ದುತಿಯಗಾಥಾಸಙ್ಗಣಿಕಂ

೧. ಕಾಯಿಕಾದಿಆಪತ್ತಿ

೪೭೪. ಕತಿ ಆಪತ್ತಿಯೋ ಕಾಯಿಕಾ, ಕತಿ ವಾಚಸಿಕಾ ಕತಾ.

ಛಾದೇನ್ತಸ್ಸ ಕತಿ ಆಪತ್ತಿಯೋ, ಕತಿ ಸಂಸಗ್ಗಪಚ್ಚಯಾ.

ಛಾಪತ್ತಿಯೋ ಕಾಯಿಕಾ, ಛ ವಾಚಸಿಕಾ ಕತಾ;

ಛಾದೇನ್ತಸ್ಸ ತಿಸ್ಸೋ ಆಪತ್ತಿಯೋ, ಪಞ್ಚ ಸಂಸಗ್ಗಪಚ್ಚಯಾ.

ಅರುಣುಗ್ಗೇ ಕತಿ ಆಪತ್ತಿಯೋ, ಕತಿ ಯಾವತತಿಯಕಾ;

ಕತೇತ್ಥ ಅಟ್ಠ ವತ್ಥುಕಾ, ಕತಿಹಿ ಸಬ್ಬಸಙ್ಗಹೋ.

ಅರುಣುಗ್ಗೇ ತಿಸ್ಸೋ ಆಪತ್ತಿಯೋ, ದ್ವೇ ಯಾವತತಿಯಕಾ;

ಏಕೇತ್ಥ ಅಟ್ಠ ವತ್ಥುಕಾ, ಏಕೇನ ಸಬ್ಬಸಙ್ಗಹೋ.

ವಿನಯಸ್ಸ ಕತಿ ಮೂಲಾನಿ, ಯಾನಿ ಬುದ್ಧೇನ ಪಞ್ಞತ್ತಾ;

ವಿನಯಗರುಕಾ ಕತಿ ವುತ್ತಾ, ದುಟ್ಠುಲ್ಲಚ್ಛಾದನಾ ಕತಿ.

ವಿನಯಸ್ಸ ದ್ವೇ ಮೂಲಾನಿ, ಯಾನಿ ಬುದ್ಧೇನ ಪಞ್ಞತ್ತಾ;

ವಿನಯಗರುಕಾ ದ್ವೇ ವುತ್ತಾ, ದ್ವೇ ದುಟ್ಠುಲ್ಲಚ್ಛಾದನಾ.

ಗಾಮನ್ತರೇ ಕತಿ ಆಪತ್ತಿಯೋ, ಕತಿ ನದಿಪಾರಪಚ್ಚಯಾ;

ಕತಿಮಂಸೇಸು ಥುಲ್ಲಚ್ಚಯಂ, ಕತಿಮಂಸೇಸು ದುಕ್ಕಟಂ.

ಗಾಮನ್ತರೇ ಚತಸ್ಸೋ ಆಪತ್ತಿಯೋ, ಚತಸ್ಸೋ ನದಿಪಾರಪಚ್ಚಯಾ;

ಏಕಮಂಸೇ ಥುಲ್ಲಚ್ಚಯಂ, ನವಮಂಸೇಸು ದುಕ್ಕಟಂ.

ಕತಿ ವಾಚಸಿಕಾ ರತ್ತಿಂ, ಕತಿ ವಾಚಸಿಕಾ ದಿವಾ;

ದದಮಾನಸ್ಸ ಕತಿ ಆಪತ್ತಿಯೋ, ಪಟಿಗ್ಗಣ್ಹನ್ತಸ್ಸ ಕಿತ್ತಕಾ.

ದ್ವೇ ವಾಚಸಿಕಾ ರತ್ತಿಂ, ದ್ವೇ ವಾಚಸಿಕಾ ದಿವಾ;

ದದಮಾನಸ್ಸ ತಿಸ್ಸೋ ಆಪತ್ತಿಯೋ, ಚತ್ತಾರೋ ಚ ಪಟಿಗ್ಗಹೇ.

