೫. ಪಾರಾಜಿಕಾದಿಆಪತ್ತಿ

೩೩೯. ‘ಪಾರಾಜಿಕ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಚುತೋ ಪರದ್ಧೋ ಭಟ್ಠೋ ಚ, ಸದ್ಧಮ್ಮಾ ಹಿ ನಿರಙ್ಕತೋ;

ಸಂವಾಸೋಪಿ ತಹಿಂ ನತ್ಥಿ, ತೇನೇತಂ ಇತಿ ವುಚ್ಚತಿ.

‘ಸಙ್ಘಾದಿಸೇಸೋ’ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಸಙ್ಘೋವ ದೇತಿ ಪರಿವಾಸಂ, ಮೂಲಾಯ ಪಟಿಕಸ್ಸತಿ;

ಮಾನತ್ತಂ ದೇತಿ ಅಬ್ಭೇತಿ, ತೇನೇತಂ ಇತಿ ವುಚ್ಚತಿ.

‘ಅನಿಯತೋ’ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಅನಿಯತೋ ನ ನಿಯತೋ, ಅನೇಕಂಸಿಕತಂ ಪದಂ;

ತಿಣ್ಣಮಞ್ಞತರಂ ಠಾನಂ, ‘ಅನಿಯತೋ’ತಿ ಪವುಚ್ಚತಿ.

‘ಥುಲ್ಲಚ್ಚಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಏಕಸ್ಸ ಮೂಲೇ ಯೋ ದೇಸೇತಿ, ಯೋ ಚ ತಂ ಪಟಿಗಣ್ಹತಿ;

ಅಚ್ಚಯೋ ತೇನ ಸಮೋ ನತ್ಥಿ, ತೇನೇತಂ ಇತಿ ವುಚ್ಚತಿ.

‘ನಿಸ್ಸಗ್ಗಿಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಸಙ್ಘಮಜ್ಝೇ ಗಣಮಜ್ಝೇ, ಏಕಸ್ಸೇವ ಚ ಏಕತೋ;

ನಿಸ್ಸಜ್ಜಿತ್ವಾನ ದೇಸೇತಿ, ತೇನೇತಂ ಇತಿ ವುಚ್ಚತಿ.

‘ಪಾಚಿತ್ತಿಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಪಾತೇತಿ ಕುಸಲಂ ಧಮ್ಮಂ, ಅರಿಯಮಗ್ಗಂ ಅಪರಜ್ಝತಿ;

ಚಿತ್ತಸಂಮೋಹನಟ್ಠಾನಂ, ತೇನೇತಂ ಇತಿ ವುಚ್ಚತಿ.

‘ಪಾಟಿದೇಸನೀಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಭಿಕ್ಖು ಅಞ್ಞಾತಕೋ ಸನ್ತೋ, ಕಿಚ್ಛಾ ಲದ್ಧಾಯ ಭೋಜನಂ;

ಸಾಮಂ ಗಹೇತ್ವಾ ಭುಞ್ಜೇಯ್ಯ, ‘ಗಾರಯ್ಹ’ನ್ತಿ ಪವುಚ್ಚತಿ.

ನಿಮನ್ತನಾಸು ಭುಞ್ಜನ್ತಾ ಛನ್ದಾಯ, ವೋಸಾಸತಿ ತತ್ಥ ಭಿಕ್ಖುನಿಂ;

ಅನಿವಾರೇತ್ವಾ ತಹಿಂ ಭುಞ್ಜೇ, ಗಾರಯ್ಹನ್ತಿ ಪವುಚ್ಚತಿ.

ಸದ್ಧಾಚಿತ್ತಂ ಕುಲಂ ಗನ್ತ್ವಾ, ಅಪ್ಪಭೋಗಂ ಅನಾಳಿಯಂ [ಅನಾಳ್ಹಿಯಂ (ಸೀ. ಸ್ಯಾ.)];

ಅಗಿಲಾನೋ ತಹಿಂ ಭುಞ್ಜೇ, ಗಾರಯ್ಹನ್ತಿ ಪವುಚ್ಚತಿ.

