ಏಕುತ್ತರಿಕನಯೋ

೧. ಏಕಕವಾರೋ

೩೨೧. ಆಪತ್ತಿಕರಾ ಧಮ್ಮಾ ಜಾನಿತಬ್ಬಾ. ಅನಾಪತ್ತಿಕರಾ ಧಮ್ಮಾ ಜಾನಿತಬ್ಬಾ. ಆಪತ್ತಿ ಜಾನಿತಬ್ಬಾ. ಅನಾಪತ್ತಿ ಜಾನಿತಬ್ಬಾ. ಲಹುಕಾ ಆಪತ್ತಿ ಜಾನಿತಬ್ಬಾ. ಗರುಕಾ ಆಪತ್ತಿ ಜಾನಿತಬ್ಬಾ. ಸಾವಸೇಸಾ ಆಪತ್ತಿ ಜಾನಿತಬ್ಬಾ. ಅನವಸೇಸಾ ಆಪತ್ತಿ ಜಾನಿತಬ್ಬಾ. ದುಟ್ಠುಲ್ಲಾ ಆಪತ್ತಿ ಜಾನಿತಬ್ಬಾ. ಅದುಟ್ಠುಲ್ಲಾ ಆಪತ್ತಿ ಜಾನಿತಬ್ಬಾ. ಸಪ್ಪಟಿಕಮ್ಮಾ ಆಪತ್ತಿ ಜಾನಿತಬ್ಬಾ. ಅಪ್ಪಟಿಕಮ್ಮಾ ಆಪತ್ತಿ ಜಾನಿತಬ್ಬಾ. ದೇಸನಾಗಾಮಿನೀ ಆಪತ್ತಿ ಜಾನಿತಬ್ಬಾ. ಅದೇಸನಾಗಾಮಿನೀ ಆಪತ್ತಿ ಜಾನಿತಬ್ಬಾ. ಅನ್ತರಾಯಿಕಾ ಆಪತ್ತಿ ಜಾನಿತಬ್ಬಾ. ಅನನ್ತರಾಯಿಕಾ ಆಪತ್ತಿ ಜಾನಿತಬ್ಬಾ. ಸಾವಜ್ಜಪಞ್ಞತ್ತಿ ಆಪತ್ತಿ ಜಾನಿತಬ್ಬಾ. ಅನವಜ್ಜಪಞ್ಞತ್ತಿ ಆಪತ್ತಿ ಜಾನಿತಬ್ಬಾ. ಕಿರಿಯತೋ ಸಮುಟ್ಠಿತಾ ಆಪತ್ತಿ ಜಾನಿತಬ್ಬಾ. ಅಕಿರಿಯತೋ ಸಮುಟ್ಠಿತಾ ಆಪತ್ತಿ ಜಾನಿತಬ್ಬಾ. ಕಿರಿಯಾಕಿರಿಯತೋ ಸಮುಟ್ಠಿತಾ ಆಪತ್ತಿ ಜಾನಿತಬ್ಬಾ. ಪುಬ್ಬಾಪತ್ತಿ ಜಾನಿತಬ್ಬಾ. ಅಪರಾಪತ್ತಿ ಜಾನಿತಬ್ಬಾ. ಪುಬ್ಬಾಪತ್ತೀನಂ ಅನ್ತರಾಪತ್ತಿ ಜಾನಿತಬ್ಬಾ. ಅಪರಾಪತ್ತೀನಂ ಅನ್ತರಾಪತ್ತಿ ಜಾನಿತಬ್ಬಾ. ದೇಸಿತಾ ಗಣನೂಪಗಾ ಆಪತ್ತಿ ಜಾನಿತಬ್ಬಾ. ದೇಸಿತಾ ನ ಗಣನೂಪಗಾ ಆಪತ್ತಿ ಜಾನಿತಬ್ಬಾ. ಪಞ್ಞತ್ತಿ ಜಾನಿತಬ್ಬಾ. ಅನುಪಞ್ಞತ್ತಿ ಜಾನಿತಬ್ಬಾ. ಅನುಪ್ಪನ್ನಪಞ್ಞತ್ತಿ ಜಾನಿತಬ್ಬಾ. ಸಬ್ಬತ್ಥಪಞ್ಞತ್ತಿ ಜಾನಿತಬ್ಬಾ. ಪದೇಸಪಞ್ಞತ್ತಿ ಜಾನಿತಬ್ಬಾ. ಸಾಧಾರಣಪಞ್ಞತ್ತಿ ಜಾನಿತಬ್ಬಾ. ಅಸಾಧಾರಣಪಞ್ಞತ್ತಿ ಜಾನಿತಬ್ಬಾ. ಏಕತೋಪಞ್ಞತ್ತಿ ಜಾನಿತಬ್ಬಾ. ಉಭತೋಪಞ್ಞತ್ತಿ ಜಾನಿತಬ್ಬಾ. ಥುಲ್ಲವಜ್ಜಾ ಆಪತ್ತಿ ಜಾನಿತಬ್ಬಾ. ಅಥುಲ್ಲವಜ್ಜಾ ಆಪತ್ತಿ ಜಾನಿತಬ್ಬಾ. ಗಿಹಿಪಟಿಸಂಯುತ್ತಾ ಆಪತ್ತಿ ಜಾನಿತಬ್ಬಾ. ನ ಗಿಹಿಪಟಿಸಂಯುತ್ತಾ ಆಪತ್ತಿ ಜಾನಿತಬ್ಬಾ. ನಿಯತಾ ಆಪತ್ತಿ ಜಾನಿತಬ್ಬಾ. ಅನಿಯತಾ ಆಪತ್ತಿ ಜಾನಿತಬ್ಬಾ. ಆದಿಕರೋ ಪುಗ್ಗಲೋ ಜಾನಿತಬ್ಬೋ. ಅನಾದಿಕರೋ ಪುಗ್ಗಲೋ ಜಾನಿತಬ್ಬೋ. ಅಧಿಚ್ಚಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಅಭಿಣ್ಹಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಚೋದಕೋ ಪುಗ್ಗಲೋ ಜಾನಿತಬ್ಬೋ. ಚುದಿತಕೋ ಪುಗ್ಗಲೋ ಜಾನಿತಬ್ಬೋ. ಅಧಮ್ಮಚೋದಕೋ ಪುಗ್ಗಲೋ ಜಾನಿತಬ್ಬೋ. ಅಧಮ್ಮಚುದಿತಕೋ ಪುಗ್ಗಲೋ ಜಾನಿತಬ್ಬೋ. ಧಮ್ಮಚೋದಕೋ ಪುಗ್ಗಲೋ ಜಾನಿತಬ್ಬೋ. ಧಮ್ಮಚುದಿತಕೋ ಪುಗ್ಗಲೋ ಜಾನಿತಬ್ಬೋ. ನಿಯತೋ ಪುಗ್ಗಲೋ ಜಾನಿತಬ್ಬೋ. ಅನಿಯತೋ ಪುಗ್ಗಲೋ ಜಾನಿತಬ್ಬೋ. ಅಭಬ್ಬಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಭಬ್ಬಾಪತ್ತಿಕೋ ಪುಗ್ಗಲೋ ಜಾನಿತಬ್ಬೋ. ಉಕ್ಖಿತ್ತಕೋ ಪುಗ್ಗಲೋ ಜಾನಿತಬ್ಬೋ. ಅನುಕ್ಖಿತ್ತಕೋ ಪುಗ್ಗಲೋ ಜಾನಿತಬ್ಬೋ. ನಾಸಿತಕೋ ಪುಗ್ಗಲೋ ಜಾನಿತಬ್ಬೋ. ಅನಾಸಿತಕೋ ಪುಗ್ಗಲೋ ಜಾನಿತಬ್ಬೋ. ಸಮಾನಸಂವಾಸಕೋ ಪುಗ್ಗಲೋ ಜಾನಿತಬ್ಬೋ. ಅಸಮಾನಸಂವಾಸಕೋ ಪುಗ್ಗಲೋ ಜಾನಿತಬ್ಬೋ. ಠಪನಂ ಜಾನಿತಬ್ಬನ್ತಿ.

ಏಕಕಂ ನಿಟ್ಠಿತಂ.

ತಸ್ಸುದ್ದಾನಂ –

ಕರಾ ಆಪತ್ತಿ ಲಹುಕಾ, ಸಾವಸೇಸಾ ಚ ದುಟ್ಠುಲ್ಲಾ;

ಪಟಿಕಮ್ಮದೇಸನಾ ಚ, ಅನ್ತರಾ ವಜ್ಜಕಿರಿಯಂ.

ಕಿರಿಯಾಕಿರಿಯಂ ಪುಬ್ಬಾ, ಅನ್ತರಾ ಗಣನೂಪಗಾ;

ಪಞ್ಞತ್ತಿ ಅನಾನುಪ್ಪನ್ನ, ಸಬ್ಬಸಾಧಾರಣಾ ಚ ಏಕತೋ [ಪಞ್ಞತ್ತಾನುಪ್ಪನ್ನಾ ಸಬ್ಬಾ, ಸಾಧಾರಣಾ ಚ ಏಕತೋ (ಸ್ಯಾ.)].

ಥುಲ್ಲಗಿಹಿನಿಯತಾ ಚ, ಆದಿ ಅಧಿಚ್ಚಚೋದಕೋ;

ಅಧಮ್ಮಧಮ್ಮನಿಯತೋ, ಅಭಬ್ಬೋಕ್ಖಿತ್ತನಾಸಿತಾ;

ಸಮಾನಂ ಠಪನಞ್ಚೇವ, ಉದ್ದಾನಂ ಏಕಕೇ ಇದನ್ತಿ.

೨. ದುಕವಾರೋ

೩೨೨. ಅತ್ಥಾಪತ್ತಿ ಸಞ್ಞಾ ವಿಮೋಕ್ಖಾ, ಅತ್ಥಾಪತ್ತಿ ನೋ ಸಞ್ಞಾವಿಮೋಕ್ಖಾ. ಅತ್ಥಾಪತ್ತಿ ಲದ್ಧಸಮಾಪತ್ತಿಕಸ್ಸ, ಅತ್ಥಾಪತ್ತಿ ನ ಲದ್ಧಸಮಾಪತ್ತಿಕಸ್ಸ. ಅತ್ಥಾಪತ್ತಿ ಸದ್ಧಮ್ಮಪಟಿಸಞ್ಞುತ್ತಾ, ಅತ್ಥಾಪತ್ತಿ ಅಸದ್ಧಮ್ಮಪಟಿಸಞ್ಞುತ್ತಾ. ಅತ್ಥಾಪತ್ತಿ ಸಪರಿಕ್ಖಾರಪಟಿಸಞ್ಞುತ್ತಾ, ಅತ್ಥಾಪತ್ತಿ ಪರಪರಿಕ್ಖಾರಪಟಿಸಞ್ಞುತ್ತಾ. ಅತ್ಥಾಪತ್ತಿ ಸಪುಗ್ಗಲಪಟಿಸಞ್ಞುತ್ತಾ, ಅತ್ಥಾಪತ್ತಿ ಪರಪುಗ್ಗಲಪಟಿಸಞ್ಞುತ್ತಾ. ಅತ್ಥಿ ಸಚ್ಚಂ ಭಣನ್ತೋ ಗರುಕಂ ಆಪತ್ತಿಂ ಆಪಜ್ಜತಿ, ಮುಸಾ ಭಣನ್ತೋ ಲಹುಕಂ. ಅತ್ಥಿ ಮುಸಾ ಭಣನ್ತೋ ಗರುಕಂ ಆಪತ್ತಿಂ ಆಪಜ್ಜತಿ, ಸಚ್ಚಂ ಭಣನ್ತೋ ಲಹುಕಂ. ಅತ್ಥಾಪತ್ತಿ ಭೂಮಿಗತೋ ಆಪಜ್ಜತಿ, ನೋ ವೇಹಾಸಗತೋ. ಅತ್ಥಾಪತ್ತಿ ವೇಹಾಸಗತೋ ಆಪಜ್ಜತಿ, ನೋ ಭೂಮಿಗತೋ. ಅತ್ಥಾಪತ್ತಿ ನಿಕ್ಖಮನ್ತೋ ಆಪಜ್ಜತಿ, ನೋ ಪವಿಸನ್ತೋ. ಅತ್ಥಾಪತ್ತಿ ಪವಿಸನ್ತೋ ಆಪಜ್ಜತಿ, ನೋ ನಿಕ್ಖಮನ್ತೋ. ಅತ್ಥಾಪತ್ತಿ ಆದಿಯನ್ತೋ ಆಪಜ್ಜತಿ, ಅತ್ಥಾಪತ್ತಿ ಅನಾದಿಯನ್ತೋ ಆಪಜ್ಜತಿ. ಅತ್ಥಾಪತ್ತಿ ಸಮಾದಿಯನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ಸಮಾದಿಯನ್ತೋ ಆಪಜ್ಜತಿ. ಅತ್ಥಾಪತ್ತಿ ಕರೋನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ಕರೋನ್ತೋ ಆಪಜ್ಜತಿ. ಅತ್ಥಾಪತ್ತಿ ದೇನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ದೇನ್ತೋ ಆಪಜ್ಜತಿ. (ಅತ್ಥಾಪತ್ತಿ ದೇಸೇನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ದೇಸೇನ್ತೋ ಆಪಜ್ಜತಿ.) [( ) (ನತ್ಥಿ ಕತ್ಥಚಿ)] ಅತ್ಥಾಪತ್ತಿ ಪಟಿಗ್ಗಣ್ಹನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ಪಟಿಗ್ಗಣ್ಹನ್ತೋ ಆಪಜ್ಜತಿ. ಅತ್ಥಾಪತ್ತಿ ಪರಿಭೋಗೇನ ಆಪಜ್ಜತಿ, ಅತ್ಥಾಪತ್ತಿ ನ ಪರಿಭೋಗೇನ ಆಪಜ್ಜತಿ. ಅತ್ಥಾಪತ್ತಿ ರತ್ತಿಂ ಆಪಜ್ಜತಿ, ನೋ ದಿವಾ. ಅತ್ಥಾಪತ್ತಿ ದಿವಾ ಆಪಜ್ಜತಿ, ನೋ ರತ್ತಿಂ. ಅತ್ಥಾಪತ್ತಿ ಅರುಣುಗ್ಗೇ ಆಪಜ್ಜತಿ, ಅತ್ಥಾಪತ್ತಿ ನ ಅರುಣುಗ್ಗೇ ಆಪಜ್ಜತಿ. ಅತ್ಥಾಪತ್ತಿ ಛಿನ್ದನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ಛಿನ್ದನ್ತೋ ಆಪಜ್ಜತಿ. ಅತ್ಥಾಪತ್ತಿ ಛಾದೇನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ಛಾದೇನ್ತೋ ಆಪಜ್ಜತಿ. ಅತ್ಥಾಪತ್ತಿ ಧಾರೇನ್ತೋ ಆಪಜ್ಜತಿ, ಅತ್ಥಾಪತ್ತಿ ನ ಧಾರೇನ್ತೋ ಆಪಜ್ಜತಿ.

ದ್ವೇ ಉಪೋಸಥಾ – ಚಾತುದ್ದಸಿಕೋ ಚ ಪನ್ನರಸಿಕೋ ಚ. ದ್ವೇ ಪವಾರಣಾ – ಚಾತುದ್ದಸಿಕಾ ಚ ಪನ್ನರಸಿಕಾ ಚ. ದ್ವೇ ಕಮ್ಮಾನಿ – ಅಪಲೋಕನಕಮ್ಮಂ, ಞತ್ತಿಕಮ್ಮಂ. ಅಪರಾನಿಪಿ ದ್ವೇ ಕಮ್ಮಾನಿ – ಞತ್ತಿದುತಿಯಕಮ್ಮಂ, ಞತ್ತಿಚತುತ್ಥಕಮ್ಮಂ. ದ್ವೇ ಕಮ್ಮವತ್ಥೂನಿ – ಅಪಲೋಕನಕಮ್ಮಸ್ಸ ವತ್ಥು, ಞತ್ತಿಕಮ್ಮಸ್ಸ ವತ್ಥು. ಅಪರಾನಿಪಿ ದ್ವೇ ಕಮ್ಮವತ್ಥೂನಿ – ಞತ್ತಿದುತಿಯಕಮ್ಮಸ್ಸ ವತ್ಥು, ಞತ್ತಿಚತುತ್ಥಕಮ್ಮಸ್ಸ ವತ್ಥು. ದ್ವೇ ಕಮ್ಮದೋಸಾ – ಅಪಲೋಕನಕಮ್ಮಸ್ಸ ದೋಸೋ, ಞತ್ತಿಕಮ್ಮಸ್ಸ ದೋಸೋ. ಅಪರೇಪಿ ದ್ವೇ ಕಮ್ಮದೋಸಾ – ಞತ್ತಿದುತಿಯಕಮ್ಮಸ್ಸ ದೋಸೋ, ಞತ್ತಿಚತುತ್ಥಕಮ್ಮಸ್ಸ ದೋಸೋ. ದ್ವೇ ಕಮ್ಮಸಮ್ಪತ್ತಿಯೋ – ಅಪಲೋಕನಕಮ್ಮಸ್ಸ ಸಮ್ಪತ್ತಿ, ಞತ್ತಿಕಮ್ಮಸ್ಸ ಸಮ್ಪತ್ತಿ. ಅಪರಾಪಿ ದ್ವೇ ಕಮ್ಮಸಮ್ಪತ್ತಿಯೋ – ಞತ್ತಿದುತಿಯಕಮ್ಮಸ್ಸ ಸಮ್ಪತ್ತಿ, ಞತ್ತಿಚತುತ್ಥಕಮ್ಮಸ್ಸ ಸಮ್ಪತ್ತಿ. ದ್ವೇ ನಾನಾಸಂವಾಸಕಭೂಮಿಯೋ – ಅತ್ತನಾ ವಾ ಅತ್ತಾನಂ ನಾನಾಸಂವಾಸಕಂ ಕರೋತಿ, ಸಮಗ್ಗೋ ವಾ ನಂ ಸಙ್ಘೋ ಉಕ್ಖಿಪತಿ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಅಪ್ಪಟಿನಿಸ್ಸಗ್ಗೇ ವಾ. ದ್ವೇ ಸಮಾನಸಂವಾಸಕಭೂಮಿಯೋ – ಅತ್ತನಾ ವಾ ಅತ್ತಾನಂ ಸಮಾನಸಂವಾಸಕಂ ಕರೋತಿ, ಸಮಗ್ಗೋ ವಾ ನಂ ಸಙ್ಘೋ ಉಕ್ಖಿತ್ತಂ ಓಸಾರೇತಿ ದಸ್ಸನೇ ವಾ ಪಟಿಕಮ್ಮೇ ವಾ ಪಟಿನಿಸ್ಸಗ್ಗೇ ವಾ. ದ್ವೇ ಪಾರಾಜಿಕಾ – ಭಿಕ್ಖೂನಞ್ಚ ಭಿಕ್ಖುನೀನಞ್ಚ. ದ್ವೇ ಸಙ್ಘಾದಿಸೇಸಾ, ದ್ವೇ ಥುಲ್ಲಚ್ಚಯಾ, ದ್ವೇ ಪಾಚಿತ್ತಿಯಾ, ದ್ವೇ ಪಾಟಿದೇಸನೀಯಾ, ದ್ವೇ ದುಕ್ಕಟಾ, ದ್ವೇ ದುಬ್ಭಾಸಿತಾ – ಭಿಕ್ಖೂನಞ್ಚ ಭಿಕ್ಖುನೀನಞ್ಚ. ಸತ್ತ ಆಪತ್ತಿಯೋ, ಸತ್ತ ಆಪತ್ತಿಕ್ಖನ್ಧಾ. ದ್ವೀಹಾಕಾರೇಹಿ ಸಙ್ಘೋ ಭಿಜ್ಜತಿ – ಕಮ್ಮೇನ ವಾ ಸಲಾಕಗ್ಗಾಹೇನ ವಾ.

