂນ ວິຣາຘນາ. ກຖຎ຺ຈ, ຠິກ຺ຂເວ, ສມ຺ມຕ຺ຕໍ ອາຄມ຺ມ ອາຣາຘນາ ໂຫຕິ, ໂນ ວິຣາຘນາ? ສມ຺ມາທິຏ຺ຐິກສ຺ສ, ຠິກ຺ຂເວ, ສມ຺ມາສງ຺ກປ຺ໂປ ປໂຫຕິ, ສມ຺ມາສງ຺ກປ຺ປສ຺ສ ສມ຺ມາວາຈາ ປໂຫຕິ, ສມ຺ມາວາຈສ຺ສ ສມ຺ມາກມ຺ມນ຺ໂຕ ປໂຫຕິ, ສມ຺ມາກມ຺ມນ຺ຕສ຺ສ ສມ຺ມາອາຊີໂວ ປໂຫຕິ, ສມ຺ມາອາຊີວສ຺ສ ສມ຺ມາວາຍາໂມ ປໂຫຕິ, ສມ຺ມາວາຍາມສ຺ສ ສມ຺ມາສຕິ ປໂຫຕິ, ສມ຺ມາສຕິສ຺ສ ສມ຺ມາສມາຘິ ປໂຫຕິ, ສມ຺ມາສມາຘິສ຺ສ ສມ຺ມາຎາຓໍ ປໂຫຕິ, ສມ຺ມາຎາຓິສ຺ສ [ສມ຺ມາຎາຓສ຺ສ (ປີ. ກ.)] ສມ຺ມາວິມຸຕ຺ຕິ ປໂຫຕິ. ເອວໍ ໂຂ, ຠິກ຺ຂເວ, ສມ຺ມຕ຺ຕໍ ອາຄມ຺ມ ອາຣາຘນາ ໂຫຕິ, ໂນ ວິຣາຘນາ’’ຕິ. ຕຕິຍໍ.