೭. ವಿಹಾರಕಾರಸಿಕ್ಖಾಪದಂ

೩೬೫. ತೇನ ಸಮಯೇನ ಬುದ್ಧೋ ಭಗವಾ ಕೋಸಮ್ಬಿಯಂ ವಿಹರತಿ ಘೋಸಿತಾರಾಮೇ. ತೇನ ಖೋ ಪನ ಸಮಯೇನ ಆಯಸ್ಮತೋ ಛನ್ನಸ್ಸ ಉಪಟ್ಠಾಕೋ ಗಹಪತಿ ಆಯಸ್ಮನ್ತಂ ಛನ್ನಂ ಏತದವೋಚ – ‘‘ವಿಹಾರವತ್ಥುಂ, ಭನ್ತೇ, ಜಾನಾಹಿ ಅಯ್ಯಸ್ಸ ವಿಹಾರಂ ಕಾರಾಪೇಸ್ಸಾಮೀ’’ತಿ. ಅಥ ಖೋ ಆಯಸ್ಮಾ ಛನ್ನೋ ವಿಹಾರವತ್ಥುಂ ಸೋಧೇನ್ತೋ ಅಞ್ಞತರಂ ಚೇತಿಯರುಕ್ಖಂ ಛೇದಾಪೇಸಿ ಗಾಮಪೂಜಿತಂ ನಿಗಮಪೂಜಿತಂ ನಗರಪೂಜಿತಂ ಜನಪದಪೂಜಿತಂ ರಟ್ಠಪೂಜಿತಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ಚೇತಿಯರುಕ್ಖಂ ಛೇದಾಪೇಸ್ಸನ್ತಿ ಗಾಮಪೂಜಿತಂ ನಿಗಮಪೂಜಿತಂ ನಗರಪೂಜಿತಂ ಜನಪದಪೂಜಿತಂ ರಟ್ಠಪೂಜಿತಂ! ಏಕಿನ್ದ್ರಿಯಂ ಸಮಣಾ ಸಕ್ಯಪುತ್ತಿಯಾ ಜೀವಂ ವಿಹೇಠೇನ್ತೀ’’ [ವಿಹೇಠೇಸ್ಸನ್ತಿ (ಕತ್ಥಚಿ)] ತಿ. ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಛನ್ನೋ ಚೇತಿಯರುಕ್ಖಂ ಛೇದಾಪೇಸ್ಸತಿ ಗಾಮಪೂಜಿತಂ…ಪೇ… ರಟ್ಠಪೂಜಿತ’’ನ್ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಛನ್ನಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತ್ವಂ, ಛನ್ನ, ಚೇತಿಯರುಕ್ಖಂ ಛೇದಾಪೇಸಿ ಗಾಮಪೂಜಿತಂ…ಪೇ… ರಟ್ಠಪೂಜಿತ’’ನ್ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಚೇತಿಯರುಕ್ಖಂ ಛೇದಾಪೇಸ್ಸಸಿ ಗಾಮಪೂಜಿತಂ ನಿಗಮಪೂಜಿತಂ ನಗರಪೂಜಿತಂ ಜನಪದಪೂಜಿತಂ ರಟ್ಠಪೂಜಿತಂ! ಜೀವಸಞ್ಞಿನೋ ಹಿ, ಮೋಘಪುರಿಸ, ಮನುಸ್ಸಾ ರುಕ್ಖಸ್ಮಿಂ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೩೬೬. ‘‘ಮಹಲ್ಲಕಂ ಪನ ಭಿಕ್ಖುನಾ ವಿಹಾರಂ ಕಾರಯಮಾನೇನ ಸಸ್ಸಾಮಿಕಂ ಅತ್ತುದ್ದೇಸಂ ಭಿಕ್ಖೂ ಅಭಿನೇತಬ್ಬಾ ವತ್ಥುದೇಸನಾಯ. ತೇಹಿ ಭಿಕ್ಖೂಹಿ ವತ್ಥು ದೇಸೇತಬ್ಬಂ ಅನಾರಮ್ಭಂ ಸಪರಿಕ್ಕಮನಂ. ಸಾರಮ್ಭೇ ಚೇ ಭಿಕ್ಖು ವತ್ಥುಸ್ಮಿಂ ಅಪರಿಕ್ಕಮನೇ ಮಹಲ್ಲಕಂ ವಿಹಾರಂ ಕಾರೇಯ್ಯ ಭಿಕ್ಖೂ ವಾ ಅನಭಿನೇಯ್ಯ ವತ್ಥುದೇಸನಾಯ, ಸಙ್ಘಾದಿಸೇಸೋ’’ತಿ.

