ಸಮುಟ್ಠಾನಸೀಸಸಙ್ಖೇಪೋ

ಸಮುಟ್ಠಾನಸ್ಸುದ್ದಾನಂ

೨೫೭. ಅನಿಚ್ಚಾ ಸಬ್ಬೇ ಸಙ್ಖಾರಾ, ದುಕ್ಖಾನತ್ತಾ ಚ ಸಙ್ಖತಾ;

ನಿಬ್ಬಾನಞ್ಚೇವ ಪಞ್ಞತ್ತಿ, ಅನತ್ತಾ ಇತಿ ನಿಚ್ಛಯಾ.

ಬುದ್ಧಚನ್ದೇ ಅನುಪ್ಪನ್ನೇ, ಬುದ್ಧಾದಿಚ್ಚೇ ಅನುಗ್ಗತೇ;

ತೇಸಂ ಸಭಾಗಧಮ್ಮಾನಂ, ನಾಮಮತ್ತಂ ನ ನಾಯತಿ.

ದುಕ್ಕರಂ ವಿವಿಧಂ ಕತ್ವಾ, ಪೂರಯಿತ್ವಾನ ಪಾರಮೀ;

ಉಪ್ಪಜ್ಜನ್ತಿ ಮಹಾವೀರಾ, ಚಕ್ಖುಭೂತಾ ಸಬ್ರಹ್ಮಕೇ.

ತೇ ದೇಸಯನ್ತಿ ಸದ್ಧಮ್ಮಂ, ದುಕ್ಖಹಾನಿಂ ಸುಖಾವಹಂ;

ಅಙ್ಗೀರಸೋ ಸಕ್ಯಮುನಿ, ಸಬ್ಬಭೂತಾನುಕಮ್ಪಕೋ.

ಸಬ್ಬಸತ್ತುತ್ತಮೋ ಸೀಹೋ, ಪಿಟಕೇ ತೀಣಿ ದೇಸಯಿ;

ಸುತ್ತನ್ತಮಭಿಧಮ್ಮಞ್ಚ, ವಿನಯಞ್ಚ ಮಹಾಗುಣಂ.

ಏವಂ ನೀಯತಿ ಸದ್ಧಮ್ಮೋ, ವಿನಯೋ ಯದಿ ತಿಟ್ಠತಿ;

ಉಭತೋ ಚ ವಿಭಙ್ಗಾನಿ, ಖನ್ಧಕಾ ಯಾ ಚ ಮಾತಿಕಾ.

ಮಾಲಾ ಸುತ್ತಗುಣೇನೇವ, ಪರಿವಾರೇನ ಗನ್ಥಿತಾ;

ತಸ್ಸೇವ ಪರಿವಾರಸ್ಸ, ಸಮುಟ್ಠಾನಂ ನಿಯತೋ ಕತಂ.

ಸಮ್ಭೇದಂ ನಿದಾನಂ ಚಞ್ಞಂ, ಸುತ್ತೇ ದಿಸ್ಸನ್ತಿ ಉಪರಿ;

ತಸ್ಮಾ ಸಿಕ್ಖೇ ಪರಿವಾರಂ, ಧಮ್ಮಕಾಮೋ ಸುಪೇಸಲೋತಿ.

ತೇರಸಸಮುಟ್ಠಾನಂ

ವಿಭಙ್ಗೇ ದ್ವೀಸು ಪಞ್ಞತ್ತಂ, ಉದ್ದಿಸನ್ತಿ ಉಪೋಸಥೇ;

ಪವಕ್ಖಾಮಿ ಸಮುಟ್ಠಾನಂ, ಯಥಾಞಾಯಂ ಸುಣಾಥ ಮೇ.

ಪಾರಾಜಿಕಂ ಯಂ ಪಠಮಂ, ದುತಿಯಞ್ಚ ತತೋ ಪರಂ;

ಸಞ್ಚರಿತ್ತಾನುಭಾಸನಞ್ಚ, ಅತಿರೇಕಞ್ಚ ಚೀವರಂ.

