೬. ಕುಟಿಕಾರಸಿಕ್ಖಾಪದಂ

೩೪೨. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಆಳವಕಾ ಭಿಕ್ಖೂ ಸಞ್ಞಾಚಿಕಾಯೋ ಕುಟಿಯೋ ಕಾರಾಪೇನ್ತಿ ಅಸ್ಸಾಮಿಕಾಯೋ ಅತ್ತುದ್ದೇಸಿಕಾಯೋ ಅಪ್ಪಮಾಣಿಕಾಯೋ. ತಾಯೋ ನ ನಿಟ್ಠಾನಂ ಗಚ್ಛನ್ತಿ. ತೇ ಯಾಚನಬಹುಲಾ ವಿಞ್ಞತ್ತಿಬಹುಲಾ ವಿಹರನ್ತಿ – ‘‘ಪುರಿಸಂ ದೇಥ, ಪುರಿಸತ್ಥಕರಂ ದೇಥ, ಗೋಣಂ ದೇಥ, ಸಕಟಂ ದೇಥ, ವಾಸಿಂ ದೇಥ, ಪರಸುಂ ದೇಥ, ಕುಠಾರಿಂ ದೇಥ, ಕುದಾಲಂ ದೇಥ, ನಿಖಾದನಂ ದೇಥ, ವಲ್ಲಿಂ ದೇಥ, ವೇಳುಂ ದೇಥ, ಮುಞ್ಜಂ ದೇಥ, ಪಬ್ಬಜಂ ದೇಥ, ತಿಣಂ ದೇಥ, ಮತ್ತಿಕಂ ದೇಥಾ’’ತಿ. ಮನುಸ್ಸಾ ಉಪದ್ದುತಾ ಯಾಚನಾಯ ಉಪದ್ದುತಾ ವಿಞ್ಞತ್ತಿಯಾ ಭಿಕ್ಖೂ ದಿಸ್ವಾ ಉಬ್ಬಿಜ್ಜನ್ತಿಪಿ ಉತ್ತಸನ್ತಿಪಿ ಪಲಾಯನ್ತಿಪಿ ಅಞ್ಞೇನಪಿ ಗಚ್ಛನ್ತಿ ಅಞ್ಞೇನಪಿ ಮುಖಂ ಕರೋನ್ತಿ ದ್ವಾರಮ್ಪಿ ಥಕೇನ್ತಿ, ಗಾವಿಮ್ಪಿ ದಿಸ್ವಾ ಪಲಾಯನ್ತಿ ಭಿಕ್ಖೂತಿ ಮಞ್ಞಮಾನಾ.

ಅಥ ಖೋ ಆಯಸ್ಮಾ ಮಹಾಕಸ್ಸಪೋ ರಾಜಗಹೇ ವಸ್ಸಂವುಟ್ಠೋ ಯೇನ ಆಳವೀ ತೇನ ಪಕ್ಕಾಮಿ. ಅನುಪುಬ್ಬೇನ ಯೇನ ಆಳವೀ ತದವಸರಿ. ತತ್ರ ಸುದಂ ಆಯಸ್ಮಾ ಮಹಾಕಸ್ಸಪೋ ಆಳವಿಯಂ ವಿಹರತಿ ಅಗ್ಗಾಳವೇ ಚೇತಿಯೇ. ಅಥ ಖೋ ಆಯಸ್ಮಾ ಮಹಾಕಸ್ಸಪೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಆಳವಿಂ ಪಿಣ್ಡಾಯ ಪಾವಿಸಿ. ಮನುಸ್ಸಾ ಆಯಸ್ಮನ್ತಂ ಮಹಾಕಸ್ಸಪಂ ಪಸ್ಸಿತ್ವಾ ಉಬ್ಬಿಜ್ಜನ್ತಿಪಿ ಉತ್ತಸನ್ತಿಪಿ ಪಲಾಯನ್ತಿಪಿ ಅಞ್ಞೇನಪಿ ಗಚ್ಛನ್ತಿ ಅಞ್ಞೇನಪಿ ಮುಖಂ ಕರೋನ್ತಿ ದ್ವಾರಮ್ಪಿ ಥಕೇನ್ತಿ. ಅಥ ಖೋ ಆಯಸ್ಮಾ ಮಹಾಕಸ್ಸಪೋ ಆಳವಿಯಂ ಪಿಣ್ಡಾಯ ಚರಿತ್ವಾ ಪಚ್ಛಾಭತ್ತಂ ಪಿಣ್ಡಪಾತಪ್ಪಟಿಕ್ಕನ್ತೋ ಭಿಕ್ಖೂ ಆಮನ್ತೇಸಿ – ‘‘ಪುಬ್ಬಾಯಂ, ಆವುಸೋ, ಆಳವೀ ಸುಭಿಕ್ಖಾ ಅಹೋಸಿ ಸುಲಭಪಿಣ್ಡಾ ಸುಕರಾ ಉಞ್ಛೇನ ಪಗ್ಗಹೇನ ಯಾಪೇತುಂ; ಏತರಹಿ ಪನಾಯಂ ಆಳವೀ ದುಬ್ಭಿಕ್ಖಾ ದುಲ್ಲಭಪಿಣ್ಡಾ, ನ ಸುಕರಾ ಉಞ್ಛೇನ ಪಗ್ಗಹೇನ ಯಾಪೇತುಂ. ಕೋ ನು ಖೋ, ಆವುಸೋ, ಹೇತು ಕೋ ಪಚ್ಚಯೋ, ಯೇನಾಯಂ ಆಳವೀ ದುಬ್ಭಿಕ್ಖಾ ದುಲ್ಲಭಪಿಣ್ಡಾ, ನ ಸುಕರಾ ಉಞ್ಛೇನ ಪಗ್ಗಹೇನ ಯಾಪೇತು’’ನ್ತಿ? ಅಥ ಖೋ ತೇ ಭಿಕ್ಖೂ ಆಯಸ್ಮತೋ ಮಹಾಕಸ್ಸಪಸ್ಸ ಏತಮತ್ಥಂ ಆರೋಚೇಸುಂ.

