೧. ಸತ್ತನಗರೇಸು ಪಞ್ಞತ್ತಸಿಕ್ಖಾಪದಂ

೩೩೫. ಏಕಂಸಂ ಚೀವರಂ ಕತ್ವಾ, ಪಗ್ಗಣ್ಹಿತ್ವಾನ ಅಞ್ಜಲಿಂ;

ಆಸೀಸಮಾನರೂಪೋವ [ಆಸಿಂಸಮಾನರೂಪೋವ (ಸೀ. ಸ್ಯಾ.)], ಕಿಸ್ಸ ತ್ವಂ ಇಧ ಮಾಗತೋ.

ದ್ವೀಸು ವಿನಯೇಸು ಯೇ ಪಞ್ಞತ್ತಾ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ಕತಿ ತೇ ಸಿಕ್ಖಾಪದಾ ಹೋನ್ತಿ;

ಕತಿಸು ನಗರೇಸು ಪಞ್ಞತ್ತಾ.

ಭದ್ದಕೋ ತೇ ಉಮ್ಮಙ್ಗೋ, ಯೋನಿಸೋ ಪರಿಪುಚ್ಛಸಿ;

ತಗ್ಘ ತೇ ಅಹಮಕ್ಖಿಸ್ಸಂ, ಯಥಾಸಿ ಕುಸಲೋ ತಥಾ.

ದ್ವೀಸು ವಿನಯೇಸು ಯೇ ಪಞ್ಞತ್ತಾ;

ಉದ್ದೇಸಂ ಆಗಚ್ಛನ್ತಿ ಉಪೋಸಥೇಸು;

ಅಡ್ಢುಡ್ಢಸತಾನಿ ತೇ ಹೋನ್ತಿ;

ಸತ್ತಸು ನಗರೇಸು ಪಞ್ಞತ್ತಾ.

ಕತಮೇಸು ಸತ್ತಸು ನಗರೇಸು ಪಞ್ಞತ್ತಾ;

ಇಙ್ಘ ಮೇ ತ್ವಂ ಬ್ಯಾಕರ ನಂ [ಇಙ್ಘ ಮೇ ತಂ ಬ್ಯಾಕರ (ಕ.)];

ತಂ ವಚನಪಥಂ [ತವ ವಚನಪಥಂ (ಸ್ಯಾ.)] ನಿಸಾಮಯಿತ್ವಾ;

ಪಟಿಪಜ್ಜೇಮ ಹಿತಾಯ ನೋ ಸಿಯಾ.

ವೇಸಾಲಿಯಂ ರಾಜಗಹೇ, ಸಾವತ್ಥಿಯಞ್ಚ ಆಳವಿಯಂ;

ಕೋಸಮ್ಬಿಯಞ್ಚ ಸಕ್ಕೇಸು, ಭಗ್ಗೇಸು ಚೇವ ಪಞ್ಞತ್ತಾ.

ಕತಿ ವೇಸಾಲಿಯಂ ಪಞ್ಞತ್ತಾ, ಕತಿ ರಾಜಗಹೇ ಕತಾ;

ಸಾವತ್ಥಿಯಂ ಕತಿ ಹೋನ್ತಿ, ಕತಿ ಆಳವಿಯಂ ಕತಾ.

ಕತಿ ಕೋಸಮ್ಬಿಯಂ ಪಞ್ಞತ್ತಾ, ಕತಿ ಸಕ್ಕೇಸು ವುಚ್ಚನ್ತಿ;

ಕತಿ ಭಗ್ಗೇಸು ಪಞ್ಞತ್ತಾ, ತಂ ಮೇ ಅಕ್ಖಾಹಿ ಪುಚ್ಛಿತೋ.

ದಸ ವೇಸಾಲಿಯಂ ಪಞ್ಞತ್ತಾ, ಏಕವೀಸ ರಾಜಗಹೇ ಕತಾ;

ಛಊನ ತೀಣಿಸತಾನಿ, ಸಬ್ಬೇ ಸಾವತ್ಥಿಯಂ ಕತಾ.

ಛ ಆಳವಿಯಂ ಪಞ್ಞತ್ತಾ, ಅಟ್ಠ ಕೋಸಮ್ಬಿಯಂ ಕತಾ;

ಅಟ್ಠ ಸಕ್ಕೇಸು ವುಚ್ಚನ್ತಿ, ತಯೋ ಭಗ್ಗೇಸು ಪಞ್ಞತ್ತಾ.

ಯೇ ವೇಸಾಲಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ [ಯಥಾಕಥಂ (ಸೀ. ಸ್ಯಾ. ಏವಮುಪರಿಪಿ)];

ಮೇಥುನವಿಗ್ಗಹುತ್ತರಿ, ಅತಿರೇಕಞ್ಚ ಕಾಳಕಂ.

ಭೂತಂ ಪರಮ್ಪರಭತ್ತಂ, ದನ್ತಪೋನೇನ [ದನ್ತಪೋಣೇನ (ಕ.)] ಅಚೇಲಕೋ;

ಭಿಕ್ಖುನೀಸು ಚ ಅಕ್ಕೋಸೋ, ದಸೇತೇ ವೇಸಾಲಿಯಂ ಕತಾ.