ಲೋಮಾನಿ ಪದಸೋಧಮ್ಮೋ, ಭೂತಂ ಸಂವಿಧಾನೇನ ಚ;

ಥೇಯ್ಯದೇಸನಚೋರೀ ಚ, ಅನನುಞ್ಞಾತಾಯ ತೇರಸ.

ತೇರಸೇತೇ ಸಮುಟ್ಠಾನ ನಯಾ, ವಿಞ್ಞೂಹಿ ಚಿನ್ತಿತಾ.

ಏಕೇಕಸ್ಮಿಂ ಸಮುಟ್ಠಾನೇ, ಸದಿಸಾ ಇಧ ದಿಸ್ಸರೇ.

೧. ಪಠಮಪಾರಾಜಿಕಸಮುಟ್ಠಾನಂ

೨೫೮. ಮೇಥುನಂ ಸುಕ್ಕಸಂಸಗ್ಗೋ, ಅನಿಯತಾ ಪಠಮಿಕಾ;

ಪುಬ್ಬೂಪಪರಿಪಾಚಿತಾ, ರಹೋ ಭಿಕ್ಖುನಿಯಾ ಸಹ.

ಸಭೋಜನೇ ರಹೋ ದ್ವೇ ಚ, ಅಙ್ಗುಲಿ ಉದಕೇ ಹಸಂ;

ಪಹಾರೇ ಉಗ್ಗಿರೇ ಚೇವ, ತೇಪಞ್ಞಾಸಾ ಚ ಸೇಖಿಯಾ.

ಅಧಕ್ಖಗಾಮಾವಸ್ಸುತಾ, ತಲಮಟ್ಠಞ್ಚ ಸುದ್ಧಿಕಾ;

ವಸ್ಸಂವುಟ್ಠಾ ಚ ಓವಾದಂ, ನಾನುಬನ್ಧೇ ಪವತ್ತಿನಿಂ.

ಛಸತ್ತತಿ ಇಮೇ ಸಿಕ್ಖಾ, ಕಾಯಮಾನಸಿಕಾ ಕತಾ;

ಸಬ್ಬೇ ಏಕಸಮುಟ್ಠಾನಾ, ಪಠಮಂ ಪಾರಾಜಿಕಂ ಯಥಾ.

ಪಠಮಪಾರಾಜಿಕಸಮುಟ್ಠಾನಂ ನಿಟ್ಠಿತಂ.

೨. ದುತಿಯಪಾರಾಜಿಕಸಮುಟ್ಠಾನಂ

೨೫೯. ಅದಿನ್ನಂ ವಿಗ್ಗಹುತ್ತರಿ, ದುಟ್ಠುಲ್ಲಾ ಅತ್ತಕಾಮಿನಂ;

ಅಮೂಲಾ ಅಞ್ಞಭಾಗಿಯಾ, ಅನಿಯತಾ ದುತಿಯಿಕಾ.

ಅಚ್ಛಿನ್ದೇ ಪರಿಣಾಮನೇ, ಮುಸಾ ಓಮಸಪೇಸುಣಾ;

ದುಟ್ಠುಲ್ಲಾ ಪಥವೀಖಣೇ, ಭೂತಂ ಅಞ್ಞಾಯ ಉಜ್ಝಾಪೇ.

ನಿಕ್ಕಡ್ಢನಂ ಸಿಞ್ಚನಞ್ಚ, ಆಮಿಸಹೇತು ಭುತ್ತಾವೀ;

ಏಹಿ ಅನಾದರಿ ಭಿಂಸಾ, ಅಪನಿಧೇ ಚ ಜೀವಿತಂ.