೩೪೩. ಅಥ ಖೋ ಭಗವಾ ರಾಜಗಹೇ ಯಥಾಭಿರನ್ತಂ ವಿಹರಿತ್ವಾ ಯೇನ ಆಳವೀ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಆಳವೀ ತದವಸರಿ. ತತ್ರ ಸುದಂ ಭಗವಾ ಆಳವಿಯಂ ವಿಹರತಿ ಅಗ್ಗಾಳವೇ ಚೇತಿಯೇ. ಅಥ ಖೋ ಆಯಸ್ಮಾ ಮಹಾಕಸ್ಸಪೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ಮಹಾಕಸ್ಸಪೋ ಭಗವತೋ ಏತಮತ್ಥಂ ಆರೋಚೇಸಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಳವಕೇ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ಸಞ್ಞಾಚಿಕಾಯೋ ಕುಟಿಯೋ ಕಾರಾಪೇಥ ಅಸ್ಸಾಮಿಕಾಯೋ ಅತ್ತುದ್ದೇಸಿಕಾಯೋ ಅಪ್ಪಮಾಣಿಕಾಯೋ. ತಾಯೋ ನ ನಿಟ್ಠಾನಂ ಗಚ್ಛನ್ತಿ. ತೇ ತುಮ್ಹೇ ಯಾಚನಬಹುಲಾ ವಿಞ್ಞತ್ತಿಬಹುಲಾ ವಿಹರಥ – ‘ಪುರಿಸಂ ದೇಥ ಪುರಿಸತ್ಥಕರಂ ದೇಥ…ಪೇ… ತಿಣಂ ದೇಥ ಮತ್ತಿಕಂ ದೇಥಾ’ತಿ. ಮನುಸ್ಸಾ ಉಪದ್ದುತಾ ಯಾಚನಾಯ ಉಪದ್ದುತಾ ವಿಞ್ಞತ್ತಿಯಾ ಭಿಕ್ಖೂ ದಿಸ್ವಾ ಉಬ್ಬಿಜ್ಜನ್ತಿಪಿ ಉತ್ತಸನ್ತಿಪಿ ಪಲಾಯನ್ತಿಪಿ ಅಞ್ಞೇನಪಿ ಗಚ್ಛನ್ತಿ ಅಞ್ಞೇನಪಿ ಮುಖಂ ಕರೋನ್ತಿ ದ್ವಾರಮ್ಪಿ ಥಕೇನ್ತಿ, ಗಾವಿಮ್ಪಿ ದಿಸ್ವಾ ಪಲಾಯನ್ತಿ ಭಿಕ್ಖೂತಿ ಮಞ್ಞಮಾನಾ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಸಂಯಾಚಿಕಾಯೋ ಕುಟಿಯೋ ಕಾರಾಪೇಸ್ಸಥ ಅಸ್ಸಾಮಿಕಾಯೋ ಅತ್ತುದ್ದೇಸಿಕಾಯೋ ಅಪ್ಪಮಾಣಿಕಾಯೋ! ತಾಯೋ ನ ನಿಟ್ಠಾನಂ ಗಚ್ಛನ್ತಿ. ತೇ ತುಮ್ಹೇ ಯಾಚನಬಹುಲಾ ವಿಞ್ಞತ್ತಿಬಹುಲಾ ವಿಹರಿಸ್ಸಥ – ‘ಪುರಿಸಂ ದೇಥ ಪುರಿಸತ್ಥಕರಂ ದೇಥ…ಪೇ… ತಿಣಂ ದೇಥ ಮತ್ತಿಕಂ ದೇಥಾ’ತಿ! ನೇತಂ ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ…’’ ವಿಗರಹಿತ್ವಾ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೪೪. ‘‘ಭೂತಪುಬ್ಬಂ, ಭಿಕ್ಖವೇ, ದ್ವೇ ಭಾತರೋ ಇಸಯೋ ಗಙ್ಗಂ ನದಿಂ ಉಪನಿಸ್ಸಾಯ ವಿಹರಿಂಸು. ಅಥ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ ಗಙ್ಗಂ ನದಿಂ ಉತ್ತರಿತ್ವಾ ಯೇನ ಕನಿಟ್ಠೋ ಇಸಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಕನಿಟ್ಠಂ ಇಸಿಂ ಸತ್ತಕ್ಖತ್ತುಂ ಭೋಗೇಹಿ ಪರಿಕ್ಖಿಪಿತ್ವಾ ಉಪರಿಮುದ್ಧನಿ ಮಹನ್ತಂ ಫಣಂ ಕರಿತ್ವಾ ಅಟ್ಠಾಸಿ. ಅಥ ಖೋ, ಭಿಕ್ಖವೇ, ಕನಿಟ್ಠೋ ಇಸಿ ತಸ್ಸ ನಾಗಸ್ಸ ಭಯಾ ಕಿಸೋ ಅಹೋಸಿ ಲೂಖೋ ದುಬ್ಬಣ್ಣೋ ಉಪ್ಪಣ್ಡುಪ್ಪಣ್ಡುಕಜಾತೋ ಧಮನಿಸನ್ಥತಗತ್ತೋ. ಅದ್ದಸ ಖೋ, ಭಿಕ್ಖವೇ, ಜೇಟ್ಠೋ ಇಸಿ ಕನಿಟ್ಠಂ ಇಸಿಂ ಕಿಸಂ ಲೂಖಂ ದುಬ್ಬಣ್ಣಂ ಉಪ್ಪಣ್ಡುಪ್ಪಣ್ಡುಕಜಾತಂ ಧಮನಿಸನ್ಥತಗತ್ತಂ. ದಿಸ್ವಾನ ಕನಿಟ್ಠಂ ಇಸಿಂ ಏತದವೋಚ – ‘‘ಕಿಸ್ಸ ತ್ವಂ, ಭೋ, ಕಿಸೋ ಲೂಖೋ ದುಬ್ಬಣ್ಣೋ ಉಪ್ಪಣ್ಡುಪ್ಪಣ್ಡುಕಜಾತೋ ಧಮನಿಸನ್ಥತಗತ್ತೋ’’ತಿ? ‘‘ಇಧ, ಭೋ, ಮಣಿಕಣ್ಠೋ ನಾಗರಾಜಾ ಗಙ್ಗಂ ನದಿಂ ಉತ್ತರಿತ್ವಾ ಯೇನಾಹಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಮಂ ಸತ್ತಕ್ಖತ್ತುಂ ಭೋಗೇಹಿ ಪರಿಕ್ಖಿಪಿತ್ವಾ ಉಪರಿಮುದ್ಧನಿ ಮಹನ್ತಂ ಫಣಂ ಕರಿತ್ವಾ ಅಟ್ಠಾಸಿ. ತಸ್ಸಾಹಂ, ಭೋ, ನಾಗಸ್ಸ ಭಯಾ [ಭಯಾಮ್ಹಿ (ಸೀ.)] ಕಿಸೋ ಲೂಖೋ ದುಬ್ಬಣ್ಣೋ ಉಪ್ಪಣ್ಡುಪ್ಪಣ್ಡುಕಜಾತೋ ಧಮನಿಸನ್ಥತಗತ್ತೋ’’ತಿ. ‘‘ಇಚ್ಛಸಿ ಪನ ತ್ವಂ, ಭೋ, ತಸ್ಸ ನಾಗಸ್ಸ ಅನಾಗಮನ’’ನ್ತಿ? ‘‘ಇಚ್ಛಾಮಹಂ, ಭೋ, ತಸ್ಸ ನಾಗಸ್ಸ ಅನಾಗಮನ’’ನ್ತಿ. ‘‘ಅಪಿ ಪನ ತ್ವಂ, ಭೋ, ತಸ್ಸ ನಾಗಸ್ಸ ಕಿಞ್ಚಿ ಪಸ್ಸಸೀ’’ತಿ? ‘‘ಪಸ್ಸಾಮಹಂ, ಭೋ, ಮಣಿಮಸ್ಸ [ಮಣಿಸ್ಸ (ಸೀ. ಕ.)] ಕಣ್ಠೇ ಪಿಲನ್ಧನ’’ನ್ತಿ. ‘‘ತೇನ ಹಿ ತ್ವಂ, ಭೋ, ತಂ ನಾಗಂ ಮಣಿಂ ಯಾಚ – ‘ಮಣಿಂ ಮೇ, ಭೋ, ದೇಹಿ; ಮಣಿನಾ ಮೇ ಅತ್ಥೋ’’’ತಿ.

