೨. ಕತಾಪತ್ತಿವಾರೋ

೧. ಪಾರಾಜಿಕಕಣ್ಡಂ

೨೨೮. ಅವಸ್ಸುತಾ ಭಿಕ್ಖುನೀ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯನ್ತೀ ಕತಿ ಆಪತ್ತಿಯೋ ಆಪಜ್ಜತಿ? ಅವಸ್ಸುತಾ ಭಿಕ್ಖುನೀ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಗಹಣಂ ಸಾದಿಯತಿ, ಆಪತ್ತಿ ಪಾರಾಜಿಕಸ್ಸ; ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಗಹಣಂ ಸಾದಿಯತಿ, ಆಪತ್ತಿ ಥುಲ್ಲಚ್ಚಯಸ್ಸ; ಕಾಯಪಟಿಬದ್ಧಂ ಗಹಣಂ ಸಾದಿಯತಿ, ಆಪತ್ತಿ ದುಕ್ಕಟಸ್ಸ – ಅವಸ್ಸುತಾ ಭಿಕ್ಖುನೀ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯನ್ತೀ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ವಜ್ಜಪ್ಪಟಿಚ್ಛಾದಿಕಾ ಭಿಕ್ಖುನೀ ವಜ್ಜಂ ಪಟಿಚ್ಛಾದೇನ್ತೀ ಕತಿ ಆಪತ್ತಿಯೋ ಆಪಜ್ಜತಿ? ವಜ್ಜಪ್ಪಟಿಚ್ಛಾದಿಕಾ ಭಿಕ್ಖುನೀ ವಜ್ಜಂ ಪಟಿಚ್ಛಾದೇನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಜಾನಂ ಪಾರಾಜಿಕಂ ಧಮ್ಮಂ ಪಟಿಚ್ಛಾದೇತಿ, ಆಪತ್ತಿ ಪಾರಾಜಿಕಸ್ಸ; ವೇಮತಿಕಾ ಪಟಿಚ್ಛಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ; ಆಚಾರವಿಪತ್ತಿಂ ಪಟಿಚ್ಛಾದೇತಿ, ಆಪತ್ತಿ ದುಕ್ಕಟಸ್ಸ – ವಜ್ಜಪ್ಪಟಿಚ್ಛಾದಿಕಾ ಭಿಕ್ಖುನೀ ವಜ್ಜಂ ಪಟಿಚ್ಛಾದೇನ್ತೀ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಉಕ್ಖಿತ್ತಾನುವತ್ತಿಕಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ಕತಿ ಆಪತ್ತಿಯೋ ಆಪಜ್ಜತಿ? ಉಕ್ಖಿತ್ತಾನುವತ್ತಿಕಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಪಾರಾಜಿಕಸ್ಸ – ಉಕ್ಖಿತ್ತಾನುವತ್ತಿಕಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಅಟ್ಠಮಂ ವತ್ಥುಂ ಪರಿಪೂರೇನ್ತೀ ಕತಿ ಆಪತ್ತಿಯೋ ಆಪಜ್ಜತಿ? ಅಟ್ಠಮಂ ವತ್ಥುಂ ಪರಿಪೂರೇನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಪುರಿಸೇನ – ‘‘ಇತ್ಥನ್ನಾಮಂ ಓಕಾಸಂ [ಇತ್ಥನ್ನಾಮಂ ಗಹನಂ (ಸೀ.), ಇತ್ಥನ್ನಾಮಂ ಗಬ್ಭಂ (ಸ್ಯಾ.)] ಆಗಚ್ಛಾ’’ತಿ ವುತ್ತಾ ಗಚ್ಛತಿ, ಆಪತ್ತಿ ದುಕ್ಕಟಸ್ಸ; ಪುರಿಸಸ್ಸ ಹತ್ಥಪಾಸಂ ಓಕ್ಕನ್ತಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸ; ಅಟ್ಠಮಂ ವತ್ಥುಂ ಪರಿಪೂರೇತಿ, ಆಪತ್ತಿ ಪಾರಾಜಿಕಸ್ಸ – ಅಟ್ಠಮಂ ವತ್ಥುಂ ಪರಿಪೂರೇನ್ತೀ ಇಮಾ ತಿಸ್ಸೋ ಆಪತ್ತಿಯೋ ಆಪಜ್ಜತಿ.

ಪಾರಾಜಿಕಾ ನಿಟ್ಠಿತಾ.