ಜಾನಂ ಸಪ್ಪಾಣಕಂ ಕಮ್ಮಂ, ಊನಸಂವಾಸನಾಸನಾ;

ಸಹಧಮ್ಮಿಕವಿಲೇಖಾ, ಮೋಹೋ ಅಮೂಲಕೇನ ಚ.

ಕುಕ್ಕುಚ್ಚಂ ಧಮ್ಮಿಕಂ ಚೀವರಂ, ದತ್ವಾ [ಕುಕ್ಕುಚ್ಚಂ ಧಮ್ಮಿಕಂ ಚೀವರಂ (ಸೀ.), ಕುಕ್ಕುಚ್ಚಂ ಧಮ್ಮಿಕಂ ದತ್ವಾ (ಸ್ಯಾ.)] ಪರಿಣಾಮೇಯ್ಯ ಪುಗ್ಗಲೇ;

ಕಿಂ ತೇ ಅಕಾಲಂ ಅಚ್ಛಿನ್ದೇ, ದುಗ್ಗಹೀ ನಿರಯೇನ ಚ.

ಗಣಂ ವಿಭಙ್ಗಂ ದುಬ್ಬಲಂ, ಕಥಿನಾಫಾಸುಪಸ್ಸಯಂ;

ಅಕ್ಕೋಸಚಣ್ಡೀ ಮಚ್ಛರೀ, ಗಬ್ಭಿನೀ ಚ ಪಾಯನ್ತಿಯಾ.

ದ್ವೇವಸ್ಸಂ ಸಿಕ್ಖಾ ಸಙ್ಘೇನ, ತಯೋ ಚೇವ ಗಿಹೀಗತಾ;

ಕುಮಾರಿಭೂತಾ ತಿಸ್ಸೋ ಚ, ಊನದ್ವಾದಸಸಮ್ಮತಾ.

ಅಲಂ ತಾವ ಸೋಕಾವಾಸಂ, ಛನ್ದಾ ಅನುವಸ್ಸಾ ಚ ದ್ವೇ;

ಸಿಕ್ಖಾಪದಾ ಸತ್ತತಿಮೇ, ಸಮುಟ್ಠಾನಾ ತಿಕಾ ಕತಾ.

ಕಾಯಚಿತ್ತೇನ ನ ವಾಚಾ, ವಾಚಾಚಿತ್ತಂ ನ ಕಾಯಿಕಂ;

ತೀಹಿ ದ್ವಾರೇಹಿ ಜಾಯನ್ತಿ, ಪಾರಾಜಿಕಂ ದುತಿಯಂ ಯಥಾ.

ದುತಿಯಪಾರಾಜಿಕಸಮುಟ್ಠಾನಂ ನಿಟ್ಠಿತಂ.

೩. ಸಞ್ಚರಿತ್ತಸಮುಟ್ಠಾನಂ

೨೬೦. ಸಞ್ಚರೀ ಕುಟಿ ವಿಹಾರೋ, ಧೋವನಞ್ಚ ಪಟಿಗ್ಗಹೋ;

ವಿಞ್ಞತ್ತುತ್ತರಿ ಅಭಿಹಟ್ಠುಂ, ಉಭಿನ್ನಂ ದೂತಕೇನ ಚ.

ಕೋಸಿಯಾ ಸುದ್ಧದ್ವೇಭಾಗಾ, ಛಬ್ಬಸ್ಸಾನಿ ನಿಸೀದನಂ;

ರಿಞ್ಚನ್ತಿ ರೂಪಿಕಾ ಚೇವ, ಉಭೋ ನಾನಪ್ಪಕಾರಕಾ.

ಊನಬನ್ಧನವಸ್ಸಿಕಾ, ಸುತ್ತಂ ವಿಕಪ್ಪನೇನ ಚ;

ದ್ವಾರದಾನಸಿಬ್ಬಾನಿ [ದ್ವಾರದಾನಸಿಬ್ಬಿನೀ (ಸೀ. ಸ್ಯಾ.)] ಚ, ಪೂವಪಚ್ಚಯಜೋತಿ ಚ.

