ಗಾಥಾಸಙ್ಗಣಿಕಂ

೧. ಸತ್ತನಗರೇಸು ಪಞ್ಞತ್ತಸಿಕ್ಖಾಪದಂ

೩೩೫. ಏಕಂಸಂ ಚೀವರಂ ಕತ್ವಾ, ಪಗ್ಗಣ್ಹಿತ್ವಾನ ಅಞ್ಜಲಿಂ;

ಆಸೀಸಮಾನರೂಪೋವ [ಆಸಿಂಸಮಾನರೂಪೋವ (ಸೀ. ಸ್ಯಾ.)], ಕಿಸ್ಸ ತ್ವಂ ಇಧ ಮಾಗತೋ.

ದ್ವೀಸು ವಿನಯೇಸು ಯೇ ಪಞ್ಞತ್ತಾ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ಕತಿ ತೇ ಸಿಕ್ಖಾಪದಾ ಹೋನ್ತಿ;

ಕತಿಸು ನಗರೇಸು ಪಞ್ಞತ್ತಾ.

ಭದ್ದಕೋ ತೇ ಉಮ್ಮಙ್ಗೋ, ಯೋನಿಸೋ ಪರಿಪುಚ್ಛಸಿ;

ತಗ್ಘ ತೇ ಅಹಮಕ್ಖಿಸ್ಸಂ, ಯಥಾಸಿ ಕುಸಲೋ ತಥಾ.

ದ್ವೀಸು ವಿನಯೇಸು ಯೇ ಪಞ್ಞತ್ತಾ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ಅಡ್ಢುಡ್ಢಸತಾನಿ ತೇ ಹೋನ್ತಿ;

ಸತ್ತಸು ನಗರೇಸು ಪಞ್ಞತ್ತಾ.

ಕತಮೇಸು ಸತ್ತಸು ನಗರೇಸು ಪಞ್ಞತ್ತಾ;

ಇಙ್ಘ ಮೇ ತ್ವಂ ಬ್ಯಾಕರ ನಂ [ಇಙ್ಘ ಮೇ ತಂ ಬ್ಯಾಕರ (ಕ.)];

ತಂ ವಚನಪಥಂ [ತವ ವಚನಪಥಂ (ಸ್ಯಾ.)] ನಿಸಾಮಯಿತ್ವಾ;

ಪಟಿಪಜ್ಜೇಮ ಹಿತಾಯ ನೋ ಸಿಯಾ.

ವೇಸಾಲಿಯಂ ರಾಜಗಹೇ, ಸಾವತ್ಥಿಯಞ್ಚ ಆಳವಿಯಂ;

ಕೋಸಮ್ಬಿಯಞ್ಚ ಸಕ್ಕೇಸು, ಭಗ್ಗೇಸು ಚೇವ ಪಞ್ಞತ್ತಾ.

ಕತಿ ವೇಸಾಲಿಯಂ ಪಞ್ಞತ್ತಾ, ಕತಿ ರಾಜಗಹೇ ಕತಾ;

ಸಾವತ್ಥಿಯಂ ಕತಿ ಹೋನ್ತಿ, ಕತಿ ಆಳವಿಯಂ ಕತಾ.

ಕತಿ ಕೋಸಮ್ಬಿಯಂ ಪಞ್ಞತ್ತಾ, ಕತಿ ಸಕ್ಕೇಸು ವುಚ್ಚನ್ತಿ;

ಕತಿ ಭಗ್ಗೇಸು ಪಞ್ಞತ್ತಾ, ತಂ ಮೇ ಅಕ್ಖಾಹಿ ಪುಚ್ಛಿತೋ.

ದಸ ವೇಸಾಲಿಯಂ ಪಞ್ಞತ್ತಾ, ಏಕವೀಸ ರಾಜಗಹೇ ಕತಾ;

ಛಊನ ತೀಣಿಸತಾನಿ, ಸಬ್ಬೇ ಸಾವತ್ಥಿಯಂ ಕತಾ.

