೪. ಅಸಾಧಾರಣಾದಿ

೩೩೮. ವೀಸಂ ದ್ವೇ ಸತಾನಿ ಭಿಕ್ಖೂನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ತೀಣಿ ಸತಾನಿ ಚತ್ತಾರಿ ಭಿಕ್ಖುನೀನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು.

ಛಚತ್ತಾರೀಸಾ ಭಿಕ್ಖೂನಂ, ಭಿಕ್ಖುನೀಹಿ ಅಸಾಧಾರಣಾ;

ಸತಂ ತಿಂಸಾ ಚ ಭಿಕ್ಖುನೀನಂ, ಭಿಕ್ಖೂಹಿ ಅಸಾಧಾರಣಾ.

ಸತಂ ಸತ್ತತಿ ಛಚ್ಚೇವ, ಉಭಿನ್ನಂ ಅಸಾಧಾರಣಾ;

ಸತಂ ಸತ್ತತಿ ಚತ್ತಾರಿ, ಉಭಿನ್ನಂ ಸಮಸಿಕ್ಖತಾ.

ವೀಸಂ ದ್ವೇ ಸತಾನಿ ಭಿಕ್ಖೂನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ ತೇರಸ;

ಅನಿಯತಾ ದ್ವೇ ಹೋನ್ತಿ.

ನಿಸ್ಸಗ್ಗಿಯಾನಿ ತಿಂಸೇವ, ದ್ವೇನವುತಿ ಚ ಖುದ್ದಕಾ;

ಚತ್ತಾರೋ ಪಾಟಿದೇಸನೀಯಾ, ಪಞ್ಚಸತ್ತತಿ ಸೇಖಿಯಾ.

ವೀಸಂ ದ್ವೇ ಸತಾನಿ ಚಿಮೇ ಹೋನ್ತಿ ಭಿಕ್ಖೂನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು.

ತೀಣಿ ಸತಾನಿ ಚತ್ತಾರಿ, ಭಿಕ್ಖುನೀನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು, ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಅಟ್ಠ, ಸಙ್ಘಾದಿಸೇಸಾನಿ ಭವನ್ತಿ ಸತ್ತರಸ;

ನಿಸ್ಸಗ್ಗಿಯಾನಿ ತಿಂಸೇವ, ಸತಂ ಸಟ್ಠಿ ಛ ಚೇವ ಖುದ್ದಕಾನಿ ಪವುಚ್ಚನ್ತಿ.

ಅಟ್ಠ ಪಾಟಿದೇಸನೀಯಾ, ಪಞ್ಚಸತ್ತತಿ ಸೇಖಿಯಾ;

ತೀಣಿ ಸತಾನಿ ಚತ್ತಾರಿ ಚಿಮೇ ಹೋನ್ತಿ ಭಿಕ್ಖುನೀನಂ ಸಿಕ್ಖಾಪದಾನಿ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು.

ಛಚತ್ತಾರೀಸಾ ಭಿಕ್ಖೂನಂ, ಭಿಕ್ಖುನೀಹಿ ಅಸಾಧಾರಣಾ;

ತೇ ಸುಣೋಹಿ ಯಥಾತಥಂ.

ಸಙ್ಘಾದಿಸೇಸಾ, ದ್ವೇ ಅನಿಯತೇಹಿ ಅಟ್ಠ;

ನಿಸ್ಸಗ್ಗಿಯಾನಿ ದ್ವಾದಸ, ತೇಹಿ ತೇ ಹೋನ್ತಿ ವೀಸತಿ.

ದ್ವೇವೀಸತಿ ಖುದ್ದಕಾ, ಚತುರೋ ಪಾಟಿದೇಸನೀಯಾ;

ಛಚತ್ತಾರೀಸಾ ಚಿಮೇ ಹೋನ್ತಿ, ಭಿಕ್ಖೂನಂ ಭಿಕ್ಖುನೀಹಿ ಅಸಾಧಾರಣಾ.

ಸತಂ ತಿಂಸಾ ಚ ಭಿಕ್ಖುನೀನಂ, ಭಿಕ್ಖೂಹಿ ಅಸಾಧಾರಣಾ;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಮ್ಹಾ ದಸ ನಿಸ್ಸರೇ;

ನಿಸ್ಸಗ್ಗಿಯಾನಿ ದ್ವಾದಸ, ಛನ್ನವುತಿ ಚ ಖುದ್ದಕಾ;

ಅಟ್ಠ ಪಾಟಿದೇಸನೀಯಾ.

