೧೦. ಸತ್ತಸಮಥನಾನತ್ಥಾದಿ

೩೫೪. ಸಮ್ಮುಖಾವಿನಯೋತಿ ವಾ ಸತಿವಿನಯೋತಿ ವಾ – ಇಮೇ ಧಮ್ಮಾ ನಾನತ್ಥಾ ನಾನಾಬ್ಯಞ್ಜನಾ ಉದಾಹು ಏಕತ್ಥಾ ಬ್ಯಞ್ಜನಮೇವ ನಾನಂ? ಸಮ್ಮುಖಾವಿನಯೋತಿ ವಾ ಅಮೂಳ್ಹವಿನಯೋತಿ ವಾ…ಪೇ… ಸಮ್ಮುಖಾವಿನಯೋತಿ ವಾ ಪಟಿಞ್ಞಾತಕರಣನ್ತಿ ವಾ… ಸಮ್ಮುಖಾವಿನಯೋತಿ ವಾ ಯೇಭುಯ್ಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಸ್ಸಪಾಪಿಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಿಣವತ್ಥಾರಕೋತಿ ವಾ – ಇಮೇ ಧಮ್ಮಾ ನಾನತ್ಥಾ ನಾನಾಬ್ಯಞ್ಜನಾ ಉದಾಹು ಏಕತ್ಥಾ ಬ್ಯಞ್ಜನಮೇವ ನಾನಂ? ಸಮ್ಮುಖಾವಿನಯೋತಿ ವಾ ಸತಿವಿನಯೋತಿ ವಾ – ಇಮೇ ಧಮ್ಮಾ ನಾನತ್ಥಾ ಚೇವ ನಾನಾಬ್ಯಞ್ಜನಾ ಚ. ಸಮ್ಮುಖಾವಿನಯೋತಿ ವಾ ಅಮೂಳ್ಹವಿನಯೋತಿ ವಾ…ಪೇ… ಸಮ್ಮುಖಾವಿನಯೋತಿ ವಾ ಪಟಿಞ್ಞಾತಕರಣನ್ತಿ ವಾ… ಸಮ್ಮುಖಾವಿನಯೋತಿ ವಾ ಯೇಭುಯ್ಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಸ್ಸಪಾಪಿಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಿಣವತ್ಥಾರಕೋತಿ ವಾ – ಇಮೇ ಧಮ್ಮಾ ನಾನತ್ಥಾ ಚೇವ ನಾನಾ ಬ್ಯಞ್ಜನಾ ಚ.

೩೫೫. [ಚೂಳವ. ೨೨೪] ವಿವಾದೋ ವಿವಾದಾಧಿಕರಣಂ, ವಿವಾದೋ ನೋ ಅಧಿಕರಣಂ, ಅಧಿಕರಣಂ ನೋ ವಿವಾದೋ, ಅಧಿಕರಣಞ್ಚೇವ ವಿವಾದೋ ಚ? ಸಿಯಾ ವಿವಾದೋ ವಿವಾದಾಧಿಕರಣಂ, ಸಿಯಾ ವಿವಾದೋ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ವಿವಾದೋ, ಸಿಯಾ ಅಧಿಕರಣಞ್ಚೇವ ವಿವಾದೋ ಚ.

ತತ್ಥ ಕತಮೋ ವಿವಾದೋ ವಿವಾದಾಧಿಕರಣಂ? ಇಧ ಭಿಕ್ಖೂ ವಿವದನ್ತಿ ಧಮ್ಮೋತಿ ವಾ ಅಧಮ್ಮೋತಿ ವಾ…ಪೇ… ದುಟ್ಠುಲ್ಲಾ ಆಪತ್ತೀತಿ ವಾ ಅದುಟ್ಠುಲ್ಲಾ ಆಪತ್ತೀತಿ ವಾ. ಯಂ ತತ್ಥ ಭಣ್ಡನಂ, ಕಲಹೋ, ವಿಗ್ಗಹೋ, ವಿವಾದೋ, ನಾನಾವಾದೋ, ಅಞ್ಞಥಾವಾದೋ, ವಿಪಚ್ಚತಾಯ ವೋಹಾರೋ, ಮೇಧಕಂ – ಅಯಂ ವಿವಾದೋ ವಿವಾದಾಧಿಕರಣಂ.