ಯೇ ರಾಜಗಹೇ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಅದಿನ್ನಾದಾನಂ ರಾಜಗಹೇ, ದ್ವೇ ಅನುದ್ಧಂಸನಾ ದ್ವೇಪಿ ಚ ಭೇದಾ.

ಅನ್ತರವಾಸಕಂ ರೂಪಿಯಂ ಸುತ್ತಂ, ಉಜ್ಝಾಪನೇನ ಚ ಪಾಚಿತಪಿಣ್ಡಂ;

ಗಣಭೋಜನಂ ವಿಕಾಲೇ ಚ, ಚಾರಿತ್ತಂ ನಹಾನಂ ಊನವೀಸತಿ.

ಚೀವರಂ ದತ್ವಾ ವೋಸಾಸನ್ತಿ, ಏತೇ ರಾಜಗಹೇ ಕತಾ;

ಗಿರಗ್ಗಚರಿಯಾ ತತ್ಥೇವ, ಛನ್ದದಾನೇನ ಏಕವೀಸತಿ.

ಯೇ ಸಾವತ್ಥಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾ ಭವನ್ತಿ ಸೋಳಸ.

ಅನಿಯತಾ ಚ ದ್ವೇ ಹೋನ್ತಿ, ನಿಸ್ಸಗ್ಗಿಯಾ ಚತುವೀಸತಿ;

ಛಪಞ್ಞಾಸಸತಞ್ಚೇವ, ಖುದ್ದಕಾನಿ ಪವುಚ್ಚನ್ತಿ.

ದಸಯೇವ ಚ ಗಾರಯ್ಹಾ, ದ್ವೇಸತ್ತತಿ ಚ ಸೇಖಿಯಾ;

ಛಊನ ತೀಣಿಸತಾನಿ, ಸಬ್ಬೇ ಸಾವತ್ಥಿಯಂ ಕತಾ.

ಯೇ ಆಳವಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಕುಟಿಕೋಸಿಯಸೇಯ್ಯಾ ಚ, ಖಣನೇ ಗಚ್ಛ ದೇವತೇ;

ಸಪ್ಪಾಣಕಞ್ಚ ಸಿಞ್ಚನ್ತಿ, ಛ ಏತೇ ಆಳವಿಯಂ ಕತಾ.

ಯೇ ಕೋಸಮ್ಬಿಯಂ ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಮಹಾವಿಹಾರೋ ದೋವಚಸ್ಸಂ, ಅಞ್ಞಂ ದ್ವಾರಂ ಸುರಾಯ ಚ;

ಅನಾದರಿಯಂ ಸಹಧಮ್ಮೋ, ಪಯೋಪಾನೇನ ಅಟ್ಠಮಂ.

ಯೇ ಸಕ್ಕೇಸು ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಏಳಕಲೋಮಾನಿ ಪತ್ತೋ ಚ, ಓವಾದೋ ಚೇವ ಭೇಸಜ್ಜಂ.

ಸೂಚಿ ಆರಞ್ಞಿಕೋ ಚೇವ, ಅಟ್ಠೇತೇ [ಛ ಏತೇ (ಸಬ್ಬತ್ಥ)] ಕಾಪಿಲವತ್ಥವೇ;

ಉದಕಸುದ್ಧಿಯಾ ಓವಾದೋ, ಭಿಕ್ಖುನೀಸು ಪವುಚ್ಚನ್ತಿ.

ಯೇ ಭಗ್ಗೇಸು ಪಞ್ಞತ್ತಾ, ತೇ ಸುಣೋಹಿ ಯಥಾತಥಂ;

ಸಮಾದಹಿತ್ವಾ ವಿಸಿಬ್ಬೇನ್ತಿ, ಸಾಮಿಸೇನ ಸಸಿತ್ಥಕಂ.

ಪಾರಾಜಿಕಾನಿ ಚತ್ತಾರಿ, ಸಙ್ಘಾದಿಸೇಸಾನಿ ಭವನ್ತಿ;

ಸತ್ತ ಚ ನಿಸ್ಸಗ್ಗಿಯಾನಿ, ಅಟ್ಠ ದ್ವತ್ತಿಂಸ ಖುದ್ದಕಾ.

ದ್ವೇ ಗಾರಯ್ಹಾ ತಯೋ ಸೇಕ್ಖಾ, ಛಪ್ಪಞ್ಞಾಸ ಸಿಕ್ಖಾಪದಾ;

ಛಸು ನಗರೇಸು ಪಞ್ಞತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ಛಊನ ತೀಣಿಸತಾನಿ, ಸಬ್ಬೇ ಸಾವತ್ಥಿಯಂ ಕತಾ;

ಕಾರುಣಿಕೇನ ಬುದ್ಧೇನ, ಗೋತಮೇನ ಯಸಸ್ಸಿನಾ.