೫. ಸಞ್ಚರಿತ್ತಸಿಕ್ಖಾಪದಂ

೨೯೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಸಾವತ್ಥಿಯಂ ಕುಲೂಪಕೋ ಹೋತಿ. ಬಹುಕಾನಿ ಕುಲಾನಿ ಉಪಸಙ್ಕಮತಿ. ಯತ್ಥ ಪಸ್ಸತಿ ಕುಮಾರಕಂ ವಾ ಅಪಜಾಪತಿಕಂ, ಕುಮಾರಿಕಂ ವಾ ಅಪತಿಕಂ, ಕುಮಾರಕಸ್ಸ ಮಾತಾಪಿತೂನಂ ಸನ್ತಿಕೇ ಕುಮಾರಿಕಾಯ ವಣ್ಣಂ ಭಣತಿ – ‘‘ಅಮುಕಸ್ಸ ಕುಲಸ್ಸ ಕುಮಾರಿಕಾ ಅಭಿರೂಪಾ ದಸ್ಸನೀಯಾ ಪಾಸಾದಿಕಾ ಪಣ್ಡಿತಾ ಬ್ಯತ್ತಾ ಮೇಧಾವಿನೀ ದಕ್ಖಾ ಅನಲಸಾ. ಛನ್ನಾ ಸಾ ಕುಮಾರಿಕಾ ಇಮಸ್ಸ ಕುಮಾರಕಸ್ಸಾ’’ತಿ. ತೇ ಏವಂ ವದನ್ತಿ – ‘‘ಏತೇ ಖೋ, ಭನ್ತೇ, ಅಮ್ಹೇ ನ ಜಾನನ್ತಿ – ‘ಕೇ ವಾ ಇಮೇ ಕಸ್ಸ ವಾ’ತಿ. ಸಚೇ, ಭನ್ತೇ, ಅಯ್ಯೋ ದಾಪೇಯ್ಯ ಆನೇಯ್ಯಾಮ ಮಯಂ ತಂ ಕುಮಾರಿಕಂ ಇಮಸ್ಸ ಕುಮಾರಕಸ್ಸಾ’’ತಿ. ಕುಮಾರಿಕಾಯ ಮಾತಾಪಿತೂನಂ ಸನ್ತಿಕೇ ಕುಮಾರಕಸ್ಸ ವಣ್ಣಂ ಭಣತಿ – ‘‘ಅಮುಕಸ್ಸ ಕುಲಸ್ಸ ಕುಮಾರಕೋ ಅಭಿರೂಪೋ ದಸ್ಸನೀಯೋ ಪಾಸಾದಿಕೋ ಪಣ್ಡಿತೋ ಬ್ಯತ್ತೋ ಮೇಧಾವೀ ದಕ್ಖೋ ಅನಲಸೋ. ಛನ್ನಾಯಂ ಕುಮಾರಿಕಾ ತಸ್ಸ ಕುಮಾರಕಸ್ಸಾ’’ತಿ [ಛನ್ನೋ ಸೋ ಕುಮಾರಕೋ ಇಮಿಸ್ಸಾ ಕುಮಾರಿಕಾಯಾತಿ (ಸ್ಯಾ.)]. ತೇ ಏವಂ ವದನ್ತಿ – ‘‘ಏತೇ ಖೋ, ಭನ್ತೇ, ಅಮ್ಹೇ ನ ಜಾನನ್ತಿ – ‘ಕೇ ವಾ ಇಮೇ ಕಸ್ಸ ವಾ’ತಿ, ಕಿಸ್ಮಿಂ ವಿಯ ಕುಮಾರಿಕಾಯ ವತ್ತುಂ. ಸಚೇ, ಭನ್ತೇ, ಅಯ್ಯೋ ಯಾಚಾಪೇಯ್ಯ ದಜ್ಜೇಯ್ಯಾಮ ಮಯಂ ಇಮಂ ಕುಮಾರಿಕಂ ತಸ್ಸ ಕುಮಾರಕಸ್ಸಾ’’ತಿ. ಏತೇನೇವ ಉಪಾಯೇನ ಆವಾಹಾನಿಪಿ ಕಾರಾಪೇತಿ, ವಿವಾಹಾನಿಪಿ ಕಾರಾಪೇತಿ, ವಾರೇಯ್ಯಾನಿಪಿ ಕಾರಾಪೇತಿ.

