೨೦. ಸಮುಟ್ಠಾಪನವಾರೋ

೩೧೪. ವಿವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಸಮುಟ್ಠಾಪೇತಿ? ವಿವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ನ ಕತಮಂ ಅಧಿಕರಣಂ ಸಮುಟ್ಠಾಪೇತಿ; ಅಪಿಚ, ವಿವಾದಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ. ಯಥಾ ಕಥಂ ವಿಯ? [ಚೂಳವ. ೨೧೫; ಪರಿ. ೩೪೮ ಆದಯೋ] ಇಧ ಭಿಕ್ಖೂ ವಿವದನ್ತಿ – ‘‘ಧಮ್ಮೋತಿ ವಾ, ಅಧಮ್ಮೋತಿ ವಾ, ವಿನಯೋತಿ ವಾ, ಅವಿನಯೋತಿ ವಾ, ಅಭಾಸಿತಂ ಅಲಪಿತಂ ತಥಾಗತೇನಾತಿ ವಾ, ಭಾಸಿತಂ ಲಪಿತಂ ತಥಾಗತೇನಾತಿ ವಾ, ಅನಾಚಿಣ್ಣಂ ತಥಾಗತೇನಾತಿ ವಾ, ಆಚಿಣ್ಣಂ ತಥಾಗತೇನಾತಿ ವಾ, ಅಪಞ್ಞತ್ತಂ ತಥಾಗತೇನಾತಿ ವಾ, ಪಞ್ಞತ್ತಂ ತಥಾಗತೇನಾತಿ ವಾ, ಆಪತ್ತೀತಿ ವಾ, ಅನಾಪತ್ತೀತಿ ವಾ, ಲಹುಕಾ ಆಪತ್ತೀತಿ ವಾ, ಗರುಕಾ ಆಪತ್ತೀತಿ ವಾ, ಸಾವಸೇಸಾ ಆಪತ್ತೀತಿ ವಾ, ಅನವಸೇಸಾ ಆಪತ್ತೀತಿ ವಾ, ದುಟ್ಠುಲ್ಲಾ ಆಪತ್ತೀತಿ ವಾ ಅದುಟ್ಠುಲ್ಲಾ ಆಪತ್ತೀತಿ ವಾ’’. ಯಂ ತತ್ಥ ಭಣ್ಡನಂ ಕಲಹೋ ವಿಗ್ಗಹೋ ವಿವಾದೋ ನಾನಾವಾದೋ ಅಞ್ಞಥಾವಾದೋ ವಿಪಚ್ಚತಾಯ ವೋಹಾರೋ ಮೇಧಕಂ [ಮೇಧಗಂ (ಕ.)], ಇದಂ ವುಚ್ಚತಿ ವಿವಾದಾಧಿಕರಣಂ. ವಿವಾದಾಧಿಕರಣೇ ಸಙ್ಘೋ ವಿವದತಿ. ವಿವಾದಾಧಿಕರಣಂ ವಿವದಮಾನೋ ಅನುವದತಿ. ಅನುವಾದಾಧಿಕರಣಂ ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ವಿವಾದಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ.

೩೧೫. ಅನುವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಸಮುಟ್ಠಾಪೇತಿ? ಅನುವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ನ ಕತಮಂ ಅಧಿಕರಣಂ ಸಮುಟ್ಠಾಪೇತಿ; ಅಪಿಚ, ಅನುವಾದಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ. ಯಥಾ ಕಥಂ ವಿಯ? [ಚೂಳವ. ೨೧೫; ಪರಿ. ೩೪೮ ಆದಯೋ] ಇಧ ಭಿಕ್ಖೂ ಭಿಕ್ಖುಂ ಅನುವದನ್ತಿ ಸೀಲವಿಪತ್ತಿಯಾ ವಾ ಆಚಾರವಿಪತ್ತಿಯಾ ವಾ ದಿಟ್ಠಿವಿಪತ್ತಿಯಾ ವಾ ಆಜೀವವಿಪತ್ತಿಯಾ ವಾ. ಯೋ ತತ್ಥ ಅನುವಾದೋ ಅನುವದನಾ ಅನುಲ್ಲಪನಾ ಅನುಭಣನಾ ಅನುಸಮ್ಪವಙ್ಕತಾ ಅಬ್ಭುಸ್ಸಹನತಾ ಅನುಬಲಪ್ಪದಾನಂ, ಇದಂ ವುಚ್ಚತಿ ಅನುವಾದಾಧಿಕರಣಂ. ಅನುವಾದಾಧಿಕರಣೇ ಸಙ್ಘೋ ವಿವದತಿ. ವಿವಾದಾಧಿಕರಣಂ ವಿವದಮಾನೋ ಅನುವದತಿ. ಅನುವಾದಾಧಿಕರಣಂ ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ಅನುವಾದಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ.

