೧೫. ಸಮಥವಾರೋ, ವಿಸ್ಸಜ್ಜನಾವಾರೋ

೩೦೫. ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ಯೇಭುಯ್ಯಸಿಕಾಯ ಚ ಅಧಿಕರಣಂ ವೂಪಸಮ್ಮತಿ, ಯತ್ಥ ಯೇಭುಯ್ಯಸಿಕಾ ಲಬ್ಭತಿ ತತ್ಥ ಸಮ್ಮುಖಾವಿನಯೋ ಲಬ್ಭತಿ, ಯತ್ಥ ಸಮ್ಮುಖಾವಿನಯೋ ಲಬ್ಭತಿ ತತ್ಥ ಯೇಭುಯ್ಯಸಿಕಾ ಲಬ್ಭತಿ. ನ ತತ್ಥ ಸತಿವಿನಯೋ ಲಬ್ಭತಿ, ನ ತತ್ಥ ಅಮೂಳ್ಹವಿನಯೋ ಲಬ್ಭತಿ, ನ ತತ್ಥ ಪಟಿಞ್ಞಾತಕರಣಂ ಲಬ್ಭತಿ, ನ ತತ್ಥ ತಸ್ಸಪಾಪಿಯಸಿಕಾ ಲಬ್ಭತಿ, ನ ತತ್ಥ ತಿಣವತ್ಥಾರಕೋ ಲಬ್ಭತಿ.

ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ಸತಿವಿನಯೇನ ಚ ಅಧಿಕರಣಂ ವೂಪಸಮ್ಮತಿ, ಯತ್ಥ ಸತಿವಿನಯೋ ಲಬ್ಭತಿ ತತ್ಥ ಸಮ್ಮುಖಾವಿನಯೋ ಲಬ್ಭತಿ, ಯತ್ಥ ಸಮ್ಮುಖಾವಿನಯೋ ಲಬ್ಭತಿ ತತ್ಥ ಸತಿವಿನಯೋ ಲಬ್ಭತಿ. ನ ತತ್ಥ ಅಮೂಳ್ಹವಿನಯೋ ಲಬ್ಭತಿ, ನ ತತ್ಥ ಪಟಿಞ್ಞಾತಕರಣಂ ಲಬ್ಭತಿ, ನ ತತ್ಥ ತಸ್ಸಪಾಪಿಯಸಿಕಾ ಲಬ್ಭತಿ, ನ ತತ್ಥ ತಿಣವತ್ಥಾರಕೋ ಲಬ್ಭತಿ, ನ ತತ್ಥ ಯೇಭುಯ್ಯಸಿಕಾ ಲಬ್ಭತಿ.

ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ಅಮೂಳ್ಹವಿನಯೇನ ಚ ಅಧಿಕರಣಂ ವೂಪಸಮ್ಮತಿ, ಯತ್ಥ ಅಮೂಳ್ಹವಿನಯೋ ಲಬ್ಭತಿ ತತ್ಥ ಸಮ್ಮುಖಾವಿನಯೋ ಲಬ್ಭತಿ, ಯತ್ಥ ಸಮ್ಮುಖಾವಿನಯೋ ಲಬ್ಭತಿ ತತ್ಥ ಅಮೂಳ್ಹವಿನಯೋ ಲಬ್ಭತಿ. ನ ತತ್ಥ ಪಟಿಞ್ಞಾತಕರಣಂ ಲಬ್ಭತಿ, ನ ತತ್ಥ ತಸ್ಸಪಾಪಿಯಸಿಕಾ ಲಬ್ಭತಿ, ನ ತತ್ಥ ತಿಣವತ್ಥಾರಕೋ ಲಬ್ಭತಿ, ನ ತತ್ಥ ಯೇಭುಯ್ಯಸಿಕಾ ಲಬ್ಭತಿ, ನ ತತ್ಥ ಸತಿವಿನಯೋ ಲಬ್ಭತಿ.

ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ ಅಧಿಕರಣಂ ವೂಪಸಮ್ಮತಿ, ಯತ್ಥ ಪಟಿಞ್ಞಾತಕರಣಂ ಲಬ್ಭತಿ ತತ್ಥ ಸಮ್ಮುಖಾವಿನಯೋ ಲಬ್ಭತಿ, ಯತ್ಥ ಸಮ್ಮುಖಾವಿನಯೋ ಲಬ್ಭತಿ ತತ್ಥ ಪಟಿಞ್ಞಾತಕರಣಂ ಲಬ್ಭತಿ. ನ ತತ್ಥ ತಸ್ಸಪಾಪಿಯಸಿಕಾ ಲಬ್ಭತಿ, ನ ತತ್ಥ ತಿಣವತ್ಥಾರಕೋ ಲಬ್ಭತಿ, ನ ತತ್ಥ ಯೇಭುಯ್ಯಸಿಕಾ ಲಬ್ಭತಿ, ನ ತತ್ಥ ಸತಿವಿನಯೋ ಲಬ್ಭತಿ, ನ ತತ್ಥ ಅಮೂಳ್ಹವಿನಯೋ ಲಬ್ಭತಿ.

ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ತಸ್ಸಪಾಪಿಯಸಿಕಾಯ ಚ ಅಧಿಕರಣಂ ವೂಪಸಮ್ಮತಿ, ಯತ್ಥ ತಸ್ಸಪಾಪಿಯಸಿಕಾ ಲಬ್ಭತಿ ತತ್ಥ ಸಮ್ಮುಖಾವಿನಯೋ ಲಬ್ಭತಿ, ಯತ್ಥ ಸಮ್ಮುಖಾವಿನಯೋ ಲಬ್ಭತಿ ತತ್ಥ ತಸ್ಸಪಾಪಿಯಸಿಕಾ ಲಬ್ಭತಿ. ನ ತತ್ಥ ತಿಣವತ್ಥಾರಕೋ ಲಬ್ಭತಿ, ನ ತತ್ಥ ಯೇಭುಯ್ಯಸಿಕಾ ಲಬ್ಭತಿ, ನ ತತ್ಥ ಸತಿವಿನಯೋ ಲಬ್ಭತಿ, ನ ತತ್ಥ ಅಮೂಳ್ಹವಿನಯೋ ಲಬ್ಭತಿ, ನ ತತ್ಥ ಪಟಿಞ್ಞಾತಕರಣಂ ಲಬ್ಭತಿ.

ಯಸ್ಮಿಂ ಸಮಯೇ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ ಅಧಿಕರಣಂ ವೂಪಸಮ್ಮತಿ, ಯತ್ಥ ತಿಣವತ್ಥಾರಕೋ ಲಬ್ಭತಿ ತತ್ಥ ಸಮ್ಮುಖಾವಿನಯೋ ಲಬ್ಭತಿ, ಯತ್ಥ ಸಮ್ಮುಖಾವಿನಯೋ ಲಬ್ಭತಿ ತತ್ಥ ತಿಣವತ್ಥಾರಕೋ ಲಬ್ಭತಿ. ನ ತತ್ಥ ಯೇಭುಯ್ಯಸಿಕಾ ಲಬ್ಭತಿ, ನ ತತ್ಥ ಸತಿವಿನಯೋ ಲಬ್ಭತಿ, ನ ತತ್ಥ ಅಮೂಳ್ಹವಿನಯೋ ಲಬ್ಭತಿ, ನ ತತ್ಥ ಪಟಿಞ್ಞಾತಕರಣಂ ಲಬ್ಭತಿ, ನ ತತ್ಥ ತಸ್ಸಪಾಪಿಯಸಿಕಾ ಲಬ್ಭತಿ.

ಸಮಥವಾರೋ ನಿಟ್ಠಿತೋ ಪನ್ನರಸಮೋ.