೨೯೭. ತೇನ ಖೋ ಪನ ಸಮಯೇನ ಅಞ್ಞತರಿಸ್ಸಾ ಪುರಾಣಗಣಕಿಯಾ ಧೀತಾ ಅಭಿರೂಪಾ ಹೋತಿ ದಸ್ಸನೀಯಾ ಪಾಸಾದಿಕಾ. ತಿರೋಗಾಮಕಾ ಆಜೀವಕಸಾವಕಾ ಆಗನ್ತ್ವಾ ತಂ ಗಣಕಿಂ ಏತದವೋಚುಂ – ‘‘ದೇಹಾಯ್ಯೇ, ಇಮಂ ಕುಮಾರಿಕಂ ಅಮ್ಹಾಕಂ ಕುಮಾರಕಸ್ಸಾ’’ತಿ. ಸಾ ಏವಮಾಹ – ‘‘ಅಹಂ ಖ್ವಯ್ಯೋ [ಖ್ವಯ್ಯಾ (ಸ್ಯಾ.), ಖ್ವಾಯ್ಯೋ (ಕ.)] ತುಮ್ಹೇ ನ ಜಾನಾಮಿ – ‘ಕೇ ವಾ ಇಮೇ ಕಸ್ಸ ವಾ’ತಿ. ಅಯಞ್ಚ ಮೇ ಏಕಧೀತಿಕಾ, ತಿರೋಗಾಮೋ ಚ ಗನ್ತಬ್ಬೋ, ನಾಹಂ ದಸ್ಸಾಮೀ’’ತಿ. ಮನುಸ್ಸಾ ತೇ ಆಜೀವಕಸಾವಕೇ ಏತದವೋಚುಂ – ‘‘ಕಿಸ್ಸ ತುಮ್ಹೇ, ಅಯ್ಯೋ, ಆಗತತ್ಥಾ’’ತಿ? ‘‘ಇಧ ಮಯಂ, ಅಯ್ಯೋ, ಅಮುಕಂ ನಾಮ ಗಣಕಿಂ ಧೀತರಂ ಯಾಚಿಮ್ಹಾ ಅಮ್ಹಾಕಂ ಕುಮಾರಕಸ್ಸ. ಸಾ ಏವಮಾಹ – ‘ಅಹಂ, ಖ್ವಯ್ಯೋ ತುಮ್ಹೇ ನ ಜಾನಾಮಿ – ಕೇ ವಾ ಇಮೇ ಕಸ್ಸ ವಾ’ತಿ. ಅಯಞ್ಚ ಮೇ ಏಕಧೀತಿಕಾ, ತಿರೋಗಾಮೋ ಚ ಗನ್ತಬ್ಬೋ, ನಾಹಂ ದಸ್ಸಾಮೀ’’ತಿ. ‘‘ಕಿಸ್ಸ ತುಮ್ಹೇ, ಅಯ್ಯೋ, ತಂ ಗಣಕಿಂ ಧೀತರಂ ಯಾಚಿತ್ಥ? ನನು ಅಯ್ಯೋ ಉದಾಯೀ ವತ್ತಬ್ಬೋ. ಅಯ್ಯೋ ಉದಾಯೀ ದಾಪೇಸ್ಸತೀ’’ತಿ.

ಅಥ ಖೋ ತೇ ಆಜೀವಕಸಾವಕಾ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚುಂ – ‘‘ಇಧ ಮಯಂ, ಭನ್ತೇ, ಅಮುಕಂ ನಾಮ ಗಣಕಿಂ ಧೀತರಂ ಯಾಚಿಮ್ಹಾ ಅಮ್ಹಾಕಂ ಕುಮಾರಕಸ್ಸ. ಸಾ ಏವಮಾಹ – ‘ಅಹಂ ಖ್ವಯ್ಯೋ ತುಮ್ಹೇ ನ ಜಾನಾಮಿ – ಕೇ ವಾ ಇಮೇ ಕಸ್ಸ ವಾತಿ. ಅಯಞ್ಚ ಮೇ ಏಕಧೀತಿಕಾ, ತಿರೋಗಾಮೋ ಚ ಗನ್ತಬ್ಬೋ, ನಾಹಂ ದಸ್ಸಾಮೀ’ತಿ. ಸಾಧು, ಭನ್ತೇ, ಅಯ್ಯೋ ತಂ ಗಣಕಿಂ ಧೀತರಂ ದಾಪೇತು ಅಮ್ಹಾಕಂ ಕುಮಾರಕಸ್ಸಾ’’ತಿ. ಅಥ ಖೋ ಆಯಸ್ಮಾ ಉದಾಯೀ ಯೇನ ಸಾ ಗಣಕೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಗಣಕಿಂ ಏತದವೋಚ – ‘‘ಕಿಸ್ಸಿಮೇಸಂ ಧೀತರಂ ನ ದೇಸೀ’’ತಿ? ‘‘ಅಹಂ ಖ್ವಯ್ಯ, ಇಮೇ ನ ಜಾನಾಮಿ – ‘ಕೇ ವಾ ಇಮೇ ಕಸ್ಸ ವಾ’ತಿ. ಅಯಞ್ಚ ಮೇ ಏಕಧೀತಿಕಾ, ತಿರೋಗಾಮೋ ಚ ಗನ್ತಬ್ಬೋ, ನಾಹಂ ದಸ್ಸಾಮೀ’’ತಿ. ‘‘ದೇಹಿಮೇಸಂ. ಅಹಂ ಇಮೇ ಜಾನಾಮೀ’’ತಿ. ‘‘ಸಚೇ, ಭನ್ತೇ, ಅಯ್ಯೋ ಜಾನಾತಿ, ದಸ್ಸಾಮೀ’’ತಿ. ಅಥ ಖೋ ಸಾ ಗಣಕೀ ತೇಸಂ ಆಜೀವಕಸಾವಕಾನಂ ಧೀತರಂ ಅದಾಸಿ. ಅಥ ಖೋ ತೇ ಆಜೀವಕಸಾವಕಾ ತಂ ಕುಮಾರಿಕಂ ನೇತ್ವಾ ಮಾಸಂಯೇವ ಸುಣಿಸಭೋಗೇನ ಭುಞ್ಜಿಂಸು. ತತೋ ಅಪರೇನ ದಾಸಿಭೋಗೇನ ಭುಞ್ಜನ್ತಿ.

