ಅಧಿಕರಣಭೇದೋ

೧. ಉಕ್ಕೋಟನಭೇದಾದಿ

೩೪೦. [ಚೂಳವ. ೨೧೫; ಪರಿ. ೨೭೫] ಚತ್ತಾರಿ ಅಧಿಕರಣಾನಿ. ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ – ಇಮಾನಿ ಚತ್ತಾರಿ ಅಧಿಕರಣಾನಿ.

ಇಮೇಸಂ ಚತುನ್ನಂ ಅಧಿಕರಣಾನಂ ಕತಿ ಉಕ್ಕೋಟಾ? ಇಮೇಸಂ ಚತುನ್ನಂ ಅಧಿಕರಣಾನಂ ದಸ ಉಕ್ಕೋಟಾ. ವಿವಾದಾಧಿಕರಣಸ್ಸ ದ್ವೇ ಉಕ್ಕೋಟಾ, ಅನುವಾದಾಧಿಕರಣಸ್ಸ ಚತ್ತಾರೋ ಉಕ್ಕೋಟಾ, ಆಪತ್ತಾಧಿಕರಣಸ್ಸ ತಯೋ ಉಕ್ಕೋಟಾ, ಕಿಚ್ಚಾಧಿಕರಣಸ್ಸ ಏಕೋ ಉಕ್ಕೋಟೋ – ಇಮೇಸಂ ಚತುನ್ನಂ ಅಧಿಕರಣಾನಂ ಇಮೇ ದಸ ಉಕ್ಕೋಟಾ.

ವಿವಾದಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ? ಅನುವಾದಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ? ಆಪತ್ತಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ? ಕಿಚ್ಚಾಧಿಕರಣಂ ಉಕ್ಕೋಟೇನ್ತೋ ಕತಿ ಸಮಥೇ ಉಕ್ಕೋಟೇತಿ?

ವಿವಾದಾಧಿಕರಣಂ ಉಕ್ಕೋಟೇನ್ತೋ ದ್ವೇ ಸಮಥೇ ಉಕ್ಕೋಟೇತಿ. ಅನುವಾದಾಧಿಕರಣಂ ಉಕ್ಕೋಟೇನ್ತೋ ಚತ್ತಾರೋ ಸಮಥೇ ಉಕ್ಕೋಟೇತಿ. ಆಪತ್ತಾಧಿಕರಣಂ ಉಕ್ಕೋಟೇನ್ತೋ ತಯೋ ಸಮಥೇ ಉಕ್ಕೋಟೇತಿ. ಕಿಚ್ಚಾಧಿಕರಣಂ ಉಕ್ಕೋಟೇನ್ತೋ ಏಕಂ ಸಮಥಂ ಉಕ್ಕೋಟೇತಿ.

೩೪೧. ಕತಿ ಉಕ್ಕೋಟಾ? ಕತಿಹಾಕಾರೇಹಿ ಉಕ್ಕೋಟನಂ ಪಸವತಿ? ಕತಿಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ? ಕತಿ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ?

ದ್ವಾದಸ ಉಕ್ಕೋಟಾ. ದಸಹಾಕಾರೇಹಿ ಉಕ್ಕೋಟನಂ ಪಸವತಿ. ಚತೂಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ. ಚತ್ತಾರೋ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ?

ಕತಮೇ ದ್ವಾದಸ ಉಕ್ಕೋಟಾ? ಅಕತಂ ಕಮ್ಮಂ, ದುಕ್ಕಟಂ ಕಮ್ಮಂ, ಪುನ ಕಾತಬ್ಬಂ ಕಮ್ಮಂ, ಅನಿಹತಂ, ದುನ್ನಿಹತಂ, ಪುನ ನಿಹನಿತಬ್ಬಂ, ಅವಿನಿಚ್ಛಿತಂ, ದುವಿನಿಚ್ಛಿತಂ, ಪುನ ವಿನಿಚ್ಛಿತಬ್ಬಂ, ಅವೂಪಸನ್ತಂ, ದುವೂಪಸನ್ತಂ, ಪುನ ವೂಪಸಮೇತಬ್ಬನ್ತಿ – ಇಮೇ ದ್ವಾದಸ ಉಕ್ಕೋಟಾ.

ಕತಮೇಹಿ ದಸಹಾಕಾರೇಹಿ ಉಕ್ಕೋಟನಂ ಪಸವತಿ? ತತ್ಥ ಜಾತಕಂ ಅಧಿಕರಣಂ ಉಕ್ಕೋಟೇತಿ, ತತ್ಥ ಜಾತಕಂ ವೂಪಸನ್ತಂ ಅಧಿಕರಣಂ ಉಕ್ಕೋಟೇತಿ, ಅನ್ತರಾಮಗ್ಗೇ ಅಧಿಕರಣಂ ಉಕ್ಕೋಟೇತಿ, ಅನ್ತರಾಮಗ್ಗೇ ವೂಪಸನ್ತಂ ಅಧಿಕರಣಂ ಉಕ್ಕೋಟೇತಿ, ತತ್ಥ ಗತಂ ಅಧಿಕರಣಂ ಉಕ್ಕೋಟೇತಿ, ತತ್ಥ ಗತಂ ವೂಪಸನ್ತಂ ಅಧಿಕರಣಂ ಉಕ್ಕೋಟೇತಿ, ಸತಿವಿನಯಂ ಉಕ್ಕೋಟೇತಿ, ಅಮೂಳ್ಹವಿನಯಂ ಉಕ್ಕೋಟೇತಿ, ತಸ್ಸಪಾಪಿಯಸಿಕಂ ಉಕ್ಕೋಟೇತಿ, ತಿಣವತ್ಥಾರಕಂ ಉಕ್ಕೋಟೇತಿ – ಇಮೇಹಿ ದಸಹಾಕಾರೇಹಿ ಉಕ್ಕೋಟನಂ ಪಸವತಿ.

ಕತಮೇಹಿ ಚತೂಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ? ಛನ್ದಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ, ದೋಸಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ, ಮೋಹಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ, ಭಯಾಗತಿಂ ಗಚ್ಛನ್ತೋ ಅಧಿಕರಣಂ ಉಕ್ಕೋಟೇತಿ – ಇಮೇಹಿ ಚತೂಹಙ್ಗೇಹಿ ಸಮನ್ನಾಗತೋ ಪುಗ್ಗಲೋ ಅಧಿಕರಣಂ ಉಕ್ಕೋಟೇತಿ.

ಕತಮೇ ಚತ್ತಾರೋ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ? ತದಹುಪಸಮ್ಪನ್ನೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ, ಆಗನ್ತುಕೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ, ಕಾರಕೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ, ಛನ್ದದಾಯಕೋ ಉಕ್ಕೋಟೇತಿ ಉಕ್ಕೋಟನಕಂ ಪಾಚಿತ್ತಿಯಂ – ಇಮೇ ಚತ್ತಾರೋ ಪುಗ್ಗಲಾ ಅಧಿಕರಣಂ ಉಕ್ಕೋಟೇನ್ತಾ ಆಪತ್ತಿಂ ಆಪಜ್ಜನ್ತಿ.

೨. ಅಧಿಕರಣನಿದಾನಾದಿ

೩೪೨. ವಿವಾದಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಅನುವಾದಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಆಪತ್ತಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಕಿಚ್ಚಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ?

ವಿವಾದಾಧಿಕರಣಂ ವಿವಾದನಿದಾನಂ ವಿವಾದಸಮುದಯಂ ವಿವಾದಜಾತಿಕಂ ವಿವಾದಪಭವಂ ವಿವಾದಸಮ್ಭಾರಂ ವಿವಾದಸಮುಟ್ಠಾನಂ. ಅನುವಾದಾಧಿಕರಣಂ ಅನುವಾದನಿದಾನಂ ಅನುವಾದಸಮುದಯಂ ಅನುವಾದಜಾತಿಕಂ ಅನುವಾದಪಭವಂ ಅನುವಾದಸಮ್ಭಾರಂ ಅನುವಾದಸಮುಟ್ಠಾನಂ. ಆಪತ್ತಾಧಿಕರಣಂ ಆಪತ್ತಿನಿದಾನಂ ಆಪತ್ತಿಸಮುದಯಂ ಆಪತ್ತಿಜಾತಿಕಂ ಆಪತ್ತಿಪಭವಂ ಆಪತ್ತಿಸಮ್ಭಾರಂ ಆಪತ್ತಿಸಮುಟ್ಠಾನಂ. ಕಿಚ್ಚಾಧಿಕರಣಂ ಕಿಚ್ಚಯನಿದಾನಂ ಕಿಚ್ಚಯಸಮುದಯಂ ಕಿಚ್ಚಯಜಾತಿಕಂ ಕಿಚ್ಚಯಪಭವಂ ಕಿಚ್ಚಯಸಮ್ಭಾರಂ ಕಿಚ್ಚಯಸಮುಟ್ಠಾನಂ.

ವಿವಾದಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಅನುವಾದಾಧಿಕರಣಂ…ಪೇ… ಆಪತ್ತಾಧಿಕರಣಂ…ಪೇ… ಕಿಚ್ಚಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ?

ವಿವಾದಾಧಿಕರಣಂ ಹೇತುನಿದಾನಂ, ಹೇತುಸಮುದಯಂ, ಹೇತುಜಾತಿಕಂ, ಹೇತುಪಭವಂ, ಹೇತುಸಮ್ಭಾರಂ, ಹೇತುಸಮುಟ್ಠಾನಂ. ಅನುವಾದಾಧಿಕರಣಂ…ಪೇ… ಆಪತ್ತಾಧಿಕರಣಂ…ಪೇ… ಕಿಚ್ಚಾಧಿಕರಣಂ ಹೇತುನಿದಾನಂ, ಹೇತುಸಮುದಯಂ, ಹೇತುಜಾತಿಕಂ, ಹೇತುಪಭವಂ, ಹೇತುಸಮ್ಭಾರಂ, ಹೇತುಸಮುಟ್ಠಾನಂ.

ವಿವಾದಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಅನುವಾದಾಧಿಕರಣಂ …ಪೇ… ಆಪತ್ತಾಧಿಕರಣಂ…ಪೇ… ಕಿಚ್ಚಾಧಿಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ?

ವಿವಾದಾಧಿಕರಣಂ ಪಚ್ಚಯನಿದಾನಂ, ಪಚ್ಚಯಸಮುದಯಂ, ಪಚ್ಚಯಜಾತಿಕಂ, ಪಚ್ಚಯಪಭವಂ, ಪಚ್ಚಯಸಮ್ಭಾರಂ, ಪಚ್ಚಯಸಮುಟ್ಠಾನಂ. ಅನುವಾದಾಧಿಕರಣಂ…ಪೇ… ಆಪತ್ತಾಧಿಕರಣಂ…ಪೇ… ಕಿಚ್ಚಾಧಿಕರಣಂ ಪಚ್ಚಯನಿದಾನಂ, ಪಚ್ಚಯಸಮುದಯಂ, ಪಚ್ಚಯಜಾತಿಕಂ, ಪಚ್ಚಯಪಭವಂ, ಪಚ್ಚಯಸಮ್ಭಾರಂ, ಪಚ್ಚಯಸಮುಟ್ಠಾನಂ.

೩. ಅಧಿಕರಣಮೂಲಾದಿ

೩೪೩. ಚತುನ್ನಂ ಅಧಿಕರಣಾನಂ ಕತಿ ಮೂಲಾನಿ, ಕತಿ ಸಮುಟ್ಠಾನಾ? ಚತುನ್ನಂ ಅಧಿಕರಣಾನಂ ತೇತ್ತಿಂಸ ಮೂಲಾನಿ, ತೇತ್ತಿಂಸ ಸಮುಟ್ಠಾನಾ.

ಚತುನ್ನಂ ಅಧಿಕರಣಾನಂ ಕತಮಾನಿ ತೇತ್ತಿಂಸ ಮೂಲಾನಿ? ವಿವಾದಾಧಿಕರಣಸ್ಸ ದ್ವಾದಸ ಮೂಲಾನಿ, ಅನುವಾದಾಧಿಕರಣಸ್ಸ ಚುದ್ದಸ ಮೂಲಾನಿ, ಆಪತ್ತಾಧಿಕರಣಸ್ಸ ಛ ಮೂಲಾನಿ, ಕಿಚ್ಚಾಧಿಕರಣಸ್ಸ ಏಕಂ ಮೂಲಂ, ಸಙ್ಘೋ – ಚತುನ್ನಂ ಅಧಿಕರಣಾನಂ ಇಮಾನಿ ತೇತ್ತಿಂಸ ಮೂಲಾನಿ.

ಚತುನ್ನಂ ಅಧಿಕರಣಾನಂ ಕತಮೇ ತೇತ್ತಿಂಸ ಸಮುಟ್ಠಾನಾ? ವಿವಾದಾಧಿಕರಣಸ್ಸ ಅಟ್ಠಾರಸಭೇದಕರವತ್ಥೂನಿ ಸಮುಟ್ಠಾನಾ, ಅನುವಾದಾಧಿಕರಣಸ್ಸ ಚತಸ್ಸೋ ವಿಪತ್ತಿಯೋ ಸಮುಟ್ಠಾನಾ, ಆಪತ್ತಾಧಿಕರಣಸ್ಸ ಸತ್ತಾಪತ್ತಿಕ್ಖನ್ಧಾ ಸಮುಟ್ಠಾನಾ, ಕಿಚ್ಚಾಧಿಕರಣಸ್ಸ ಚತ್ತಾರಿ ಕಮ್ಮಾನಿ ಸಮುಟ್ಠಾನಾ – ಚತುನ್ನಂ ಅಧಿಕರಣಾನಂ ಇಮೇ ತೇತ್ತಿಂಸ ಸಮುಟ್ಠಾನಾ.

೪. ಅಧಿಕರಣಪಚ್ಚಯಾಪತ್ತಿ

೩೪೪. ವಿವಾದಾಧಿಕರಣಂ ಆಪತ್ತಾನಾಪತ್ತೀತಿ? ವಿವಾದಾಧಿಕರಣಂ ನ ಆಪತ್ತಿ. ಕಿಂ ಪನ ವಿವಾದಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯಾತಿ? ಆಮ, ವಿವಾದಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯ. ವಿವಾದಾಧಿಕರಣಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ವಿವಾದಾಧಿಕರಣಪಚ್ಚಯಾ ದ್ವೇ ಆಪತ್ತಿಯೋ ಆಪಜ್ಜತಿ. ಉಪಸಮ್ಪನ್ನಂ ಓಮಸತಿ, ಆಪತ್ತಿ ಪಾಚಿತ್ತಿಯಸ್ಸ; ಅನುಪಸಮ್ಪನ್ನಂ ಓಮಸತಿ, ಆಪತ್ತಿ ದುಕ್ಕಟಸ್ಸ – ವಿವಾದಾಧಿಕರಣಪಚ್ಚಯಾ ಇಮಾ ದ್ವೇ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ? ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ? ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಛನ್ನಂ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠನ್ತಿ? ಕತಿಹಿ ಅಧಿಕರಣೇಹಿ ಕತಿಸು ಠಾನೇಸು ಕತಿಹಿ ಸಮಥೇಹಿ ಸಮ್ಮನ್ತಿ?