ತತ್ಥ ಕತಮೋ ವಿವಾದೋ ನೋ ಅಧಿಕರಣಂ? ಮಾತಾಪಿ ಪುತ್ತೇನ ವಿವದತಿ, ಪುತ್ತೋಪಿ ಮಾತರಾ ವಿವದತಿ, ಪಿತಾಪಿ ಪುತ್ತೇನ ವಿವದತಿ, ಪುತ್ತೋಪಿ ಪಿತರಾ ವಿವದತಿ, ಭಾತಾಪಿ ಭಾತರಾ ವಿವದತಿ, ಭಾತಾಪಿ ಭಗಿನಿಯಾ ವಿವದತಿ, ಭಗಿನೀಪಿ ಭಾತರಾ ವಿವದತಿ, ಸಹಾಯೋಪಿ ಸಹಾಯೇನ ವಿವದತಿ – ಅಯಂ ವಿವಾದೋ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ವಿವಾದೋ? ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ – ಇದಂ ಅಧಿಕರಣಂ ನೋ ವಿವಾದೋ.

ತತ್ಥ ಕತಮಂ ಅಧಿಕರಣಞ್ಚೇವ ವಿವಾದೋ ಚ? ವಿವಾದಾಧಿಕರಣಂ ಅಧಿಕರಣಞ್ಚೇವ ವಿವಾದೋ ಚ.

೩೫೬. [ಚೂಳವ. ೨೨೪ ಆದಯೋ] ಅನುವಾದೋ ಅನುವಾದಾಧಿಕರಣಂ, ಅನುವಾದೋ ನೋ ಅಧಿಕರಣಂ, ಅಧಿಕರಣಂ ನೋ ಅನುವಾದೋ, ಅಧಿಕರಣಞ್ಚೇವ ಅನುವಾದೋ ಚ? ಸಿಯಾ ಅನುವಾದೋ ಅನುವಾದಾಧಿಕರಣಂ, ಸಿಯಾ ಅನುವಾದೋ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ಅನುವಾದೋ, ಸಿಯಾ ಅಧಿಕರಣಞ್ಚೇವ ಅನುವಾದೋ ಚ.

ತತ್ಥ ಕತಮೋ ಅನುವಾದೋ ಅನುವಾದಾಧಿಕರಣಂ? ಇಧ ಭಿಕ್ಖೂ ಭಿಕ್ಖುಂ ಅನುವದನ್ತಿ ಸೀಲವಿಪತ್ತಿಯಾ ವಾ ಆಚಾರವಿಪತ್ತಿಯಾ ವಾ ದಿಟ್ಠಿವಿಪತ್ತಿಯಾ ವಾ ಆಜೀವವಿಪತ್ತಿಯಾ ವಾ. ಯೋ ತತ್ಥ ಅನುವಾದೋ, ಅನುವದನಾ ಅನುಲ್ಲಪನಾ ಅನುಭಣನಾ ಅನುಸಮ್ಪವಙ್ಕತಾ ಅಬ್ಭುಸ್ಸಹನತಾ ಅನುಬಲಪ್ಪದಾನಂ – ಅಯಂ ಅನುವಾದೋ ಅನುವಾದಾಧಿಕರಣಂ.

ತತ್ಥ ಕತಮೋ ಅನುವಾದೋ ನೋ ಅಧಿಕರಣಂ? ಮಾತಾಪಿ ಪುತ್ತಂ ಅನುವದತಿ, ಪುತ್ತೋಪಿ ಮಾತರಂ ಅನುವದತಿ, ಪಿತಾಪಿ ಪುತ್ತಂ ಅನುವದತಿ, ಪುತ್ತೋಪಿ ಪಿತರಂ ಅನುವದತಿ, ಭಾತಾಪಿ ಭಾತರಂ ಅನುವದತಿ, ಭಾತಾಪಿ ಭಗಿನಿಂ ಅನುವದತಿ, ಭಗಿನೀಪಿ ಭಾತರಂ ಅನುವದತಿ, ಸಹಾಯೋಪಿ ಸಹಾಯಂ ಅನುವದತಿ – ಅಯಂ ಅನುವಾದೋ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ಅನುವಾದೋ? ಆಪತ್ತಾಧಿಕರಣಂ ಕಿಚ್ಚಾಧಿಕರಣಂ ವಿವಾದಾಧಿಕರಣಂ – ಇದಂ ಅಧಿಕರಣಂ ನೋ ಅನುವಾದೋ.

ತತ್ಥ ಕತಮಂ ಅಧಿಕರಣಞ್ಚೇವ ಅನುವಾದೋ ಚ? ಅನುವಾದಾಧಿಕರಣಂ ಅಧಿಕರಣಞ್ಚೇವ ಅನುವಾದೋ ಚ.