ಅಥ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ ಗಙ್ಗಂ ನದಿಂ ಉತ್ತರಿತ್ವಾ ಯೇನ ಕನಿಟ್ಠೋ ಇಸಿ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಏಕಮನ್ತಂ ಅಟ್ಠಾಸಿ. ಏಕಮನ್ತಂ ಠಿತಂ ಖೋ, ಭಿಕ್ಖವೇ, ಮಣಿಕಣ್ಠಂ ನಾಗರಾಜಾನಂ ಕನಿಟ್ಠೋ ಇಸಿ ಏತದವೋಚ – ‘‘ಮಣಿಂ ಮೇ, ಭೋ, ದೇಹಿ; ಮಣಿನಾ ಮೇ ಅತ್ಥೋ’’ತಿ. ಅಥ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ – ‘ಭಿಕ್ಖು ಮಣಿಂ ಯಾಚತಿ, ಭಿಕ್ಖುಸ್ಸ ಮಣಿನಾ ಅತ್ಥೋ’ತಿ ಖಿಪ್ಪಞ್ಞೇವ ಅಗಮಾಸಿ. ದುತಿಯಮ್ಪಿ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ ಗಙ್ಗಂ ನದಿಂ ಉತ್ತರಿತ್ವಾ ಯೇನ ಕನಿಟ್ಠೋ ಇಸಿ ತೇನುಪಸಙ್ಕಮಿ. ಅದ್ದಸ ಖೋ, ಭಿಕ್ಖವೇ, ಕನಿಟ್ಠೋ ಇಸಿ ಮಣಿಕಣ್ಠಂ ನಾಗರಾಜಾನಂ ದೂರತೋವ ಆಗಚ್ಛನ್ತಂ. ದಿಸ್ವಾನ ಮಣಿಕಣ್ಠಂ ನಾಗರಾಜಾನಂ ಏತದವೋಚ – ‘‘ಮಣಿಂ ಮೇ, ಭೋ, ದೇಹಿ; ಮಣಿನಾ ಮೇ ಅತ್ಥೋ’’ತಿ. ಅಥ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ – ‘‘ಭಿಕ್ಖು ಮಣಿಂ ಯಾಚತಿ, ಭಿಕ್ಖುಸ್ಸ ಮಣಿನಾ ಅತ್ಥೋ’’ತಿ ತತೋವ ಪಟಿನಿವತ್ತಿ. ತತಿಯಮ್ಪಿ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ ಗಙ್ಗಂ ನದಿಂ ಉತ್ತರತಿ. ಅದ್ದಸ ಖೋ, ಭಿಕ್ಖವೇ, ಕನಿಟ್ಠೋ ಇಸಿ ಮಣಿಕಣ್ಠಂ ನಾಗರಾಜಾನಂ ಗಙ್ಗಂ ನದಿಂ ಉತ್ತರನ್ತಂ. ದಿಸ್ವಾನ ಮಣಿಕಣ್ಠಂ ನಾಗರಾಜಾನಂ ಏತದವೋಚ – ‘‘ಮಣಿಂ ಮೇ, ಭೋ, ದೇಹಿ; ಮಣಿನಾ ಮೇ ಅತ್ಥೋ’’ತಿ. ಅಥ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ ಕನಿಟ್ಠಂ ಇಸಿಂ ಗಾಥಾಹಿ ಅಜ್ಝಭಾಸಿ –

[ಜಾ. ೧.೩.೭ ಮಣಿಕಣ್ಠಜಾತಕೇಪಿ] ‘‘ಮಮನ್ನಪಾನಂ ವಿಪುಲಂ ಉಳಾರಂ,

ಉಪ್ಪಜ್ಜತೀಮಸ್ಸ ಮಣಿಸ್ಸ ಹೇತು;

ತಂ ತೇ ನ ದಸ್ಸಂ ಅತಿಯಾಚಕೋಸಿ;

ನ ಚಾಪಿ ತೇ ಅಸ್ಸಮಮಾಗಮಿಸ್ಸಂ.

[ಜಾ. ೧.೩.೮ ಮಣಿಕಣ್ಠಜಾತಕೇಪಿ] ‘‘ಸುಸೂ ಯಥಾ ಸಕ್ಖರಧೋತಪಾಣೀ;

ತಾಸೇಸಿ ಮಂ ಸೇಲಮಾಯಾಚಮಾನೋ;

ತಂ ತೇ ನ ದಸ್ಸಂ ಅತಿಯಾಚಕೋಸಿ;

ನ ಚಾಪಿ ತೇ ಅಸ್ಸಮಮಾಗಮಿಸ್ಸ’’ನ್ತಿ.

ಅಥ ಖೋ, ಭಿಕ್ಖವೇ, ಮಣಿಕಣ್ಠೋ ನಾಗರಾಜಾ – ‘‘ಭಿಕ್ಖು ಮಣಿಂ ಯಾಚತಿ, ಭಿಕ್ಖುಸ್ಸ ಮಣಿನಾ ಅತ್ಥೋ’’ತಿ ಪಕ್ಕಾಮಿ. ತಥಾ ಪಕ್ಕನ್ತೋವ [ತದಾಪಕ್ಕನ್ತೋವ (ಕ.)] ಅಹೋಸಿ, ನ ಪುನ ಪಚ್ಚಾಗಞ್ಛಿ. ಅಥ ಖೋ, ಭಿಕ್ಖವೇ, ಕನಿಟ್ಠೋ ಇಸಿ ತಸ್ಸ ನಾಗಸ್ಸ ದಸ್ಸನೀಯಸ್ಸ ಅದಸ್ಸನೇನ ಭಿಯ್ಯೋಸೋಮತ್ತಾಯ ಕಿಸೋ ಅಹೋಸಿ ಲೂಖೋ ದುಬ್ಬಣ್ಣೋ, ಉಪ್ಪಣ್ಡುಪ್ಪಣ್ಡುಕಜಾತೋ ಧಮನಿಸನ್ಥತಗತ್ತೋ. ಅದ್ದಸ ಖೋ, ಭಿಕ್ಖವೇ, ಜೇಟ್ಠೋ ಇಸಿ ಕನಿಟ್ಠಂ ಇಸಿಂ ಭಿಯ್ಯೋಸೋಮತ್ತಾಯ ಕಿಸಂ ಲೂಖಂ ದುಬ್ಬಣ್ಣಂ ಉಪ್ಪಣ್ಡುಪ್ಪಣ್ಡುಕಜಾತಂ ಧಮನಿಸನ್ಥತಗತ್ತಂ. ದಿಸ್ವಾನ ಕನಿಟ್ಠಂ ಇಸಿಂ ಏತದವೋಚ – ‘‘ಕಿಸ್ಸ ತ್ವಂ, ಭೋ, ಭಿಯ್ಯೋಸೋಮತ್ತಾಯ ಕಿಸೋ ಲೂಖೋ ದುಬ್ಬಣ್ಣೋ ಉಪ್ಪಣ್ಡುಪ್ಪಣ್ಡುಕಜಾತೋ ಧಮನಿಸನ್ಥತಗತ್ತೋ’’ತಿ? ‘‘ತಸ್ಸಾಹಂ, ಭೋ, ನಾಗಸ್ಸ ದಸ್ಸನೀಯಸ್ಸ ಅದಸ್ಸನೇನ ಭಿಯ್ಯೋಸೋಮತ್ತಾಯ ಕಿಸೋ ಲೂಖೋ ದುಬ್ಬಣ್ಣೋ ಉಪ್ಪಣ್ಡುಪ್ಪಣ್ಡುಕಜಾತೋ ಧಮನಿಸನ್ಥತಗತ್ತೋ’’ತಿ. ಅಥ ಖೋ, ಭಿಕ್ಖವೇ, ಜೇಟ್ಠೋ ಇಸಿ ಕನಿಟ್ಠಂ ಇಸಿಂ ಗಾಥಾಯ ಅಜ್ಝಭಾಸಿ –

[ಜಾ. ೧.೩.೯ ಮಣಿಕಣ್ಠಜಾತಕೇಪಿ] ‘‘ನ ತಂ ಯಾಚೇ ಯಸ್ಸ ಪಿಯಂ ಜಿಗೀಸೇ,

ವಿದೇಸ್ಸೋ [ದೇಸ್ಸೋ (ಸೀ.), ದೇಸ್ಸೋ ಚ (ಸ್ಯಾ.)] ಹೋತಿ ಅತಿಯಾಚನಾಯ;

ನಾಗೋ ಮಣಿಂ ಯಾಚಿತೋ ಬ್ರಾಹ್ಮಣೇನ;

ಅದಸ್ಸನಞ್ಞೇವ ತದಜ್ಝಗಮಾ’’ತಿ.