ಛ ಆಳವಿಯಂ ಪಞ್ಞತ್ತಾ, ಅಟ್ಠ ಕೋಸಮ್ಬಿಯಂ ಕತಾ;

ಅಟ್ಠ ಸಕ್ಕೇಸು ವುಚ್ಚನ್ತಿ, ತಯೋ ಭಗ್ಗೇಸು ಪಞ್ಞತ್ತಾ.

ಯೇ ವೇಸಾಲಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ [ಯಥಾಕಥಂ (ಸೀ. ಸ್ಯಾ. ಏವಮುಪರಿಪಿ)];

ಮೇಥುನವಿಗ್ಗಹುತ್ತರಿ, ಅತಿರೇಕಞ್ಚ ಕಾಳಕಂ.

ಭೂತಂ ಪರಮ್ಪರಭತ್ತಂ, ದನ್ತಪೋನೇನ [ದನ್ತಪೋಣೇನ (ಕ.)] ಅಚೇಲಕೋ;

ಭಿಕ್ಖುನೀಸು ಚ ಅಕ್ಕೋಸೋ, ದಸೇತೇ ವೇಸಾಲಿಯಂ ಕತಾ.

ಯೇ ರಾಜಗಹೇ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಅದಿನ್ನಾದಾನಂ ರಾಜಗಹೇ, ದ್ವೇ ಅನುದ್ಧಂಸನಾ ದ್ವೇಪಿ ಚ ಭೇದಾ.

ಅನ್ತರವಾಸಕಂ ರೂಪಿಯಂ ಸುತ್ತಂ, ಉಜ್ಝಾಪನೇನ ಚ ಪಾಚಿತಪಿಣ್ಡಂ;

ಗಣಭೋಜನಂ ವಿಕಾಲೇ ಚ, ಚಾರಿತ್ತಂ ನಹಾನಂ ಊನವೀಸತಿ.

ಚೀವರಂ ದತ್ವಾ ವೋಸಾಸನ್ತಿ, ಏತೇ ರಾಜಗಹೇ ಕತಾ;

ಗಿರಗ್ಗಚರಿಯಾ ತತ್ಥೇವ, ಛನ್ದದಾನೇನ ಏಕವೀಸತಿ.

ಯೇ ಸಾವತ್ಥಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾ ಭವನ್ತಿ ಸೋಳಸ.

ಅನಿಯತಾ ಚ ದ್ವೇ ಹೋನ್ತಿ, ನಿಸ್ಸಗ್ಗಿಯಾ ಚತುವೀಸತಿ;

ಛಪಞ್ಞಾಸಸತಞ್ಚೇವ, ಖುದ್ದಕಾನಿ ಪವುಚ್ಚನ್ತಿ.

ದಸಯೇವ ಚ ಗಾರಯ್ಹಾ, ದ್ವೇಸತ್ತತಿ ಚ ಸೇಖಿಯಾ;

ಛಊನ ತೀಣಿಸತಾನಿ, ಸಬ್ಬೇ ಸಾವತ್ಥಿಯಂ ಕತಾ.

ಯೇ ಆಳವಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಕುಟಿಕೋಸಿಯಸೇಯ್ಯಾ ಚ, ಖಣನೇ ಗಚ್ಛ ದೇವತೇ;

ಸಪ್ಪಾಣಕಞ್ಚ ಸಿಞ್ಚನ್ತಿ, ಛ ಏತೇ ಆಳವಿಯಂ ಕತಾ.

ಯೇ ಕೋಸಮ್ಬಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಮಹಾವಿಹಾರೋ ದೋವಚಸ್ಸಂ, ಅಞ್ಞಂ ದ್ವಾರಂ ಸುರಾಯ ಚ;

ಅನಾದರಿಯಂ ಸಹಧಮ್ಮೋ, ಪಯೋಪಾನೇನ ಅಟ್ಠಮಂ.

