໙. ປພ຺ພຊ຺ຊາສຸຕ຺ຕໍ

໕໙. ‘‘ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ຍຖາປພ຺ພຊ຺ຊາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ນ ຈຸປ຺ປນ຺ນາ ປາປກາ ອກຸສລາ ຘມ຺ມາ ຈິຕ຺ຕໍ ປຣິຍາທາຍ ຐສ຺ສນ຺ຕິ; ອນິຈ຺ຈສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ອນຕ຺ຕສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ອສຸຠສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ອາທີນວສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ໂລກສ຺ສ ສມຎ຺ຈ ວິສມຎ຺ຈ ຎຕ຺ວາ ຕໍສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ໂລກສ຺ສ ຠວຎ຺ຈ [ສມ຺ຠວຎ຺ຈ (ສີ. ສ຺ຍາ.)] ວິຠວຎ຺ຈ ຎຕ຺ວາ ຕໍສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ໂລກສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ຎຕ຺ວາ ຕໍສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ປຫານສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ວິຣາຄສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕິ, ນິໂຣຘສຎ຺ຎາປຣິຈິຕຎ຺ຈ ໂນ ຈິຕ຺ຕໍ ຠວິສ຺ສຕີ’ຕິ – ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພໍ.

‘‘ຍໂຕ ໂຂ, ຠິກ຺ຂເວ, ຠິກ຺ຂຸໂນ ຍຖາປພ຺ພຊ຺ຊາປຣິຈິຕຎ຺ຈ ຈິຕ຺ຕໍ ໂຫຕິ ນ ຈຸປ຺ປນ຺ນາ ປາປກາ ອກຸສລາ ຘມ຺ມາ ຈິຕ຺ຕໍ ປຣິຍາທາຍ ຕິຏ຺ຐນ຺ຕິ, ອນິຈ຺ຈສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ອນຕ຺ຕສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ອສຸຠສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ອາທີນວສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ໂລກສ຺ສ ສມຎ຺ຈ ວິສມຎ຺ຈ ຎຕ຺ວາ ຕໍສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ໂລກສ຺ສ ຠວຎ຺ຈ ວິຠວຎ຺ຈ ຎຕ຺ວາ ຕໍສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ໂລກສ຺ສ ສມຸທຍຎ຺ຈ ອຕ຺ຖງ຺ຄມຎ຺ຈ ຎຕ຺ວາ ຕໍສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ປຫານສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ວິຣາຄສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ນິໂຣຘສຎ຺ຎາປຣິຈິຕຎ຺ຈ ຈິຕ຺ຕໍ ໂຫຕິ, ຕສ຺ສ ທ຺ວິນ຺ນໍ ຜລານໍ ອຎ຺ຎຕຣໍ ຜລໍ ປາຏິກງ຺ຂໍ – ທິຏ຺ເຐວ ຘມ຺ເມ ອຎ຺ຎາ, ສຕິ ວາ ອຸປາທິເສເສ ອນາຄາມິຕາ’’ຕິ. ນວມໍ.