ಅನ್ತರಪೇಯ್ಯಾಲಂ

ಕತಿಪುಚ್ಛಾವಾರೋ

೨೭೧. ಕತಿ ಆಪತ್ತಿಯೋ? ಕತಿ ಆಪತ್ತಿಕ್ಖನ್ಧಾ? ಕತಿ ವಿನೀತವತ್ಥೂನಿ? ಕತಿ ಅಗಾರವಾ? ಕತಿ ಗಾರವಾ? ಕತಿ ವಿನೀತವತ್ಥೂನಿ? ಕತಿ ವಿಪತ್ತಿಯೋ? ಕತಿ ಆಪತ್ತಿಸಮುಟ್ಠಾನಾ? ಕತಿ ವಿವಾದಮೂಲಾನಿ? ಕತಿ ಅನುವಾದಮೂಲಾನಿ? ಕತಿ ಸಾರಣೀಯಾ ಧಮ್ಮಾ? ಕತಿ ಭೇದಕರವತ್ಥೂನಿ? ಕತಿ ಅಧಿಕರಣಾನಿ? ಕತಿ ಸಮಥಾ?

ಪಞ್ಚ ಆಪತ್ತಿಯೋ. ಪಞ್ಚ ಆಪತ್ತಿಕ್ಖನ್ಧಾ. ಪಞ್ಚ ವಿನೀತವತ್ಥೂನಿ. ಸತ್ತ ಆಪತ್ತಿಯೋ. ಸತ್ತ ಆಪತ್ತಿಕ್ಖನ್ಧಾ. ಸತ್ತ ವಿನೀತವತ್ಥೂನಿ. ಛ ಅಗಾರವಾ. ಛ ಗಾರವಾ. ಛ ವಿನೀತವತ್ಥೂನಿ. ಚತಸ್ಸೋ ವಿಪತ್ತಿಯೋ. ಛ ಆಪತ್ತಿಸಮುಟ್ಠಾನಾ. ಛ ವಿವಾದಮೂಲಾನಿ. ಛ ಅನುವಾದಮೂಲಾನಿ. ಛ ಸಾರಣೀಯಾ ಧಮ್ಮಾ. ಅಟ್ಠಾರಸ ಭೇದಕರವತ್ಥೂನಿ. ಚತ್ತಾರಿ ಅಧಿಕರಣಾನಿ. ಸತ್ತ ಸಮಥಾ.

ತತ್ಥ ಕತಮಾ ಪಞ್ಚ ಆಪತ್ತಿಯೋ? ಪಾರಾಜಿಕಾಪತ್ತಿ, ಸಙ್ಘಾದಿಸೇಸಾಪತ್ತಿ, ಪಾಚಿತ್ತಿಯಾಪತ್ತಿ, ಪಾಟಿದೇಸನೀಯಾಪತ್ತಿ, ದುಕ್ಕಟಾಪತ್ತಿ – ಇಮಾ ಪಞ್ಚ ಆಪತ್ತಿಯೋ.

ತತ್ಥ ಕತಮೇ ಪಞ್ಚ ಆಪತ್ತಿಕ್ಖನ್ಧಾ? ಪಾರಾಜಿಕಾಪತ್ತಿಕ್ಖನ್ಧೋ, ಸಙ್ಘಾದಿಸೇಸಾಪತ್ತಿಕ್ಖನ್ಧೋ, ಪಾಚಿತ್ತಿಯಾಪತ್ತಿಕ್ಖನ್ಧೋ, ಪಾಟಿದೇಸನೀಯಾಪತ್ತಿಕ್ಖನ್ಧೋ, ದುಕ್ಕಟಾಪತ್ತಿಕ್ಖನ್ಧೋ – ಇಮೇ ಪಞ್ಚ ಆಪತ್ತಿಕ್ಖನ್ಧಾ.

ತತ್ಥ ಕತಮಾನಿ ಪಞ್ಚ ವಿನೀತವತ್ಥೂನಿ? ಪಞ್ಚಹಿ ಆಪತ್ತಿಕ್ಖನ್ಧೇಹಿ ಆರತಿ ವಿರತಿ ಪಟಿವಿರತಿ ವೇರಮಣೀ ಅಕಿರಿಯಾ ಅಕರಣಂ ಅನಜ್ಝಾಪತ್ತಿ ವೇಲಾಅನತಿಕ್ಕಮೋ ಸೇತುಘಾತೋ – ಇಮಾನಿ ಪಞ್ಚ ವಿನೀತವತ್ಥೂನಿ.

ತತ್ಥ ಕತಮಾ ಸತ್ತ ಆಪತ್ತಿಯೋ? ಪಾರಾಜಿಕಾಪತ್ತಿ, ಸಙ್ಘಾದಿಸೇಸಾಪತ್ತಿ, ಥುಲ್ಲಚ್ಚಯಾಪತ್ತಿ, ಪಾಚಿತ್ತಿಯಾಪತ್ತಿ, ಪಾಟಿದೇಸನೀಯಾಪತ್ತಿ, ದುಕ್ಕಟಾಪತ್ತಿ, ದುಬ್ಭಾಸಿತಾಪತ್ತಿ – ಇಮಾ ಸತ್ತ ಆಪತ್ತಿಯೋ.

ತತ್ಥ ಕತಮೇ ಸತ್ತ ಆಪತ್ತಿಕ್ಖನ್ಧಾ? ಪಾರಾಜಿಕಾಪತ್ತಿಕ್ಖನ್ಧೋ, ಸಙ್ಘಾದಿಸೇಸಾಪತ್ತಿಕ್ಖನ್ಧೋ, ಥುಲ್ಲಚ್ಚಯಾಪತ್ತಿಕ್ಖನ್ಧೋ, ಪಾಚಿತ್ತಿಯಾಪತ್ತಿಕ್ಖನ್ಧೋ, ಪಾಟಿದೇಸನೀಯಾಪತ್ತಿಕ್ಖನ್ಧೋ, ದುಕ್ಕಟಾಪತ್ತಿಕ್ಖನ್ಧೋ, ದುಬ್ಭಾಸಿತಾಪತ್ತಿಕ್ಖನ್ಧೋ – ಇಮೇ ಸತ್ತ ಆಪತ್ತಿಕ್ಖನ್ಧಾ.

ತತ್ಥ ಕತಮಾನಿ ಸತ್ತ ವಿನೀತವತ್ಥೂನಿ? ಸತ್ತಹಿ ಆಪತ್ತಿಕ್ಖನ್ಧೇಹಿ ಆರತಿ ವಿರತಿ ಪಟಿವಿರತಿ ವೇರಮಣೀ ಅಕಿರಿಯಾ ಅಕರಣಂ ಅನಜ್ಝಾಪತ್ತಿ ವೇಲಾಅನತಿಕ್ಕಮೋ ಸೇತುಘಾತೋ – ಇಮಾನಿ ಸತ್ತ ವಿನೀತವತ್ಥೂನಿ.

ತತ್ಥ ಕತಮೇ ಛ ಅಗಾರವಾ? ಬುದ್ಧೇ ಅಗಾರವೋ, ಧಮ್ಮೇ ಅಗಾರವೋ, ಸಙ್ಘೇ ಅಗಾರವೋ, ಸಿಕ್ಖಾಯ ಅಗಾರವೋ, ಅಪ್ಪಮಾದೇ ಅಗಾರವೋ, ಪಟಿಸನ್ಧಾರೇ ಅಗಾರವೋ – ಇಮೇ ಛ ಅಗಾರವಾ.

ತತ್ಥ ಕತಮೇ ಛ ಗಾರವಾ? ಬುದ್ಧೇ ಗಾರವೋ, ಧಮ್ಮೇ ಗಾರವೋ, ಸಙ್ಘೇ ಗಾರವೋ, ಸಿಕ್ಖಾಯ ಗಾರವೋ, ಅಪ್ಪಮಾದೇ ಗಾರವೋ, ಪಟಿಸನ್ಧಾರೇ ಗಾರವೋ – ಇಮೇ ಛ ಗಾರವಾ.

ತತ್ಥ ಕತಮಾನಿ ಛ ವಿನೀತವತ್ಥೂನಿ? ಛಹಿ ಅಗಾರವೇಹಿ ಆರತಿ ವಿರತಿ ಪಟಿವಿರತಿ ವೇರಮಣೀ ಅಕಿರಿಯಾ ಅಕರಣಂ ಅನಜ್ಝಾಪತ್ತಿ ವೇಲಾಅನತಿಕ್ಕಮೋ ಸೇತುಘಾತೋ – ಇಮಾನಿ ಛ ವಿನೀತವತ್ಥೂನಿ.

ತತ್ಥ ಕತಮಾ ಚತಸ್ಸೋ ವಿಪತ್ತಿಯೋ? ಸೀಲವಿಪತ್ತಿ, ಆಚಾರವಿಪತ್ತಿ, ದಿಟ್ಠಿವಿಪತ್ತಿ, ಆಜೀವವಿಪತ್ತಿ – ಇಮಾ ಚತಸ್ಸೋ ವಿಪತ್ತಿಯೋ.

ತತ್ಥ ಕತಮೇ ಛ ಆಪತ್ತಿಸಮುಟ್ಠಾನಾ? ಅತ್ಥಾಪತ್ತಿ ಕಾಯತೋ ಸಮುಟ್ಠಾತಿ, ನ ವಾಚತೋ ನ ಚಿತ್ತತೋ; ಅತ್ಥಾಪತ್ತಿ ವಾಚತೋ ಸಮುಟ್ಠಾತಿ, ನ ಕಾಯತೋ ನ ಚಿತ್ತತೋ; ಅತ್ಥಾಪತ್ತಿ ಕಾಯತೋ ಚ ವಾಚತೋ ಚ ಸಮುಟ್ಠಾತಿ, ನ ಚಿತ್ತತೋ; ಅತ್ಥಾಪತ್ತಿ ಕಾಯತೋ ಚ ಚಿತ್ತತೋ ಚ ಸಮುಟ್ಠಾತಿ, ನ ವಾಚತೋ; ಅತ್ಥಾಪತ್ತಿ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ, ನ ಕಾಯತೋ; ಅತ್ಥಾಪತ್ತಿ ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ – ಇಮೇ ಛ ಆಪತ್ತಿಸಮುಟ್ಠಾನಾ.

೨೭೨. ತತ್ಥ [ಚೂಳವ. ೨೧೬; ಅ. ನಿ. ೬.೩೬; ಮ. ನಿ. ೩.೪೪; ದೀ. ನಿ. ೩.೩೨೫] ಕತಮಾನಿ ಛ ವಿವಾದಮೂಲಾನಿ? ಇಧ ಭಿಕ್ಖು ಕೋಧನೋ ಹೋತಿ ಉಪನಾಹೀ. ಯೋ ಸೋ ಭಿಕ್ಖು ಕೋಧನೋ ಹೋತಿ ಉಪನಾಹೀ ಸೋ ಸತ್ಥರಿಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಧಮ್ಮೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಙ್ಘೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಿಕ್ಖಾಯಪಿ ನ ಪರಿಪೂರಕಾರೀ ಹೋತಿ. ಯೋ ಸೋ ಭಿಕ್ಖು ಸತ್ಥರಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಧಮ್ಮೇ…ಪೇ… ಸಙ್ಘೇ…ಪೇ… ಸಿಕ್ಖಾಯ ನ ಪರಿಪೂರಕಾರೀ, ಸೋ ಸಙ್ಘೇ ವಿವಾದಂ ಜನೇತಿ. ಯೋ ಹೋತಿ ವಿವಾದೋ ಬಹುಜನಾಹಿತಾಯ ಬಹುಜನಾಸುಖಾಯ ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಏವರೂಪಂ ಚೇ ತುಮ್ಹೇ ವಿವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ವಿವಾದಮೂಲಸ್ಸ ಪಹಾನಾಯ ವಾಯಮೇಯ್ಯಾಥ. ಏವರೂಪಂ ಚೇ ತುಮ್ಹೇ ವಿವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ನ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ವಿವಾದಮೂಲಸ್ಸ ಆಯತಿಂ ಅನವಸ್ಸವಾಯ ಪಟಿಪಜ್ಜೇಯ್ಯಾಥ. ಏವಮೇತಸ್ಸ ಪಾಪಕಸ್ಸ ವಿವಾದಮೂಲಸ್ಸ ಪಹಾನಂ ಹೋತಿ. ಏವಮೇತಸ್ಸ ಪಾಪಕಸ್ಸ ವಿವಾದಮೂಲಸ್ಸ ಆಯತಿಂ ಅನವಸ್ಸವೋ ಹೋತಿ.