ಯೇ ಸಕ್ಕೇಸು ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಏಳಕಲೋಮಾನಿ ಪತ್ತೋ ಚ, ಓವಾದೋ ಚೇವ ಭೇಸಜ್ಜಂ.

ಸೂಚಿ ಆರಞ್ಞಿಕೋ ಚೇವ, ಅಟ್ಠೇತೇ [ಛ ಏತೇ (ಸಬ್ಬತ್ಥ)] ಕಾಪಿಲವತ್ಥವೇ;

ಉದಕಸುದ್ಧಿಯಾ ಓವಾದೋ, ಭಿಕ್ಖುನೀಸು ಪವುಚ್ಚನ್ತಿ.

ಯೇ ಭಗ್ಗೇಸು ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಸಮಾದಹಿತ್ವಾ ವಿಸಿಬ್ಬೇನ್ತಿ, ಸಾಮಿಸೇನ ಸಸಿತ್ಥಕಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ;

ಸತ್ತ ಚ ನಿಸ್ಸಗ್ಗಿಯಾನಿ, ಅಟ್ಠ ದ್ವತ್ತಿಂಸ ಖುದ್ದಕಾ.

ದ್ವೇ ಗಾರಯ್ಹಾ ತಯೋ ಸೇಕ್ಖಾ, ಛಪ್ಪಞ್ಞಾಸ ಸಿಕ್ಖಾಪದಾ;

ಛಸು ನಗರೇಸು ಪಞ್ಞತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ಛಊನ ತೀಣಿಸತಾನಿ, ಸಬ್ಬೇ ಸಾವತ್ಥಿಯಂ ಕತಾ;

ಕಾರುಣಿಕೇನ ಬುದ್ಧೇನ, ಗೋತಮೇನ ಯಸಸ್ಸಿನಾ.

೨. ಚತುವಿಪತ್ತಿಂ

೩೩೬. ಯಂ ತಂ [ಯಂ ಯಂ (ಕ.)] ಪುಚ್ಛಿಮ್ಹ ಅಕಿತ್ತಯಿ ನೋ;

ತಂ ತಂ ಬ್ಯಾಕತಂ ಅನಞ್ಞಥಾ;

ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;

ಗರುಕ ಲಹುಕಞ್ಚಾಪಿ ಸಾವಸೇಸಂ;

ಅನವಸೇಸಂ ದುಟ್ಠುಲ್ಲಞ್ಚ ಅದುಟ್ಠುಲ್ಲಂ;

ಯೇ ಚ ಯಾವತತಿಯಕಾ.

ಸಾಧಾರಣಂ ಅಸಾಧಾರಣಂ;

ವಿಭತ್ತಿಯೋ ಚ [ವಿಪತ್ತಿಯೋ ಚ (ಸೀ. ಸ್ಯಾ.)] ಯೇಹಿ ಸಮಥೇಹಿ ಸಮ್ಮನ್ತಿ;

ಸಬ್ಬಾನಿಪೇತಾನಿ ವಿಯಾಕರೋಹಿ;

ಹನ್ದ ವಾಕ್ಯಂ ಸುಣೋಮ ತೇ.

ಏಕತಿಂಸಾ ಯೇ ಗರುಕಾ, ಅಟ್ಠೇತ್ಥ ಅನವಸೇಸಾ;

ಯೇ ಗರುಕಾ ತೇ ದುಟ್ಠುಲ್ಲಾ, ಯೇ ದುಟ್ಠುಲ್ಲಾ ಸಾ ಸೀಲವಿಪತ್ತಿ;

ಪಾರಾಜಿಕಂ ಸಙ್ಘಾದಿಸೇಸೋ, ‘‘ಸೀಲವಿಪತ್ತೀ’’ತಿ ವುಚ್ಚತಿ.

ಥುಲ್ಲಚ್ಚಯಂ ಪಾಚಿತ್ತಿಯಾ, ಪಾಟಿದೇಸನೀಯಂ ದುಕ್ಕಟಂ;

ದುಬ್ಭಾಸಿತಂ ಯೋ ಚಾಯಂ, ಅಕ್ಕೋಸತಿ ಹಸಾಧಿಪ್ಪಾಯೋ;

ಅಯಂ ಸಾ ಆಚಾರವಿಪತ್ತಿಸಮ್ಮತಾ.

