໘. ທຸຕິຍນຬກປານສຸຕ຺ຕໍ

໖໘. ເອກໍ ສມຍໍ ຠຄວາ ນຬກປາເນ ວິຫຣຕິ ປລາສວເນ. ເຕນ ໂຂ ປນ ສມເຍນ ຠຄວາ ຕທຫຸໂປສເຖ ຠິກ຺ຂຸສງ຺ຆປຣິວຸໂຕ ນິສິນ຺ໂນ ໂຫຕິ. ອຖ ໂຂ ຠຄວາ ພຫຸເທວ ຣຕ຺ຕິໍ ຠິກ຺ຂູນໍ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ ຕຸຓ຺ຫີຠູຕໍ ຕຸຓ຺ຫີຠູຕໍ ຠິກ຺ຂຸສງ຺ຆໍ ອນຸວິໂລເກຕ຺ວາ ອາຍສ຺ມນ຺ຕໍ ສາຣິປຸຕ຺ຕໍ ອາມນ຺ເຕສິ –

‘‘ວິຄຕຖິນມິທ຺ໂຘ ໂຂ, ສາຣິປຸຕ຺ຕ, ຠິກ຺ຂຸສງ຺ໂຆ. ປຏິຠາຕຸ ຕໍ, ສາຣິປຸຕ຺ຕ, ຠິກ຺ຂູນໍ ຘມ຺ມີ ກຖາ. ປິຏ຺ຐິ ເມ ອາຄິລາຍຕິ; ຕມຫໍ ອາຍມິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ອາຍສ຺ມາ ສາຣິປຸຕ຺ໂຕ ຠຄວໂຕ ປຈ຺ຈສ຺ໂສສິ.

ອຖ ໂຂ ຠຄວາ ຈຕຸຄ຺ຄຸຓໍ ສງ຺ຆາຏິໍ ປຎ຺ຎາເປຕ຺ວາ ທກ຺ຂິເຓນ ປສ຺ເສນ ສີຫເສຍ຺ຍໍ ກປ຺ເປສິ ປາເທ ປາທໍ ອຈ຺ຈາຘາຍ ສໂຕ ສມ຺ປຊາໂນ ອຸຏ຺ຐານສຎ຺ຎໍ ມນສິ ກຣິຕ຺ວາ. ຕຕ຺ຣ ໂຂ ອາຍສ຺ມາ ສາຣິປຸຕ຺ໂຕ ຠິກ຺ຂູ ອາມນ຺ເຕສິ – ‘‘ອາວຸໂສ, ຠິກ຺ຂເວ’’ຕິ! ‘‘ອາວຸໂສ’’ຕິ ໂຂ ເຕ ຠິກ຺ຂູ ອາຍສ຺ມໂຕ ສາຣິປຸຕ຺ຕສ຺ສ ປຈ຺ຈສ຺ໂສສຸໍ. ອາຍສ຺ມາ ສາຣິປຸຕ຺ໂຕ ເອຕທໂວຈ –

‘‘ຍສ຺ສ ກສ຺ສຈິ, ອາວຸໂສ, ສທ຺ຘາ ນຕ຺ຖິ ກຸສເລສຸ ຘມ຺ເມສຸ, ຫິຣີ ນຕ຺ຖິ… ໂອຕ຺ຕປ຺ປໍ ນຕ຺ຖິ… ວີຣິຍໍ ນຕ຺ຖິ… ປຎ຺ຎາ ນຕ຺ຖິ… ໂສຕາວຘານໍ ນຕ຺ຖິ… ຘມ຺ມຘາຣຓາ ນຕ຺ຖິ… ອຕ຺ຖູປປຣິກ຺ຂາ ນຕ຺ຖິ… ຘມ຺ມານຸຘມ຺ມປ຺ປຏິປຕ຺ຕິ ນຕ຺ຖິ… ອປ຺ປມາໂທ ນຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ວຸທ຺ຘິ. ເສຍ຺ຍຖາປິ, ອາວຸໂສ, ກາຬປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫາຍເຕວ ວຓ຺ເຓນ ຫາຍຕິ ມຓ຺ຑເລນ ຫາຍຕິ ອາຠາຍ ຫາຍຕິ ອາໂຣຫປຣິຓາເຫນ; ເອວເມວໍ ໂຂ, ອາວຸໂສ, ຍສ຺ສ ກສ຺ສຈິ ສທ຺ຘາ ນຕ຺ຖິ ກຸສເລສຸ ຘມ຺ເມສຸ, ຫິຣີ ນຕ຺ຖິ… ໂອຕ຺ຕປ຺ປໍ ນຕ຺ຖິ… ວີຣິຍໍ ນຕ຺ຖິ… ປຎ຺ຎາ ນຕ຺ຖິ… ໂສຕາວຘານໍ ນຕ຺ຖິ… ຘມ຺ມຘາຣຓາ ນຕ຺ຖິ… ອຕ຺ຖູປປຣິກ຺ຂາ ນຕ຺ຖິ… ຘມ຺ມານຸຘມ຺ມປ຺ປຏິປຕ຺ຕິ ນຕ຺ຖິ… ອປ຺ປມາໂທ ນຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ວຸທ຺ຘິ.