ಅಥ ಖೋ ಸಾ ಕುಮಾರಿಕಾ ಮಾತುಯಾ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಮ್ಹಿ ದುಗ್ಗತಾ ದುಕ್ಖಿತಾ, ನ ಸುಖಂ ಲಭಾಮಿ. ಮಾಸಂಯೇವ ಮಂ ಸುಣಿಸಭೋಗೇನ ಭುಞ್ಜಿಂಸು. ತತೋ ಅಪರೇನ ದಾಸಿಭೋಗೇನ ಭುಞ್ಜನ್ತಿ. ಆಗಚ್ಛತು ಮೇ ಮಾತಾ, ಮಂ ನೇಸ್ಸತೂ’’ತಿ. ಅಥ ಖೋ ಸಾ ಗಣಕೀ ಯೇನ ತೇ ಆಜೀವಕಸಾವಕಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತೇ ಆಜೀವಕಸಾವಕೇ ಏತದವೋಚ – ‘‘ಮಾಯ್ಯೋ, ಇಮಂ ಕುಮಾರಿಕಂ ದಾಸಿಭೋಗೇನ ಭುಞ್ಜಿತ್ಥ. ಸುಣಿಸಭೋಗೇನ ಇಮಂ ಕುಮಾರಿಕಂ ಭುಞ್ಜಥಾ’’ತಿ. ತೇ ಏವಮಾಹಂಸು – ‘‘ನತ್ಥಮ್ಹಾಕಂ ತಯಾ ಸದ್ಧಿಂ ಆಹಾರೂಪಹಾರೋ, ಸಮಣೇನ ಸದ್ಧಿಂ ಅಮ್ಹಾಕಂ ಆಹಾರೂಪಹಾರೋ. ಗಚ್ಛ ತ್ವಂ. ನ ಮಯಂ ತಂ ಜಾನಾಮಾ’’ತಿ. ಅಥ ಖೋ ಸಾ ಗಣಕೀ ತೇಹಿ ಆಜೀವಕಸಾವಕೇಹಿ ಅಪಸಾದಿತಾ ಪುನದೇವ ಸಾವತ್ಥಿಂ ಪಚ್ಚಾಗಞ್ಛಿ. ದುತಿಯಮ್ಪಿ ಖೋ ಸಾ ಕುಮಾರಿಕಾ ಮಾತುಯಾ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಮ್ಹಿ ದುಗ್ಗತಾ ದುಕ್ಖಿತಾ, ನ ಸುಖಂ ಲಭಾಮಿ. ಮಾಸಂಯೇವ ಮಂ ಸುಣಿಸಭೋಗೇನ ಭುಞ್ಜಿಂಸು. ತತೋ ಅಪರೇನ ದಾಸಿಭೋಗೇನ ಭುಞ್ಜನ್ತಿ. ಆಗಚ್ಛತು ಮೇ ಮಾತಾ, ಮಂ ನೇಸ್ಸತೂ’’ತಿ. ಅಥ ಖೋ ಸಾ ಗಣಕೀ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚ – ‘‘ಸಾ ಕಿರ, ಭನ್ತೇ, ಕುಮಾರಿಕಾ ದುಗ್ಗತಾ ದುಕ್ಖಿತಾ, ನ ಸುಖಂ ಲಭತಿ. ಮಾಸಂಯೇವ ನಂ ಸುಣಿಸಭೋಗೇನ ಭುಞ್ಜಿಂಸು. ತತೋ ಅಪರೇನ ದಾಸಿಭೋಗೇನ ಭುಞ್ಜನ್ತಿ. ವದೇಯ್ಯಾಥ, ಭನ್ತೇ – ‘ಮಾಯ್ಯೋ, ಇಮಂ ಕುಮಾರಿಕಂ ದಾಸಿಭೋಗೇನ ಭುಞ್ಜಿತ್ಥ. ಸುಣಿಸಭೋಗೇನ ಇಮಂ ಕುಮಾರಿಕಂ ಭುಞ್ಜಿಥಾ’’’ತಿ.

ಅಥ ಖೋ ಆಯಸ್ಮಾ ಉದಾಯೀ ಯೇನ ತೇ ಆಜೀವಕಸಾವಕಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತೇ ಆಜೀವಕಸಾವಕೇ ಏತದವೋಚ – ‘‘ಮಾಯ್ಯೋ, ಇಮಂ ಕುಮಾರಿಕಂ ದಾಸಿಭೋಗೇನ ಭುಜ್ಜಿತ್ಥ. ಸುಣಿಸಭೋಗೇನ ಇಮಂ ಕುಮಾರಿಕಂ ಭುಞ್ಜಥಾ’’ತಿ. ತೇ ಏವಮಾಹಂಸು – ‘‘ನತ್ಥಮ್ಹಾಕಂ ತಯಾ ಸದ್ಧಿಂ ಆಹಾರೂಪಹಾರೋ, ಗಣಕಿಯಾ ಸದ್ಧಿಂ ಅಮ್ಹಾಕಂ ಆಹಾರೂಪಹಾರೋ. ಸಮಣೇನ ಭವಿತಬ್ಬಂ ಅಬ್ಯಾವಟೇನ. ಸಮಣೋ ಅಸ್ಸ ಸುಸಮಣೋ, ಗಚ್ಛ ತ್ವಂ, ನ ಮಯಂ ತಂ ಜಾನಾಮಾ’’ತಿ. ಅಥ ಖೋ ಆಯಸ್ಮಾ ಉದಾಯೀ ತೇಹಿ ಆಜೀವಕಸಾವಕೇಹಿ ಅಪಸಾದಿತೋ ಪುನದೇವ ಸಾವತ್ಥಿಂ ಪಚ್ಚಾಗಞ್ಛಿ. ತತಿಯಮ್ಪಿ ಖೋ ಸಾ ಕುಮಾರಿಕಾ ಮಾತುಯಾ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಮ್ಹಿ ದುಗ್ಗತಾ ದುಕ್ಖಿತಾ, ನ ಸುಖಂ ಲಭಾಮಿ. ಮಾಸಂಯೇವ ಮಂ ಸುಣಿಸಭೋಗೇನ ಭುಞ್ಜಿಂಸು. ತತೋ ಅಪರೇನ ದಾಸಿಭೋಗೇನ ಭುಞ್ಜನ್ತಿ. ಆಗಚ್ಛತು ಮೇ ಮಾತಾ, ಮಂ ನೇಸ್ಸತೂ’’ತಿ. ದುತಿಯಮ್ಪಿ ಖೋ ಸಾ ಗಣಕೀ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚ – ‘‘ಸಾ ಕಿರ, ಭನ್ತೇ, ಕುಮಾರಿಕಾ ದುಗ್ಗತಾ ದುಕ್ಖಿತಾ, ನ ಸುಖಂ ಲಭತಿ. ಮಾಸಂಯೇವ ನಂ ಸುಣಿಸಭೋಗೇನ ಭುಞ್ಜಿಂಸು. ತತೋ ಅಪರೇನ ದಾಸಿಭೋಗೇನ ಭುಞ್ಜನ್ತಿ. ವದೇಯ್ಯಾಥ, ಭನ್ತೇ – ‘ಮಾಯ್ಯೋ, ಇಮಂ ಕುಮಾರಿಕಂ ದಾಸಿಭೋಗೇನ ಭುಞ್ಜಿತ್ಥ, ಸುಣಿಸಭೋಗೇನ ಇಮಂ ಕುಮಾರಿಕಂ ಭುಞ್ಜಥಾ’’’ತಿ. ‘‘ಪಠಮಂಪಾಹಂ ತೇಹಿ ಆಜೀವಕಸಾವಕೇಹಿ ಅಪಸಾದಿತೋ. ಗಚ್ಛ ತ್ವಂ. ನಾಹಂ ಗಮಿಸ್ಸಾಮೀ’’ತಿ.

