໑໐. ຄິຣິມານນ຺ທສຸຕ຺ຕໍ

໖໐. ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອາຍສ຺ມາ ຄິຣິມານນ຺ໂທ ອາພາຘິໂກ ໂຫຕິ ທຸກ຺ຂິໂຕ ພາຬ຺ຫຄິລາໂນ. ອຖ ໂຂ ອາຍສ຺ມາ ອານນ຺ໂທ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອານນ຺ໂທ ຠຄວນ຺ຕໍ ເອຕທໂວຈ –

‘‘ອາຍສ຺ມາ, ຠນ຺ເຕ, ຄິຣິມານນ຺ໂທ ອາພາຘິໂກ ໂຫຕິ ທຸກ຺ຂິໂຕ ພາຬ຺ຫຄິລາໂນ. ສາຘຸ, ຠນ຺ເຕ, ຠຄວາ ເຍນາຍສ຺ມາ ຄິຣິມານນ຺ໂທ ເຕນຸປສງ຺ກມຕຸ ອນຸກມ຺ປໍ ອຸປາທາຍາ’’ຕິ. ‘‘ສເຈ ໂຂ ຕ຺ວໍ, ອານນ຺ທ, ຄິຣິມານນ຺ທສ຺ສ ຠິກ຺ຂຸໂນ ທສ ສຎ຺ຎາ ຠາເສຍ຺ຍາສິ, ຐານໍ ໂຂ ປເນຕໍ ວິຊ຺ຊຕິ ຍໍ ຄິຣິມານນ຺ທສ຺ສ ຠິກ຺ຂຸໂນ ທສ ສຎ຺ຎາ ສຸຕ຺ວາ ໂສ ອາພາໂຘ ຐານໂສ ປຏິປ຺ປສ຺ສມ຺ເຠຍ຺ຍ.

‘‘ກຕມາ ທສ? ອນິຈ຺ຈສຎ຺ຎາ, ອນຕ຺ຕສຎ຺ຎາ, ອສຸຠສຎ຺ຎາ, ອາທີນວສຎ຺ຎາ, ປຫານສຎ຺ຎາ, ວິຣາຄສຎ຺ຎາ, ນິໂຣຘສຎ຺ຎາ, ສພ຺ພໂລເກ ອນຠິຣຕສຎ຺ຎາ [ອນຠິຣຕິສຎ຺ຎາ (ກ.)], ສພ຺ພສງ຺ຂາເຣສຸ ອນິຈ຺ຉາສຎ຺ຎາ, ອານາປານສ຺ສຕິ.

‘‘ກຕມາ ຈານນ຺ທ, ອນິຈ຺ຈສຎ຺ຎາ? ອິຘານນ຺ທ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ອິຕິ ປຏິສຎ຺ຈິກ຺ຂຕິ – ‘ຣູປໍ ອນິຈ຺ຈໍ, ເວທນາ ອນິຈ຺ຈາ, ສຎ຺ຎາ ອນິຈ຺ຈາ, ສງ຺ຂາຣາ ອນິຈ຺ຈາ, ວິຎ຺ຎາຓໍ ອນິຈ຺ຈ’ນ຺ຕິ. ອິຕິ ອິເມສຸ ປຎ຺ຈສຸ ອຸປາທານກ຺ຂນ຺ເຘສຸ ອນິຈ຺ຈານຸປສ຺ສີ ວິຫຣຕິ. ອຍໍ ວຸຈ຺ຈຕານນ຺ທ, ອນິຈ຺ຈສຎ຺ຎາ.

‘‘ກຕມາ ຈານນ຺ທ, ອນຕ຺ຕສຎ຺ຎາ? ອິຘານນ຺ທ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ອິຕິ ປຏິສຎ຺ຈິກ຺ຂຕິ – ‘ຈກ຺ຂຸ ອນຕ຺ຕາ, ຣູປາ ອນຕ຺ຕາ, ໂສຕໍ ອນຕ຺ຕາ, ສທ຺ທາ ອນຕ຺ຕາ, ຆານໍ ອນຕ຺ຕາ, ຄນ຺ຘາ ອນຕ຺ຕາ, ຊິວ຺ຫາ ອນຕ຺ຕາ, ຣສາ ອນຕ຺ຕາ, ກາຍາ ອນຕ຺ຕາ, ໂຜຏ຺ຐພ຺ພາ ອນຕ຺ຕາ, ມໂນ ອນຕ຺ຕາ, ຘມ຺ມາ ອນຕ຺ຕາ’ຕິ. ອິຕິ ອິເມສຸ ຉສຸ ອຊ຺ຌຕ຺ຕິກພາຫິເຣສຸ ອາຍຕເນສຸ ອນຕ຺ຕານຸປສ຺ສີ ວິຫຣຕິ. ອຍໍ ວຸຈ຺ຈຕານນ຺ທ, ອນຕ຺ຕສຎ຺ຎາ.

