໔. ອຸປສມ຺ປທາສຸຕ຺ຕໍ

໓໔. ‘‘ກຕິຫິ ນຸ ໂຂ, ຠນ຺ເຕ, ຘມ຺ເມຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພ’’ນ຺ຕິ? ‘‘ທສຫິ ໂຂ, ອຸປາລິ, ຘມ຺ເມຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພໍ. ກຕເມຫິ ທສຫິ? ອິຘຸປາລິ, ຠິກ຺ຂຸ ສີລວາ ໂຫຕິ, ປາຕິໂມກ຺ຂສໍວຣສໍວຸໂຕ ວິຫຣຕິ ອາຈາຣໂຄຈຣສມ຺ປນ຺ໂນ ອຓຸມຕ຺ເຕສຸ ວຊ຺ເຊສຸ ຠຍທສ຺ສາວີ, ສມາທາຍ ສິກ຺ຂຕິ ສິກ຺ຂາປເທສຸ; ພຫຸສ຺ສຸໂຕ ໂຫຕິ ສຸຕຘໂຣ ສຸຕສນ຺ນິຈໂຍ, ເຍ ເຕ ຘມ຺ມາ ອາທິກລ຺ຍາຓາ ມຊ຺ເຌກລ຺ຍາຓາ ປຣິໂຍສານກລ຺ຍາຓາ ສາຕ຺ຖໍ ສພ຺ຍຎ຺ຊນໍ ເກວລປຣິປຸຓ຺ຓໍ ປຣິສຸທ຺ຘໍ ພ຺ຣຫ຺ມຈຣິຍໍ ອຠິວທນ຺ຕິ, ຕຖາຣູປາສ຺ສ ຘມ຺ມາ ພຫຸສ຺ສຸຕາ ໂຫນ຺ຕິ ຘາຕາ ວຈສາ ປຣິຈິຕາ ມນສານຸເປກ຺ຂິຕາ ທິຏ຺ຐິຍາ ສຸປ຺ປຏິວິທ຺ຘາ; ປາຕິໂມກ຺ຂໍ ໂຂ ປນສ຺ສ ວິຕ຺ຖາເຣນ ສ຺ວາຄຕໍ ໂຫຕິ ສຸວິຠຕ຺ຕໍ ສຸປ຺ປວຕ຺ຕໍ ສຸວິນິຈ຺ຉິຕໍ ສຸຕ຺ຕໂສ ອນຸພ຺ຍຎ຺ຊນໂສ; ປຏິພໂລ ໂຫຕິ ຄິລານໍ ອຸປຏ຺ຐາຕຸໍ ວາ ອຸປຏ຺ຐາເປຕຸໍ ວາ; ປຏິພໂລ ໂຫຕິ ອນຠິຣຕິໍ ວູປກາເສຕຸໍ ວາ ວູປກາສາເປຕຸໍ ວາ; ປຏິພໂລ ໂຫຕິ ອຸປ຺ປນ຺ນໍ ກຸກ຺ກຸຈ຺ຈໍ ຘມ຺ມໂຕ ວິໂນເທຕຸໍ; ປຏິພໂລ ໂຫຕິ ອຸປ຺ປນ຺ນໍ ທິຏ຺ຐິຄຕໍ ຘມ຺ມໂຕ ວິເວເຈຕຸໍ; ປຏິພໂລ ໂຫຕິ ອຘິສີເລ ສມາທເປຕຸໍ; ປຏິພໂລ ໂຫຕິ ອຘິຈິຕ຺ເຕ ສມາທເປຕຸໍ; ປຏິພໂລ ໂຫຕິ ອຘິປຎ຺ຎາຍ ສມາທເປຕຸໍ. ອິເມຫິ ໂຂ, ອຸປາລິ, ທສຫິ ຘມ຺ເມຫິ ສມນ຺ນາຄເຕນ ຠິກ຺ຂຸນາ ອຸປສມ຺ປາເທຕພ຺ພ’’ນ຺ຕິ. ຈຕຸຕ຺ຖໍ.