೩೬೭. ಮಹಲ್ಲಕೋ ನಾಮ ವಿಹಾರೋ ಸಸ್ಸಾಮಿಕೋ ವುಚ್ಚತಿ.

ವಿಹಾರೋ ನಾಮ ಉಲ್ಲಿತ್ತೋ ವಾ ಹೋತಿ ಅವಲಿತ್ತೋ ವಾ ಉಲ್ಲಿತ್ತಾವಲಿತ್ತೋ ವಾ.

ಕಾರಯಮಾನೇನಾತಿ ಕರೋನ್ತೋ ವಾ ಕಾರಾಪೇನ್ತೋ ವಾ.

ಸಸ್ಸಾಮಿಕನ್ತಿ ಅಞ್ಞೋ ಕೋಚಿ ಸಾಮಿಕೋ ಹೋತಿ ಇತ್ಥೀ ವಾ ಪುರಿಸೋ ವಾ ಗಹಟ್ಠೋ ವಾ ಪಬ್ಬಜಿತೋ ವಾ.

ಅತ್ತುದ್ದೇಸನ್ತಿ ಅತ್ತನೋ ಅತ್ಥಾಯ.

ಭಿಕ್ಖೂ ಅಭಿನೇತಬ್ಬಾ ವತ್ಥುದೇಸನಾಯಾತಿ ತೇನ ವಿಹಾರಕಾರಕೇನ ಭಿಕ್ಖುನಾ ವಿಹಾರವತ್ಥುಂ ಸೋಧೇತ್ವಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅಹಂ, ಭನ್ತೇ, ಮಹಲ್ಲಕಂ ವಿಹಾರಂ ಕತ್ತುಕಾಮೋ ಸಸ್ಸಾಮಿಕಂ ಅತ್ತುದ್ದೇಸಂ. ಸೋಹಂ, ಭನ್ತೇ, ಸಙ್ಘಂ ವಿಹಾರವತ್ಥುಓಲೋಕನಂ ಯಾಚಾಮೀ’’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಸಚೇ ಸಬ್ಬೋ ಸಙ್ಘೋ ಉಸ್ಸಹತಿ ವಿಹಾರವತ್ಥುಂ ಓಲೋಕೇತುಂ ಸಬ್ಬೇನ ಸಙ್ಘೇನ ಓಲೋಕೇತಬ್ಬಂ. ನೋ ಚೇ ಸಬ್ಬೋ ಸಙ್ಘೋ ಉಸ್ಸಹತಿ ವಿಹಾರವತ್ಥುಂ ಓಲೋಕೇತುಂ, ಯೇ ತತ್ಥ ಹೋನ್ತಿ ಭಿಕ್ಖೂ ಬ್ಯತ್ತಾ ಪಟಿಬಲಾ ಸಾರಮ್ಭಂ ಅನಾರಮ್ಭಂ ಸಪರಿಕ್ಕಮನಂ ಅಪರಿಕ್ಕಮನಂ ಜಾನಿತುಂ ತೇ ಯಾಚಿತ್ವಾ ಸಮ್ಮನ್ನಿತಬ್ಬಾ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೩೬೮. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಮಹಲ್ಲಕಂ ವಿಹಾರಂ ಕತ್ತುಕಾಮೋ ಸಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ವಿಹಾರವತ್ಥುಓಲೋಕನಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಞ್ಚ ಇತ್ಥನ್ನಾಮಞ್ಚ ಭಿಕ್ಖು ಸಮ್ಮನ್ನೇಯ್ಯ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ ಓಲೋಕೇತುಂ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಮಹಲ್ಲಕಂ ವಿಹಾರಂ ಕತ್ತುಕಾಮೋ ಸಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ವಿಹಾರವತ್ಥುಓಲೋಕನಂ ಯಾಚತಿ. ಸಙ್ಘೋ ಇತ್ಥನ್ನಾಮಞ್ಚ ಇತ್ಥನ್ನಾಮಞ್ಚ ಭಿಕ್ಖೂ ಸಮ್ಮನ್ನತಿ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ ಓಲೋಕೇತುಂ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಚ ಇತ್ಥನ್ನಾಮಸ್ಸ ಚ ಭಿಕ್ಖೂನಂ ಸಮ್ಮುತಿ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ ಓಲೋಕೇತುಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮೋ ಚ ಇತ್ಥನ್ನಾಮೋ ಚ ಭಿಕ್ಖೂ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ ಓಲೋಕೇತುಂ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೩೬೯. ತೇಹಿ ಸಮ್ಮತೇಹಿ ಭಿಕ್ಖೂಹಿ ತತ್ಥ ಗನ್ತ್ವಾ ವಿಹಾರವತ್ಥು ಓಲೋಕೇತಬ್ಬಂ; ಸಾರಮ್ಭಂ ಅನಾರಮ್ಭಂ ಸಪರಿಕ್ಕಮನಂ ಅಪರಿಕ್ಕಮನಂ ಜಾನಿತಬ್ಬಂ. ಸಚೇ ಸಾರಮ್ಭಂ ಹೋತಿ ಅಪರಿಕ್ಕಮನಂ, ‘ಮಾಯಿಧ ಕರೀ’ತಿ ವತ್ತಬ್ಬೋ. ಸಚೇ ಅನಾರಮ್ಭಂ ಹೋತಿ ಸಪರಿಕ್ಕಮನಂ, ಸಙ್ಘಸ್ಸ ಆರೋಚೇತಬ್ಬಂ – ‘ಅನಾರಮ್ಭಂ ಸಪರಿಕ್ಕಮನ’ನ್ತಿ. ತೇನ ವಿಹಾರಕಾರಕೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಅಹಂ, ಭನ್ತೇ, ಮಹಲ್ಲಕಂ ವಿಹಾರಂ ಕತ್ತುಕಾಮೋ ಸಸ್ಸಾಮಿಕಂ ಅತ್ತುದ್ದೇಸಂ. ಸೋಹಂ, ಭನ್ತೇ, ಸಙ್ಘಂ ವಿಹಾರವತ್ಥುದೇಸನಂ ಯಾಚಾಮೀ’’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೩೭೦. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಮಹಲ್ಲಕಂ ವಿಹಾರಂ ಕತ್ತುಕಾಮೋ ಸಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ವಿಹಾರವತ್ಥುದೇಸನಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ ದೇಸೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಮಹಲ್ಲಕಂ ವಿಹಾರಂ ಕತ್ತುಕಾಮೋ ಸಸ್ಸಾಮಿಕಂ ಅತ್ತುದ್ದೇಸಂ. ಸೋ ಸಙ್ಘಂ ವಿಹಾರವತ್ಥುದೇಸನಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ ದೇಸೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಸ್ಸ ದೇಸನಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದೇಸಿತಂ ಸಙ್ಘೇನ ಇತ್ಥನ್ನಾಮಸ್ಸ ಭಿಕ್ಖುನೋ ವಿಹಾರವತ್ಥುಂ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೩೭೧. ಸಾರಮ್ಭಂ ನಾಮ ಕಿಪಿಲ್ಲಿಕಾನಂ ವಾ ಆಸಯೋ ಹೋತಿ, ಉಪಚಿಕಾನಂ ವಾ ಆಸಯೋ ಹೋತಿ, ಉನ್ದೂರಾನಂ ವಾ…ಪೇ… ಅಹೀನಂ ವಾ ವಿಚ್ಛಿಕಾನಂ ವಾ ಸತಪದೀನಂ ವಾ ಹತ್ಥೀನಂ ವಾ ಅಸ್ಸಾನಂ ವಾ ಸೀಹಾನಂ ವಾ ಬ್ಯಗ್ಘಾನಂ ವಾ ದೀಪೀನಂ ವಾ ಅಚ್ಛಾನಂ ವಾ ತರಚ್ಛಾನಂ ವಾ ಆಸಯೋ ಹೋತಿ, ಯೇಸಂ ಕೇಸಞ್ಚಿ ತಿರಚ್ಛಾನಗತಾನಂ ಪಾಣಾನಂ ಆಸಯೋ ಹೋತಿ, ಪುಬ್ಬಣ್ಣನಿಸ್ಸಿತಂ ವಾ ಹೋತಿ, ಅಪರಣ್ಣನಿಸ್ಸಿತಂ ವಾ ಹೋತಿ, ಅಬ್ಭಾಘಾತನಿಸ್ಸಿತಂ ವಾ ಹೋತಿ, ಆಘಾತನನಿಸ್ಸಿತಂ ವಾ ಹೋತಿ, ಸುಸಾನನಿಸ್ಸಿತಂ ವಾ ಹೋತಿ, ಉಯ್ಯಾನನಿಸ್ಸಿತಂ ವಾ ಹೋತಿ, ರಾಜವತ್ಥುನಿಸ್ಸಿತಂ ವಾ ಹೋತಿ, ಹತ್ಥಿಸಾಲಾನಿಸ್ಸಿತಂ ವಾ ಹೋತಿ, ಅಸ್ಸಸಾಲಾನಿಸ್ಸಿತಂ ವಾ ಹೋತಿ, ಬನ್ಧನಾಗಾರನಿಸ್ಸಿತಂ ವಾ ಹೋತಿ, ಪಾನಾಗಾರನಿಸ್ಸಿತಂ ವಾ ಹೋತಿ, ಸೂನನಿಸ್ಸಿತಂ ವಾ ಹೋತಿ, ರಚ್ಛಾನಿಸ್ಸಿತಂ ವಾ ಹೋತಿ, ಚಚ್ಚರನಿಸ್ಸಿತಂ ವಾ ಹೋತಿ, ಸಭಾನಿಸ್ಸಿತಂ ವಾ ಹೋತಿ, ಸಂಸರಣನಿಸ್ಸಿತಂ ವಾ ಹೋತಿ. ಏತಂ ಸಾರಮ್ಭಂ ನಾಮ.

