೩. ವೋಹಾರವಗ್ಗೋ

೪೨೪. ‘‘ಕತಿಹಿ ನು ಖೋ, ಭನ್ತೇ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬ’’ನ್ತಿ?

‘‘ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಆಪತ್ತಿಂ ನ ಜಾನಾತಿ, ಆಪತ್ತಿಸಮುಟ್ಠಾನಂ ನ ಜಾನಾತಿ, ಆಪತ್ತಿಯಾ ಪಯೋಗಂ ನ ಜಾನಾತಿ, ಆಪತ್ತಿಯಾ ವೂಪಸಮಂ ನ ಜಾನಾತಿ, ಆಪತ್ತಿಯಾ ನ ವಿನಿಚ್ಛಯಕುಸಲೋ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಆಪತ್ತಿಂ ಜಾನಾತಿ, ಆಪತ್ತಿಸಮುಟ್ಠಾನಂ ಜಾನಾತಿ, ಆಪತ್ತಿಯಾ ಪಯೋಗಂ ಜಾನಾತಿ, ಆಪತ್ತಿಯಾ ವೂಪಸಮಂ ಜಾನಾತಿ, ಆಪತ್ತಿಯಾ ವಿನಿಚ್ಛಯಕುಸಲೋ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಅಧಿಕರಣಂ ನ ಜಾನಾತಿ, ಅಧಿಕರಣಸಮುಟ್ಠಾನಂ ನ ಜಾನಾತಿ, ಅಧಿಕರಣಸ್ಸ ಪಯೋಗಂ ನ ಜಾನಾತಿ, ಅಧಿಕರಣಸ್ಸ ವೂಪಸಮಂ ನ ಜಾನಾತಿ, ಅಧಿಕರಣಸ್ಸ ನ ವಿನಿಚ್ಛಯಕುಸಲೋ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಅಧಿಕರಣಂ ಜಾನಾತಿ, ಅಧಿಕರಣಸಮುಟ್ಠಾನಂ ಜಾನಾತಿ, ಅಧಿಕರಣಸ್ಸ ಪಯೋಗಂ ಜಾನಾತಿ, ಅಧಿಕರಣಸ್ಸ ವೂಪಸಮಂ ಜಾನಾತಿ, ಅಧಿಕರಣಸ್ಸ ವಿನಿಚ್ಛಯಕುಸಲೋ ಹೋತಿ – ಇಮೇಹಿ ಖೋ, ಉಪಾಲಿ ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಪಸಯ್ಹಪವತ್ತಾ ಹೋತಿ, ಅನೋಕಾಸಕಮ್ಮಂ ಕಾರೇತ್ವಾ ಪವತ್ತಾ ಹೋತಿ, ನ ಯಥಾಧಮ್ಮೇ ಯಥಾವಿನಯೇ ಯಥಾಪತ್ತಿಯಾ ಚೋದೇತಾ ಹೋತಿ, ನ ಯಥಾಧಮ್ಮೇ ಯಥಾವಿನಯೇ ಯಥಾಪತ್ತಿಯಾ ಕಾರೇತಾ ಹೋತಿ, ನ ಯಥಾದಿಟ್ಠಿಯಾ ಬ್ಯಾಕತಾ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ನ ಪಸಯ್ಹಪವತ್ತಾ ಹೋತಿ, ಓಕಾಸಕಮ್ಮಂ ಕಾರೇತ್ವಾ ಪವತ್ತಾ ಹೋತಿ, ಯಥಾಧಮ್ಮೇ ಯಥಾವಿನಯೇ ಯಥಾಪತ್ತಿಯಾ ಚೋದೇತಾ ಹೋತಿ, ಯಥಾಧಮ್ಮೇ ಯಥಾವಿನಯೇ ಯಥಾಪತ್ತಿಯಾ ಕಾರೇತಾ ಹೋತಿ, ಯಥಾದಿಟ್ಠಿಯಾ ಬ್ಯಾಕತಾ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಆಪತ್ತಾನಾಪತ್ತಿಂ ನ ಜಾನಾತಿ, ಲಹುಕಗರುಕಂ ಆಪತ್ತಿಂ ನ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ನ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ನ ಜಾನಾತಿ, ಸಪ್ಪಟಿಕಮ್ಮಂ ಅಪ್ಪಟಿಕಮ್ಮಂ ಆಪತ್ತಿಂ ನ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಆಪತ್ತಾನಾಪತ್ತಿಂ ಜಾನಾತಿ, ಲಹುಕಗರುಕಂ ಆಪತ್ತಿಂ ಜಾನಾತಿ, ಸಾವಸೇಸಾನವಸೇಸಂ ಆಪತ್ತಿಂ ಜಾನಾತಿ, ದುಟ್ಠುಲ್ಲಾದುಟ್ಠುಲ್ಲಂ ಆಪತ್ತಿಂ ಜಾನಾತಿ, ಸಪ್ಪಟಿಕಮ್ಮಂ ಅಪ್ಪಟಿಕಮ್ಮಂ ಆಪತ್ತಿಂ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಕಮ್ಮಂ ನ ಜಾನಾತಿ, ಕಮ್ಮಸ್ಸ ಕರಣಂ ನ ಜಾನಾತಿ, ಕಮ್ಮಸ್ಸ ವತ್ಥುಂ ನ ಜಾನಾತಿ, ಕಮ್ಮಸ್ಸ ವತ್ತಂ ನ ಜಾನಾತಿ, ಕಮ್ಮಸ್ಸ ವೂಪಸಮಂ ನ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಕಮ್ಮಂ ಜಾನಾತಿ, ಕಮ್ಮಸ್ಸ ಕರಣಂ ಜಾನಾತಿ, ಕಮ್ಮಸ್ಸ ವತ್ಥುಂ ಜಾನಾತಿ, ಕಮ್ಮಸ್ಸ ವತ್ತಂ ಜಾನಾತಿ, ಕಮ್ಮಸ್ಸ ವೂಪಸಮಂ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ವತ್ಥುಂ ನ ಜಾನಾತಿ, ನಿದಾನಂ ನ ಜಾನಾತಿ, ಪಞ್ಞತ್ತಿಂ ನ ಜಾನಾತಿ, ಪದಪಚ್ಚಾಭಟ್ಠಂ ನ ಜಾನಾತಿ, ಅನುಸನ್ಧಿವಚನಪಥಂ ನ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ವತ್ಥುಂ ಜಾನಾತಿ, ನಿದಾನಂ ಜಾನಾತಿ, ಪಞ್ಞತ್ತಿಂ ಜಾನಾತಿ, ಪದಪಚ್ಚಾಭಟ್ಠಂ ಜಾನಾತಿ, ಅನುಸನ್ಧಿವಚನಪಥಂ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ, ಅಲಜ್ಜೀ ಚ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ನ ಛನ್ದಾಗತಿಂ ಗಚ್ಛತಿ, ನ ದೋಸಾಗತಿಂ ಗಚ್ಛತಿ, ನ ಮೋಹಾಗತಿಂ ಗಚ್ಛತಿ, ನ ಭಯಾಗತಿಂ ಗಚ್ಛತಿ, ಲಜ್ಜೀ ಚ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಛನ್ದಾಗತಿಂ ಗಚ್ಛತಿ, ದೋಸಾಗತಿಂ ಗಚ್ಛತಿ, ಮೋಹಾಗತಿಂ ಗಚ್ಛತಿ, ಭಯಾಗತಿಂ ಗಚ್ಛತಿ, ಅಕುಸಲೋ ಚ ಹೋತಿ ವಿನಯೇ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ನ ಛನ್ದಾಗತಿಂ ಗಚ್ಛತಿ, ನ ದೋಸಾಗತಿಂ ಗಚ್ಛತಿ, ನ ಮೋಹಾಗತಿಂ ಗಚ್ಛತಿ, ನ ಭಯಾಗತಿಂ ಗಚ್ಛತಿ, ಕುಸಲೋ ಚ ಹೋತಿ ವಿನಯೇ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಞತ್ತಿಂ ನ ಜಾನಾತಿ, ಞತ್ತಿಯಾ ಕರಣಂ ನ ಜಾನಾತಿ, ಞತ್ತಿಯಾ ಅನುಸ್ಸಾವನಂ ನ ಜಾನಾತಿ, ಞತ್ತಿಯಾ ಸಮಥಂ ನ ಜಾನಾತಿ, ಞತ್ತಿಯಾ ವೂಪಸಮಂ ನ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಞತ್ತಿಂ ಜಾನಾತಿ, ಞತ್ತಿಯಾ ಕರಣಂ ಜಾನಾತಿ, ಞತ್ತಿಯಾ ಅನುಸ್ಸಾವನಂ ಜಾನಾತಿ, ಞತ್ತಿಯಾ ಸಮಥಂ ಜಾನಾತಿ, ಞತ್ತಿಯಾ ವೂಪಸಮಂ ಜಾನಾತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಸುತ್ತಂ ನ ಜಾನಾತಿ, ಸುತ್ತಾನುಲೋಮಂ ನ ಜಾನಾತಿ, ವಿನಯಂ ನ ಜಾನಾತಿ, ವಿನಯಾನುಲೋಮಂ ನ ಜಾನಾತಿ, ನ ಚ ಠಾನಾಠಾನಕುಸಲೋ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಸುತ್ತಂ ಜಾನಾತಿ, ಸುತ್ತಾನುಲೋಮಂ ಜಾನಾತಿ, ವಿನಯಂ ಜಾನಾತಿ, ವಿನಯಾನುಲೋಮಂ ಜಾನಾತಿ, ಠಾನಾಠಾನಕುಸಲೋ ಚ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ.

‘‘ಅಪರೇಹಿಪಿ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಧಮ್ಮಂ ನ ಜಾನಾತಿ, ಧಮ್ಮಾನುಲೋಮಂ ನ ಜಾನಾತಿ, ವಿನಯಂ ನ ಜಾನಾತಿ, ವಿನಯಾನುಲೋಮಂ ನ ಜಾನಾತಿ, ನ ಚ ಪುಬ್ಬಾಪರಕುಸಲೋ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ನ ವೋಹರಿತಬ್ಬಂ. ಪಞ್ಚಹುಪಾಲಿ, ಅಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬಂ. ಕತಮೇಹಿ ಪಞ್ಚಹಿ? ಧಮ್ಮಂ ಜಾನಾತಿ, ಧಮ್ಮಾನುಲೋಮಂ ಜಾನಾತಿ, ವಿನಯಂ ಜಾನಾತಿ, ವಿನಯಾನುಲೋಮಂ ಜಾನಾತಿ, ಪುಬ್ಬಾಪರಕುಸಲೋ ಚ ಹೋತಿ – ಇಮೇಹಿ ಖೋ, ಉಪಾಲಿ, ಪಞ್ಚಹಙ್ಗೇಹಿ ಸಮನ್ನಾಗತೇನ ಭಿಕ್ಖುನಾ ಸಙ್ಘೇ ವೋಹರಿತಬ್ಬ’’ನ್ತಿ.

ವೋಹಾರವಗ್ಗೋ ನಿಟ್ಠಿತೋ ತತಿಯೋ.

ತಸ್ಸುದ್ದಾನಂ –

ಆಪತ್ತಿ ಅಧಿಕರಣಂ, ಪಸಯ್ಹಾಪತ್ತಿ ಜಾನನಾ;

ಕಮ್ಮಂ ವತ್ಥುಂ ಅಲಜ್ಜೀ ಚ, ಅಕುಸಲೋ ಚ ಞತ್ತಿಯಾ;

ಸುತ್ತಂ ನ ಜಾನಾತಿ ಧಮ್ಮಂ, ತತಿಯೋ ವಗ್ಗಸಙ್ಗಹೋತಿ.