ರತನಂ ಸೂಚಿ ಮಞ್ಚೋ ಚ, ತೂಲಂ ನಿಸೀದನಕಣ್ಡು ಚ;

ವಸ್ಸಿಕಾ ಚ ಸುಗತೇನ, ವಿಞ್ಞತ್ತಿ ಅಞ್ಞಂ ಚೇತಾಪನಾ.

ದ್ವೇ ಸಙ್ಘಿಕಾ ಮಹಾಜನಿಕಾ, ದ್ವೇ ಪುಗ್ಗಲಲಹುಕಾ ಗರು;

ದ್ವೇ ವಿಘಾಸಾ ಸಾಟಿಕಾ ಚ, ಸಮಣಚೀವರೇನ ಚ.

ಸಮಪಞ್ಞಾಸಿಮೇ ಧಮ್ಮಾ, ಛಹಿ ಠಾನೇಹಿ ಜಾಯರೇ;

ಕಾಯತೋ ನ ವಾಚಾಚಿತ್ತಾ, ವಾಚತೋ ನ ಕಾಯಮನಾ.

ಕಾಯವಾಚಾ ನ ಚ ಚಿತ್ತಾ [ನ ಚಿತ್ತತೋ (ಸೀ. ಸ್ಯಾ.)], ಕಾಯಚಿತ್ತಾ ನ ವಾಚಿಕಾ [ನ ವಾಚತೋ (ಸೀ. ಸ್ಯಾ.)];

ವಾಚಾಚಿತ್ತಾ ನ ಕಾಯೇನ, ತೀಹಿ ದ್ವಾರೇಹಿ [ತೀಹಿ ಠಾನೇಹಿ (ಸ್ಯಾ.)] ಜಾಯರೇ.

ಛಸಮುಟ್ಠಾನಿಕಾ ಏತೇ, ಸಞ್ಚರಿತ್ತೇನ ಸಾದಿಸಾ.

ಸಞ್ಚರಿತ್ತಸಮುಟ್ಠಾನಂ ನಿಟ್ಠಿತಂ.

೪. ಸಮನುಭಾಸನಾಸಮುಟ್ಠಾನಂ

೨೬೧. ಭೇದಾನುವತ್ತದುಬ್ಬಚ, ದೂಸದುಟ್ಠುಲ್ಲದಿಟ್ಠಿ ಚ;

ಛನ್ದಂ ಉಜ್ಜಗ್ಘಿಕಾ ದ್ವೇ ಚ, ದ್ವೇ ಚ ಸದ್ದಾ ನ ಬ್ಯಾಹರೇ.

ಛಮಾ ನೀಚಾಸನೇ ಠಾನಂ, ಪಚ್ಛತೋ ಉಪ್ಪಥೇನ ಚ;

ವಜ್ಜಾನುವತ್ತಿಗಹಣಾ, ಓಸಾರೇ ಪಚ್ಚಾಚಿಕ್ಖನಾ.

ಕಿಸ್ಮಿಂ ಸಂಸಟ್ಠಾ ದ್ವೇ ವಧಿ, ವಿಸಿಬ್ಬೇ ದುಕ್ಖಿತಾಯ ಚ;

ಪುನ ಸಂಸಟ್ಠಾ ನ ವೂಪಸಮೇ, ಆರಾಮಞ್ಚ ಪವಾರಣಾ.

ಅನ್ವದ್ಧಂ [ಅನ್ವದ್ಧಮಾಸಂ (ಸೀ. ಸ್ಯಾ.)] ಸಹ ಜೀವಿನಿಂ, ದ್ವೇ ಚೀವರಂ ಅನುಬನ್ಧನಾ;

ಸತ್ತತಿಂಸ ಇಮೇ ಧಮ್ಮಾ, ಕಾಯವಾಚಾಯ ಚಿತ್ತತೋ.