ದ್ವೇ ಪುಗ್ಗಲಾ ನ ಉಪಸಮ್ಪಾದೇತಬ್ಬಾ – ಅದ್ಧಾನಹೀನೋ, ಅಙ್ಗಹೀನೋ. ಅಪರೇಪಿ ದ್ವೇ ಪುಗ್ಗಲಾ ನ ಉಪಸಮ್ಪಾದೇತಬ್ಬಾ – ವತ್ಥುವಿಪನ್ನೋ, ಕರಣದುಕ್ಕಟಕೋ. ಅಪರೇಪಿ ದ್ವೇ ಪುಗ್ಗಲಾ ನ ಉಪಸಮ್ಪಾದೇತಬ್ಬಾ – ಅಪರಿಪೂರೋ ಪರಿಪೂರೋ ನೋ ಚ ಯಾಚತಿ. ದ್ವಿನ್ನಂ ಪುಗ್ಗಲಾನಂ ನಿಸ್ಸಾಯ ನ ವತ್ಥಬ್ಬಂ – ಅಲಜ್ಜಿಸ್ಸ ಚ ಬಾಲಸ್ಸ ಚ. ದ್ವಿನ್ನಂ ಪುಗ್ಗಲಾನಂ ನಿಸ್ಸಯೋ ನ ದಾತಬ್ಬೋ – ಅಲಜ್ಜಿಸ್ಸ ಚ ಲಜ್ಜಿನೋ ಚ ನ ಯಾಚತಿ. ದ್ವಿನ್ನಂ ಪುಗ್ಗಲಾನಂ ನಿಸ್ಸಯೋ ದಾತಬ್ಬೋ – ಬಾಲಸ್ಸ ಚ ಲಜ್ಜಿಸ್ಸ ಚ ಯಾಚತಿ. ದ್ವೇ ಪುಗ್ಗಲಾ ಅಭಬ್ಬಾ ಆಪತ್ತಿಂ ಆಪಜ್ಜಿತುಂ – ಬುದ್ಧಾ ಚ ಪಚ್ಚೇಕಬುದ್ಧಾ ಚ. ದ್ವೇ ಪುಗ್ಗಲಾ ಭಬ್ಬಾ, ಆಪತ್ತಿಂ ಆಪಜ್ಜಿತುಂ – ಭಿಕ್ಖೂ ಚ ಭಿಕ್ಖುನಿಯೋ ಚ. ದ್ವೇ ಪುಗ್ಗಲಾ ಅಭಬ್ಬಾ ಸಞ್ಚಿಚ್ಚ ಆಪತ್ತಿಂ ಆಪಜ್ಜಿತುಂ – ಭಿಕ್ಖೂ ಚ ಭಿಕ್ಖುನಿಯೋ ಚ ಅರಿಯಪುಗ್ಗಲಾ. ದ್ವೇ ಪುಗ್ಗಲಾ ಭಬ್ಬಾ ಸಞ್ಚಿಚ್ಚ ಆಪತ್ತಿಂ ಆಪಜ್ಜಿತುಂ – ಭಿಕ್ಖೂ ಚ ಭಿಕ್ಖುನಿಯೋ ಚ ಪುಥುಜ್ಜನಾ. ದ್ವೇ ಪುಗ್ಗಲಾ ಅಭಬ್ಬಾ ಸಞ್ಚಿಚ್ಚ ಸಾತಿಸಾರಂ ವತ್ಥುಂ ಅಜ್ಝಾಚರಿತುಂ – ಭಿಕ್ಖೂ ಚ ಭಿಕ್ಖುನಿಯೋ ಚ ಅರಿಯಪುಗ್ಗಲಾ. ದ್ವೇ ಪುಗ್ಗಲಾ ಭಬ್ಬಾ ಸಞ್ಚಿಚ್ಚ ಸಾತಿಸಾರಂ ವತ್ಥುಂ ಅಜ್ಝಾಚರಿತುಂ – ಭಿಕ್ಖೂ ಚ ಭಿಕ್ಖುನಿಯೋ ಚ ಪುಥುಜ್ಜನಾ.

ದ್ವೇ ಪಟಿಕ್ಕೋಸಾ – ಕಾಯೇನ ವಾ ಪಟಿಕ್ಕೋಸತಿ ವಾಚಾಯ ವಾ ಪಟಿಕ್ಕೋಸತಿ. ದ್ವೇ ನಿಸ್ಸಾರಣಾ – ಅತ್ಥಿ ಪುಗ್ಗಲೋ ಅಪ್ಪತ್ತೋ ನಿಸ್ಸಾರಣಂ ತಂ ಚೇ ಸಙ್ಘೋ ನಿಸ್ಸಾರೇತಿ ಏಕಚ್ಚೋ ಸುನಿಸ್ಸಾರಿತೋ, ಏಕಚ್ಚೋ ದುನ್ನಿಸ್ಸಾರಿತೋ. ದ್ವೇ ಓಸಾರಣಾ – ಅತ್ಥಿ ಪುಗ್ಗಲೋ ಅಪ್ಪತ್ತೋ ಓಸಾರಣಂ ತಂ ಚೇ ಸಙ್ಘೋ ಓಸಾರೇತಿ ಏಕಚ್ಚೋ ಸೋಸಾರಿತೋ, ಏಕಚ್ಚೋ ದೋಸಾರಿತೋ. ದ್ವೇ ಪಟಿಞ್ಞಾ – ಕಾಯೇನ ವಾ ಪಟಿಜಾನಾತಿ ವಾಚಾಯ ವಾ ಪಟಿಜಾನಾತಿ. ದ್ವೇ ಪಟಿಗ್ಗಹಾ – ಕಾಯೇನ ವಾ ಪಟಿಗ್ಗಣ್ಹಾತಿ ಕಾಯಪಟಿಬದ್ಧೇನ ವಾ ಪಟಿಗ್ಗಣ್ಹಾತಿ. ದ್ವೇ ಪಟಿಕ್ಖೇಪಾ – ಕಾಯೇನ ವಾ ಪಟಿಕ್ಖಿಪತಿ ವಾಚಾಯ ವಾ ಪಟಿಕ್ಖಿಪತಿ. ದ್ವೇ ಉಪಘಾತಿಕಾ – ಸಿಕ್ಖೂಪಘಾತಿಕಾ ಚ ಭೋಗೂಪಘಾತಿಕಾ ಚ. ದ್ವೇ ಚೋದನಾ – ಕಾಯೇನ ವಾ ಚೋದೇತಿ ವಾಚಾಯ ವಾ ಚೋದೇತಿ. ದ್ವೇ ಕಥಿನಸ್ಸ ಪಲಿಬೋಧಾ – ಆವಾಸಪಲಿಬೋಧೋ ಚ ಚೀವರಪಲಿಬೋಧೋ ಚ. ದ್ವೇ ಕಥಿನಸ್ಸ ಅಪಲಿಬೋಧಾ – ಆವಾಸಅಪಲಿಬೋಧೋ ಚ ಚೀವರಅಪಲಿಬೋಧೋ ಚ. ದ್ವೇ ಚೀವರಾನಿ – ಗಹಪತಿಕಞ್ಚ ಪಂಸುಕೂಲಞ್ಚ. ದ್ವೇ ಪತ್ತಾ – ಅಯೋಪತ್ತೋ ಮತ್ತಿಕಾಪತ್ತೋ. ದ್ವೇ ಮಣ್ಡಲಾನಿ – ತಿಪುಮಯಂ, ಸೀಸಮಯಂ. ದ್ವೇ ಪತ್ತಸ್ಸ ಅಧಿಟ್ಠಾನಾ – ಕಾಯೇನ ವಾ ಅಧಿಟ್ಠೇತಿ ವಾಚಾಯ ವಾ ಅಧಿಟ್ಠೇತಿ. ದ್ವೇ ಚೀವರಸ್ಸ ಅಧಿಟ್ಠಾನಾ – ಕಾಯೇನ ವಾ ಅಧಿಟ್ಠೇತಿ ವಾಚಾಯ ವಾ ಅಧಿಟ್ಠೇತಿ. ದ್ವೇ ವಿಕಪ್ಪನಾ – ಸಮ್ಮುಖಾವಿಕಪ್ಪನಾ ಚ ಪರಮ್ಮುಖಾವಿಕಪ್ಪನಾ ಚ. ದ್ವೇ ವಿನಯಾ – ಭಿಕ್ಖೂನಞ್ಚ ಭಿಕ್ಖುನೀನಞ್ಚ. ದ್ವೇ ವೇನಯಿಕಾ – ಪಞ್ಞತ್ತಞ್ಚ ಪಞ್ಞತ್ತಾನುಲೋಮಞ್ಚ. ದ್ವೇ ವಿನಯಸ್ಸ ಸಲ್ಲೇಖಾ – ಅಕಪ್ಪಿಯೇ ಸೇತುಘಾತೋ, ಕಪ್ಪಿಯೇ ಮತ್ತಕಾರಿತಾ. ದ್ವೀಹಾಕಾರೇಹಿ ಆಪತ್ತಿಂ ಆಪಜ್ಜತಿ – ಕಾಯೇನ ವಾ ಆಪಜ್ಜತಿ ವಾಚಾಯ ವಾ ಆಪಜ್ಜತಿ. ದ್ವೀಹಾಕಾರೇಹಿ ಆಪತ್ತಿಯಾ ವುಟ್ಠಾತಿ – ಕಾಯೇನ ವಾ ವುಟ್ಠಾತಿ ವಾಚಾಯ ವಾ ವುಟ್ಠಾತಿ. ದ್ವೇ ಪರಿವಾಸಾ – ಪಟಿಚ್ಛನ್ನಪರಿವಾಸೋ, ಅಪ್ಪಟಿಚ್ಛನ್ನಪರಿವಾಸೋ. ಅಪರೇಪಿ ದ್ವೇ ಪರಿವಾಸಾ – ಸುದ್ಧನ್ತಪರಿವಾಸೋ ಸಮೋಧಾನಪರಿವಾಸೋ. ದ್ವೇ ಮಾನತ್ತಾ – ಪಟಿಚ್ಛನ್ನಮಾನತ್ತಂ, ಅಪ್ಪಟಿಚ್ಛನ್ನಮಾನತ್ತಂ. ಅಪರೇಪಿ ದ್ವೇ ಮಾನತ್ತಾ – ಪಕ್ಖಮಾನತ್ತಂ, ಸಮೋಧಾನಮಾನತ್ತಂ. ದ್ವಿನ್ನಂ ಪುಗ್ಗಲಾನಂ ರತ್ತಿಚ್ಛೇದೋ – ಪಾರಿವಾಸಿಕಸ್ಸ ಚ ಮಾನತ್ತಚಾರಿಕಸ್ಸ ಚ. ದ್ವೇ ಅನಾದರಿಯಾನಿ – ಪುಗ್ಗಲಾನಾದರಿಯಞ್ಚ ಧಮ್ಮಾನಾದರಿಯಞ್ಚ. ದ್ವೇ ಲೋಣಾನಿ – ಜಾತಿಮಞ್ಚ ಕಾರಿಮಞ್ಚ [ಜಾತಿಮಯಞ್ಚ ಖಾರಿಮಯಞ್ಚ (ಸ್ಯಾ.)]. ಅಪರಾನಿಪಿ ದ್ವೇ ಲೋಣಾನಿ – ಸಾಮುದ್ದಂ ಕಾಳಲೋಣಂ. ಅಪರಾನಿಪಿ ದ್ವೇ ಲೋಣಾನಿ – ಸಿನ್ಧವಂ, ಉಬ್ಭಿದಂ [ಉಬ್ಭಿರಂ (ಇತಿಪಿ)]. ಅಪರಾನಿಪಿ ದ್ವೇ ಲೋಣಾನಿ – ರೋಮಕಂ, ಪಕ್ಕಾಲಕಂ. ದ್ವೇ ಪರಿಭೋಗಾ – ಅಬ್ಭನ್ತರಪರಿಭೋಗೋ ಚ ಬಾಹಿರಪರಿಭೋಗೋ ಚ. ದ್ವೇ ಅಕ್ಕೋಸಾ – ಹೀನೋ ಚ ಅಕ್ಕೋಸೋ ಉಕ್ಕಟ್ಠೋ ಚ ಅಕ್ಕೋಸೋ. ದ್ವೀಹಾಕಾರೇಹಿ ಪೇಸುಞ್ಞಂ ಹೋತಿ – ಪಿಯಕಮ್ಯಸ್ಸ ವಾ ಭೇದಾಧಿಪ್ಪಾಯಸ್ಸ ವಾ. ದ್ವೀಹಾಕಾರೇಹಿ ಗಣಭೋಜನಂ ಪಸವತಿ – ನಿಮನ್ತನತೋ ವಾ ವಿಞ್ಞತ್ತಿತೋ ವಾ. ದ್ವೇ ವಸ್ಸೂಪನಾಯಿಕಾ – ಪುರಿಮಿಕಾ, ಪಚ್ಛಿಮಿಕಾ. ದ್ವೇ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ದ್ವೇ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ.

[ಅ. ನಿ. ೨.೯೯ ಆದಯೋ] ದ್ವೇ ಪುಗ್ಗಲಾ ಬಾಲಾ – ಯೋ ಚ ಅನಾಗತಂ ಭಾರಂ ವಹತಿ, ಯೋ ಚ ಆಗತಂ ಭಾರಂ ನ ವಹತಿ. ದ್ವೇ ಪುಗ್ಗಲಾ ಪಣ್ಡಿತಾ – ಯೋ ಚ ಅನಾಗತಂ ಭಾರಂ ನ ವಹತಿ, ಯೋ ಚ ಆಗತಂ ಭಾರಂ ವಹತಿ. ಅಪರೇಪಿ ದ್ವೇ ಪುಗ್ಗಲಾ ಬಾಲಾ – ಯೋ ಚ ಅಕಪ್ಪಿಯೇ ಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಅಕಪ್ಪಿಯಸಞ್ಞೀ. ದ್ವೇ ಪುಗ್ಗಲಾ ಪಣ್ಡಿತಾ – ಯೋ ಚ ಅಕಪ್ಪಿಯೇ ಅಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಕಪ್ಪಿಯಸಞ್ಞೀ. ಅಪರೇಪಿ ದ್ವೇ ಪುಗ್ಗಲಾ ಬಾಲಾ – ಯೋ ಚ ಅನಾಪತ್ತಿಯಾ ಆಪತ್ತಿಸಞ್ಞೀ, ಯೋ ಚ ಆಪತ್ತಿಯಾ ಅನಾಪತ್ತಿಸಞ್ಞೀ. ದ್ವೇ ಪುಗ್ಗಲಾ ಪಣ್ಡಿತಾ – ಯೋ ಚ ಆಪತ್ತಿಯಾ ಆಪತ್ತಿಸಞ್ಞೀ, ಯೋ ಚ ಅನಾಪತ್ತಿಯಾ ಅನಾಪತ್ತಿಸಞ್ಞೀ. ಅಪರೇಪಿ ದ್ವೇ ಪುಗ್ಗಲಾ ಬಾಲಾ – ಯೋ ಚ ಅಧಮ್ಮೇ ಧಮ್ಮಸಞ್ಞೀ, ಯೋ ಚ ಧಮ್ಮೇ ಅಧಮ್ಮಸಞ್ಞೀ. ದ್ವೇ ಪುಗ್ಗಲಾ ಪಣ್ಡಿತಾ – ಯೋ ಚ ಅಧಮ್ಮೇ ಅಧಮ್ಮಸಞ್ಞೀ, ಯೋ ಚ ಧಮ್ಮೇ ಧಮ್ಮಸಞ್ಞೀ. ಅಪರೇಪಿ ದ್ವೇ ಪುಗ್ಗಲಾ ಬಾಲಾ – ಯೋ ಚ ಅವಿನಯೇ ವಿನಯಸಞ್ಞೀ, ಯೋ ಚ ವಿನಯೇ ಅವಿನಯಸಞ್ಞೀ. ದ್ವೇ ಪುಗ್ಗಲಾ ಪಣ್ಡಿತಾ – ಯೋ ಚ ಅವಿನಯೇ ಅವಿನಯಸಞ್ಞೀ, ಯೋ ಚ ವಿನಯೇ ವಿನಯಸಞ್ಞೀ.

[ಅ. ನಿ. ೨.೧೦೯] ದ್ವಿನ್ನಂ ಪುಗ್ಗಲಾನಂ ಆಸವಾ ವಡ್ಢನ್ತಿ – ಯೋ ಚ ನ ಕುಕ್ಕುಚ್ಚಾಯಿತಬ್ಬಂ ಕುಕ್ಕುಚ್ಚಾಯತಿ, ಯೋ ಚ ಕುಕ್ಕುಚ್ಚಾಯಿತಬ್ಬಂ ಕುಕ್ಕುಚ್ಚಾಯತಿ. ದ್ವಿನ್ನಂ ಪುಗ್ಗಲಾನಂ ಆಸವಾ ನ ವಡ್ಢನ್ತಿ – ಯೋ ಚ ಕುಕ್ಕುಚ್ಚಾಯಿತಬ್ಬಂ ನ ಕುಕ್ಕುಚ್ಚಾಯತಿ, ಯೋ ಚ ಕುಕ್ಕುಚ್ಚಾಯಿತಬ್ಬಂ ಕುಕ್ಕುಚ್ಚಾಯತಿ. ಅಪರೇಸಮ್ಪಿ ದ್ವಿನ್ನಂ ಪುಗ್ಗಲಾನಂ ಆಸವಾ ವಡ್ಢನ್ತಿ – ಯೋ ಚ ಅಕಪ್ಪಿಯೇ ಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಅಕಪ್ಪಿಯಸಞ್ಞೀ. ದ್ವಿನ್ನಂ ಪುಗ್ಗಲಾನಂ ಆಸವಾ ನ ವಡ್ಢನ್ತಿ – ಯೋ ಚ ಅಕಪ್ಪಿಯೇ ಅಕಪ್ಪಿಯಸಞ್ಞೀ, ಯೋ ಚ ಕಪ್ಪಿಯೇ ಕಪ್ಪಿಯಸಞ್ಞೀ. ಅಪರೇಸಮ್ಪಿ ದ್ವಿನ್ನಂ ಪುಗ್ಗಲಾನಂ ಆಸವಾ ವಡ್ಢನ್ತಿ – ಯೋ ಚ ಅನಾಪತ್ತಿಯಾ ಆಪತ್ತಿಸಞ್ಞೀ, ಯೋ ಚ ಆಪತ್ತಿಯಾ ಅನಾಪತ್ತಿಸಞ್ಞೀ. ದ್ವಿನ್ನಂ ಪುಗ್ಗಲಾನಂ ಆಸವಾ ನ ವಡ್ಢನ್ತಿ – ಯೋ ಚ ಅನಾಪತ್ತಿಯಾ ಅನಾಪತ್ತಿಸಞ್ಞೀ, ಯೋ ಚ ಆಪತ್ತಿಯಾ ಆಪತ್ತಿಸಞ್ಞೀ. ಅಪರೇಸಮ್ಪಿ ದ್ವಿನ್ನಂ ಪುಗ್ಗಲಾನಂ ಆಸವಾ ವಡ್ಢನ್ತಿ – ಯೋ ಚ ಅಧಮ್ಮೇ ಧಮ್ಮಸಞ್ಞೀ, ಯೋ ಚ ಧಮ್ಮೇ ಅಧಮ್ಮಸಞ್ಞೀ. ದ್ವಿನ್ನಂ ಪುಗ್ಗಲಾನಂ ಆಸವಾ ನ ವಡ್ಢನ್ತಿ – ಯೋ ಚ ಅಧಮ್ಮೇ ಅಧಮ್ಮಸಞ್ಞೀ, ಯೋ ಚ ಧಮ್ಮೇ ಧಮ್ಮಸಞ್ಞೀ. ಅಪರೇಸಮ್ಪಿ ದ್ವಿನ್ನಂ ಪುಗ್ಗಲಾನಂ ಆಸವಾ ವಡ್ಢನ್ತಿ – ಯೋ ಚ ಅವಿನಯೇ ವಿನಯಸಞ್ಞೀ, ಯೋ ಚ ವಿನಯೇ ಅವಿನಯಸಞ್ಞೀ. ದ್ವಿನ್ನಂ ಪುಗ್ಗಲಾನಂ ಆಸವಾ ನ ವಡ್ಢನ್ತಿ – ಯೋ ಚ ಅವಿನಯೇ ಅವಿನಯಸಞ್ಞೀ, ಯೋ ಚ ವಿನಯೇ ವಿನಯಸಞ್ಞೀ.

ದುಕಾ ನಿಟ್ಠಿತಾ.

ತಸ್ಸುದ್ದಾನಂ –

ಸಞ್ಞಾ ಲದ್ಧಾ ಚ ಸದ್ಧಮ್ಮಾ, ಪರಿಕ್ಖಾರಾ ಚ ಪುಗ್ಗಲಾ;

ಸಚ್ಚಂ ಭೂಮಿ ನಿಕ್ಖಮನ್ತೋ, ಆದಿಯನ್ತೋ ಸಮಾದಿಯಂ.

ಕರೋನ್ತೋ ದೇನ್ತೋ ಗಣ್ಹನ್ತೋ, ಪರಿಭೋಗೇನ ರತ್ತಿ ಚ;

ಅರುಣಾಛಿನ್ದಂ ಛಾದೇನ್ತೋ, ಧಾರೇನ್ತೋ ಚ ಉಪೋಸಥಾ.

ಪವಾರಣಾ ಕಮ್ಮಾಪರಾ, ವತ್ಥು ಅಪರಾ ದೋಸಾ ಚ;

ಅಪರಾ ದ್ವೇ ಚ ಸಮ್ಪತ್ತಿ, ನಾನಾ ಸಮಾನಮೇವ ಚ.

ಪಾರಾಜಿಸಙ್ಘಥುಲ್ಲಚ್ಚಯ, ಪಾಚಿತ್ತಿ ಪಾಟಿದೇಸನಾ;

ದುಕ್ಕಟಾ ದುಬ್ಭಾಸಿತಾ ಚೇವ, ಸತ್ತ ಆಪತ್ತಿಕ್ಖನ್ಧಾ ಚ.

ಭಿಜ್ಜತಿ ಉಪಸಮ್ಪದಾ, ತಥೇವ ಅಪರೇ ದುವೇ;

ನ ವತ್ಥಬ್ಬಂ ನ ದಾತಬ್ಬಂ, ಅಭಬ್ಬಾಭಬ್ಬಮೇವ ಚ.

ಸಞ್ಚಿಚ್ಚ ಸಾತಿಸಾರಾ ಚ, ಪಟಿಕ್ಕೋಸಾ ನಿಸ್ಸಾರಣಾ;

ಓಸಾರಣಾ ಪಟಿಞ್ಞಾ ಚ, ಪಟಿಗ್ಗಹಾ ಪಟಿಕ್ಖಿಪಾ.