ವಿಪರೀತದಿಟ್ಠಿಂ ಗಣ್ಹನ್ತಿ, ಅಸದ್ಧಮ್ಮೇಹಿ ಪುರಕ್ಖತಾ;

ಅಬ್ಭಾಚಿಕ್ಖನ್ತಿ ಸಮ್ಬುದ್ಧಂ, ದುಪ್ಪಞ್ಞಾ ಮೋಹಪಾರುತಾ;

ಅಯಂ ಸಾ ದಿಟ್ಠಿವಿಪತ್ತಿಸಮ್ಮತಾ.

ಆಜೀವಹೇತು ಆಜೀವಕಾರಣಾ ಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ, ಆಜೀವಹೇತು ಆಜೀವಕಾರಣಾ ಸಞ್ಚರಿತ್ತಂ ಸಮಾಪಜ್ಜತಿ, ಆಜೀವಹೇತು ಆಜೀವಕಾರಣಾ – ‘‘ಯೋ ತೇ ವಿಹಾರೇ ವಸತಿ, ಸೋ ಭಿಕ್ಖು ಅರಹಾ’’ತಿ ಭಣತಿ, ಆಜೀವಹೇತು ಆಜೀವಕಾರಣಾ ಭಿಕ್ಖು ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಜೀವಹೇತು ಆಜೀವಕಾರಣಾ ಭಿಕ್ಖುನೀ ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಜೀವಹೇತು ಆಜೀವಕಾರಣಾ ಸೂಪಂ ವಾ ಓದನಂ ವಾ ಅಗಿಲಾನೋ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ. ಅಯಂ ಸಾ ಆಜೀವವಿಪತ್ತಿ ಸಮ್ಮತಾ.

ಏಕಾದಸ ಯಾವತತಿಯಕಾ, ತೇ ಸುಣೋಹಿ ಯಥಾತಥಂ;

ಉಕ್ಖಿತ್ತಾನುವತ್ತಿಕಾ, ಅಟ್ಠ ಯಾವತತಿಯಕಾ;

ಅರಿಟ್ಠೋ ಚಣ್ಡಕಾಳೀ ಚ, ಇಮೇ ತೇ ಯಾವತತಿಯಕಾ.

೩. ಛೇದನಕಾದಿ

೩೩೭. ಕತಿ ಛೇದನಕಾನಿ? ಕತಿ ಭೇದನಕಾನಿ? ಕತಿ ಉದ್ದಾಲನಕಾನಿ? ಕತಿ ಅನಞ್ಞಪಾಚಿತ್ತಿಯಾನಿ? ಕತಿ ಭಿಕ್ಖುಸಮ್ಮುತಿಯೋ? ಕತಿ ಸಾಮೀಚಿಯೋ? ಕತಿ ಪರಮಾನಿ?

ಕತಿ ಜಾನನ್ತಿ ಪಞ್ಞತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ಛ ಛೇದನಕಾನಿ. ಏಕಂ ಭೇದನಕಂ. ಏಕಂ ಉದ್ದಾಲನಕಂ. ಚತ್ತಾರಿ ಅನಞ್ಞಪಾಚಿತ್ತಿಯಾನಿ. ಚತಸ್ಸೋ ಭಿಕ್ಖುಸಮ್ಮುತಿಯೋ. ಸತ್ತ ಸಾಮೀಚಿಯೋ. ಚುದ್ದಸ ಪರಮಾನಿ.

ಸೋದಸ [ಸೋಳಸ (ಸೀ. ಸ್ಯಾ.) ಅಟ್ಠಕಥಾ ಓಲೋಕೇತಬ್ಬಾ] ಜಾನನ್ತಿ ಪಞ್ಞತ್ತಾ, ಬುದ್ಧೇನಾದಿಚ್ಚಬನ್ಧುನಾ.