೨೯೮. ಅಥ ಖೋ ಸಾ ಗಣಕೀ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಏವಂ ದುಗ್ಗತೋ ಹೋತು ಅಯ್ಯೋ ಉದಾಯೀ, ಏವಂ ದುಕ್ಖಿತೋ ಹೋತು ಅಯ್ಯೋ ಉದಾಯೀ, ಏವಂ ಮಾ ಸುಖಂ ಲಭತು ಅಯ್ಯೋ ಉದಾಯೀ, ಯಥಾ ಮೇ ಕುಮಾರಿಕಾ ದುಗ್ಗತಾ ದುಕ್ಖಿತಾ ನ ಸುಖಂ ಲಭತಿ ಪಾಪಿಕಾಯ ಸಸ್ಸುಯಾ ಪಾಪಕೇನ ಸಸುರೇನ ಪಾಪಕೇನ ಸಾಮಿಕೇನಾ’’ತಿ. ಸಾಪಿ ಖೋ ಕುಮಾರಿಕಾ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಏವಂ ದುಗ್ಗತೋ ಹೋತು ಅಯ್ಯೋ ಉದಾಯೀ, ಏವಂ ದುಕ್ಖಿತೋ ಹೋತು ಅಯ್ಯೋ ಉದಾಯೀ, ಏವಂ ಮಾ ಸುಖಂ ಲಭತು ಅಯ್ಯೋ ಉದಾಯೀ, ಯಥಾಹಂ ದುಗ್ಗತಾ ದುಕ್ಖಿತಾ ನ ಸುಖಂ ಲಭಾಮಿ ಪಾಪಿಕಾಯ ಸಸ್ಸುಯಾ ಪಾಪಕೇನ ಸಸುರೇನ ಪಾಪಕೇನ ಸಾಮಿಕೇನಾ’’ತಿ. ಅಞ್ಞಾಪಿ ಇತ್ಥಿಯೋ ಅಸನ್ತುಟ್ಠಾ ಸಸ್ಸೂಹಿ ವಾ ಸಸುರೇಹಿ ವಾ ಸಾಮಿಕೇಹಿ ವಾ, ತಾ ಏವಂ ಓಯಾಚನ್ತಿ – ‘‘ಏವಂ ದುಗ್ಗತೋ ಹೋತು ಅಯ್ಯೋ ಉದಾಯೀ, ಏವಂ ದುಕ್ಖಿತೋ ಹೋತು ಅಯ್ಯೋ ಉದಾಯೀ, ಏವಂ ಮಾ ಸುಖಂ ಲಭತು ಅಯ್ಯೋ ಉದಾಯೀ, ಯಥಾ ಮಯಂ ದುಗ್ಗತಾ ದುಕ್ಖಿತಾ ನ ಸುಖಂ ಲಭಾಮ ಪಾಪಿಕಾಹಿ ಸಸ್ಸೂಹಿ ಪಾಪಕೇಹಿ ಸಸುರೇಹಿ ಪಾಪಕೇಹಿ ಸಾಮಿಕೇಹೀ’’ತಿ. ಯಾ ಪನ ತಾ ಇತ್ಥಿಯೋ ಸನ್ತುಟ್ಠಾ ಸಸ್ಸೂಹಿ ವಾ ಸಸುರೇಹಿ ವಾ ಸಾಮಿಕೇಹಿ ವಾ ತಾ ಏವಂ ಆಯಾಚನ್ತಿ – ‘‘ಏವಂ ಸುಖಿತೋ ಹೋತು ಅಯ್ಯೋ ಉದಾಯೀ, ಏವಂ ಸಜ್ಜಿತೋ ಹೋತು ಅಯ್ಯೋ ಉದಾಯೀ, ಏವಂ ಸುಖಮೇಧೋ [ಸುಖಮೇಧಿತೋ (ಸೀ. ಕ.)] ಹೋತು ಅಯ್ಯೋ ಉದಾಯೀ, ಯಥಾ ಮಯಂ ಸುಖಿತಾ ಸಜ್ಜಿತಾ ಸುಖಮೇಧಾ ಭದ್ದಿಕಾಹಿ ಸಸ್ಸೂಹಿ ಭದ್ದಕೇಹಿ ಸಸುರೇಹಿ ಭದ್ದಕೇಹಿ ಸಾಮಿಕೇಹೀ’’ತಿ.