೩೫೭. ಆಪತ್ತಿ ಆಪತ್ತಾಧಿಕರಣಂ, ಆಪತ್ತಿ ನೋ ಅಧಿಕರಣಂ, ಅಧಿಕರಣಂ ನೋ ಆಪತ್ತಿ, ಅಧಿಕರಣಞ್ಚೇವ ಆಪತ್ತಿ ಚ? ಸಿಯಾ ಆಪತ್ತಿ ಆಪತ್ತಾಧಿಕರಣಂ, ಸಿಯಾ ಆಪತ್ತಿ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ಆಪತ್ತಿ, ಸಿಯಾ ಅಧಿಕರಣಞ್ಚೇವ ಆಪತ್ತಿ ಚ.

ತತ್ಥ ಕತಮಾ ಆಪತ್ತಿ ಆಪತ್ತಾಧಿಕರಣಂ? ಪಞ್ಚಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ. ಸತ್ತಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ. ಅಯಂ ಆಪತ್ತಿ ಆಪತ್ತಾಧಿಕರಣಂ.

ತತ್ಥ ಕತಮಾ ಆಪತ್ತಿ ನೋ ಅಧಿಕರಣಂ? ಸೋತಾಪತ್ತಿ ಸಮಾಪತ್ತಿ – ಅಯಂ ಆಪತ್ತಿ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ಆಪತ್ತಿ? ಕಿಚ್ಚಾಧಿಕರಣಂ ವಿವಾದಾಧಿಕರಣಂ ಅನುವಾದಾಧಿಕರಣಂ – ಇದಂ ಅಧಿಕರಣಂ ನೋ ಆಪತ್ತಿ.

ತತ್ಥ ಕತಮಂ ಅಧಿಕರಣಞ್ಚೇವ ಆಪತ್ತಿ ಚ? ಆಪತ್ತಾಧಿಕರಣಂ ಅಧಿಕರಣಞ್ಚೇವ ಆಪತ್ತಿ ಚ.

೩೫೮. [ಚೂಳವ. ೨೨೩] ಕಿಚ್ಚಂ ಕಿಚ್ಚಾಧಿಕರಣಂ, ಕಿಚ್ಚಂ ನೋ ಅಧಿಕರಣಂ, ಅಧಿಕರಣಂ ನೋ ಕಿಚ್ಚಂ, ಅಧಿಕರಣಞ್ಚೇವ ಕಿಚ್ಚಞ್ಚ? ಸಿಯಾ ಕಿಚ್ಚಂ ಕಿಚ್ಚಾಧಿಕರಣಂ, ಸಿಯಾ ಕಿಚ್ಚಂ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ಕಿಚ್ಚಂ, ಸಿಯಾ ಅಧಿಕರಣಞ್ಚೇವ ಕಿಚ್ಚಞ್ಚ.

ತತ್ಥ ಕತಮಂ ಕಿಚ್ಚಂ ಕಿಚ್ಚಾಧಿಕರಣಂ? ಯಾ ಸಙ್ಘಸ್ಸ ಕಿಚ್ಚಯತಾ ಕರಣೀಯತಾ ಅಪಲೋಕನಕಮ್ಮಂ ಞತ್ತಿಕಮ್ಮಂ ಞತ್ತಿದುತಿಯಕಮ್ಮಂ ಞತ್ತಿಚತುತ್ಥಕಮ್ಮಂ – ಇದಂ ಕಿಚ್ಚಂ ಕಿಚ್ಚಾಧಿಕರಣಂ.

ತತ್ಥ ಕತಮಂ ಕಿಚ್ಚಂ ನೋ ಅಧಿಕರಣಂ? ಆಚರಿಯಕಿಚ್ಚಂ ಉಪಜ್ಝಾಯಕಿಚ್ಚಂ [ಉಪಜ್ಝಾಯಕಿಚ್ಚಂ ಸಕಿಚ್ಚಂ (ಕ.)] ಸಮಾನುಪಜ್ಝಾಯಕಿಚ್ಚಂ ಸಮಾನಾಚರಿಯಕಿಚ್ಚಂ – ಇದಂ ಕಿಚ್ಚಂ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ಕಿಚ್ಚಂ? ವಿವಾದಾಧಿಕರಣಂ ಅನುವಾದಾಧಿಕರಣಂ ಆಪತ್ತಾಧಿಕರಣಂ – ಇದಂ ಅಧಿಕರಣಂ ನೋ ಕಿಚ್ಚಂ.

ತತ್ಥ ಕತಮಂ ಅಧಿಕರಣಞ್ಚೇವ ಕಿಚ್ಚಞ್ಚ? ಕಿಚ್ಚಾಧಿಕರಣಂ ಅಧಿಕರಣಞ್ಚೇವ ಕಿಚ್ಚಂ ಚಾತಿ.

ಅಧಿಕರಣಭೇದೋ ನಿಟ್ಠಿತೋ.