ಅಪರಿಕ್ಕಮನಂ ನಾಮ ನ ಸಕ್ಕಾ ಹೋತಿ ಯಥಾಯುತ್ತೇನ ಸಕಟೇನ ಅನುಪರಿಗನ್ತುಂ, ಸಮನ್ತಾ ನಿಸ್ಸೇಣಿಯಾ ಅನುಪರಿಗನ್ತುಂ. ಏತಂ ಅಪರಿಕ್ಕಮನಂ ನಾಮ.

ಅನಾರಮ್ಭಂ ನಾಮ ನ ಕಿಪಿಲ್ಲಿಕಾನಂ ವಾ ಆಸಯೋ ಹೋತಿ…ಪೇ… ನ ಸಂಸರಣನಿಸ್ಸಿತಂ ವಾ ಹೋತಿ. ಏತಂ ಅನಾರಮ್ಭಂ ನಾಮ.

ಸಪರಿಕ್ಕಮನಂ ನಾಮ ಸಕ್ಕಾ ಹೋತಿ ಯಥಾಯುತ್ತೇನ ಸಕಟೇನ ಅನುಪರಿಗನ್ತುಂ, ಸಮನ್ತಾ ನಿಸ್ಸೇಣಿಯಾ ಅನುಪರಿಗನ್ತುಂ. ಏತಂ ಸಪರಿಕ್ಕಮನಂ ನಾಮ.

ಮಹಲ್ಲಕೋ ನಾಮ ವಿಹಾರೋ ಸಸ್ಸಾಮಿಕೋ ವುಚ್ಚತಿ.

ವಿಹಾರೋ ನಾಮ ಉಲ್ಲಿತ್ತೋ ವಾ ಹೋತಿ ಅವಲಿತ್ತೋ ವಾ ಉಲ್ಲಿತ್ತಾವಲಿತ್ತೋ ವಾ.

