೧೦. ದಸಕವಾರೋ

೩೩೦. ದಸ ಆಘಾತವತ್ಥೂನಿ. ದಸ ಆಘಾತಪಟಿವಿನಯಾ. ದಸ ವಿನೀತವತ್ಥೂನಿ. ದಸವತ್ಥುಕಾ ಮಿಚ್ಛಾದಿಟ್ಠಿ. ದಸವತ್ಥುಕಾ ಸಮ್ಮಾದಿಟ್ಠಿ. ದಸ ಅನ್ತಗ್ಗಾಹಿಕಾ ದಿಟ್ಠಿ. ದಸ ಮಿಚ್ಛತ್ತಾ. ದಸ ಸಮ್ಮತ್ತಾ. ದಸ ಅಕುಸಲಕಮ್ಮಪಥಾ. ದಸ ಕುಸಲಕಮ್ಮಪಥಾ. ದಸ ಅಧಮ್ಮಿಕಾ ಸಲಾಕಗ್ಗಾಹಾ. ದಸ ಧಮ್ಮಿಕಾ ಸಲಾಕಗ್ಗಾಹಾ. ಸಾಮಣೇರಾನಂ ದಸ ಸಿಕ್ಖಾಪದಾನಿ. ದಸಹಙ್ಗೇಹಿ ಸಮನ್ನಾಗತೋ ಸಾಮಣೇರೋ ನಾಸೇತಬ್ಬೋ.

ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಅತ್ತನೋ ಭಾಸಪರಿಯನ್ತಂ ನ ಉಗ್ಗಣ್ಹಾತಿ, ಪರಸ್ಸ ಭಾಸಪರಿಯನ್ತಂ ನ ಉಗ್ಗಣ್ಹಾತಿ, ಅತ್ತನೋ ಭಾಸಪರಿಯನ್ತಂ ಅನುಗ್ಗಹೇತ್ವಾ ಪರಸ್ಸ ಭಾಸಪರಿಯನ್ತಂ ಅನುಗ್ಗಹೇತ್ವಾ ಅಧಮ್ಮೇನ ಕಾರೇತಿ, ಅಪ್ಪಟಿಞ್ಞಾಯ ಆಪತ್ತಿಂ ನ ಜಾನಾತಿ, ಆಪತ್ತಿಯಾ ಮೂಲಂ ನ ಜಾನಾತಿ, ಆಪತ್ತಿಸಮುದಯಂ ನ ಜಾನಾತಿ, ಆಪತ್ತಿನಿರೋಧಂ ನ ಜಾನಾತಿ, ಆಪತ್ತಿನಿರೋಧಗಾಮಿನಿಂ ಪಟಿಪದಂ ನ ಜಾನಾತಿ.

ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಅತ್ತನೋ ಭಾಸಪರಿಯನ್ತಂ ಉಗ್ಗಣ್ಹಾತಿ, ಪರಸ್ಸ ಭಾಸಪರಿಯನ್ತಂ ಉಗ್ಗಣ್ಹಾತಿ, ಅತ್ತನೋ ಭಾಸಪರಿಯನ್ತಂ ಉಗ್ಗಹೇತ್ವಾ ಪರಸ್ಸ ಭಾಸಪರಿಯನ್ತಂ ಉಗ್ಗಹೇತ್ವಾ ಧಮ್ಮೇನ ಕಾರೇತಿ, ಪಟಿಞ್ಞಾಯ ಆಪತ್ತಿಂ ಜಾನಾತಿ, ಆಪತ್ತಿಯಾ ಮೂಲಂ ಜಾನಾತಿ, ಆಪತ್ತಿಸಮುದಯಂ ಜಾನಾತಿ, ಆಪತ್ತಿನಿರೋಧಂ ಜಾನಾತಿ, ಆಪತ್ತಿನಿರೋಧಗಾಮಿನಿಂ ಪಟಿಪದಂ ಜಾನಾತಿ.

ಅಪರೇಹಿಪಿ ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಅಧಿಕರಣಂ ನ ಜಾನಾತಿ, ಅಧಿಕರಣಸ್ಸ ಮೂಲಂ ನ ಜಾನಾತಿ, ಅಧಿಕರಣಸಮುದಯಂ ನ ಜಾನಾತಿ, ಅಧಿಕರಣನಿರೋಧಂ ನ ಜಾನಾತಿ, ಅಧಿಕರಣನಿರೋಧಗಾಮಿನಿಂ ಪಟಿಪದಂ ನ ಜಾನಾತಿ, ವತ್ಥುಂ ನ ಜಾನಾತಿ, ನಿದಾನಂ [ಉದ್ದಾನಂ (ಕ.)] ನ ಜಾನಾತಿ, ಪಞ್ಞತ್ತಿಂ ನ ಜಾನಾತಿ, ಅನುಪಞ್ಞತ್ತಿಂ ನ ಜಾನಾತಿ, ಅನುಸನ್ಧಿವಚನಪಥಂ ನ ಜಾನಾತಿ.

ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಅಧಿಕರಣಂ ಜಾನಾತಿ, ಅಧಿಕರಣಸ್ಸ ಮೂಲಂ ಜಾನಾತಿ, ಅಧಿಕರಣಸಮುದಯಂ ಜಾನಾತಿ, ಅಧಿಕರಣನಿರೋಧಂ ಜಾನಾತಿ, ಅಧಿಕರಣನಿರೋಧಗಾಮಿನಿಂ ಪಟಿಪದಂ ಜಾನಾತಿ, ವತ್ಥುಂ ಜಾನಾತಿ, ನಿದಾನಂ ಜಾನಾತಿ, ಪಞ್ಞತ್ತಿಂ ಜಾನಾತಿ, ಅನುಪಞ್ಞತ್ತಿಂ ಜಾನಾತಿ, ಅನುಸನ್ಧಿವಚನಪಥಂ ಜಾನಾತಿ.

ಅಪರೇಹಿಪಿ ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಞತ್ತಿಂ ನ ಜಾನಾತಿ, ಞತ್ತಿಯಾ ಕರಣಂ ನ ಜಾನಾತಿ, ನ ಪುಬ್ಬಕುಸಲೋ ಹೋತಿ, ನ ಅಪರಕುಸಲೋ ಹೋತಿ, ಅಕಾಲಞ್ಞೂ ಚ ಹೋತಿ, ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಆಚರಿಯಪರಮ್ಪರಾ ಖೋ ಪನಸ್ಸ ನ ಸುಗ್ಗಹಿತಾ ಹೋತಿ ನ ಸುಮನಸಿಕತಾ ನ ಸೂಪಧಾರಿತಾ.

ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಞತ್ತಿಂ ಜಾನಾತಿ, ಞತ್ತಿಯಾ ಕರಣಂ ಜಾನಾತಿ, ಪುಬ್ಬಕುಸಲೋ ಹೋತಿ, ಅಪರಕುಸಲೋ ಹೋತಿ, ಕಾಲಞ್ಞೂ ಚ ಹೋತಿ, ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಆಚರಿಯಪರಮ್ಪರಾ ಖೋ ಪನಸ್ಸ ಸುಗ್ಗಹಿತಾ ಹೋತಿ ಸುಮನಸಿಕತಾ ಸೂಪಧಾರಿತಾ.

ಅಪರೇಹಿಪಿ ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ವಿತ್ಥಾರೇನ ನ ಸ್ವಾಗತಾನಿ ಹೋನ್ತಿ ನ ಸುವಿಭತ್ತಾನಿ ನ ಸುಪ್ಪವತ್ತೀನಿ ನ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ, ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಅಧಿಕರಣೇ ಚ ನ ವಿನಿಚ್ಛಯಕುಸಲೋ ಹೋತಿ.

ದಸಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ವಿತ್ಥಾರೇನ ಸ್ವಾಗತಾನಿ ಹೋನ್ತಿ ಸುವಿಭತ್ತಾನಿ ಸುಪ್ಪವತ್ತೀನಿ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ, ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಅಧಿಕರಣೇ ಚ ವಿನಿಚ್ಛಯಕುಸಲೋ ಹೋತಿ.