೨. ಸಙ್ಘಾದಿಸೇಸಕಣ್ಡಂ

೨೨೯. ಉಸ್ಸಯವಾದಿಕಾ ಭಿಕ್ಖುನೀ ಅಡ್ಡಂ ಕರೋನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಏಕಸ್ಸ ಆರೋಚೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಸ್ಸ ಆರೋಚೇತಿ, ಆಪತ್ತಿ ಥುಲ್ಲಚ್ಚಯಸ್ಸ; ಅಡ್ಡಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಚೋರಿಂ ವುಟ್ಠಾಪೇನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಾ ಗಾಮನ್ತರಂ ಗಚ್ಛನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಗಚ್ಛತಿ, ಆಪತ್ತಿ ದುಕ್ಕಟಸ್ಸ; ಪಠಮಂ ಪಾದಂ ಪರಿಕ್ಖೇಪಂ ಅತಿಕ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುನಿಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಪಲೋಕೇತ್ವಾ ಕಾರಕಸಙ್ಘಂ ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಅವಸ್ಸುತಾ ಭಿಕ್ಖುನೀ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಭುಞ್ಜನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ಥುಲ್ಲಚ್ಚಯಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಸಙ್ಘಾದಿಸೇಸಸ್ಸ; ಉದಕದನ್ತಪೋನಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತಿ ಅವಸ್ಸುತೋ ವಾ ಅನವಸ್ಸುತೋ ವಾ, ಯತೋ ತ್ವಂ ಅನವಸ್ಸುತಾ! ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ ಭೋಜನೀಯಂ ವಾ, ತಂ ತ್ವಂ ಸಹತ್ಥಾ ಪಟಿಗ್ಗಹೇತ್ವಾ ಖಾದ ವಾ ಭುಞ್ಜ ವಾ’’ತಿ ಉಯ್ಯೋಜೇನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ತಸ್ಸಾ ವಚನೇನ ಖಾದಿಸ್ಸಾಮಿ ಭುಞ್ಜಿಸ್ಸಾಮೀತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಥುಲ್ಲಚ್ಚಯಸ್ಸ; ಭೋಜನಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಕುಪಿತಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಸಂಸಟ್ಠಾ ಭಿಕ್ಖುನಿಯೋ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತಿಯೋ ತಿಸ್ಸೋ ಆಪತ್ತಿಯೋ ಆಪಜ್ಜನ್ತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

‘‘ಸಂಸಟ್ಠಾವ, ಅಯ್ಯೇ, ತುಮ್ಹೇ ವಿಹರಥ. ಮಾ ತುಮ್ಹೇ ನಾನಾ ವಿಹರಿತ್ಥಾ’’ತಿ ಉಯ್ಯೋಜೇನ್ತೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ತಿಸ್ಸೋ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಸಙ್ಘಾದಿಸೇಸಾ ನಿಟ್ಠಿತಾ.

೩. ನಿಸ್ಸಗ್ಗಿಯಕಣ್ಡಂ

೨೩೦. ಪತ್ತಸನ್ನಿಚಯಂ ಕರೋನ್ತೀ ಏಕಂ ಆಪತ್ತಿಂ ಆಪಜ್ಜತಿ. ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಕಾಲಚೀವರಂ ‘‘ಕಾಲಚೀವರ’’ನ್ತಿ ಅಧಿಟ್ಠಹಿತ್ವಾ ಭಾಜಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಭಾಜಾಪೇತಿ, ಪಯೋಗೇ ದುಕ್ಕಟಂ; ಭಾಜಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಭಿಕ್ಖುನಿಯಾ ಸದ್ಧಿಂ ಚೀವರಂ ಪರಿವತ್ತೇತ್ವಾ ಅಚ್ಛಿನ್ದನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಅಚ್ಛಿನ್ದತಿ, ಪಯೋಗೇ ದುಕ್ಕಟಂ; ಅಚ್ಛಿನ್ನೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞಂ ವಿಞ್ಞಾಪೇತ್ವಾ ಅಞ್ಞಂ ವಿಞ್ಞಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವಿಞ್ಞಾಪೇತಿ, ಪಯೋಗೇ ದುಕ್ಕಟಂ; ವಿಞ್ಞಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞಂ ಚೇತಾಪೇತ್ವಾ ಅಞ್ಞಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಸಙ್ಘಿಕೇನ ಅಞ್ಞಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞದತ್ಥಿಕೇ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಸಙ್ಘಿಕೇನ ಸಂಯಾಚಿಕೇನ ಅಞ್ಞಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಮಹಾಜನಿಕೇನ ಅಞ್ಞಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇನ ಮಹಾಜನಿಕೇನ ಸಂಯಾಚಿಕೇನ ಅಞ್ಞಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅಞ್ಞದತ್ಥಿಕೇನ ಪರಿಕ್ಖಾರೇನ ಅಞ್ಞುದ್ದಿಸಿಕೇ ಪುಗ್ಗಲಿಕೇನ ಸಂಯಾಚಿಕೇನ ಅಞ್ಞಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅತಿರೇಕಚತುಕ್ಕಂಸಪರಮಂ ಗರುಪಾವುರಣಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಅತಿರೇಕಅಡ್ಢತೇಯ್ಯಕಂಸಪರಮಂ ಲಹುಪಾವುರಣಂ ಚೇತಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಚೇತಾಪೇತಿ, ಪಯೋಗೇ ದುಕ್ಕಟಂ; ಚೇತಾಪಿತೇ ನಿಸ್ಸಗ್ಗಿಯಂ ಪಾಚಿತ್ತಿಯಂ.

