೧೯. ಸಮಥಾಧಿಕರಣವಾರೋ

೩೦೯. ಸಮಥಾ ಸಮಥೇಹಿ ಸಮ್ಮನ್ತಿ? ಸಮಥಾ ಅಧಿಕರಣೇಹಿ ಸಮ್ಮನ್ತಿ? ಅಧಿಕರಣಾ ಸಮಥೇಹಿ ಸಮ್ಮನ್ತಿ? ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ?

ಸಿಯಾ ಸಮಥಾ ಸಮಥೇಹಿ ಸಮ್ಮನ್ತಿ, ಸಿಯಾ ಸಮಥಾ ಸಮಥೇಹಿ ನ ಸಮ್ಮನ್ತಿ. ಸಿಯಾ ಸಮಥಾ ಅಧಿಕರಣೇಹಿ ಸಮ್ಮನ್ತಿ, ಸಿಯಾ ಸಮಥಾ ಅಧಿಕರಣೇಹಿ ನ ಸಮ್ಮನ್ತಿ. ಸಿಯಾ ಅಧಿಕರಣಾ ಸಮಥೇಹಿ ಸಮ್ಮನ್ತಿ, ಸಿಯಾ ಅಧಿಕರಣಾ ಸಮಥೇಹಿ ನ ಸಮ್ಮನ್ತಿ. ಸಿಯಾ ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ, ಸಿಯಾ ಅಧಿಕರಣಾ ಅಧಿಕರಣೇಹಿ ನ ಸಮ್ಮನ್ತಿ.

೩೧೦. ಕಥಂ ಸಿಯಾ ಸಮಥಾ ಸಮಥೇಹಿ ಸಮ್ಮನ್ತಿ, ಕಥಂ ಸಿಯಾ ಸಮಥಾ ಸಮಥೇಹಿ ನ ಸಮ್ಮನ್ತಿ? ಯೇಭುಯ್ಯಸಿಕಾ ಸಮ್ಮುಖಾವಿನಯೇನ ಸಮ್ಮತಿ; ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ.

ಸತಿವಿನಯೋ ಸಮ್ಮುಖಾವಿನಯೇನ ಸಮ್ಮತಿ; ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮಾತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ.

ಅಮೂಳ್ಹವಿನಯೋ ಸಮ್ಮುಖಾವಿನಯೇನ ಸಮ್ಮತಿ; ಪಟಿಞ್ಞಾತಕರಣೇನ ನ ಸಮ್ಮತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ.

ಪಟಿಞ್ಞಾತಕರಣಂ ಸಮ್ಮುಖಾವಿನಯೇನ ಸಮ್ಮತಿ; ತಸ್ಸಪಾಪಿಯಸಿಕಾಯ ನ ಸಮ್ಮತಿ, ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ.

ತಸ್ಸಪಾಪಿಯಸಿಕಾ ಸಮ್ಮುಖಾವಿನಯೇನ ಸಮ್ಮತಿ; ತಿಣವತ್ಥಾರಕೇನ ನ ಸಮ್ಮತಿ, ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮತಿ.

ತಿಣವತ್ಥಾರಕೋ ಸಮ್ಮುಖಾವಿನಯೇನ ಸಮ್ಮತಿ; ಯೇಭುಯ್ಯಸಿಕಾಯ ನ ಸಮ್ಮತಿ, ಸತಿವಿನಯೇನ ನ ಸಮ್ಮತಿ, ಅಮೂಳ್ಹವಿನಯೇನ ನ ಸಮ್ಮತಿ, ಪಟಿಞ್ಞಾತಕರಣೇನ ನ ಸಮ್ಮತಿ, ತಸ್ಸಪಾಪಿಯಸಿಕಾಯ ನ ಸಮ್ಮತಿ. ಏವಂ ಸಿಯಾ ಸಮಥಾ ಸಮಥೇಹಿ ಸಮ್ಮನ್ತಿ. ಏವಂ ಸಿಯಾ ಸಮಥಾ ಸಮಥೇಹಿ ನ ಸಮ್ಮನ್ತಿ.