ಅಸ್ಸೋಸುಂ ಖೋ ಭಿಕ್ಖೂ ಏಕಚ್ಚಾನಂ ಇತ್ಥೀನಂ ಓಯಾಚನ್ತೀನಂ ಏಕಚ್ಚಾನಂ ಇತ್ಥೀನಂ ಆಯಾಚನ್ತೀನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ಸಞ್ಚರಿತ್ತಂ ಸಮಾಪಜ್ಜಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಉದಾಯಿಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಉದಾಯಿ, ಸಞ್ಚರಿತ್ತಂ ಸಮಾಪಜ್ಜಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಸಞ್ಚರಿತ್ತಂ ಸಮಾಪಜ್ಜಸಿ! ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೨೯೯. ‘‘ಯೋ ಪನ ಭಿಕ್ಖು ಸಞ್ಚರಿತ್ತಂ ಸಮಾಪಜ್ಜೇಯ್ಯ, ಇತ್ಥಿಯಾ ವಾ ಪುರಿಸಮತಿಂ ಪುರಿಸಸ್ಸ ವಾ ಇತ್ಥಿಮತಿಂ, ಜಾಯತ್ತನೇ ವಾ ಜಾರತ್ತನೇ ವಾ, ಸಙ್ಘಾದಿಸೇಸೋ’’ತಿ.

ಏವಞ್ಚಿದಂ ಭಗವತಾ ಭಿಕ್ಖೂನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೩೦೦. ತೇನ ಖೋ ಪನ ಸಮಯೇನ ಸಮ್ಬಹುಲಾ ಧುತ್ತಾ ಉಯ್ಯಾನೇ ಪರಿಚಾರೇನ್ತಾ ಅಞ್ಞತರಿಸ್ಸಾ ವೇಸಿಯಾ ಸನ್ತಿಕೇ ದೂತಂ ಪಾಹೇಸುಂ – ‘‘ಆಗಚ್ಛತು ಉಯ್ಯಾನೇ, ಪರಿಚಾರೇಸ್ಸಾಮಾ’’ತಿ. ಸಾ ಏವಮಾಹ – ‘‘ಅಹಂ ಖ್ವಯ್ಯೋ ತುಮ್ಹೇ ನ ಜಾನಾಮಿ – ‘ಕೇ ವಾ ಇಮೇ ಕಸ್ಸ ವಾ’ತಿ. ಅಹಞ್ಚಮ್ಹಿ ಬಹುಭಣ್ಡಾ ಬಹುಪರಿಕ್ಖಾರಾ, ಬಹಿನಗರಞ್ಚ ಗನ್ತಬ್ಬಂ. ನಾಹಂ ಗಮಿಸ್ಸಾಮೀ’’ತಿ. ಅಥ ಖೋ ಸೋ ದೂತೋ ತೇಸಂ ಧುತ್ತಾನಂ ಏತಮತ್ಥಂ ಆರೋಚೇಸಿ. ಏವಂ ವುತ್ತೇ, ಅಞ್ಞತರೋ ಪುರಿಸೋ ತೇ ಧುತ್ತೇ ಏತದವೋಚ – ‘‘ಕಿಸ್ಸ ತುಮ್ಹೇ ಅಯ್ಯೋ ಏತಂ ವೇಸಿಂ ಯಾಚಿತ್ಥ? ನನು ಅಯ್ಯೋ ಉದಾಯೀ ವತ್ತಬ್ಬೋ! ಅಯ್ಯೋ ಉದಾಯೀ ಉಯ್ಯೋಜೇಸ್ಸತೀ’’ತಿ. ಏವಂ ವುತ್ತೇ, ಅಞ್ಞತರೋ ಉಪಾಸಕೋ ತಂ ಪುರಿಸಂ ಏತದವೋಚ – ‘‘ಮಾಯ್ಯೋ ಏವಂ ಅವಚ. ನ ಕಪ್ಪತಿ ಸಮಣಾನಂ ಸಕ್ಯಪುತ್ತಿಯಾನಂ ಏವರೂಪಂ ಕಾತುಂ. ನಾಯ್ಯೋ ಉದಾಯೀ ಏವಂ ಕರಿಸ್ಸತೀ’’ತಿ. ಏವಂ ವುತ್ತೇ, ‘‘ಕರಿಸ್ಸತಿ ನ ಕರಿಸ್ಸತೀ’’ತಿ ಅಬ್ಭುತಮಕಂಸು. ಅಥ ಖೋ ತೇ ಧುತ್ತಾ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚುಂ – ‘‘ಇಧ ಮಯಂ, ಭನ್ತೇ, ಉಯ್ಯಾನೇ ಪರಿಚಾರೇನ್ತಾ ಅಸುಕಾಯ ನಾಮ ವೇಸಿಯಾ ಸನ್ತಿಕೇ ದೂತಂ ಪಹಿಣಿಮ್ಹಾ – ‘ಆಗಚ್ಛತು ಉಯ್ಯಾನೇ, ಪರಿಚಾರೇಸ್ಸಾಮಾ’ತಿ. ಸಾ ಏವಮಾಹ – ‘ಅಹಂ ಖ್ವಯ್ಯೋ ತುಮ್ಹೇ ನ ಜಾನಾಮಿ – ಕೇ ವಾ ಇಮೇ ಕಸ್ಸ ವಾತಿ, ಅಹಞ್ಚಮ್ಹಿ ಬಹುಭಣ್ಡಾ ಬಹುಪರಿಕ್ಖಾರಾ, ಬಹಿನಗರಞ್ಚ ಗನ್ತಬ್ಬಂ. ನಾಹಂ ಗಮಿಸ್ಸಾಮೀ’ತಿ. ಸಾಧು, ಭನ್ತೇ, ಅಯ್ಯೋ ತಂ ವಸಿಂ ಉಯ್ಯೋಜೇತೂ’’ತಿ.