[ಚೂಳವ. ೨೧೬] ಪುನ ಚಪರಂ ಭಿಕ್ಖು ಮಕ್ಖೀ ಹೋತಿ ಪಳಾಸೀ…ಪೇ… ಇಸ್ಸುಕೀ ಹೋತಿ ಮಚ್ಛರೀ, ಸಠೋ ಹೋತಿ ಮಾಯಾವೀ, ಪಾಪಿಚ್ಛೋ ಹೋತಿ ಮಿಚ್ಛಾದಿಟ್ಠಿ, ಸನ್ದಿಟ್ಠಿಪರಾಮಾಸೀ ಹೋತಿ ಆಧಾನಗ್ಗಾಹೀ ದುಪ್ಪಟಿನಿಸ್ಸಗ್ಗೀ. ಯೋ ಸೋ ಭಿಕ್ಖು ಸನ್ದಿಟ್ಠಿಪರಾಮಾಸೀ ಹೋತಿ ಆಧಾನಗ್ಗಾಹೀ ದುಪ್ಪಟಿನಿಸ್ಸಗ್ಗೀ ಸೋ ಸತ್ಥರಿಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಧಮ್ಮೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಙ್ಘೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಿಕ್ಖಾಯಪಿ ನ ಪರಿಪೂರಕಾರೀ ಹೋತಿ. ಯೋ ಸೋ ಭಿಕ್ಖು ಸತ್ಥರಿ ಅಗಾರವೋ ವಿಹರತಿ ಅಪ್ಪತಿಸ್ಸೋ ಧಮ್ಮೇ…ಪೇ… ಸಙ್ಘೇ…ಪೇ… ಸಿಕ್ಖಾಯ ನ ಪರಿಪೂರಕಾರೀ, ಸೋ ಸಙ್ಘೇ ವಿವಾದಂ ಜನೇತಿ. ಯೋ ಸೋ ಹೋತಿ ವಿವಾದೋ ಬಹುಜನಾಹಿತಾಯ ಬಹುಜನಾಸುಖಾಯ ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಏವರೂಪಂ ಚೇ ತುಮ್ಹೇ ವಿವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ವಿವಾದಮೂಲಸ್ಸ ಪಹಾನಾಯ ವಾಯಮೇಯ್ಯಾಥ. ಏವರೂಪಂ ಚೇ ತುಮ್ಹೇ ವಿವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ನ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ವಿವಾದಮೂಲಸ್ಸ ಆಯತಿಂ ಅನವಸ್ಸವಾಯ ಪಟಿಪಜ್ಜೇಯ್ಯಾಥ. ಏವಮೇತಸ್ಸ ಪಾಪಕಸ್ಸ ವಿವಾದಮೂಲಸ್ಸ ಪಹಾನಂ ಹೋತಿ. ಏವಮೇತಸ್ಸ ಪಾಪಕಸ್ಸ ವಿವಾದಮೂಲಸ್ಸ ಆಯತಿಂ ಅನವಸ್ಸವೋ ಹೋತಿ. ಇಮಾನಿ ಛ ವಿವಾದಮೂಲಾನಿ.

೨೭೩. [ಚೂಳವ. ೨೧೭] ತತ್ಥ ಕತಮಾನಿ ಛ ಅನುವಾದಮೂಲಾನಿ? ಇಧ ಭಿಕ್ಖು ಕೋಧನೋ ಹೋತಿ ಉಪನಾಹೀ. ಯೋ ಸೋ ಭಿಕ್ಖು ಕೋಧನೋ ಹೋತಿ ಉಪನಾಹೀ ಸೋ ಸತ್ಥರಿಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಧಮ್ಮೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಙ್ಘೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಿಕ್ಖಾಯಪಿ ನ ಪರಿಪೂರಕಾರೀ ಹೋತಿ. ಯೋ ಸೋ ಭಿಕ್ಖು ಸತ್ಥರಿ ಅಗಾರವೋ ವಿಹರತಿ ಅಪ್ಪತಿಸ್ಸೋ ಧಮ್ಮೇ…ಪೇ… ಸಙ್ಘೇ …ಪೇ… ಸಿಕ್ಖಾಯ ನ ಪರಿಪೂರಕಾರೀ ಸೋ ಸಙ್ಘೇ ಅನುವಾದಂ ಜನೇತಿ. ಯೋ ಹೋತಿ ಅನುವಾದೋ ಬಹುಜನಾಹಿತಾಯ ಬಹುಜನಾಸುಖಾಯ ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಏವರೂಪಂ ಚೇ ತುಮ್ಹೇ ಅನುವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ಅನುವಾದಮೂಲಸ್ಸ ಪಹಾನಾಯ ವಾಯಮೇಯ್ಯಾಥ. ಏವರೂಪಂ ಚೇ ತುಮ್ಹೇ ಅನುವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ನ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ಅನುವಾದಮೂಲಸ್ಸ ಆಯತಿಂ ಅನವಸ್ಸವಾಯ ಪಟಿಪಜ್ಜೇಯ್ಯಾಥ. ಏವಮೇತಸ್ಸ ಪಾಪಕಸ್ಸ ಅನುವಾದಮೂಲಸ್ಸ ಪಹಾನಂ ಹೋತಿ. ಏವಮೇತಸ್ಸ ಪಾಪಕಸ್ಸ ಅನುವಾದಮೂಲಸ್ಸ ಆಯತಿಂ ಅನವಸ್ಸವೋ ಹೋತಿ.