ತೇಸಞ್ಹಿ ನಾಮ, ಭಿಕ್ಖವೇ, ತಿರಚ್ಛಾನಗತಾನಂ ಪಾಣಾನಂ ಅಮನಾಪಾ ಭವಿಸ್ಸತಿ ಯಾಚನಾ ಅಮನಾಪಾ ವಿಞ್ಞತ್ತಿ. ಕಿಮಙ್ಗಂ [ಕಿಮಙ್ಗ (ಸೀ.)] ಪನ ಮನುಸ್ಸಭೂತಾನಂ!

೩೪೫. ‘‘ಭೂತಪುಬ್ಬಂ, ಭಿಕ್ಖವೇ, ಅಞ್ಞತರೋ ಭಿಕ್ಖು ಹಿಮವನ್ತಪಸ್ಸೇ ವಿಹರತಿ ಅಞ್ಞತರಸ್ಮಿಂ ವನಸಣ್ಡೇ. ತಸ್ಸ ಖೋ, ಭಿಕ್ಖವೇ, ವನಸಣ್ಡಸ್ಸ ಅವಿದೂರೇ ಮಹನ್ತಂ ನಿನ್ನಂ ಪಲ್ಲಲಂ. ಅಥ ಖೋ,

ವಾಸಾಯ ಉಪಗಚ್ಛತಿ. ಅಥ ಖೋ, ಭಿಕ್ಖವೇ, ಸೋ ಭಿಕ್ಖು ತಸ್ಸ ಸಕುಣಸಙ್ಘಸ್ಸ ಸದ್ದೇನ ಉಬ್ಬಾಳ್ಹೋ ಯೇನಾಹಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಮಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಂ ಖೋ ಅಹಂ, ಭಿಕ್ಖವೇ, ತಂ ಭಿಕ್ಖುಂ ಏತದವೋಚ – ‘ಕಚ್ಚಿ, ಭಿಕ್ಖು, ಖಮನೀಯಂ ಕಚ್ಚಿ ಯಾಪನೀಯಂ ಕಚ್ಚಿಸಿ ಅಪ್ಪಕಿಲಮಥೇನ ಅದ್ಧಾನಂ ಆಗತೋ? ಕುತೋ ಚ ತ್ವಂ, ಭಿಕ್ಖು, ಆಗಚ್ಛಸೀ’ತಿ? ‘ಖಮನೀಯಂ, ಭಗವಾ, ಯಾಪನೀಯಂ, ಭಗವಾ. ಅಪ್ಪಕಿಲಮಥೇನ ಚಾಹಂ, ಭನ್ತೇ, ಅದ್ಧಾನಂ ಆಗತೋ. ಅತ್ಥಿ, ಭನ್ತೇ, ಹಿಮವನ್ತಪಸ್ಸೇ ಮಹಾವನಸಣ್ಡೋ. ತಸ್ಸ ಖೋ ಪನ, ಭನ್ತೇ, ವನಸಣ್ಡಸ್ಸ ಅವಿದೂರೇ ಮಹನ್ತಂ ನಿನ್ನಂ ಪಲ್ಲಲಂ. ಅಥ ಖೋ, ಭನ್ತೇ, ಮಹಾಸಕುಣಸಙ್ಘೋ ತಸ್ಮಿಂ ಪಲ್ಲಲೇ ದಿವಸಂ ಗೋಚರಂ ಚರಿತ್ವಾ ಸಾಯಂ ತಂ ವನಸಣ್ಡಂ ವಾಸಾಯ ಉಪಗಚ್ಛತಿ. ತತೋ ಅಹಂ, ಭಗವಾ, ಆಗಚ್ಛಾಮಿ – ತಸ್ಸ ಸಕುಣಸಙ್ಘಸ್ಸ ಸದ್ದೇನ ಉಬ್ಬಾಳ್ಹೋ’ತಿ. ‘ಇಚ್ಛಸಿ ಪನ ತ್ವಂ, ಭಿಕ್ಖು, ತಸ್ಸ ಸಕುಣಸಙ್ಘಸ್ಸ ಅನಾಗಮನ’ನ್ತಿ? ‘ಇಚ್ಛಾಮಹಂ, ಭಗವಾ, ತಸ್ಸ ಸಕುಣಸಙ್ಘಸ್ಸ ಅನಾಗಮನ’ನ್ತಿ. ‘ತೇನ ಹಿ ತ್ವಂ, ಭಿಕ್ಖು, ತತ್ಥ ಗನ್ತ್ವಾ ತಂ ವನಸಣ್ಡಂ ಅಜ್ಝೋಗಾಹೇತ್ವಾ ರತ್ತಿಯಾ ಪಠಮಂ ಯಾಮಂ ತಿಕ್ಖತ್ತುಂ ಸದ್ದಮನುಸ್ಸಾವೇಹಿ – ಸುಣನ್ತು ಮೇ, ಭೋನ್ತೋ ಸಕುಣಾ, ಯಾವತಿಕಾ ಇಮಸ್ಮಿಂ ವನಸಣ್ಡೇ ವಾಸಂ ಉಪಗತಾ, ಪತ್ತೇನ ಮೇ ಅತ್ಥೋ. ಏಕೇಕಂ ಮೇ, ಭೋನ್ತೋ, ಪತ್ತಂ ದದನ್ತೂ’ತಿ. ರತ್ತಿಯಾ ಮಜ್ಝಿಮಂ ಯಾಮಂ… ರತ್ತಿಯಾ ಪಚ್ಛಿಮಂ ಯಾಮಂ ತಿಕ್ಖತ್ತುಂ ಸದ್ದಮನುಸ್ಸಾವೇಹಿ – ‘ಸುಣನ್ತು ಮೇ, ಭೋನ್ತೋ ಸಕುಣಾ, ಯಾವತಿಕಾ ಇಮಸ್ಮಿಂ ವನಸಣ್ಡೇ ವಾಸಂ ಉಪಗತಾ, ಪತ್ತೇನ ಮೇ ಅತ್ಥೋ. ಏಕೇಕಂ ಮೇ, ಭೋನ್ತೋ, ಪತ್ತಂ ದದನ್ತೂ’ತಿ.