ಸಬ್ಬೇ ಏಕಸಮುಟ್ಠಾನಾ, ಸಮನುಭಾಸನಾ ಯಥಾ.

ಸಮನುಭಾಸನಾಸಮುಟ್ಠಾನಂ ನಿಟ್ಠಿತಂ.

೫. ಕಥಿನಸಮುಟ್ಠಾನಂ

೨೬೨. ಉಬ್ಭತಂ ಕಥಿನಂ ತೀಣಿ, ಪಠಮಂ ಪತ್ತಭೇಸಜ್ಜಂ;

ಅಚ್ಚೇಕಂ ಚಾಪಿ ಸಾಸಙ್ಕಂ, ಪಕ್ಕಮನ್ತೇನ ವಾ ದುವೇ.

ಉಪಸ್ಸಯಂ ಪರಮ್ಪರಾ, ಅನತಿರಿತ್ತಂ ನಿಮನ್ತನಾ;

ವಿಕಪ್ಪಂ ರಞ್ಞೋ ವಿಕಾಲೇ, ವೋಸಾಸಾರಞ್ಞಕೇನ ಚ.

ಉಸ್ಸಯಾಸನ್ನಿಚಯಞ್ಚ, ಪುರೇ ಪಚ್ಛಾ ವಿಕಾಲೇ ಚ;

ಪಞ್ಚಾಹಿಕಾ ಸಙ್ಕಮನೀ, ದ್ವೇಪಿ ಆವಸಥೇನ ಚ.

ಪಸಾಖೇ ಆಸನೇ ಚೇವ, ತಿಂಸ ಏಕೂನಕಾ ಇಮೇ;

ಕಾಯವಾಚಾ ನ ಚ ಚಿತ್ತಾ [ನ ಚಿತ್ತತೋ (ಸ್ಯಾ.)], ತೀಹಿ ದ್ವಾರೇಹಿ ಜಾಯರೇ.

ದ್ವಿಸಮುಟ್ಠಾನಿಕಾ ಸಬ್ಬೇ, ಕಥಿನೇನ ಸಹಾಸಮಾ.

ಕಥಿನಸಮುಟ್ಠಾನಂ ನಿಟ್ಠಿತಂ.

೬. ಏಳಕಲೋಮಸಮುಟ್ಠಾನಂ

೨೬೩. ಏಳಕಲೋಮಾ ದ್ವೇ ಸೇಯ್ಯಾ, ಆಹಚ್ಚ ಪಿಣ್ಡಭೋಜನಂ;

ಗಣವಿಕಾಲಸನ್ನಿಧಿ, ದನ್ತಪೋನೇನ ಚೇಲಕಾ.

ಉಯ್ಯುತ್ತಂ ಸೇನಂ [ಉಯ್ಯುತ್ತಂ ವಸೇ (ಸ್ಯಾ.)] ಉಯ್ಯೋಧಿ, ಸುರಾ ಓರೇನ ನ್ಹಾಯನಾ;

ದುಬ್ಬಣ್ಣೇ ದ್ವೇ ದೇಸನಿಕಾ, ಲಸುಣುಪತಿಟ್ಠೇ ನಚ್ಚನಾ.

ನ್ಹಾನಮತ್ಥರಣಂ ಸೇಯ್ಯಾ, ಅನ್ತೋರಟ್ಠೇ ತಥಾ ಬಹಿ;

ಅನ್ತೋವಸ್ಸಂ ಚಿತ್ತಾಗಾರಂ, ಆಸನ್ದಿ ಸುತ್ತಕನ್ತನಾ.

ವೇಯ್ಯಾವಚ್ಚಂ ಸಹತ್ಥಾ ಚ, ಅಭಿಕ್ಖುಕಾವಾಸೇನ ಚ;

ಛತ್ತಂ ಯಾನಞ್ಚ ಸಙ್ಘಾಣಿಂ, ಅಲಙ್ಕಾರಂ ಗನ್ಧವಾಸಿತಂ.