‘‘ກຕມາ ຈານນ຺ທ, ອສຸຠສຎ຺ຎາ? ອິຘານນ຺ທ, ຠິກ຺ຂຸ ອິມເມວ ກາຍໍ ອຸທ຺ຘໍ ປາທຕລາ ອໂຘ ເກສມຕ຺ຖກາ ຕຈປຣິຍນ຺ຕໍ ປູຣໍ ນານາປ຺ປກາຣສ຺ສ ອສຸຈິໂນ ປຈ຺ຈເວກ຺ຂຕິ – ‘ອຕ຺ຖິ ອິມສ຺ມິໍ ກາເຍ ເກສາ ໂລມາ ນຂາ ທນ຺ຕາ ຕໂຈ ມໍສໍ ນ຺ຫາຣຸ ອຏ຺ຐິ ອຏ຺ຐິມິຎ຺ຊໍ ວກ຺ກໍ ຫທຍໍ ຍກນໍ ກິໂລມກໍ ປິຫກໍ ປປ຺ຜາສໍ ອນ຺ຕໍ ອນ຺ຕຄຸຓໍ ອຸທຣິຍໍ ກຣີສໍ ປິຕ຺ຕໍ ເສມ຺ຫໍ ປຸພ຺ໂພ ໂລຫິຕໍ ເສໂທ ເມໂທ ອສ຺ສຸ ວສາ ເຂໂຬ ສິງ຺ຆາຓິກາ ລສິກາ ມຸຕ຺ຕ’ນ຺ຕິ. ອິຕິ ອິມສ຺ມິໍ ກາເຍ ອສຸຠານຸປສ຺ສີ ວິຫຣຕິ. ອຍໍ ວຸຈ຺ຈຕານນ຺ທ, ອສຸຠສຎ຺ຎາ.

‘‘ກຕມາ ຈານນ຺ທ, ອາທີນວສຎ຺ຎາ? ອິຘານນ຺ທ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ອິຕິ ປຏິສຎ຺ຈິກ຺ຂຕິ – ‘ພຫຸທຸກ຺ໂຂ ໂຂ ອຍໍ ກາໂຍ ພຫຸອາທີນໂວ? ອິຕິ ອິມສ຺ມິໍ ກາເຍ ວິວິຘາ ອາພາຘາ ອຸປ຺ປຊ຺ຊນ຺ຕິ, ເສຍ຺ຍຖິທໍ – ຈກ຺ຂຸໂຣໂຄ ໂສຕໂຣໂຄ ຆານໂຣໂຄ ຊິວ຺ຫາໂຣໂຄ ກາຍໂຣໂຄ ສີສໂຣໂຄ ກຓ຺ຓໂຣໂຄ ມຸຂໂຣໂຄ ທນ຺ຕໂຣໂຄ ໂອຏ຺ຐໂຣໂຄ ກາໂສ ສາໂສ ປິນາໂສ ຑາໂຫ [ຑໂຫ (ສີ. ສ຺ຍາ.)] ຊໂຣ ກຸຈ຺ຉິໂຣໂຄ ມຸຈ຺ຉາ ປກ຺ຂນ຺ທິກາ ສູລາ ວິສູຈິກາ ກຸຏ຺ຐໍ ຄຓ຺ໂຑ ກິລາໂສ ໂສໂສ ອປມາໂຣ ທທ຺ທຸ ກຓ຺ຑຸ ກຈ຺ຉຸ ນຂສາ ວິຕຈ຺ຉິກາ ໂລຫິຕໍ ປິຕ຺ຕໍ [ໂລຫິຕປິຕ຺ຕໍ (ສີ.)] ມຘຸເມໂຫ ອໍສາ ປິຬກາ ຠຄນ຺ທລາ ປິຕ຺ຕສມຸຏ຺ຐານາ ອາພາຘາ ເສມ຺ຫສມຸຏ຺ຐານາ ອາພາຘາ ວາຕສມຸຏ຺ຐານາ ອາພາຘາ ສນ຺ນິປາຕິກາ ອາພາຘາ ອຸຕຸປຣິຓາມຊາ ອາພາຘາ ວິສມປຣິຫາຣຊາ ອາພາຘາ ໂອປກ຺ກມິກາ ອາພາຘາ ກມ຺ມວິປາກຊາ ອາພາຘາ ສີຕໍ ອຸຓ຺ຫໍ ຊິຆຈ຺ຉາ ປິປາສາ ອຸຈ຺ຈາໂຣ ປສ຺ສາໂວ’ຕິ. ອິຕິ ອິມສ຺ມິໍ ກາເຍ ອາທີນວານຸປສ຺ສີ ວິຫຣຕິ. ອຍໍ ວຸຈ຺ຈຕານນ຺ທ, ອາທີນວສຎ຺ຎາ.