ನಿಸ್ಸಗ್ಗಿಯಾ ಪಾಚಿತ್ತಿಯಾ ನಿಟ್ಠಿತಾ.

೪. ಪಾಚಿತ್ತಿಯಕಣ್ಡಂ

೧. ಲಸುಣವಗ್ಗೋ

೨೩೧. ಲಸುಣಂ ಖಾದನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಖಾದಿಸ್ಸಾಮೀತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಚಿತ್ತಿಯಸ್ಸ.

ಸಮ್ಬಾಧೇ ಲೋಮಂ ಸಂಹರಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಸಂಹರಾಪೇತಿ, ಪಯೋಗೇ ದುಕ್ಕಟಂ; ಸಂಹರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ತಲಘಾತಕಂ ಕರೋನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಕರೋತಿ, ಪಯೋಗೇ ದುಕ್ಕಟಂ; ಕತೇ ಆಪತ್ತಿ ಪಾಚಿತ್ತಿಯಸ್ಸ.

ಜತುಮಟ್ಠಕಂ ಆದಿಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಆದಿಯತಿ, ಪಯೋಗೇ ದುಕ್ಕಟಂ, ಆದಿನ್ನೇ ಆಪತ್ತಿ ಪಾಚಿತ್ತಿಯಸ್ಸ.

ಅತಿರೇಕದ್ವಙ್ಗುಲಪಬ್ಬಪರಮಂ ಉದಕಸುದ್ಧಿಕಂ ಆದಿಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಆದಿಯತಿ, ಪಯೋಗೇ ದುಕ್ಕಟಂ; ಆದಿನ್ನೇ ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುಸ್ಸ ಭುಞ್ಜನ್ತಸ್ಸ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ; ಹತ್ಥಪಾಸಂ ವಿಜಹಿತ್ವಾ ತಿಟ್ಠತಿ, ಆಪತ್ತಿ ದುಕ್ಕಟಸ್ಸ.

ಆಮಕಧಞ್ಞಂ ವಿಞ್ಞಾಪೇತ್ವಾ ಭುಞ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಭುಞ್ಜಿಸ್ಸಾಮೀತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಚಿತ್ತಿಯಸ್ಸ.

ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ತಿರೋಕುಟ್ಟೇ ವಾ ತಿರೋಪಾಕಾರೇ ವಾ ಛಡ್ಡೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಛಡ್ಡೇತಿ, ಪಯೋಗೇ ದುಕ್ಕಟಂ; ಛಡ್ಡಿತೇ ಆಪತ್ತಿ ಪಾಚಿತ್ತಿಯಸ್ಸ.

ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ಹರಿತೇ ಛಡ್ಡೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಛಡ್ಡೇತಿ, ಪಯೋಗೇ ದುಕ್ಕಟಂ; ಛಡ್ಡಿತೇ ಆಪತ್ತಿ ಪಾಚಿತ್ತಿಯಸ್ಸ.

ನಚ್ಚಂ ವಾ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಗಚ್ಛತಿ, ಆಪತ್ತಿ ದುಕ್ಕಟಸ್ಸ; ಯತ್ಥ ಠಿತಾ ಪಸ್ಸತಿ ವಾ ಸುಣಾತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

ಲಸುಣವಗ್ಗೋ ಪಠಮೋ.

೨. ರತ್ತನ್ಧಕಾರವಗ್ಗೋ

೨೩೨. ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ; ಹತ್ಥಪಾಸಂ ವಿಜಹಿತ್ವಾ ತಿಟ್ಠತಿ, ಆಪತ್ತಿ ದುಕ್ಕಟಸ್ಸ.

ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ; ಹತ್ಥಪಾಸಂ ವಿಜಹಿತ್ವಾ ತಿಟ್ಠತಿ, ಆಪತ್ತಿ ದುಕ್ಕಟಸ್ಸ.

ಅಜ್ಝೋಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ; ಹತ್ಥಪಾಸಂ ವಿಜಹಿತ್ವಾ ತಿಟ್ಠತಿ, ಆಪತ್ತಿ ದುಕ್ಕಟಸ್ಸ.