೩೧೧. ಕಥಂ ಸಿಯಾ ಸಮಥಾ ಅಧಿಕರಣೇಹಿ ಸಮ್ಮನ್ತಿ, ಕಥಂ ಸಿಯಾ ಸಮಥಾ ಅಧಿಕರಣೇಹಿ ನ ಸಮ್ಮನ್ತಿ? ಸಮ್ಮುಖಾವಿನಯೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಯೇಭುಯ್ಯಸಿಕಾ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಸತಿವಿನಯೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಅಮೂಳ್ಹವಿನಯೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಪಟಿಞ್ಞಾತಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ತಸ್ಸಪಾಪಿಯಸಿಕಾ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ತಿಣವತ್ಥಾರಕೋ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ. ಏವಂ ಸಿಯಾ ಸಮಥಾ ಅಧಿಕರಣೇಹಿ ಸಮ್ಮನ್ತಿ. ಏವಂ ಸಿಯಾ ಸಮಥಾ ಅಧಿಕರಣೇಹಿ ನ ಸಮ್ಮನ್ತಿ.

೩೧೨. ಕಥಂ ಸಿಯಾ ಅಧಿಕರಣಾ ಸಮಥೇಹಿ ಸಮ್ಮನ್ತಿ, ಕಥಂ ಸಿಯಾ ಅಧಿಕರಣಾ ಸಮಥೇಹಿ ನ ಸಮ್ಮನ್ತಿ? ವಿವಾದಾಧಿಕರಣಂ ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಸಮ್ಮತಿ; ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ಚ ತಿಣವತ್ಥಾರಕೇನ ಚ ನ ಸಮ್ಮತಿ.

ಅನುವಾದಾಧಿಕರಣಂ ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ ಸಮ್ಮತಿ; ಯೇಭುಯ್ಯಸಿಕಾಯ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ ನ ಸಮ್ಮತಿ.

ಆಪತ್ತಾಧಿಕರಣಂ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ ತಿಣವತ್ಥಾರಕೇನ ಚ ಸಮ್ಮತಿ; ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ತಸ್ಸಪಾಪಿಯಸಿಕಾಯ ಚ ನ ಸಮ್ಮತಿ.

ಕಿಚ್ಚಾಧಿಕರಣಂ ಸಮ್ಮುಖಾವಿನಯೇನ ಸಮ್ಮತಿ; ಯೇಭುಯ್ಯಸಿಕಾಯ ಚ ಸತಿವಿನಯೇನ ಚ ಅಮೂಳ್ಹವಿನಯೇನ ಚ ಪಟಿಞ್ಞಾತಕರಣೇನ ಚ ತಸ್ಸಪಾಪಿಯಸಿಕಾಯ ತಿಣವತ್ಥಾರಕೇನ ಚ ನ ಸಮ್ಮತಿ. ಏವಂ ಸಿಯಾ ಅಧಿಕರಣಾ ಸಮಥೇಹಿ ಸಮ್ಮನ್ತಿ. ಏವಂ ಸಿಯಾ ಅಧಿಕರಣಾ ಸಮಥೇಹಿ ನ ಸಮ್ಮನ್ತಿ.

೩೧೩. ಕಥಂ ಸಿಯಾ ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ? ಕಥಂ ಸಿಯಾ ಅಧಿಕರಣಾ ಅಧಿಕರಣೇಹಿ ನ ಸಮ್ಮನ್ತಿ? ವಿವಾದಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಅನುವಾದಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಆಪತ್ತಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ.

ಕಿಚ್ಚಾಧಿಕರಣಂ ವಿವಾದಾಧಿಕರಣೇನ ನ ಸಮ್ಮತಿ, ಅನುವಾದಾಧಿಕರಣೇನ ನ ಸಮ್ಮತಿ, ಆಪತ್ತಾಧಿಕರಣೇನ ನ ಸಮ್ಮತಿ; ಕಿಚ್ಚಾಧಿಕರಣೇನ ಸಮ್ಮತಿ. ಏವಂ ಸಿಯಾ ಅಧಿಕರಣಾ ಅಧಿಕರಣೇಹಿ ಸಮ್ಮನ್ತಿ. ಏವಂ ಸಿಯಾ ಅಧಿಕರಣಾ ಅಧಿಕರಣೇಹಿ ನ ಸಮ್ಮನ್ತಿ.

ಛಾಪಿ ಸಮಥಾ ಚತ್ತಾರೋಪಿ ಅಧಿಕರಣಾ ಸಮ್ಮುಖಾವಿನಯೇನ ಸಮ್ಮನ್ತಿ; ಸಮ್ಮುಖಾವಿನಯೋ ನ ಕೇನಚಿ ಸಮ್ಮತಿ.

ಸಮಥಾಧಿಕರಣವಾರೋ ನಿಟ್ಠಿತೋ ಏಕೂನವೀಸತಿಮೋ.