ಪುನ ಚಪರಂ ಭಿಕ್ಖು ಮಕ್ಖೀ ಹೋತಿ ಪಲಾಸೀ…ಪೇ… ಇಸ್ಸುಕೀ ಹೋತಿ ಮಚ್ಛರೀ, ಸಠೋ ಹೋತಿ ಮಾಯಾವೀ, ಪಾಪಿಚ್ಛೋ ಹೋತಿ ಮಿಚ್ಛಾದಿಟ್ಠಿ, ಸನ್ದಿಟ್ಠಿಪರಾಮಾಸೀ ಹೋತಿ ಆಧಾನಗ್ಗಾಹೀ ದುಪ್ಪಟಿನಿಸ್ಸಗ್ಗೀ. ಯೋ ಸೋ ಭಿಕ್ಖು ಸನ್ದಿಟ್ಠಿಪರಾಮಾಸೀ ಹೋತಿ ಆಧಾನಗ್ಗಾಹೀ ದುಪ್ಪಟಿನಿಸ್ಸಗ್ಗೀ ಸೋ ಸತ್ಥರಿಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಧಮ್ಮೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಙ್ಘೇಪಿ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಸಿಕ್ಖಾಯಪಿ ನ ಪರಿಪೂರಕಾರೀ ಹೋತಿ. ಯೋ ಭಿಕ್ಖು ಸತ್ಥರಿ ಅಗಾರವೋ ವಿಹರತಿ ಅಪ್ಪತಿಸ್ಸೋ ಧಮ್ಮೇ…ಪೇ… ಸಙ್ಘೇ…ಪೇ… ಸಿಕ್ಖಾಯ ನ ಪರಿಪೂರಕಾರೀ ಸೋ ಸಙ್ಘೇ ಅನುವಾದಂ ಜನೇತಿ. ಯೋ ಹೋತಿ ಅನುವಾದೋ ಬಹುಜನಾಹಿತಾಯ ಬಹುಜನಾಸುಖಾಯ ಬಹುನೋ ಜನಸ್ಸ ಅನತ್ಥಾಯ ಅಹಿತಾಯ ದುಕ್ಖಾಯ ದೇವಮನುಸ್ಸಾನಂ. ಏವರೂಪಂ ಚೇ ತುಮ್ಹೇ ಅನುವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ಅನುವಾದಮೂಲಸ್ಸ ಪಹಾನಾಯ ವಾಯಮೇಯ್ಯಾಥ. ಏವರೂಪಂ ಚೇ ತುಮ್ಹೇ ಅನುವಾದಮೂಲಂ ಅಜ್ಝತ್ತಂ ವಾ ಬಹಿದ್ಧಾ ವಾ ನ ಸಮನುಪಸ್ಸೇಯ್ಯಾಥ ತತ್ರ ತುಮ್ಹೇ ತಸ್ಸೇವ ಪಾಪಕಸ್ಸ ಅನುವಾದಮೂಲಸ್ಸ ಆಯತಿಂ ಅನವಸ್ಸವಾಯ ಪಟಿಪಜ್ಜೇಯ್ಯಾಥ. ಏವಮೇತಸ್ಸ ಪಾಪಕಸ್ಸ ಅನುವಾದಮೂಲಸ್ಸ ಪಹಾನಂ ಹೋತಿ. ಏವಮೇತಸ್ಸ ಪಾಪಕಸ್ಸ ಅನುವಾದಮೂಲಸ್ಸ ಆಯತಿಂ ಅನವಸ್ಸವೋ ಹೋತಿ. ಇಮಾನಿ ಛ ಅನುವಾದಮೂಲಾನಿ.

೨೭೪. [ದೀ. ನಿ. ೩.೩೨೪; ಅ. ನಿ. ೬.೧೧] ತತ್ಥ ಕತಮೇ ಛ ಸಾರಣೀಯಾ ಧಮ್ಮಾ? ಇಧ ಭಿಕ್ಖುನೋ ಮೇತ್ತಂ ಕಾಯಕಮ್ಮಂ ಪಚ್ಚುಪಟ್ಠಿತಂ ಹೋತಿ ಸಬ್ರಹ್ಮಚಾರೀಸು ಆವಿ ಚೇವ ರಹೋ ಚ. ಅಯಮ್ಪಿ ಧಮ್ಮೋ ಸಾರಣೀಯೋ ಪಿಯಕರಣೋ ಗರುಕರಣೋ ಸಙ್ಗಹಾಯ ಅವಿವಾದಾಯ ಸಾಮಗ್ಗಿಯಾ ಏಕೀಭಾವಾಯ ಸಂವತ್ತತಿ.

ಪುನ ಚಪರಂ ಭಿಕ್ಖುನೋ ಮೇತ್ತಂ ವಚೀಕಮ್ಮಂ ಪಚ್ಚುಪಟ್ಠಿತಂ ಹೋತಿ ಸಬ್ರಹ್ಮಚಾರೀಸು ಆವಿ ಚೇವ ರಹೋ ಚ. ಅಯಮ್ಪಿ ಧಮ್ಮೋ ಸಾರಣೀಯೋ ಪಿಯಕರಣೋ ಗರುಕರಣೋ ಸಙ್ಗಹಾಯ ಅವಿವಾದಾಯ ಸಾಮಗ್ಗಿಯಾ ಏಕೀಭಾವಾಯ ಸಂವತ್ತತಿ.

ಪುನ ಚಪರಂ ಭಿಕ್ಖುನೋ ಮೇತ್ತಂ ಮನೋಕಮ್ಮಂ ಪಚ್ಚುಪಟ್ಠಿತಂ ಹೋತಿ ಸಬ್ರಹ್ಮಚಾರೀಸು ಆವಿ ಚೇವ ರಹೋ ಚ. ಅಯಮ್ಪಿ ಧಮ್ಮೋ ಸಾರಣೀಯೋ ಪಿಯಕರಣೋ ಗರುಕರಣೋ ಸಙ್ಗಹಾಯ ಅವಿವಾದಾಯ ಸಾಮಗ್ಗಿಯಾ ಏಕೀಭಾವಾಯ ಸಂವತ್ತತಿ.