ಉಪಘಾತಿ ಚೋದನಾ ಚ, ಕಥಿನಾ ಚ ದುವೇ ತಥಾ;

ಚೀವರಾ ಪತ್ತಮಣ್ಡಲಾ, ಅಧಿಟ್ಠಾನಾ ತಥೇವ ದ್ವೇ.

ವಿಕಪ್ಪನಾ ಚ ವಿನಯಾ, ವೇನಯಿಕಾ ಚ ಸಲ್ಲೇಖಾ;

ಆಪಜ್ಜತಿ ಚ ವುಟ್ಠಾತಿ, ಪರಿವಾಸಾಪರೇ ದುವೇ.

ದ್ವೇ ಮಾನತ್ತಾ ಅಪರೇ ಚ, ರತ್ತಿಚ್ಛೇದೋ ಅನಾದರಿ;

ದ್ವೇ ಲೋಣಾ ತಯೋ ಅಪರೇ, ಪರಿಭೋಗಕ್ಕೋಸೇನ ಚ.

ಪೇಸುಞ್ಞೋ ಚ ಗಣಾವಸ್ಸ, ಠಪನಾ ಭಾರಕಪ್ಪಿಯಂ;

ಅನಾಪತ್ತಿ ಅಧಮ್ಮಧಮ್ಮಾ, ವಿನಯೇ ಆಸವೇ ತಥಾತಿ.

೩. ತಿಕವಾರೋ

೩೨೩. ಅತ್ಥಾಪತ್ತಿ ತಿಟ್ಠನ್ತೇ ಭಗವತಿ ಆಪಜ್ಜತಿ, ನೋ ಪರಿನಿಬ್ಬುತೇ; ಅತ್ಥಾಪತ್ತಿ ಪರಿನಿಬ್ಬುತೇ ಭಗವತಿ ಆಪಜ್ಜತಿ, ನೋ ತಿಟ್ಠನ್ತೇ; ಅತ್ಥಾಪತ್ತಿ ತಿಟ್ಠನ್ತೇಪಿ ಭಗವತಿ ಆಪಜ್ಜತಿ ಪರಿನಿಬ್ಬುತೇಪಿ. ಅತ್ಥಾಪತ್ತಿ ಕಾಲೇ ಆಪಜ್ಜತಿ, ನೋ ವಿಕಾಲೇ; ಅತ್ಥಾಪತ್ತಿ ವಿಕಾಲೇ ಆಪಜ್ಜತಿ, ನೋ ಕಾಲೇ; ಅತ್ಥಾಪತ್ತಿ ಕಾಲೇ ಚೇವ ಆಪಜ್ಜತಿ ವಿಕಾಲೇ ಚ. ಅತ್ಥಾಪತ್ತಿ ರತ್ತಿಂ ಆಪಜ್ಜತಿ, ನೋ ದಿವಾ; ಅತ್ಥಾಪತ್ತಿ ದಿವಾ ಆಪಜ್ಜತಿ, ನೋ ರತ್ತಿಂ; ಅತ್ಥಾಪತ್ತಿ ರತ್ತಿಞ್ಚೇವ ಆಪಜ್ಜತಿ ದಿವಾ ಚ. ಅತ್ಥಾಪತ್ತಿ ದಸವಸ್ಸೋ ಆಪಜ್ಜತಿ, ನೋ ಊನದಸವಸ್ಸೋ; ಅತ್ಥಾಪತ್ತಿ ಊನದಸವಸ್ಸೋ ಆಪಜ್ಜತಿ, ನೋ ದಸವಸ್ಸೋ; ಅತ್ಥಾಪತ್ತಿ ದಸವಸ್ಸೋ ಚೇವ ಆಪಜ್ಜತಿ ಊನದಸವಸ್ಸೋ ಚ. ಅತ್ಥಾಪತ್ತಿ ಪಞ್ಚವಸ್ಸೋ ಆಪಜ್ಜತಿ, ನೋ ಊನಪಞ್ಚವಸ್ಸೋ; ಅತ್ಥಾಪತ್ತಿ ಊನಪಞ್ಚವಸ್ಸೋ ಆಪಜ್ಜತಿ, ನೋ ಪಞ್ಚವಸ್ಸೋ; ಅತ್ಥಾಪತ್ತಿ ಪಞ್ಚವಸ್ಸೋ ಚೇವ ಆಪಜ್ಜತಿ ಊನಪಞ್ಚವಸ್ಸೋ ಚ. ಅತ್ಥಾಪತ್ತಿ ಕುಸಲಚಿತ್ತೋ ಆಪಜ್ಜತಿ; ಅತ್ಥಾಪತ್ತಿ ಅಕುಸಲಚಿತ್ತೋ ಆಪಜ್ಜತಿ; ಅತ್ಥಾಪತ್ತಿ ಅಬ್ಯಾಕತಚಿತ್ತೋ ಆಪಜ್ಜತಿ. ಅತ್ಥಾಪತ್ತಿ ಸುಖವೇದನಾಸಮಙ್ಗೀ ಆಪಜ್ಜತಿ; ಅತ್ಥಾಪತ್ತಿ ದುಕ್ಖವೇದನಾಸಮಙ್ಗೀ ಆಪಜ್ಜತಿ; ಅತ್ಥಾಪತ್ತಿ ಅದುಕ್ಖಮಸುಖವೇದನಾಸಮಙ್ಗೀ ಆಪಜ್ಜತಿ. ತೀಣಿ ಚೋದನಾವತ್ಥೂನಿ – ದಿಟ್ಠೇನ, ಸುತೇನ, ಪರಿಸಙ್ಕಾಯ. ತಯೋ ಸಲಾಕಗ್ಗಾಹಾ – ಗುಳ್ಹಕೋ, ವಿವಟಕೋ [ವಿವಟ್ಟಕೋ (ಕ.)], ಸಕಣ್ಣಜಪ್ಪಕೋ. ತಯೋ ಪಟಿಕ್ಖೇಪಾ – ಮಹಿಚ್ಛತಾ, ಅಸನ್ತುಟ್ಠಿತಾ [ಅಸನ್ತುಟ್ಠತಾ (ಸ್ಯಾ.)], ಅಸಲ್ಲೇಖತಾ. ತಯೋ ಅನುಞ್ಞಾತಾ – ಅಪ್ಪಿಚ್ಛತಾ, ಸನ್ತುಟ್ಠಿತಾ, ಸಲ್ಲೇಖತಾ. ಅಪರೇಪಿ ತಯೋ ಪಟಿಕ್ಖೇಪಾ – ಮಹಿಚ್ಛತಾ, ಅಸನ್ತುಟ್ಠಿತಾ, ಅಮತ್ತಞ್ಞುತಾ. ತಯೋ ಅನುಞ್ಞಾತಾ – ಅಪ್ಪಿಚ್ಛತಾ, ಸನ್ತುಟ್ಠಿತಾ, ಮತ್ತಞ್ಞುತಾ. ತಿಸ್ಸೋ ಪಞ್ಞತ್ತಿಯೋ – ಪಞ್ಞತ್ತಿ, ಅನುಪಞ್ಞತ್ತಿ, ಅನುಪ್ಪನ್ನಪಞ್ಞತ್ತಿ. ಅಪರಾಪಿ ತಿಸ್ಸೋ ಪಞ್ಞತ್ತಿಯೋ – ಸಬ್ಬತ್ಥಪಞ್ಞತ್ತಿ, ಪದೇಸಪಞ್ಞತ್ತಿ, ಸಾಧಾರಣಪಞ್ಞತ್ತಿ. ಅಪರಾಪಿ ತಿಸ್ಸೋ ಪಞ್ಞತ್ತಿಯೋ – ಅಸಾಧಾರಣಪಞ್ಞತ್ತಿ, ಏಕತೋಪಞ್ಞತ್ತಿ, ಉಭತೋಪಞ್ಞತ್ತಿ.

ಅತ್ಥಾಪತ್ತಿ ಬಾಲೋ ಆಪಜ್ಜತಿ, ನೋ ಪಣ್ಡಿತೋ; ಅತ್ಥಾಪತ್ತಿ ಪಣ್ಡಿತೋ ಆಪಜ್ಜತಿ, ನೋ ಬಾಲೋ; ಅತ್ಥಾಪತ್ತಿ ಬಾಲೋ ಚೇವ ಆಪಜ್ಜತಿ ಪಣ್ಡಿತೋ ಚ. ಅತ್ಥಾಪತ್ತಿ ಕಾಳೇ ಆಪಜ್ಜತಿ, ನೋ ಜುಣ್ಹೇ; ಅತ್ಥಾಪತ್ತಿ ಜುಣ್ಹೇ ಆಪಜ್ಜತಿ, ನೋ ಕಾಳೇ; ಅತ್ಥಾಪತ್ತಿ ಕಾಳೇ ಚೇವ ಆಪಜ್ಜತಿ ಜುಣ್ಹೇ ಚ. ಅತ್ಥಿ ಕಾಳೇ ಕಪ್ಪತಿ, ನೋ ಜುಣ್ಹೇ; ಅತ್ಥಿ ಜುಣ್ಹೇ ಕಪ್ಪತಿ, ನೋ ಕಾಳೇ; ಅತ್ಥಿ ಕಾಳೇ ಚೇವ ಕಪ್ಪತಿ ಜುಣ್ಹೇ ಚ. ಅತ್ಥಾಪತ್ತಿ ಹೇಮನ್ತೇ ಆಪಜ್ಜತಿ, ನೋ ಗಿಮ್ಹೇ ನೋ ವಸ್ಸೇ; ಅತ್ಥಾಪತ್ತಿ ಗಿಮ್ಹೇ ಆಪಜ್ಜತಿ, ನೋ ಹೇಮನ್ತೇ ನೋ ವಸ್ಸೇ; ಅತ್ಥಾಪತ್ತಿ ವಸ್ಸೇ ಆಪಜ್ಜತಿ, ನೋ ಹೇಮನ್ತೇ ನೋ ಗಿಮ್ಹೇ. ಅತ್ಥಾಪತ್ತಿ ಸಙ್ಘೋ ಆಪಜ್ಜತಿ, ನ ಗಣೋ ನ ಪುಗ್ಗಲೋ; ಅತ್ಥಾಪತ್ತಿ ಗಣೋ ಆಪಜ್ಜತಿ, ನ ಸಙ್ಘೋ ನ ಪುಗ್ಗಲೋ; ಅತ್ಥಾಪತ್ತಿ ಪುಗ್ಗಲೋ ಆಪಜ್ಜತಿ, ನ ಸಙ್ಘೋ ನ ಗಣೋ. ಅತ್ಥಿ ಸಙ್ಘಸ್ಸ ಕಪ್ಪತಿ, ನ ಗಣಸ್ಸ ನ ಪುಗ್ಗಲಸ್ಸ; ಅತ್ಥಿ ಗಣಸ್ಸ ಕಪ್ಪತಿ, ನ ಸಙ್ಘಸ್ಸ ನ ಪುಗ್ಗಲಸ್ಸ; ಅತ್ಥಿ ಪುಗ್ಗಲಸ್ಸ ಕಪ್ಪತಿ, ನ ಸಙ್ಘಸ್ಸ ನ ಗಣಸ್ಸ. ತಿಸ್ಸೋ ಛಾದನಾ ವತ್ಥುಂ ಛಾದೇತಿ, ನೋ ಆಪತ್ತಿಂ; ಆಪತ್ತಿಂ ಛಾದೇತಿ, ನೋ ವತ್ಥುಂ; ವತ್ಥುಞ್ಚೇವ ಛಾದೇತಿ ಆಪತ್ತಿಞ್ಚ. ತಿಸ್ಸೋ ಪಟಿಚ್ಛಾದಿಯೋ – ಜನ್ತಾಘರಪಟಿಚ್ಛಾದಿ, ಉದಕಪಟಿಚ್ಛಾದಿ, ವತ್ಥಪಟಿಚ್ಛಾದಿ. [ಅ. ನಿ. ೩.೧೩೨] ತೀಣಿ ಪಟಿಚ್ಛನ್ನಾನಿ ವಹನ್ತಿ, ನೋ ವಿವಟಾನಿ – ಮಾತುಗಾಮೋ ಪಟಿಚ್ಛನ್ನೋ ವಹತಿ, ನೋ ವಿವಟೋ; ಬ್ರಾಹ್ಮಣಾನಂ ಮನ್ತಾ ಪಟಿಚ್ಛನ್ನಾ ವಹನ್ತಿ, ನೋ ವಿವಟಾ; ಮಿಚ್ಛಾದಿಟ್ಠಿ ಪಟಿಚ್ಛನ್ನಾ ವಹತಿ, ನೋ ವಿವಟಾ. ತೀಣಿ ವಿವಟಾನಿ ವಿರೋಚನ್ತಿ, ನೋ ಪಟಿಚ್ಛನ್ನಾನಿ – ಚನ್ದಮಣ್ಡಲಂ ವಿವಟಂ ವಿರೋಚತಿ, ನೋ ಪಟಿಚ್ಛನ್ನಂ; ಸೂರಿಯಮಣ್ಡಲಂ ವಿವಟಂ ವಿರೋಚತಿ, ನೋ ಪಟಿಚ್ಛನ್ನಂ; ತಥಾಗತಪ್ಪವೇದಿತೋ ಧಮ್ಮವಿನಯೋ ವಿವಟೋ ವಿರೋಚತಿ, ನೋ ಪಟಿಚ್ಛನ್ನೋ. ತಯೋ ಸೇನಾಸನಗ್ಗಾಹಾ – ಪುರಿಮಕೋ, ಪಚ್ಛಿಮಕೋ, ಅನ್ತರಾಮುತ್ತಕೋ. ಅತ್ಥಾಪತ್ತಿ ಗಿಲಾನೋ ಆಪಜ್ಜತಿ, ನೋ ಅಗಿಲಾನೋ; ಅತ್ಥಾಪತ್ತಿ ಅಗಿಲಾನೋ ಆಪಜ್ಜತಿ, ನೋ ಗಿಲಾನೋ; ಅತ್ಥಾಪತ್ತಿ ಗಿಲಾನೋ ಚೇವ ಆಪಜ್ಜತಿ ಅಗಿಲಾನೋ ಚ.

ತೀಣಿ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ತೀಣಿ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ತಯೋ ಪರಿವಾಸಾ – ಪಟಿಚ್ಛನ್ನಪರಿವಾಸೋ, ಅಪ್ಪಟಿಚ್ಛನ್ನಪರಿವಾಸೋ, ಸುದ್ಧನ್ತಪರಿವಾಸೋ. ತಯೋ ಮಾನತ್ತಾ – ಪಟಿಚ್ಛನ್ನಮಾನತ್ತಂ, ಅಪ್ಪಟಿಚ್ಛನ್ನಮಾನತ್ತಂ, ಪಕ್ಖಮಾನತ್ತಂ. ತಯೋ ಪಾರಿವಾಸಿಕಸ್ಸ ಭಿಕ್ಖುನೋ ರತ್ತಿಚ್ಛೇದಾ – ಸಹವಾಸೋ, ವಿಪ್ಪವಾಸೋ, ಅನಾರೋಚನಾ. ಅತ್ಥಾಪತ್ತಿ ಅನ್ತೋ ಆಪಜ್ಜತಿ, ನೋ ಬಹಿ; ಅತ್ಥಾಪತ್ತಿ ಬಹಿ ಆಪಜ್ಜತಿ, ನೋ ಅನ್ತೋ; ಅತ್ಥಾಪತ್ತಿ ಅನ್ತೋ ಚೇವ ಆಪಜ್ಜತಿ ಬಹಿ ಚ. ಅತ್ಥಾಪತ್ತಿ ಅನ್ತೋಸೀಮಾಯ ಆಪಜ್ಜತಿ, ನೋ ಬಹಿಸೀಮಾಯ; ಅತ್ಥಾಪತ್ತಿ ಬಹಿಸೀಮಾಯ ಆಪಜ್ಜತಿ, ನೋ ಅನ್ತೋಸೀಮಾಯ; ಅತ್ಥಾಪತ್ತಿ ಅನ್ತೋಸೀಮಾಯ ಚೇವ ಆಪಜ್ಜತಿ ಬಹಿಸೀಮಾಯ ಚ. ತೀಹಾಕಾರೇಹಿ ಆಪತ್ತಿಂ ಆಪಜ್ಜತಿ – ಕಾಯೇನ ಆಪಜ್ಜತಿ, ವಾಚಾಯ ಆಪಜ್ಜತಿ, ಕಾಯೇನ ವಾಚಾಯ ಆಪಜ್ಜತಿ. ಅಪರೇಹಿಪಿ ತೀಹಾಕಾರೇಹಿ ಆಪತ್ತಿಂ ಆಪಜ್ಜತಿ – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ. ತೀಹಾಕಾರೇಹಿ ಆಪತ್ತಿಯಾ ವುಟ್ಠಾತಿ – ಕಾಯೇನ ವುಟ್ಠಾತಿ, ವಾಚಾಯ ವುಟ್ಠಾತಿ, ಕಾಯೇನ ವಾಚಾಯ ವುಟ್ಠಾತಿ. ಅಪರೇಹಿಪಿ ತೀಹಾಕಾರೇಹಿ ಆಪತ್ತಿಯಾ ವುಟ್ಠಾತಿ – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ. ತೀಣಿ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ. ತೀಣಿ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ.

[ಚೂಳವ. ೬] ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ತಜ್ಜನೀಯಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿಬಹುಲೋ ಅನಪದಾನೋ ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ. [ಚೂಳವ. ೧೫] ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ನಿಯಸ್ಸಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ…ಪೇ… ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿಬಹುಲೋ ಅನಪದಾನೋ ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ. [ಚೂಳವ. ೨೭] ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ಪಬ್ಬಾಜನೀಯಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ…ಪೇ… ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿಬಹುಲೋ ಅನಪದಾನೋ ಕುಲದೂಕಕೋ ಹೋತಿ ಪಾಪಸಮಾಚಾರೋ ಪಾಪಸಮಾಚಾರಾ ದಿಸ್ಸನ್ತಿ ಚೇವ ಸುಯ್ಯನ್ತಿ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ಪಟಿಸಾರಣೀಯಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ…ಪೇ… ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿ ಬಹುಲೋ ಅನಪದಾನೋ ಗಿಹೀ ಅಕ್ಕೋಸತಿ ಪರಿಭಾಸತಿ. [ಚೂಳವ. ೫೦] ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ…ಪೇ… ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿಬಹುಲೋ ಅನಪದಾನೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಸ್ಸಿತುಂ. [ಚೂಳವ. ೫೯] ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖೇಪನೀಯಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ…ಪೇ… ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿಬಹುಲೋ ಅನಪದಾನೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಟಿಕಾತುಂ. [ಚೂಳವ. ೬೯] ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖೇಪನೀಯಕಮ್ಮಂ ಕರೇಯ್ಯ – ಭಣ್ಡನಕಾರಕೋ ಹೋತಿ…ಪೇ… ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ, ಆಪತ್ತಿಬಹುಲೋ ಅನಪದಾನೋ ನ ಇಚ್ಛತಿ ಪಾಪಿಕಂ ದಿಟ್ಠಿಂ ಪಟಿನಿಸ್ಸಜ್ಜಿತುಂ.

ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಆಕಙ್ಖಮಾನೋ ಸಙ್ಘೋ ಆಗಾಳ್ಹಾಯ ಚೇತೇಯ್ಯ – ಭಣ್ಡನಕಾರಕೋ ಹೋತಿ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ, ಬಾಲೋ ಹೋತಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ, ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಅಧಿಸೀಲೇ ಸೀಲವಿಪನ್ನೋ ಹೋತಿ, ಅಜ್ಝಾಚಾರೇ ಆಚಾರವಿಪನ್ನೋ ಹೋತಿ, ಅತಿದಿಟ್ಠಿಯಾ ದಿಟ್ಠಿವಿಪನ್ನೋ ಹೋತಿ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಕಾಯಿಕೇನ ದವೇನ ಸಮನ್ನಾಗತೋ ಹೋತಿ, ವಾಚಸಿಕೇನ ದವೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ದವೇನ ಸಮನ್ನಾಗತೋ ಹೋತಿ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಕಾಯಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ, ವಾಚಸಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ಅನಾಚಾರೇನ ಸಮನ್ನಾಗತೋ ಹೋತಿ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಕಾಯಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ, ವಾಚಸಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ಉಪಘಾತಿಕೇನ ಸಮನ್ನಾಗತೋ ಹೋತಿ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಕಾಯಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ, ವಾಚಸಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ, ಕಾಯಿಕವಾಚಸಿಕೇನ ಮಿಚ್ಛಾಜೀವೇನ ಸಮನ್ನಾಗತೋ ಹೋತಿ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಆಪತ್ತಿಂ ಆಪನ್ನೋ ಕಮ್ಮಕತೋ ಉಪಸಮ್ಪಾದೇತಿ, ನಿಸ್ಸಯಂ ದೇತಿ, ಸಾಮಣೇರಂ ಉಪಟ್ಠಾಪೇತಿ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಯಾಯ ಆಪತ್ತಿಯಾ ಸಙ್ಘೇನ ಕಮ್ಮಂ ಕತಂ ಹೋತಿ ತಂ ಆಪತ್ತಿಂ ಆಪಜ್ಜತಿ, ಅಞ್ಞಂ ವಾ ತಾದಿಸಿಕಂ, ತತೋ ವಾ ಪಾಪಿಟ್ಠತರಂ. ಅಪರೇಹಿಪಿ ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಕಮ್ಮಂ ಕಾತಬ್ಬಂ – ಬುದ್ಧಸ್ಸ ಅವಣ್ಣಂ ಭಾಸತಿ, ಧಮ್ಮಸ್ಸ ಅವಣ್ಣಂ ಭಾಸತಿ, ಸಙ್ಘಸ್ಸ ಅವಣ್ಣಂ ಭಾಸತಿ.

ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಸಙ್ಘಮಜ್ಝೇ ಉಪೋಸಥಂ ಠಪೇನ್ತಸ್ಸ – ‘‘ಅಲಂ, ಭಿಕ್ಖು, ಮಾ ಭಣ್ಡನಂ ಮಾ ಕಲಹಂ ಮಾ ವಿಗ್ಗಹಂ ಮಾ ವಿವಾದ’’ನ್ತಿ ಓಮದ್ದಿತ್ವಾ ಸಙ್ಘೇನ ಉಪೋಸಥೋ ಕಾತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಸಙ್ಘಮಜ್ಝೇ ಪವಾರಣಂ ಠಪೇನ್ತಸ್ಸ – ‘‘ಅಲಂ, ಭಿಕ್ಖು, ಮಾ ಭಣ್ಡನಂ ಮಾ ಕಲಹಂ ಮಾ ವಿಗ್ಗಹಂ ಮಾ ವಿವಾದ’’ನ್ತಿ ಓಮದ್ದಿತ್ವಾ ಸಙ್ಘೇನ ಪವಾರೇತಬ್ಬಂ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ನ ಕಾಚಿ ಸಙ್ಘಸಮ್ಮುತಿ ದಾತಬ್ಬಾ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ [ಸಂಘೋ ನ ವೋಹರಿತಬ್ಬೋ (ಸ್ಯಾ.)] – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತೋ ಭಿಕ್ಖು ನ ಕಿಸ್ಮಿಂ ಚಿ ಪಚ್ಚೇಕಟ್ಠಾನೇ ಠಪೇತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ನಿಸ್ಸಾಯ ನ ವತ್ಥಬ್ಬಂ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ನಿಸ್ಸಯೋ ನ ದಾತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಓಕಾಸಕಮ್ಮಂ ಕಾರಾಪೇನ್ತಸ್ಸ ನಾಲಂ ಓಕಾಸಕಮ್ಮಂ ಕಾತುಂ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಸವಚನೀಯಂ ನಾದಾತಬ್ಬಂ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ವಿನಯೋ ನ ಪುಚ್ಛಿತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ವಿನಯೋ ನ ಪುಚ್ಛಿತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ವಿನಯೋ ನ ವಿಸ್ಸಜ್ಜೇತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ವಿನಯೋ ನ ವಿಸ್ಸಜ್ಜೇತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಅನುಯೋಗೋ ನ ದಾತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸದ್ಧಿಂ ವಿನಯೋ ನ ಸಾಕಚ್ಛಿತಬ್ಬೋ [ಸಾಕಚ್ಛಾತಬ್ಬೋ (ಕ.)] – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ. ತೀಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ನ ಉಪಸಮ್ಪಾದೇತಬ್ಬಂ ನ ನಿಸ್ಸಯೋ ದಾತಬ್ಬೋ ನ ಸಾಮಣೇರೋ ಉಪಟ್ಠಾಪೇತಬ್ಬೋ – ಅಲಜ್ಜೀ ಚ ಹೋತಿ, ಬಾಲೋ ಚ, ಅಪಕತತ್ತೋ ಚ.

ತಯೋ ಉಪೋಸಥಾ – ಚಾತುದ್ದಸಿಕೋ, ಪನ್ನರಸಿಕೋ, ಸಾಮಗ್ಗಿಉಪೋಸಥೋ. ಅಪರೇಪಿ ತಯೋ ಉಪೋಸಥಾ – ಸಙ್ಘೇಉಪೋಸಥೋ, ಗಣೇಉಪೋಸಥೋ, ಪುಗ್ಗಲೇಉಪೋಸಥೋ. ಅಪರೇಪಿ ತಯೋ ಉಪೋಸಥಾ – ಸುತ್ತುದ್ದೇಸೋಉಪೋಸಥೋ, ಪಾರಿಸುದ್ಧಿಉಪೋಸಥೋ, ಅಧಿಟ್ಠಾನುಪೋಸಥೋ. ತಿಸ್ಸೋ ಪವಾರಣಾ – ಚಾತುದ್ದಸಿಕಾ, ಪನ್ನರಸಿಕಾ, ಸಾಮಗ್ಗಿಪವಾರಣಾ. ಅಪರಾಪಿ ತಿಸ್ಸೋ ಪವಾರಣಾ – ಸಙ್ಘೇಪವಾರಣಾ, ಗಣೇಪವಾರಣಾ, ಪುಗ್ಗಲೇಪವಾರಣಾ. ಅಪರಾಪಿ ತಿಸ್ಸೋ ಪವಾರಣಾ – ತೇವಾಚಿಕಾಪವಾರಣಾ, ದ್ವೇವಾಚಿಕಾಪವಾರಣಾ, ಸಮಾನವಸ್ಸಿಕಾಪವಾರಣಾ.

ತಯೋ ಆಪಾಯಿಕಾ ನೇರಯಿಕಾ – ಇದಮಪ್ಪಹಾಯ, ಯೋ ಚ ಅಬ್ರಹ್ಮಚಾರೀ ಬ್ರಹ್ಮಚಾರಿಪಟಿಞ್ಞೋ, ಯೋ ಚ ಸುದ್ಧಂ ಬ್ರಹ್ಮಚಾರಿಂ ಪರಿಸುದ್ಧಬ್ರಹ್ಮಚರಿಯಂ ಚರನ್ತಂ ಅಮೂಲಕೇನ ಅಬ್ರಹ್ಮಚರಿಯೇನ ಅನುದ್ಧಂಸೇತಿ, ಯೋ ಚಾಯಂ ಏವಂವಾದೀ ಏವಂದಿಟ್ಠಿ [ಏವಂದಿಟ್ಠೀ (ಸೀ.)] – ‘‘ನತ್ಥಿ ಕಾಮೇಸು ದೋಸೋ’’ತಿ ಸೋ ಕಾಮೇಸು ಪಾತಬ್ಯತಂ ಆಪಜ್ಜತಿ. [ಅ. ನಿ. ೩.೭೦] ತೀಣಿ ಅಕುಸಲಮೂಲಾನಿ – ಲೋಭೋ ಅಕುಸಲಮೂಲಂ, ದೋಸೋ ಅಕುಸಲಮೂಲಂ, ಮೋಹೋ ಅಕುಸಲಮೂಲಂ. [ಅ. ನಿ. ೩.೭೦] ತೀಣಿ ಕುಸಲಮೂಲಾನಿ – ಅಲೋಭೋ ಕುಸಲಮೂಲಂ, ಅದೋಸೋ ಕುಸಲಮೂಲಂ, ಅಮೋಹೋ ಕುಸಲಮೂಲಂ. ತೀಣಿ ದುಚ್ಚರಿತಾನಿ – ಕಾಯದುಚ್ಚರಿತಂ, ವಚೀದುಚ್ಚರಿತಂ, ಮನೋದುಚ್ಚರಿತಂ. ತೀಣಿ ಸುಚರಿತಾನಿ – ಕಾಯಸುಚರಿತಂ, ವಚೀಸುಚರಿತಂ, ಮನೋಸುಚರಿತಂ. ತಯೋ ಅತ್ಥವಸೇ ಪಟಿಚ್ಚ ಭಗವತಾ ಕುಲೇಸು ತಿಕಭೋಜನಂ ಪಞ್ಞತ್ತಂ – ದುಮ್ಮಙ್ಕೂನಂ ಪುಗ್ಗಲಾನಂ ನಿಗ್ಗಹಾಯ, ಪೇಸಲಾನಂ ಭಿಕ್ಖೂನಂ ಫಾಸುವಿಹಾರಾಯ, ‘‘ಮಾ ಪಾಪಿಚ್ಛಾ ಪಕ್ಖಂ ನಿಸ್ಸಾಯ ಸಙ್ಘಂ ಭಿನ್ದೇಯ್ಯು’’ನ್ತಿ ಕುಲಾನುದ್ದಯತಾಯ ಚ. [ಚೂಳವ. ೩೫೦] ತೀಹಿ ಅಸದ್ಧಮ್ಮೇಹಿ ಅಭಿಭೂತೋ ಪರಿಯಾದಿನ್ನಚಿತ್ತೋ ದೇವದತ್ತೋ ಆಪಾಯಿಕೋ ನೇರಯಿಕೋ ಕಪ್ಪಟ್ಠೋ ಅತೇಕಿಚ್ಛೋ ಪಾಪಿಚ್ಛತಾ ಪಾಪಮಿತ್ತತಾ ಓರಮತ್ತಕೇನ ವಿಸೇಸಾಧಿಗಮೇನ ಅನ್ತರಾ ವೋಸಾನಂ ಆಪಾದಿ. ತಿಸ್ಸೋ ಸಮ್ಮುತಿಯೋ – ದಣ್ಡಸಮ್ಮುತಿ, ಸಿಕ್ಕಾಸಮ್ಮುತಿ, ದಣ್ಡಸಿಕ್ಕಾಸಮ್ಮುತಿ. ತಿಸ್ಸೋ ಪಾದುಕಾ ಧುವಟ್ಠಾನಿಕಾ ಅಸಙ್ಕಮನೀಯಾ – ವಚ್ಚಪಾದುಕಾ, ಪಸ್ಸಾವಪಾದುಕಾ, ಆಚಮನಪಾದುಕಾ. ತಿಸ್ಸೋ ಪಾದಘಂಸನಿಯೋ – ಸಕ್ಖರಂ, ಕಥಲಾ, ಸಮುದ್ದಫೇಣಕೋತಿ.

ತಿಕಂ ನಿಟ್ಠಿತಂ.

ತಸ್ಸುದ್ದಾನಂ –

ತಿಟ್ಠನ್ತೇ ಕಾಲೇ ರತ್ತಿಞ್ಚ, ದಸ ಪಞ್ಚ ಕುಸಲೇನ;

ವೇದನಾ ಚೋದನಾ ವತ್ಥು, ಸಲಾಕಾ ದ್ವೇ ಪಟಿಕ್ಖಿಪಾ.

ಪಞ್ಞತ್ತಿ ಅಪರೇ ದ್ವೇ ಚ, ಬಾಲೋ ಕಾಳೇ ಚ ಕಪ್ಪತಿ;

ಹೇಮನ್ತೇ ಸಙ್ಘೋ ಸಙ್ಘಸ್ಸ, ಛಾದನಾ ಚ ಪಟಿಚ್ಛಾದಿ.

ಪಟಿಚ್ಛನ್ನಾ ವಿವಟಾ ಚ, ಸೇನಾಸನಗಿಲಾಯನಾ;

ಪಾತಿಮೋಕ್ಖಂ ಪರಿವಾಸಂ, ಮಾನತ್ತಾ ಪಾರಿವಾಸಿಕಾ.

ಅನ್ತೋ ಅನ್ತೋ ಚ ಸೀಮಾಯ, ಆಪಜ್ಜತಿ ಪುನಾಪರೇ;

ವುಟ್ಠಾತಿ ಅಪರೇ ಚೇವ, ಅಮೂಳ್ಹವಿನಯಾ ದುವೇ.

ತಜ್ಜನೀಯಾ ನಿಯಸ್ಸಾ ಚ, ಪಬ್ಬಾಜಪಟಿಸಾರಣೀ;

ಅದಸ್ಸನಾ ಪಟಿಕಮ್ಮೇ, ಅನಿಸ್ಸಗ್ಗೇ ಚ ದಿಟ್ಠಿಯಾ.

ಆಗಾಳ್ಹಕಮ್ಮಾಧಿಸೀಲೇ, ದವಾನಾಚಾರ ಘಾತಿಕಾ;

ಆಜೀವಾಪನ್ನಾ ತಾದಿಸಿಕಾ, ಅವಣ್ಣುಪೋಸಥೇನ ಚ.

ಪವಾರಣಾ ಸಮ್ಮುತಿ ಚ, ವೋಹಾರಪಚ್ಚೇಕೇನ ಚ;

ನ ವತ್ಥಬ್ಬಂ ನ ದಾತಬ್ಬಂ, ಓಕಾಸಂ ನ ಕರೇ ತಥಾ.

ನ ಕರೇ ಸವಚನೀಯಂ, ನ ಪುಚ್ಛಿತಬ್ಬಕಾ ದುವೇ;

ನ ವಿಸ್ಸಜ್ಜೇ ದುವೇ ಚೇವ, ಅನುಯೋಗಮ್ಪಿ ನೋ ದದೇ.

ಸಾಕಚ್ಛಾ ಉಪಸಮ್ಪದಾ, ನಿಸ್ಸಯಸಾಮಣೇರಾ ಚ;

ಉಪೋಸಥತಿಕಾ ತೀಣಿ, ಪವಾರಣತಿಕಾ ತಯೋ.

ಆಪಾಯಿಕಾ ಅಕುಸಲಾ, ಕುಸಲಾ ಚರಿತಾ ದುವೇ;

ತಿಕಭೋಜನಸದ್ಧಮ್ಮೇ, ಸಮ್ಮುತಿ ಪಾದುಕೇನ ಚ;

ಪಾದಘಂಸನಿಕಾ ಚೇವ, ಉದ್ದಾನಂ ತಿಕಕೇ ಇದನ್ತಿ.

೪. ಚತುಕ್ಕವಾರೋ

೩೨೪. ಅತ್ಥಾಪತ್ತಿ ಸಕವಾಚಾಯ ಆಪಜ್ಜತಿ, ಪರವಾಚಾಯ ವುಟ್ಠಾತಿ; ಅತ್ಥಾಪತ್ತಿ ಪರವಾಚಾಯ ಆಪಜ್ಜತಿ, ಸಕವಾಚಾಯ ವುಟ್ಠಾತಿ; ಅತ್ಥಾಪತ್ತಿ ಸಕವಾಚಾಯ ಆಪಜ್ಜತಿ, ಸಕವಾಚಾಯ ವುಟ್ಠಾತಿ; ಅತ್ಥಾಪತ್ತಿ ಪರವಾಚಾಯ ಆಪಜ್ಜತಿ, ಪರವಾಚಾಯ ವುಟ್ಠಾತಿ. ಅತ್ಥಾಪತ್ತಿ ಕಾಯೇನ ಆಪಜ್ಜತಿ, ವಾಚಾಯ ವುಟ್ಠಾತಿ; ಅತ್ಥಾಪತ್ತಿ ವಾಚಾಯ ಆಪಜ್ಜತಿ, ಕಾಯೇನ ವುಟ್ಠಾತಿ; ಅತ್ಥಾಪತ್ತಿ ಕಾಯೇನ ಆಪಜ್ಜತಿ, ಕಾಯೇನ ವುಟ್ಠಾತಿ; ಅತ್ಥಾಪತ್ತಿ ವಾಚಾಯ ಆಪಜ್ಜತಿ, ವಾಚಾಯ ವುಟ್ಠಾತಿ. ಅತ್ಥಾಪತ್ತಿ ಪಸುತ್ತೋ ಆಪಜ್ಜತಿ, ಪಟಿಬುದ್ಧೋ ವುಟ್ಠಾತಿ; ಅತ್ಥಾಪತ್ತಿ ಪಟಿಬುದ್ಧೋ ಆಪಜ್ಜತಿ, ಪಸುತ್ತೋ ವುಟ್ಠಾತಿ; ಅತ್ಥಾಪತ್ತಿ ಪಸುತ್ತೋ ಆಪಜ್ಜತಿ, ಪಸುತ್ತೋ ವುಟ್ಠಾತಿ; ಅತ್ಥಾಪತ್ತಿ ಪಟಿಬುದ್ಧೋ ಆಪಜ್ಜತಿ, ಪಟಿಬುದ್ಧೋ ವುಟ್ಠಾತಿ. ಅತ್ಥಾಪತ್ತಿ ಅಚಿತ್ತಕೋ ಆಪಜ್ಜತಿ, ಸಚಿತ್ತಕೋ ವುಟ್ಠಾತಿ; ಅತ್ಥಾಪತ್ತಿ ಸಚಿತ್ತಕೋ ಆಪಜ್ಜತಿ, ಅಚಿತ್ತಕೋ ವುಟ್ಠಾತಿ; ಅತ್ಥಾಪತ್ತಿ ಅಚಿತ್ತಕೋ ಆಪಜ್ಜತಿ, ಅಚಿತ್ತಕೋ ವುಟ್ಠಾತಿ; ಅತ್ಥಾಪತ್ತಿ ಸಚಿತ್ತಕೋ ಆಪಜ್ಜತಿ, ಸಚಿತ್ತಕೋ ವುಟ್ಠಾತಿ. ಅತ್ಥಾಪತ್ತಿ ಆಪಜ್ಜನ್ತೋ ದೇಸೇತಿ; ದೇಸೇನ್ತೋ ಆಪಜ್ಜತಿ; ಅತ್ಥಾಪತ್ತಿ ಆಪಜ್ಜನ್ತೋ ವುಟ್ಠಾತಿ; ವುಟ್ಠಹನ್ತೋ ಆಪಜ್ಜತಿ. ಅತ್ಥಾಪತ್ತಿ ಕಮ್ಮೇನ ಆಪಜ್ಜತಿ, ಅಕಮ್ಮೇನ ವುಟ್ಠಾತಿ; ಅತ್ಥಾಪತ್ತಿ ಅಕಮ್ಮೇನ ಆಪಜ್ಜತಿ, ಕಮ್ಮೇನ ವುಟ್ಠಾತಿ; ಅತ್ಥಾಪತ್ತಿ ಕಮ್ಮೇನ ಆಪಜ್ಜತಿ, ಕಮ್ಮೇನ ವುಟ್ಠಾತಿ; ಅತ್ಥಾಪತ್ತಿ ಅಕಮ್ಮೇನ ಆಪಜ್ಜತಿ, ಅಕಮ್ಮೇನ ವುಟ್ಠಾತಿ.

[ಅ. ನಿ. ೪.೨೫೦; ದೀ. ನಿ. ೩.೩೧೩; ವಿಭ. ೯೩೯] ಚತ್ತಾರೋ ಅನರಿಯವೋಹಾರಾ – ಅದಿಟ್ಠೇ ದಿಟ್ಠವಾದಿತಾ, ಅಸ್ಸುತೇ ಸುತವಾದಿತಾ, ಅಮುತೇ ಮುತವಾದಿತಾ, ಅವಿಞ್ಞಾತೇ ವಿಞ್ಞಾತವಾದಿತಾ. ಚತ್ತಾರೋ ಅರಿಯವೋಹಾರಾ – ಅದಿಟ್ಠೇ ಅದಿಟ್ಠವಾದಿತಾ, ಅಸ್ಸುತೇ ಅಸ್ಸುತವಾದಿತಾ, ಅಮುತೇ ಅಮುತವಾದಿತಾ, ಅವಿಞ್ಞಾತೇ ಅವಿಞ್ಞಾತವಾದಿತಾ. ಅಪರೇಪಿ ಚತ್ತಾರೋ ಅನರಿಯವೋಹಾರಾ – ದಿಟ್ಠೇ ಅದಿಟ್ಠವಾದಿತಾ, ಸುತೇ ಅಸ್ಸುತವಾದಿತಾ, ಮುತೇ ಅಮುತವಾದಿತಾ, ವಿಞ್ಞಾತೇ ಅವಿಞ್ಞಾತವಾದಿತಾ. ಚತ್ತಾರೋ ಅರಿಯವೋಹಾರಾ – ದಿಟ್ಠೇ ದಿಟ್ಠವಾದಿತಾ, ಸುತೇ ಸುತವಾದಿತಾ, ಮುತೇ ಮುತವಾದಿತಾ, ವಿಞ್ಞಾತೇ ವಿಞ್ಞಾತವಾದಿತಾ.