‘‘ಅಥ ಖೋ, ಭಿಕ್ಖವೇ, ಸೋ ಭಿಕ್ಖು ತತ್ಥ ಗನ್ತ್ವಾ ತಂ ವನಸಣ್ಡಂ ಅಜ್ಝೋಗಾಹೇತ್ವಾ ರತ್ತಿಯಾ ಪಠಮಂ ಯಾಮಂ ತಿಕ್ಖತ್ತುಂ ಸದ್ದಮನುಸ್ಸಾವೇಸಿ – ‘ಸುಣನ್ತು ಮೇ, ಭೋನ್ತೋ ಸಕುಣಾ, ಯಾವತಿಕಾ ಇಮಸ್ಮಿಂ ವನಸಣ್ಡೇ ವಾಸಂ ಉಪಗತಾ, ಪತ್ತೇನ ಮೇ ಅತ್ಥೋ. ಏಕೇಕಂ ಮೇ, ಭೋನ್ತೋ, ಪತ್ತಂ ದದನ್ತೂ’ತಿ. ರತ್ತಿಯಾ ಮಜ್ಝಿಮ ಯಾಮಂ… ರತ್ತಿಯಾ ಪಚ್ಛಿಮಂ ಯಾಮಂ ತಿಕ್ಖತ್ತುಂ ಸದ್ದಮನುಸ್ಸಾವೇಸಿ – ‘ಸುಣನ್ತು ಮೇ, ಭೋನ್ತೋ ಸಕುಣಾ, ಯಾವತಿಕಾ ಇಮಸ್ಮಿಂ ವನಸಣ್ಡೇ ವಾಸಂ ಉಪಗತಾ, ಪತ್ತೇನ ಮೇ ಅತ್ಥೋ. ಏಕೇಕಂ ಮೇ, ಭೋನ್ತೋ, ಪತ್ತಂ ದದನ್ತೂ’ತಿ. ಅಥ ಖೋ, ಭಿಕ್ಖವೇ, ಸೋ ಸಕುಣಸಙ್ಘೋ – ‘ಭಿಕ್ಖು ಪತ್ತಂ ಯಾಚತಿ ಭಿಕ್ಖುಸ್ಸ ಪತ್ತೇನ ಅತ್ಥೋ’ತಿ ತಮ್ಹಾ ವನಸಣ್ಡಾ ಪಕ್ಕಾಮಿ. ತಥಾ ಪಕ್ಕನ್ತೋವ ಅಹೋಸಿ ನ ಪುನ ಪಚ್ಚಾಗಞ್ಛಿ. ತೇಸಞ್ಹಿ ನಾಮ, ಭಿಕ್ಖವೇ, ತಿರಚ್ಛಾನಗತಾನಂ ಪಾಣಾನಂ ಅಮನಾಪಾ ಭವಿಸ್ಸತಿ ಯಾಚನಾ ಅಮನಾಪಾ ವಿಞ್ಞತ್ತಿ. ಕಿಮಙ್ಗಂ ಪನ ಮನುಸ್ಸಭೂತಾನಂ’’!

೩೪೬. ‘‘ಭೂತಪುಬ್ಬಂ, ಭಿಕ್ಖವೇ, ರಟ್ಠಪಾಲಸ್ಸ ಕುಲಪುತ್ತಸ್ಸ ಪಿತಾ ರಟ್ಠಪಾಲಂ ಕುಲಪುತ್ತಂ ಗಾಥಾಯ ಅಜ್ಝಭಾಸಿ –

‘ಅಪಾಹಂ ತೇ ನ ಜಾನಾಮಿ, ರಟ್ಠಪಾಲ ಬಹೂ ಜನಾ;

[ಜಾ. ೧.೭.೫೪] ತೇ ಮಂ ಸಙ್ಗಮ್ಮ ಯಾಚನ್ತಿ, ಕಸ್ಮಾ ಮಂ ತ್ವಂ ನ ಯಾಚಸೀ’ತಿ.

[ಜಾ. ೧.೭.೫೫] ‘ಯಾಚಕೋ ಅಪ್ಪಿಯೋ ಹೋತಿ, ಯಾಚಂ ಅದದಮಪ್ಪಿಯೋ;

ತಸ್ಮಾಹಂ ತಂ ನ ಯಾಚಾಮಿ, ಮಾ ಮೇ ವಿದೇಸ್ಸನಾ ಅಹೂ’ತಿ.

‘‘ಸೋ ಹಿ ನಾಮ, ಭಿಕ್ಖವೇ, ರಟ್ಠಪಾಲೋ ಕುಲಪುತ್ತೋ ಸಕಂ ಪಿತರಂ ಏವಂ ವಕ್ಖತಿ. ಕಿಮಙ್ಗಂ ಪನ ಜನೋ ಜನಂ!

೩೪೭. ‘‘ಗಿಹೀನಂ, ಭಿಕ್ಖವೇ, ದುಸ್ಸಂಹರಾನಿ ಭೋಗಾನಿ ಸಮ್ಭತಾನಿಪಿ ದುರಕ್ಖಿಯಾನಿ. ತತ್ಥ ನಾಮ ತುಮ್ಹೇ, ಮೋಘಪುರಿಸಾ, ಏವಂ ದುಸ್ಸಂಹರೇಸು ಭೋಗೇಸು ಸಮ್ಭತೇಸುಪಿ ದುರಕ್ಖಿಯೇಸು ಯಾಚನಬಹುಲಾ ವಿಞ್ಞತ್ತಿಬಹುಲಾ ವಿಹರಿಸ್ಸಥ – ‘ಪುರಿಸಂ ದೇಥ, ಪುರಿಸತ್ಥಕರಂ ದೇಥ, ಗೋಣಂ ದೇಥ, ಸಕಟಂ ದೇಥ, ವಾಸಿಂ ದೇಥ, ಪರಸುಂ ದೇಥ, ಕುಠಾರಿಂ ದೇಥ, ಕುದಾಲಂ ದೇಥ, ನಿಖಾದನಂ ದೇಥ, ವಲ್ಲಿಂ ದೇಥ, ವೇಳುಂ ದೇಥ, ಮುಞ್ಜಂ ದೇಥ, ಪಬ್ಬಜಂ ದೇಥ, ತಿಣಂ ದೇಥ, ಮತ್ತಿಕಂ ದೇಥಾ’’ತಿ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೩೪೮. ‘‘ಸಞ್ಞಾಚಿಕಾಯ ಪನ ಭಿಕ್ಖುನಾ ಕುಟಿಂ ಕಾರಯಮಾನೇನ ಅಸ್ಸಾಮಿಕಂ ಅತ್ತುದ್ದೇಸಂ ಪಮಾಣಿಕಾ ಕಾರೇತಬ್ಬಾ. ತತ್ರಿದಂ ಪಮಾಣಂ – ದೀಘಸೋ ದ್ವಾದಸ ವಿದತ್ಥಿಯೋ, ಸುಗತವಿದತ್ಥಿಯಾ; ತಿರಿಯಂ ಸತ್ತನ್ತರಾ. ಭಿಕ್ಖೂ ಅಭಿನೇತಬ್ಬಾ ವತ್ಥುದೇಸನಾಯ. ತೇಹಿ ಭಿಕ್ಖೂಹಿ ವತ್ಥು ದೇಸೇತಬ್ಬಂ – ಅನಾರಮ್ಭಂ [ಅನಾರಬ್ಭಂ (ಕ.)] ಸಪರಿಕ್ಕಮನಂ. ಸಾರಮ್ಭೇ [ಸಾರಬ್ಭೇ (ಕ.)] ಚೇ ಭಿಕ್ಖು ವತ್ಥುಸ್ಮಿಂ ಅಪರಿಕ್ಕಮನೇ ಸಞ್ಞಾಚಿಕಾಯ ಕುಟಿಂ ಕಾರೇಯ್ಯ, ಭಿಕ್ಖೂ ವಾ ಅನಭಿನೇಯ್ಯ ವತ್ಥುದೇಸನಾಯ, ಪಮಾಣಂ ವಾ ಅತಿಕ್ಕಾಮೇಯ್ಯ, ಸಙ್ಘಾದಿಸೇಸೋ’’ತಿ.