ಕಾರೇಯ್ಯಾತಿ ಕರೋತಿ ವಾ ಕಾರಾಪೇತಿ ವಾ.

ಭಿಕ್ಖೂ ವಾ ಅನಭಿನೇಯ್ಯ ವತ್ಥುದೇಸನಾಯಾತಿ ಞತ್ತಿದುತಿಯೇನ ಕಮ್ಮೇನ ವಿಹಾರವತ್ಥುಂ ನ ದೇಸಾಪೇತ್ವಾ ಕರೋತಿ ವಾ ಕಾರಾಪೇತಿ ವಾ, ಪಯೋಗೇ ದುಕ್ಕಟಂ. ಏಕಂ ಪಿಣ್ಡಂ ಅನಾಗತೇ, ಆಪತ್ತಿ ಥುಲ್ಲಚ್ಚಯಸ್ಸ. ತಸ್ಮಿಂ ಪಿಣ್ಡೇ ಆಗತೇ, ಆಪತ್ತಿ ಸಙ್ಘಾದಿಸೇಸಸ್ಸ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ – ‘ಸಙ್ಘಾದಿಸೇಸೋ’ತಿ.

೩೭೨. ಭಿಕ್ಖು ವಿಹಾರಂ ಕರೋತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ವಿಹಾರಂ ಕರೋತಿ ಅದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ವಿಹಾರಂ ಕರೋತಿ ಅದೇಸಿತವತ್ಥುಕಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ. ಭಿಕ್ಖು ವಿಹಾರಂ ಕರೋತಿ ಅದೇಸಿತವತ್ಥುಕಂ ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ವಿಹಾರಂ ಕರೋತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ. ಭಿಕ್ಖು ವಿಹಾರಂ ಕರೋತಿ ದೇಸಿತವತ್ಥುಕಂ ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ವಿಹಾರಂ ಕರೋತಿ ದೇಸಿತವತ್ಥುಕಂ ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ. ಭಿಕ್ಖು ವಿಹಾರಂ ಕರೋತಿ ದೇಸಿತವತ್ಥುಕಂ ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೭೩. ಭಿಕ್ಖು ಸಮಾದಿಸತಿ – ‘‘ವಿಹಾರಂ ಮೇ ಕರೋಥಾ’’ತಿ. ತಸ್ಸ ವಿಹಾರಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸತಿ – ‘‘ವಿಹಾರಂ ಮೇ ಕರೋಥಾ’’ತಿ. ತಸ್ಸ ವಿಹಾರಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೭೪. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ. ತಸ್ಸ ವಿಹಾರಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ನ ಚ ಸಮಾದಿಸತಿ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ. ತಸ್ಸ ವಿಹಾರಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೭೫. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ. ತಸ್ಸ ವಿಹಾರಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ವಿಹಾರೋ ಕಿರ ಮೇ ಕಯಿರತಿ ಅದೇಸಿತವತ್ಥುಕೋ ಸಾರಮ್ಭೋ ಅಪರಿಕ್ಕಮನೋ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ …ಪೇ… ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚಾ’’ತಿ…ಪೇ… ‘‘ದೇಸಿತವತ್ಥುಕೋ ಚ ಹೋತು ಸಪರಿಕ್ಕಮನೋ ಚಾ’’ತಿ …ಪೇ… ‘‘ದೇಸಿತವತ್ಥುಕೋ ಹೋತೂ’’ತಿ. ನೋ ಚೇ ಸಾಮಂ ವಾ ಗಚ್ಛೇಯ್ಯ ದೂತಂ ವಾ ಪಹಿಣೇಯ್ಯ, ಆಪತ್ತಿ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ. ತಸ್ಸ ವಿಹಾರಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಸುಣಾತಿ – ‘‘ವಿಹಾರೋ ಕಿರ ಮೇ ಕಯಿರತಿ ದೇಸಿತವತ್ಥುಕೋ ಸಾರಮ್ಭೋ ಅಪರಿಕ್ಕಮನೋ’’ತಿ. ತೇನ ಭಿಕ್ಖುನಾ ಸಾಮಂ ವಾ ಗನ್ತಬ್ಬಂ ದೂತೋ ವಾ ಪಾಹೇತಬ್ಬೋ – ‘‘ಅನಾರಮ್ಭೋ ಚ ಹೋತು ಸಪರಿಕ್ಕಮನೋ ಚಾ’’ತಿ…ಪೇ… ‘‘ಅನಾರಮ್ಭೋ ಹೋತೂ’’ತಿ ‘‘ಸಪರಿಕ್ಕಮನೋ ಹೋತೂ’’ತಿ, ಅನಾಪತ್ತಿ.

