೯. ನವಕವಾರೋ

೩೨೯. ನವ ಆಘಾತವತ್ಥೂನಿ. ನವ ಆಘಾತಪಟಿವಿನಯಾ. ನವ ವಿನೀತವತ್ಥೂನಿ. ನವ ಪಠಮಾಪತ್ತಿಕಾ. ನವಹಿ ಸಙ್ಘೋ ಭಿಜ್ಜತಿ. ನವ ಪಣೀತಭೋಜನಾನಿ. ನವಮಂಸೇಹಿ ದುಕ್ಕಟಂ. ನವ ಪಾತಿಮೋಕ್ಖುದ್ದೇಸಾ. ನವ ಪರಮಾನಿ. ನವ ತಣ್ಹಾಮೂಲಕಾ ಧಮ್ಮಾ. ನವ ವಿಧಮಾನಾ. ನವ ಚೀವರಾನಿ ಅಧಿಟ್ಠಾತಬ್ಬಾನಿ. ನವ ಚೀವರಾನಿ ನ ವಿಕಪ್ಪೇತಬ್ಬಾನಿ. ದೀಘಸೋ ನವ ವಿದತ್ಥಿಯೋ ಸುಗತವಿದತ್ಥಿಯಾ. ನವ ಅಧಮ್ಮಿಕಾನಿ ದಾನಾನಿ. ನವ ಅಧಮ್ಮಿಕಾ ಪಟಿಗ್ಗಹಾ. ನವ ಅಧಮ್ಮಿಕಾ ಪರಿಭೋಗಾ – ತೀಣಿ ಧಮ್ಮಿಕಾನಿ ದಾನಾನಿ, ತಯೋ ಧಮ್ಮಿಕಾ ಪಟಿಗ್ಗಹಾ, ತಯೋ ಧಮ್ಮಿಕಾ ಪರಿಭೋಗಾ. ನವ ಅಧಮ್ಮಿಕಾ ಸಞ್ಞತ್ತಿಯೋ [ಪಞ್ಞತ್ತಿಯೋ (ಸಬ್ಬತ್ಥ) ಅಟ್ಠಕಥಾ ಚ ಸಮಥಕ್ಖನ್ಧಕೇ ಕಣ್ಹಪಕ್ಖನವಕಞ್ಚ ಓಲೋಕೇತಬ್ಬಂ]. ನವ ಧಮ್ಮಿಕಾ ಸಞ್ಞತ್ತಿಯೋ. ಅಧಮ್ಮಕಮ್ಮೇ ದ್ವೇ ನವಕಾನಿ. ಧಮ್ಮಕಮ್ಮೇ ದ್ವೇ ನವಕಾನಿ. ನವ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ನವ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನೀತಿ.

ನವಕಂ ನಿಟ್ಠಿತಂ.

ತಸ್ಸುದ್ದಾನಂ –

ಆಘಾತವತ್ಥುವಿನಯಾ, ವಿನೀತಾ ಪಠಮೇನ ಚ;

ಭಿಜ್ಜತಿ ಚ ಪಣೀತಞ್ಚ, ಮಂಸುದ್ದೇಸಪರಮಾನಿ ಚ.

ತಣ್ಹಾ ಮಾನಾ ಅಧಿಟ್ಠಾನಾ, ವಿಕಪ್ಪೇ ಚ ವಿದತ್ಥಿಯೋ;

ದಾನಾ ಪಟಿಗ್ಗಹಾ ಭೋಗಾ, ತಿವಿಧಾ ಪುನ ಧಮ್ಮಿಕಾ.

ಅಧಮ್ಮಧಮ್ಮಸಞ್ಞತ್ತಿ, ದುವೇ ದ್ವೇ ನವಕಾನಿ ಚ;

ಪಾತಿಮೋಕ್ಖಟ್ಠಪನಾನಿ, ಅಧಮ್ಮಧಮ್ಮಿಕಾನಿ ಚಾತಿ.