ಅಥ ಖೋ ಆಯಸ್ಮಾ ಉದಾಯೀ ಯೇನ ಸಾ ವೇಸೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ವೇಸಿಂ ಏತದವೋಚ – ‘‘ಕಿಸ್ಸಿಮೇಸಂ ನ ಗಚ್ಛಸೀ’’ತಿ? ‘‘ಅಹಂ ಖ್ವಯ್ಯ ಇಮೇ ನ ಜಾನಾಮಿ – ‘ಕೇ ವಾ ಇಮೇ ಕಸ್ಸ ವಾ’ತಿ. ಅಹಞ್ಚಮ್ಹಿ ಬಹುಭಣ್ಡಾ ಬಹುಪರಿಕ್ಖಾರಾ, ಬಹಿನಗರಞ್ಚ ಗನ್ತಬ್ಬಂ. ನಾಹಂ ಗಮಿಸ್ಸಾಮೀ’’ತಿ. ‘‘ಗಚ್ಛಿಮೇಸಂ. ಅಹಂ ಇಮೇ ಜಾನಾಮೀ’’ತಿ. ‘‘ಸಚೇ, ಭನ್ತೇ, ಅಯ್ಯೋ ಜಾನಾತಿ ಅಹಂ ಗಮಿಸ್ಸಾಮೀ’’ತಿ. ಅಥ ಖೋ ತೇ ಧುತ್ತಾ ತಂ ವೇಸಿಂ ಆದಾಯ ಉಯ್ಯಾನಂ ಅಗಮಂಸು. ಅಥ ಖೋ ಸೋ ಉಪಾಸಕೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಅಯ್ಯೋ ಉದಾಯೀ ತಙ್ಖಣಿಕಂ ಸಞ್ಚರಿತ್ತಂ ಸಮಾಪಜ್ಜಿಸ್ಸತೀ’’ತಿ. ಅಸ್ಸೋಸುಂ ಖೋ ಭಿಕ್ಖೂ ತಸ್ಸ ಉಪಾಸಕಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ತಙ್ಖಣಿಕಂ ಸಞ್ಚರಿತ್ತಂ ಸಮಾಪಜ್ಜಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತ್ವಂ, ಉದಾಯಿ, ತಙ್ಖಣಿಕಂ ಸಞ್ಚರಿತ್ತಂ ಸಮಾಪಜ್ಜಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ತಙ್ಖಣಿಕಂ ಸಞ್ಚರಿತ್ತಂ ಸಮಾಪಜ್ಜಿಸ್ಸಸಿ? ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೩೦೧. ‘‘ಯೋ ಪನ ಭಿಕ್ಖು ಸಞ್ಚರಿತ್ತಂ ಸಮಾಪಜ್ಜೇಯ್ಯ, ಇತ್ಥಿಯಾ ವಾ ಪುರಿಸಮತಿಂ ಪುರಿಸಸ್ಸ ವಾ ಇತ್ಥಿಮತಿಂ, ಜಾಯತ್ತನೇ ವಾ ಜಾರತ್ತನೇ ವಾ, ಅನ್ತಮಸೋ ತಙ್ಖಣಿಕಾಯಪಿ, ಸಙ್ಘಾದಿಸೇಸೋ’’ತಿ.

೩೦೨. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಸಞ್ಚರಿತ್ತಂ ಸಮಾಪಜ್ಜೇಯ್ಯಾತಿ ಇತ್ಥಿಯಾ ವಾ ಪಹಿತೋ ಪುರಿಸಸ್ಸ ಸನ್ತಿಕೇ ಗಚ್ಛತಿ, ಪುರಿಸೇನ ವಾ ಪಹಿತೋ ಇತ್ಥಿಯಾ ಸನ್ತಿಕೇ ಗಚ್ಛತಿ.

ಇತ್ಥಿಯಾ ವಾ ಪುರಿಸಮತಿನ್ತಿ ಪುರಿಸಸ್ಸ ಮತಿಂ ಇತ್ಥಿಯಾ ಆರೋಚೇತಿ.

ಪುರಿಸಸ್ಸ ವಾ ಇತ್ಥಿಮತಿನ್ತಿ ಇತ್ಥಿಯಾ ಮತಿಂ ಪುರಿಸಸ್ಸ ಆರೋಚೇತಿ.

ಜಾಯತ್ತನೇ ವಾತಿ ಜಾಯಾ ಭವಿಸ್ಸಸಿ.

ಜಾರತ್ತನೇ ವಾತಿ ಜಾರೀ ಭವಿಸ್ಸಸಿ.

ಅನ್ತಮಸೋ ತಙ್ಖಣಿಕಾಯಪೀತಿ ಮುಹುತ್ತಿಕಾ ಭವಿಸ್ಸಸಿ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೩೦೩. ದಸ ಇತ್ಥಿಯೋ – ಮಾತುರಕ್ಖಿತಾ ಪಿತುರಕ್ಖಿತಾ ಮಾತಾಪಿತುರಕ್ಖಿತಾ ಭಾತುರಕ್ಖಿತಾ ಭಗಿನಿರಕ್ಖಿತಾ ಞಾತಿರಕ್ಖಿತಾ ಗೋತ್ತರಕ್ಖಿತಾ ಧಮ್ಮರಕ್ಖಿತಾ ಸಾರಕ್ಖಾ ಸಪರಿದಣ್ಡಾ.