ಪುನ ಚಪರಂ ಭಿಕ್ಖು ಯೇ ತೇ ಲಾಭಾ ಧಮ್ಮಿಕಾ ಧಮ್ಮಲದ್ಧಾ ಅನ್ತಮಸೋ ಪತ್ತಪರಿಯಾಪನ್ನಮತ್ತಮ್ಪಿ ತಥಾರೂಪೇಹಿ ಲಾಭೇಹಿ ಅಪ್ಪಟಿವಿಭತ್ತಭೋಗೀ ಹೋತಿ ಸೀಲವನ್ತೇಹಿ ಸಬ್ರಹ್ಮಚಾರೀಹಿ ಸಾಧಾರಣಭೋಗೀ. ಅಯಮ್ಪಿ ಧಮ್ಮೋ ಸಾರಣೀಯೋ ಪಿಯಕರಣೋ ಗರುಕರಣೋ ಸಙ್ಗಹಾಯ ಅವಿವಾದಾಯ ಸಾಮಗ್ಗಿಯಾ ಏಕೀಭಾವಾಯ ಸಂವತ್ತತಿ.

ಪುನ ಚಪರಂ ಭಿಕ್ಖು ಯಾನಿ ತಾನಿ ಸೀಲಾನಿ ಅಖಣ್ಡಾನಿ ಅಚ್ಛಿದ್ದಾನಿ ಅಸಬಲಾನಿ ಅಕಮ್ಮಾಸಾನಿ ಭುಜಿಸ್ಸಾನಿ ವಿಞ್ಞುಪಸತ್ಥಾನಿ ಅಪರಾಮಟ್ಠಾನಿ ಸಮಾಧಿಸಂವತ್ತನಿಕಾನಿ, ತಥಾರೂಪೇಸು ಸೀಲೇಸು ಸೀಲಸಾಮಞ್ಞಗತೋ ವಿಹರತಿ ಸಬ್ರಹ್ಮಚಾರೀಹಿ ಆವಿ ಚೇವ ರಹೋ ಚ. ಅಯಮ್ಪಿ ಧಮ್ಮೋ ಸಾರಣೀಯೋ ಪಿಯಕರಣೋ ಗರುಕರಣೋ ಸಙ್ಗಹಾಯ ಅವಿವಾದಾಯ ಸಾಮಗ್ಗಿಯಾ ಏಕೀಭಾವಾಯ ಸಂವತ್ತತಿ.

ಪುನ ಚಪರಂ ಭಿಕ್ಖು ಯಾಯಂ ದಿಟ್ಠಿ ಅರಿಯಾ ನಿಯ್ಯಾನಿಕಾ ನಿಯ್ಯಾತಿ ತಕ್ಕರಸ್ಸ ಸಮ್ಮಾ ದುಕ್ಖಕ್ಖಯಾಯ ತಥಾರೂಪಾಯ ದಿಟ್ಠಿಯಾ ದಿಟ್ಠಿಸಾಮಞ್ಞಗತೋ ವಿಹರತಿ ಸಬ್ರಹ್ಮಚಾರೀಹಿ ಆವಿ ಚೇವ ರಹೋ ಚ. ಅಯಮ್ಪಿ ಧಮ್ಮೋ ಸಾರಣೀಯೋ ಪಿಯಕರಣೋ ಗರುಕರಣೋ ಸಙ್ಗಹಾಯ ಅವಿವಾದಾಯ ಸಾಮಗ್ಗಿಯಾ ಏಕೀಭಾವಾಯ ಸಂವತ್ತತಿ. ಇಮೇ ಛ ಸಾರಣೀಯಾ ಧಮ್ಮಾ.

೨೭೫. ತತ್ಥ ಕತಮಾನಿ ಅಟ್ಠಾರಸ ಭೇದಕರವತ್ಥೂನಿ? ಇಧ ಭಿಕ್ಖು ಅಧಮ್ಮಂ ‘‘ಧಮ್ಮೋ’’ತಿ ದೀಪೇತಿ, ಧಮ್ಮಂ ‘‘ಅಧಮ್ಮೋ’’ತಿ ದೀಪೇತಿ, ಅವಿನಯಂ ‘‘ವಿನಯೋ’’ತಿ ದೀಪೇತಿ, ವಿನಯಂ ‘‘ಅವಿನಯೋ’’ತಿ ದೀಪೇತಿ, ಅಭಾಸಿತಂ ಅಲಪಿತಂ ತಥಾಗತೇನ ‘‘ಭಾಸಿತಂ ಲಪಿತಂ ತಥಾಗತೇನಾ’’ತಿ ದೀಪೇತಿ, ಭಾಸಿತಂ ಲಪಿತಂ ತಥಾಗತೇನ ‘‘ಅಭಾಸಿತಂ ಅಲಪಿತಂ ತಥಾಗತೇನಾ’’ತಿ ದೀಪೇತಿ, ಅನಾಚಿಣ್ಣಂ ತಥಾಗತೇನ ‘‘ಆಚಿಣ್ಣಂ ತಥಾಗತೇನಾ’’ತಿ ದೀಪೇತಿ, ಆಚಿಣ್ಣಂ ತಥಾಗತೇನ ‘‘ಅನಾಚಿಣ್ಣಂ ತಥಾಗತೇನಾ’’ತಿ ದೀಪೇತಿ, ಅಪಞ್ಞತ್ತಂ ತಥಾಗತೇನ ‘‘ಪಞ್ಞತ್ತಂ ತಥಾಗತೇನಾ’’ತಿ ದೀಪೇತಿ, ಪಞ್ಞತ್ತಂ ತಥಾಗತೇನ ‘‘ಅಪಞ್ಞತ್ತಂ ತಥಾಗತೇನಾ’’ತಿ ದೀಪೇತಿ, ಆಪತ್ತಿಂ ‘‘ಅನಾಪತ್ತೀ’’ತಿ ದೀಪೇತಿ, ಅನಾಪತ್ತಿಂ ‘‘ಆಪತ್ತೀ’’ತಿ ದೀಪೇತಿ, ಲಹುಕಂ ಆಪತ್ತಿಂ ‘‘ಗರುಕಾ ಆಪತ್ತೀ’’ತಿ ದೀಪೇತಿ, ಗರುಕಂ ಆಪತ್ತಿಂ ‘‘ಲಹುಕಾ ಆಪತ್ತೀ’’ತಿ ದೀಪೇತಿ, ಸಾವಸೇಸಂ ಆಪತ್ತಿಂ ‘‘ಅನವಸೇಸಾ ಆಪತ್ತೀ’’ತಿ ದೀಪೇತಿ, ಅನವಸೇಸಂ ಆಪತ್ತಿಂ ‘‘ಸಾವಸೇಸಾ ಆಪತ್ತೀ’’ತಿ ದೀಪೇತಿ, ದುಟ್ಠುಲ್ಲಂ ಆಪತ್ತಿಂ ‘‘ಅದುಟ್ಠುಲ್ಲಾ ಆಪತ್ತೀ’’ತಿ ದೀಪೇತಿ, ಅದುಟ್ಠುಲ್ಲಂ ಆಪತ್ತಿಂ ‘‘ದುಟ್ಠುಲ್ಲಾ ಆಪತ್ತೀ’’ತಿ ದೀಪೇತಿ. ಇಮಾನಿ ಅಟ್ಠಾರಸ ಭೇದಕರವತ್ಥೂನಿ.