೨. ದೇಸನಾಗಾಮಿನಿಯಾದಿಆಪತ್ತಿ

೪೭೫. ಕತಿ ದೇಸನಾಗಾಮಿನಿಯೋ, ಕತಿ ಸಪ್ಪಟಿಕಮ್ಮಾ ಕತಾ;

ಕತೇತ್ಥ ಅಪ್ಪಟಿಕಮ್ಮಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ಪಞ್ಚ ದೇಸನಾಗಾಮಿನಿಯೋ, ಛ ಸಪ್ಪಟಿಕಮ್ಮಾ ಕತಾ;

ಏಕೇತ್ಥ ಅಪ್ಪಟಿಕಮ್ಮಾ ವುತ್ತಾ, ಬುದ್ಧೇನಾದಿಚ್ಚಬನ್ಧುನಾ.

ವಿನಯಗರುಕಾ ಕತಿ ವುತ್ತಾ, ಕಾಯವಾಚಸಿಕಾನಿ ಚ;

ಕತಿ ವಿಕಾಲೇ ಧಞ್ಞರಸೋ, ಕತಿ ಞತ್ತಿಚತುತ್ಥೇನ ಸಮ್ಮುತಿ.

ವಿನಯಗರುಕಾ ದ್ವೇ ವುತ್ತಾ, ಕಾಯವಾಚಸಿಕಾನಿ ಚ;

ಏಕೋ ವಿಕಾಲೇ ಧಞ್ಞರಸೋ, ಏಕಾ ಞತ್ತಿಚತುತ್ಥೇನ ಸಮ್ಮುತಿ.

ಪಾರಾಜಿಕಾ ಕಾಯಿಕಾ ಕತಿ, ಕತಿ ಸಂವಾಸಕಭೂಮಿಯೋ;

ಕತಿನಂ ರತ್ತಿಚ್ಛೇದೋ, ಪಞ್ಞತ್ತಾ ದ್ವಙ್ಗುಲಾ ಕತಿ.

ಪಾರಾಜಿಕಾ ಕಾಯಿಕಾ ದ್ವೇ, ದ್ವೇ ಸಂವಾಸಕಭೂಮಿಯೋ;

ದ್ವಿನ್ನಂ ರತ್ತಿಚ್ಛೇದೋ, ಪಞ್ಞತ್ತಾ ದ್ವಙ್ಗುಲಾ ದುವೇ.

ಕತತ್ತಾನಂ ವಧಿತ್ವಾನ, ಕತಿಹಿ ಸಙ್ಘೋ ಭಿಜ್ಜತಿ;

ಕತೇತ್ಥ ಪಠಮಾಪತ್ತಿಕಾ, ಞತ್ತಿಯಾ ಕರಣಾ ಕತಿ.

ದ್ವೇ ಅತ್ತಾನಂ ವಧಿತ್ವಾನ, ದ್ವೀಹಿ ಸಙ್ಘೋ ಭಿಜ್ಜತಿ;

ದ್ವೇತ್ಥ ಪಠಮಾಪತ್ತಿಕಾ, ಞತ್ತಿಯಾ ಕರಣಾ ದುವೇ.

ಪಾಣಾತಿಪಾತೇ ಕತಿ ಆಪತ್ತಿಯೋ, ವಾಚಾ ಪಾರಾಜಿಕಾ ಕತಿ;

ಓಭಾಸನಾ ಕತಿ ವುತ್ತಾ, ಸಞ್ಚರಿತ್ತೇನ ವಾ ಕತಿ.

ಪಾಣಾತಿಪಾತೇ ತಿಸ್ಸೋ ಆಪತ್ತಿಯೋ;

ವಾಚಾ ಪಾರಾಜಿಕಾ ತಯೋ;

ಓಭಾಸನಾ ತಯೋ ವುತ್ತಾ;

ಸಞ್ಚರಿತ್ತೇನ ವಾ ತಯೋ.

ಕತಿ ಪುಗ್ಗಲಾ ನ ಉಪಸಮ್ಪಾದೇತಬ್ಬಾ, ಕತಿ ಕಮ್ಮಾನಂ ಸಙ್ಗಹಾ;

ನಾಸಿತಕಾ ಕತಿ ವುತ್ತಾ, ಕತಿನಂ ಏಕವಾಚಿಕಾ.

