೭. ಮಹಾಪೇಸಕಾರಸಿಕ್ಖಾಪದಂ

೬೪೧. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೋ ಪುರಿಸೋ ಪವಾಸಂ ಗಚ್ಛನ್ತೋ ಪಜಾಪತಿಂ ಏತದವೋಚ – ‘‘ಸುತ್ತಂ ಧಾರಯಿತ್ವಾ ಅಮುಕಸ್ಸ ತನ್ತವಾಯಸ್ಸ ದೇಹಿ, ಚೀವರಂ ವಾಯಾಪೇತ್ವಾ ನಿಕ್ಖಿಪ, ಆಗತೋ ಅಯ್ಯಂ ಉಪನನ್ದಂ ಚೀವರೇನ ಅಚ್ಛಾದೇಸ್ಸಾಮೀ’’ತಿ. ಅಸ್ಸೋಸಿ ಖೋ ಅಞ್ಞತರೋ ಪಿಣ್ಡಚಾರಿಕೋ ಭಿಕ್ಖು ತಸ್ಸ ಪುರಿಸಸ್ಸ ಇಮಂ ವಾಚಂ ಭಾಸಮಾನಸ್ಸ. ಅಥ ಖೋ ಸೋ ಭಿಕ್ಖು ಯೇನಾಯಸ್ಮಾ ಉಪನನ್ದೋ ಸಕ್ಯಪುತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಏತದವೋಚ – ‘‘ಮಹಾಪುಞ್ಞೋಸಿ ತ್ವಂ, ಆವುಸೋ ಉಪನನ್ದ, ಅಮುಕಸ್ಮಿಂ ಓಕಾಸೇ ಅಞ್ಞತರೋ ಪುರಿಸೋ ಪವಾಸಂ ಗಚ್ಛನ್ತೋ ಪಜಾಪತಿಂ ಏತದವೋಚ – ‘‘ಸುತ್ತಂ ಧಾರಯಿತ್ವಾ ಅಮುಕಸ್ಸ ತನ್ತವಾಯಸ್ಸ ದೇಹಿ, ಚೀವರಂ ವಾಯಾಪೇತ್ವಾ ನಿಕ್ಖಿಪ, ಆಗತೋ ಅಯ್ಯಂ ಉಪನನ್ದಂ ಚೀವರೇನ ಅಚ್ಛಾದೇಸ್ಸಾಮೀ’’ತಿ. ‘‘ಅತ್ಥಾವುಸೋ, ಮಂ ಸೋ ಉಪಟ್ಠಾಕೋ’’ತಿ. ಸೋಪಿ ಖೋ ತನ್ತವಾಯೋ ಆಯಸ್ಮತೋ ಉಪನನ್ದಸ್ಸ ಸಕ್ಯಪುತ್ತಸ್ಸ ಉಪಟ್ಠಾಕೋ ಹೋತಿ. ಅಥ ಖೋ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಯೇನ ಸೋ ತನ್ತವಾಯೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ತನ್ತವಾಯಂ ಏತದವೋಚ – ‘‘ಇದಂ ಖೋ, ಆವುಸೋ, ಚೀವರಂ ಮಂ ಉದ್ದಿಸ್ಸ ವಿಯ್ಯತಿ; ಆಯತಞ್ಚ ಕರೋಹಿ ವಿತ್ಥತಞ್ಚ. ಅಪ್ಪಿತಞ್ಚ ಸುವೀತಞ್ಚ ಸುಪ್ಪವಾಯಿತಞ್ಚ ಸುವಿಲೇಖಿತಞ್ಚ ಸುವಿತಚ್ಛಿತಞ್ಚ ಕರೋಹೀ’’ತಿ. ‘‘ಏತೇ ಖೋ ಮೇ, ಭನ್ತೇ, ಸುತ್ತಂ ಧಾರಯಿತ್ವಾ ಅದಂಸು; ಇಮಿನಾ ಸುತ್ತೇನ ಚೀವರಂ ವಿನಾಹೀ’’ತಿ. ‘‘ನ, ಭನ್ತೇ, ಸಕ್ಕಾ ಆಯತಂ ವಾ ವಿತ್ಥತಂ ವಾ ಅಪ್ಪಿತಂ ವಾ ಕಾತುಂ. ಸಕ್ಕಾ ಚ ಖೋ, ಭನ್ತೇ, ಸುವೀತಞ್ಚ ಸುಪ್ಪವಾಯಿತಞ್ಚ ಸುವಿಲೇಖಿತಞ್ಚ ಸುವಿತಚ್ಛಿತಞ್ಚ ಕಾತು’’ನ್ತಿ. ‘‘ಇಙ್ಘ ತ್ವಂ, ಆವುಸೋ, ಆಯತಞ್ಚ ಕರೋಹಿ ವಿತ್ಥತಞ್ಚ ಅಪ್ಪಿತಞ್ಚ. ನ ತೇನ ಸುತ್ತೇನ ಪಟಿಬದ್ಧಂ ಭವಿಸ್ಸತೀ’’ತಿ.