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಏಕಂ ವಿಪತ್ತಿಂ ಭಜನ್ತಿ – ಆಚಾರವಿಪತ್ತಿಂ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ದ್ವೀಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ತೀಹಿ ಸಮುಟ್ಠಾನೇಹಿ ಸಮುಟ್ಠನ್ತಿ. ಏಕೇನ ಅಧಿಕರಣೇನ – ಕಿಚ್ಚಾಧಿಕರಣೇನ; ತೀಸು ಠಾನೇಸು – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ; ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೩೪೫. ಅನುವಾದಾಧಿಕರಣಂ ಆಪತ್ತಾನಾಪತ್ತೀತಿ? ಅನುವಾದಾಧಿಕರಣಂ ನ ಆಪತ್ತಿ. ಕಿಂ ಪನ ಅನುವಾದಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯಾತಿ? ಆಮ, ಅನುವಾದಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯ. ಅನುವಾದಾಧಿಕರಣಪಚ್ಚಯಾ, ಕತಿ ಆಪತ್ತಿಯೋ ಆಪಜ್ಜತಿ? ಅನುವಾದಾಧಿಕರಣಪಚ್ಚಯಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಭಿಕ್ಖುಂ ಅಮೂಲಕೇನ ಪಾರಾಜಿಕೇನ ಧಮ್ಮೇನ ಅನುದ್ಧಂಸೇತಿ, ಆಪತ್ತಿ ಸಙ್ಘಾದಿಸೇಸಸ್ಸ; ಅಮೂಲಕೇನ ಸಙ್ಘಾದಿಸೇಸೇನ ಅನುದ್ಧಂಸೇತಿ, ಆಪತ್ತಿ ಪಾಚಿತ್ತಿಯಸ್ಸ; ಅಮೂಲಿಕಾಯ ಆಚಾರವಿಪತ್ತಿಯಾ ಅನುದ್ಧಂಸೇತಿ, ಆಪತ್ತಿ ದುಕ್ಕಟಸ್ಸ – ಅನುವಾದಾಧಿಕರಣಪಚ್ಚಯಾ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ತೀಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ತೀಹಿ ಸಮುಟ್ಠಾನೇಹಿ ಸಮುಟ್ಠನ್ತಿ. ಯಾ ತಾ ಆಪತ್ತಿಯೋ ಗರುಕಾ ತಾ ಆಪತ್ತಿಯೋ ಏಕೇನ ಅಧಿಕರಣೇನ – ಕಿಚ್ಚಾಧಿಕರಣೇನ; ಏಕಮ್ಹಿ ಠಾನೇ – ಸಙ್ಘಮಜ್ಝೇ; ದ್ವೀಹಿ ಸಮಥೇಹಿ ಸಮ್ಮನ್ತಿ – ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ. ಯಾ ತಾ ಆಪತ್ತಿಯೋ ಲಹುಕಾ ತಾ ಆಪತ್ತಿಯೋ ಏಕೇನ ಅಧಿಕರಣೇನ – ಕಿಚ್ಚಾಧಿಕರಣೇನ; ತೀಸು ಠಾನೇಸು – ಸಙ್ಘಮಜ್ಝೇ ಗಣಮಜ್ಝೇ ಪುಗ್ಗಲಸ್ಸ ಸನ್ತಿಕೇ; ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೩೪೬. ಆಪತ್ತಾಧಿಕರಣಂ ಆಪತ್ತಾನಾಪತ್ತೀತಿ? ಆಪತ್ತಾಧಿಕರಣಂ ಆಪತ್ತಿ. ಕಿಂ ಪನ ಆಪತ್ತಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯಾತಿ? ಆಮ, ಆಪತ್ತಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯ. ಆಪತ್ತಾಧಿಕರಣಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ಆಪತ್ತಾಧಿಕರಣಪಚ್ಚಯಾ ಚತಸ್ಸೋ ಆಪತ್ತಿಯೋ ಆಪಜ್ಜತಿ. ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ [ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ (ಸ್ಯಾ.)] ಪಟಿಚ್ಛಾದೇತಿ, ಆಪತ್ತಿ ಪಾರಾಜಿಕಸ್ಸ; ವೇಮತಿಕಾ ಪಟಿಚ್ಛಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ; ಭಿಕ್ಖು ಸಙ್ಘಾದಿಸೇಸಂ ಪಟಿಚ್ಛಾದೇತಿ, ಆಪತ್ತಿ ಪಾಚಿತ್ತಿಯಸ್ಸ; ಆಚಾರವಿಪತ್ತಿಂ ಪಟಿಚ್ಛಾದೇತಿ, ಆಪತ್ತಿ ದುಕ್ಕಟಸ್ಸ – ಆಪತ್ತಾಧಿಕರಣಪಚ್ಚಯಾ ಇಮಾ ಚತಸ್ಸೋ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ ಸಿಯಾ ಆಚಾರವಿಪತ್ತಿಂ. ಚತುನ್ನಂ ಅಧಿಕರಣಾನಂ – ಆಪತ್ತಾಧಿಕರಣಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಚತೂಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ. ಯಾ ಸಾ ಆಪತ್ತಿ ಅನವಸೇಸಾ ಸಾ ಆಪತ್ತಿ ನ ಕತಮೇನ ಅಧಿಕರಣೇನ, ನ ಕತಮಮ್ಹಿ ಠಾನೇ, ನ ಕತಮೇನ ಸಮಥೇನ ಸಮ್ಮತಿ. ಯಾ ತಾ ಆಪತ್ತಿಯೋ ಲಹುಕಾ ತಾ ಆಪತ್ತಿಯೋ ಏಕೇನ ಅಧಿಕರಣೇನ – ಕಿಚ್ಚಾಧಿಕರಣೇನ; ತೀಸು ಠಾನೇಸು – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ; ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೩೪೭. ಕಿಚ್ಚಾಧಿಕರಣಂ ಆಪತ್ತಾನಾಪತ್ತೀತಿ? ಕಿಚ್ಚಾಧಿಕರಣಂ ನ ಆಪತ್ತಿ. ಕಿಂ ಪನ ಕಿಚ್ಚಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯಾತಿ? ಆಮ, ಕಿಚ್ಚಾಧಿಕರಣಪಚ್ಚಯಾ ಆಪತ್ತಿಂ ಆಪಜ್ಜೇಯ್ಯ. ಕಿಚ್ಚಾಧಿಕರಣಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ಕಿಚ್ಚಾಧಿಕರಣಪಚ್ಚಯಾ ಪಞ್ಚ ಆಪತ್ತಿಯೋ ಆಪಜ್ಜತಿ. ಉಕ್ಖಿತ್ತಾನುವತ್ತಿಕಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜತಿ, ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಪಾರಾಜಿಕಸ್ಸ; ಭೇದಕಾನುವತ್ತಕಾ ಭಿಕ್ಖೂ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತಿ, ಆಪತ್ತಿ ಸಙ್ಘಾದಿಸೇಸಸ್ಸ; ಪಾಪಿಕಾಯ ದಿಟ್ಠಿಯಾ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತಿ, ಆಪತ್ತಿ ಪಾಚಿತ್ತಿಯಸ್ಸ – ಕಿಚ್ಚಾಧಿಕರಣಪಚ್ಚಯಾ ಇಮಾ ಪಞ್ಚ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ ಸಿಯಾ ಆಚಾರವಿಪತ್ತಿಂ. ಚತುನ್ನಂ ಅಧಿಕರಣಾನಂ – ಆಪತ್ತಾಧಿಕರಣಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಪಞ್ಚಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ. ಯಾ ಸಾ ಆಪತ್ತಿ ಅನವಸೇಸಾ ಸಾ ಆಪತ್ತಿ ನ ಕತಮೇನ ಅಧಿಕರಣೇನ, ನ ಕತಮಮ್ಹಿ ಠಾನೇ, ನ ಕತಮೇನ ಸಮಥೇನ ಸಮ್ಮತಿ. ಯಾ ಸಾ ಆಪತ್ತಿ ಗರುಕಾ ಸಾ ಆಪತ್ತಿ ಏಕೇನ ಅಧಿಕರಣೇನ – ಕಿಚ್ಚಾಧಿಕರಣೇನ; ಏಕಮ್ಹಿ ಠಾನೇ – ಸಙ್ಘಮಜ್ಝೇ; ದ್ವೀಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ. ಯಾ ತಾ ಆಪತ್ತಿಯೋ ಲಹುಕಾ ತಾ ಆಪತ್ತಿಯೋ ಏಕೇನ ಅಧಿಕರಣೇನ – ಕಿಚ್ಚಾಧಿಕರಣೇನ; ತೀಸು ಠಾನೇಸು – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ; ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೫. ಅಧಿಕರಣಾಧಿಪ್ಪಾಯೋ

