೨೧. ಭಜತಿವಾರೋ

೩೧೮. ವಿವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಭಜತಿ? ಕತಮಂ ಅಧಿಕರಣಂ ಉಪನಿಸ್ಸಿತಂ? ಕತಮಂ ಅಧಿಕರಣಂ ಪರಿಯಾಪನ್ನಂ? ಕತಮೇನ ಅಧಿಕರಣೇನ ಸಙ್ಗಹಿತಂ?

ಅನುವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಭಜತಿ? ಕತಮಂ ಅಧಿಕರಣಂ ಉಪನಿಸ್ಸಿತಂ? ಕತಮಂ ಅಧಿಕರಣಂ ಪರಿಯಾಪನ್ನಂ? ಕತಮೇನ ಅಧಿಕರಣೇನ ಸಙ್ಗಹಿತಂ?

ಆಪತ್ತಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಭಜತಿ? ಕತಮಂ ಅಧಿಕರಣಂ ಉಪನಿಸ್ಸಿತಂ? ಕತಮಂ ಅಧಿಕರಣಂ ಪರಿಯಾಪನ್ನಂ? ಕತಮೇನ ಅಧಿಕರಣೇನ ಸಙ್ಗಹಿತಂ?

ಕಿಚ್ಚಾಧಿಕರಣಂ ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ ಭಜತಿ? ಕತಮಂ ಅಧಿಕರಣಂ ಉಪನಿಸ್ಸಿತಂ? ಕತಮಂ ಅಧಿಕರಣಂ ಪರಿಯಾಪನ್ನಂ? ಕತಮೇನ ಅಧಿಕರಣೇನ ಸಙ್ಗಹಿತಂ?

ವಿವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ವಿವಾದಾಧಿಕರಣಂ ಭಜತಿ, ವಿವಾದಾಧಿಕರಣಂ ಉಪನಿಸ್ಸಿತಂ, ವಿವಾದಾಧಿಕರಣಂ ಪರಿಯಾಪನ್ನಂ, ವಿವಾದಾಧಿಕರಣೇನ ಸಙ್ಗಹಿತಂ.

ಅನುವಾದಾಧಿಕರಣಂ ಚತುನ್ನಂ ಅಧಿಕರಣಾನಂ ಅನುವಾದಾಧಿಕರಣಂ ಭಜತಿ, ಅನುವಾದಾಧಿಕರಣಂ ಉಪನಿಸ್ಸಿತಂ, ಅನುವಾದಾಧಿಕರಣಂ ಪರಿಯಾಪನ್ನಂ, ಅನುವಾದಾಧಿಕರಣೇನ ಸಙ್ಗಹಿತಂ.

ಆಪತ್ತಾಧಿಕರಣಂ ಚತುನ್ನಂ ಅಧಿಕರಣಾನಂ ಆಪತ್ತಾಧಿಕರಣಂ ಭಜತಿ, ಆಪತ್ತಾಧಿಕರಣಂ ಉಪನಿಸ್ಸಿತಂ, ಆಪತ್ತಾಧಿಕರಣಂ ಪರಿಯಾಪನ್ನಂ, ಆಪತ್ತಾಧಿಕರಣೇನ ಸಙ್ಗಹಿತಂ.

ಕಿಚ್ಚಾಧಿಕರಣಂ ಚತುನ್ನಂ ಅಧಿಕರಣಾನಂ ಕಿಚ್ಚಾಧಿಕರಣಂ ಭಜತಿ, ಕಿಚ್ಚಾಧಿಕರಣಂ ಉಪನಿಸ್ಸಿತಂ, ಕಿಚ್ಚಾಧಿಕರಣಂ ಪರಿಯಾಪನ್ನಂ, ಕಿಚ್ಚಾಧಿಕರಣೇನ ಸಙ್ಗಹಿತಂ.

೩೧೯. ವಿವಾದಾಧಿಕರಣಂ ಸತ್ತನ್ನಂ ಸಮಥಾನಂ ಕತಿ ಸಮಥೇ ಭಜತಿ, ಕತಿ ಸಮಥೇ ಉಪನಿಸ್ಸಿತಂ, ಕತಿ ಸಮಥೇ ಪರಿಯಾಪನ್ನಂ, ಕತಿಹಿ ಸಮಥೇಹಿ ಸಙ್ಗಹಿತಂ, ಕತಿಹಿ ಸಮಥೇಹಿ ಸಮ್ಮತಿ?

ಅನುವಾದಾಧಿಕರಣಂ ಸತ್ತನ್ನಂ ಸಮಥಾನಂ ಕತಿ ಸಮಥೇ ಭಜತಿ, ಕತಿ ಸಮಥೇ ಉಪನಿಸ್ಸಿತಂ, ಕತಿ ಸಮಥೇ ಪರಿಯಾಪನ್ನಂ, ಕತಿಹಿ ಸಮಥೇಹಿ ಸಙ್ಗಹಿತಂ, ಕತಿಹಿ ಸಮಥೇಹಿ ಸಮ್ಮತಿ?