ಚತ್ತಾರೋ ಪಾರಾಜಿಕಾ ಭಿಕ್ಖೂನಂ ಭಿಕ್ಖುನೀಹಿ ಸಾಧಾರಣಾ; ಚತ್ತಾರೋ ಪಾರಾಜಿಕಾ ಭಿಕ್ಖುನೀನಂ ಭಿಕ್ಖೂಹಿ ಅಸಾಧಾರಣಾ. ಚತ್ತಾರೋ ಪರಿಕ್ಖಾರಾ – ಅತ್ಥಿ ಪರಿಕ್ಖಾರೋ ರಕ್ಖಿತಬ್ಬೋ ಗೋಪೇತಬ್ಬೋ ಮಮಾಯಿತಬ್ಬೋ ಪರಿಭುಞ್ಜಿತಬ್ಬೋ; ಅತ್ಥಿ ಪರಿಕ್ಖಾರೋ ರಕ್ಖಿತಬ್ಬೋ ಗೋಪೇತಬ್ಬೋ ಮಮಾಯಿತಬ್ಬೋ, ನ ಪರಿಭುಞ್ಜಿತಬ್ಬೋ; ಅತ್ಥಿ ಪರಿಕ್ಖಾರೋ ರಕ್ಖಿತಬ್ಬೋ ಗೋಪೇತಬ್ಬೋ, ನ ಮಮಾಯಿತಬ್ಬೋ ನ ಪರಿಭುಞ್ಜಿತಬ್ಬೋ; ಅತ್ಥಿ ಪರಿಕ್ಖಾರೋ ನ ರಕ್ಖಿತಬ್ಬೋ ನ ಗೋಪೇತಬ್ಬೋ, ನ ಮಮಾಯಿತಬ್ಬೋ ನ ಪರಿಭುಞ್ಜಿತಬ್ಬೋ. ಅತ್ಥಾಪತ್ತಿ ಸಮ್ಮುಖಾ ಆಪಜ್ಜತಿ, ಪರಮ್ಮುಖಾ ವುಟ್ಠಾತಿ; ಅತ್ಥಾಪತ್ತಿ ಪರಮ್ಮುಖಾ ಆಪಜ್ಜತಿ, ಸಮ್ಮುಖಾ ವುಟ್ಠಾತಿ; ಅತ್ಥಾಪತ್ತಿ ಸಮ್ಮುಖಾ ಆಪಜ್ಜತಿ, ಸಮ್ಮುಖಾ ವುಟ್ಠಾತಿ; ಅತ್ಥಾಪತ್ತಿ ಪರಮ್ಮುಖಾ ಆಪಜ್ಜತಿ, ಪರಮ್ಮುಖಾ ವುಟ್ಠಾತಿ. ಅತ್ಥಾಪತ್ತಿ ಅಜಾನನ್ತೋ ಆಪಜ್ಜತಿ, ಜಾನನ್ತೋ ವುಟ್ಠಾತಿ; ಅತ್ಥಾಪತ್ತಿ ಜಾನನ್ತೋ ಆಪಜ್ಜತಿ, ಅಜಾನನ್ತೋ ವುಟ್ಠಾತಿ; ಅತ್ಥಾಪತ್ತಿ ಅಜಾನನ್ತೋ ಆಪಜ್ಜತಿ, ಅಜಾನನ್ತೋ ವುಟ್ಠಾತಿ; ಅತ್ಥಾಪತ್ತಿ ಜಾನನ್ತೋ ಆಪಜ್ಜತಿ, ಜಾನನ್ತೋ ವುಟ್ಠಾತಿ.

ಚತೂಹಾಕಾರೇಹಿ ಆಪತ್ತಿಂ ಆಪಜ್ಜತಿ – ಕಾಯೇನ ಆಪಜ್ಜತಿ, ವಾಚಾಯ ಆಪಜ್ಜತಿ, ಕಾಯೇನ ವಾಚಾಯ ಆಪಜ್ಜತಿ, ಕಮ್ಮವಾಚಾಯ ಆಪಜ್ಜತಿ. ಅಪರೇಹಿಪಿ ಚತೂಹಾಕಾರೇಹಿ ಆಪತ್ತಿಂ ಆಪಜ್ಜತಿ – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ, ಲಿಙ್ಗಪಾತುಭಾವೇನ. ಚತೂಹಾಕಾರೇಹಿ ಆಪತ್ತಿಯಾ ವುಟ್ಠಾತಿ – ಕಾಯೇನ ವುಟ್ಠಾತಿ, ವಾಚಾಯ ವುಟ್ಠಾತಿ, ಕಾಯೇನ ವಾಚಾಯ ವುಟ್ಠಾತಿ, ಕಮ್ಮವಾಚಾಯ ವುಟ್ಠಾತಿ. ಅಪರೇಹಿಪಿ ಚತೂಹಾಕಾರೇಹಿ ಆಪತ್ತಿಯಾ ವುಟ್ಠಾತಿ – ಸಙ್ಘಮಜ್ಝೇ, ಗಣಮಜ್ಝೇ, ಪುಗ್ಗಲಸ್ಸ ಸನ್ತಿಕೇ, ಲಿಙ್ಗಪಾತುಭಾವೇನ. ಸಹ ಪಟಿಲಾಭೇನ ಪುರಿಮಂ ಜಹತಿ, ಪಚ್ಛಿಮೇ ಪತಿಟ್ಠಾತಿ, ವಿಞ್ಞತ್ತಿಯೋ ಪಟಿಪ್ಪಸ್ಸಮ್ಭನ್ತಿ, ಪಣ್ಣತ್ತಿಯೋ ನಿರುಜ್ಝನ್ತಿ. ಸಹ ಪಟಿಲಾಭೇನ ಪಚ್ಛಿಮಂ ಜಹತಿ, ಪುರಿಮೇ ಪತಿಟ್ಠಾತಿ, ವಿಞ್ಞತ್ತಿಯೋ ಪಟಿಪ್ಪಸ್ಸಮ್ಭನ್ತಿ, ಪಣ್ಣತ್ತಿಯೋ ನಿರುಜ್ಝನ್ತಿ. ಚತಸ್ಸೋ ಚೋದನಾ – ಸೀಲವಿಪತ್ತಿಯಾ ಚೋದೇತಿ, ಆಚಾರವಿಪತ್ತಿಯಾ ಚೋದೇತಿ, ದಿಟ್ಠಿವಿಪತ್ತಿಯಾ ಚೋದೇತಿ, ಆಜೀವವಿಪತ್ತಿಯಾ ಚೋದೇತಿ. ಚತ್ತಾರೋ ಪರಿವಾಸಾ – ಪಟಿಚ್ಛನ್ನಪರಿವಾಸೋ, ಅಪ್ಪಟಿಚ್ಛನ್ನಪರಿವಾಸೋ, ಸುದ್ಧನ್ತಪರಿವಾಸೋ, ಸಮೋಧಾನಪರಿವಾಸೋ. ಚತ್ತಾರೋ ಮಾನತ್ತಾ – ಪಟಿಚ್ಛನ್ನಮಾನತ್ತಂ, ಅಪ್ಪಟಿಚ್ಛನ್ನಮಾನತ್ತಂ, ಪಕ್ಖಮಾನತ್ತಂ, ಸಮೋಧಾನಮಾನತ್ತಂ. ಚತ್ತಾರೋ ಮಾನತ್ತಚಾರಿಕಸ್ಸ ಭಿಕ್ಖುನೋ ರತ್ತಿಚ್ಛೇದಾ – ಸಹವಾಸೋ, ವಿಪ್ಪವಾಸೋ, ಅನಾರೋಚನಾ, ಊನೇ ಗಣೇ ಚರತಿ. ಚತ್ತಾರೋ ಸಾಮುಕ್ಕಂಸಾ. ಚತ್ತಾರೋ ಪಟಿಗ್ಗಹಿತಪರಿಭೋಗಾ – ಯಾವಕಾಲಿಕಂ, ಯಾಮಕಾಲಿಕಂ, ಸತ್ತಾಹಕಾಲಿಕಂ, ಯಾವಜೀವಿಕಂ. ಚತ್ತಾರಿ ಮಹಾವಿಕಟಾನಿ – ಗೂಥೋ, ಮುತ್ತಂ, ಛಾರಿಕಾ, ಮತ್ತಿಕಾ. ಚತ್ತಾರಿ ಕಮ್ಮಾನಿ – ಅಪಲೋಕನಕಮ್ಮಂ, ಞತ್ತಿಕಮ್ಮಂ, ಞತ್ತಿದುತಿಯಕಮ್ಮಂ, ಞತ್ತಿಚತುತ್ಥಕಮ್ಮಂ. ಅಪರಾನಿಪಿ ಚತ್ತಾರಿ ಕಮ್ಮಾನಿ – ಅಧಮ್ಮೇನ ವಗ್ಗಕಮ್ಮಂ, ಅಧಮ್ಮೇನ ಸಮಗ್ಗಕಮ್ಮಂ, ಧಮ್ಮೇನ ವಗ್ಗಕಮ್ಮಂ, ಧಮ್ಮೇನ ಸಮಗ್ಗಕಮ್ಮಂ. ಚತಸ್ಸೋ ವಿಪತ್ತಿಯೋ – ಸೀಲವಿಪತ್ತಿ, ಆಚಾರವಿಪತ್ತಿ, ದಿಟ್ಠಿವಿಪತ್ತಿ, ಆಜೀವವಿಪತ್ತಿ. ಚತ್ತಾರಿ ಅಧಿಕರಣಾನಿ – ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ. [ಅ. ನಿ. ೪.೨೧೧] ಚತ್ತಾರೋ ಪರಿಸದೂಸನಾ – ಭಿಕ್ಖು ದುಸ್ಸೀಲೋ ಪಾಪಧಮ್ಮೋ ಪರಿಸದೂಸನೋ, ಭಿಕ್ಖುನೀ ದುಸ್ಸೀಲಾ ಪಾಪಧಮ್ಮಾ ಪರಿಸದೂಸನಾ, ಉಪಾಸಕೋ ದುಸ್ಸೀಲೋ ಪಾಪಧಮ್ಮೋ ಪರಿಸದೂಸನೋ, ಉಪಾಸಿಕಾ ದುಸ್ಸೀಲಾ ಪಾಪಧಮ್ಮಾ ಪರಿಸದೂಸನಾ. ಚತ್ತಾರೋ ಪರಿಸಸೋಭನಾ [ಪರಿಸಸೋಭಣಾ (ಸ್ಯಾ. ಕ.)] – ಭಿಕ್ಖು ಸೀಲವಾ ಕಲ್ಯಾಣಧಮ್ಮೋ ಪರಿಸಸೋಭನೋ, ಭಿಕ್ಖುನೀ ಸೀಲವತೀ ಕಲ್ಯಾಣಧಮ್ಮಾ ಪರಿಸಸೋಭನಾ, ಉಪಾಸಕೋ ಸೀಲವಾ ಕಲ್ಯಾಣಧಮ್ಮೋ ಪರಿಸಸೋಭನೋ, ಉಪಾಸಿಕಾ ಸೀಲವತೀ ಕಲ್ಯಾಣಧಮ್ಮಾ ಪರಿಸಸೋಭನಾ.

ಅತ್ಥಾಪತ್ತಿ ಆಗನ್ತುಕೋ ಆಪಜ್ಜತಿ, ನೋ ಆವಾಸಿಕೋ; ಅತ್ಥಾಪತ್ತಿ ಆವಾಸಿಕೋ ಆಪಜ್ಜತಿ, ನೋ ಆಗನ್ತುಕೋ; ಅತ್ಥಾಪತ್ತಿ ಆಗನ್ತುಕೋ ಚೇವ ಆಪಜ್ಜತಿ ಆವಾಸಿಕೋ ಚ ಅತ್ಥಾಪತ್ತಿ ನೇವ ಆಗನ್ತುಕೋ ಆಪಜ್ಜತಿ, ನೋ ಆವಾಸಿಕೋ. ಅತ್ಥಾಪತ್ತಿ ಗಮಿಕೋ ಆಪಜ್ಜತಿ, ನೋ ಆವಾಸಿಕೋ; ಅತ್ಥಾಪತ್ತಿ ಆವಾಸಿಕೋ ಆಪಜ್ಜತಿ, ನೋ ಗಮಿಕೋ; ಅತ್ಥಾಪತ್ತಿ ಗಮಿಕೋ ಚೇವ ಆಪಜ್ಜತಿ ಆವಾಸಿಕೋ ಚ; ಅತ್ಥಾಪತ್ತಿ ನೇವ ಗಮಿಕೋ ಆಪಜ್ಜತಿ ನೋ ಆವಾಸಿಕೋ. ಅತ್ಥಿ ವತ್ಥುನಾನತ್ತತಾ ನೋ ಆಪತ್ತಿನಾನತ್ತತಾ, ಅತ್ಥಿ ಆಪತ್ತಿನಾನತ್ತತಾ ನೋ ವತ್ಥುನಾನತ್ತತಾ, ಅತ್ಥಿ ವತ್ಥುನಾನತ್ತತಾ ಚೇವ ಆಪತ್ತಿನಾನತ್ತತಾ ಚ, ಅತ್ಥಿ ನೇವ ವತ್ಥುನಾನತ್ತತಾ ನೋ ಆಪತ್ತಿನಾನತ್ತತಾ. ಅತ್ಥಿ ವತ್ಥುಸಭಾಗತಾ ನೋ ಆಪತ್ತಿಸಭಾಗತಾ, ಅತ್ಥಿ ಆಪತ್ತಿಸಭಾಗತಾ ನೋ ವತ್ಥುಸಭಾಗತಾ, ಅತ್ಥಿ ವತ್ಥುಸಭಾಗತಾ ಚೇವ ಆಪತ್ತಿಸಭಾಗತಾ ಚ ಅತ್ಥಿ ನೇವ ವತ್ಥುಸಭಾಗತಾ ನೋ ಆಪತ್ತಿಸಭಾಗತಾ. ಅತ್ಥಾಪತ್ತಿ ಉಪಜ್ಝಾಯೋ ಆಪಜ್ಜತಿ ನೋ ಸದ್ಧಿವಿಹಾರಿಕೋ, ಅತ್ಥಾಪತ್ತಿ ಸದ್ಧಿವಿಹಾರಿಕೋ ಆಪಜ್ಜತಿ ನೋ ಉಪಜ್ಝಾಯೋ, ಅತ್ಥಾಪತ್ತಿ ಉಪಜ್ಝಾಯೋ ಚೇವ ಆಪಜ್ಜತಿ ಸದ್ಧಿವಿಹಾರಿಕೋ ಚ, ಅತ್ಥಾಪತ್ತಿ ನೇವ ಉಪಜ್ಝಾಯೋ ಆಪಜ್ಜತಿ ನೋ ಸದ್ಧಿವಿಹಾರಿಕೋ. ಅತ್ಥಾಪತ್ತಿ ಆಚರಿಯೋ ಆಪಜ್ಜತಿ ನೋ ಅನ್ತೇವಾಸಿಕೋ, ಅತ್ಥಾಪತ್ತಿ ಅನ್ತೇವಾಸಿಕೋ ಆಪಜ್ಜತಿ ನೋ ಆಚರಿಯೋ, ಅತ್ಥಾಪತ್ತಿ ಆಚರಿಯೋ ಚೇವ ಆಪಜ್ಜತಿ ಅನ್ತೇವಾಸಿಕೋ ಚ, ಅತ್ಥಾಪತ್ತಿ ನೇವ ಆಚರಿಯೋ ಆಪಜ್ಜತಿ ನೋ ಅನ್ತೇವಾಸಿಕೋ. ಚತ್ತಾರೋ ಪಚ್ಚಯಾ ಅನಾಪತ್ತಿ ವಸ್ಸಚ್ಛೇದಸ್ಸ – ಸಙ್ಘೋ ವಾ ಭಿನ್ನೋ ಹೋತಿ, ಸಙ್ಘಂ ವಾ ಭಿನ್ದಿತುಕಾಮಾ ಹೋನ್ತಿ, ಜೀವಿತನ್ತರಾಯೋ ವಾ ಹೋತಿ, ಬ್ರಹ್ಮಚರಿಯನ್ತರಾಯೋ ವಾ ಹೋತಿ. ಚತ್ತಾರಿ ವಚೀದುಚ್ಚರಿತಾನಿ – ಮುಸಾವಾದೋ, ಪಿಸುಣಾ ವಾಚಾ, ಫರುಸಾ ವಾಚಾ, ಸಮ್ಫಪ್ಪಲಾಪೋ. ಚತ್ತಾರಿ ವಚೀಸುಚರಿತಾನಿ – ಸಚ್ಚವಾಚಾ, ಅಪಿಸುಣಾ ವಾಚಾ, ಸಣ್ಹಾ ವಾಚಾ, ಮನ್ತಾ ಭಾಸಾ. ಅತ್ಥಿ ಆದಿಯನ್ತೋ ಗರುಕಂ ಆಪತ್ತಿಂ ಆಪಜ್ಜತಿ, ಪಯೋಜೇನ್ತೋ ಲಹುಕಂ; ಅತ್ಥಿ ಆದಿಯನ್ತೋ ಲಹುಕಂ ಆಪತ್ತಿಂ ಆಪಜ್ಜತಿ, ಪಯೋಜೇನ್ತೋ ಗರುಕಂ, ಅತ್ಥಿ ಆದಿಯನ್ತೋಪಿ ಪಯೋಜೇನ್ತೋಪಿ ಗರುಕಂ ಆಪತ್ತಿಂ ಆಪಜ್ಜತಿ; ಅತ್ಥಿ ಆದಿಯನ್ತೋಪಿ ಪಯೋಜೇನ್ತೋಪಿ ಲಹುಕಂ ಆಪತ್ತಿಂ ಆಪಜ್ಜತಿ.

ಅತ್ಥಿ ಪುಗ್ಗಲೋ ಅಭಿವಾದನಾರಹೋ, ನೋ ಪಚ್ಚುಟ್ಠಾನಾರಹೋ; ಅತ್ಥಿ ಪುಗ್ಗಲೋ ಪಚ್ಚುಟ್ಠಾನಾರಹೋ, ನೋ ಅಭಿವಾದನಾರಹೋ; ಅತ್ಥಿ ಪುಗ್ಗಲೋ ಅಭಿವಾದನಾರಹೋ ಚೇವ ಪಚ್ಚುಟ್ಠಾನಾರಹೋ ಚ; ಅತ್ಥಿ ಪುಗ್ಗಲೋ ನೇವ ಅಭಿವಾದನಾರಹೋ ನೋ ಪಚ್ಚುಟ್ಠಾನಾರಹೋ. ಅತ್ಥಿ ಪುಗ್ಗಲೋ ಆಸನಾರಹೋ, ನೋ ಅಭಿವಾದನಾರಹೋ; ಅತ್ಥಿ ಪುಗ್ಗಲೋ ಅಭಿವಾದನಾರಹೋ, ನೋ ಆಸನಾರಹೋ; ಅತ್ಥಿ ಪುಗ್ಗಲೋ ಆಸನಾರಹೋ ಚೇವ ಅಭಿವಾದನಾರಹೋ ಚ; ಅತ್ಥಿ ಪುಗ್ಗಲೋ ನೇವ ಆಸನಾರಹೋ ನೋ ಅಭಿವಾದನಾರಹೋ. ಅತ್ಥಾಪತ್ತಿ ಕಾಲೇ ಆಪಜ್ಜತಿ, ನೋ ವಿಕಾಲೇ; ಅತ್ಥಾಪತ್ತಿ ವಿಕಾಲೇ ಆಪಜ್ಜತಿ, ನೋ ಕಾಲೇ; ಅತ್ಥಾಪತ್ತಿ ಕಾಲೇ ಚೇವ ಆಪಜ್ಜತಿ ವಿಕಾಲೇ ಚ; ಅತ್ಥಾಪತ್ತಿ ನೇವ ಕಾಲೇ ಆಪಜ್ಜತಿ ನೋ ವಿಕಾಲೇ. ಅತ್ಥಿ ಪಟಿಗ್ಗಹಿತಂ ಕಾಲೇ ಕಪ್ಪತಿ, ನೋ ವಿಕಾಲೇ; ಅತ್ಥಿ ಪಟಿಗ್ಗಹಿತಂ ವಿಕಾಲೇ ಕಪ್ಪತಿ, ನೋ ಕಾಲೇ; ಅತ್ಥಿ ಪಟಿಗ್ಗಹಿತಂ ಕಾಲೇ ಚೇವ ಕಪ್ಪತಿ ವಿಕಾಲೇ ಚ; ಅತ್ಥಿ ಪಟಿಗ್ಗಹಿತಂ ನೇವ ಕಾಲೇ ಕಪ್ಪತಿ ನೋ ವಿಕಾಲೇ. ಅತ್ಥಾಪತ್ತಿ ಪಚ್ಚನ್ತಿಮೇಸು ಜನಪದೇಸು ಆಪಜ್ಜತಿ, ನೋ ಮಜ್ಝಿಮೇಸು; ಅತ್ಥಾಪತ್ತಿ ಮಜ್ಝಿಮೇಸು ಜನಪದೇಸು ಆಪಜ್ಜತಿ, ನೋ ಪಚ್ಚನ್ತಿಮೇಸು; ಅತ್ಥಾಪತ್ತಿ ಪಚ್ಚನ್ತಿಮೇಸು ಚೇವ ಜನಪದೇಸು ಆಪಜ್ಜತಿ ಮಜ್ಝಿಮೇಸು ಚ; ಅತ್ಥಾಪತ್ತಿ ನೇವ ಪಚ್ಚನ್ತಿಮೇಸು ಜನಪದೇಸು ಆಪಜ್ಜತಿ ನೋ ಮಜ್ಝಿಮೇಸು. ಅತ್ಥಿ ಪಚ್ಚನ್ತಿಮೇಸು ಜನಪದೇಸು ಕಪ್ಪತಿ, ನೋ ಮಜ್ಝಿಮೇಸು; ಅತ್ಥಿ ಮಜ್ಝಿಮೇಸು ಜನಪದೇಸು ಕಪ್ಪತಿ, ನೋ ಪಚ್ಚನ್ತಿಮೇಸು; ಅತ್ಥಿ ಪಚ್ಚನ್ತಿಮೇಸು ಚೇವ ಜನಪದೇಸು ಕಪ್ಪತಿ ಮಜ್ಝಿಮೇಸು ಚ; ಅತ್ಥಿ ನೇವ ಪಚ್ಚನ್ತಿಮೇಸು ಜನಪದೇಸು ಕಪ್ಪತಿ ನೋ ಮಜ್ಝಿಮೇಸು. ಅತ್ಥಾಪತ್ತಿ ಅನ್ತೋ ಆಪಜ್ಜತಿ, ನೋ ಬಹಿ; ಅತ್ಥಾಪತ್ತಿ ಬಹಿ ಆಪಜ್ಜತಿ, ನೋ ಅನ್ತೋ; ಅತ್ಥಾಪತ್ತಿ ಅನ್ತೋ ಚೇವ ಆಪಜ್ಜತಿ ಬಹಿ ಚ; ಅತ್ಥಾಪತ್ತಿ ನೇವ ಅನ್ತೋ ಆಪಜ್ಜತಿ ನೋ ಬಹಿ. ಅತ್ಥಾಪತ್ತಿ ಅನ್ತೋಸೀಮಾಯ ಆಪಜ್ಜತಿ, ನೋ ಬಹಿಸೀಮಾಯ; ಅತ್ಥಾಪತ್ತಿ ಬಹಿಸೀಮಾಯ ಆಪಜ್ಜತಿ, ನೋ ಅನ್ತೋಸೀಮಾಯ; ಅತ್ಥಾಪತ್ತಿ ಅನ್ತೋಸೀಮಾಯ ಚೇವ ಆಪಜ್ಜತಿ ಬಹಿಸೀಮಾಯ ಚ; ಅತ್ಥಾಪತ್ತಿ ನೇವ ಅನ್ತೋಸೀಮಾಯ ಆಪಜ್ಜತಿ ನೋ ಬಹಿಸೀಮಾಯ. ಅತ್ಥಾಪತ್ತಿ ಗಾಮೇ ಆಪಜ್ಜತಿ, ನೋ ಅರಞ್ಞೇ; ಅತ್ಥಾಪತ್ತಿ ಅರಞ್ಞೇ ಆಪಜ್ಜತಿ, ನೋ ಗಾಮೇ; ಅತ್ಥಾಪತ್ತಿ ಗಾಮೇ ಚೇವ ಆಪಜ್ಜತಿ ಅರಞ್ಞೇ ಚ; ಅತ್ಥಾಪತ್ತಿ ನೇವ ಗಾಮೇ ಆಪಜ್ಜತಿ ನೋ ಅರಞ್ಞೇ.