[ಚೂಳವ. ೨೧೫; ಪರಿ. ೩೪೦] ತತ್ಥ ಕತಮಾನಿ ಚತ್ತಾರಿ ಅಧಿಕರಣಾನಿ? ವಿವಾದಾಧಿಕರಣಂ, ಅನುವಾದಾಧಿಕರಣಂ, ಆಪತ್ತಾಧಿಕರಣಂ, ಕಿಚ್ಚಾಧಿಕರಣಂ – ಇಮಾನಿ ಚತ್ತಾರಿ ಅಧಿಕರಣಾನಿ.

ತತ್ಥ ಕತಮೇ ಸತ್ತ ಸಮಥಾ? ಸಮ್ಮುಖಾವಿನಯೋ, ಸತಿವಿನಯೋ, ಅಮೂಳ್ಹವಿನಯೋ, ಪಟಿಞ್ಞಾತಕರಣಂ, ಯೇಭುಯ್ಯಸಿಕಾ, ತಸ್ಸಪಾಪಿಯಸಿಕಾ, ತಿಣವತ್ಥಾರಕೋ – ಇಮೇ ಸತ್ತ ಸಮಥಾ.

ಕತಿಪುಚ್ಛಾವಾರೋ ನಿಟ್ಠಿತೋ.

ತಸ್ಸುದ್ದಾನಂ –

ಆಪತ್ತಿ ಆಪತ್ತಿಕ್ಖನ್ಧಾ, ವಿನೀತಾ ಸತ್ತಧಾ ಪುನ;

ವಿನೀತಾಗಾರವಾ ಚೇವ, ಗಾರವಾ ಮೂಲಮೇವ ಚ.

ಪುನ ವಿನೀತಾ ವಿಪತ್ತಿ, ಸಮುಟ್ಠಾನಾ ವಿವಾದನಾ;

ಅನುವಾದಾ ಸಾರಣೀಯಂ, ಭೇದಾಧಿಕರಣೇನ ಚ.

ಸತ್ತೇವ ಸಮಥಾ ವುತ್ತಾ, ಪದಾ ಸತ್ತರಸಾ ಇಮೇತಿ.

೧. ಛಆಪತ್ತಿಸಮುಟ್ಠಾನವಾರೋ

೨೭೬. ಪಠಮೇನ ಆಪತ್ತಿಸಮುಟ್ಠಾನೇನ ಪಾರಾಜಿಕಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ. ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಥುಲ್ಲಚ್ಚಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಚಿತ್ತಿಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಟಿದೇಸನೀಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಕ್ಕಟಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಬ್ಭಾಸಿತಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ.

ದುತಿಯೇನ ಆಪತ್ತಿಸಮುಟ್ಠಾನೇನ ಪಾರಾಜಿಕಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ. ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಥುಲ್ಲಚ್ಚಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಚಿತ್ತಿಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಟಿದೇಸನೀಯಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ. ದುಕ್ಕಟಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಬ್ಭಾಸಿತಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ.

ತತಿಯೇನ ಆಪತ್ತಿಸಮುಟ್ಠಾನೇನ ಪಾರಾಜಿಕಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ. ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಥುಲ್ಲಚ್ಚಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಚಿತ್ತಿಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಟಿದೇಸನೀಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಕ್ಕಟಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಬ್ಭಾಸಿತಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ.

ಚತುತ್ಥೇ ಆಪತ್ತಿಸಮುಟ್ಠಾನೇನ ಪಾರಾಜಿಕಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಥುಲ್ಲಚ್ಚಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಚಿತ್ತಿಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಟಿದೇಸನೀಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಕ್ಕಟಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಬ್ಭಾಸಿತಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ.

ಪಞ್ಚಮೇನ ಆಪತ್ತಿಸಮುಟ್ಠಾನೇನ ಪಾರಾಜಿಕಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಥುಲ್ಲಚ್ಚಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಚಿತ್ತಿಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಟಿದೇಸನೀಯಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ. ದುಕ್ಕಟಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಬ್ಭಾಸಿತಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ.

ಛಟ್ಠೇನ ಆಪತ್ತಿಸಮುಟ್ಠಾನೇನ ಪಾರಾಜಿಕಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಥುಲ್ಲಚ್ಚಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಚಿತ್ತಿಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ಪಾಟಿದೇಸನೀಯಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಕ್ಕಟಂ ಆಪಜ್ಜೇಯ್ಯಾತಿ? ಸಿಯಾತಿ ವತ್ತಬ್ಬಂ. ದುಬ್ಭಾಸಿತಂ ಆಪಜ್ಜೇಯ್ಯಾತಿ? ನ ಹೀತಿ ವತ್ತಬ್ಬಂ.

ಛಆಪತ್ತಿಸಮುಟ್ಠಾನವಾರೋ ನಿಟ್ಠಿತೋ ಪಠಮೋ.