‘‘ກຕມາ ຈານນ຺ທ, ປຫານສຎ຺ຎາ? ອິຘານນ຺ທ, ຠິກ຺ຂຸ ອຸປ຺ປນ຺ນໍ ກາມວິຕກ຺ກໍ ນາຘິວາເສຕິ, ປຊຫຕິ, ວິໂນເທຕິ, ພ຺ຍນ຺ຕີກໂຣຕິ, ອນຠາວໍ ຄເມຕິ. ອຸປ຺ປນ຺ນໍ ພ຺ຍາປາທວິຕກ຺ກໍ ນາຘິວາເສຕິ, ປຊຫຕິ, ວິໂນເທຕິ, ພ຺ຍນ຺ຕີກໂຣຕິ, ອນຠາວໍ ຄເມຕິ. ອຸປ຺ປນ຺ນໍ ວິຫິໍສາວິຕກ຺ກໍ ນາຘິວາເສຕິ, ປຊຫຕິ, ວິໂນເທຕິ, ພ຺ຍນ຺ຕີກໂຣຕິ, ອນຠາວໍ ຄເມຕິ. ອຸປ຺ປນ຺ນຸປ຺ປນ຺ເນ ປາປເກ ອກຸສເລ ຘມ຺ເມ ນາຘິວາເສຕິ, ປຊຫຕິ, ວິໂນເທຕິ, ພ຺ຍນ຺ຕີກໂຣຕິ, ອນຠາວໍ ຄເມຕິ. ອຍໍ ວຸຈ຺ຈຕານນ຺ທ, ປຫານສຎ຺ຎາ.

‘‘ກຕມາ ຈານນ຺ທ, ວິຣາຄສຎ຺ຎາ? ອິຘານນ຺ທ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ອິຕິ ປຏິສຎ຺ຈິກ຺ຂຕິ – ‘ເອຕໍ ສນ຺ຕໍ ເອຕໍ ປຓີຕໍ ຍທິທໍ ສພ຺ພສງ຺ຂາຣສມໂຖ ສພ຺ພູປຘິປ຺ປຏິນິສ຺ສຄ຺ໂຄ ຕຓ຺ຫາກ຺ຂໂຍ ວິຣາໂຄ ນິພ຺ພານ’ນ຺ຕິ. ອຍໍ ວຸຈ຺ຈຕານນ຺ທ, ວິຣາຄສຎ຺ຎາ.

‘‘ກຕມາ ຈານນ຺ທ, ນິໂຣຘສຎ຺ຎາ? ອິຘານນ຺ທ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ອິຕິ ປຏິສຎ຺ຈິກ຺ຂຕິ – ‘ເອຕໍ ສນ຺ຕໍ ເອຕໍ ປຓີຕໍ ຍທິທໍ ສພ຺ພສງ຺ຂາຣສມໂຖ ສພ຺ພູປຘິປ຺ປຏິນິສ຺ສຄ຺ໂຄ ຕຓ຺ຫາກ຺ຂໂຍ ນິໂຣໂຘ ນິພ຺ພານ’ນ຺ຕິ. ອຍໍ ວຸຈ຺ຈຕານນ຺ທ, ນິໂຣຘສຎ຺ຎາ.