ರಥಿಕಾಯ ವಾ ಬ್ಯೂಹೇ ವಾ ಸಿಙ್ಘಾಟಕೇ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ; ಹತ್ಥಪಾಸಂ ವಿಜಹಿತ್ವಾ ತಿಟ್ಠತಿ, ಆಪತ್ತಿ ದುಕ್ಕಟಸ್ಸ.

ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಮನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಅನೋವಸ್ಸಕಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ನಿಸೀದನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ನಿಸೀದತಿ, ಪಯೋಗೇ ದುಕ್ಕಟಂ; ನಿಸಿನ್ನೇ ಆಪತ್ತಿ ಪಾಚಿತ್ತಿಯಸ್ಸ.

ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಅಭಿನಿಸೀದತಿ, ಪಯೋಗೇ ದುಕ್ಕಟಂ; ಅಭಿನಿಸಿನ್ನೇ ಆಪತ್ತಿ ಪಾಚಿತ್ತಿಯಸ್ಸ.

ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಉಜ್ಝಾಪೇತಿ, ಪಯೋಗೇ ದುಕ್ಕಟಂ; ಉಜ್ಝಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಅತ್ತಾನಂ ವಾ ಪರಂ ವಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಅಭಿಸಪತಿ, ಪಯೋಗೇ ದುಕ್ಕಟಂ; ಅಭಿಸಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಅತ್ತಾನಂ ವಧಿತ್ವಾ ವಧಿತ್ವಾ ರೋದನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವಧತಿ ರೋದತಿ, ಆಪತ್ತಿ ಪಾಚಿತ್ತಿಯಸ್ಸ; ವಧತಿ ನ ರೋದತಿ, ಆಪತ್ತಿ ದುಕ್ಕಟಸ್ಸ.

ರತ್ತನ್ಧಕಾರವಗ್ಗೋ ದುತಿಯೋ.

೩. ನಹಾನವಗ್ಗೋ

೨೩೩. ನಗ್ಗಾ ನಹಾಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ನಹಾಯತಿ, ಪಯೋಗೇ ದುಕ್ಕಟಂ; ನಹಾನಪರಿಯೋಸಾನೇ ಆಪತ್ತಿ ಪಾಚಿತ್ತಿಯಸ್ಸ.

ಪಮಾಣಾತಿಕ್ಕನ್ತಂ ಉದಕಸಾಟಿಕಂ ಕಾರಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುನಿಯಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ನೇವ ಸಿಬ್ಬೇನ್ತೀ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಪಞ್ಚಾಹಿಕಂ ಸಙ್ಘಾಟಿಚಾರಂ ಅತಿಕ್ಕಾಮೇನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ. ಚೀವರಸಙ್ಕಮನೀಯಂ ಧಾರೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಧಾರೇತಿ, ಪಯೋಗೇ ದುಕ್ಕಟಂ; ಧಾರಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಗಣಸ್ಸ ಚೀವರಲಾಭಂ ಅನ್ತರಾಯಂ ಕರೋನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಕರೋತಿ, ಪಯೋಗೇ ದುಕ್ಕಟಂ; ಕತೇ, ಆಪತ್ತಿ ಪಾಚಿತ್ತಿಯಸ್ಸ.

ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಟಿಬಾಹತಿ, ಪಯೋಗೇ ದುಕ್ಕಟಂ; ಪಟಿಬಾಹಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಮಣಚೀವರಂ ದೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ದೇತಿ, ಪಯೋಗೇ ದುಕ್ಕಟಂ; ದಿನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ದುಬ್ಬಲಚೀವರಪಚ್ಚಾಸಾ ಚೀವರಕಾಲಸಮಯಂ ಅತಿಕ್ಕಾಮೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಅತಿಕ್ಕಾಮೇತಿ, ಪಯೋಗೇ ದುಕ್ಕಟಂ; ಅತಿಕ್ಕಾಮಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಟಿಬಾಹತಿ, ಪಯೋಗೇ ದುಕ್ಕಟಂ; ಪಟಿಬಾಹಿತೇ, ಆಪತ್ತಿ ಪಾಚಿತ್ತಿಯಸ್ಸ.

ನಹಾನವಗ್ಗೋ ತತಿಯೋ.

