ಅಪರಗಾಥಾಸಙ್ಗಣಿಕಂ

೧. ಚೋದನಾದಿಪುಚ್ಛಾವಿಸ್ಸಜ್ಜನಾ

೩೫೯. ಚೋದನಾ ಕಿಮತ್ಥಾಯ, ಸಾರಣಾ ಕಿಸ್ಸ ಕಾರಣಾ;

ಸಙ್ಘೋ ಕಿಮತ್ಥಾಯ, ಮತಿಕಮ್ಮಂ ಪನ ಕಿಸ್ಸ ಕಾರಣಾ.

ಚೋದನಾ ಸಾರಣತ್ಥಾಯ, ನಿಗ್ಗಹತ್ಥಾಯ ಸಾರಣಾ;

ಸಙ್ಘೋ ಪರಿಗ್ಗಹತ್ಥಾಯ, ಮತಿಕಮ್ಮಂ ಪನ ಪಾಟಿಯೇಕ್ಕಂ.

ಮಾ ಖೋ ತುರಿತೋ ಅಭಣಿ, ಮಾ ಖೋ ಚಣ್ಡಿಕತೋ ಭಣಿ;

ಮಾ ಖೋ ಪಟಿಘಂ ಜನಯಿ, ಸಚೇ ಅನುವಿಜ್ಜಕೋ ತುವಂ.

ಮಾ ಖೋ ಸಹಸಾ ಅಭಣಿ, ಕಥಂ ವಿಗ್ಗಾಹಿಕಂ ಅನತ್ಥಸಂಹಿತಂ;

ಸುತ್ತೇ ವಿನಯೇ ಅನುಲೋಮೇ, ಪಞ್ಞತ್ತೇ ಅನುಲೋಮಿಕೇ.

ಅನುಯೋಗವತ್ತಂ ನಿಸಾಮಯ, ಕುಸಲೇನ ಬುದ್ಧಿಮತಾ ಕತಂ;

ಸುವುತ್ತಂ ಸಿಕ್ಖಾಪದಾನುಲೋಮಿಕಂ, ಗತಿಂ ನ ನಾಸೇನ್ತೋ ಸಮ್ಪರಾಯಿಕಂ;

ಹಿತೇಸೀ ಅನುಯುಞ್ಜಸ್ಸು, ಕಾಲೇನತ್ಥೂಪಸಂಹಿತಂ.

ಚುದಿತಸ್ಸ ಚ ಚೋದಕಸ್ಸ ಚ;

ಸಹಸಾ ವೋಹಾರಂ ಮಾ ಪಧಾರೇಸಿ;

ಚೋದಕೋ ಆಹ ಆಪನ್ನೋತಿ;

ಚುದಿತಕೋ ಆಹ ಅನಾಪನ್ನೋತಿ.

ಉಭೋ ಅನುಕ್ಖಿಪನ್ತೋ, ಪಟಿಞ್ಞಾನುಸನ್ಧಿತೇನ ಕಾರಯೇ;

ಪಟಿಞ್ಞಾ ಲಜ್ಜೀಸು ಕತಾ, ಅಲಜ್ಜೀಸು ಏವಂ ನ ವಿಜ್ಜತಿ;

ಬಹುಮ್ಪಿ ಅಲಜ್ಜೀ ಭಾಸೇಯ್ಯ, ವತ್ತಾನುಸನ್ಧಿತೇನ [ವುತ್ತಾನುಸನ್ಧಿತೇನ (ಸೀ. ಸ್ಯಾ. ಕ.)] ಕಾರಯೇ.

ಅಲಜ್ಜೀ ಕೀದಿಸೋ ಹೋತಿ, ಪಟಿಞ್ಞಾ ಯಸ್ಸ ನ ರೂಹತಿ;

ಏತಞ್ಚ [ಏವಞ್ಚ (ಕ.)] ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಅಲಜ್ಜೀ ಪುಗ್ಗಲೋ.

