೩. ಪಾಚಿತ್ತಿಯಂ

೪೭೬. ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ, ಆಪಜ್ಜೇಯ್ಯ ಏಕತೋ.

ಪಞ್ಚ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ, ಆಪಜ್ಜೇಯ್ಯ ಏಕತೋ.

ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ, ಆಪಜ್ಜೇಯ್ಯ ಏಕತೋ.

ನ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಅಪುಬ್ಬಂ ಅಚರಿಮಂ, ಆಪಜ್ಜೇಯ್ಯ ಏಕತೋ.

ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಕತಿ ವಾಚಾಯ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ಪಞ್ಚ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಏಕವಾಚಾಯ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಕತಿ ವಾಚಾಯ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ನವ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಏಕವಾಚಾಯ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಕಿಞ್ಚ ಕಿತ್ತೇತ್ವಾ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ಪಞ್ಚ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ವತ್ಥುಂ ಕಿತ್ತೇತ್ವಾ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ಕತಿ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ಕಿಞ್ಚ ಕಿತ್ತೇತ್ವಾ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ನವ ಪಾಚಿತ್ತಿಯಾನಿ, ಸಬ್ಬಾನಿ ನಾನಾವತ್ಥುಕಾನಿ;

ವತ್ಥುಂ ಕಿತ್ತೇತ್ವಾ ದೇಸೇಯ್ಯ, ವುತ್ತಾ ಆದಿಚ್ಚಬನ್ಧುನಾ.

ಯಾವತತಿಯಕೇ ಕತಿ ಆಪತ್ತಿಯೋ, ಕತಿ ವೋಹಾರಪಚ್ಚಯಾ;

ಖಾದನ್ತಸ್ಸ ಕತಿ ಆಪತ್ತಿಯೋ, ಕತಿ ಭೋಜನಪಚ್ಚಯಾ.

ಯಾವತತಿಯಕೇ ತಿಸ್ಸೋ ಆಪತ್ತಿಯೋ, ಛ ವೋಹಾರಪಚ್ಚಯಾ;

ಖಾದನ್ತಸ್ಸ ತಿಸ್ಸೋ ಆಪತ್ತಿಯೋ, ಪಞ್ಚ ಭೋಜನಪಚ್ಚಯಾ.

ಸಬ್ಬಾ ಯಾವತತಿಯಕಾ, ಕತಿ ಠಾನಾನಿ ಗಚ್ಛನ್ತಿ;

ಕತಿನಞ್ಚೇವ ಆಪತ್ತಿ, ಕತಿನಂ ಅಧಿಕರಣೇನ ಚ.

ಸಬ್ಬಾ ಯಾವತತಿಯಕಾ, ಪಞ್ಚ ಠಾನಾನಿ ಗಚ್ಛನ್ತಿ;

ಪಞ್ಚನ್ನಞ್ಚೇವ ಆಪತ್ತಿ, ಪಞ್ಚನ್ನಂ ಅಧಿಕರಣೇನ ಚ.

ಕತಿನಂ ವಿನಿಚ್ಛಯೋ ಹೋತಿ, ಕತಿನಂ ವೂಪಸಮೇನ ಚ;

ಕತಿನಞ್ಚೇವ ಅನಾಪತ್ತಿ, ಕತಿಹಿ ಠಾನೇಹಿ ಸೋಭತಿ.

ಪಞ್ಚನ್ನಂ ವಿನಿಚ್ಛಯೋ ಹೋತಿ, ಪಞ್ಚನ್ನಂ ವೂಪಸಮೇನ ಚ;

ಪಞ್ಚನ್ನಞ್ಚೇವ ಅನಾಪತ್ತಿ, ತೀಹಿ ಠಾನೇಹಿ ಸೋಭತಿ.

ಕತಿ ಕಾಯಿಕಾ ರತ್ತಿಂ, ಕತಿ ಕಾಯಿಕಾ ದಿವಾ;

ನಿಜ್ಝಾಯನ್ತಸ್ಸ ಕತಿ ಆಪತ್ತಿ, ಕತಿ ಪಿಣ್ಡಪಾತಪಚ್ಚಯಾ.

ದ್ವೇ ಕಾಯಿಕಾ ರತ್ತಿಂ, ದ್ವೇ ಕಾಯಿಕಾ ದಿವಾ;

ನಿಜ್ಝಾಯನ್ತಸ್ಸ ಏಕಾ ಆಪತ್ತಿ, ಏಕಾ ಪಿಣ್ಡಪಾತಪಚ್ಚಯಾ.

