೧೧. ಏಕಾದಸಕವಾರೋ

೩೩೧. ಏಕಾದ ಪುಗ್ಗಲಾ ಅನುಪಸಮ್ಪನ್ನಾ ನ ಉಪಸಮ್ಪಾದೇತಬ್ಬಾ, ಉಪಸಮ್ಪನ್ನಾ ನಾಸೇತಬ್ಬಾ. ಏಕಾದಸ ಪಾದುಕಾ ಅಕಪ್ಪಿಯಾ. ಏಕಾದಸ ಪತ್ತಾ ಅಕಪ್ಪಿಯಾ. ಏಕಾದಸ ಚೀವರಾನಿ ಅಕಪ್ಪಿಯಾನಿ. ಏಕಾದಸ ಯಾವತತಿಯಕಾ. ಭಿಕ್ಖುನೀನಂ ಏಕಾದಸ ಅನ್ತರಾಯಿಕಾ ಧಮ್ಮಾ ಪುಚ್ಛಿತಬ್ಬಾ. ಏಕಾದಸ ಚೀವರಾನಿ ಅಧಿಟ್ಠಾತಬ್ಬಾನಿ. ಏಕಾದಸ ಚೀವರಾನಿ ನ ವಿಕಪ್ಪೇತಬ್ಬಾನಿ. ಏಕಾದಸೇ ಅರುಣುಗ್ಗಮನೇ ನಿಸ್ಸಗ್ಗಿಯಂ ಹೋತಿ. ಏಕಾದಸ ಗಣ್ಠಿಕಾ ಕಪ್ಪಿಯಾ. ಏಕಾದಸ ವಿಧಾ [ವೀಥಾ (ಸ್ಯಾ.)] ಕಪ್ಪಿಯಾ. ಏಕಾದಸ ಪಥವೀ ಅಕಪ್ಪಿಯಾ. ಏಕಾದಸ ಪಥವೀ ಕಪ್ಪಿಯಾ. ಏಕಾದಸ ನಿಸ್ಸಯಪಟಿಪ್ಪಸ್ಸದ್ಧಿಯೋ. ಏಕಾದಸ ಪುಗ್ಗಲಾ ಅವನ್ದಿಯಾ. ಏಕಾದಸ ಪರಮಾನಿ. ಏಕಾದಸ ವರಾನಿ ಯಾಚಿಂಸು. ಏಕಾದಸ ಸೀಮಾದೋಸಾ. ಅಕ್ಕೋಸಕಪರಿಭಾಸಕೇ ಪುಗ್ಗಲೇ ಏಕಾದಸಾದೀನವಾ ಪಾಟಿಕಙ್ಖಾ. [ಅ. ನಿ. ೧೧.೧೫; ಮಿ. ಪ. ೪.೪.೬] ಮೇತ್ತಾಯ ಚೇತೋವಿಮುತ್ತಿಯಾ ಆಸೇವಿತಾಯ ಭಾವಿತಾಯ ಬಹುಲೀಕತಾಯ ಯಾನೀಕತಾಯ ವತ್ಥುಕತಾಯ ಅನುಟ್ಠಿತಾಯ ಪರಿಚಿತಾಯ ಸುಸಮಾರದ್ಧಾಯ ಏಕಾದಸಾನಿಸಂಸಾ ಪಾಟಿಕಙ್ಖಾ. ಸುಖಂ ಸುಪತಿ, ಸುಖಂ ಪಟಿಬುಜ್ಝತಿ, ನ ಪಾಪಕಂ ಸುಪಿನಂ ಪಸ್ಸತಿ, ಮನುಸ್ಸಾನಂ ಪಿಯೋ ಹೋತಿ, ಅಮನುಸ್ಸಾನಂ ಪಿಯೋ ಹೋತಿ, ದೇವತಾ ರಕ್ಖನ್ತಿ, ನಾಸ್ಸ ಅಗ್ಗಿ ವಾ ವಿಸಂ ವಾ ಸತ್ಥಂ ವಾ ಕಮತಿ, ತುವಟ್ಟಂ ಚಿತ್ತಂ ಸಮಾಧಿಯತಿ, ಮುಖವಣ್ಣೋ ವಿಪ್ಪಸೀದತಿ, ಅಸಮ್ಮೂಳ್ಹೋ ಕಾಲಙ್ಕರೋತಿ, ಉತ್ತರಿ ಅಪ್ಪಟಿವಿಜ್ಝನ್ತೋ ಬ್ರಹ್ಮಲೋಕೂಪಗೋ ಹೋತಿ – ಮೇತ್ತಾಯ ಚೇತೋವಿಮುತ್ತಿಯಾ ಆಸೇವಿತಾಯ ಭಾವಿತಾಯ ಬಹುಲೀಕತಾಯ ಯಾನೀಕತಾಯ ವತ್ಥುಕತಾಯ ಅನುಟ್ಠಿತಾಯ ಪರಿಚಿತಾಯ ಸುಸಮಾರದ್ಧಾಯ ಇಮೇ ಏಕಾದಸಾನಿಸಂಸಾ ಪಾಟಿಕಙ್ಖಾತಿ.

ಏಕಾದಸಕಂ ನಿಟ್ಠಿತಂ.

ತಸ್ಸುದ್ದಾನಂ –

ನಾಸೇತಬ್ಬಾ ಪಾದುಕಾ ಚ, ಪತ್ತಾ ಚ ಚೀವರಾನಿ ಚ;

ತತಿಯಾ ಪುಚ್ಛಿತಬ್ಬಾ ಚ, ಅಧಿಟ್ಠಾನವಿಕಪ್ಪನಾ.

ಅರುಣಾ ಗಣ್ಠಿಕಾ ವಿಧಾ, ಅಕಪ್ಪಿಯಾ ಚ ಕಪ್ಪಿಯಂ;

ನಿಸ್ಸಯಾವನ್ದಿಯಾ ಚೇವ, ಪರಮಾನಿ ವರಾನಿ ಚ;

ಸೀಮಾದೋಸಾ ಚ ಅಕ್ಕೋಸಾ, ಮೇತ್ತಾಯೇಕಾದಸಾ ಕತಾತಿ.

ಏಕುತ್ತರಿಕನಯೋ.

ತಸ್ಸುದ್ದಾನಂ –

ಏಕಕಾ ಚ ದುಕಾ ಚೇವ, ತಿಕಾ ಚ ಚತುಪಞ್ಚಕಾ;

ಛಸತ್ತಟ್ಠನವಕಾ ಚ, ದಸ ಏಕಾದಸಾನಿ ಚ.

ಹಿತಾಯ ಸಬ್ಬಸತ್ತಾನಂ, ಞಾತಧಮ್ಮೇನ ತಾದಿನಾ;

ಏಕುತ್ತರಿಕಾ ವಿಮಲಾ, ಮಹಾವೀರೇನ ದೇಸಿತಾತಿ.

ಏಕುತ್ತರಿಕನಯೋ ನಿಟ್ಠಿತೋ.