ಅಥ ಖೋ ಸೋ ತನ್ತವಾಯೋ ಯಥಾಭತಂ ಸುತ್ತಂ ತನ್ತೇ ಉಪನೇತ್ವಾ ಯೇನ ಸಾ ಇತ್ಥೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಇತ್ಥಿಂ ಏತದವೋಚ – ‘‘ಸುತ್ತೇನ, ಅಯ್ಯೇ, ಅತ್ಥೋ’’ತಿ. ‘‘ನನು ತ್ವಂ ಅಯ್ಯೋ [ಅಯ್ಯ (ಸ್ಯಾ.)] ಮಯಾ ವುತ್ತೋ – ‘ಇಮಿನಾ ಸುತ್ತೇನ ಚೀವರಂ ವಿನಾಹೀ’’’ತಿ. ‘‘ಸಚ್ಚಾಹಂ, ಅಯ್ಯೇ, ತಯಾ ವುತ್ತೋ – ‘ಇಮಿನಾ ಸುತ್ತೇನ ಚೀವರಂ ವಿನಾಹೀ’ತಿ. ಅಪಿಚ, ಮಂ ಅಯ್ಯೋ ಉಪನನ್ದೋ ಏವಮಾಹ – ‘ಇಙ್ಘ ತ್ವಂ, ಆವುಸೋ, ಆಯತಞ್ಚ ಕರೋಹಿ ವಿತ್ಥತಞ್ಚ ಅಪ್ಪಿತಞ್ಚ, ನ ತೇನ ಸುತ್ತೇನ ಪಟಿಬದ್ಧಂ ಭವಿಸ್ಸತೀ’’’ತಿ. ಅಥ ಖೋ ಸಾ ಇತ್ಥೀ ಯತ್ತಕಂಯೇವ ಸುತ್ತಂ ಪಠಮಂ ಅದಾಸಿ ತತ್ತಕಂ ಪಚ್ಛಾ ಅದಾಸಿ. ಅಸ್ಸೋಸಿ ಖೋ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ – ‘‘ಸೋ ಕಿರ ಪುರಿಸೋ ಪವಾಸತೋ ಆಗತೋ’’ತಿ. ಅಥ ಖೋ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಯೇನ ತಸ್ಸ ಪುರಿಸಸ್ಸ ನಿವೇಸನಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ. ಅಥ ಖೋ ಸೋ ಪುರಿಸೋ ಯೇನಾಯಸ್ಮಾ ಉಪನನ್ದೋ ಸಕ್ಯಪುತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಸೋ ಪುರಿಸೋ ಪಜಾಪತಿಂ ಏತದವೋಚ – ‘‘ವೀತಂ ತಂ ಚೀವರ’’ನ್ತಿ? ‘‘ಆಮಾಯ್ಯ, ವೀತಂ ತಂ ಚೀವರ’’ನ್ತಿ. ‘‘ಆಹರ, ಅಯ್ಯಂ ಉಪನನ್ದಂ ಚೀವರೇನ ಅಚ್ಛಾದೇಸ್ಸಾಮೀ’’ತಿ. ಅಥ ಖೋ ಸಾ ಇತ್ಥೀ ತಂ ಚೀವರಂ ನೀಹರಿತ್ವಾ ಸಾಮಿಕಸ್ಸ ದತ್ವಾ ಏತಮತ್ಥಂ ಆರೋಚೇಸಿ. ಅಥ ಖೋ ಸೋ ಪುರಿಸೋ ಆಯಸ್ಮತೋ ಉಪನನ್ದಸ್ಸ ಸಕ್ಯಪುತ್ತಸ್ಸ ಚೀವರಂ ದತ್ವಾ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಮಹಿಚ್ಛಾ ಇಮೇ ಸಮಣಾ ಸಕ್ಯಪುತ್ತಿಯಾ ಅಸನ್ತುಟ್ಠಾ. ನಯಿಮೇ ಸುಕರಾ ಚೀವರೇನ ಅಚ್ಛಾದೇತುಂ. ಕಥಞ್ಹಿ ನಾಮ ಅಯ್ಯೋ ಉಪನನ್ದೋ ಮಯಾ ಪುಬ್ಬೇ ಅಪ್ಪವಾರಿತೋ ತನ್ತವಾಯೇ [ಗಹಪತಿಕಸ್ಸ ತನ್ತವಾಯೇ (ಕ.)] ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜಿಸ್ಸತೀ’’ತಿ.