ಸಞ್ಚಿಚ್ಚ ಆಪತ್ತಿಂ ಆಪಜ್ಜತಿ, ಆಪತ್ತಿಂ ಪರಿಗೂಹತಿ;

ಅಗತಿಗಮನಞ್ಚ ಗಚ್ಛತಿ, ಏದಿಸೋ ವುಚ್ಚತಿ ಅಲಜ್ಜೀಪುಗ್ಗಲೋ.

ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಅಲಜ್ಜೀಪುಗ್ಗಲೋ;

ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಲಜ್ಜೀಪುಗ್ಗಲೋ.

ಸಞ್ಚಿಚ್ಚ ಆಪತ್ತಿಂ ನಾಪಜ್ಜತಿ, ಆಪತ್ತಿಂ ನ ಪರಿಗೂಹತಿ;

ಅಗತಿಗಮನಂ ನ ಗಚ್ಛತಿ, ಏದಿಸೋ ವುಚ್ಚತಿ ಲಜ್ಜೀಪುಗ್ಗಲೋ.

ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಲಜ್ಜೀಪುಗ್ಗಲೋ;

ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಅಧಮ್ಮಚೋದಕೋ.

ಅಕಾಲೇ ಚೋದೇತಿ ಅಭೂತೇನ;

ಫರುಸೇನ ಅನತ್ಥಸಂಹಿತೇನ;

ದೋಸನ್ತರೋ ಚೋದೇತಿ ನೋ ಮೇತ್ತಾಚಿತ್ತೋ;

ಏದಿಸೋ ವುಚ್ಚತಿ ಅಧಮ್ಮಚೋದಕೋ.

ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಅಧಮ್ಮಚೋದಕೋ;

ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಧಮ್ಮಚೋದಕೋ.

ಕಾಲೇನ ಚೋದೇತಿ ಭೂತೇನ, ಸಣ್ಹೇನ ಅತ್ಥಸಂಹಿತೇನ;

ಮೇತ್ತಾಚಿತ್ತೋ ಚೋದೇತಿ ನೋ ದೋಸನ್ತರೋ;

ಏದಿಸೋ ವುಚ್ಚತಿ ಧಮ್ಮಚೋದಕೋ.

ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಧಮ್ಮಚೋದಕೋ;

ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಬಾಲಚೋದಕೋ.

ಪುಬ್ಬಾಪರಂ ನ ಜಾನಾತಿ, ಪುಬ್ಬಾಪರಸ್ಸ ಅಕೋವಿದೋ;

ಅನುಸನ್ಧಿವಚನಪಥಂ ನ ಜಾನಾತಿ;

ಅನುಸನ್ಧಿವಚನಪಥಸ್ಸ ಅಕೋವಿದೋ;

ಏದಿಸೋ ವುಚ್ಚತಿ ಬಾಲಚೋದಕೋ.

ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಬಾಲಚೋದಕೋ;

ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಪಣ್ಡಿತಚೋದಕೋ.

ಪುಬ್ಬಾಪರಮ್ಪಿ ಜಾನಾತಿ, ಪುಬ್ಬಾಪರಸ್ಸ ಕೋವಿದೋ;

ಅನುಸನ್ಧಿವಚನಪಥಂ ಜಾನಾತಿ, ಅನುಸನ್ಧಿವಚನಪಥಸ್ಸ ಕೋವಿದೋ;

ಏದಿಸೋ ವುಚ್ಚತಿ ಪಣ್ಡಿತಚೋದಕೋ.

ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಪಣ್ಡಿತಚೋದಕೋ;

ಅಞ್ಞಞ್ಚ ತಾಹಂ ಪುಚ್ಛಾಮಿ, ಚೋದನಾ ಕಿನ್ತಿ ವುಚ್ಚತಿ.

ಸೀಲವಿಪತ್ತಿಯಾ ಚೋದೇತಿ, ಅಥೋ ಆಚಾರದಿಟ್ಠಿಯಾ;

ಆಜೀವೇನಪಿ ಚೋದೇತಿ, ಚೋದನಾ ತೇನ ವುಚ್ಚತೀತಿ.

ಅಪರಂ ಗಾಥಾಸಙ್ಗಣಿಕಂ ನಿಟ್ಠಿತಂ.