೩೧೬. ಆಪತ್ತಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಸಮುಟ್ಠಾಪೇತಿ? ಆಪತ್ತಾಧಿಕರಣಂ ಚತುನ್ನಂ ಅಧಿಕರಣಾನಂ ನ ಕತಮಂ ಅಧಿಕರಣಂ ಸಮುಟ್ಠಾಪೇತಿ; ಅಪಿಚ, ಆಪತ್ತಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ. ಯಥಾ ಕಥಂ ವಿಯ? ಪಞ್ಚಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ, ಸತ್ತಪಿ ಆಪತ್ತಿಕ್ಖನ್ಧಾ ಆಪತ್ತಾಧಿಕರಣಂ, ಇದಂ ವುಚ್ಚತಿ ಆಪತ್ತಾಧಿಕರಣಂ. ಆಪತ್ತಾಧಿಕರಣೇ ಸಙ್ಘೋ ವಿವದತಿ. ವಿವಾದಾಧಿಕರಣಂ ವಿವದಮಾನೋ ಅನುವದತಿ. ಅನುವಾದಾಧಿಕರಣಂ ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ಆಪತ್ತಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ.

೩೧೭. ಕಿಚ್ಚಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಸಮುಟ್ಠಾಪೇತಿ? ಕಿಚ್ಚಾಧಿಕರಣಂ ಚತುನ್ನಂ ಅಧಿಕರಣಾನಂ ನ ಕತಮಂ ಅಧಿಕರಣಂ ಸಮುಟ್ಠಾಪೇತಿ, ಅಪಿಚ ಕಿಚ್ಚಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ. ಯಥಾ ಕಥಂ ವಿಯ? ಯಾ ಸಙ್ಘಸ್ಸ ಕಿಚ್ಚಯತಾ ಕರಣೀಯತಾ ಅಪಲೋಕನಕಮ್ಮಂ ಞತ್ತಿಕಮ್ಮಂ ಞತ್ತಿದುತಿಯಕಮ್ಮಂ ಞತ್ತಿಚತುತ್ಥಕಮ್ಮಂ, ಇದಂ ವುಚ್ಚತಿ ಕಿಚ್ಚಾಧಿಕರಣಂ. ಕಿಚ್ಚಾಧಿಕರಣೇ ಸಙ್ಘೋ ವಿವದತಿ. ವಿವಾದಾಧಿಕರಣಂ ವಿವದಮಾನೋ ಅನುವದತಿ. ಅನುವಾದಾಧಿಕರಣಂ ಅನುವದಮಾನೋ ಆಪತ್ತಿಂ ಆಪಜ್ಜತಿ ಆಪತ್ತಾಧಿಕರಣಂ. ತಾಯ ಆಪತ್ತಿಯಾ ಸಙ್ಘೋ ಕಮ್ಮಂ ಕರೋತಿ ಕಿಚ್ಚಾಧಿಕರಣಂ. ಏವಂ ಕಿಚ್ಚಾಧಿಕರಣಪಚ್ಚಯಾ ಚತ್ತಾರೋ ಅಧಿಕರಣಾ ಜಾಯನ್ತಿ.

ಸಮುಟ್ಠಾಪನವಾರೋ ನಿಟ್ಠಿತೋ ವೀಸತಿಮೋ.