ಅಸ್ಸೋಸುಂ ಖೋ ಭಿಕ್ಖೂ ತಸ್ಸ ಪುರಿಸಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಪುಬ್ಬೇ ಅಪ್ಪವಾರಿತೋ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತ್ವಂ, ಉಪನನ್ದ, ಪುಬ್ಬೇ ಅಪ್ಪವಾರಿತೋ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜೀ’’ತಿ? ‘‘ಸಚ್ಚಂ, ಭಗವಾ’’ತಿ. ‘‘ಞಾತಕೋ ತೇ, ಉಪನನ್ದ, ಅಞ್ಞಾತಕೋ’’ತಿ? ‘‘ಅಞ್ಞಾತಕೋ, ಭಗವಾ’’ತಿ. ‘‘ಅಞ್ಞಾತಕೋ, ಮೋಘಪುರಿಸ, ಅಞ್ಞಾತಕಸ್ಸ ನ ಜಾನಾತಿ ಪತಿರೂಪಂ ವಾ ಅಪ್ಪತಿರೂಪಂ ವಾ ಸನ್ತಂ ವಾ ಅಸನ್ತಂ ವಾ. ತತ್ಥ ನಾಮ ತ್ವಂ, ಮೋಘಪುರಿಸ, ಪುಬ್ಬೇ ಅಪ್ಪವಾರಿತೋ ಅಞ್ಞಾತಕಸ್ಸ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜಿಸ್ಸಸಿ! ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೬೪೨. ‘‘ಭಿಕ್ಖುಂ ಪನೇವ ಉದ್ದಿಸ್ಸ ಅಞ್ಞಾತಕೋ ಗಹಪತಿ ವಾ ಗಹಪತಾನೀ ವಾ ತನ್ತವಾಯೇಹಿ ಚೀವರಂ ವಾಯಾಪೇಯ್ಯ, ತತ್ರ ಚೇ ಸೋ ಭಿಕ್ಖು ಪುಬ್ಬೇ ಅಪ್ಪವಾರಿತೋ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜೇಯ್ಯ – ‘ಇದಂ ಖೋ, ಆವುಸೋ, ಚೀವರಂ ಮಂ ಉದ್ದಿಸ್ಸ ವಿಯ್ಯತಿ. ಆಯತಞ್ಚ ಕರೋಥ ವಿತ್ಥತಞ್ಚ. ಅಪ್ಪಿತಞ್ಚ ಸುವೀತಞ್ಚ ಸುಪ್ಪವಾಯಿತಞ್ಚ ಸುವಿಲೇಖಿತಞ್ಚ ಸುವಿತಚ್ಛಿತಞ್ಚ ಕರೋಥ. ಅಪ್ಪೇವ ನಾಮ ಮಯಮ್ಪಿ ಆಯಸ್ಮನ್ತಾನಂ ಕಿಞ್ಚಿಮತ್ತಂ ಅನುಪದಜ್ಜೇಯ್ಯಾಮಾ’ತಿ. ಏವಞ್ಚ ಸೋ ಭಿಕ್ಖು ವತ್ವಾ ಕಿಞ್ಚಿಮತ್ತಂ ಅನುಪದಜ್ಜೇಯ್ಯ ಅನ್ತಮಸೋ ಪಿಣ್ಡಪಾತಮತ್ತಮ್ಪಿ, ನಿಸ್ಸಗ್ಗಿಯಂ ಪಾಚಿತ್ತಿಯ’’ನ್ತಿ.