೩೪೮. ವಿವಾದಾಧಿಕರಣಂ ಹೋತಿ ಅನುವಾದಾಧಿಕರಣಂ, ಹೋತಿ ಆಪತ್ತಾಧಿಕರಣಂ, ಹೋತಿ ಕಿಚ್ಚಾಧಿಕರಣಂ. ವಿವಾದಾಧಿಕರಣಂ ನ ಹೋತಿ ಅನುವಾದಾಧಿಕರಣಂ, ನ ಹೋತಿ ಆಪತ್ತಾಧಿಕರಣಂ, ನ ಹೋತಿ ಕಿಚ್ಚಾಧಿಕರಣಂ; ಅಪಿ ಚ, ವಿವಾದಾಧಿಕರಣಪಚ್ಚಯಾ ಹೋತಿ ಅನುವಾದಾಧಿಕರಣಂ, ಹೋತಿ ಆಪತ್ತಾಧಿಕರಣಂ, ಹೋತಿ ಕಿಚ್ಚಾಧಿಕರಣಂ. ಯಥಾ ಕಥಂ ವಿಯ? [ಚೂಳವ. ೨೧೫; ಪರಿ. ೩೧೪] ಇಧ ಭಿಕ್ಖೂ ವಿವದನ್ತಿ – ಧಮ್ಮೋತಿ ವಾ ಅಧಮ್ಮೋತಿ ವಾ ದುಟ್ಠುಲ್ಲಾಪತ್ತೀತಿ ವಾ ಅದುಟ್ಠುಲ್ಲಾಪತ್ತೀತಿ ವಾ. ಯಂ ತತ್ಥ ಭಣ್ಡನಂ ಕಲಹೋ ವಿಗ್ಗಹೋ ವಿವಾದೋ ನಾನಾವಾದೋ ಅಞ್ಞಥಾವಾದೋ ವಿಪಚ್ಚತಾಯ ವೋಹಾರೋ ಮೇಧಕಂ, ಇದಂ ವುಚ್ಚತಿ ವಿವಾದಾಧಿಕರಣಂ. ವಿವಾದಾಧಿಕರಣೇ ಸಙ್ಘೋ ವಿವದತಿ ವಿವಾದಾಧಿಕರಣಂ. ವಿವದಮಾನೋ ಅನುವದತಿ ಅನುವಾದಾಧಿಕರಣಂ. ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ವಿವಾದಾಧಿಕರಣಪಚ್ಚಯಾ ಹೋತಿ ಅನುವಾದಾಧಿಕರಣಂ, ಹೋತಿ ಆಪತ್ತಾಧಿಕರಣಂ, ಹೋತಿ ಕಿಚ್ಚಾಧಿಕರಣಂ.

ಅನುವಾದಾಧಿಕರಣಂ ಹೋತಿ ಆಪತ್ತಾಧಿಕರಣಂ, ಹೋತಿ ಕಿಚ್ಚಾಧಿಕರಣಂ, ಹೋತಿ ವಿವಾದಾಧಿಕರಣಂ. ಅನುವಾದಾಧಿಕರಣಂ ನ ಹೋತಿ ಆಪತ್ತಾಧಿಕರಣಂ, ನ ಹೋತಿ ಕಿಚ್ಚಾಧಿಕರಣಂ, ನ ಹೋತಿ ವಿವಾದಾಧಿಕರಣಂ; ಅಪಿ ಚ, ಅನುವಾದಾಧಿಕರಣಪಚ್ಚಯಾ ಹೋತಿ ಆಪತ್ತಾಧಿಕರಣಂ, ಹೋತಿ ಕಿಚ್ಚಾಧಿಕರಣಂ, ಹೋತಿ ವಿವಾದಾಧಿಕರಣಂ. ಯಥಾ ಕಥಂ ವಿಯ? ಇಧ ಭಿಕ್ಖೂ ಭಿಕ್ಖುಂ ಅನುವದನ್ತಿ ಸೀಲವಿಪತ್ತಿಯಾ ವಾ ಆಚಾರವಿಪತ್ತಿಯಾ ವಾ ದಿಟ್ಠಿವಿಪತ್ತಿಯಾ ವಾ ಆಜೀವವಿಪತ್ತಿಯಾ ವಾ. ಯೋ ತತ್ಥ ಅನುವಾದೋ ಅನುವದನಾ ಅನುಲ್ಲಪನಾ ಅನುಭಣನಾ ಅನುಸಮ್ಪವಙ್ಕತಾ ಅಬ್ಭುಸ್ಸಹನತಾ ಅನುಬಲಪ್ಪದಾನಂ, ಇದಂ ವುಚ್ಚತಿ ಅನುವಾದಾಧಿಕರಣಂ. ಅನುವಾದಾಧಿಕರಣೇ ಸಙ್ಘೋ ವಿವದತಿ, ವಿವಾದಾಧಿಕರಣಂ. ವಿವದಮಾನೋ ಅನುವದತಿ, ಅನುವಾದಾಧಿಕರಣಂ. ಅನುವದಮಾನೋ ಆಪತ್ತಿಂ ಆಪಜ್ಜತಿ, ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ, ಕಿಚ್ಚಾಧಿಕರಣಂ. ಏವಂ ಅನುವಾದಾಧಿಕರಣಪಚ್ಚಯಾ ಹೋತಿ ಆಪತ್ತಾಧಿಕರಣಂ, ಹೋತಿ ಕಿಚ್ಚಾಧಿಕರಣಂ, ಹೋತಿ ವಿವಾದಾಧಿಕರಣಂ.

ಆಪತ್ತಾಧಿಕರಣಂ ಹೋತಿ ಕಿಚ್ಚಾಧಿಕರಣಂ, ಹೋತಿ ವಿವಾದಾಧಿಕರಣಂ, ಹೋತಿ ಅನುವಾದಾಧಿಕರಣಂ. ಆಪತ್ತಾಧಿಕರಣಂ ನ ಹೋತಿ ಕಿಚ್ಚಾಧಿಕರಣಂ, ನ ಹೋತಿ ವಿವಾದಾಧಿಕರಣಂ, ನ ಹೋತಿ ಅನುವಾದಾಧಿಕರಣಂ; ಅಪಿ ಚ, ಆಪತ್ತಾಧಿಕರಣಪಚ್ಚಯಾ ಹೋತಿ ಕಿಚ್ಚಾಧಿಕರಣಂ, ಹೋತಿ ವಿವಾದಾಧಿಕರಣಂ, ಹೋತಿ ಅನುವಾದಾಧಿಕರಣಂ. ಯಥಾ ಕಥಂ ವಿಯ? [ಚೂಳವ. ೨೧೫; ಪರಿ. ೩೪೮] ಪಞ್ಚಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ, ಸತ್ತಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ, ಇದಂ ವುಚ್ಚತಿ ಆಪತ್ತಾಧಿಕರಣಂ. ಆಪತ್ತಾಧಿಕರಣೇ ಸಙ್ಘೋ ವಿವದತಿ ವಿವಾದಾಧಿಕರಣಂ. ವಿವದಮಾನೋ ಅನುವದತಿ ಅನುವಾದಾಧಿಕರಣಂ. ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ಆಪತ್ತಾಧಿಕರಣಪಚ್ಚಯಾ ಹೋತಿ ಕಿಚ್ಚಾಧಿಕರಣಂ, ಹೋತಿ ವಿವಾದಾಧಿಕರಣಂ, ಹೋತಿ ಅನುವಾದಾಧಿಕರಣಂ.

ಕಿಚ್ಚಾಧಿಕರಣಂ ಹೋತಿ ವಿವಾದಾಧಿಕರಣಂ, ಹೋತಿ ಅನುವಾದಾಧಿಕರಣಂ, ಹೋತಿ ಆಪತ್ತಾಧಿಕರಣಂ. ಕಿಚ್ಚಾಧಿಕರಣಂ ನ ಹೋತಿ ವಿವಾದಾಧಿಕರಣಂ, ನ ಹೋತಿ ಅನುವಾದಾಧಿಕರಣಂ, ನ ಹೋತಿ ಆಪತ್ತಾಧಿಕರಣಂ; ಅಪಿ ಚ, ಕಿಚ್ಚಾಧಿಕರಣಪಚ್ಚಯಾ ಹೋತಿ ವಿವಾದಾಧಿಕರಣಂ, ಹೋತಿ ಅನುವಾದಾಧಿಕರಣಂ, ಹೋತಿ ಆಪತ್ತಾಧಿಕರಣಂ. ಯಥಾ ಕಥಂ ವಿಯ? ಯಾ ಸಙ್ಘಸ್ಸ ಕಿಚ್ಚಯತಾ ಕರಣೀಯತಾ ಅಪಲೋಕನಕಮ್ಮಂ ಞತ್ತಿಕಮ್ಮಂ ಞತ್ತಿದುತಿಯಕಮ್ಮಂ ಞತ್ತಿಚತುತ್ಥಕಮ್ಮಂ, ಇದಂ ವುಚ್ಚತಿ ಕಿಚ್ಚಾಧಿಕರಣಂ. ಕಿಚ್ಚಾಧಿಕರಣೇ ಸಙ್ಘೋ ವಿವದತಿ ವಿವಾದಾಧಿಕರಣಂ. ವಿವದಮಾನೋ ಅನುವದತಿ ಅನುವಾದಾಧಿಕರಣಂ. ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ಕಿಚ್ಚಾಧಿಕರಣಪಚ್ಚಯಾ ಹೋತಿ ವಿವಾದಾಧಿಕರಣಂ, ಹೋತಿ ಅನುವಾದಾಧಿಕರಣಂ, ಹೋತಿ ಆಪತ್ತಾಧಿಕರಣಂ.