ಆಪತ್ತಾಧಿಕರಣಂ ಸತ್ತನ್ನಂ ಸಮಥಾನಂ ಕತಿ ಸಮಥೇ ಭಜತಿ, ಕತಿ ಸಮಥೇ ಉಪನಿಸ್ಸಿತಂ, ಕತಿ ಸಮಥೇ ಪರಿಯಾಪನ್ನಂ, ಕತಿಹಿ ಸಮಥೇಹಿ ಸಙ್ಗಹಿತಂ, ಕತಿಹಿ ಸಮಥೇಹಿ ಸಮ್ಮತಿ?

ಕಿಚ್ಚಾಧಿಕರಣಂ ಸತ್ತನ್ನಂ ಸಮಥಾನಂ ಕತಿ ಸಮಥೇ ಭಜತಿ, ಕತಿ ಸಮಥೇ ಉಪನಿಸ್ಸಿತಂ, ಕತಿ ಸಮಥೇ ಪರಿಯಾಪನ್ನಂ, ಕತಿಹಿ ಸಮಥೇಹಿ ಸಙ್ಗಹಿತಂ, ಕತಿಹಿ ಸಮಥೇಹಿ ಸಮ್ಮತಿ?

ವಿವಾದಾಧಿಕರಣಂ ಸತ್ತನ್ನಂ ಸಮಥಾನಂ ದ್ವೇ ಸಮಥೇ ಭಜತಿ, ದ್ವೇ ಸಮಥೇ ಉಪನಿಸ್ಸಿತಂ, ದ್ವೇ ಸಮಥೇ ಪರಿಯಾಪನ್ನಂ, ದ್ವೀಹಿ ಸಮಥೇಹಿ ಸಙ್ಗಹಿತಂ, ದ್ವೀಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ.

ಅನುವಾದಾಧಿಕರಣಂ ಸತ್ತನ್ನಂ ಸಮಥಾನಂ ಚತ್ತಾರೋ ಸಮಥೇ ಭಜತಿ, ಚತ್ತಾರೋ ಸಮಥೇ ಉಪನಿಸ್ಸಿತಂ, ಚತ್ತಾರೋ ಸಮಥೇ ಪರಿಯಾಪನ್ನಂ, ಚತೂಹಿ ಸಮಥೇಹಿ ಸಙ್ಗಹಿತಂ, ಚತೂಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ.

ಆಪತ್ತಾಧಿಕರಣಂ ಸತ್ತನ್ನಂ ಸಮಥಾನಂ ತಯೋ ಸಮಥೇ ಭಜತಿ, ತಯೋ ಸಮಥೇ ಉಪನಿಸ್ಸಿತಂ, ತಯೋ ಸಮಥೇ ಪರಿಯಾಪನ್ನಂ, ತೀಹಿ ಸಮಥೇಹಿ ಸಙ್ಗಹಿತಂ ತೀಹಿ ಸಮಥೇಹಿ ಸಮ್ಮತಿ – ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ತಿಣವತ್ಥಾರಕೇನ ಚ.

ಕಿಚ್ಚಾಧಿಕರಣಂ ಸತ್ತನ್ನಂ ಸಮಥಾನಂ ಏಕಂ ಸಮಥಂ ಭಜತಿ, ಏಕಂ ಸಮಥಂ ಉಪನಿಸ್ಸಿತಂ, ಏಕಂ ಸಮಥಂ ಪರಿಯಾಪನ್ನಂ, ಏಕೇನ ಸಮಥೇನ ಸಙ್ಗಹಿತಂ, ಏಕೇನ ಸಮಥೇನ ಸಮ್ಮತಿ – ಸಮ್ಮುಖಾವಿನಯೇನಾತಿ.

ಭಜತಿವಾರೋ ನಿಟ್ಠಿತೋ ಏಕವೀಸತಿಮೋ.

ಸಮಥಭೇದೋ ನಿಟ್ಠಿತೋ.

ತಸ್ಸುದ್ದಾನಂ –

ಅಧಿಕರಣಂ ಪರಿಯಾಯಂ, ಸಾಧಾರಣಾ ಚ ಭಾಗಿಯಾ;

ಸಮಥಾ ಸಾಧಾರಣಿಕಾ, ಸಮಥಸ್ಸ ತಬ್ಭಾಗಿಯಾ.

ಸಮಥಾ ಸಮ್ಮುಖಾ ಚೇವ, ವಿನಯೇನ ಕುಸಲೇನ ಚ;

ಯತ್ಥ ಸಮಥಸಂಸಟ್ಠಾ, ಸಮ್ಮನ್ತಿ ನ ಸಮ್ಮನ್ತಿ ಚ.

ಸಮಥಾಧಿಕರಣಞ್ಚೇವ, ಸಮುಟ್ಠಾನಂ ಭಜನ್ತಿ ಚಾತಿ.