೩೪೯. ಸಞ್ಞಾಚಿಕಾ ನಾಮ ಸಯಂ ಯಾಚಿತ್ವಾ ಪುರಿಸಮ್ಪಿ ಪುರಿಸತ್ಥಕರಮ್ಪಿ ಗೋಣಮ್ಪಿ ಸಕಟಮ್ಪಿ ವಾಸಿಮ್ಪಿ ಪರಸುಮ್ಪಿ ಕುಠಾರಿಮ್ಪಿ ಕುದಾಲಮ್ಪಿ ನಿಖಾದನಮ್ಪಿ ವಲ್ಲಿಮ್ಪಿ ವೇಳುಮ್ಪಿ ಮುಞ್ಜಮ್ಪಿ ಪಬ್ಬಜಮ್ಪಿ ತಿಣಮ್ಪಿ ಮತ್ತಿಕಮ್ಪಿ.

ಕುಟಿ ನಾಮ ಉಲ್ಲಿತ್ತಾ ವಾ ಹೋತಿ ಅವಲಿತ್ತಾ ವಾ ಉಲ್ಲಿತ್ತಾವಲಿತ್ತಾ ವಾ.

ಕಾರಯಮಾನೇನಾತಿ ಕರೋನ್ತೋ ವಾ ಕಾರಾಪೇನ್ತೋ ವಾ.

ಅಸ್ಸಾಮಿಕನ್ತಿ ನ ಅಞ್ಞೋ ಕೋಚಿ ಸಾಮಿಕೋ ಹೋತಿ, ಇತ್ಥೀ ವಾ ಪುರಿಸೋ ವಾ ಗಹಟ್ಠೋ ವಾ ಪಬ್ಬಜಿತೋ ವಾ.

ಅತ್ತುದ್ದೇಸನ್ತಿ ಅತ್ತನೋ ಅತ್ಥಾಯ.

ಪಮಾಣಿಕಾ ಕಾರೇತಬ್ಬಾ. ತತ್ರಿದಂ ಪಮಾಣಂ – ದೀಘಸೋ ದ್ವಾದಸ ವಿದತ್ಥಿಯೋ, ಸುಗತವಿದತ್ಥಿಯಾತಿ ಬಾಹಿರಿಮೇನ ಮಾನೇನ.

ತಿರಿಯಂ ಸತ್ತನ್ತರಾತಿ ಅಬ್ಭನ್ತರಿಮೇನ ಮಾನೇನ.

ಭಿಕ್ಖೂ ಅಭಿನೇತಬ್ಬಾ ವತ್ಥುದೇಸನಾಯಾತಿ ತೇನ ಕುಟಿಕಾರಕೇನ ಭಿಕ್ಖುನಾ ಕುಟಿವತ್ಥುಂ ಸೋಧೇತ್ವಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅಹಂ, ಭನ್ತೇ, ಸಞ್ಞಾಚಿಕಾಯ ಕುಟಿಂ ಕತ್ತುಕಾಮೋ ಅಸ್ಸಾಮಿಕಂ ಅತ್ತುದ್ದೇಸಂ. ಸೋಹಂ, ಭನ್ತೇ, ಸಙ್ಘಂ ಕುಟಿವತ್ಥುಓಲೋಕನಂ ಯಾಚಾಮೀ’’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಸಚೇ ಸಬ್ಬೋ ಸಙ್ಘೋ ಉಸ್ಸಹತಿ ಕುಟಿವತ್ಥುಂ ಓಲೋಕೇತುಂ, ಸಬ್ಬೇನ ಸಙ್ಘೇನ ಓಲೋಕೇತಬ್ಬಂ. ನೋ ಚೇ ಸಬ್ಬೋ ಸಙ್ಘೋ ಉಸ್ಸಹತಿ ಕುಟಿವತ್ಥುಂ ಓಲೋಕೇತುಂ, ಯೇ ತತ್ಥ ಹೋನ್ತಿ ಭಿಕ್ಖೂ ಬ್ಯತ್ತಾ ಪಟಿಬಲಾ ಸಾರಮ್ಭಂ ಅನಾರಮ್ಭಂ ಸಪರಿಕ್ಕಮನಂ ಅಪರಿಕ್ಕಮನಂ ಜಾನಿತುಂ ತೇ ಯಾಚಿತ್ವಾ ಸಮ್ಮನ್ನಿತಬ್ಬಾ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೩೫೦. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಞ್ಞಾಚಿಕಾಯ ಕುಟಿಂ ಕತ್ತುಕಾಮೋ ಅಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ಕುಟಿವತ್ಥುಓಲೋಕನಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಞ್ಚ ಇತ್ಥನ್ನಾಮಞ್ಚ ಭಿಕ್ಖೂ ಸಮ್ಮನ್ನೇಯ್ಯ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಂ ಓಲೋಕೇತುಂ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಞ್ಞಾಚಿಕಾಯ ಕುಟಿಂ ಕತ್ತುಕಾಮೋ ಅಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ಕುಟಿವತ್ಥುಓಲೋಕನಂ ಯಾಚತಿ. ಸಙ್ಘೋ ಇತ್ಥನ್ನಾಮಞ್ಚ ಇತ್ಥನ್ನಾಮಞ್ಚ ಭಿಕ್ಖೂ ಸಮ್ಮನ್ನತಿ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಂ ಓಲೋಕೇತುಂ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಚ ಇತ್ಥನ್ನಾಮಸ್ಸ ಚ ಭಿಕ್ಖೂನಂ ಸಮ್ಮುತಿ [ಸಮ್ಮತಿ (ಸ್ಯಾ.)] ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಂ ಓಲೋಕೇತುಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮೋ ಚ ಇತ್ಥನ್ನಾಮೋ ಚ ಭಿಕ್ಖೂ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಂ ಓಲೋಕೇತುಂ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೩೫೧. ತೇಹಿ ಸಮ್ಮತೇಹಿ ಭಿಕ್ಖೂಹಿ ತತ್ಥ ಗನ್ತ್ವಾ ಕುಟಿವತ್ಥು ಓಲೋಕೇತಬ್ಬಂ, ಸಾರಮ್ಭಂ ಅನಾರಮ್ಭಂ ಸಪರಿಕ್ಕಮನಂ ಅಪರಿಕ್ಕಮನಂ ಜಾನಿತಬ್ಬಂ. ಸಚೇ ಸಾರಮ್ಭಂ ಹೋತಿ ಅಪರಿಕ್ಕಮನಂ, ‘ಮಾ ಇಧ ಕರೀ’ತಿ ವತ್ತಬ್ಬೋ. ಸಚೇ ಅನಾರಮ್ಭಂ ಹೋತಿ ಸಪರಿಕ್ಕಮನಂ, ಸಙ್ಘಸ್ಸ ಆರೋಚೇತಬ್ಬಂ – ‘ಅನಾರಮ್ಭಂ ಸಪರಿಕ್ಕಮನ’ನ್ತಿ. ತೇನ ಕುಟಿಕಾರಕೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅಹಂ, ಭನ್ತೇ, ಸಞ್ಞಾಚಿಕಾಯ ಕುಟಿಂ ಕತ್ತುಕಾಮೋ ಅಸ್ಸಾಮಿಕಂ ಅತ್ತುದ್ದೇಸಂ. ಸೋಹಂ, ಭನ್ತೇ, ಸಙ್ಘಂ ಕುಟಿವತ್ಥುದೇಸನಂ ಯಾಚಾಮೀ’’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೩೫೨. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಞ್ಞಾಚಿಕಾಯ ಕುಟಿಂ ಕತ್ತುಕಾಮೋ ಅಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ಕುಟಿವತ್ಥುದೇಸನಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಂ ದೇಸೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಸಞ್ಞಾಚಿಕಾಯ ಕುಟಿಂ ಕತ್ತುಕಾಮೋ ಅಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ಕುಟಿವತ್ಥುದೇಸನಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಂ ದೇಸೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥುಸ್ಸ ದೇಸನಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದೇಸಿತಂ ಸಙ್ಘೇನ ಇತ್ಥನ್ನಾಮಸ್ಸ ಭಿಕ್ಖುನೋ ಕುಟಿವತ್ಥು. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೩೫೩. ಸಾರಮ್ಭಂ ನಾಮ ಕಿಪಿಲ್ಲಿಕಾನಂ ವಾ ಆಸಯೋ ಹೋತಿ, ಉಪಚಿಕಾನಂ ವಾ ಆಸಯೋ ಹೋತಿ, ಉನ್ದುರಾನಂ ವಾ ಆಸಯೋ ಹೋತಿ, ಅಹೀನಂ ವಾ ಆಸಯೋ ಹೋತಿ, ವಿಚ್ಛಿಕಾನಂ ವಾ ಆಸಯೋ ಹೋತಿ, ಸತಪದೀನಂ ವಾ ಆಸಯೋ ಹೋತಿ, ಹತ್ಥೀನಂ ವಾ ಆಸಯೋ ಹೋತಿ, ಅಸ್ಸಾನಂ ವಾ ಆಸಯೋ ಹೋತಿ, ಸೀಹಾನಂ ವಾ ಆಸಯೋ ಹೋತಿ, ಬ್ಯಗ್ಘಾನಂ ವಾ ಆಸಯೋ ಹೋತಿ, ದೀಪೀನಂ ವಾ ಆಸಯೋ ಹೋತಿ, ಅಚ್ಛಾನಂ ವಾ ಆಸಯೋ ಹೋತಿ, ತರಚ್ಛಾನಂ ವಾ ಆಸಯೋ ಹೋತಿ, ಯೇಸಂ ಕೇಸಞ್ಚಿ ತಿರಚ್ಛಾನಗತಾನಂ ಪಾಣಾನಂ ಆಸಯೋ ಹೋತಿ, ಪುಬ್ಬಣ್ಣನಿಸ್ಸಿತಂ ವಾ ಹೋತಿ, ಅಪರಣ್ಣನಿಸ್ಸಿತಂ ವಾ ಹೋತಿ, ಅಬ್ಭಾಘಾತನಿಸ್ಸಿತಂ ವಾ ಹೋತಿ, ಆಘಾತನನಿಸ್ಸಿತಂ ವಾ ಹೋತಿ, ಸುಸಾನನಿಸ್ಸಿತಂ ವಾ ಹೋತಿ, ಉಯ್ಯಾನನಿಸ್ಸಿತಂ ವಾ ಹೋತಿ, ರಾಜವತ್ಥುನಿಸ್ಸಿತಂ ವಾ ಹೋತಿ, ಹತ್ಥಿಸಾಲಾನಿಸ್ಸಿತಂ ವಾ ಹೋತಿ, ಅಸ್ಸಸಾಲಾನಿಸ್ಸಿತಂ ವಾ ಹೋತಿ, ಬನ್ಧನಾಗಾರನಿಸ್ಸಿತಂ ವಾ ಹೋತಿ, ಪಾನಾಗಾರನಿಸ್ಸಿತಂ ವಾ ಹೋತಿ, ಸೂನನಿಸ್ಸಿತಂ ವಾ ಹೋತಿ, ರಚ್ಛಾನಿಸ್ಸಿತಂ ವಾ ಹೋತಿ, ಚಚ್ಚರನಿಸ್ಸಿತಂ ವಾ ಹೋತಿ, ಸಭಾನಿಸ್ಸಿತಂ ವಾ ಹೋತಿ, ಸಂಸರಣನಿಸ್ಸಿತಂ ವಾ [ಸಞ್ಚರಣನಿಸ್ಸಿತಂ ವಾ (ಕ.)] ಹೋತಿ. ಏತಂ ಸಾರಮ್ಭಂ ನಾಮ.