೬. ಪುಚ್ಛಾವಾರೋ

೩೪೯. ಯತ್ಥ ಸತಿವಿನಯೋ ತತ್ಥ ಸಮ್ಮುಖಾವಿನಯೋ? ಯತ್ಥ ಸಮ್ಮುಖಾವಿನಯೋ ತತ್ಥ ಸತಿವಿನಯೋ? ಯತ್ಥ ಅಮೂಳ್ಹವಿನಯೋ ತತ್ಥ ಸಮ್ಮುಖಾವಿನಯೋ? ಯತ್ಥ ಸಮ್ಮುಖಾವಿನಯೋ ತತ್ಥ ಅಮೂಳ್ಹವಿನಯೋ? ಯತ್ಥ ಪಟಿಞ್ಞಾತಕರಣಂ ತತ್ಥ ಸಮ್ಮುಖಾವಿನಯೋ? ಯತ್ಥ ಸಮ್ಮುಖಾವಿನಯೋ ತತ್ಥ ಪಟಿಞ್ಞಾತಕರಣಂ? ಯತ್ಥ ಯೇಭುಯ್ಯಸಿಕಾ ತತ್ಥ ಸಮ್ಮುಖಾವಿನಯೋ? ಯತ್ಥ ಸಮ್ಮುಖಾವಿನಯೋ ತತ್ಥ ಯೇಭುಯ್ಯಸಿಕಾ? ಯತ್ಥ ತಸ್ಸಪಾಪಿಯಸಿಕಾ ತತ್ಥ ಸಮ್ಮುಖಾವಿನಯೋ? ಯತ್ಥ ಸಮ್ಮುಖಾವಿನಯೋ ತತ್ಥ ತಸ್ಸಪಾಪಿಯಸಿಕಾ? ಯತ್ಥ ತಿಣವತ್ಥಾರಕೋ ತತ್ಥ ಸಮ್ಮುಖಾವಿನಯೋ? ಯತ್ಥ ಸಮ್ಮುಖಾವಿನಯೋ ತತ್ಥ ತಿಣವತ್ಥಾರಕೋ?

೭. ವಿಸ್ಸಜ್ಜನಾವಾರೋ

೩೫೦. ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಧಿಕರಣಂ ವೂಪಸಮ್ಮತಿ – ಯತ್ಥ ಸತಿವಿನಯೋ ತತ್ಥ ಸಮ್ಮುಖಾವಿನಯೋ, ಯತ್ಥ ಸಮ್ಮುಖಾವಿನಯೋ ತತ್ಥ ಸತಿವಿನಯೋ, ನ ತತ್ಥ ಅಮೂಳ್ಹವಿನಯೋ, ನ ತತ್ಥ ಪಟಿಞ್ಞಾತಕರಣಂ, ನ ತತ್ಥ ಯೇಭುಯ್ಯಸಿಕಾ, ನ ತತ್ಥ ತಸ್ಸಪಾಪಿಯಸಿಕಾ, ನ ತತ್ಥ ತಿಣವತ್ಥಾರಕೋ. ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ಅಮೂಳ್ಹವಿನಯೇನ ಚ…ಪೇ… ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ…ಪೇ… ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ…ಪೇ… ಸಮ್ಮುಖಾವಿನಯೇನ ಚ ತಸ್ಸಪಾಪಿಯಸಿಕಾಯ ಚ…ಪೇ… ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ ಅಧಿಕರಣಂ ವೂಪಸಮ್ಮತಿ – ಯತ್ಥ ತಿಣವತ್ಥಾರಕೋ ತತ್ಥ ಸಮ್ಮುಖಾವಿನಯೋ, ಯತ್ಥ ಸಮ್ಮುಖಾವಿನಯೋ ತತ್ಥ ತಿಣವತ್ಥಾರಕೋ, ನ ತತ್ಥ ಸತಿವಿನಯೋ, ನ ತತ್ಥ ಅಮೂಳ್ಹವಿನಯೋ, ನ ತತ್ಥ ಪಟಿಞ್ಞಾತಕರಣಂ, ನ ತತ್ಥ ಯೇಭುಯ್ಯಸಿಕಾ, ನ ತತ್ಥ ತಸ್ಸಪಾಪಿಯಸಿಕಾ.

೮. ಸಂಸಟ್ಠವಾರೋ

೩೫೧. ಸಮ್ಮುಖಾವಿನಯೋತಿ ವಾ ಸತಿವಿನಯೋತಿ ವಾ – ಇಮೇ ಧಮ್ಮಾ ಸಂಸಟ್ಠಾ ಉದಾಹು ವಿಸಂಸಟ್ಠಾ? ಲಬ್ಭಾ ಚ ಪನಿಮೇಸಂ ಧಮ್ಮಾನಂ ವಿನಿಬ್ಭುಜಿತ್ವಾ ವಿನಿಬ್ಭುಜಿತ್ವಾ ನಾನಾಕರಣಂ ಪಞ್ಞಾಪೇತುಂ? ಸಮ್ಮುಖಾವಿನಯೋತಿ ವಾ ಅಮೂಳ್ಹವಿನಯೋತಿ ವಾ…ಪೇ… ಸಮ್ಮುಖಾವಿನಯೋತಿ ವಾ ಪಟಿಞ್ಞಾತಕರಣನ್ತಿ ವಾ… ಸಮ್ಮುಖಾವಿನಯೋತಿ ವಾ ಯೇಭುಯ್ಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಸ್ಸಪಾಪಿಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಿಣವತ್ಥಾರಕೋತಿ – ಇಮೇ ಧಮ್ಮಾ ಸಂಸಟ್ಠಾ ಉದಾಹು ವಿಸಂಸಟ್ಠಾ? ಲಬ್ಭಾ ಚ ಪನಿಮೇಸಂ ಧಮ್ಮಾನಂ ವಿನಿಬ್ಭುಜಿತ್ವಾ ವಿನಿಬ್ಭುಜಿತ್ವಾ ನಾನಾಕರಣಂ ಪಞ್ಞಾಪೇತುಂ?

ಸಮ್ಮುಖಾವಿನಯೋತಿ ವಾ ಸತಿವಿನಯೋತಿ ವಾ – ಇಮೇ ಧಮ್ಮಾ ಸಂಸಟ್ಠಾ, ನೋ ವಿಸಂಸಟ್ಠಾ; ನ ಚ ಲಬ್ಭಾ ಇಮೇಸಂ ಧಮ್ಮಾನಂ ವಿನಿಬ್ಭುಜಿತ್ವಾ ವಿನಿಬ್ಭುಜಿತ್ವಾ ನಾನಾಕರಣಂ ಪಞ್ಞಾಪೇತುಂ. ಸಮ್ಮುಖಾವಿನಯೋತಿ ವಾ ಅಮೂಳ್ಹವಿನಯೋತಿ ವಾ…ಪೇ… ಸಮ್ಮುಖಾವಿನಯೋತಿ ವಾ ಪಟಿಞ್ಞಾತಕರಣನ್ತಿ ವಾ… ಸಮ್ಮುಖಾವಿನಯೋತಿ ವಾ ಯೇಭುಯ್ಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಸ್ಸಪಾಪಿಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಿಣವತ್ಥಾರಕೋತಿ ವಾ – ಇಮೇ ಧಮ್ಮಾ ಸಂಸಟ್ಠಾ, ನೋ ವಿಸಂಸಟ್ಠಾ; ನ ಚ ಲಬ್ಭಾ ಇಮೇಸಂ ಧಮ್ಮಾನಂ ವಿನಿಬ್ಭುಜಿತ್ವಾ ವಿನಿಬ್ಭುಜಿತ್ವಾ ನಾನಾಕರಣಂ ಪಞ್ಞಾಪೇತುಂ.