ಭಿಕ್ಖುನೀ ಸಿಕ್ಖಮಾನಾ ಚ, ಸಾಮಣೇರೀ ಗಿಹಿನಿಯಾ;

ಅಸಂಕಚ್ಚಿಕಾ ಆಪತ್ತಿ, ಚತ್ತಾರೀಸಾ ಚತುತ್ತರಿ.

ಕಾಯೇನ ನ ವಾಚಾಚಿತ್ತೇನ, ಕಾಯಚಿತ್ತೇನ ನ ವಾಚತೋ;

ದ್ವಿಸಮುಟ್ಠಾನಿಕಾ ಸಬ್ಬೇ, ಸಮಾ ಏಳಕಲೋಮಿಕಾತಿ.

ಏಳಕಲೋಮಸಮುಟ್ಠಾನಂ ನಿಟ್ಠಿತಂ.

೭. ಪದಸೋಧಮ್ಮಸಮುಟ್ಠಾನಂ

೨೬೪. ಪದಞ್ಞತ್ರ ಅಸಮ್ಮತಾ, ತಥಾ ಅತ್ಥಙ್ಗತೇನ ಚ;

ತಿರಚ್ಛಾನವಿಜ್ಜಾ ದ್ವೇ ವುತ್ತಾ, ಅನೋಕಾಸೋ [ಅನೋಕಾಸೇ (ಸೀ. ಸ್ಯಾ.)] ಚ ಪುಚ್ಛನಾ.

ಸತ್ತ ಸಿಕ್ಖಾಪದಾ ಏತೇ, ವಾಚಾ ನ ಕಾಯಚಿತ್ತತೋ [ಕಾಯಚಿತ್ತಕಾ (ಕ.)];

ವಾಚಾಚಿತ್ತೇನ ಜಾಯನ್ತಿ, ನ ತು ಕಾಯೇನ ಜಾಯರೇ.

ದ್ವಿಸಮುಟ್ಠಾನಿಕಾ ಸಬ್ಬೇ, ಪದಸೋಧಮ್ಮಸದಿಸಾ.

ಪದಸೋಧಮ್ಮಸಮುಟ್ಠಾನಂ ನಿಟ್ಠಿತಂ.

೮. ಅದ್ಧಾನಸಮುಟ್ಠಾನಂ

೨೬೫. ಅದ್ಧಾನನಾವಂ ಪಣೀತಂ, ಮಾತುಗಾಮೇನ ಸಂಹರೇ;

ಧಞ್ಞಂ ನಿಮನ್ತಿತಾ ಚೇವ, ಅಟ್ಠ ಚ ಪಾಟಿದೇಸನೀ.

ಸಿಕ್ಖಾ ಪನ್ನರಸ ಏತೇ, ಕಾಯಾ ನ ವಾಚಾ ನ ಮನಾ;

ಕಾಯವಾಚಾಹಿ ಜಾಯನ್ತಿ, ನ ತೇ ಚಿತ್ತೇನ ಜಾಯರೇ.

ಕಾಯಚಿತ್ತೇನ ಜಾಯನ್ತಿ, ನ ತೇ ಜಾಯನ್ತಿ ವಾಚತೋ;

ಕಾಯವಾಚಾಹಿ ಚಿತ್ತೇನ, ಸಮುಟ್ಠಾನಾ ಚತುಬ್ಬಿಧಾ.

ಪಞ್ಞತ್ತಾ ಬುದ್ಧಞಾಣೇನ, ಅದ್ಧಾನೇನ ಸಹಾ ಸಮಾ [ಸಮಾನಯಾ (ಸ್ಯಾ.)].

ಅದ್ಧಾನಸಮುಟ್ಠಾನಂ ನಿಟ್ಠಿತಂ.