ಕತಾನಿಸಂಸೇ ಸಮ್ಪಸ್ಸಂ, ಪರೇಸಂ ಸದ್ಧಾಯ ದೇಸಯೇ;

ಉಕ್ಖಿತ್ತಕಾ ಕತಿ ವುತ್ತಾ, ಕತಿ ಸಮ್ಮಾವತ್ತನಾ.

ಅಟ್ಠಾನಿಸಂಸೇ ಸಮ್ಪಸ್ಸಂ, ಪರೇಸಂ ಸದ್ಧಾಯ ದೇಸಯೇ;

ಉಕ್ಖಿತ್ತಕಾ ತಯೋ ವುತ್ತಾ, ತೇಚತ್ತಾಲೀಸ ಸಮ್ಮಾವತ್ತನಾ.

ಕತಿ ಠಾನೇ ಮುಸಾವಾದೋ, ಕತಿ ಪರಮನ್ತಿ ವುಚ್ಚತಿ;

ಕತಿ ಪಾಟಿದೇಸನೀಯಾ, ಕತಿನಂ ದೇಸನಾಯ ಚ.

ಪಞ್ಚ ಠಾನೇ ಮುಸಾವಾದೋ, ಚುದ್ದಸ ಪರಮನ್ತಿ ವುಚ್ಚತಿ;

ದ್ವಾದಸ ಪಾಟಿದೇಸನೀಯಾ, ಚತುನ್ನಂ ದೇಸನಾಯ ಚ.

ಕತಙ್ಗಿಕೋ ಮುಸಾವಾದೋ, ಕತಿ ಉಪೋಸಥಙ್ಗಾನಿ;

ಕತಿ ದೂತೇಯ್ಯಙ್ಗಾನಿ, ಕತಿ ತಿತ್ಥಿಯವತ್ತನಾ.

ಅಟ್ಠಙ್ಗಿಕೋ ಮುಸಾವಾದೋ, ಅಟ್ಠ ಉಪೋಸಥಙ್ಗಾನಿ;

ಅಟ್ಠ ದೂತೇಯ್ಯಙ್ಗಾನಿ, ಅಟ್ಠ ತಿತ್ಥಿಯವತ್ತನಾ.

ಕತಿವಾಚಿಕಾ ಉಪಸಮ್ಪದಾ, ಕತಿನಂ ಪಚ್ಚುಟ್ಠಾತಬ್ಬಂ;

ಕತಿನಂ ಆಸನಂ ದಾತಬ್ಬಂ, ಭಿಕ್ಖುನೋವಾದಕೋ ಕತಿಹಿ.

ಅಟ್ಠವಾಚಿಕಾ ಉಪಸಮ್ಪದಾ, ಅಟ್ಠನ್ನಂ ಪಚ್ಚುಟ್ಠಾತಬ್ಬಂ;

ಅಟ್ಠನ್ನಂ ಆಸನಂ ದಾತಬ್ಬಂ, ಭಿಕ್ಖುನೋವಾದಕೋ ಅಟ್ಠಹಿ.

ಕತಿನಂ ಛೇಜ್ಜಂ ಹೋತಿ, ಕತಿನಂ ಥುಲ್ಲಚ್ಚಯಂ;

ಕತಿನಞ್ಚೇವ ಅನಾಪತ್ತಿ, ಸಬ್ಬೇಸಂ ಏಕವತ್ಥುಕಾ.

ಏಕಸ್ಸ ಛೇಜ್ಜಂ ಹೋತಿ, ಚತುನ್ನಂ ಥುಲ್ಲಚ್ಚಯಂ;

ಚತುನ್ನಞ್ಚೇವ ಅನಾಪತ್ತಿ, ಸಬ್ಬೇಸಂ ಏಕವತ್ಥುಕಾ.

ಕತಿ ಆಘಾತವತ್ಥೂನಿ, ಕತಿಹಿ ಸಙ್ಘೋ ಭಿಜ್ಜತಿ;

ಕತೇತ್ಥ ಪಠಮಾಪತ್ತಿಕಾ, ಞತ್ತಿಯಾ ಕರಣಾ ಕತಿ.

ನವ ಆಘಾತವತ್ಥೂನಿ, ನವಹಿ ಸಙ್ಘೋ ಭಿಜ್ಜತಿ;

ನವೇತ್ಥ ಪಠಮಾಪತ್ತಿಕಾ, ಞತ್ತಿಯಾ ಕರಣಾ ನವ.