ಅಪರಿಕ್ಕಮನಂ ನಾಮ ನ ಸಕ್ಕಾ ಹೋತಿ ಯಥಾಯುತ್ತೇನ ಸಕಟೇನ ಅನುಪರಿಗನ್ತುಂ ಸಮನ್ತಾ ನಿಸ್ಸೇಣಿಯಾ ಅನುಪರಿಗನ್ತುಂ. ಏತಂ ಅಪರಿಕ್ಕಮನಂ ನಾಮ.

ಅನಾರಮ್ಭಂ ನಾಮ ನ ಕಿಪಿಲ್ಲಿಕಾನಂ ವಾ ಆಸಯೋ ಹೋತಿ, ನ ಉಪಚಿಕಾನಂ ವಾ ಆಸಯೋ ಹೋತಿ, ನ ಉನ್ದುರಾನಂ ವಾ ಆಸಯೋ ಹೋತಿ, ನ ಅಹೀನಂ ವಾ ಆಸಯೋ ಹೋತಿ, ನ ವಿಚ್ಛಿಕಾನಂ ವಾ ಆಸಯೋ ಹೋತಿ, ನ ಸತಪದೀನಂ ವಾ ಆಸಯೋ ಹೋತಿ…ಪೇ… ನ ಸಂಸರಣನಿಸ್ಸಿತಂ ವಾ ಹೋತಿ. ಏತಂ ಅನಾರಮ್ಭಂ ನಾಮ.

ಸಪರಿಕ್ಕಮನಂ ನಾಮ ಸಕ್ಕಾ ಹೋತಿ ಯಥಾಯುತ್ತೇನ ಸಕಟೇನ ಅನುಪರಿಗನ್ತುಂ, ಸಮನ್ತಾ ನಿಸ್ಸೇಣಿಯಾ ಅನುಪರಿಗನ್ತುಂ. ಏತಂ ಸಪರಿಕ್ಕಮನಂ ನಾಮ.

ಸಞ್ಞಾಚಿಕಾ ನಾಮ ಸಯಂ ಯಾಚಿತ್ವಾ ಪುರಿಸಮ್ಪಿ ಪುರಿಸತ್ಥಕರಮ್ಪಿ…ಪೇ… ಮತ್ತಿಕಮ್ಪಿ.

ಕುಟಿ ನಾಮ ಉಲ್ಲಿತ್ತಾ ವಾ ಹೋತಿ ವಾ ಅವಲಿತ್ತಾ ವಾ ಉಲ್ಲಿತ್ತಾವಲಿತ್ತಾ ವಾ.

ಕಾರೇಯ್ಯಾತಿ ಕರೋತಿ ವಾ ಕಾರಾಪೇತಿ ವಾ.

ಭಿಕ್ಖೂ ವಾ ಅನಭಿನೇಯ್ಯ, ವತ್ಥುದೇಸನಾಯ ಪಮಾಣಂ ವಾ ಅತಿಕ್ಕಾಮೇಯ್ಯಾತಿ ಞತ್ತಿದುತಿಯೇನ ಕಮ್ಮೇನ ಕುಟಿವತ್ಥುಂ ನ ದೇಸಾಪೇತ್ವಾ, ಆಯಾಮತೋ ವಾ ವಿತ್ಥಾರತೋ ವಾ ಅನ್ತಮಸೋ ಕೇಸಗ್ಗಮತ್ತಮ್ಪಿ ಅತಿಕ್ಕಾಮೇತ್ವಾ ಕರೋತಿ ವಾ ಕಾರಾಪೇತಿ ವಾ, ಪಯೋಗೇ ಪಯೋಗೇ ದುಕ್ಕಟಂ. ಏಕಂ ಪಿಣ್ಡಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ. ತಸ್ಮಿಂ ಪಿಣ್ಡೇ ಆಗತೇ ಆಪತ್ತಿ ಸಙ್ಘಾದಿಸೇಸಸ್ಸ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೩೫೪. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

೩೫೫. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಕುಟಿಂ ಕರೋತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ಕುಟಿಂ ಕರೋತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಪಮಾಣಾತಿಕ್ಕನ್ತಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಪಮಾಣಾತಿಕ್ಕನ್ತಂ ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಕುಟಿಂ ಕರೋತಿ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ಕುಟಿಂ ಕರೋತಿ ಪಮಾಣಿಕಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಪಮಾಣಿಕಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಪಮಾಣಿಕಂ ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ.

ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಪಮಾಣಿಕಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ಕುಟಿಂ ಕರೋತಿ ದೇಸಿತವತ್ಥುಕಂ ಪಮಾಣಿಕಂ ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೫೬. ಭಿಕ್ಖು ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ.

ಭಿಕ್ಖು ಸಮಾದಿಸತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೫೭. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ …ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೫೮. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಅದೇಸಿತವತ್ಥುಕಾ ಸಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಅದೇಸಿತವತ್ಥುಕಾ ಸಾರಮ್ಭಾ ಸಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚಾ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಅನಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಅದೇಸಿತವತ್ಥುಕಾ ಅನಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ದೇಸಿತವತ್ಥುಕಾ ಚ ಹೋತು ಸಪರಿಕ್ಕಮನಾ ಚಾ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಅನಾರಮ್ಭಂ ಸಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಅದೇಸಿತವತ್ಥುಕಾ ಅನಾರಮ್ಭಾ ಸಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ದೇಸಿತವತ್ಥುಕಾ ಹೋತೂ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ದೇಸಿತವತ್ಥುಕಾ ಸಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಅನಾರಮ್ಭಾ ಚ ಹೋತು ಸಪರಿಕ್ಕಮನಾ ಚಾ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ದೇಸಿತವತ್ಥುಕಾ ಸಾರಮ್ಭಾ ಸಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಅನಾರಮ್ಭಾ ಹೋತೂ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಅನಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ದೇಸಿತವತ್ಥುಕಾ ಅನಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಸಪರಿಕ್ಕಮನಾ ಹೋತೂ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೫೯. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಪಮಾಣಾತಿಕ್ಕನ್ತಾ ಸಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ…ಪೇ… ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚಾ’’ತಿ…ಪೇ… ‘‘ಪಮಾಣಿಕಾ ಚ ಹೋತು ಸಪರಿಕ್ಕಮನಾ ಚಾ’’ತಿ…ಪೇ… ‘‘ಪಮಾಣಿಕಾ ಹೋತೂ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಪಮಾಣಿಕಾ ಸಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಅನಾರಮ್ಭಾ ಚ ಹೋತು ಸಪರಿಕ್ಕಮನಾ ಚಾ’’ತಿ…ಪೇ… ‘‘ಅನಾರಮ್ಭಾ ಹೋತೂ’’ತಿ…ಪೇ… ‘‘ಸಪರಿಕ್ಕಮನಾ ಹೋತೂ’’ತಿ…ಪೇ… ಅನಾಪತ್ತಿ.

೩೬೦. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ಅದೇಸಿತವತ್ಥುಕಾ ಪಮಾಣಾತಿಕ್ಕನ್ತಾ ಸಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ…ಪೇ… ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚಾ’’ತಿ…ಪೇ… ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಸಪರಿಕ್ಕಮನಾ ಚಾ’’ತಿ…ಪೇ… ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚಾ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ಕುಟಿ ಕಿರ ಮೇ ಕಯಿರತಿ ದೇಸಿತವತ್ಥುಕಾ ಪಮಾಣಿಕಾ ಸಾರಮ್ಭಾ ಅಪರಿಕ್ಕಮನಾ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಅನಾರಮ್ಭಾ ಚ ಹೋತು ಸಪರಿಕ್ಕಮನಾ ಚಾ’’ತಿ…ಪೇ… ‘‘ಅನಾರಮ್ಭಾ ಹೋತೂ’’ತಿ…ಪೇ… ‘‘ಸಪರಿಕ್ಕಮನಾ ಹೋತೂ’’ತಿ…ಪೇ… ಅನಾಪತ್ತಿ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ತಿಣ್ಣಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಾಟನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ತಿಣ್ಣಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಅನಾರಮ್ಭಂ ಸಪರಿಕ್ಕಮನಂ ಆಪತ್ತಿ ಕಾರುಕಾನಂ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ಪಮಾಣಿಕಾ ಚ ಹೋತು ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ಚತುನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ತಿಣ್ಣಂ ದುಕ್ಕಟಾನಂ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ತಿಣ್ಣಂ ದುಕ್ಕಟಾನಂ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕಾ ಚ ಹೋತು ಪಮಾಣಿಕಾ ಚ ಅನಾರಮ್ಭಾ ಚ ಸಪರಿಕ್ಕಮನಾ ಚಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೬೧. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ…ಪೇ… ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ…ಪೇ… ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೬೨. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ಅದೇಸಿತವತ್ಥುಕಂ ಪಮಾಣಾತಿಕ್ಕನ್ತಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಪಮಾಣಿಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸಾ ಕುಟಿ ಅಞ್ಞಸ್ಸ ವಾ ದಾತಬ್ಬಾ ಭಿನ್ದಿತ್ವಾ ವಾ ಪುನ ಕಾತಬ್ಬಾ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ದ್ವಿನ್ನಂ ದುಕ್ಕಾಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ಕುಟಿಂ ಮೇ ಕರೋಥಾ’’ತಿ. ತಸ್ಸ ಕುಟಿಂ ಕರೋನ್ತಿ ದೇಸಿತವತ್ಥುಕಂ ಪಮಾಣಿಕಂ ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೬೩. ಅತ್ತನಾ ವಿಪ್ಪಕತಂ ಅತ್ತನಾ ಪರಿಯೋಸಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಅತ್ತನಾ ವಿಪ್ಪಕತಂ ಪರೇಹಿ ಪರಿಯೋಸಾಪೇತಿ [ಪರಿಯೋಸಾವಾಪೇತಿ (ಕ.)], ಆಪತ್ತಿ ಸಙ್ಘಾದಿಸೇಸಸ್ಸ.

ಪರೇಹಿ ವಿಪ್ಪಕತಂ ಅತ್ತನಾ ಪರಿಯೋಸಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪರೇಹಿ ವಿಪ್ಪಕತಂ ಪರೇಹಿ ಪರಿಯೋಸಾಪೇತಿ [ಪರಿಯೋಸಾವಾಪೇತಿ (ಕ.)], ಆಪತ್ತಿ ಸಙ್ಘಾದಿಸೇಸಸ್ಸ.

೩೬೪. ಅನಾಪತ್ತಿ ಲೇಣೇ ಗುಹಾಯ ತಿಣಕುಟಿಕಾಯ ಅಞ್ಞಸ್ಸತ್ಥಾಯ ವಾಸಾಗಾರಂ ಠಪೇತ್ವಾ ಸಬ್ಬತ್ಥ, ಅನಾಪತ್ತಿ ಉಮ್ಮತ್ತಕಸ್ಸ ಆದಿಕಮ್ಮಿಕಸ್ಸಾತಿ.

ಕುಟಿಕಾರಸಿಕ್ಖಾಪದಂ ನಿಟ್ಠಿತಂ ಛಟ್ಠಂ.