໑໐. ທຸຕິຍກຖາວຕ຺ຖຸສຸຕ຺ຕໍ

໗໐. ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ສມ຺ພຫຸລາ ຠິກ຺ຂູ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ຕາ ອຸປຏ຺ຐານສາລາຍໍ ສນ຺ນິສິນ຺ນາ ສນ຺ນິປຕິຕາ ອເນກວິຫິຕໍ ຕິຣຈ຺ຉານກຖໍ ອນຸຍຸຕ຺ຕາ ວິຫຣນ຺ຕິ, ເສຍ຺ຍຖິທໍ – ຣາຊກຖໍ ໂຈຣກຖໍ ມຫາມຕ຺ຕກຖໍ…ເປ… ອິຕິຠວາຠວກຖໍ ອິຕິ ວາຕິ.

‘‘ທສຍິມານິ, ຠິກ຺ຂເວ, ປາສໍສານິ ຐານານິ. ກຕມານິ ທສ? ອິຘ, ຠິກ຺ຂເວ, ຠິກ຺ຂຸ ອຕ຺ຕນາ ຈ ອປ຺ປິຈ຺ໂຉ ໂຫຕິ, ອປ຺ປິຈ຺ຉກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ອປ຺ປິຈ຺ໂຉ ຠິກ຺ຂຸ ອປ຺ປິຈ຺ຉກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ສນ຺ຕຸຏ຺ໂຐ ໂຫຕິ, ສນ຺ຕຸຏ຺ຐິກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ສນ຺ຕຸຏ຺ໂຐ ຠິກ຺ຂຸ ສນ຺ຕຸຏ຺ຐິກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ປວິວິຕ຺ໂຕ ໂຫຕິ, ປວິເວກກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ປວິວິຕ຺ໂຕ ຠິກ຺ຂຸ ປວິເວກກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ອສໍສຏ຺ໂຐ ໂຫຕິ, ອສໍສຏ຺ຐກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ອສໍສຏ຺ໂຐ ຠິກ຺ຂຸ ອສໍສຏ຺ຐກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ອາຣທ຺ຘວີຣິໂຍ ໂຫຕິ, ວີຣິຍາຣມ຺ຠກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ອາຣທ຺ຘວີຣິໂຍ ຠິກ຺ຂຸ ວີຣິຍາຣມ຺ຠກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ສີລສມ຺ປນ຺ໂນ ໂຫຕິ, ສີລສມ຺ປທາກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ສີລສມ຺ປນ຺ໂນ ຠິກ຺ຂຸ ສີລສມ຺ປທາກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ສມາຘິສມ຺ປນ຺ໂນ ໂຫຕິ, ສມາຘິສມ຺ປທາກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ສມາຘິສມ຺ປນ຺ໂນ ຠິກ຺ຂຸ ສມາຘິສມ຺ປທາກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ປຎ຺ຎາສມ຺ປນ຺ໂນ ໂຫຕິ, ປຎ຺ຎາສມ຺ປທາກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ປຎ຺ຎາສມ຺ປນ຺ໂນ ຠິກ຺ຂຸ ປຎ຺ຎາສມ຺ປທາກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ວິມຸຕ຺ຕິສມ຺ປນ຺ໂນ ໂຫຕິ, ວິມຸຕ຺ຕິສມ຺ປທາກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ວິມຸຕ຺ຕິສມ຺ປນ຺ໂນ ຠິກ຺ຂຸ ວິມຸຕ຺ຕິສມ຺ປທາກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ.

‘‘ອຕ຺ຕນາ ຈ ວິມຸຕ຺ຕິຎາຓທສ຺ສນສມ຺ປນ຺ໂນ ໂຫຕິ, ວິມຸຕ຺ຕິຎາຓທສ຺ສນສມ຺ປທາກຖຎ຺ຈ ຠິກ຺ຂູນໍ ກຕ຺ຕາ ໂຫຕິ. ‘ວິມຸຕ຺ຕິຎາຓທສ຺ສນສມ຺ປນ຺ໂນ ຠິກ຺ຂຸ ວິມຸຕ຺ຕິຎາຓທສ຺ສນສມ຺ປທາກຖຎ຺ຈ ຠິກ຺ຂູນໍ ກຕ຺ຕາ’ຕິ ປາສໍສເມຕໍ ຐານໍ. ອິມານິ ໂຂ, ຠິກ຺ຂເວ, ທສ ປາສໍສານິ ຐານານີ’’ຕິ. ທສມໍ.

ຍມກວຄ຺ໂຄ ທຸຕິໂຍ.