೨. ಚತುವಿಪತ್ತಿಂ

೩೩೬. ಯಂ ತಂ [ಯಂ ಯಂ (ಕ.)] ಪುಚ್ಛಿಮ್ಹ ಅಕಿತ್ತಯಿ ನೋ;

ತಂ ತಂ ಬ್ಯಾಕತಂ ಅನಞ್ಞಥಾ;

ಅಞ್ಞಂ ತಂ ಪುಚ್ಛಾಮಿ ತದಿಙ್ಘ ಬ್ರೂಹಿ;

ಗರುಕ ಲಹುಕಞ್ಚಾಪಿ ಸಾವಸೇಸಂ;

ಅನವಸೇಸಂ ದುಟ್ಠುಲ್ಲಞ್ಚ ಅದುಟ್ಠುಲ್ಲಂ;

ಯೇ ಚ ಯಾವತತಿಯಕಾ.

ಸಾಧಾರಣಂ ಅಸಾಧಾರಣಂ;

ವಿಭತ್ತಿಯೋ ಚ [ವಿಪತ್ತಿಯೋ ಚ (ಸೀ. ಸ್ಯಾ.)] ಯೇಹಿ ಸಮಥೇಹಿ ಸಮ್ಮನ್ತಿ;

ಸಬ್ಬಾನಿಪೇತಾನಿ ವಿಯಾಕರೋಹಿ;

ಹನ್ದ ವಾಕ್ಯಂ ಸುಣೋಮ ತೇ.

ಏಕತಿಂಸಾ ಯೇ ಗರುಕಾ, ಅಟ್ಠೇತ್ಥ ಅನವಸೇಸಾ;

ಯೇ ಗರುಕಾ ತೇ ದುಟ್ಠುಲ್ಲಾ, ಯೇ ದುಟ್ಠುಲ್ಲಾ ಸಾ ಸೀಲವಿಪತ್ತಿ;

ಪಾರಾಜಿಕಂ ಸಙ್ಘಾದಿಸೇಸೋ, ‘‘ಸೀಲವಿಪತ್ತೀ’’ತಿ ವುಚ್ಚತಿ.

ಥುಲ್ಲಚ್ಚಯಂ ಪಾಚಿತ್ತಿಯಾ, ಪಾಟಿದೇಸನೀಯಂ ದುಕ್ಕಟಂ;

ದುಬ್ಭಾಸಿತಂ ಯೋ ಚಾಯಂ, ಅಕ್ಕೋಸತಿ ಹಸಾಧಿಪ್ಪಾಯೋ;

ಅಯಂ ಸಾ ಆಚಾರವಿಪತ್ತಿಸಮ್ಮತಾ.

ವಿಪರೀತದಿಟ್ಠಿಂ ಗಣ್ಹನ್ತಿ, ಅಸದ್ಧಮ್ಮೇಹಿ ಪುರಕ್ಖತಾ;

ಅಬ್ಭಾಚಿಕ್ಖನ್ತಿ ಸಮ್ಬುದ್ಧಂ, ದುಪ್ಪಞ್ಞಾ ಮೋಹಪಾರುತಾ;

ಅಯಂ ಸಾ ದಿಟ್ಠಿವಿಪತ್ತಿಸಮ್ಮತಾ.

ಆಜೀವಹೇತು ಆಜೀವಕಾರಣಾ ಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ, ಆಜೀವಹೇತು ಆಜೀವಕಾರಣಾ ಸಞ್ಚರಿತ್ತಂ ಸಮಾಪಜ್ಜತಿ, ಆಜೀವಹೇತು ಆಜೀವಕಾರಣಾ – ‘‘ಯೋ ತೇ ವಿಹಾರೇ ವಸತಿ, ಸೋ ಭಿಕ್ಖು ಅರಹಾ’’ತಿ ಭಣತಿ, ಆಜೀವಹೇತು ಆಜೀವಕಾರಣಾ ಭಿಕ್ಖು ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಜೀವಹೇತು ಆಜೀವಕಾರಣಾ ಭಿಕ್ಖುನೀ ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಜೀವಹೇತು ಆಜೀವಕಾರಣಾ ಸೂಪಂ ವಾ ಓದನಂ ವಾ ಅಗಿಲಾನೋ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ. ಅಯಂ ಸಾ ಆಜೀವವಿಪತ್ತಿ ಸಮ್ಮತಾ.

ಏಕಾದಸ ಯಾವತತಿಯಕಾ, ತೇ ಸುಣೋಹಿ ಯಥಾತಥಂ;

ಉಕ್ಖಿತ್ತಾನುವತ್ತಿಕಾ, ಅಟ್ಠ ಯಾವತತಿಯಕಾ;

ಅರಿಟ್ಠೋ ಚಣ್ಡಕಾಳೀ ಚ, ಇಮೇ ತೇ ಯಾವತತಿಯಕಾ.