೨. ಕತಾಪತ್ತಿವಾರೋ

೨೭೭. ಪಠಮೇನ ಆಪತ್ತಿಸಮುಟ್ಠಾನೇನ ಕತಿ ಆಪತ್ತಿಯೋ ಆಪಜ್ಜತಿ? ಪಠಮೇನ ಆಪತ್ತಿಸಮುಟ್ಠಾನೇನ ಪಞ್ಚ ಆಪತ್ತಿಯೋ ಆಪಜ್ಜತಿ. ಭಿಕ್ಖು ಕಪ್ಪಿಯಸಞ್ಞೀ ಸಞ್ಞಾಚಿಕಾಯ ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಪಯೋಗೇ ದುಕ್ಕಟಂ; ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ; ತಸ್ಮಿಂ ಪಿಣ್ಡೇ ಆಗತೇ ಆಪತ್ತಿ ಸಙ್ಘಾದಿಸೇಸಸ್ಸ; ಭಿಕ್ಖು ಕಪ್ಪಿಯಸಞ್ಞೀ ವಿಕಾಲೇ ಭೋಜನಂ ಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ; ಭಿಕ್ಖು ಕಪ್ಪಿಯಸಞ್ಞೀ ಅಞ್ಞಾತಿಕಾಯ ಭಿಕ್ಖುನಿಯಾ ಅನ್ತರಘರಂ ಪವಿಟ್ಠಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಭುಞ್ಜತಿ, ಆಪತ್ತಿ ಪಾಟಿದೇಸನೀಯಸ್ಸ – ಪಠಮೇನ ಆಪತ್ತಿಸಮುಟ್ಠಾನೇನ ಇಮಾ ಪಞ್ಚ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ? ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಛನ್ನಂ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠನ್ತಿ? ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ? ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಪಞ್ಚಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ಪಾಟಿದೇಸನೀಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಸಮುಟ್ಠನ್ತಿ, ನ ವಾಚತೋ ನ ಚಿತ್ತತೋ. ಚತುನ್ನಂ ಅಧಿಕರಣಾನಂ ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೨೭೮. ದುತಿಯೇನ ಆಪತ್ತಿಸಮುಟ್ಠಾನೇನ ಕತಿ ಆಪತ್ತಿಯೋ ಆಪಜ್ಜತಿ? ದುತಿಯೇನ ಆಪತ್ತಿಸಮುಟ್ಠಾನೇನ ಚತಸ್ಸೋ ಆಪತ್ತಿಯೋ ಆಪಜ್ಜತಿ – ಭಿಕ್ಖು ಕಪ್ಪಿಯಸಞ್ಞೀ ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಪಯೋಗೇ ದುಕ್ಕಟಂ; ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ; ತಸ್ಮಿಂ ಪಿಣ್ಡೇ ಆಗತೇ ಆಪತ್ತಿ ಸಙ್ಘಾದಿಸೇಸಸ್ಸ. ಭಿಕ್ಖು ಕಪ್ಪಿಯಸಞ್ಞೀ ಅನುಪಸಮ್ಪನ್ನಂ ಪದಸೋ ಧಮ್ಮಂ ವಾಚೇತಿ, ಆಪತ್ತಿ ಪಾಚಿತ್ತಿಯಸ್ಸ – ದುತಿಯೇನ ಆಪತ್ತಿಸಮುಟ್ಠಾನೇನ ಇಮಾ ಚತಸ್ಸೋ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ…ಪೇ… ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಚತೂಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ವಾಚತೋ ಸಮುಟ್ಠನ್ತಿ, ನ ಕಾಯತೋ ನ ಚಿತ್ತತೋ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೨೭೯. ತತಿಯೇನ ಆಪತ್ತಿಸಮುಟ್ಠಾನೇನ ಕತಿ ಆಪತ್ತಿಯೋ ಆಪಜ್ಜತಿ? ತತಿಯೇನ ಆಪತ್ತಿಸಮುಟ್ಠಾನೇನ ಪಞ್ಚ ಆಪತ್ತಿಯೋ ಆಪಜ್ಜತಿ. ಭಿಕ್ಖು ಕಪ್ಪಿಯಸಞ್ಞೀ ಸಂವಿದಹಿತ್ವಾ ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಪಯೋಗೇ ದುಕ್ಕಟಂ; ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ; ತಸ್ಮಿಂ ಪಿಣ್ಡೇ ಆಗತೇ ಆಪತ್ತಿ ಸಙ್ಘಾದಿಸೇಸಸ್ಸ. ಭಿಕ್ಖು ಕಪ್ಪಿಯಸಞ್ಞೀ ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ. ಭಿಕ್ಖು ಕಪ್ಪಿಯಸಞ್ಞೀ ಭಿಕ್ಖುನಿಯಾ ವೋಸಾಸನ್ತಿಯಾ ನ ನಿವಾರೇತ್ವಾ ಭುಞ್ಜತಿ, ಆಪತ್ತಿ ಪಾಟಿದೇಸನೀಯಸ್ಸ – ತತಿಯೇನ ಆಪತ್ತಿಸಮುಟ್ಠಾನೇನ ಇಮಾ ಪಞ್ಚ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ…ಪೇ… ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಪಞ್ಚಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ಪಾಟಿದೇಸನೀಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಚ ವಾಚತೋ ಚ ಸಮುಟ್ಠನ್ತಿ, ನ ಚಿತ್ತತೋ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೨೮೦. ಚತುತ್ಥೇನ ಆಪತ್ತಿಸಮುಟ್ಠಾನೇನ ಕತಿ ಆಪತ್ತಿಯೋ ಆಪಜ್ಜತಿ? ಚತುತ್ಥೇನ ಆಪತ್ತಿಸಮುಟ್ಠಾನೇನ ಛ ಆಪತ್ತಿಯೋ ಆಪಜ್ಜತಿ – ಭಿಕ್ಖು ಮೇಥುನಂ ಧಮ್ಮಂ ಪಟಿಸೇವತಿ, ಆಪತ್ತಿ ಪಾರಾಜಿಕಸ್ಸ; ಭಿಕ್ಖು ಅಕಪ್ಪಿಯಸಞ್ಞೀ ಸಞ್ಞಾಚಿಕಾಯ ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಪಯೋಗೇ ದುಕ್ಕಟಂ; ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ; ತಸ್ಮಿಂ ಪಿಣ್ಡೇ ಆಗತೇ ಆಪತ್ತಿ ಸಙ್ಘಾದಿಸೇಸಸ್ಸ. ಭಿಕ್ಖು ಅಕಪ್ಪಿಯಸಞ್ಞೀ ವಿಕಾಲೇ ಭೋಜನಂ ಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ. ಭಿಕ್ಖು ಅಕಪ್ಪಿಯಸಞ್ಞೀ ಅಞ್ಞಾತಿಕಾಯ ಭಿಕ್ಖುನಿಯಾ ಅನ್ತರಘರಂ ಪವಿಟ್ಠಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಭುಞ್ಜತಿ, ಆಪತ್ತಿ ಪಾಟಿದೇಸನೀಯಸ್ಸ. ಚತುತ್ಥೇನ ಆಪತ್ತಿಸಮುಟ್ಠಾನೇನ ಇಮಾ ಛ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ…ಪೇ… ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಛಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ಪಾಟಿದೇಸನೀಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಚ ಚಿತ್ತತೋ ಚ ಸಮುಟ್ಠನ್ತಿ, ನ ವಾಚತೋ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೨೮೧. ಪಞ್ಚಮೇನ ಆಪತ್ತಿಸಮುಟ್ಠಾನೇನ ಕತಿ ಆಪತ್ತಿಯೋ ಆಪಜ್ಜತಿ? ಪಞ್ಚಮೇನ ಆಪತ್ತಿಸಮುಟ್ಠಾನೇನ ಛ ಆಪತ್ತಿಯೋ ಆಪಜ್ಜತಿ. ಭಿಕ್ಖು ಪಾಪಿಚ್ಛೋ ಇಚ್ಛಾಪಕತೋ ಅಸನ್ತಂ ಅಭೂತಂ ಉತ್ತರಿಮನುಸ್ಸಧಮ್ಮಂ ಉಲ್ಲಪತಿ, ಆಪತ್ತಿ ಪಾರಾಜಿಕಸ್ಸ; ಭಿಕ್ಖು ಅಕಪ್ಪಿಯಸಞ್ಞೀ ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಪಯೋಗೇ ದುಕ್ಕಟಂ; ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ; ತಸ್ಮಿಂ ಪಿಣ್ಡೇ ಆಗತೇ ಆಪತ್ತಿ ಸಙ್ಘಾದಿಸೇಸಸ್ಸ. ಭಿಕ್ಖು ಅಕಪ್ಪಿಯಸಞ್ಞೀ ಅನುಪಸಮ್ಪನ್ನಂ ಪದಸೋ ಧಮ್ಮಂ ವಾಚೇತಿ, ಆಪತ್ತಿ ಪಾಚಿತ್ತಿಯಸ್ಸ. ನ ಖುಂಸೇತುಕಾಮೋ ನ ವಮ್ಭೇತುಕಾಮೋ ನ ಮಙ್ಕುಕತ್ತುಕಾಮೋ ದವಕಮ್ಯತಾ ಹೀನೇನ ಹೀನಂ ವದೇತಿ, ಆಪತ್ತಿ ದುಬ್ಭಾಸಿತಸ್ಸ – ಪಞ್ಚಮೇನ ಆಪತ್ತಿಸಮುಟ್ಠಾನೇನ ಇಮಾ ಛ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ…ಪೇ… ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಛಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ, ಸಿಯಾ ದುಬ್ಭಾಸಿತಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ, ನ ಕಾಯತೋ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ.