ಚತಸ್ಸೋ ಚೋದನಾ – ವತ್ಥುಸನ್ದಸ್ಸನಾ, ಆಪತ್ತಿಸನ್ದಸ್ಸನಾ, ಸಂವಾಸಪಟಿಕ್ಖೇಪೋ, ಸಾಮೀಚಿಪಟಿಕ್ಖೇಪೋ. ಚತ್ತಾರೋ ಪುಬ್ಬಕಿಚ್ಚಾ. ಚತ್ತಾರೋ ಪತ್ತಕಲ್ಲಾ. ಚತ್ತಾರಿ ಅನಞ್ಞಪಾಚಿತ್ತಿಯಾನಿ. ಚತಸ್ಸೋ ಭಿಕ್ಖುಸಮ್ಮುತಿಯೋ. [ಅ. ನಿ. ೪.೧೭; ವಿಭ. ೯೩೯; ದೀ. ನಿ. ೩.೩೧೧] ಚತ್ತಾರಿ ಅಗತಿಗಮನಾನಿ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಚತ್ತಾರಿ ನಾಗತಿಗಮನಾನಿ – ನ ಛನ್ದಾಗತಿಂ ಗಚ್ಛತಿ, ನ ದೋಸಾಗತಿಂ ಗಚ್ಛತಿ, ನ ಮೋಹಾಗತಿಂ ಗಚ್ಛತಿ, ನ ಭಯಾಗತಿಂ ಗಚ್ಛತಿ. ಚತೂಹಙ್ಗೇಹಿ ಸಮನ್ನಾಗತೋ ಅಲಜ್ಜೀ ಭಿಕ್ಖು ಸಙ್ಘಂ ಭಿನ್ದತಿ – ಛನ್ದಾಗತಿಂ ಗಚ್ಛನ್ತೋ, ದೋಸಾಗತಿಂ ಗಚ್ಛನ್ತೋ, ಮೋಹಾಗತಿಂ ಗಚ್ಛನ್ತೋ, ಭಯಾಗತಿಂ ಗಚ್ಛನ್ತೋ. ಚತೂಹಙ್ಗೇಹಿ ಸಮನ್ನಾಗತೋ ಪೇಸಲೋ ಭಿಕ್ಖು ಭಿನ್ನಂ ಸಙ್ಘಂ ಸಮಗ್ಗಂ ಕರೋತಿ – ನ ಛನ್ದಾಗತಿಂ ಗಚ್ಛನ್ತೋ, ನ ದೋಸಾಗತಿಂ ಗಚ್ಛನ್ತೋ, ನ ಮೋಹಾಗತಿಂ ಗಚ್ಛನ್ತೋ, ನ ಭಯಾಗತಿಂ ಗಚ್ಛನ್ತೋ. ಚತೂಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ವಿನಯೋ ನ ಪುಚ್ಛಿತಬ್ಬೋ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಚತೂಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ವಿನಯೋ ನ ಪುಚ್ಛಿತಬ್ಬೋ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಚತೂಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ವಿನಯೋ ನ ವಿಸ್ಸಜ್ಜೇತಬ್ಬೋ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಚತೂಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ವಿನಯೋ ನ ವಿಸ್ಸಜ್ಜೇತಬ್ಬೋ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಚತೂಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ ಅನುಯೋಗೋ ನ ದಾತಬ್ಬೋ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಚತೂಹಙ್ಗೇಹಿ ಸಮನ್ನಾಗತೇ ಭಿಕ್ಖುನಾ ಸದ್ಧಿಂ ವಿನಯೋ ನ ಸಾಕಚ್ಛಿತಬ್ಬೋ – ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ. ಅತ್ಥಾಪತ್ತಿ ಗಿಲಾನೋ ಆಪಜ್ಜತಿ, ನೋ ಅಗಿಲಾನೋ; ಅತ್ಥಾಪತ್ತಿ ಅಗಿಲಾನೋ ಆಪಜ್ಜತಿ, ನೋ ಗಿಲಾನೋ; ಅತ್ಥಾಪತ್ತಿ ಗಿಲಾನೋ ಚೇವ ಆಪಜ್ಜತಿ ಅಗಿಲಾನೋ ಚ; ಅತ್ಥಾಪತ್ತಿ ನೇವ ಗಿಲಾನೋ ಆಪಜ್ಜತಿ ನೋ ಅಗಿಲಾನೋ. ಚತ್ತಾರಿ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ಚತ್ತಾರಿ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ.

ಚತುಕ್ಕಂ ನಿಟ್ಠಿತಂ.

ತಸ್ಸುದ್ದಾನಂ –

ಸಕವಾಚಾಯ ಕಾಯೇನ, ಪಸುತ್ತೋ ಚ ಅಚಿತ್ತಕೋ;

ಆಪಜ್ಜನ್ತೋ ಚ ಕಮ್ಮೇನ, ವೋಹಾರಾ ಚತುರೋ ತಥಾ.

ಭಿಕ್ಖೂನಂ ಭಿಕ್ಖುನೀನಞ್ಚ, ಪರಿಕ್ಖಾರೋ ಚ ಸಮ್ಮುಖಾ;

ಅಜಾನಕಾಯೇ ಮಜ್ಝೇ ಚ, ವುಟ್ಠಾತಿ ದುವಿಧಾ ತಥಾ.

ಪಟಿಲಾಭೇನ ಚೋದನಾ, ಪರಿವಾಸಾ ಚ ವುಚ್ಚತಿ;

ಮಾನತ್ತಚಾರಿಕಾ ಚಾಪಿ, ಸಾಮುಕ್ಕಂಸಾ ಪಟಿಗ್ಗಹಿ.

ಮಹಾವಿಕಟಕಮ್ಮಾನಿ, ಪುನ ಕಮ್ಮೇ ವಿಪತ್ತಿಯೋ;

ಅಧಿಕರಣಾ ದುಸ್ಸೀಲಾ ಚ, ಸೋಭನಾಗನ್ತುಕೇನ ಚ.

ಗಮಿಕೋ ವತ್ಥುನಾನತ್ತಾ, ಸಭಾಗುಪಜ್ಝಾಯೇನ ಚ;

ಆಚರಿಯೋ ಪಚ್ಚಯಾ ವಾ, ದುಚ್ಚರಿತಂ ಸುಚರಿತಂ.

ಆದಿಯನ್ತೋ ಪುಗ್ಗಲೋ ಚ, ಅರಹೋ ಆಸನೇನ ಚ;

ಕಾಲೇ ಚ ಕಪ್ಪತಿ ಚೇವ, ಪಚ್ಚನ್ತಿಮೇಸು ಕಪ್ಪತಿ.

ಅನ್ತೋ ಅನ್ತೋ ಚ ಸೀಮಾಯ, ಗಾಮೇ ಚ ಚೋದನಾಯ ಚ;

ಪುಬ್ಬಕಿಚ್ಚಂ ಪತ್ತಕಲ್ಲಂ, ಅನಞ್ಞಾ ಸಮ್ಮುತಿಯೋ ಚ.

ಅಗತಿ ನಾಗತಿ ಚೇವ, ಅಲಜ್ಜೀ ಪೇಸಲೇನ ಚ;

ಪುಚ್ಛಿತಬ್ಬಾ ದುವೇ ಚೇವ, ವಿಸ್ಸಜ್ಜೇಯ್ಯಾ ತಥಾ ದುವೇ;

ಅನುಯೋಗೋ ಚ ಸಾಕಚ್ಛಾ, ಗಿಲಾನೋ ಠಪನೇನ ಚಾತಿ.

೫. ಪಞ್ಚಕವಾರೋ

೩೨೫. ಪಞ್ಚ ಆಪತ್ತಿಯೋ. ಪಞ್ಚ ಆಪತ್ತಿಕ್ಖನ್ಧಾ. ಪಞ್ಚ ವಿನೀತವತ್ಥೂನಿ. ಪಞ್ಚ ಕಮ್ಮಾನಿ ಆನನ್ತರಿಕಾನಿ. ಪಞ್ಚ ಪುಗ್ಗಲಾ ನಿಯತಾ. ಪಞ್ಚ ಛೇದನಕಾ ಆಪತ್ತಿಯೋ. ಪಞ್ಚಹಾಕಾರೇಹಿ ಆಪತ್ತಿಂ ಆಪಜ್ಜತಿ. ಪಞ್ಚ ಆಪತ್ತಿಯೋ. ಮುಸಾವಾದಪಚ್ಚಯಾ ಪಞ್ಚಹಾಕಾರೇಹಿ ಕಮ್ಮಂ ನ ಉಪೇತಿ – ಸಯಂ ವಾ ಕಮ್ಮಂ ನ ಕರೋತಿ, ಪರಂ ವಾ ನ ಅಜ್ಝೇಸತಿ, ಛನ್ದಂ ವಾ ಪಾರಿಸುದ್ಧಿಂ ವಾ ನ ದೇತಿ, ಕಯಿರಮಾನೇ ಕಮ್ಮೇ ಪಟಿಕ್ಕೋಸತಿ, ಕತೇ ವಾ ಪನ ಕಮ್ಮೇ ಅಧಮ್ಮದಿಟ್ಠಿ ಹೋತಿ. ಪಞ್ಚಹಾಕಾರೇಹಿ ಕಮ್ಮಂ ಉಪೇತಿ – ಸಯಂ ವಾ ಕಮ್ಮಂ ಕರೋತಿ, ಪರಂ ವಾ ಅಜ್ಝೇಸತಿ, ಛನ್ದಂ ವಾ ಪಾರಿಸುದ್ಧಿಂ ವಾ ದೇತಿ, ಕಯಿರಮಾನೇ ಕಮ್ಮೇ ನಪ್ಪಟಿಕ್ಕೋಸತಿ, ಕತೇ ವಾ ಪನ ಕಮ್ಮೇ ಧಮ್ಮದಿಟ್ಠಿ ಹೋತಿ. ಪಞ್ಚ ಪಿಣ್ಡಪಾತಿಕಸ್ಸ ಭಿಕ್ಖುನೋ ಕಪ್ಪನ್ತಿ – ಅನಾಮನ್ತಚಾರೋ, ಗಣಭೋಜನಂ, ಪರಮ್ಪರಭೋಜನಂ, ಅನಧಿಟ್ಠಾನಂ, ಅವಿಕಪ್ಪನಾ. [ಅ. ನಿ. ೫.೧೦೨] ಪಞ್ಚಹಙ್ಗೇಹಿ ಸಮನ್ನಾಗತೋ ಭಿಕ್ಖು ಉಸ್ಸಙ್ಕಿತಪರಿಸಙ್ಕಿತೋ ಹೋತಿ – ಪಾಪಭಿಕ್ಖುಪಿ ಅಕುಪ್ಪಧಮ್ಮೋಪಿ ವೇಸಿಯಾಗೋಚರೋ ವಾ ಹೋತಿ, ವಿಧವಾಗೋಚರೋ ವಾ ಹೋತಿ, ಥುಲ್ಲಕುಮಾರಿಗೋಚರೋ ವಾ ಹೋತಿ, ಪಣ್ಡಕಗೋಚರೋ ವಾ ಹೋತಿ, ಭಿಕ್ಖುನಿಗೋಚರೋ ವಾ ಹೋತಿ. ಪಞ್ಚ ತೇಲಾನಿ – ತಿಲತೇಲಂ, ಸಾಸಪತೇಲಂ, ಮಧುಕತೇಲಂ, ಏರಣ್ಡಕತೇಲಂ, ವಸಾತೇಲಂ. ಪಞ್ಚ ವಸಾನಿ – ಅಚ್ಛವಸಂ, ಮಚ್ಛವಸಂ, ಸುಸುಕಾವಸಂ, ಸೂಕರವಸಂ, ಗದ್ರಭವಸಂ. [ಅ. ನಿ. ೫.೧೩೦; ದೀ. ನಿ. ೩.೩೧೬] ಪಞ್ಚ ಬ್ಯಸನಾನಿ – ಞಾತಿಬ್ಯಸನಂ, ಭೋಗಬ್ಯಸನಂ, ರೋಗಬ್ಯಸನಂ, ಸೀಲಬ್ಯಸನಂ, ದಿಟ್ಠಿಬ್ಯಸನಂ. [ಅ. ನಿ. ೫.೧೩೦; ದೀ. ನಿ. ೩.೩೧೬] ಪಞ್ಚ ಸಮ್ಪದಾ – ಞಾತಿಸಮ್ಪದಾ, ಭೋಗಸಮ್ಪದಾ, ಅರೋಗಸಮ್ಪದಾ, ಸೀಲಸಮ್ಪದಾ, ದಿಟ್ಠಿಸಮ್ಪದಾ. ಪಞ್ಚ ನಿಸ್ಸಯಪಟಿಪ್ಪಸ್ಸದ್ಧಿಯೋ ಉಪಜ್ಝಾಯಮ್ಹಾ – ಉಪಜ್ಝಾಯೋ ಪಕ್ಕನ್ತೋ ವಾ ಹೋತಿ, ವಿಬ್ಭನ್ತೋ ವಾ, ಕಾಲಙ್ಕತೋ ವಾ, ಪಕ್ಖಸಙ್ಕನ್ತೋ ವಾ, ಆಣತ್ತಿಯೇವ ಪಞ್ಚಮೀ. ಪಞ್ಚ ಪುಗ್ಗಲಾ ನ ಉಪಸಮ್ಪಾದೇತಬ್ಬಾ – ಅದ್ಧಾನಹೀನೋ, ಅಙ್ಗಹೀನೋ, ವತ್ಥುವಿಪನ್ನೋ, ಕರಣದುಕ್ಕಟಕೋ, ಅಪರಿಪೂರೋ. ಪಞ್ಚ ಪಂಸುಕೂಲಾನಿ – ಸೋಸಾನಿಕಂ, ಪಾಪಣಿಕಂ, ಉನ್ದೂರಕ್ಖಾಯಿಕಂ, ಉಪಚಿಕಕ್ಖಾಯಿಕಂ, ಅಗ್ಗಿದಡ್ಢಂ. ಅಪರಾನಿಪಿ ಪಞ್ಚ ಪಂಸುಕೂಲಾನಿ – ಗೋಖಾಯಿಕಂ, ಅಜಕ್ಖಾಯಿಕಂ, ಥೂಪಚೀವರಂ, ಆಭಿಸೇಕಿಕಂ, ಗತಪಟಿಯಾಗತಂ [ಭತಪಟಿಯಾಭತಂ (ಕ.)]. ಪಞ್ಚ ಅವಹಾರಾ – ಥೇಯ್ಯಾವಹಾರೋ, ಪಸಯ್ಹಾವಹಾರೋ, ಪರಿಕಪ್ಪಾವಹಾರೋ, ಪಟಿಚ್ಛನ್ನಾವಹಾರೋ, ಕುಸಾವಹಾರೋ. ಪಞ್ಚ ಮಹಾಚೋರಾ ಸನ್ತೋ ಸಂವಿಜ್ಜಮಾನಾ ಲೋಕಸ್ಮಿಂ. ಪಞ್ಚ ಅವಿಸ್ಸಜ್ಜನಿಯಾನಿ. ಪಞ್ಚ ಅವೇಭಙ್ಗಿಯಾನಿ. ಪಞ್ಚಾಪತ್ತಿಯೋ ಕಾಯತೋ ಸಮುಟ್ಠನ್ತಿ, ನ ವಾಚತೋ ನ ಚಿತ್ತತೋ. ಪಞ್ಚಾಪತ್ತಿಯೋ ಕಾಯತೋ ಚ ವಾಚತೋ ಚ ಸಮುಟ್ಠನ್ತಿ, ಚಿತ್ತತೋ. ಪಞ್ಚಾಪತ್ತಿಯೋ ದೇಸನಾಗಾಮಿನಿಯೋ. ಪಞ್ಚ ಸಙ್ಘಾ. ಪಞ್ಚ ಪಾತಿಮೋಕ್ಖುದ್ದೇಸಾ. ಸಬ್ಬಪಚ್ಚನ್ತಿಮೇಸು ಜನಪದೇಸು ವಿನಯಧರಪಞ್ಚಮೇನ ಗಣೇನ ಉಪಸಮ್ಪಾದೇತಬ್ಬಂ. ಪಞ್ಚಾನಿಸಂಸಾ ಕಥಿನತ್ಥಾರೇ. ಪಞ್ಚ ಕಮ್ಮಾನಿ. ಯಾವತತಿಯಕೇ ಪಞ್ಚ ಆಪತ್ತಿಯೋ. ಪಞ್ಚಹಾಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ಪಾರಾಜಿಕಸ್ಸ. ಪಞ್ಚಹಾಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ಥುಲ್ಲಚ್ಚಯಸ್ಸ. ಪಞ್ಚಹಾಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ದುಕ್ಕಟಸ್ಸ. ಪಞ್ಚ ಅಕಪ್ಪಿಯಾನಿ ನ ಪರಿಭುಞ್ಜಿತಬ್ಬಾನಿ – ಅದಿನ್ನಞ್ಚ ಹೋತಿ, ಅವಿದಿತಞ್ಚ ಹೋತಿ, ಅಕಪ್ಪಿಯಞ್ಚ ಹೋತಿ, ಅಪ್ಪಟಿಗ್ಗಹಿತಞ್ಚ ಹೋತಿ, ಅಕತಾತಿರಿತ್ತಞ್ಚ ಹೋತಿ. ಪಞ್ಚ ಕಪ್ಪಿಯಾನಿ ಪರಿಭುಞ್ಜಿತಬ್ಬಾನಿ – ದಿನ್ನಞ್ಚ ಹೋತಿ, ವಿದಿತಞ್ಚ ಹೋತಿ, ಕಪ್ಪಿಯಞ್ಚ ಹೋತಿ, ಪಟಿಗ್ಗಹಿತಞ್ಚ ಹೋತಿ, ಕತಾತಿರಿತ್ತಞ್ಚ ಹೋತಿ. ಪಞ್ಚ ದಾನಾನಿ ಅಪುಞ್ಞಾನಿ ಪುಞ್ಞಸಮ್ಮತಾನಿ ಲೋಕಸ್ಮಿಂ [ಲೋಕಸ್ಸ (ಸ್ಯಾ.)] – ಮಜ್ಜದಾನಂ, ಸಮಜ್ಜದಾನಂ, ಇತ್ಥಿದಾನಂ, ಉಸಭದಾನಂ, ಚಿತ್ತಕಮ್ಮದಾನಂ. ಪಞ್ಚ ಉಪ್ಪನ್ನಾ ದುಪ್ಪಟಿವಿನೋದಯಾ [ವಿನೋದಿಯಾ (ಸ್ಯಾ.)] – ಉಪ್ಪನ್ನೋ ರಾಗೋ ದುಪ್ಪಟಿವಿನೋದಯೋ, ಉಪ್ಪನ್ನೋ ದೋಸೋ ದುಪ್ಪಟಿವಿನೋದಯೋ, ಉಪ್ಪನ್ನೋ ಮೋಹೋ ದುಪ್ಪಟಿವಿನೋದಯೋ, ಉಪ್ಪನ್ನಂ ಪಟಿಭಾನಂ ದುಪ್ಪಟಿವಿನೋದಯಂ, ಉಪ್ಪನ್ನಂ ಗಮಿಯಚಿತ್ತಂ ದುಪ್ಪಟಿವಿನೋದಯಂ. ಪಞ್ಚಾನಿಸಂಸಾ ಸಮ್ಮಜ್ಜನಿಯಾ – ಸಕಚಿತ್ತಂ ಪಸೀದತಿ, ಪರಚಿತ್ತಂ ಪಸೀದತಿ, ದೇವತಾ ಅತ್ತಮನಾ ಹೋನ್ತಿ, ಪಾಸಾದಿಕಸಂವತ್ತನಿಕಕಮ್ಮಂ ಉಪಚಿನತಿ, ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜತಿ. ಅಪರೇಪಿ ಪಞ್ಚಾನಿಸಂಸಾ ಸಮ್ಮಜ್ಜನಿಯಾ – ಸಕಚಿತ್ತಂ ಪಸೀದತಿ, ಪರಚಿತ್ತಂ ಪಸೀದತಿ, ದೇವತಾ ಅತ್ತಮನಾ ಹೋನ್ತಿ, ಸತ್ಥುಸಾಸನಂ ಕತಂ ಹೋತಿ, ಪಚ್ಛಿಮಾ ಜನತಾ ದಿಟ್ಠಾನುಗತಿಂ ಆಪಜ್ಜತಿ.

ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ‘‘ಬಾಲೋ’’ ತ್ವೇವ ಸಙ್ಖಂ ಗಚ್ಛತಿ – ಅತ್ತನೋ ಭಾಸಪರಿಯನ್ತಂ ನ ಉಗ್ಗಣ್ಹಾತಿ, ಪರಸ್ಸ ಭಾಸಪರಿಯನ್ತಂ ನ ಉಗ್ಗಣ್ಹಾತಿ, ಅತ್ತನೋ ಭಾಸಪರಿಯನ್ತಂ ನ ಉಗ್ಗಹೇತ್ವಾ ಪರಸ್ಸ ಭಾಸಪರಿಯನ್ತಂ ನ ಉಗ್ಗಹೇತ್ವಾ ಅಧಮ್ಮೇನ ಕಾರೇತಿ ಅಪ್ಪಟಿಞ್ಞಾಯ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ‘‘ಪಣ್ಡಿತೋ’’ ತ್ವೇವ ಸಙ್ಖಂ ಗಚ್ಛತಿ – ಅತ್ತನೋ ಭಾಸಪರಿಯನ್ತಂ ಉಗ್ಗಣ್ಹಾತಿ, ಪರಸ್ಸ ಭಾಸಪರಿಯನ್ತಂ ಉಗ್ಗಣ್ಹಾತಿ, ಅತ್ತನೋ ಭಾಸಪರಿಯನ್ತಂ ಉಗ್ಗಹೇತ್ವಾ ಪರಸ್ಸ ಭಾಸಪರಿಯನ್ತಂ ಉಗ್ಗಹೇತ್ವಾ ಧಮ್ಮೇನ ಕಾರೇತಿ ಪಟಿಞ್ಞಾಯ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಿಂ ನ ಜಾನಾತಿ, ಆಪತ್ತಿಯಾ ಮೂಲಂ ನ ಜಾನಾತಿ, ಆಪತ್ತಿಸಮುದಯಂ ನ ಜಾನಾತಿ, ಆಪತ್ತಿನಿರೋಧಂ ನ ಜಾನಾತಿ, ಆಪತ್ತಿನಿರೋಧಗಾಮಿನಿಂ ಪಟಿಪದಂ ನ ಜಾನಾತಿ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಿಂ ಜಾನಾತಿ, ಆಪತ್ತಿಯಾ ಮೂಲಂ ಜಾನಾತಿ, ಆಪತ್ತಿಸಮುದಯಂ ಜಾನಾತಿ, ಆಪತ್ತಿನಿರೋಧಂ ಜಾನಾತಿ, ಆಪತ್ತಿನಿರೋಧಗಾಮಿನಿಂ ಪಟಿಪದಂ ಜಾನಾತಿ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಅಧಿಕರಣಂ ನ ಜಾನಾತಿ, ಅಧಿಕರಣಸ್ಸ ಮೂಲಂ ನ ಜಾನಾತಿ, ಅಧಿಕರಣಸಮುದಯಂ ನ ಜಾನಾತಿ, ಅಧಿಕರಣನಿರೋಧಂ ನ ಜಾನಾತಿ, ಅಧಿಕರಣನಿರೋಧಗಾಮಿನಿಂ ಪಟಿಪದಂ ನ ಜಾನಾತಿ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಅಧಿಕರಣಂ ಜಾನಾತಿ, ಅಧಿಕರಣಸ್ಸ ಮೂಲಂ ಜಾನಾತಿ, ಅಧಿಕರಣಸಮುದಯಂ ಜಾನಾತಿ, ಅಧಿಕರಣನಿರೋಧಂ ಜಾನಾತಿ, ಅಧಿಕರಣನಿರೋಧಗಾಮಿನಿಂ ಪಟಿಪದಂ ಜಾನಾತಿ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ವತ್ಥುಂ ನ ಜಾನಾತಿ, ನಿದಾನಂ ನ ಜಾನಾತಿ, ಪಞ್ಞತ್ತಿಂ ನ ಜಾನಾತಿ, ಅನುಪಞ್ಞತ್ತಿಂ ನ ಜಾನಾತಿ, ಅನುಸನ್ಧಿವಚನಪಥಂ ನ ಜಾನಾತಿ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ವತ್ಥುಂ ಜಾನಾತಿ, ನಿದಾನಂ ಜಾನಾತಿ, ಪಞ್ಞತ್ತಿಂ ಜಾನಾತಿ, ಅನುಪಞ್ಞತ್ತಿಂ ಜಾನಾತಿ, ಅನುಸನ್ಧಿವಚನಪಥಂ ಜಾನಾತಿ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಞತ್ತಿಂ ನ ಜಾನಾತಿ, ಞತ್ತಿಯಾ ಕರಣಂ ನ ಜಾನಾತಿ, ನ ಪುಬ್ಬಕುಸಲೋ ಹೋತಿ, ನ ಅಪರಕುಸಲೋ ಹೋತಿ, ಅಕಾಲಞ್ಞೂ ಚ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಞತ್ತಿಂ ಜಾನಾತಿ, ಞತ್ತಿಯಾ ಕರಣಂ ಜಾನಾತಿ, ಪುಬ್ಬಕುಸಲೋ ಹೋತಿ, ಅಪರಕುಸಲೋ ಹೋತಿ, ಕಾಲಞ್ಞೂ ಚ ಹೋತಿ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಆಚರಿಯಪರಮ್ಪರಾ ಖೋ ಪನಸ್ಸ ನ ಸುಗ್ಗಹಿತಾ ಹೋತಿ ನ ಸುಮನಸಿಕತಾ ನ ಸೂಪಧಾರಿತಾ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಆಚರಿಯಪರಮ್ಪರಾ ಖೋ ಪನಸ್ಸ ಸುಗ್ಗಹಿತಾ ಹೋತಿ ಸುಮನಸಿಕತಾ ಸೂಪಧಾರಿತಾ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ನ ವಿತ್ಥಾರೇನ ಸ್ವಾಗತಾನಿ ಹೋನ್ತಿ ನ ಸುವಿಭತ್ತಾನಿ ನ ಸುಪ್ಪವತ್ತೀನಿ ನ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ವಿತ್ಥಾರೇನ ಸ್ವಾಗತಾನಿ ಹೋನ್ತಿ ಸುವಿಭತ್ತಾನಿ ಸುಪ್ಪವತ್ತೀನಿ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಬಾಲೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಅಧಿಕರಣೇ ಚ ನ ವಿನಿಚ್ಛಯಕುಸಲೋ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತೋ ವಿನಯಧರೋ ಪಣ್ಡಿತೋ ತ್ವೇವ ಸಙ್ಖಂ ಗಚ್ಛತಿ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಅಧಿಕರಣೇ ಚ ವಿನಿಚ್ಛಯಕುಸಲೋ ಹೋತಿ.

[ಅ. ನಿ. ೫.೧೮೧; ಪರಿ. ೪೪೩] ಪಞ್ಚ ಆರಞ್ಞಿಕಾ – ಮನ್ದತ್ತಾ ಮೋಮೂಹತ್ತಾ ಆರಞ್ಞಿಕೋ ಹೋತಿ, ಪಾಪಿಚ್ಛೋ ಇಚ್ಛಾಪಕತೋ ಆರಞ್ಞಿಕೋ ಹೋತಿ, ಉಮ್ಮಾದಾ ಚಿತ್ತಕ್ಖೇಪಾ ಆರಞ್ಞಿಕೋ ಹೋತಿ, ವಣ್ಣಿತಂ ಬುದ್ಧೇಹಿ ಬುದ್ಧಸಾವಕೇಹೀತಿ ಆರಞ್ಞಿಕೋ ಹೋತಿ, ಅಪಿ ಚ ಅಪ್ಪಿಚ್ಛಞ್ಞೇವ ನಿಸ್ಸಾಯ ಸನ್ತುಟ್ಠಿಞ್ಞೇವ ನಿಸ್ಸಾಯ ಸಲ್ಲೇಖಞ್ಞೇವ ನಿಸ್ಸಾಯ ಪವಿವೇಕಞ್ಞೇವ ನಿಸ್ಸಾಯ ಇದಮತ್ಥಿತಞ್ಞೇವ [ಇದಮಟ್ಠಿತಞ್ಞೇವ (ಸೀ. ಸ್ಯಾ.)] ನಿಸ್ಸಾಯ ಆರಞ್ಞಿಕೋ ಹೋತಿ. ಪಞ್ಚ ಪಿಣ್ಡಪಾತಿಕಾ…ಪೇ… ಪಞ್ಚ ಪಂಸುಕೂಲಿಕಾ…ಪೇ… ಪಞ್ಚ ರುಕ್ಖಮೂಲಿಕಾ…ಪೇ… ಪಞ್ಚ ಸೋಸಾನಿಕಾ…ಪೇ… ಪಞ್ಚ ಅಬ್ಭೋಕಾಸಿಕಾ…ಪೇ… ಪಞ್ಚ ತೇಚೀವರಿಕಾ…ಪೇ… ಪಞ್ಚ ಸಪದಾನಚಾರಿಕಾ…ಪೇ… ಪಞ್ಚ ನೇಸಜ್ಜಿಕಾ…ಪೇ… ಪಞ್ಚ ಯಥಾಸನ್ಥತಿಕಾ…ಪೇ… ಪಞ್ಚ ಏಕಾಸನಿಕಾ…ಪೇ… ಪಞ್ಚ ಖಲುಪಚ್ಛಾಭತ್ತಿಕಾ…ಪೇ… ಪಞ್ಚ ಪತ್ತಪಿಣ್ಡಿಕಾ – ಮನ್ದತ್ತಾ ಮೋಮೂಹತ್ತಾ ಪತ್ತಪಿಣ್ಡಿಕೋ ಹೋತಿ, ಪಾಪಿಚ್ಛೋ ಇಚ್ಛಾಪಕತೋ ಪತ್ತಪಿಣ್ಡಿಕೋ ಹೋತಿ, ಉಮ್ಮಾದಾ ಚಿತ್ತಕ್ಖೇಪಾ ಪತ್ತಪಿಣ್ಡಿಕೋ ಹೋತಿ, ವಣ್ಣಿತಂ ಬುದ್ಧೇಹಿ ಬುದ್ಧಸಾವಕೇಹೀತಿ ಪತ್ತಪಿಣ್ಡಿಕೋ ಹೋತಿ, ಅಪಿ ಚ ಅಪ್ಪಿಚ್ಛಞ್ಞೇವ ನಿಸ್ಸಾಯ ಸನ್ತುಟ್ಠಿಞ್ಞೇವ ನಿಸ್ಸಾಯ ಸಲ್ಲೇಖಞ್ಞೇವ ನಿಸ್ಸಾಯ ಪವಿವೇಕಞ್ಞೇವ ನಿಸ್ಸಾಯ ಇದಮತ್ಥಿತಞ್ಞೇವ ನಿಸ್ಸಾಯ ಪತ್ತಪಿಣ್ಡಿಕೋ ಹೋತಿ.

[ಪರಿ. ೪೧೭] ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ನಾನಿಸ್ಸಿತೇನ ವತ್ಥಬ್ಬಂ – ಉಪೋಸಥಂ ನ ಜಾನಾತಿ, ಉಪೋಸಥಕಮ್ಮಂ ನ ಜಾನಾತಿ, ಪಾತಿಮೋಕ್ಖಂ ನ ಜಾನಾತಿ, ಪಾತಿಮೋಕ್ಖುದ್ದೇಸಂ ನ ಜಾನಾತಿ, ಊನಪಞ್ಚವಸ್ಸೋ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಅನಿಸ್ಸಿತೇನ ವತ್ಥಬ್ಬಂ – ಉಪೋಸಥಂ ಜಾನಾತಿ, ಉಪೋಸಥಕಮ್ಮಂ ಜಾನಾತಿ, ಪಾತಿಮೋಕ್ಖಂ ಜಾನಾತಿ, ಪಾತಿಮೋಕ್ಖುದ್ದೇಸಂ ಜಾನಾತಿ, ಪಞ್ಚವಸ್ಸೋ ವಾ ಹೋತಿ ಅತಿರೇಕಪಞ್ಚವಸ್ಸೋ ವಾ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ನಾನಿಸ್ಸಿತೇನ ವತ್ಥಬ್ಬಂ – ಪವಾರಣಂ ನ ಜಾನಾತಿ, ಪವಾರಣಾಕಮ್ಮಂ ನ ಜಾನಾತಿ, ಪಾತಿಮೋಕ್ಖಂ ನ ಜಾನಾತಿ, ಪಾತಿಮೋಕ್ಖುದ್ದೇಸಂ ನ ಜಾನಾತಿ, ಊನಪಞ್ಚವಸ್ಸೋ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಅನಿಸ್ಸಿತೇನ ವತ್ಥಬ್ಬಂ – ಪವಾರಣಂ ಜಾನಾತಿ, ಪವಾರಣಾಕಮ್ಮಂ ಜಾನಾತಿ, ಪಾತಿಮೋಕ್ಖಂ ಜಾನಾತಿ, ಪಾತಿಮೋಕ್ಖುದ್ದೇಸಂ ಜಾನಾತಿ, ಪಞ್ಚವಸ್ಸೋ ವಾ ಹೋತಿ ಅತಿರೇಕಪಞ್ಚವಸ್ಸೋ ವಾ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ನಾನಿಸ್ಸಿತೇನ ವತ್ಥಬ್ಬಂ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಊನಪಞ್ಚವಸ್ಸೋ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಅನಿಸ್ಸಿತೇನ ವತ್ಥಬ್ಬಂ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಪಞ್ಚವಸ್ಸೋ ವಾ ಹೋತಿ ಅತಿರೇಕಪಞ್ಚವಸ್ಸೋ ವಾ. ಪಞ್ಚಹಙ್ಗೇಹಿ ಸಮನ್ನಾಗತಾಯ ಭಿಕ್ಖುನಿಯಾ ನಾನಿಸ್ಸಿತಾಯ ವತ್ಥಬ್ಬಂ – ಉಪೋಸಥಂ ನ ಜಾನಾತಿ, ಉಪೋಸಥಕಮ್ಮಂ ನ ಜಾನಾತಿ, ಪಾತಿಮೋಕ್ಖಂ ನ ಜಾನಾತಿ, ಪಾತಿಮೋಕ್ಖುದ್ದೇಸಂ ನ ಜಾನಾತಿ, ಊನಪಞ್ಚವಸ್ಸಾ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತಾಯ ಭಿಕ್ಖುನಿಯಾ ಅನಿಸ್ಸಿತಾಯ ವತ್ಥಬ್ಬಂ – ಉಪೋಸಥಂ ಜಾನಾತಿ, ಉಪೋಸಥಕಮ್ಮಂ ಜಾನಾತಿ, ಪಾತಿಮೋಕ್ಖಂ ಜಾನಾತಿ, ಪಾತಿಮೋಕ್ಖುದ್ದೇಸಂ ಜಾನಾತಿ, ಪಞ್ಚವಸ್ಸಾ ವಾ ಹೋತಿ ಅತಿರೇಕಪಞ್ಚವಸ್ಸಾ ವಾ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತಾಯ ಭಿಕ್ಖುನಿಯಾ ನಾನಿಸ್ಸಿತಾಯ ವತ್ಥಬ್ಬಂ – ಪವಾರಣಂ ನ ಜಾನಾತಿ, ಪವಾರಣಾಕಮ್ಮಂ ನ ಜಾನಾತಿ, ಪಾತಿಮೋಕ್ಖಂ ನ ಜಾನಾತಿ, ಪಾತಿಮೋಕ್ಖುದ್ದೇಸಂ ನ ಜಾನಾತಿ, ಊನಪಞ್ಚವಸ್ಸಾ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತಾಯ ಭಿಕ್ಖುನಿಯಾ ಅನಿಸ್ಸಿತಾಯ ವತ್ಥಬ್ಬಂ – ಪವಾರಣಂ ಜಾನಾತಿ, ಪವಾರಣಾಕಮ್ಮಂ ಜಾನಾತಿ, ಪಾತಿಮೋಕ್ಖಂ ಜಾನಾತಿ, ಪಾತಿಮೋಕ್ಖುದ್ದೇಸಂ ಜಾನಾತಿ, ಪಞ್ಚವಸ್ಸಾ ವಾ ಹೋತಿ ಅತಿರೇಕಪಞ್ಚವಸ್ಸಾ ವಾ. ಅಪರೇಹಿಪಿ ಪಞ್ಚಹಙ್ಗೇಹಿ ಸಮನ್ನಾಗತಾಯ ಭಿಕ್ಖುನಿಯಾ ನಾನಿಸ್ಸಿತಾಯ ವತ್ಥಬ್ಬಂ – ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಊನಪಞ್ಚವಸ್ಸಾ ಹೋತಿ. ಪಞ್ಚಹಙ್ಗೇಹಿ ಸಮನ್ನಾಗತಾಯ ಭಿಕ್ಖುನಿಯಾ ಅನಿಸ್ಸಿತಾಯ ವತ್ಥಬ್ಬಂ – ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಪಞ್ಚವಸ್ಸಾ ವಾ ಹೋತಿ ಅತಿರೇಕಪಞ್ಚವಸ್ಸಾ ವಾ.

ಪಞ್ಚ ಆದೀನವಾ ಅಪಾಸಾದಿಕೇ – ಅತ್ತಾಪಿ ಅತ್ತಾನಂ ಉಪವದತಿ, ಅನುವಿಚ್ಚಪಿ ವಿಞ್ಞೂ ಗರಹನ್ತಿ, ಪಾಪಕೋ ಕಿತ್ತಿಸದ್ದೋ ಅಬ್ಭುಗ್ಗಚ್ಛತಿ, ಸಮ್ಮೂಳ್ಹೋ ಕಾಲಂ ಕರೋತಿ, ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜತಿ. ಪಞ್ಚಾನಿಸಂಸಾ ಪಾಸಾದಿಕೇ – ಅತ್ತಾಪಿ ಅತ್ತಾನಂ ನ ಉಪವದತಿ, ಅನುವಿಚ್ಚಪಿ ವಿಞ್ಞೂ ಪಸಂಸನ್ತಿ, ಕಲ್ಯಾಣೋ ಕಿತ್ತಿಸದ್ದೋ ಅಬ್ಭುಗ್ಗಚ್ಛತಿ, ಅಸಮ್ಮೂಳ್ಹೋ ಕಾಲಂ ಕರೋತಿ, ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜತಿ. ಅಪರೇಪಿ ಪಞ್ಚ ಆದೀನವಾ ಅಪಾಸಾದಿಕೇ – ಅಪ್ಪಸನ್ನಾ ನ ಪಸೀದನ್ತಿ, ಪಸನ್ನಾನಂ ಏಕಚ್ಚಾನಂ ಅಞ್ಞಥತ್ತಂ ಹೋತಿ, ಸತ್ಥುಸಾಸನಂ ಅಕತಂ ಹೋತಿ, ಪಚ್ಛಿಮಾ ಜನತಾ ದಿಟ್ಠಾನುಗತಿಂ ನಾಪಜ್ಜತಿ, ಚಿತ್ತಮಸ್ಸ ನ ಪಸೀದತಿ. ಪಞ್ಚಾನಿಸಂಸಾ ಪಾಸಾದಿಕೇ – ಅಪ್ಪಸನ್ನಾ ಪಸೀದನ್ತಿ, ಪಸನ್ನಾನಂ ಭಿಯ್ಯೋಭಾವಾಯ ಹೋತಿ, ಸತ್ಥುಸಾಸನಂ ಕತಂ ಹೋತಿ, ಪಚ್ಛಿಮಾ ಜನತಾ ದಿಟ್ಠಾನುಗತಿಂ ಆಪಜ್ಜತಿ, ಚಿತ್ತಮಸ್ಸ ಪಸೀದತಿ. ಪಞ್ಚ ಆದೀನವಾ ಕುಲೂಪಕೇ – ಅನಾಮನ್ತಚಾರೇ ಆಪಜ್ಜತಿ, ರಹೋ ನಿಸಜ್ಜಾಯ ಆಪಜ್ಜತಿ, ಪಟಿಚ್ಛನ್ನೇ ಆಸನೇ ಆಪಜ್ಜತಿ, ಮಾತುಗಾಮಸ್ಸ ಉತ್ತರಿಛಪ್ಪಞ್ಚವಾಚಾಹಿ ಧಮ್ಮಂ ದೇಸೇನ್ತೋ ಆಪಜ್ಜತಿ, ಕಾಮಸಙ್ಕಪ್ಪಬಹುಲೋ ಚ ವಿಹರತಿ. ಪಞ್ಚ ಆದೀನವಾ ಕುಲೂಪಕಸ್ಸ ಭಿಕ್ಖುನೋ – ಅತಿವೇಲಂ ಕುಲೇಸು ಸಂಸಟ್ಠಸ್ಸ ವಿಹರತೋ ಮಾತುಗಾಮಸ್ಸ ಅಭಿಣ್ಹದಸ್ಸನಂ, ದಸ್ಸನೇ ಸತಿ ಸಂಸಗ್ಗೋ, ಸಂಸಗ್ಗೇ ಸತಿ ವಿಸ್ಸಾಸೋ, ವಿಸ್ಸಾಸೇ ಸತಿ ಓತಾರೋ, ಓತಿಣ್ಣಚಿತ್ತಸ್ಸೇತಂ ಭಿಕ್ಖುನೋ ಪಾಟಿಕಙ್ಖಂ ಅನಭಿರತೋ ವಾ ಬ್ರಹ್ಮಚರಿಯಂ ಚರಿಸ್ಸತಿ ಅಞ್ಞತರಂ ವಾ ಸಂಕಿಲಿಟ್ಠಂ ಆಪತ್ತಿಂ ಆಪಜ್ಜಿಸ್ಸತಿ ಸಿಕ್ಖಂ ವಾ ಪಚ್ಚಕ್ಖಾಯ ಹೀನಾಯಾವತ್ತಿಸ್ಸತಿ.