‘‘ຍສ຺ສ ກສ຺ສຈິ, ອາວຸໂສ, ສທ຺ຘາ ອຕ຺ຖິ ກຸສເລສຸ ຘມ຺ເມສຸ, ຫິຣີ ອຕ຺ຖິ… ໂອຕ຺ຕປ຺ປໍ ອຕ຺ຖິ… ວີຣິຍໍ ອຕ຺ຖິ… ປຎ຺ຎາ ອຕ຺ຖິ… ໂສຕາວຘານໍ ອຕ຺ຖິ… ຘມ຺ມຘາຣຓາ ອຕ຺ຖິ… ອຕ຺ຖູປປຣິກ຺ຂາ ອຕ຺ຖິ… ຘມ຺ມານຸຘມ຺ມປ຺ປຏິປຕ຺ຕິ ອຕ຺ຖິ… ອປ຺ປມາໂທ ອຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ປຣິຫານິ. ເສຍ຺ຍຖາປິ, ອາວຸໂສ, ຊຸຓ຺ຫປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຑ຺ຒເຕວ ວຓ຺ເຓນ ວຑ຺ຒຕິ ມຓ຺ຑເລນ ວຑ຺ຒຕິ ອາຠາຍ ວຑ຺ຒຕິ ອາໂຣຫປຣິຓາເຫນ; ເອວເມວໍ ໂຂ, ອາວຸໂສ, ຍສ຺ສ ກສ຺ສຈິ ສທ຺ຘາ ອຕ຺ຖິ ກຸສເລສຸ ຘມ຺ເມສຸ…ເປ… ອປ຺ປມາໂທ ອຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ປຣິຫານີ’’ຕິ.

ອຖ ໂຂ ຠຄວາ ປຈ຺ຈຸຏ຺ຐາຍ ອາຍສ຺ມນ຺ຕໍ ສາຣິປຸຕ຺ຕໍ ອາມນ຺ເຕສິ – ‘‘ສາຘຸ ສາຘຸ, ສາຣິປຸຕ຺ຕ! ຍສ຺ສ ກສ຺ສຈິ, ສາຣິປຸຕ຺ຕ, ສທ຺ຘາ ນຕ຺ຖິ ກຸສເລສຸ ຘມ຺ເມສຸ ຫິຣີ ນຕ຺ຖິ… ໂອຕ຺ຕປ຺ປໍ ນຕ຺ຖິ… ປຎ຺ຎາ ນຕ຺ຖິ… ວີຣິຍໍ ນຕ຺ຖິ… ໂສຕາວຘານໍ ນຕ຺ຖິ… ຘມ຺ມຘາຣຓາ ນຕ຺ຖິ… ອຕ຺ຖູປປຣິກ຺ຂາ ນຕ຺ຖິ… ຘມ຺ມານຸຘມ຺ມປ຺ປຏິປຕ຺ຕິ ນຕ຺ຖິ… ອປ຺ປມາໂທ ນຕ຺ຖິ ກຸສເລສຸ ຘມ຺ເມສຸ ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ວຸທ຺ຘິ. ເສຍ຺ຍຖາປິ, ສາຣິປຸຕ຺ຕ, ກາຬປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫາຍເຕວ ວຓ຺ເຓນ ຫາຍຕິ ມຓ຺ຑເລນ ຫາຍຕິ ອາຠາຍ ຫາຍຕິ ອາໂຣຫປຣິຓາເຫນ; ເອວເມວໍ ໂຂ, ສາຣິປຸຕ຺ຕ, ຍສ຺ສ ກສ຺ສຈິ ສທ຺ຘາ ນຕ຺ຖິ ກຸສເລສຸ ຘມ຺ເມສຸ…ເປ… ອປ຺ປມາໂທ ນຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ຫານິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ວຸທ຺ຘິ.

‘‘ຍສ຺ສ ກສ຺ສຈິ, ສາຣິປຸຕ຺ຕ, ສທ຺ຘາ ອຕ຺ຖິ ກຸສເລສຸ ຘມ຺ເມສຸ ຫິຣີ ອຕ຺ຖິ… ໂອຕ຺ຕປ຺ປໍ ອຕ຺ຖິ… ວີຣິຍໍ ອຕ຺ຖິ… ປຎ຺ຎາ ອຕ຺ຖິ… ໂສຕາວຘານໍ ອຕ຺ຖິ… ຘມ຺ມຘາຣຓາ ອຕ຺ຖິ… ອຕ຺ຖູປປຣິກ຺ຂາ ອຕ຺ຖິ… ຘມ຺ມານຸຘມ຺ມປ຺ປຏິປຕ຺ຕິ ອຕ຺ຖິ… ອປ຺ປມາໂທ ອຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ປຣິຫານິ. ເສຍ຺ຍຖາປິ, ສາຣິປຸຕ຺ຕ, ຊຸຓ຺ຫປກ຺ເຂ ຈນ຺ທສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຑ຺ຒເຕວ ວຓ຺ເຓນ ວຑ຺ຒຕິ ມຓ຺ຑເລນ ວຑ຺ຒຕິ ອາຠາຍ ວຑ຺ຒຕິ ອາໂຣຫປຣິຓາເຫນ; ເອວເມວໍ ໂຂ, ສາຣິປຸຕ຺ຕ, ຍສ຺ສ ກສ຺ສຈິ ສທ຺ຘາ ອຕ຺ຖິ ກຸສເລສຸ ຘມ຺ເມສຸ…ເປ… ອປ຺ປມາໂທ ອຕ຺ຖິ ກຸສເລສຸ ຘມ຺ເມສຸ, ຕສ຺ສ ຍາ ຣຕ຺ຕິ ວາ ທິວໂສ ວາ ອາຄຈ຺ຉຕິ, ວຸທ຺ຘິເຍວ ປາຏິກງ຺ຂາ ກຸສເລສຸ ຘມ຺ເມສຸ ໂນ ປຣິຫານີ’’ຕິ. ອຏ຺ຐມໍ.