‘‘ກຕມາ ຈານນ຺ທ, ສພ຺ພໂລເກ ອນຠິຣຕສຎ຺ຎາ? ອິຘານນ຺ທ, ຠິກ຺ຂຸ ເຍ ໂລເກ ອຸປາທານາ ເຈຕໂສ ອຘິຏ຺ຐານາຠິນິເວສານຸສຍາ, ເຕ ປຊຫນ຺ໂຕ ວິຫຣຕິ ອນຸປາທິຍນ຺ໂຕ. ອຍໍ ວຸຈ຺ຈຕານນ຺ທ, ສພ຺ພໂລເກ ອນຠິຣຕສຎ຺ຎາ.

‘‘ກຕມາ ຈານນ຺ທ, ສພ຺ພສງ຺ຂາເຣສຸ ອນິຈ຺ຉາສຎ຺ຎາ? ອິຘານນ຺ທ, ຠິກ຺ຂຸ ສພ຺ພສງ຺ຂາເຣສຸ ອຏ຺ຏີຍຕິ ຫຣາຍຕິ ຊິຄຸຈ຺ຉຕິ. ອຍໍ ວຸຈ຺ຈຕານນ຺ທ, ສພ຺ພສງ຺ຂາເຣສຸ ອນິຈ຺ຉາສຎ຺ຎາ.

‘‘ກຕມາ ຈານນ຺ທ, ອານາປານສ຺ສຕິ? ອິຘານນ຺ທ, ຠິກ຺ຂຸ ອຣຎ຺ຎຄໂຕ ວາ ຣຸກ຺ຂມູລຄໂຕ ວາ ສຸຎ຺ຎາຄາຣຄໂຕ ວາ ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍ ປຣິມຸຂໍ ສຕິໍ ອຸປຏ຺ຐເປຕ຺ວາ. ໂສ ສໂຕວ ອສ຺ສສຕິ ສໂຕວ ປສ຺ສສຕິ. ທີຆໍ ວາ ອສ຺ສສນ຺ໂຕ ‘ທີຆໍ ອສ຺ສສາມີ’ຕິ ປຊານາຕິ. ທີຆໍ ວາ ປສ຺ສສນ຺ໂຕ ‘ທີຆໍ ປສ຺ສສາມີ’ຕິ ປຊານາຕິ. ຣສ຺ສໍ ວາ ອສ຺ສສນ຺ໂຕ ‘ຣສ຺ສໍ ອສ຺ສສາມີ’ຕິ ປຊານາຕິ. ຣສ຺ສໍ ວາ ປສ຺ສສນ຺ໂຕ ‘ຣສ຺ສໍ ປສ຺ສສາມີ’ຕິ ປຊານາຕິ. ‘ສພ຺ພກາຍປຏິສໍເວທີ ອສ຺ສສິສ຺ສາມີ’ຕິ ສິກ຺ຂຕິ. ‘ສພ຺ພກາຍປຏິສໍເວທີ ປສ຺ສສິສ຺ສາມີ’ຕິ ສິກ຺ຂຕິ. ‘ປສ຺ສມ຺ຠຍໍ ກາຍສງ຺ຂາຣໍ ອສ຺ສສິສ຺ສາມີ’ຕິ ສິກ຺ຂຕິ. ‘ປສ຺ສມ຺ຠຍໍ ກາຍສງ຺ຂາຣໍ ປສ຺ສສິສ຺ສາມີ’ຕິ ສິກ຺ຂຕິ. ‘ປີຕິປຏິສໍເວທີ ອສ຺ສສິສ຺ສາມີ’ຕິ ສິກ຺ຂຕິ. ‘ປີຕິປຏິສໍເວທີ ປສ຺ສສິສ຺ສາມີ’ຕິ ສິກ຺ຂຕິ. ‘ສຸຂປຏິສໍເວທີ ອສ຺ສສິສ຺ສາມີ’ຕິ ສິກ຺ຂຕິ. ‘ສຸຂປຏິສໍເວທີ ປສ຺ສສິສ຺ສາມີ’ຕິ ສິກ຺ຂຕິ. ‘ຈິຕ຺ຕສງ຺ຂາຣປຏິສໍເວທີ ອສ຺ສສິສ຺ສາມີ’ຕິ ສິກ຺ຂຕິ. ‘ຈິຕ຺ຕສງ຺ຂາຣປຏິສໍເວທີ ປສ຺ສສິສ຺ສາມີ’ຕິ ສິກ຺ຂຕິ. ‘ປສ຺ສມ຺ຠຍໍ ຈິຕ຺ຕສງ຺ຂາຣໍ ອສ຺ສສິສ຺ສາມີ’ຕິ ສິກ຺ຂຕິ. ‘ປສ຺ສມ຺ຠຍໍ ຈິຕ຺ຕສງ຺ຂາຣໍ ປສ຺ສສິສ຺ສາມີ’ຕິ ສິກ຺ຂຕິ. ‘ຈິຕ຺ຕປຏິສໍເວທີ ອສ຺ສສິສ຺ສາມີ’ຕິ ສິກ຺ຂຕິ. ‘ຈິຕ຺ຕປຏິສໍເວທີ ປສ຺ສສິສ຺ສາມີ’ຕິ ສິກ຺ຂຕິ. ອຠິປ຺ປໂມທຍໍ ຈິຕ຺ຕໍ…ເປ… ສມາທຫໍ ຈິຕ຺ຕໍ…ເປ… ວິໂມຈຍໍ ຈິຕ຺ຕໍ…ເປ… ອນິຈ຺ຈານຸປສ຺ສີ…ເປ… ວິຣາຄານຸປສ຺ສີ…ເປ… ນິໂຣຘານຸປສ຺ສີ…ເປ… ‘ປຏິນິສ຺ສຄ຺ຄານຸປສ຺ສີ ອສ຺ສສິສ຺ສາມີ’ຕິ ສິກ຺ຂຕິ. ‘ປຏິນິສ຺ສຄ຺ຄານຸປສ຺ສີ ປສ຺ສສິສ຺ສາມີ’ຕິ ສິກ຺ຂຕິ. ອຍໍ ວຸຈ຺ຈຕານນ຺ທ, ອານາປານສ຺ສຕິ.