೯. ಸತ್ತಸಮಥನಿದಾನಂ

೩೫೨. ಸಮ್ಮುಖಾವಿನಯೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ ಕಿಂಸಮುಟ್ಠಾನೋ? ಸತಿವಿನಯೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಅಮೂಳ್ಹವಿನಯೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಪಟಿಞ್ಞಾತಕರಣಂ ಕಿಂನಿದಾನಂ, ಕಿಂಸಮುದಯಂ, ಕಿಂಜಾತಿಕಂ, ಕಿಂಪಭವಂ, ಕಿಂಸಮ್ಭಾರಂ, ಕಿಂಸಮುಟ್ಠಾನಂ? ಯೇಭುಯ್ಯಸಿಕಾ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾ, ಕಿಂಸಮ್ಭಾರಾ, ಕಿಂಸಮುಟ್ಠಾನಾ? ತಸ್ಸಪಾಪಿಯಸಿಕಾ ಕಿಂನಿದಾನಾ, ಕಿಂಸಮುದಯಾ, ಕಿಂಜಾತಿಕಾ, ಕಿಂಪಭವಾ, ಕಿಂಸಮ್ಭಾರಾ, ಕಿಂಸಮುಟ್ಠಾನಾ ತಿಣವತ್ಥಾರಕೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ?

ಸಮ್ಮುಖಾವಿನಯೋ ನಿದಾನನಿದಾನೋ, ನಿದಾನಸಮುದಯೋ, ನಿದಾನಜಾತಿಕೋ, ನಿದಾನಪಭವೋ, ನಿದಾನಸಮ್ಭಾರೋ, ನಿದಾನಸಮುಟ್ಠಾನೋ. ಸತಿವಿನಯೋ…ಪೇ… ಅಮೂಳ್ಹವಿನಯೋ…ಪೇ… ಪಟಿಞ್ಞಾತಕರಣಂ ನಿದಾನನಿದಾನಂ, ನಿದಾನಸಮುದಯಂ, ನಿದಾನಜಾತಿಕಂ, ನಿದಾನಪಭವಂ, ನಿದಾನಸಮ್ಭಾರಂ, ನಿದಾನಸಮುಟ್ಠಾನಂ. ಯೇಭುಯ್ಯಸಿಕಾ…ಪೇ… ತಸ್ಸಪಾಪಿಯಸಿಕಾ ನಿದಾನನಿದಾನಾ, ನಿದಾನಸಮುದಯಾ, ನಿದಾನಜಾತಿಕಾ, ನಿದಾನಪಭವಾ, ನಿದಾನಸಮ್ಭಾರಾ, ನಿದಾನಸಮುಟ್ಠಾನಾ. ತಿಣವತ್ಥಾರಕೋ ನಿದಾನನಿದಾನೋ, ನಿದಾನಸಮುದಯೋ, ನಿದಾನಜಾತಿಕೋ, ನಿದಾನಪಭವೋ, ನಿದಾನಸಮ್ಭಾರೋ, ನಿದಾನಸಮುಟ್ಠಾನೋ.

ಸಮ್ಮುಖಾವಿನಯೋ ಹೇತುನಿದಾನೋ, ಹೇತುಸಮುದಯೋ, ಹೇತುಜಾತಿಕೋ, ಹೇತುಪಭವೋ, ಹೇತುಸಮ್ಭಾರೋ, ಹೇತುಸಮುಟ್ಠಾನೋ. ಸತಿವಿನಯೋ…ಪೇ… ಅಮೂಳ್ಹವಿನಯೋ…ಪೇ… ಪಟಿಞ್ಞಾತಕರಣಂ ಹೇತುನಿದಾನಂ, ಹೇತುಸಮುದಯಂ, ಹೇತುಜಾತಿಕಂ, ಹೇತುಪಭವಂ, ಹೇತುಸಮ್ಭಾರಂ, ಹೇತುಸಮುಟ್ಠಾನಂ. ಯೇಭುಯ್ಯಸಿಕಾ…ಪೇ… ತಸ್ಸಪಾಪಿಯಸಿಕಾ ಹೇತುನಿದಾನಾ, ಹೇತುಸಮುದಯಾ, ಹೇತುಜಾತಿಕಾ, ಹೇತುಪಭವಾ, ಹೇತುಸಮ್ಭಾರಾ, ಹೇತುಸಮುಟ್ಠಾನಾ. ತಿಣವತ್ಥಾರಕೋ ಹೇತುನಿದಾನೋ, ಹೇತುಸಮುದಯೋ, ಹೇತುಜಾತಿಕೋ, ಹೇತುಪಭವೋ, ಹೇತುಸಮ್ಭಾರೋ, ಹೇತುಸಮುಟ್ಠಾನೋ.

ಸಮ್ಮುಖಾವಿನಯೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಸತಿವಿನಯೋ…ಪೇ… ಅಮೂಳ್ಹವಿನಯೋ…ಪೇ… ಪಟಿಞ್ಞಾತಕರಣಂ…ಪೇ… ಯೇಭುಯ್ಯಸಿಕಾ…ಪೇ… ತಸ್ಸಪಾಪಿಯಸಿಕಾ…ಪೇ… ತಿಣವತ್ಥಾರಕೋ ಕಿಂನಿದಾನೋ, ಕಿಂಸಮುದಯೋ, ಕಿಂಜಾತಿಕೋ, ಕಿಂಪಭವೋ, ಕಿಂಸಮ್ಭಾರೋ, ಕಿಂಸಮುಟ್ಠಾನೋ? ಸಮ್ಮುಖಾವಿನಯೋ ಪಚ್ಚಯನಿದಾನೋ, ಪಚ್ಚಯಸಮುದಯೋ, ಪಚ್ಚಯಜಾತಿಕೋ, ಪಚ್ಚಯಪಭವೋ, ಪಚ್ಚಯಸಮ್ಭಾರೋ, ಪಚ್ಚಯಸಮುಟ್ಠಾನೋ. ಸತಿವಿನಯೋ…ಪೇ… ಅಮೂಳ್ಹವಿನಯೋ…ಪೇ… ಪಟಿಞ್ಞಾತಕರಣಂ ಪಚ್ಚಯನಿದಾನಂ, ಪಚ್ಚಯಸಮುದಯಂ, ಪಚ್ಚಯಜಾತಿಕಂ, ಪಚ್ಚಯಪಭವಂ, ಪಚ್ಚಯಸಮ್ಭಾರಂ, ಪಚ್ಚಯಸಮುಟ್ಠಾನಂ. ಯೇಭುಯ್ಯಸಿಕಾ…ಪೇ… ತಸ್ಸಪಾಪಿಯಸಿಕಾ ಪಚ್ಚಯನಿದಾನಾ, ಪಚ್ಚಯಸಮುದಯಾ, ಪಚ್ಚಯಜಾತಿಕಾ, ಪಚ್ಚಯಪಭವಾ, ಪಚ್ಚಯಸಮ್ಭಾರಾ, ಪಚ್ಚಯಸಮುಟ್ಠಾನಾ. ತಿಣವತ್ಥಾರಕೋ ಪಚ್ಚಯನಿದಾನೋ, ಪಚ್ಚಯಸಮುದಯೋ, ಪಚ್ಚಯಜಾತಿಕೋ, ಪಚ್ಚಯಪಭವೋ, ಪಚ್ಚಯಸಮ್ಭಾರೋ, ಪಚ್ಚಯಸಮುಟ್ಠಾನೋ.

೩೫೩. ಸತ್ತನ್ನಂ ಸಮಥಾನಂ ಕತಿ ಮೂಲಾನಿ, ಕತಿ ಸಮುಟ್ಠಾನಾ? ಸತ್ತನ್ನಂ ಸಮಥಾನಂ ಛಬ್ಬೀಸ ಮೂಲಾನಿ, ಛತ್ತಿಂಸ ಸಮುಟ್ಠಾನಾ. ಸತ್ತನ್ನಂ ಸಮಥಾನಂ ಕತಮಾನಿ ಛಬ್ಬೀ ಮೂಲಾನಿ? ಸಮ್ಮುಖಾವಿನಯಸ್ಸ ಚತ್ತಾರಿ ಮೂಲಾನಿ. ಸಙ್ಘಸಮ್ಮುಖತಾ, ಧಮ್ಮಸಮ್ಮುಖತಾ, ವಿನಯಸಮ್ಮುಖತಾ, ಪುಗ್ಗಲಸಮ್ಮುಖತಾ; ಸತಿವಿನಯಸ್ಸ ಚತ್ತಾರಿ ಮೂಲಾನಿ; ಅಮೂಳ್ಹವಿನಯಸ್ಸ ಚತ್ತಾರಿ ಮೂಲಾನಿ; ಪಟಿಞ್ಞಾತಕರಣಸ್ಸ ದ್ವೇ ಮೂಲಾನಿ – ಯೋ ಚ ದೇಸೇತಿ ಯಸ್ಸ ಚ ದೇಸೇತಿ; ಯೇಭುಯ್ಯಸಿಕಾಯ ಚತ್ತಾರಿ ಮೂಲಾನಿ; ತಸ್ಸಪಾಪಿಯಸಿಕಾಯ ಚತ್ತಾರಿ ಮೂಲಾನಿ; ತಿಣವತ್ಥಾರಕಸ್ಸ ಚತ್ತಾರಿ ಮೂಲಾನಿ – ಸಙ್ಘಸಮ್ಮುಖತಾ, ಧಮ್ಮಸಮ್ಮುಖತಾ, ವಿನಯಸಮ್ಮುಖತಾ, ಪುಗ್ಗಲಸಮ್ಮುಖತಾ – ಸತ್ತನ್ನಂ ಸಮಥಾನಂ ಇಮಾನಿ ಛಬ್ಬೀಸ ಮೂಲಾನಿ.