[ಅ. ನಿ. ೧೦.೩೩] ದಸಹಙ್ಗೇಹಿ ಸಮನ್ನಾಗತೋ ಭಿಕ್ಖು ಉಬ್ಬಾಹಿಕಾಯ ಸಮ್ಮನ್ನಿತಬ್ಬೋ. ದಸ ಅತ್ಥವಸೇ ಪಟಿಚ್ಚ ತಥಾಗತೇನ ಸಾವಕಾನಂ ಸಿಕ್ಖಾಪದಂ ಪಞ್ಞತ್ತಂ. ದಸ ಆದೀನವಾ ರಾಜನ್ತೇಪುರಪ್ಪವೇಸನೇ. ದಸ ದಾನವತ್ಥೂನಿ. ದಸ ರತನಾನಿ. ದಸವಗ್ಗೋ ಭಿಕ್ಖುಸಙ್ಘೋ. ದಸವಗ್ಗೇನ ಗಣೇನ ಉಪಸಮ್ಪಾದೇತಬ್ಬಂ. ದಸ ಪಂಸುಕೂಲಾನಿ. ದಸ ಚೀವರಧಾರಣಾ [ಚೀವರಧಾರಣಾನಿ (ಸ್ಯಾ.)]. ದಸಾಹಪರಮಂ ಅತಿರೇಕಚೀವರಂ ಧಾರೇತಬ್ಬಂ. ದಸ ಸುಕ್ಕಾನಿ. ದಸ ಇತ್ಥಿಯೋ. ದಸ ಭರಿಯಾಯೋ. ವೇಸಾಲಿಯಾ ದಸ ವತ್ಥೂನಿ ದೀಪೇನ್ತಿ. ದಸ ಪುಗ್ಗಲಾ ಅವನ್ದಿಯಾ. ದಸ ಅಕ್ಕೋಸವತ್ಥೂನಿ. ದಸಹಾಕಾರೇಹಿ ಪೇಸುಞ್ಞಂ ಉಪಸಂಹರತಿ. ದಸ ಸೇನಾಸನಾನಿ. ದಸ ವರಾನಿ ಯಾಚಿಂಸು. ದಸ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ದಸ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ದಸಾನಿಸಂಸಾ ಯಾಗುಯಾ. ದಸ ಮಂಸಾ ಅಕಪ್ಪಿಯಾ. ದಸ ಪರಮಾನಿ. ದಸವಸ್ಸೇನ ಭಿಕ್ಖುನಾ ಬ್ಯತ್ತೇನ ಪಟಿಬಲೇನ ಪಬ್ಬಾಜೇತಬ್ಬಂ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ. ದಸವಸ್ಸಾಯ ಭಿಕ್ಖುನಿಯಾ ಬ್ಯತ್ತಾಯ ಪಟಿಬಲಾಯ ಪಬ್ಬಾಜೇತಬ್ಬಂ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೀ ಉಪಟ್ಠಾಪೇತಬ್ಬಾ. ದಸವಸ್ಸಾಯ ಭಿಕ್ಖುನಿಯಾ ಬ್ಯತ್ತಾಯ ಪಟಿಬಲಾಯ ವುಟ್ಠಾಪನಸಮ್ಮುತಿ ಸಾದಿತಬ್ಬಾ. ದಸವಸ್ಸಾಯ ಗಿಹಿಗತಾಯ ಸಿಕ್ಖಾ ದಾತಬ್ಬಾತಿ.

ದಸಕಂ ನಿಟ್ಠಿತಂ.

ತಸ್ಸುದ್ದಾನಂ –

ಆಘಾತಂ ವಿನಯಂ ವತ್ಥು, ಮಿಚ್ಛಾ ಸಮ್ಮಾ ಚ ಅನ್ತಗಾ;

ಮಿಚ್ಛತ್ತಾ ಚೇವ ಸಮ್ಮತ್ತಾ, ಅಕುಸಲಾ ಕುಸಲಾಪಿ ಚ.

ಸಲಾಕಾ ಅಧಮ್ಮಾ ಧಮ್ಮಾ, ಸಾಮಣೇರಾ ಚ ನಾಸನಾ;

ಭಾಸಾಧಿಕರಣಞ್ಚೇವ, ಞತ್ತಿಲಹುಕಮೇವ ಚ.

ಲಹುಕಾ ಗರುಕಾ ಏತೇ, ಕಣ್ಹಸುಕ್ಕಾ ವಿಜಾನಥ;

ಉಬ್ಬಾಹಿಕಾ ಚ ಸಿಕ್ಖಾ ಚ, ಅನ್ತೇಪುರೇ ಚ ವತ್ಥೂನಿ.

ರತನಂ ದಸವಗ್ಗೋ ಚ, ತಥೇವ ಉಪಸಮ್ಪದಾ;

ಪಂಸುಕೂಲಧಾರಣಾ ಚ, ದಸಾಹಸುಕ್ಕಇತ್ಥಿಯೋ.

ಭರಿಯಾ ದಸ ವತ್ಥೂನಿ, ಅವನ್ದಿಯಕ್ಕೋಸೇನ ಚ;

ಪೇಸುಞ್ಞಞ್ಚೇವ ಸೇನಾನಿ, ವರಾನಿ ಚ ಅಧಮ್ಮಿಕಾ.

ಧಮ್ಮಿಕಾ ಯಾಗುಮಂಸಾ ಚ, ಪರಮಾ ಭಿಕ್ಖು ಭಿಕ್ಖುನೀ;

ವುಟ್ಠಾಪನಾ ಗಿಹಿಗತಾ, ದಸಕಾ ಸುಪ್ಪಕಾಸಿತಾತಿ.