೨೮೨. ಛಟ್ಠೇನ ಆಪತ್ತಿಸಮುಟ್ಠಾನೇನ ಕತಿ ಆಪತ್ತಿಯೋ ಆಪಜ್ಜತಿ? ಛಟ್ಠೇನ ಆಪತ್ತಿಸಮುಟ್ಠಾನೇನ ಛ ಆಪತ್ತಿಯೋ ಆಪಜ್ಜತಿ – ಭಿಕ್ಖು ಸಂವಿದಹಿತ್ವಾ ಭಣ್ಡಂ ಅವಹರತಿ, ಆಪತ್ತಿ ಪಾರಾಜಿಕಸ್ಸ; ಭಿಕ್ಖು ಅಕಪ್ಪಿಯಸಞ್ಞೀ ಸಂವಿದಹಿತ್ವಾ ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಪಯೋಗೇ ದುಕ್ಕಟಂ; ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ; ತಸ್ಮಿಂ ಪಿಣ್ಡೇ ಆಗತೇ, ಆಪತ್ತಿ ಸಙ್ಘಾದಿಸೇಸಸ್ಸ. ಭಿಕ್ಖು ಅಕಪ್ಪಿಯಸಞ್ಞೀ ಪಣೀತಭೋಜನಾನಿ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾ ಭುಞ್ಜತಿ, ಆಪತ್ತಿ ಪಾಚಿತ್ತಿಯಸ್ಸ. ಭಿಕ್ಖು ಅಕಪ್ಪಿಯಸಞ್ಞೀ ಭಿಕ್ಖುನಿಯಾ ವೋಸಾಸನ್ತಿಯಾ ನ ನಿವಾರೇತ್ವಾ ಭುಞ್ಜತಿ, ಆಪತ್ತಿ ಪಾಟಿದೇಸನೀಯಸ್ಸ – ಛಟ್ಠೇನ ಆಪತ್ತಿಸಮುಟ್ಠಾನೇನ ಇಮಾ ಛ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ? ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಛನ್ನಂ ಆಪತ್ತಿಸಮುಟ್ಠಾನಾನಂ ಕತಿಹಿ ಆಪತ್ತಿಸಮುಟ್ಠಾನೇಹಿ ಸಮುಟ್ಠನ್ತಿ? ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ? ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಛಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ಪಾಟಿದೇಸನೀಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚಾತಿ.

ಛನ್ನಂ ಆಪತ್ತಿಸಮುಟ್ಠಾನಾನಂ

ಕತಾಪತ್ತಿವಾರೋ ನಿಟ್ಠಿತೋ ದುತಿಯೋ.