೪. ಅಸಾಧಾರಣಾದಿ

೩೩೮. ವೀಸಂ ದ್ವೇ ಸತಾನಿ ಭಿಕ್ಖೂನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ತೀಣಿ ಸತಾನಿ ಚತ್ತಾರಿ ಭಿಕ್ಖುನೀನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು.

ಛಚತ್ತಾರೀಸಾ ಭಿಕ್ಖೂನಂ, ಭಿಕ್ಖುನೀಹಿ ಅಸಾಧಾರಣಾ;

ಸತಂ ತಿಂಸಾ ಚ ಭಿಕ್ಖುನೀನಂ, ಭಿಕ್ಖೂಹಿ ಅಸಾಧಾರಣಾ.

ಸತಂ ಸತ್ತತಿ ಛಚ್ಚೇವ, ಉಭಿನ್ನಂ ಅಸಾಧಾರಣಾ;

ಸತಂ ಸತ್ತತಿ ಚತ್ತಾರಿ, ಉಭಿನ್ನಂ ಸಮಸಿಕ್ಖತಾ.

ವೀಸಂ ದ್ವೇ ಸತಾನಿ ಭಿಕ್ಖೂನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ ತೇರಸ;

ಅನಿಯತಾ ದ್ವೇ ಹೋನ್ತಿ.

ನಿಸ್ಸಗ್ಗಿಯಾನಿ ತಿಂಸೇವ, ದ್ವೇನವುತಿ ಚ ಖುದ್ದಕಾ;

ಚತ್ತಾರೋ ಪಾಟಿದೇಸನೀಯಾ, ಪಞ್ಚಸತ್ತತಿ ಸೇಖಿಯಾ.

ವೀಸಂ ದ್ವೇ ಸತಾನಿ ಚಿಮೇ ಹೋನ್ತಿ ಭಿಕ್ಖೂನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು.

ತೀಣಿ ಸತಾನಿ ಚತ್ತಾರಿ, ಭಿಕ್ಖುನೀನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು, ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಅಟ್ಠ, ಸಙ್ಘಾದಿಸೇಸಾನಿ ಭವನ್ತಿ ಸತ್ತರಸ;

ನಿಸ್ಸಗ್ಗಿಯಾನಿ ತಿಂಸೇವ, ಸತಂ ಸಟ್ಠಿ ಛ ಚೇವ ಖುದ್ದಕಾನಿ ಪವುಚ್ಚನ್ತಿ.

ಅಟ್ಠ ಪಾಟಿದೇಸನೀಯಾ, ಪಞ್ಚಸತ್ತತಿ ಸೇಖಿಯಾ;

ತೀಣಿ ಸತಾನಿ ಚತ್ತಾರಿ ಚಿಮೇ ಹೋನ್ತಿ ಭಿಕ್ಖುನೀನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು.

ಛಚತ್ತಾರೀಸಾ ಭಿಕ್ಖೂನಂ, ಭಿಕ್ಖುನೀಹಿ ಅಸಾಧಾರಣಾ;

ತೇ ಸುಣೋಹಿ ಯಥಾತಥಂ.

ಸಙ್ಘಾದಿಸೇಸಾ, ದ್ವೇ ಅನಿಯತೇಹಿ ಅಟ್ಠ;

ನಿಸ್ಸಗ್ಗಿಯಾನಿ ದ್ವಾದಸ, ತೇಹಿ ತೇ ಹೋನ್ತಿ ವೀಸತಿ.

ದ್ವೇವೀಸತಿ ಖುದ್ದಕಾ, ಚತುರೋ ಪಾಟಿದೇಸನೀಯಾ;

ಛಚತ್ತಾರೀಸಾ ಚಿಮೇ ಹೋನ್ತಿ, ಭಿಕ್ಖೂನಂ ಭಿಕ್ಖುನೀಹಿ ಅಸಾಧಾರಣಾ.