೪. ತುವಟ್ಟವಗ್ಗೋ

೨೩೪. ದ್ವೇ ಭಿಕ್ಖುನಿಯೋ ಏಕಮಞ್ಚೇ ತುವಟ್ಟೇನ್ತಿಯೋ ದ್ವೇ ಆಪತ್ತಿಯೋ ಆಪಜ್ಜನ್ತಿ. ನಿಪಜ್ಜನ್ತಿ, ಪಯೋಗೇ ದುಕ್ಕಟಂ; ನಿಪನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ದ್ವೇ ಭಿಕ್ಖುನಿಯೋ ಏಕತ್ಥರಣಪಾವುರಣಾ ತುವಟ್ಟೇನ್ತಿಯೋ ದ್ವೇ ಆಪತ್ತಿಯೋ ಆಪಜ್ಜನ್ತಿ. ನಿಪಜ್ಜನ್ತಿ, ಪಯೋಗೇ ದುಕ್ಕಟಂ; ನಿಪನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುನಿಯಾ ಸಞ್ಚಿಚ್ಚ ಅಫಾಸುಂ ಕರೋನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಕರೋತಿ, ಪಯೋಗೇ ದುಕ್ಕಟಂ; ಕತೇ, ಆಪತ್ತಿ ಪಾಚಿತ್ತಿಯಸ್ಸ.

ದುಕ್ಖಿತಂ ಸಹಜೀವಿನಿಂ ನೇವ ಉಪಟ್ಠೇನ್ತೀ ನ ಉಪಟ್ಠಾಪನಾಯ ಉಸ್ಸುಕ್ಕಂ ಕರೋನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಭಿಕ್ಖುನಿಯಾ ಉಪಸ್ಸಯಂ ದತ್ವಾ ಕುಪಿತಾ ಅನತ್ತಮನಾ ನಿಕ್ಕಡ್ಢನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ನಿಕ್ಕಡ್ಢತಿ, ಪಯೋಗೇ ದುಕ್ಕಟಂ; ನಿಕ್ಕಡ್ಢಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಸಂಸಟ್ಠಾ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಞತ್ತಿಯಾ ದುಕ್ಕಟಂ; ಕಮ್ಮವಾಚಾಪರಿಯೋಸಾನೇ ಆಪತ್ತಿ ಪಾಚಿತ್ತಿಯಸ್ಸ.

ಅನ್ತೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾ ಚಾರಿಕಂ ಚರನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಟಿಪಜ್ಜತಿ, ಪಯೋಗೇ ದುಕ್ಕಟಂ; ಪಟಿಪನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ತಿರೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾ ಚಾರಿಕಂ ಚರನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಟಿಪಜ್ಜತಿ, ಪಯೋಗೇ ದುಕ್ಕಟಂ; ಪಟಿಪನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ಅನ್ತೋವಸ್ಸಂ ಚಾರಿಕಂ ಚರನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಟಿಪಜ್ಜತಿ, ಪಯೋಗೇ ದುಕ್ಕಟಂ; ಪಟಿಪನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ವಸ್ಸಂವುಟ್ಠಾ ಭಿಕ್ಖುನೀ ಚಾರಿಕಂ ನ ಪಕ್ಕಮನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ತುವಟ್ಟವಗ್ಗೋ ಚತುತ್ಥೋ.

೫. ಚಿತ್ತಾಗಾರವಗ್ಗೋ

೨೩೫. ರಾಜಾಗಾರಂ ವಾ ಚಿತ್ತಾಗಾರಂ ವಾ ಆರಾಮಂ ವಾ ಉಯ್ಯಾನಂ ವಾ ಪೋಕ್ಖರಣಿಂ ವಾ ದಸ್ಸನಾಯ ಗಚ್ಛನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಗಚ್ಛತಿ, ಆಪತ್ತಿ ದುಕ್ಕಟಸ್ಸ; ಯತ್ಥ ಠಿತಾ ಪಸ್ಸತಿ, ಆಪತ್ತಿ ಪಾಚಿತ್ತಿಯಸ್ಸ.

ಆಸನ್ದಿಂ ವಾ ಪಲ್ಲಙ್ಕಂ ವಾ ಪರಿಭುಞ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪರಿಭುಞ್ಜತಿ, ಪಯೋಗೇ ದುಕ್ಕಟಂ; ಪರಿಭುತ್ತೇ, ಆಪತ್ತಿ ಪಾಚಿತ್ತಿಯಸ್ಸ.

ಸುತ್ತಂ ಕನ್ತನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಕನ್ತತಿ, ಪಯೋಗೇ ದುಕ್ಕಟಂ; ಉಜ್ಜವುಜ್ಜವೇ, ಆಪತ್ತಿ ಪಾಚಿತ್ತಿಯಸ್ಸ.