ಯೋ ಚೇ ಅರಞ್ಞೇ ವಿಹರನ್ತೋ, ಸಾಸಙ್ಕೇ ಸಭಯಾನಕೇ;

ಅವಿದಿತಂ ತಹಿಂ ಭುಞ್ಜೇ, ಗಾರಯ್ಹನ್ತಿ ಪವುಚ್ಚತಿ.

ಭಿಕ್ಖುನೀ ಅಞ್ಞಾತಿಕಾ ಸನ್ತಾ, ಯಂ ಪರೇಸಂ ಮಮಾಯಿತಂ;

ಸಪ್ಪಿ ತೇಲಂ ಮಧುಂ ಫಾಣಿತಂ, ಮಚ್ಛಮಂಸಂ ಅಥೋ ಖೀರಂ;

ದಧಿಂ ಸಯಂ ವಿಞ್ಞಾಪೇಯ್ಯ ಭಿಕ್ಖುನೀ, ಗಾರಯ್ಹಪತ್ತಾ ಸುಗತಸ್ಸ ಸಾಸನೇ.

‘ದುಕ್ಕಟ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಅಪರದ್ಧಂ ವಿರದ್ಧಞ್ಚ, ಖಲಿತಂ ಯಞ್ಚ ದುಕ್ಕಟಂ.

ಯಂ ಮನುಸ್ಸೋ ಕರೇ ಪಾಪಂ, ಆವಿ ವಾ ಯದಿ ವಾ ರಹೋ;

‘ದುಕ್ಕಟ’ನ್ತಿ ಪವೇದೇನ್ತಿ, ತೇನೇತಂ ಇತಿ ವುಚ್ಚತಿ.

‘ದುಬ್ಭಾಸಿತ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ದುಬ್ಭಾಸಿತಂ ದುರಾಭಟ್ಠಂ, ಸಂಕಿಲಿಟ್ಠಞ್ಚ ಯಂ ಪದಂ;

ಯಞ್ಚ ವಿಞ್ಞೂ ಗರಹನ್ತಿ, ತೇನೇತಂ ಇತಿ ವುಚ್ಚತಿ.

‘ಸೇಖಿಯ’ನ್ತಿ ಯಂ ವುತ್ತಂ, ತಂ ಸುಣೋಹಿ ಯಥಾತಥಂ;

ಸೇಕ್ಖಸ್ಸ ಸಿಕ್ಖಮಾನಸ್ಸ, ಉಜುಮಗ್ಗಾನುಸಾರಿನೋ.

ಆದಿ ಚೇತಂ ಚರಣಞ್ಚ, ಮುಖಂ ಸಞ್ಞಮಸಂವರೋ;

ಸಿಕ್ಖಾ ಏತಾದಿಸೀ ನತ್ಥಿ, ತೇನೇತಂ ಇತಿ ವುಚ್ಚತಿ.

[ಉದಾ. ೪೫ ಉದಾನೇಪಿ] ಛನ್ನಮತಿವಸ್ಸತಿ, ವಿವಟಂ ನಾತಿವಸ್ಸತಿ;

ತಸ್ಮಾ ಛನ್ನಂ ವಿವರೇಥ, ಏವಂ ತಂ ನಾತಿವಸ್ಸತಿ.

ಗತಿ ಮಿಗಾನಂ ಪವನಂ, ಆಕಾಸೋ ಪಕ್ಖಿನಂ ಗತಿ;

ವಿಭವೋ ಗತಿ ಧಮ್ಮಾನಂ, ನಿಬ್ಬಾನಂ ಅರಹತೋ ಗತೀತಿ.

ಗಾಥಾಸಙ್ಗಣಿಕಂ.

ತಸ್ಸುದ್ದಾನಂ –

ಸತ್ತನಗರೇಸು ಪಞ್ಞತ್ತಾ, ವಿಪತ್ತಿ ಚತುರೋಪಿ ಚ;

ಭಿಕ್ಖೂನಂ ಭಿಕ್ಖುನೀನಞ್ಚ, ಸಾಧಾರಣಾ ಅಸಾಧಾರಣಾ;

ಸಾಸನಂ ಅನುಗ್ಗಹಾಯ, ಗಾಥಾಸಙ್ಗಣಿಕಂ ಇದನ್ತಿ.

ಗಾಥಾಸಙ್ಗಣಿಕಂ ನಿಟ್ಠಿತಂ.