ದಸ ಭರಿಯಾಯೋ – ಧನಕ್ಕೀತಾ ಛನ್ದವಾಸಿನೀ ಭೋಗವಾಸಿನೀ ಪಟವಾಸಿನೀ ಓದಪತ್ತಕಿನೀ ಓಭಟಚುಮ್ಬಟಾ ದಾಸೀ ಚ ಭರಿಯಾ ಚ ಕಮ್ಮಕಾರೀ ಚ ಭರಿಯಾ ಚ ಧಜಾಹಟಾ ಮುಹುತ್ತಿಕಾ.

೩೦೪. ಮಾತುರಕ್ಖಿತಾ ನಾಮ ಮಾತಾ ರಕ್ಖತಿ ಗೋಪೇತಿ ಇಸ್ಸರಿಯಂ ಕಾರೇತಿ ವಸಂ ವತ್ತೇತಿ.

ಪಿತುರಕ್ಖಿತಾ ನಾಮ ಪಿತಾ ರಕ್ಖತಿ ಗೋಪೇತಿ ಇಸ್ಸರಿಯಂ ಕಾರೇತಿ ವಸಂ ವತ್ತೇತಿ.

ಮಾತಾಪಿತುರಕ್ಖಿತಾ ನಾಮ ಮಾತಾಪಿತರೋ ರಕ್ಖನ್ತಿ ಗೋಪೇನ್ತಿ ಇಸ್ಸರಿಯಂ ಕಾರೇನ್ತಿ ವಸಂ ವತ್ತೇನ್ತಿ.

ಭಾತುರಕ್ಖಿತಾ ನಾಮ ಭಾತಾ ರಕ್ಖತಿ ಗೋಪೇತಿ ಇಸ್ಸರಿಯಂ ಕಾರೇತಿ ವಸಂ ವತ್ತೇತಿ.

ಭಗಿನಿರಕ್ಖಿತಾ ನಾಮ ಭಗಿನೀ ರಕ್ಖತಿ ಗೋಪೇತಿ ಇಸ್ಸರಿಯಂ ಕಾರೇತಿ ವಸಂ ವತ್ತೇತಿ.

ಞಾತಿರಕ್ಖಿತಾ ನಾಮ ಞಾತಕಾ ರಕ್ಖನ್ತಿ ಗೋಪೇನ್ತಿ ಇಸ್ಸರಿಯಂ ಕಾರೇನ್ತಿ ವಸಂ ವತ್ತೇನ್ತಿ.

ಗೋತ್ತರಕ್ಖಿತಾ ನಾಮ ಸಗೋತ್ತಾ ರಕ್ಖನ್ತಿ ಗೋಪೇನ್ತಿ ಇಸ್ಸರಿಯಂ ಕಾರೇನ್ತಿ ವಸಂ ವತ್ತೇನ್ತಿ.

ಧಮ್ಮರಕ್ಖಿತಾ ನಾಮ ಸಹಧಮ್ಮಿಕಾ ರಕ್ಖನ್ತಿ ಗೋಪೇನ್ತಿ ಇಸ್ಸರಿಯಂ ಕಾರೇನ್ತಿ ವಸಂ ವತ್ತೇನ್ತಿ.

ಸಾರಕ್ಖಾ ನಾಮ ಗಬ್ಭೇಪಿ ಪರಿಗ್ಗಹಿತಾ ಹೋತಿ – ಮಯ್ಹಂ ಏಸಾತಿ. ಅನ್ತಮಸೋ ಮಾಲಾಗುಳಪರಿಕ್ಖಿತ್ತಾಪಿ.

ಸಪರಿದಣ್ಡಾ ನಾಮ ಕೇಹಿಚಿ ದಣ್ಡೋ ಠಪಿತೋ ಹೋತಿ – ಯೋ ಇತ್ಥನ್ನಾಮಂ ಇತ್ಥಿಂ ಗಚ್ಛತಿ ಏತ್ತಕೋ ದಣ್ಡೋತಿ.

ಧನಕ್ಕೀತಾ ನಾಮ ಧನೇನ ಕಿಣಿತ್ವಾ ವಾಸೇತಿ.

ಛನ್ದವಾಸಿನೀ ನಾಮ ಪಿಯೋ ಪಿಯಂ ವಾಸೇತಿ.

ಭೋಗವಾಸಿನೀ ನಾಮ ಭೋಗಂ ದತ್ವಾ ವಾಸೇತಿ.

ಪಟವಾಸಿನೀ ನಾಮ ಪಟಂ ದತ್ವಾ ವಾಸೇತಿ.

ಓದಪತ್ತಕಿನೀ ನಾಮ ಉದಕಪತ್ತಂ ಆಮಸಿತ್ವಾ ವಾಸೇತಿ.

ಓಭಟಚುಮ್ಬಟಾ ನಾಮ ಚುಮ್ಬಟಂ ಓರೋಪೇತ್ವಾ ವಾಸೇತಿ.

ದಾಸೀ ನಾಮ ದಾಸೀ ಚೇವ ಹೋತಿ ಭರಿಯಾ ಚ.

ಕಮ್ಮಕಾರೀ ನಾಮ ಕಮ್ಮಕಾರೀ ಚೇವ ಹೋತಿ ಭರಿಯಾ ಚ.

ಧಜಾಹಟಾ ನಾಮ ಕರಮರಾನೀತಾ ವುಚ್ಚತಿ.

ಮುಹುತ್ತಿಕಾ ನಾಮ ತಙ್ಖಣಿಕಾ ವುಚ್ಚತಿ.