[ಪಾಚಿ. ೯೨] ಪಞ್ಚ ಬೀಜಜಾತಾನಿ – ಮೂಲಬೀಜಂ, ಖನ್ಧಬೀಜಂ, ಫಳುಬೀಜಂ, ಅಗ್ಗಬೀಜಂ, ಬೀಜಬೀಜಞ್ಞೇವ [ಬೀಜಬೀಜಮೇವ (ಕ.)] ಪಞ್ಚಮಂ. ಪಞ್ಚಹಿ ಸಮಣಕಪ್ಪೇಹಿ ಫಲಂ ಪರಿಭುಞ್ಜಿತಬ್ಬಂ – ಅಗ್ಗಿಪರಿಜಿತಂ, ಸತ್ಥಪರಿಜಿತಂ, ನಖಪರಿಜಿತಂ, ಅಬೀಜಂ, ನಿಬ್ಬತ್ತಬೀಜಞ್ಞೇವ [ನಿಬ್ಬಟ್ಟಬೀಜಞ್ಞೇವ (ಸೀ.), ನಿಬ್ಬಟಬೀಜಞ್ಞೇವ (ಸ್ಯಾ.), ನಿಪ್ಪಟ್ಟಬೀಜಞ್ಞೇವ (ಕ.)] ಪಞ್ಚಮಂ. ಪಞ್ಚ ವಿಸುದ್ಧಿಯೋ – ನಿದಾನಂ ಉದ್ದಿಸಿತ್ವಾ ಅವಸೇಸಂ ಸುತೇನ ಸಾವೇತಬ್ಬಂ, ಅಯಂ ಪಠಮಾ ವಿಸುದ್ಧಿ; ನಿದಾನಂ ಉದ್ದಿಸಿತ್ವಾ ಚತ್ತಾರಿ ಪಾರಾಜಿಕಾನಿ ಉದ್ದಿಸಿತ್ವಾ ಅವಸೇಸಂ ಸುತೇನ ಸಾವೇತಬ್ಬಂ, ಅಯಂ ದುತಿಯಾ ವಿಸುದ್ಧಿ; ನಿದಾನಂ ಉದ್ದಿಸಿತ್ವಾ ಚತ್ತಾರಿ ಪಾರಾಜಿಕಾನಿ ಉದ್ದಿಸಿತ್ವಾ ತೇರಸ ಸಙ್ಘಾದಿಸೇಸೇ ಉದ್ದಿಸಿತ್ವಾ ಅವಸೇಸಂ ಸುತೇನ ಸಾವೇತಬ್ಬಂ, ಅಯಂ ತತಿಯಾ ವಿಸುದ್ಧಿ; ನಿದಾನಂ ಉದ್ದಿಸಿತ್ವಾ ಚತ್ತಾರಿ ಪಾರಾಜಿಕಾನಿ ಉದ್ದಿಸಿತ್ವಾ ತೇರಸ ಸಙ್ಘಾದಿಸೇಸೇ ಉದ್ದಿಸಿತ್ವಾ ದ್ವೇ ಅನಿಯತೇ ಉದ್ದಿಸಿತ್ವಾ ಅವಸೇಸಂ ಸುತೇನ ಸಾವೇತಬ್ಬಂ, ಅಯಂ ಚತುತ್ಥಾ ವಿಸುದ್ಧಿ; ವಿತ್ಥಾರೇನೇವ ಪಞ್ಚಮೀ. ಅಪರಾಪಿ ಪಞ್ಚ ವಿಸುದ್ಧಿಯೋ – ಸುತ್ತುದ್ದೇಸೋ, ಪಾರಿಸುದ್ಧಿಉಪೋಸಥೋ, ಅಧಿಟ್ಠಾನುಪೋಸಥೋ, ಪವಾರಣಾ, ಸಾಮಗ್ಗೀಉಪೋಸಥೋಯೇವ ಪಞ್ಚಮೋ. ಪಞ್ಚಾನಿಸಂಸಾ ವಿನಯಧರೇ – ಅತ್ತನೋ ಸೀಲಕ್ಖನ್ಧೋ ಸುಗುತ್ತೋ ಹೋತಿ ಸುರಕ್ಖಿತೋ, ಕುಕ್ಕುಚ್ಚಪಕತಾನಂ ಪಟಿಸರಣಂ ಹೋತಿ, ವಿಸಾರದೋ ಸಙ್ಘಮಜ್ಝೇ ವೋಹರತಿ, ಪಚ್ಚತ್ಥಿಕೇ ಸಹಧಮ್ಮೇನ ಸುನಿಗ್ಗಹಿತಂ ನಿಗ್ಗಣ್ಹಾತಿ, ಸದ್ಧಮ್ಮಟ್ಠಿತಿಯಾ ಪಟಿಪನ್ನೋ ಹೋತಿ. ಪಞ್ಚ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ. ಪಞ್ಚ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನೀತಿ.

ಪಞ್ಚಕಂ ನಿಟ್ಠಿತಂ.

ತಸ್ಸುದ್ದಾನಂ –

ಆಪತ್ತಿ ಆಪತ್ತಿಕ್ಖನ್ಧಾ, ವಿನೀತಾನನ್ತರೇನ ಚ;

ಪುಗ್ಗಲಾ ಛೇದನಾ ಚೇವ, ಆಪಜ್ಜತಿ ಚ ಪಚ್ಚಯಾ.

ನ ಉಪೇತಿ ಉಪೇತಿ ಚ, ಕಪ್ಪನ್ತುಸಙ್ಕಿತೇಲಞ್ಚ;

ವಸಂ ಬ್ಯಸನಾ ಸಮ್ಪದಾ, ಪಸ್ಸದ್ಧಿ ಪುಗ್ಗಲೇನ ಚ.

ಸೋಸಾನಿಕಂ ಖಾಯಿತಞ್ಚ, ಥೇಯ್ಯಂ ಚೋರೋ ಚ ವುಚ್ಚತಿ;

ಅವಿಸ್ಸಜ್ಜಿ ಅವೇಭಙ್ಗಿ, ಕಾಯತೋ ಕಾಯವಾಚತೋ.

ದೇಸನಾ ಸಙ್ಘಂ ಉದ್ದೇಸಂ, ಪಚ್ಚನ್ತಿಕಥಿನೇನ ಚ;

ಕಮ್ಮಾನಿ ಯಾವತತಿಯಂ, ಪಾರಾಜಿಥುಲ್ಲದುಕ್ಕಟಂ.

ಅಕಪ್ಪಿಯಂ ಕಪ್ಪಿಯಞ್ಚ, ಅಪುಞ್ಞದುವಿನೋದಯಾ;

ಸಮ್ಮಜ್ಜನೀ ಅಪರೇ ಚ, ಭಾಸಂ ಆಪತ್ತಿಮೇವ ಚ.

ಅಧಿಕರಣಂ ವತ್ಥು ಞತ್ತಿ, ಆಪತ್ತಾ ಉಭಯಾನಿ ಚ;

ಲಹುಕಟ್ಠಮಕಾ ಏತೇ, ಕಣ್ಹಸುಕ್ಕಾ ವಿಜಾನಥ.

ಅರಞ್ಞಂ ಪಿಣ್ಡಪಾತಞ್ಚ, ಪಂಸುರುಕ್ಖಸುಸಾನಿಕಾ;

ಅಬ್ಭೋಕಾಸೋ ಚೀವರಞ್ಚ, ಸಪದಾನೋ ನಿಸಜ್ಜಿಕೋ.

ಸನ್ಥತಿ ಖಲು ಪಚ್ಛಾಪಿ, ಪತ್ತಪಿಣ್ಡಿಕಮೇವ ಚ;

ಉಪೋಸಥಂ ಪವಾರಣಂ, ಆಪತ್ತಾನಾಪತ್ತಿಪಿ ಚ.

ಕಣ್ಹಸುಕ್ಕಪದಾ ಏತೇ, ಭಿಕ್ಖುನೀನಮ್ಪಿ ತೇ ತಥಾ;

ಅಪಾಸಾದಿಕಪಾಸಾದಿ, ತಥೇವ ಅಪರೇ ದುವೇ.

ಕುಲೂಪಕೇ ಅತಿವೇಲಂ, ಬೀಜಂ ಸಮಣಕಪ್ಪಿ ಚ;

ವಿಸುದ್ಧಿ ಅಪರೇ ಚೇವ, ವಿನಯಾಧಮ್ಮಿಕೇನ ಚ;

ಧಮ್ಮಿಕಾ ಚ ತಥಾ ವುತ್ತಾ, ನಿಟ್ಠಿತಾ ಸುದ್ಧಿಪಞ್ಚಕಾತಿ.

೬. ಛಕ್ಕವಾರೋ

೩೨೬. [ದೀ. ನಿ. ೩.೩೨೪] ಛ ಅಗಾರವಾ. ಛ ಗಾರವಾ. ಛ ವಿನೀತವತ್ಥೂನಿ. ಛ ಸಾಮೀಚಿಯೋ. ಛ ಆಪತ್ತಿಸಮುಟ್ಠಾನಾ. ಛಚ್ಛೇದನಕಾ ಆಪತ್ತಿಯೋ. ಛಹಾಕಾರೇಹಿ ಆಪತ್ತಿಂ ಆಪಜ್ಜತಿ. ಛಾನಿಸಂಸಾ ವಿನಯಧರೇ. ಛ ಪರಮಾನಿ. ಛಾರತ್ತಂ ತಿಚೀವರೇನ ವಿಪ್ಪವಸಿತಬ್ಬಂ. ಛ ಚೀವರಾನಿ. ಛ ರಜನಾನಿ. ಛ ಆಪತ್ತಿಯೋ ಕಾಯತೋ ಚ ಚಿತ್ತತೋ ಚ ಸಮುಟ್ಠನ್ತಿ ನ ವಾಚತೋ. ಛ ಆಪತ್ತಿಯೋ ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ ನ ಕಾಯತೋ. ಛ ಆಪತ್ತಿಯೋ ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ. ಛ ಕಮ್ಮಾನಿ. ಛ ವಿವಾದಮೂಲಾನಿ. ಛ ಅನುವಾದಮೂಲಾನಿ. ಛ ಸಾರಣೀಯಾ ಧಮ್ಮಾ ದೀಘಸೋ. ಛ ವಿದತ್ಥಿಯೋ, ಸುಗತವಿದತ್ಥಿಯಾ, ತಿರಿಯಂ ಛ ವಿದತ್ಥಿಯೋ. ಛ ನಿಸ್ಸಯಪಟಿಪ್ಪಸ್ಸದ್ಧಿಯೋ ಆಚರಿಯಮ್ಹಾ. ಛ ನಹಾನೇ ಅನುಪಞ್ಞತ್ತಿಯೋ – ವಿಪ್ಪಕತಚೀವರಂ ಆದಾಯ ಪಕ್ಕಮತಿ, ವಿಪ್ಪಕತಚೀವರಂ ಸಮಾದಾಯ ಪಕ್ಕಮತಿ.

[ಮಹಾವ. ೮೫ ಆದಯೋ] ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ಅಸೇಕ್ಖೇನ ಸೀಲಕ್ಖನ್ಧೇನ ಸಮನ್ನಾಗತೋ ಹೋತಿ, ಅಸೇಕ್ಖೇನ ಸಮಾಧಿಕ್ಖನ್ಧೇನ ಸಮನ್ನಾಗತೋ ಹೋತಿ, ಅಸೇಕ್ಖೇನ ಪಞ್ಞಕ್ಖನ್ಧೇನ ಸಮನ್ನಾಗತೋ ಹೋತಿ, ಅಸೇಕ್ಖೇನ ವಿಮುತ್ತಿಕ್ಖನ್ಧೇನ ಸಮನ್ನಾಗತೋ ಹೋತಿ, ಅಸೇಕ್ಖೇನ ವಿಮುತ್ತಿಞಾಣದಸ್ಸನಕ್ಖನ್ಧೇನ ಸಮನ್ನಾಗತೋ ಹೋತಿ, ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಅಪರೇಹಿಪಿ ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ಅತ್ತನಾ ಅಸೇಕ್ಖೇನ ಸೀಲಕ್ಖನ್ಧೇ ಸಮನ್ನಾಗತೋ ಹೋತಿ, ಪರಂ ಅಸೇಕ್ಖೇ ಸೀಲಕ್ಖನ್ಧೇ ಸಮಾದಪೇತಾ; ಅತ್ತನಾ ಅಸೇಕ್ಖೇನ ಸಮಾಧಿಕ್ಖನ್ಧೇನ ಸಮನ್ನಾಗತೋ ಹೋತಿ, ಪರಂ ಅಸೇಕ್ಖೇ ಸಮಾಧಿಕ್ಖನ್ಧೇ ಸಮಾದಪೇತಾ; ಅತ್ತನಾ ಅಸೇಕ್ಖೇನ ಪಞ್ಞಕ್ಖನ್ಧೇನ ಸಮನ್ನಾಗತೋ ಹೋತಿ, ಪರಂ ಅಸೇಕ್ಖೇ ಪಞ್ಞಕ್ಖನ್ಧೇ ಸಮಾದಪೇತಾ; ಅತ್ತನಾ ಅಸೇಕ್ಖೇನ ವಿಮುತ್ತಿಕ್ಖನ್ಧೇನ ಸಮನ್ನಾಗತೋ ಹೋತಿ, ಪರಂ ಅಸೇಕ್ಖೇ ವಿಮುತ್ತಿಕ್ಖನ್ಧೇ ಸಮಾದಪೇತಾ; ಅತ್ತನಾ ಅಸೇಕ್ಖೇನ ವಿಮುತ್ತಿಞಾಣದಸ್ಸನಕ್ಖನ್ಧೇನ ಸಮನ್ನಾಗತೋ ಹೋತಿ, ಪರಂ ಅಸೇಕ್ಖೇ ವಿಮುತ್ತಿಞಾಣದಸ್ಸನಕ್ಖನ್ಧೇ ಸಮಾದಪೇತಾ; ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಅಪರೇಹಿಪಿ ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ಸದ್ಧೋ ಹೋತಿ, ಹಿರಿಮಾ ಹೋತಿ, ಓತ್ತಪ್ಪೀ ಹೋತಿ, ಆರದ್ಧವೀರಿಯೋ ಹೋತಿ, ಉಪಟ್ಠಿತಸ್ಸತಿ ಹೋತಿ, ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಅಪರೇಹಿಪಿ ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ನ ಅಧಿಸೀಲೇ ಸೀಲವಿಪನ್ನೋ ಹೋತಿ, ನ ಅಜ್ಝಾಚಾರೇ ಆಚಾರವಿಪನ್ನೋ ಹೋತಿ, ನ ಅತಿದಿಟ್ಠಿಯಾ ದಿಟ್ಠಿವಿಪನ್ನೋ ಹೋತಿ, ಬಹುಸ್ಸುತೋ ಹೋತಿ, ಪಞ್ಞವಾ ಹೋತಿ, ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಅಪರೇಹಿಪಿ ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ಪಟಿಬಲೋ ಹೋತಿ ಅನ್ತೇವಾಸಿಂ ವಾ ಸದ್ಧಿವಿಹಾರಿಂ ವಾ ಗಿಲಾನಂ ಉಪಟ್ಠಾತುಂ ವಾ ಉಪಟ್ಠಾಪೇತುಂ ವಾ, ಅನಭಿರತಂ ವೂಪಕಾಸೇತುಂ ವಾ ವೂಪಕಾಸಾಪೇತುಂ ವಾ [ಅನಭಿರತಿಂ (ಕ.)], ಉಪ್ಪನ್ನಂ ಕುಕ್ಕುಚ್ಚಂ ಧಮ್ಮತೋ ವಿನೋದೇತುಂ [ವಿನೋದೇತುಂ ವಾ ವಿನೋದಾಪೇತುಂ ವಾ (ಸ್ಯಾ.) ಮಹಾವ. ೮೫], ಆಪತ್ತಿಂ ಜಾನಾತಿ, ಆಪತ್ತಿವುಟ್ಠಾನಂ ಜಾನಾತಿ, ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಅಪರೇಹಿಪಿ ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ಪಟಿಬಲೋ ಹೋತಿ ಅನ್ತೇವಾಸಿಂ ವಾ ಸದ್ಧಿವಿಹಾರಿಂ ವಾ ಆಭಿಸಮಾಚಾರಿಕಾಯ ಸಿಕ್ಖಾಯ ಸಿಕ್ಖಾಪೇತುಂ, ಆದಿಬ್ರಹ್ಮಚಾರಿಯಕಾಯ ಸಿಕ್ಖಾಯ ವಿನೇತುಂ, ಅಭಿಧಮ್ಮೇ ವಿನೇತುಂ, ಅಭಿವಿನಯೇ ವಿನೇತುಂ, ಉಪ್ಪನ್ನಂ ದಿಟ್ಠಿಗತಂ ಧಮ್ಮತೋ ವಿವೇಚೇತುಂ, ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಅಪರೇಹಿಪಿ ಛಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಉಪಸಮ್ಪಾದೇತಬ್ಬಂ ನಿಸ್ಸಯೋ ದಾತಬ್ಬೋ ಸಾಮಣೇರೋ ಉಪಟ್ಠಾಪೇತಬ್ಬೋ – ಆಪತ್ತಿಂ ಜಾನಾತಿ, ಅನಾಪತ್ತಿಂ ಜಾನಾತಿ, ಲಹುಕಂ ಆಪತ್ತಿಂ ಜಾನಾತಿ, ಗರುಕಂ ಆಪತ್ತಿಂ ಜಾನಾತಿ, ಉಭಯಾನಿ ಖೋ ಪನಸ್ಸ ಪಾತಿಮೋಕ್ಖಾನಿ ವಿತ್ಥಾರೇನ ಸ್ವಾಗತಾನಿ ಹೋನ್ತಿ ಸುವಿಭತ್ತಾನಿ ಸುಪ್ಪವತ್ತೀನಿ ಸುವಿನಿಚ್ಛಿತಾನಿ ಸುತ್ತಸೋ ಅನುಬ್ಯಞ್ಜನಸೋ, ದಸವಸ್ಸೋ ವಾ ಹೋತಿ ಅತಿರೇಕದಸವಸ್ಸೋ ವಾ.

ಛ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ, ಛ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನೀತಿ.

ಛಕ್ಕಂ ನಿಟ್ಠಿತಂ.

ತಸ್ಸುದ್ದಾನಂ –

ಅಗಾರವಾ ಗಾರವಾ ಚ, ವಿನೀತಾ ಸಾಮೀಚಿಪಿ ಚ;

ಸಮುಟ್ಠಾನಾ ಛೇದನಾ ಚೇವ, ಆಕಾರಾನಿಸಂಸೇನ ಚ.

ಪರಮಾನಿ ಚ ಛಾರತ್ತಂ, ಚೀವರಂ ರಜನಾನಿ ಚ;

ಕಾಯತೋ ಚಿತ್ತತೋ ಚಾಪಿ, ವಾಚತೋ ಚಿತ್ತತೋಪಿ ಚ.

ಕಾಯವಾಚಾಚಿತ್ತತೋ ಚ, ಕಮ್ಮವಿವಾದಮೇವ ಚ;

ಅನುವಾದಾ ದೀಘಸೋ ಚ, ತಿರಿಯಂ ನಿಸ್ಸಯೇನ ಚ.

ಅನುಪಞ್ಞತ್ತಿ ಆದಾಯ, ಸಮಾದಾಯ ತಥೇವ ಚ;

ಅಸೇಕ್ಖೇ ಸಮಾದಪೇತಾ, ಸದ್ಧೋ ಅಧಿಸೀಲೇನ ಚ;