໑໐. ນິທ຺ຘມນີຍສຸຕ຺ຕໍ

໑໑໐. ‘‘ທສຍິເມ, ຠິກ຺ຂເວ, ນິທ຺ຘມນີຍາ ຘມ຺ມາ. ກຕເມ ທສ? ສມ຺ມາທິຏ຺ຐິກສ຺ສ, ຠິກ຺ຂເວ, ມິຈ຺ຉາທິຏ຺ຐິ ນິທ຺ຘນ຺ຕາ ໂຫຕິ; ເຍ ຈ ມິຈ຺ຉາທິຏ຺ຐິປຈ຺ຈຍາ ອເນເກ ປາປກາ ອກຸສລາ ຘມ຺ມາ ສມ຺ຠວນ຺ຕິ ເຕ ຈສ຺ສ ນິທ຺ຘນ຺ຕາ ໂຫນ຺ຕິ; ສມ຺ມາທິຏ຺ຐິປຈ຺ຈຍາ ຈ ອເນເກ ກຸສລາ ຘມ຺ມາ ຠາວນາປາຣິປູຣິໍ ຄຈ຺ຉນ຺ຕິ.

‘‘ສມ຺ມາສງ຺ກປ຺ປສ຺ສ, ຠິກ຺ຂເວ, ມິຈ຺ຉາສງ຺ກປ຺ໂປ ນິທ຺ຘນ຺ໂຕ ໂຫຕິ…ເປ… ສມ຺ມາວາຈສ຺ສ ຠິກ຺ຂເວ, ມິຈ຺ຉາວາຈາ ນິທ຺ຘນ຺ຕາ ໂຫຕິ… ສມ຺ມາກມ຺ມນ຺ຕສ຺ສ, ຠິກ຺ຂເວ, ມິຈ຺ຉາກມ຺ມນ຺ໂຕ ນິທ຺ຘນ຺ໂຕ ໂຫຕິ… ສມ຺ມາອາຊີວສ຺ສ, ຠິກ຺ຂເວ, ມິຈ຺ຉາອາຊີໂວ ນິທ຺ຘນ຺ໂຕ ໂຫຕິ… ສມ຺ມາວາຍາມສ຺ສ, ຠິກ຺ຂເວ, ມິຈ຺ຉາວາຍາໂມ ນິທ຺ຘນ຺ໂຕ ໂຫຕິ… ສມ຺ມາສຕິສ຺ສ, ຠິກ຺ຂເວ, ມິຈ຺ຉາສຕິ ນິທ຺ຘນ຺ຕາ ໂຫຕິ… ສມ຺ມາສມາຘິສ຺ສ, ຠິກ຺ຂເວ, ມິຈ຺ຉາສມາຘິ ນິທ຺ຘນ຺ໂຕ ໂຫຕິ… ສມ຺ມາຎາຓິສ຺ສ, ຠິກ຺ຂເວ, ມິຈ຺ຉາຎາຓໍ ນິທ຺ຘນ຺ຕໍ ໂຫຕິ….

‘‘ສມ຺ມາວິມຸຕ຺ຕິສ຺ສ, ຠິກ຺ຂເວ, ມິຈ຺ຉາວິມຸຕ຺ຕິ ນິທ຺ຘນ຺ຕາ ໂຫຕິ; ເຍ ຈ ມິຈ຺ຉາວິມຸຕ຺ຕິປຈ຺ຈຍາ ອເນເກ ປາປກາ ອກຸສລາ ຘມ຺ມາ ສມ຺ຠວນ຺ຕິ ເຕ ຈສ຺ສ ນິທ຺ຘນ຺ຕາ ໂຫນ຺ຕິ; ສມ຺ມາວິມຸຕ຺ຕິປຈ຺ຈຍາ ຈ ອເນເກ ກຸສລາ ຘມ຺ມາ ຠາວນາປາຣິປູຣິໍ ຄຈ຺ຉນ຺ຕິ. ອິເມ ໂຂ, ຠິກ຺ຂເວ, ທສ ນິທ຺ຘມນີຍາ ຘມ຺ມາ’’ຕິ. ທສມໍ.