ಗಿಹಿವೇಯ್ಯಾವಚ್ಚಂ ಕರೋನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಕರೋತಿ, ಪಯೋಗೇ ದುಕ್ಕಟಂ; ಕತೇ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುನಿಯಾ – ‘‘ಏಹಾಯ್ಯೇ ಇಮಂ ಅಧಿಕರಣಂ ವೂಪಸಮೇಹೀ’’ತಿ ವುಚ್ಚಮಾನಾ – ‘‘ಸಾಧೂ’’ತಿ ಪಟಿಸ್ಸುಣಿತ್ವಾ ನೇವ ವೂಪಸಮೇನ್ತೀ ನ ವೂಪಸಮಾಯ ಉಸ್ಸುಕ್ಕಂ ಕರೋನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಂ ವಾ ಭೋಜನೀಯಂ ವಾ ದೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ದೇತಿ, ಪಯೋಗೇ ದುಕ್ಕಟಂ; ದಿನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪರಿಭುಞ್ಜತಿ, ಪಯೋಗೇ ದುಕ್ಕಟಂ; ಪರಿಭುತ್ತೇ, ಆಪತ್ತಿ ಪಾಚಿತ್ತಿಯಸ್ಸ.

ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಪರಿಕ್ಖೇಪಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ತಿರಚ್ಛಾನವಿಜ್ಜಂ ಪರಿಯಾಪುಣನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪರಿಯಾಪುಣಾತಿ, ಪಯೋಗೇ ದುಕ್ಕಟಂ; ಪದೇ ಪದೇ ಆಪತ್ತಿ ಪಾಚಿತ್ತಿಯಸ್ಸ.

ತಿರಚ್ಛಾನವಿಜ್ಜಂ ವಾಚೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವಾಚೇತಿ, ಪಯೋಗೇ ದುಕ್ಕಟಂ; ಪದೇ ಪದೇ ಆಪತ್ತಿ ಪಾಚಿತ್ತಿಯಸ್ಸ.

ಚಿತ್ತಾಗಾರವಗ್ಗೋ ಪಞ್ಚಮೋ.

೬. ಆರಾಮವಗ್ಗೋ

೨೩೬. ಜಾನಂ ಸಭಿಕ್ಖುಕಂ ಆರಾಮಂ ಅನಾಪುಚ್ಛಾ ಪವಿಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಪರಿಕ್ಖೇಪಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುಂ ಅಕ್ಕೋಸನ್ತೀ ಪರಿಭಾಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಅಕ್ಕೋಸತಿ, ಪಯೋಗೇ ದುಕ್ಕಟಂ; ಅಕ್ಕೋಸಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಚಣ್ಡೀಕತಾ ಗಣಂ ಪರಿಭಾಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪರಿಭಾಸತಿ, ಪಯೋಗೇ ದುಕ್ಕಟಂ; ಪರಿಭಾಸಿತೇ, ಆಪತ್ತಿ ಪಾಚಿತ್ತಿಯಸ್ಸ.

ನಿಮನ್ತಿತಾ ವಾ ಪವಾರಿತಾ ವಾ ಖಾದನೀಯಂ ವಾ ಭೋಜನೀಯಂ ವಾ ಭುಞ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಚಿತ್ತಿಯಸ್ಸ.

ಕುಲಂ ಮಚ್ಛರಾಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಮಚ್ಛರಾಯತಿ, ಪಯೋಗೇ ದುಕ್ಕಟಂ; ಮಚ್ಛರಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಅಭಿಕ್ಖುಕೇ ಆವಾಸೇ ವಸ್ಸಂ ವಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ‘‘ವಸ್ಸಂ ವಸಿಸ್ಸಾಮೀ’’ತಿ ಸೇನಾಸನಂ ಪಞ್ಞಪೇತಿ ಪಾನೀಯಂ ಪರಿಭೋಜನೀಯಂ ಉಪಟ್ಠಪೇತಿ ಪರಿವೇಣಂ ಸಮ್ಮಜ್ಜತಿ, ಆಪತ್ತಿ ದುಕ್ಕಟಸ್ಸ; ಸಹ ಅರುಣುಗ್ಗಮನಾ ಆಪತ್ತಿ ಪಾಚಿತ್ತಿಯಸ್ಸ.

ವಸ್ಸಂವುಟ್ಠಾ ಭಿಕ್ಖುನೀ ಉಭತೋಸಙ್ಘೇ ತೀಹಿ ಠಾನೇಹಿ ನ ಪವಾರೇನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಓವಾದಾಯ ವಾ ಸಂವಾಸಾಯ ವಾ ನ ಗಚ್ಛನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಉಪೋಸಥಮ್ಪಿ ನ ಪುಚ್ಛನ್ತೀ ಓವಾದಮ್ಪಿ ನ ಯಾಚನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಪಸಾಖೇ ಜಾತಂ ಗಣ್ಡಂ ವಾ ರುಧಿತಂ ವಾ ಅನಪಲೋಕೇತ್ವಾ ಸಙ್ಘಂ ವಾ ಗಣಂ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಭೇದಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಭೇದಾಪೇತಿ, ಪಯೋಗೇ ದುಕ್ಕಟಂ; ಭಿನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ಆರಾಮವಗ್ಗೋ ಛಟ್ಠೋ.