೬೪೩. ಭಿಕ್ಖುಂ ಪನೇವ ಉದ್ದಿಸ್ಸಾತಿ ಭಿಕ್ಖುಸ್ಸತ್ಥಾಯ ಭಿಕ್ಖುಂ ಆರಮ್ಮಣಂ ಕರಿತ್ವಾ ಭಿಕ್ಖುಂ ಅಚ್ಛಾದೇತುಕಾಮೋ.

ಅಞ್ಞಾತಕೋ ನಾಮ ಮಾತಿತೋ ವಾ ಪಿತಿತೋ ವಾ ಯಾವ ಸತ್ತಮಾ ಪಿತಾಮಹಯುಗಾ ಅಸಮ್ಬದ್ಧೋ.

ಗಹಪತಿ ನಾಮ ಯೋ ಕೋಚಿ ಅಗಾರಂ ಅಜ್ಝಾವಸತಿ.

ಗಹಪತಾನೀ ನಾಮ ಯಾ ಕಾಚಿ ಅಗಾರಂ ಅಜ್ಝಾವಸತಿ.

ತನ್ತವಾಯೇಹೀತಿ ಪೇಸಕಾರೇಹಿ.

ಚೀವರಂ ನಾಮ ಛನ್ನಂ ಚೀವರಾನಂ ಅಞ್ಞತರಂ ಚೀವರಂ ವಿಕಪ್ಪನುಪಗಂ ಪಚ್ಛಿಮಂ.

ವಾಯಾಪೇಯ್ಯಾತಿ ವಿನಾಪೇತಿ.

ತತ್ರ ಚೇ ಸೋ ಭಿಕ್ಖೂತಿ ಯಂ ಭಿಕ್ಖುಂ ಉದ್ದಿಸ್ಸ ಚೀವರಂ ವಿಯ್ಯತಿ ಸೋ ಭಿಕ್ಖು.

ಪುಬ್ಬೇ ಅಪ್ಪವಾರಿತೋತಿ ಪುಬ್ಬೇ ಅವುತ್ತೋ ಹೋತಿ – ‘‘ಕೀದಿಸೇನ ತೇ, ಭನ್ತೇ, ಚೀವರೇನ ಅತ್ಥೋ, ಕೀದಿಸಂ ತೇ ಚೀವರಂ ವಾಯಾಪೇಮೀ’’ತಿ?

ತನ್ತವಾಯೇ ಉಪಸಙ್ಕಮಿತ್ವಾತಿ ಘರಂ ಗನ್ತ್ವಾ ಯತ್ಥ ಕತ್ಥಚಿ ಉಪಸಙ್ಕಮಿತ್ವಾ.

ಚೀವರೇ ವಿಕಪ್ಪಂ ಆಪಜ್ಜೇಯ್ಯಾತಿ – ‘‘ಇದಂ ಖೋ, ಆವುಸೋ, ಚೀವರಂ ಮಂ ಉದ್ದಿಸ್ಸ ವಿಯ್ಯತಿ, ಆಯತಞ್ಚ ಕರೋಥ ವಿತ್ಥತಞ್ಚ. ಅಪ್ಪಿತಞ್ಚ ಸುವೀತಞ್ಚ ಸುಪ್ಪವಾಯಿತಞ್ಚ ಸುವಿಲೇಖಿತಞ್ಚ ಸುವಿತಚ್ಛಿತಞ್ಚ ಕರೋಥ. ಅಪ್ಪೇವ ನಾಮ ಮಯಮ್ಪಿ ಆಯಸ್ಮನ್ತಾನಂ ಕಿಞ್ಚಿಮತ್ತಂ ಅನುಪದಜ್ಜೇಯ್ಯಾಮಾ’’ತಿ.