ಸತಂ ತಿಂಸಾ ಚಿಮೇ ಹೋನ್ತಿ ಭಿಕ್ಖುನೀನಂ, ಭಿಕ್ಖೂಹಿ ಅಸಾಧಾರಣಾ;

ಸತಂ ಸತ್ತತಿ ಛಚ್ಚೇವ, ಉಭಿನ್ನಂ ಅಸಾಧಾರಣಾ;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ ಸೋಳಸ;

ಅನಿಯತಾ ದ್ವೇ ಹೋನ್ತಿ, ನಿಸ್ಸಗ್ಗಿಯಾನಿ ಚತುವೀಸತಿ;

ಸತಂ ಅಟ್ಠಾರಸಾ ಚೇವ, ಖುದ್ದಕಾನಿ ಪವುಚ್ಚನ್ತಿ;

ದ್ವಾದಸ ಪಾಟಿದೇಸನೀಯಾ.

ಸತಂ ಸತ್ತತಿ ಛಚ್ಚೇವಿಮೇ ಹೋನ್ತಿ, ಉಭಿನ್ನಂ ಅಸಾಧಾರಣಾ;

ಸತಂ ಸತ್ತತಿ ಚತ್ತಾರಿ, ಉಭಿನ್ನಂ ಸಮಸಿಕ್ಖತಾ;

ತೇ ಸುಣೋಹಿ ಯಥಾತಥಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ ಸತ್ತ;

ನಿಸ್ಸಗ್ಗಿಯಾನಿ ಅಟ್ಠಾರಸ, ಸಮಸತ್ತತಿ ಖುದ್ದಕಾ;

ಪಞ್ಚಸತ್ತತಿ ಸೇಖಿಯಾನಿ.

ಸತಂ ಸತ್ತತಿ ಚತ್ತಾರಿ ಚಿಮೇ ಹೋನ್ತಿ, ಉಭಿನ್ನಂ ಸಮಸಿಕ್ಖತಾ;

ಅಟ್ಠೇ ಪಾರಾಜಿಕಾ ಯೇ ದುರಾಸದಾ, ತಾಲವತ್ಥುಸಮೂಪಮಾ.

ಪಣ್ಡುಪಲಾಸೋ ಪುಥುಸಿಲಾ, ಸೀಸಚ್ಛಿನ್ನೋವ ಸೋ ನರೋ;

ತಾಲೋವ ಮತ್ಥಕಚ್ಛಿನ್ನೋ, ಅವಿರುಳ್ಹೀ ಭವನ್ತಿ ತೇ.

ತೇವೀಸತಿ ಸಙ್ಘಾದಿಸೇಸಾ, ದ್ವೇ ಅನಿಯತಾ;

ದ್ವೇ ಚತ್ತಾರೀಸ ನಿಸ್ಸಗ್ಗಿಯಾ;

ಅಟ್ಠಾಸೀತಿಸತಂ ಪಾಚಿತ್ತಿಯಾ, ದ್ವಾದಸ ಪಾಟಿದೇಸನೀಯಾ.

ಪಞ್ಚಸತ್ತತಿ ಸೇಖಿಯಾ, ತೀಹಿ ಸಮಥೇಹಿ ಸಮ್ಮನ್ತಿ;

ಸಮ್ಮುಖಾ ಚ ಪಟಿಞ್ಞಾಯ, ತಿಣವತ್ಥಾರಕೇನ ಚ.

ದ್ವೇ ಉಪೋಸಥಾ ದ್ವೇ ಪವಾರಣಾ;

ಚತ್ತಾರಿ ಕಮ್ಮಾನಿ ಜಿನೇನ ದೇಸಿತಾ;

ಪಞ್ಚೇವ ಉದ್ದೇಸಾ ಚತುರೋ ಭವನ್ತಿ;

ಅನಞ್ಞಥಾ ಆಪತ್ತಿಕ್ಖನ್ಧಾ ಚ ಭವನ್ತಿ ಸತ್ತ.

ಅಧಿಕರಣಾನಿ ಚತ್ತಾರಿ ಸತ್ತಹಿ ಸಮಥೇಹಿ ಸಮ್ಮನ್ತಿ;

ದ್ವೀಹಿ ಚತೂಹಿ ತೀಹಿ ಕಿಚ್ಚಂ ಏಕೇನ ಸಮ್ಮತಿ.