೮. ಸಮುಚ್ಚಯವಾರೋ

೨೫೬. ಕಾಯಸಂಸಗ್ಗಂ ಸಾದಿಯನಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ಕಾಯಸಂಸಗ್ಗಂ ಸಾದಿಯನಪಚ್ಚಯಾ ಪಞ್ಚ ಆಪತ್ತಿಯೋ ಆಪಜ್ಜತಿ. ಅವಸ್ಸುತಾ ಭಿಕ್ಖುನೀ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಗಹಣಂ ಸಾದಿಯತಿ, ಆಪತ್ತಿ ಪಾರಾಜಿಕಸ್ಸ; ಭಿಕ್ಖು ಕಾಯೇನ ಕಾಯಂ ಆಮಸತಿ, ಆಪತ್ತಿ ಸಙ್ಘಾದಿಸೇಸಸ್ಸ; ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ; ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ; ಅಙ್ಗುಲಿಪತೋದಕೇ ಪಾಚಿತ್ತಿಯಂ – ಕಾಯಸಂಸಗ್ಗಂ ಸಾದಿಯನಪಚ್ಚಯಾ ಇಮಾ ಪಞ್ಚ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ? ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಛನ್ನಂ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠನ್ತಿ? ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ? ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ದ್ವೇ ವಿಪತ್ತಿಯೋ ಭಜನ್ತಿ – ಸಿಯಾ ಸೀಲವಿಪತ್ತಿಂ, ಸಿಯಾ ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ಪಞ್ಚಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಸಙ್ಘಾದಿಸೇಸಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠನ್ತಿ – ಕಾಯತೋ ಚ ಚಿತ್ತತೋ ಚ ಸಮುಟ್ಠನ್ತಿ, ನ ವಾಚತೋ. ಚತುನ್ನಂ ಅಧಿಕರಣಾನಂ ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚ…ಪೇ….

ದಧಿಂ ವಿಞ್ಞಾಪೇತ್ವಾ ಭುಞ್ಜನಪಚ್ಚಯಾ ಕತಿ ಆಪತ್ತಿಯೋ ಆಪಜ್ಜತಿ? ದಧಿಂ ವಿಞ್ಞಾಪೇತ್ವಾ ಭುಞ್ಜನಪಚ್ಚಯಾ ದ್ವೇ ಆಪತ್ತಿಯೋ ಆಪಜ್ಜತಿ. ಭುಞ್ಜಿಸ್ಸಾಮೀತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಟಿದೇಸನೀಯಸ್ಸ – ದಧಿಂ ವಿಞ್ಞಾಪೇತ್ವಾ ಭುಞ್ಜನಪಚ್ಚಯಾ ಇಮಾ ದ್ವೇ ಆಪತ್ತಿಯೋ ಆಪಜ್ಜತಿ.

ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಕತಿ ವಿಪತ್ತಿಯೋ ಭಜನ್ತಿ? ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಛನ್ನಂ ಆಪತ್ತಿಸಮುಟ್ಠಾನಾನಂ ಕತಿಹಿ ಸಮುಟ್ಠಾನೇಹಿ ಸಮುಟ್ಠನ್ತಿ? ಚತುನ್ನಂ ಅಧಿಕರಣಾನಂ ಕತಮಂ ಅಧಿಕರಣಂ? ಸತ್ತನ್ನಂ ಸಮಥಾನಂ ಕತಿಹಿ ಸಮಥೇಹಿ ಸಮ್ಮನ್ತಿ? ತಾ ಆಪತ್ತಿಯೋ ಚತುನ್ನಂ ವಿಪತ್ತೀನಂ ಏಕಂ ವಿಪತ್ತಿಂ ಭಜನ್ತಿ – ಆಚಾರವಿಪತ್ತಿಂ. ಸತ್ತನ್ನಂ ಆಪತ್ತಿಕ್ಖನ್ಧಾನಂ ದ್ವೀಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾಟಿದೇಸನೀಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ. ಛನ್ನಂ ಆಪತ್ತಿಸಮುಟ್ಠಾನಾನಂ ಚತೂಹಿ ಸಮುಟ್ಠಾನೇಹಿ ಸಮುಟ್ಠನ್ತಿ – ಸಿಯಾ ಕಾಯತೋ ಸಮುಟ್ಠನ್ತಿ, ನ ವಾಚತೋ ನ ಚಿತ್ತತೋ; ಸಿಯಾ ಕಾಯತೋ ಚ ವಾಚತೋ ಚ ಸಮುಟ್ಠನ್ತಿ, ನ ಚಿತ್ತತೋ; ಸಿಯಾ ಕಾಯತೋ ಚ ಚಿತ್ತತೋ ಚ ಸಮುಟ್ಠನ್ತಿ ನ ವಾಚತೋ; ಸಿಯಾ ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠನ್ತಿ. ಚತುನ್ನಂ ಅಧಿಕರಣಾನಂ, ಆಪತ್ತಾಧಿಕರಣಂ. ಸತ್ತನ್ನಂ ಸಮಥಾನಂ ತೀಹಿ ಸಮಥೇಹಿ ಸಮ್ಮನ್ತಿ – ಸಿಯಾ ಸಮ್ಮುಖಾವಿನಯೇನ ಚ ಪಟಿಞ್ಞಾತಕರಣೇನ ಚ, ಸಿಯಾ ಸಮ್ಮುಖಾವಿನಯೇನ ಚ ತಿಣವತ್ಥಾರಕೇನ ಚಾತಿ.

ಸಮುಚ್ಚಯವಾರೋ ನಿಟ್ಠಿತೋ ಅಟ್ಠಮೋ. [ಇಮಸ್ಸಾನನ್ತರಂ ಪೋರಾಣಸೀಹಳಪೋತ್ಥಕೇ ಏವಮ್ಪಿ§ದಿಸ್ಸತಿ –§‘‘ತೇಸಮುದ್ದಾನಂ –§ಕತಿವಾರೋ ಚ ವಿಪತ್ತಿವಾರೋ ಚ, ಸಙ್ಗಹವಾರೋ ಚ ಸಮುಟ್ಠಾನವಾರೋ. ಅಧಿಕರಣವಾರೋ ಚ ಸಮಥವಾರೋ ಚ, ಸಮುಚ್ಚಯವಾರೋ ಚ ಇಮೇ ಸತ್ತ ವಾರಾ. ಆದಿತೋ ಪಞ್ಞತ್ತಿವಾರೇನ ಸಹ ಅಟ್ಠವಾರಾತಿ’’ಇತಿ.]

ಅಟ್ಠ ಪಚ್ಚಯವಾರಾ ನಿಟ್ಠಿತಾ.

ಭಿಕ್ಖುನೀವಿಭಙ್ಗೇ ಸೋಳಸ ಮಹಾವಾರಾ ನಿಟ್ಠಿತಾ.