೭. ಗಬ್ಭಿನೀವಗ್ಗೋ

೨೩೭. ಗಬ್ಭಿನಿಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪಾಯನ್ತಿಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ಸಿಕ್ಖಮಾನಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಿಕ್ಖಮಾನಂ ಸಙ್ಘೇನ ಅಸಮ್ಮತಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಊನದ್ವಾದಸವಸ್ಸಂ ಗಿಹಿಗತಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪರಿಪುಣ್ಣದ್ವಾದಸವಸ್ಸಂ ಗಿಹಿಗತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪರಿಪುಣ್ಣದ್ವಾದಸವಸ್ಸಂ ಗಿಹಿಗತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಙ್ಘೇನ ಅಸಮ್ಮತಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಸಹಜೀವಿನಿಂ ವುಟ್ಠಾಪೇತ್ವಾ ದ್ವೇ ವಸ್ಸಾನಿ ನೇವ ಅನುಗ್ಗಣ್ಹನ್ತೀ ನಾನುಗ್ಗಣ್ಹಾಪೇನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ವುಟ್ಠಾಪಿತಂ ಪವತ್ತಿನಿಂ ದ್ವೇ ವಸ್ಸಾನಿ ನಾನುಬನ್ಧನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇನ್ತೀ ನ ವೂಪಕಾಸಾಪೇನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಗಬ್ಭಿನೀವಗ್ಗೋ ಸತ್ತಮೋ.

೮. ಕುಮಾರೀಭೂತವಗ್ಗೋ

೨೩೮. ಊನವೀಸತಿವಸ್ಸಂ ಕುಮಾರಿಭೂತಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪರಿಪುಣ್ಣವೀಸತಿವಸ್ಸಂ ಕುಮಾರಿಭೂತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪರಿಪುಣ್ಣವೀಸತಿವಸ್ಸಂ ಕುಮಾರಿಭೂತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಸಿಕ್ಖಿತಸಿಕ್ಖಂ ಸಙ್ಘೇನ ಅಸಮ್ಮತಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಊನದ್ವಾದಸವಸ್ಸಾ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪರಿಪುಣ್ಣದ್ವಾದಸವಸ್ಸಾ ಸಙ್ಘೇನ ಅಸಮ್ಮತಾ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

‘‘ಅಲಂ ತಾವ ತೇ, ಅಯ್ಯೇ, ವುಟ್ಠಾಪಿತೇನಾ’’ತಿ ವುಚ್ಚಮಾನಾ ‘‘ಸಾಧೂ’’ತಿ ಪಟಿಸ್ಸುಣಿತ್ವಾ ಪಚ್ಛಾ ಖೀಯನಧಮ್ಮಂ ಆಪಜ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಖಿಯ್ಯತಿ, ಪಯೋಗೇ ದುಕ್ಕಟಂ; ಖಿಯ್ಯಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಸಿಕ್ಖಮಾನಂ – ‘‘ಸಚೇ ಮೇ ತ್ವಂ, ಅಯ್ಯೇ, ಚೀವರಂ ದಸ್ಸಸಿ, ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ ವತ್ವಾ ನೇವ ವುಟ್ಠಾಪೇನ್ತೀ ನ ವುಟ್ಠಾಪನಾಯ ಉಸ್ಸುಕ್ಕಂ ಕರೋನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಸಿಕ್ಖಮಾನಂ – ‘‘ಸಚೇ ಮಂ ತ್ವಂ, ಅಯ್ಯೇ, ದ್ವೇ ವಸ್ಸಾನಿ ಅನುಬನ್ಧಿಸ್ಸಸಿ, ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ ವತ್ವಾ ನೇವ ವುಟ್ಠಾಪೇನ್ತೀ ನ ವುಟ್ಠಾಪನಾಯ ಉಸ್ಸುಕ್ಕಂ ಕರೋನ್ತೀ ಏಕಂ ಆಪತ್ತಿಂ ಆಪಜ್ಜತಿ. ಪಾಚಿತ್ತಿಯಂ.