‘‘ສເຈ ໂຂ ຕ຺ວໍ, ອານນ຺ທ, ຄິຣິມານນ຺ທສ຺ສ ຠິກ຺ຂຸໂນ ອິມາ ທສ ສຎ຺ຎາ ຠາເສຍ຺ຍາສິ, ຐານໍ ໂຂ ປເນຕໍ ວິຊ຺ຊຕິ ຍໍ ຄິຣິມານນ຺ທສ຺ສ ຠິກ຺ຂຸໂນ ອິມາ ທສ ສຎ຺ຎາ ສຸຕ຺ວາ ໂສ ອາພາໂຘ ຐານໂສ ປຏິປ຺ປສ຺ສມ຺ເຠຍ຺ຍາ’’ຕິ.

ອຖ ໂຂ ອາຍສ຺ມາ ອານນ຺ໂທ ຠຄວໂຕ ສນ຺ຕິເກ ອິມາ ທສ ສຎ຺ຎາ ອຸຄ຺ຄເຫຕ຺ວາ ເຍນາຍສ຺ມາ ຄິຣິມານນ຺ໂທ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມໂຕ ຄິຣິມານນ຺ທສ຺ສ ອິມາ ທສ ສຎ຺ຎາ ອຠາສິ. ອຖ ໂຂ ອາຍສ຺ມໂຕ ຄິຣິມານນ຺ທສ຺ສ ທສ ສຎ຺ຎາ ສຸຕ຺ວາ ໂສ ອາພາໂຘ ຐານໂສ ປຏິປ຺ປສ຺ສມ຺ຠິ. ວຸຏ຺ຐຫິ ຈາຍສ຺ມາ ຄິຣິມານນ຺ໂທ ຕມ຺ຫາ ອາພາຘາ. ຕຖາ ປຫີໂນ ຈ ປນາຍສ຺ມໂຕ ຄິຣິມານນ຺ທສ຺ສ ໂສ ອາພາໂຘ ອໂຫສີ’’ຕິ. ທສມໍ.

ສຈິຕ຺ຕວຄ຺ໂຄ ປຐໂມ.