ಸತಂ ತಿಂಸಾ ಚ ಭಿಕ್ಖುನೀನಂ, ಭಿಕ್ಖೂಹಿ ಅಸಾಧಾರಣಾ;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಮ್ಹಾ ದಸ ನಿಸ್ಸರೇ;

ನಿಸ್ಸಗ್ಗಿಯಾನಿ ದ್ವಾದಸ, ಛನ್ನವುತಿ ಚ ಖುದ್ದಕಾ;

ಅಟ್ಠ ಪಾಟಿದೇಸನೀಯಾ.

ಸತಂ ತಿಂಸಾ ಚಿಮೇ ಹೋನ್ತಿ ಭಿಕ್ಖುನೀನಂ, ಭಿಕ್ಖೂಹಿ ಅಸಾಧಾರಣಾ;

ಸತಂ ಸತ್ತತಿ ಛಚ್ಚೇವ, ಉಭಿನ್ನಂ ಅಸಾಧಾರಣಾ;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ ಸೋಳಸ;

ಅನಿಯತಾ ದ್ವೇ ಹೋನ್ತಿ, ನಿಸ್ಸಗ್ಗಿಯಾನಿ ಚತುವೀಸತಿ;

ಸತಂ ಅಟ್ಠಾರಸಾ ಚೇವ, ಖುದ್ದಕಾನಿ ಪವುಚ್ಚನ್ತಿ;

ದ್ವಾದಸ ಪಾಟಿದೇಸನೀಯಾ.

ಸತಂ ಸತ್ತತಿ ಛಚ್ಚೇವಿಮೇ ಹೋನ್ತಿ, ಉಭಿನ್ನಂ ಅಸಾಧಾರಣಾ;

ಸತಂ ಸತ್ತತಿ ಚತ್ತಾರಿ, ಉಭಿನ್ನಂ ಸಮಸಿಕ್ಖತಾ;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ ಸತ್ತ;

ನಿಸ್ಸಗ್ಗಿಯಾನಿ ಅಟ್ಠಾರಸ, ಸಮಸತ್ತತಿ ಖುದ್ದಕಾ;

ಪಞ್ಚಸತ್ತತಿ ಸೇಖಿಯಾನಿ.

ಸತಂ ಸತ್ತತಿ ಚತ್ತಾರಿ ಚಿಮೇ ಹೋನ್ತಿ, ಉಭಿನ್ನಂ ಸಮಸಿಕ್ಖತಾ;

ಅಟ್ಠೇ ಪಾರಾಜಿಕಾ ಯೇ ದುರಾಸದಾ, ತಾಲವತ್ಥುಸಮೂಪಮಾ.

ಪಣ್ಡುಪಲಾಸೋ ಪುಥುಸಿಲಾ, ಸೀಸಚ್ಛಿನ್ನೋವ ಸೋ ನರೋ;

ತಾಲೋವ ಮತ್ಥಕಚ್ಛಿನ್ನೋ, ಅವಿರುಳ್ಹೀ ಭವನ್ತಿ ತೇ.

ತೇವೀಸತಿ ಸಙ್ಘಾದಿಸೇಸಾ, ದ್ವೇ ಅನಿಯತಾ;

ದ್ವೇ ಚತ್ತಾರೀಸ ನಿಸ್ಸಗ್ಗಿಯಾ;

ಅಟ್ಠಾಸೀತಿಸತಂ ಪಾಚಿತ್ತಿಯಾ, ದ್ವಾದಸ ಪಾಟಿದೇಸನೀಯಾ.

ಪಞ್ಚಸತ್ತತಿ ಸೇಖಿಯಾ, ತೀಹಿ ಸಮಥೇಹಿ ಸಮ್ಮನ್ತಿ;

ಸಮ್ಮುಖಾ ಚ ಪಟಿಞ್ಞಾಯ, ತಿಣವತ್ಥಾರಕೇನ ಚ.

ದ್ವೇ ಉಪೋಸಥಾ ದ್ವೇ ಪವಾರಣಾ;