೩೭೬. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ. ತಸ್ಸ ವಿಹಾರಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ತಿಣ್ಣಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ಸಮಾದಿಸತಿ ಚ – ‘‘ದೇಸಿತವತ್ಥುಕೋ ಚ ಹೋತು ಅನಾರಮ್ಭೋ ಚ ಸಪರಿಕ್ಕಮನೋ ಚಾ’’ತಿ. ತಸ್ಸ ವಿಹಾರಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಕಾರುಕಾನಂ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೭೭. ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ತಸ್ಸ ವಿಹಾರಂ ಕರೋನ್ತಿ ಅದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸೋ ವಿಹಾರೋ ಅಞ್ಞಸ್ಸ ವಾ ದಾತಬ್ಬೋ ಭಿನ್ದಿತ್ವಾ ವಾ ಪುನ ಕಾತಬ್ಬೋ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ಸಙ್ಘಾದಿಸೇಸೇನ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಆಪತ್ತಿ ಸಙ್ಘಾದಿಸೇಸಸ್ಸ.

ಭಿಕ್ಖು ಸಮಾದಿಸಿತ್ವಾ ಪಕ್ಕಮತಿ – ‘‘ವಿಹಾರಂ ಮೇ ಕರೋಥಾ’’ತಿ. ತಸ್ಸ ವಿಹಾರಂ ಕರೋನ್ತಿ ದೇಸಿತವತ್ಥುಕಂ ಸಾರಮ್ಭಂ ಅಪರಿಕ್ಕಮನಂ. ಸೋ ಚೇ ವಿಪ್ಪಕತೇ ಆಗಚ್ಛತಿ, ತೇನ ಭಿಕ್ಖುನಾ ಸೋ ವಿಹಾರೋ ಅಞ್ಞಸ್ಸ ವಾ ದಾತಬ್ಬೋ ಭಿನ್ದಿತ್ವಾ ವಾ ಪುನ ಕಾತಬ್ಬೋ. ನೋ ಚೇ ಅಞ್ಞಸ್ಸ ವಾ ದದೇಯ್ಯ ಭಿನ್ದಿತ್ವಾ ವಾ ಪುನ ಕಾರೇಯ್ಯ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ… ಸಾರಮ್ಭಂ ಸಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಅಪರಿಕ್ಕಮನಂ, ಆಪತ್ತಿ ದುಕ್ಕಟಸ್ಸ…ಪೇ… ಅನಾರಮ್ಭಂ ಸಪರಿಕ್ಕಮನಂ, ಅನಾಪತ್ತಿ.

೩೭೮. ಅತ್ತನಾ ವಿಪ್ಪಕತಂ ಅತ್ತನಾ ಪರಿಯೋಸಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಅತ್ತನಾ ವಿಪ್ಪಕತಂ ಪರೇಹಿ ಪರಿಯೋಸಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪರೇಹಿ ವಿಪ್ಪಕತಂ ಅತ್ತನಾ ಪರಿಯೋಸಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪರೇಹಿ ವಿಪ್ಪಕತಂ ಪರೇಹಿ ಪರಿಯೋಸಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ.

೩೭೯. ಅನಾಪತ್ತಿ ಲೇಣೇ ಗುಹಾಯ ತಿಣಕುಟಿಕಾಯ ಅಞ್ಞಸ್ಸತ್ಥಾಯ ವಾಸಾಗಾರಂ ಠಪೇತ್ವಾ ಸಬ್ಬತ್ಥ. ಅನಾಪತ್ತಿ ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ವಿಹಾರಕಾರಸಿಕ್ಖಾಪದಂ ನಿಟ್ಠಿತಂ ಸತ್ತಮಂ.