೪. ಅವನ್ದನೀಯಪುಗ್ಗಲಾದಿ

೪೭೭. ಕತಿ ಪುಗ್ಗಲಾ ನಾಭಿವಾದೇತಬ್ಬಾ, ಅಞ್ಜಲಿಸಾಮಿಚೇನ ಚ;

ಕತಿನಂ ದುಕ್ಕಟಂ ಹೋತಿ, ಕತಿ ಚೀವರಧಾರಣಾ.

ದಸ ಪುಗ್ಗಲಾ ನಾಭಿವಾದೇತಬ್ಬಾ, ಅಞ್ಜಲಿಸಾಮಿಚೇನ ಚ;

ದಸನ್ನಂ ದುಕ್ಕಟಂ ಹೋತಿ, ದಸ ಚೀವರಧಾರಣಾ.

ಕತಿನಂ ವಸ್ಸಂವುಟ್ಠಾನಂ, ದಾತಬ್ಬಂ ಇಧ ಚೀವರಂ;

ಕತಿನಂ ಭನ್ತೇ ದಾತಬ್ಬಂ, ಕತಿನಞ್ಚೇವ ನ ದಾತಬ್ಬಂ.

ಪಞ್ಚನ್ನಂ ವಸ್ಸಂವುಟ್ಠಾನಂ, ದಾತಬ್ಬಂ ಇಧ ಚೀವರಂ;

ಸತ್ತನ್ನಂ ಸನ್ತೇ ದಾತಬ್ಬಂ, ಸೋಳಸನ್ನಂ ನ ದಾತಬ್ಬಂ.

ಕತಿಸತಂ ರತ್ತಿಸತಂ, ಆಪತ್ತಿಯೋ ಛಾದಯಿತ್ವಾನ;

ಕತಿ ರತ್ತಿಯೋ ವಸಿತ್ವಾನ, ಮುಚ್ಚೇಯ್ಯ ಪಾರಿವಾಸಿಕೋ.

ದಸಸತಂ ರತ್ತಿಸತಂ, ಆಪತ್ತಿಯೋ ಛಾದಯಿತ್ವಾನ;

ದಸ ರತ್ತಿಯೋ ವಸಿತ್ವಾನ, ಮುಚ್ಚೇಯ್ಯ ಪಾರಿವಾಸಿಕೋ.

ಕತಿ ಕಮ್ಮದೋಸಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಸಬ್ಬೇವ ಅಧಮ್ಮಿಕಾ [ಸಬ್ಬೇ ಅಧಮ್ಮಿಕಾ (ಸೀ. ಸ್ಯಾ.)] ಕತಿ.

ದ್ವಾದಸ ಕಮ್ಮದೋಸಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಸಬ್ಬೇವ ಅಧಮ್ಮಿಕಾ [ಸಬ್ಬೇವಾಧಮ್ಮಿಕಾ (ಸೀ.), ಸಬ್ಬೇ ಅಧಮ್ಮಿಕಾ (ಸ್ಯಾ.)] ಕತಾ.

ಕತಿ ಕಮ್ಮಸಮ್ಪತ್ತಿಯೋ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಸಬ್ಬೇವ ಧಮ್ಮಿಕಾ ಕತಿ.

ಚತಸ್ಸೋ ಕಮ್ಮಸಮ್ಪತ್ತಿಯೋ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಸಬ್ಬೇವ ಧಮ್ಮಿಕಾ ಕತಾ.

ಕತಿ ಕಮ್ಮಾನಿ ವುತ್ತಾನಿ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಧಮ್ಮಿಕಾ ಅಧಮ್ಮಿಕಾ ಕತಿ.

ಛ ಕಮ್ಮಾನಿ ವುತ್ತಾನಿ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಏಕೇತ್ಥ ಧಮ್ಮಿಕಾ ಕತಾ;

ಪಞ್ಚ ಅಧಮ್ಮಿಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ಕತಿ ಕಮ್ಮಾನಿ ವುತ್ತಾನಿ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಧಮ್ಮಿಕಾ ಅಧಮ್ಮಿಕಾ ಕತಿ.

ಚತ್ತಾರಿ ಕಮ್ಮಾನಿ ವುತ್ತಾನಿ, ಬುದ್ಧೇನಾದಿಚ್ಚಬನ್ಧುನಾ;

ಚಮ್ಪಾಯಂ ವಿನಯವತ್ಥುಸ್ಮಿಂ, ಏಕೇತ್ಥ ಧಮ್ಮಿಕಾ ಕತಾ;

ತಯೋ ಅಧಮ್ಮಿಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ಯಂ ದೇಸಿತಂನನ್ತಜಿನೇನ ತಾದಿನಾ;

ಆಪತ್ತಿಕ್ಖನ್ಧಾನಿ ವಿವೇಕದಸ್ಸಿನಾ;

ಕತೇತ್ಥ ಸಮ್ಮನ್ತಿ ವಿನಾ ಸಮಥೇಹಿ;

ಪುಚ್ಛಾಮಿ ತಂ ಬ್ರೂಹಿ ವಿಭಙ್ಗಕೋವಿದ.

ಯಂ ದೇಸಿತಂನನ್ತಜಿನೇನ ತಾದಿನಾ;

ಆಪತ್ತಿಕ್ಖನ್ಧಾನಿ ವಿವೇಕದಸ್ಸಿನಾ;

ಏಕೇತ್ಥ ಸಮ್ಮತಿ ವಿನಾ ಸಮಥೇಹಿ;

ಏತಂ ತೇ ಅಕ್ಖಾಮಿ ವಿಭಙ್ಗಕೋವಿದ.

ಕತಿ ಆಪಾಯಿಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ವಿನಯಂ ಪಟಿಜಾನನ್ತಸ್ಸ, ವಿನಯಾನಿ [ವಿಸಯಾನಿ (ಸೀ. ಸ್ಯಾ. ಏವಮುಪರಿಪಿ)] ಸುಣೋಮ ತೇ.

ಛಊನದಿಯಡ್ಢಸತಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ಆಪಾಯಿಕಾ ನೇರಯಿಕಾ, ಕಪ್ಪಟ್ಠಾ ಸಙ್ಘಭೇದಕಾ;

ವಿನಯಂ ಪಟಿಜಾನನ್ತಸ್ಸ, ವಿನಯಾನಿ ಸುಣೋಹಿ ಮೇ.

ಕತಿ ನಾಪಾಯಿಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ವಿನಯಂ ಪಟಿಜಾನನ್ತಸ್ಸ, ವಿನಯಾನಿ ಸುಣೋಮ ತೇ.

ಅಟ್ಠಾರಸ ನಾಪಾಯಿಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ವಿನಯಂ ಪಟಿಜಾನನ್ತಸ್ಸ, ವಿನಯಾನಿ ಸುಣೋಹಿ ಮೇ.

ಕತಿ ಅಟ್ಠಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ವಿನಯಂ ಪಟಿಜಾನನ್ತಸ್ಸ, ವಿನಯಾನಿ ಸುಣೋಮ ತೇ.

ಅಟ್ಠಾರಸ ಅಟ್ಠಕಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ;

ವಿನಯಂ ಪಟಿಜಾನನ್ತಸ್ಸ, ವಿನಯಾನಿ ಸುಣೋಹಿ ಮೇ.