ಸತ್ತನ್ನಂ ಸಮಥಾನಂ ಕತಮೇ ಛತ್ತಿಂಸ ಸಮುಟ್ಠಾನಾ? ಸತಿವಿನಯಸ್ಸ ಕಮ್ಮಸ್ಸ ಕಿರಿಯಾ, ಕರಣಂ, ಉಪಗಮನಂ, ಅಜ್ಝುಪಗಮನಂ, ಅಧಿವಾಸನಾ, ಅಪ್ಪಟಿಕ್ಕೋಸನಾ. ಅಮೂಳ್ಹವಿನಯಸ್ಸ ಕಮ್ಮಸ್ಸ…ಪೇ… ಪಟಿಞ್ಞಾತಕರಣಸ್ಸ ಕಮ್ಮಸ್ಸ… ಯೇಭುಯ್ಯಸಿಕಾಯ ಕಮ್ಮಸ್ಸ… ತಸ್ಸಪಾಪಿಯಸಿಕಾಯ ಕಮ್ಮಸ್ಸ… ತಿಣವತ್ಥಾರಕಸ್ಸ ಕಮ್ಮಸ್ಸ ಕಿರಿಯಾ, ಕರಣಂ, ಉಪಗಮನಂ, ಅಜ್ಝುಪಗಮನಂ, ಅಧಿವಾಸನಾ, ಅಪ್ಪಟಿಕ್ಕೋಸನಾ – ಸತ್ತನ್ನಂ ಸಮಥಾನಂ ಇಮೇ ಛತ್ತಿಂಸ ಸಮುಟ್ಠಾನಾ.

೧೦. ಸತ್ತಸಮಥನಾನತ್ಥಾದಿ

೩೫೪. ಸಮ್ಮುಖಾವಿನಯೋತಿ ವಾ ಸತಿವಿನಯೋತಿ ವಾ – ಇಮೇ ಧಮ್ಮಾ ನಾನತ್ಥಾ ನಾನಾಬ್ಯಞ್ಜನಾ ಉದಾಹು ಏಕತ್ಥಾ ಬ್ಯಞ್ಜನಮೇವ ನಾನಂ? ಸಮ್ಮುಖಾವಿನಯೋತಿ ವಾ ಅಮೂಳ್ಹವಿನಯೋತಿ ವಾ…ಪೇ… ಸಮ್ಮುಖಾವಿನಯೋತಿ ವಾ ಪಟಿಞ್ಞಾತಕರಣನ್ತಿ ವಾ… ಸಮ್ಮುಖಾವಿನಯೋತಿ ವಾ ಯೇಭುಯ್ಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಸ್ಸಪಾಪಿಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಿಣವತ್ಥಾರಕೋತಿ ವಾ – ಇಮೇ ಧಮ್ಮಾ ನಾನತ್ಥಾ ನಾನಾಬ್ಯಞ್ಜನಾ ಉದಾಹು ಏಕತ್ಥಾ ಬ್ಯಞ್ಜನಮೇವ ನಾನಂ? ಸಮ್ಮುಖಾವಿನಯೋತಿ ವಾ ಸತಿವಿನಯೋತಿ ವಾ – ಇಮೇ ಧಮ್ಮಾ ನಾನತ್ಥಾ ಚೇವ ನಾನಾಬ್ಯಞ್ಜನಾ ಚ. ಸಮ್ಮುಖಾವಿನಯೋತಿ ವಾ ಅಮೂಳ್ಹವಿನಯೋತಿ ವಾ…ಪೇ… ಸಮ್ಮುಖಾವಿನಯೋತಿ ವಾ ಪಟಿಞ್ಞಾತಕರಣನ್ತಿ ವಾ… ಸಮ್ಮುಖಾವಿನಯೋತಿ ವಾ ಯೇಭುಯ್ಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಸ್ಸಪಾಪಿಯಸಿಕಾತಿ ವಾ… ಸಮ್ಮುಖಾವಿನಯೋತಿ ವಾ ತಿಣವತ್ಥಾರಕೋತಿ ವಾ – ಇಮೇ ಧಮ್ಮಾ ನಾನತ್ಥಾ ಚೇವ ನಾನಾ ಬ್ಯಞ್ಜನಾ ಚ.

೩೫೫. [ಚೂಳವ. ೨೨೪] ವಿವಾದೋ ವಿವಾದಾಧಿಕರಣಂ, ವಿವಾದೋ ನೋ ಅಧಿಕರಣಂ, ಅಧಿಕರಣಂ ನೋ ವಿವಾದೋ, ಅಧಿಕರಣಞ್ಚೇವ ವಿವಾದೋ ಚ? ಸಿಯಾ ವಿವಾದೋ ವಿವಾದಾಧಿಕರಣಂ, ಸಿಯಾ ವಿವಾದೋ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ವಿವಾದೋ, ಸಿಯಾ ಅಧಿಕರಣಞ್ಚೇವ ವಿವಾದೋ ಚ.

ತತ್ಥ ಕತಮೋ ವಿವಾದೋ ವಿವಾದಾಧಿಕರಣಂ? ಇಧ ಭಿಕ್ಖೂ ವಿವದನ್ತಿ ಧಮ್ಮೋತಿ ವಾ ಅಧಮ್ಮೋತಿ ವಾ…ಪೇ… ದುಟ್ಠುಲ್ಲಾ ಆಪತ್ತೀತಿ ವಾ ಅದುಟ್ಠುಲ್ಲಾ ಆಪತ್ತೀತಿ ವಾ. ಯಂ ತತ್ಥ ಭಣ್ಡನಂ, ಕಲಹೋ, ವಿಗ್ಗಹೋ, ವಿವಾದೋ, ನಾನಾವಾದೋ, ಅಞ್ಞಥಾವಾದೋ, ವಿಪಚ್ಚತಾಯ ವೋಹಾರೋ, ಮೇಧಕಂ – ಅಯಂ ವಿವಾದೋ ವಿವಾದಾಧಿಕರಣಂ.

ತತ್ಥ ಕತಮೋ ವಿವಾದೋ ನೋ ಅಧಿಕರಣಂ? ಮಾತಾಪಿ ಪುತ್ತೇನ ವಿವದತಿ, ಪುತ್ತೋಪಿ ಮಾತರಾ ವಿವದತಿ, ಪಿತಾಪಿ ಪುತ್ತೇನ ವಿವದತಿ, ಪುತ್ತೋಪಿ ಪಿತರಾ ವಿವದತಿ, ಭಾತಾಪಿ ಭಾತರಾ ವಿವದತಿ, ಭಾತಾಪಿ ಭಗಿನಿಯಾ ವಿವದತಿ, ಭಗಿನೀಪಿ ಭಾತರಾ ವಿವದತಿ, ಸಹಾಯೋಪಿ ಸಹಾಯೇನ ವಿವದತಿ – ಅಯಂ ವಿವಾದೋ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ವಿವಾದೋ? ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ – ಇದಂ ಅಧಿಕರಣಂ ನೋ ವಿವಾದೋ.

ತತ್ಥ ಕತಮಂ ಅಧಿಕರಣಞ್ಚೇವ ವಿವಾದೋ ಚ? ವಿವಾದಾಧಿಕರಣಂ ಅಧಿಕರಣಞ್ಚೇವ ವಿವಾದೋ ಚ.