೯. ಥೇಯ್ಯಸತ್ಥಸಮುಟ್ಠಾನಂ

೨೬೬. ಥೇಯ್ಯಸತ್ಥಂ ಉಪಸ್ಸುತಿ, ಸೂಪವಿಞ್ಞಾಪನೇನ ಚ;

ರತ್ತಿಛನ್ನಞ್ಚ ಓಕಾಸಂ, ಏತೇ ಬ್ಯೂಹೇನ ಸತ್ತಮಾ.

ಕಾಯಚಿತ್ತೇನ ಜಾಯನ್ತಿ, ನ ತೇ ಜಾಯನ್ತಿ ವಾಚತೋ;

ತೀಹಿ ದ್ವಾರೇಹಿ ಜಾಯನ್ತಿ, ದ್ವಿಸಮುಟ್ಠಾನಿಕಾ ಇಮೇ.

ಥೇಯ್ಯಸತ್ಥಸಮುಟ್ಠಾನಾ, ದೇಸಿತಾದಿಚ್ಚಬನ್ಧುನಾ.

ಥೇಯ್ಯಸತ್ಥಸಮುಟ್ಠಾನಂ ನಿಟ್ಠಿತಂ.

೧೦. ಧಮ್ಮದೇಸನಾಸಮುಟ್ಠಾನಂ

೨೬೭. ಛತ್ತಪಾಣಿಸ್ಸ ಸದ್ಧಮ್ಮಂ, ನ ದೇಸೇನ್ತಿ ತಥಾಗತಾ;

ಏವಮೇವ [ತಥೇವ (ಸೀ. ಸ್ಯಾ.)] ದಣ್ಡಪಾಣಿಸ್ಸ, ಸತ್ಥಆವುಧಪಾಣಿನಂ.

ಪಾದುಕುಪಾಹನಾ ಯಾನಂ, ಸೇಯ್ಯಪಲ್ಲತ್ಥಿಕಾಯ ಚ;

ವೇಠಿತೋಗುಣ್ಠಿತೋ ಚೇವ, ಏಕಾದಸಮನೂನಕಾ.

ವಾಚಾಚಿತ್ತೇನ ಜಾಯನ್ತಿ, ನ ತೇ ಜಾಯನ್ತಿ ಕಾಯತೋ;

ಸಬ್ಬೇ ಏಕಸಮುಟ್ಠಾನಾ, ಸಮಕಾ ಧಮ್ಮದೇಸನೇ.

ಧಮ್ಮದೇಸನಾಸಮುಟ್ಠಾನಂ ನಿಟ್ಠಿತಂ.

೧೧. ಭೂತಾರೋಚನಸಮುಟ್ಠಾನಂ

೨೬೮. ಭೂತಂ ಕಾಯೇನ ಜಾಯತಿ, ನ ವಾಚಾ ನ ಚ ಚಿತ್ತತೋ;

ವಾಚತೋ ಚ ಸಮುಟ್ಠಾತಿ, ನ ಕಾಯಾ ನ ಚ ಚಿತ್ತತೋ.

ಕಾಯವಾಚಾಯ ಜಾಯತಿ, ನ ತು ಜಾಯತಿ ಚಿತ್ತತೋ;

ಭೂತಾರೋಚನಕಾ ನಾಮ, ತೀಹಿ ಠಾನೇಹಿ ಜಾಯತಿ.

ಭೂತಾರೋಚನಸಮುಟ್ಠಾನಂ ನಿಟ್ಠಿತಂ.

೧೨. ಚೋರಿವುಟ್ಠಾಪನಸಮುಟ್ಠಾನಂ

೨೬೯. ಚೋರೀ ವಾಚಾಯ ಚಿತ್ತೇನ, ನ ತಂ ಜಾಯತಿ ಕಾಯತೋ;

ಜಾಯತಿ ತೀಹಿ ದ್ವಾರೇಹಿ, ಚೋರಿವುಟ್ಠಾಪನಂ ಇದಂ;