ಏವಞ್ಚ ಸೋ ಭಿಕ್ಖು ವತ್ವಾ ಕಿಞ್ಚಿಮತ್ತಂ ಅನುಪದಜ್ಜೇಯ್ಯ ಅನ್ತಮಸೋ ಪಿಣ್ಡಪಾತಮತ್ತಮ್ಪೀತಿ. ಪಿಣ್ಡಪಾತೋ ನಾಮ ಯಾಗುಪಿ ಭತ್ತಮ್ಪಿ ಖಾದನೀಯಮ್ಪಿ ಚುಣ್ಣಪಿಣ್ಡೋಪಿ ದನ್ತಕಟ್ಠಮ್ಪಿ ದಸಿಕಸುತ್ತಮ್ಪಿ, ಅನ್ತಮಸೋ ಧಮ್ಮಮ್ಪಿ ಭಣತಿ.

ತಸ್ಸ ವಚನೇನ ಆಯತಂ ವಾ ವಿತ್ಥತಂ ವಾ ಅಪ್ಪಿತಂ ವಾ ಕರೋತಿ, ಪಯೋಗೇ ದುಕ್ಕಟಂ. ಪಟಿಲಾಭೇನ ನಿಸ್ಸಗ್ಗಿಯಂ ಹೋತಿ. ನಿಸ್ಸಜ್ಜಿತಬ್ಬಂ ಸಙ್ಘಸ್ಸ ವಾ ಗಣಸ್ಸ ವಾ ಪುಗ್ಗಲಸ್ಸ ವಾ. ಏವಞ್ಚ ಪನ, ಭಿಕ್ಖವೇ, ನಿಸ್ಸಜ್ಜಿತಬ್ಬಂ…ಪೇ… ಇದಂ ಮೇ, ಭನ್ತೇ, ಚೀವರಂ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕಸ್ಸ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪನ್ನಂ ನಿಸ್ಸಗ್ಗಿಯಂ. ಇಮಾಹಂ ಸಙ್ಘಸ್ಸ ನಿಸ್ಸಜ್ಜಾಮೀತಿ…ಪೇ… ದದೇಯ್ಯಾತಿ…ಪೇ… ದದೇಯ್ಯುನ್ತಿ…ಪೇ… ಆಯಸ್ಮತೋ ದಮ್ಮೀತಿ.

೬೪೪. ಅಞ್ಞಾತಕೇ ಅಞ್ಞಾತಕಸಞ್ಞೀ ಪುಬ್ಬೇ ಅಪ್ಪವಾರಿತೋ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಞ್ಞಾತಕೇ ವೇಮತಿಕೋ ಪುಬ್ಬೇ ಅಪ್ಪವಾರಿತೋ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ. ಅಞ್ಞಾತಕೇ ಞಾತಕಸಞ್ಞೀ ಪುಬ್ಬೇ ಅಪ್ಪವಾರಿತೋ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಂ ಆಪಜ್ಜತಿ, ನಿಸ್ಸಗ್ಗಿಯಂ ಪಾಚಿತ್ತಿಯಂ.

ಞಾತಕೇ ಅಞಾತಕಸಞ್ಞೀ, ಆಪತ್ತಿ ದುಕ್ಕಟಸ್ಸ. ಞಾತಕೇ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಞಾತಕೇ ಞಾತಕಸಞ್ಞೀ, ಅನಾಪತ್ತಿ.

೬೪೫. ಅನಾಪತ್ತಿ – ಞಾತಕಾನಂ, ಪವಾರಿತಾನಂ, ಅಞ್ಞಸ್ಸತ್ಥಾಯ, ಅತ್ತನೋ ಧನೇನ, ಮಹಗ್ಘಂ ವಾಯಾಪೇತುಕಾಮಸ್ಸ ಅಪ್ಪಗ್ಘಂ ವಾಯಾಪೇತಿ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಮಹಾಪೇಸಕಾರಸಿಕ್ಖಾಪದಂ ನಿಟ್ಠಿತಂ ಸತ್ತಮಂ.