೩೫೬. [ಚೂಳವ. ೨೨೪ ಆದಯೋ] ಅನುವಾದೋ ಅನುವಾದಾಧಿಕರಣಂ, ಅನುವಾದೋ ನೋ ಅಧಿಕರಣಂ, ಅಧಿಕರಣಂ ನೋ ಅನುವಾದೋ, ಅಧಿಕರಣಞ್ಚೇವ ಅನುವಾದೋ ಚ? ಸಿಯಾ ಅನುವಾದೋ ಅನುವಾದಾಧಿಕರಣಂ, ಸಿಯಾ ಅನುವಾದೋ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ಅನುವಾದೋ, ಸಿಯಾ ಅಧಿಕರಣಞ್ಚೇವ ಅನುವಾದೋ ಚ.

ತತ್ಥ ಕತಮೋ ಅನುವಾದೋ ಅನುವಾದಾಧಿಕರಣಂ? ಇಧ ಭಿಕ್ಖೂ ಭಿಕ್ಖುಂ ಅನುವದನ್ತಿ ಸೀಲವಿಪತ್ತಿಯಾ ವಾ ಆಚಾರವಿಪತ್ತಿಯಾ ವಾ ದಿಟ್ಠಿವಿಪತ್ತಿಯಾ ವಾ ಆಜೀವವಿಪತ್ತಿಯಾ ವಾ. ಯೋ ತತ್ಥ ಅನುವಾದೋ, ಅನುವದನಾ ಅನುಲ್ಲಪನಾ ಅನುಭಣನಾ ಅನುಸಮ್ಪವಙ್ಕತಾ ಅಬ್ಭುಸ್ಸಹನತಾ ಅನುಬಲಪ್ಪದಾನಂ – ಅಯಂ ಅನುವಾದೋ ಅನುವಾದಾಧಿಕರಣಂ.

ತತ್ಥ ಕತಮೋ ಅನುವಾದೋ ನೋ ಅಧಿಕರಣಂ? ಮಾತಾಪಿ ಪುತ್ತಂ ಅನುವದತಿ, ಪುತ್ತೋಪಿ ಮಾತರಂ ಅನುವದತಿ, ಪಿತಾಪಿ ಪುತ್ತಂ ಅನುವದತಿ, ಪುತ್ತೋಪಿ ಪಿತರಂ ಅನುವದತಿ, ಭಾತಾಪಿ ಭಾತರಂ ಅನುವದತಿ, ಭಾತಾಪಿ ಭಗಿನಿಂ ಅನುವದತಿ, ಭಗಿನೀಪಿ ಭಾತರಂ ಅನುವದತಿ, ಸಹಾಯೋಪಿ ಸಹಾಯಂ ಅನುವದತಿ – ಅಯಂ ಅನುವಾದೋ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ಅನುವಾದೋ? ಆಪತ್ತಾಧಿಕರಣಂ ಕಿಚ್ಚಾಧಿಕರಣಂ ವಿವಾದಾಧಿಕರಣಂ – ಇದಂ ಅಧಿಕರಣಂ ನೋ ಅನುವಾದೋ.

ತತ್ಥ ಕತಮಂ ಅಧಿಕರಣಞ್ಚೇವ ಅನುವಾದೋ ಚ? ಅನುವಾದಾಧಿಕರಣಂ ಅಧಿಕರಣಞ್ಚೇವ ಅನುವಾದೋ ಚ.

೩೫೭. ಆಪತ್ತಿ ಆಪತ್ತಾಧಿಕರಣಂ, ಆಪತ್ತಿ ನೋ ಅಧಿಕರಣಂ, ಅಧಿಕರಣಂ ನೋ ಆಪತ್ತಿ, ಅಧಿಕರಣಞ್ಚೇವ ಆಪತ್ತಿ ಚ? ಸಿಯಾ ಆಪತ್ತಿ ಆಪತ್ತಾಧಿಕರಣಂ, ಸಿಯಾ ಆಪತ್ತಿ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ಆಪತ್ತಿ, ಸಿಯಾ ಅಧಿಕರಣಞ್ಚೇವ ಆಪತ್ತಿ ಚ.

ತತ್ಥ ಕತಮಾ ಆಪತ್ತಿ ಆಪತ್ತಾಧಿಕರಣಂ? ಪಞ್ಚಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ. ಸತ್ತಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ. ಅಯಂ ಆಪತ್ತಿ ಆಪತ್ತಾಧಿಕರಣಂ.

ತತ್ಥ ಕತಮಾ ಆಪತ್ತಿ ನೋ ಅಧಿಕರಣಂ? ಸೋತಾಪತ್ತಿ ಸಮಾಪತ್ತಿ – ಅಯಂ ಆಪತ್ತಿ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ಆಪತ್ತಿ? ಕಿಚ್ಚಾಧಿಕರಣಂ ವಿವಾದಾಧಿಕರಣಂ ಅನುವಾದಾಧಿಕರಣಂ – ಇದಂ ಅಧಿಕರಣಂ ನೋ ಆಪತ್ತಿ.

ತತ್ಥ ಕತಮಂ ಅಧಿಕರಣಞ್ಚೇವ ಆಪತ್ತಿ ಚ? ಆಪತ್ತಾಧಿಕರಣಂ ಅಧಿಕರಣಞ್ಚೇವ ಆಪತ್ತಿ ಚ.

೩೫೮. [ಚೂಳವ. ೨೨೩] ಕಿಚ್ಚಂ ಕಿಚ್ಚಾಧಿಕರಣಂ, ಕಿಚ್ಚಂ ನೋ ಅಧಿಕರಣಂ, ಅಧಿಕರಣಂ ನೋ ಕಿಚ್ಚಂ, ಅಧಿಕರಣಞ್ಚೇವ ಕಿಚ್ಚಞ್ಚ? ಸಿಯಾ ಕಿಚ್ಚಂ ಕಿಚ್ಚಾಧಿಕರಣಂ, ಸಿಯಾ ಕಿಚ್ಚಂ ನೋ ಅಧಿಕರಣಂ, ಸಿಯಾ ಅಧಿಕರಣಂ ನೋ ಕಿಚ್ಚಂ, ಸಿಯಾ ಅಧಿಕರಣಞ್ಚೇವ ಕಿಚ್ಚಞ್ಚ.

ತತ್ಥ ಕತಮಂ ಕಿಚ್ಚಂ ಕಿಚ್ಚಾಧಿಕರಣಂ? ಯಾ ಸಙ್ಘಸ್ಸ ಕಿಚ್ಚಯತಾ ಕರಣೀಯತಾ ಅಪಲೋಕನಕಮ್ಮಂ ಞತ್ತಿಕಮ್ಮಂ ಞತ್ತಿದುತಿಯಕಮ್ಮಂ ಞತ್ತಿಚತುತ್ಥಕಮ್ಮಂ – ಇದಂ ಕಿಚ್ಚಂ ಕಿಚ್ಚಾಧಿಕರಣಂ.

ತತ್ಥ ಕತಮಂ ಕಿಚ್ಚಂ ನೋ ಅಧಿಕರಣಂ? ಆಚರಿಯಕಿಚ್ಚಂ ಉಪಜ್ಝಾಯಕಿಚ್ಚಂ [ಉಪಜ್ಝಾಯಕಿಚ್ಚಂ ಸಕಿಚ್ಚಂ (ಕ.)] ಸಮಾನುಪಜ್ಝಾಯಕಿಚ್ಚಂ ಸಮಾನಾಚರಿಯಕಿಚ್ಚಂ – ಇದಂ ಕಿಚ್ಚಂ ನೋ ಅಧಿಕರಣಂ.

ತತ್ಥ ಕತಮಂ ಅಧಿಕರಣಂ ನೋ ಕಿಚ್ಚಂ? ವಿವಾದಾಧಿಕರಣಂ ಅನುವಾದಾಧಿಕರಣಂ ಆಪತ್ತಾಧಿಕರಣಂ – ಇದಂ ಅಧಿಕರಣಂ ನೋ ಕಿಚ್ಚಂ.

ತತ್ಥ ಕತಮಂ ಅಧಿಕರಣಞ್ಚೇವ ಕಿಚ್ಚಞ್ಚ? ಕಿಚ್ಚಾಧಿಕರಣಂ ಅಧಿಕರಣಞ್ಚೇವ ಕಿಚ್ಚಂ ಚಾತಿ.

ಅಧಿಕರಣಭೇದೋ ನಿಟ್ಠಿತೋ.