೮. ಅಟ್ಠಕವಾರೋ

೩೨೮. ಅಟ್ಠಾನಿಸಂಸೇ ಸಮ್ಪಸ್ಸಮಾನೇನ ನ ಸೋ ಭಿಕ್ಖು ಆಪತ್ತಿಯಾ ಅದಸ್ಸನೇ ಉಕ್ಖಿಪಿತಬ್ಬೋ. ಅಟ್ಠಾನಿಸಂಸೇ ಸಮ್ಪಸ್ಸಮಾನೇನ ಪರೇಸಮ್ಪಿ ಸದ್ಧಾಯ ಸಾ ಆಪತ್ತಿ ದೇಸೇತಬ್ಬಾ. ಅಟ್ಠ ಯಾವತತಿಯಕಾ. ಅಟ್ಠಹಾಕಾರೇಹಿ ಕುಲಾನಿ ದೂಸೇತಿ. ಅಟ್ಠ ಮಾತಿಕಾ ಚೀವರಸ್ಸ ಉಪ್ಪಾದಾಯ. ಅಟ್ಠ ಮಾತಿಕಾ ಕಥಿನಸ್ಸ ಉಬ್ಭಾರಾಯ. ಅಟ್ಠ ಪಾನಾನಿ. [ಚೂಳವ. ೩೪೮; ಅ. ನಿ. ೮.೭] ಅಟ್ಠಹಿ ಅಸದ್ಧಮ್ಮೇಹಿ ಅಭಿಭೂತೋ ಪರಿಯಾದಿನ್ನಚಿತ್ತೋ ದೇವದತ್ತೋ ಆಪಾಯಿಕೋ ನೇರಯಿಕೋ ಕಪ್ಪಟ್ಠೋ ಅತೇಕಿಚ್ಛೋ. ಅಟ್ಠ ಲೋಕಧಮ್ಮಾ. ಅಟ್ಠ ಗರುಧಮ್ಮಾ. ಅಟ್ಠ ಪಾಟಿದೇಸನೀಯಾ. ಅಟ್ಠಙ್ಗಿಕೋ ಮುಸಾವಾದೋ. ಅಟ್ಠ ಉಪೋಸಥಙ್ಗಾನಿ. ಅಟ್ಠ ದೂತೇಯ್ಯಙ್ಗಾನಿ. ಅಟ್ಠ ತಿತ್ಥಿಯವತ್ತಾನಿ. ಅಟ್ಠ ಅಚ್ಛರಿಯಾ ಅಬ್ಭುತಧಮ್ಮಾ ಮಹಾಸಮುದ್ದೇ. ಅಟ್ಠ ಅಚ್ಛರಿಯಾ ಅಬ್ಭುತಧಮ್ಮಾ ಇಮಸ್ಮಿಂ ಧಮ್ಮವಿನಯೇ. ಅಟ್ಠ ಅನತಿರಿತ್ತಾ. ಅಟ್ಠ ಅತಿರಿತ್ತಾ. ಅಟ್ಠಮೇ ಅರುಣುಗ್ಗಮನೇ ನಿಸ್ಸಗ್ಗಿಯಂ ಹೋತಿ. ಅಟ್ಠ ಪಾರಾಜಿಕಾ. ಅಟ್ಠಮಂ ವತ್ಥುಂ ಪರಿಪೂರೇನ್ತೀ ನಾಸೇತಬ್ಬಾ. ಅಟ್ಠಮಂ ವತ್ಥುಂ ಪರಿಪೂರೇನ್ತಿಯಾ ದೇಸಿತಾಪಿ ಅದೇಸಿತಾ ಹೋತಿ. ಅಟ್ಠವಾಚಿಕಾ ಉಪಸಮ್ಪದಾ. ಅಟ್ಠನ್ನಂ ಪಚ್ಚುಟ್ಠಾತಬ್ಬಂ. ಅಟ್ಠನ್ನಂ ಆಸನಂ ದಾತಬ್ಬಂ. ಉಪಾಸಿಕಾ ಅಟ್ಠ ವರಾನಿ ಯಾಚತಿ. ಅಟ್ಠಹಙ್ಗೇಹಿ ಸಮನ್ನಾಗತೋ ಭಿಕ್ಖು ಭಿಕ್ಖುನೋವಾದಕೋ ಸಮ್ಮನ್ನಿತಬ್ಬೋ [ಸಮ್ಮನಿತಬ್ಬೋ (ಕ.)]. ಅಟ್ಠಾನಿಸಂಸಾ ವಿನಯಧರೇ. ಅಟ್ಠ ಪರಮಾನಿ. ತಸ್ಸಪಾಪಿಯಸಿಕಕಮ್ಮಕತೇನ ಭಿಕ್ಖುನಾ ಅಟ್ಠಸು ಧಮ್ಮೇಸು ಸಮ್ಮಾ ವತ್ತಿತಬ್ಬಂ. ಅಟ್ಠ ಅಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನಿ ಅಟ್ಠ ಧಮ್ಮಿಕಾನಿ ಪಾತಿಮೋಕ್ಖಟ್ಠಪನಾನೀತಿ.

ಅಟ್ಠಕಂ ನಿಟ್ಠಿತಂ.

ತಸ್ಸುದ್ದಾನಂ –

ನ ಸೋ ಭಿಕ್ಖು ಪರೇಸಮ್ಪಿ, ಯಾವತತಿಯದೂಸನಾ;

ಮಾತಿಕಾ ಕಥಿನುಬ್ಭಾರಾ, ಪಾನಾ ಅಭಿಭೂತೇನ ಚ.

ಲೋಕಧಮ್ಮಾ ಗರುಧಮ್ಮಾ, ಪಾಟಿದೇಸನೀಯಾ ಮುಸಾ;

ಉಪೋಸಥಾ ಚ ದೂತಙ್ಗಾ, ತಿತ್ಥಿಯಾ ಸಮುದ್ದೇಪಿ ಚ.

ಅಬ್ಭುತಾ ಅನತಿರಿತ್ತಂ, ಅತಿರಿತ್ತಂ ನಿಸ್ಸಗ್ಗಿಯಂ;

ಪಾರಾಜಿಕಟ್ಠಮಂ ವತ್ಥು, ಅದೇಸಿತೂಪಸಮ್ಪದಾ.

ಪಚ್ಚುಟ್ಠಾನಾಸನಞ್ಚೇವ, ವರಂ ಓವಾದಕೇನ ಚ;

ಆನಿಸಂಸಾ ಪರಮಾನಿ, ಅಟ್ಠಧಮ್ಮೇಸು ವತ್ತನಾ;

ಅಧಮ್ಮಿಕಾ ಧಮ್ಮಿಕಾ ಚ, ಅಟ್ಠಕಾ ಸುಪ್ಪಕಾಸಿತಾತಿ.