ತಯೋ ಪುಗ್ಗಲಾ ನ ಉಪಸಮ್ಪಾದೇತಬ್ಬಾ, ತಯೋ ಕಮ್ಮಾನಂ ಸಙ್ಗಹಾ;

ನಾಸಿತಕಾ ತಯೋ ವುತ್ತಾ, ತಿಣ್ಣನ್ನಂ ಏಕವಾಚಿಕಾ.

ಅದಿನ್ನಾದಾನೇ ಕತಿ ಆಪತ್ತಿಯೋ, ಕತಿ ಮೇಥುನಪಚ್ಚಯಾ;

ಛಿನ್ದನ್ತಸ್ಸ ಕತಿ ಆಪತ್ತಿಯೋ, ಕತಿ ಛಡ್ಡಿತಪಚ್ಚಯಾ.

ಅದಿನ್ನಾದಾನೇ ತಿಸ್ಸೋ ಆಪತ್ತಿಯೋ, ಚತಸ್ಸೋ ಮೇಥುನಪಚ್ಚಯಾ;

ಛಿನ್ದನ್ತಸ್ಸ ತಿಸ್ಸೋ ಆಪತ್ತಿಯೋ, ಪಞ್ಚ ಛಡ್ಡಿತಪಚ್ಚಯಾ.

ಭಿಕ್ಖುನೋವಾದಕವಗ್ಗಸ್ಮಿಂ, ಪಾಚಿತ್ತಿಯೇನ ದುಕ್ಕಟಾ;

ಕತೇತ್ಥ ನವಕಾ ವುತ್ತಾ, ಕತಿನಂ ಚೀವರೇನ ಚ.

ಭಿಕ್ಖುನೋವಾದಕವಗ್ಗಸ್ಮಿಂ, ಪಾಚಿತ್ತಿಯೇನ ದುಕ್ಕಟಾ ಕತಾ;

ಚತುರೇತ್ಥ ನವಕಾ ವುತ್ತಾ, ದ್ವಿನ್ನಂ ಚೀವರೇನ ಚ.

ಭಿಕ್ಖುನೀನಞ್ಚ ಅಕ್ಖಾತಾ, ಪಾಟಿದೇಸನಿಯಾ ಕತಿ;

ಭುಞ್ಜನ್ತಾಮಕಧಞ್ಞೇನ, ಪಾಚಿತ್ತಿಯೇನ ದುಕ್ಕಟಾ ಕತಿ.

ಭಿಕ್ಖುನೀನಞ್ಚ ಅಕ್ಖಾತಾ, ಅಟ್ಠ ಪಾಟಿದೇಸನೀಯಾ ಕತಾ;

ಭುಞ್ಜನ್ತಾಮಕಧಞ್ಞೇನ, ಪಾಚಿತ್ತಿಯೇನ ದುಕ್ಕಟಾ ಕತಾ.

ಗಚ್ಛನ್ತಸ್ಸ ಕತಿ ಆಪತ್ತಿಯೋ, ಠಿತಸ್ಸ ಚಾಪಿ ಕಿತ್ತಕಾ;

ನಿಸಿನ್ನಸ್ಸ ಕತಿ ಆಪತ್ತಿಯೋ, ನಿಪನ್ನಸ್ಸಾಪಿ ಕಿತ್ತಕಾ.

ಗಚ್ಛನ್ತಸ್ಸ ಚತಸ್ಸೋ ಆಪತ್ತಿಯೋ, ಠಿತಸ್ಸ ಚಾಪಿ ತತ್ತಕಾ;

ನಿಸಿನ್ನಸ್ಸ ಚತಸ್ಸೋ ಆಪತ್ತಿಯೋ, ನಿಪನ್ನಸ್ಸಾಪಿ ತತ್ತಕಾ.

೩. ಪಾಚಿತ್ತಿಯಂ

೪೭೬. ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ, ಆಪಜ್ಜೇಯ್ಯ ಏಕತೋ.

ಪಞ್ಚ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ, ಆಪಜ್ಜೇಯ್ಯ ಏಕತೋ.