ಪುರಿಸಸಂಸಟ್ಠಂ ಕುಮಾರಕಸಂಸಟ್ಠಂ ಚಣ್ಡಿಂ ಸೋಕಾವಾಸಂ ಸಿಕ್ಖಮಾನಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಮಾತಾಪಿತೂಹಿ ವಾ ಸಾಮಿಕೇನ ವಾ ಅನನುಞ್ಞಾತಂ ಸಿಕ್ಖಮಾನಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಪಾರಿವಾಸಿಕಛನ್ದದಾನೇ ಸಿಕ್ಖಮಾನಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಅನುವಸ್ಸಂ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಏಕಂ ವಸ್ಸಂ ದ್ವೇ ವುಟ್ಠಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ವುಟ್ಠಾಪೇತಿ, ಪಯೋಗೇ ದುಕ್ಕಟಂ; ವುಟ್ಠಾಪಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಕುಮಾರೀಭೂತವಗ್ಗೋ ಅಟ್ಠಮೋ.

೯. ಛತ್ತುಪಾಹನವಗ್ಗೋ

೨೩೯. ಛತ್ತುಪಾಹನಂ ಧಾರೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಧಾರೇತಿ, ಪಯೋಗೇ ದುಕ್ಕಟಂ; ಧಾರಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಯಾನೇನ ಯಾಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಯಾಯತಿ, ಪಯೋಗೇ ದುಕ್ಕಟಂ; ಯಾಯಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಸಙ್ಘಾಣಿಂ ಧಾರೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಧಾರೇತಿ, ಪಯೋಗೇ ದುಕ್ಕಟಂ; ಧಾರಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಇತ್ಥಾಲಙ್ಕಾರಂ ಧಾರೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಧಾರೇತಿ, ಪಯೋಗೇ ದುಕ್ಕಟಂ; ಧಾರಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಗನ್ಧವಣ್ಣಕೇನ ನಹಾಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ನಹಾಯತಿ, ಪಯೋಗೇ ದುಕ್ಕಟಂ; ನಹಾನಪರಿಯೋಸಾನೇ, ಆಪತ್ತಿ ಪಾಚಿತ್ತಿಯಸ್ಸ.

ವಾಸಿತಕೇನ ಪಿಞ್ಞಾಕೇನ ನಹಾಯನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ನಹಾಯತಿ, ಪಯೋಗೇ ದುಕ್ಕಟಂ; ನಹಾನಪರಿಯೋಸಾನೇ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುನಿಯಾ ಉಮ್ಮದ್ದಾಪೇನ್ತೀ ಪರಿಮದ್ದಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಉಮ್ಮದ್ದಾಪೇತಿ, ಪಯೋಗೇ ದುಕ್ಕಟಂ; ಉಮ್ಮದ್ದಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಸಿಕ್ಖಮಾನಾಯ ಉಮ್ಮದ್ದಾಪೇನ್ತೀ ಪರಿಮದ್ದಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಉಮ್ಮದ್ದಾಪೇತಿ, ಪಯೋಗೇ ದುಕ್ಕಟಂ; ಉಮ್ಮದ್ದಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಸಾಮಣೇರಿಯಾ ಉಮ್ಮದ್ದಾಪೇನ್ತೀ ಪರಿಮದ್ದಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಉಮ್ಮದ್ದಾಪೇತಿ, ಪಯೋಗೇ ದುಕ್ಕಟಂ; ಉಮ್ಮದ್ದಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಗಿಹಿನಿಯಾ ಉಮ್ಮದ್ದಾಪೇನ್ತೀ ಪರಿಮದ್ದಾಪೇನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಉಮ್ಮದ್ದಾಪೇತಿ, ಪಯೋಗೇ ದುಕ್ಕಟಂ; ಉಮ್ಮದ್ದಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ನಿಸೀದತಿ, ಪಯೋಗೇ ದುಕ್ಕಟಂ; ನಿಸಿನ್ನೇ, ಆಪತ್ತಿ ಪಾಚಿತ್ತಿಯಸ್ಸ.

ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪುಚ್ಛತಿ, ಪಯೋಗೇ ದುಕ್ಕಟಂ; ಪುಚ್ಛಿತೇ, ಆಪತ್ತಿ ಪಾಚಿತ್ತಿಯಸ್ಸ.

ಅಸಙ್ಕಚ್ಚಿಕಾ ಗಾಮಂ ಪವಿಸನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಪರಿಕ್ಖೇಪಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಛತ್ತುಪಾಹನವಗ್ಗೋ ನವಮೋ.

ಖುದ್ದಕಂ ನಿಟ್ಠಿತಂ.

೫. ಪಾಟಿದೇಸನೀಯಕಣ್ಡಂ

೨೪೦. ಸಪ್ಪಿಂ ವಿಞ್ಞಾಪೇತ್ವಾ ಭುಞ್ಜನ್ತೀ ದ್ವೇ ಆಪತ್ತಿಯೋ ಆಪಜ್ಜತಿ. ಭುಞ್ಜಿಸ್ಸಾಮೀತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ; ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಟಿದೇಸನೀಯಸ್ಸ.