೩೦೫. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಂ ಬ್ರೂಹಿ…ಪೇ… ಮಾತಾಪಿತುರಕ್ಖಿತಂ ಬ್ರೂಹಿ… ಭಾತುರಕ್ಖಿತಂ ಬ್ರೂಹಿ… ಭಗಿನಿರಕ್ಖಿತಂ ಬ್ರೂಹಿ… ಞಾತಿರಕ್ಖಿತಂ ಬ್ರೂಹಿ… ಗೋತ್ತರಕ್ಖಿತಂ ಬ್ರೂಹಿ… ಧಮ್ಮರಕ್ಖಿತಂ ಬ್ರೂಹಿ… ಸಾರಕ್ಖಂ ಬ್ರೂಹಿ… ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೦೬. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಮಾತಾಪಿತುರಅಖತಞ್ಚ…ಪೇ…

ಮಾತುರಕ್ಖಿತಞ್ಚ ಭಾತುರಕ್ಖಿತಞ್ಚ… ಮಾತುರಕ್ಖಿತಞ್ಚ ಭಗಿನಿರಕ್ಖಿತಞ್ಚ… ಮಾತುರಕ್ಖಿತಞ್ಚ ಞಾತಿರಕ್ಖಿತಞ್ಚ… ಮಾತುರಕ್ಖಿತಞ್ಚ ಗೋತ್ತರಕ್ಖಿತಞ್ಚ… ಮಾತುರಕ್ಖಿತಞ್ಚ ಧಮ್ಮರಕ್ಖಿತಞ್ಚ… ಮಾತುರಕ್ಖಿತಞ್ಚ ಸಾರಕ್ಖಞ್ಚ… ಮಾತುರಕ್ಖಿತಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

೩೦೭. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಞ್ಚ ಭಾತುರಕ್ಖಿತಞ್ಚ…ಪೇ… ಪಿತುರಕ್ಖಿತಞ್ಚ ಭಗಿನಿರಕ್ಖಿತಞ್ಚ… ಪಿತುರಕ್ಖಿತಞ್ಚ ಞಾತಿರಕ್ಖಿತಞ್ಚ… ಪಿತುರಕ್ಖಿತಞ್ಚ ಗೋತ್ತರಕ್ಖಿತಞ್ಚ… ಪಿತುರಕ್ಖಿತಞ್ಚ ಧಮ್ಮರಕ್ಖಿತಞ್ಚ… ಪಿತುರಕ್ಖಿತಞ್ಚ ಸಾರಕ್ಖಞ್ಚ… ಪಿತುರಕ್ಖಿತಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಞ್ಚ ಮಾತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.

೩೦೮. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಞ್ಚ ಮಾತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಞ್ಚ ಪಿತುರಅಖತಞ್ಚ…ಪೇ…

ಸಪರಿದಣ್ಡಞ್ಚ ಮಾತಾಪಿತುರಕ್ಖಿತಞ್ಚ… ಸಪರಿದಣ್ಡಞ್ಚ ಭಾತುರಕ್ಖಿತಞ್ಚ… ಸಪರಿದಣ್ಡಞ್ಚ ಭಗಿನಿರಕ್ಖಿತಞ್ಚ… ಸಪರಿದಣ್ಡಞ್ಚ ಞಾತಿರಕ್ಖಿತಞ್ಚ… ಸಪರಿದಣ್ಡಞ್ಚ ಗೋತ್ತರಕ್ಖಿತಞ್ಚ… ಸಪರಿದಣ್ಡಞ್ಚ ಧಮ್ಮರಕ್ಖಿತಞ್ಚ… ಸಪರಿದಣ್ಡಞ್ಚ ಸಾರಕ್ಖಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಮೂಲಕಂ ನಿಟ್ಠಿತಂ.

ಏವಂ ದುಮೂಲಕಮ್ಪಿ ತಿಮೂಲಕಮ್ಪಿ ಯಾವ ನವಮೂಲಕಂ ಕಾತಬ್ಬಂ.

ಇದಂ ದಸಮೂಲಕಂ

೩೦೯. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ ಭಾತುರಕ್ಖಿತಞ್ಚ ಭಗಿನಿರಕ್ಖಿತಞ್ಚ ಞಾತಿರಕ್ಖಿತಞ್ಚ ಗೋತ್ತರಕ್ಖಿತಞ್ಚ ಧಮ್ಮರಕ್ಖಿತಞ್ಚ ಸಾರಕ್ಖಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಧನಕ್ಕೀತಾಚಕ್ಕಂ ನಿಟ್ಠಿತಂ.

೩೧೦. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ…ಪೇ… ಭೋಗವಾಸಿನೀ… ಪಟವಾಸಿನೀ… ಓದಪತ್ತಕಿನೀ… ಓಭಟಚುಮ್ಬಟಾ… ದಾಸೀ ಚ ಭರಿಯಾ ಚ… ಕಮ್ಮಕಾರೀ ಚ ಭರಿಯಾ ಚ… ಧಜಾಹಟಾ… ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಂ ಬ್ರೂಹಿ…ಪೇ… ಮಾತಾಪಿತುರಕ್ಖಿತಂ ಬ್ರೂಹಿ… ಭಾತುರಕ್ಖಿತಂ ಬ್ರೂಹಿ… ಭಗಿನಿರಕ್ಖಿತಂ ಬ್ರೂಹಿ… ಞಾತಿರಕ್ಖಿತಂ ಬ್ರೂಹಿ… ಗೋತ್ತರಕ್ಖಿತಂ ಬ್ರೂಹಿ… ಧಮ್ಮರಕ್ಖಿತಂ ಬ್ರೂಹಿ… ಸಾರಕ್ಖಂ ಬ್ರೂಹಿ… ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೧೧. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ…ಪೇ… ಮಾತುರಕ್ಖಿತಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

೩೧೨. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಞ್ಚ ಭಾತುರಕ್ಖಿತಞ್ಚ…ಪೇ… ಪಿತುರಕ್ಖಿತಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಞ್ಚ ಮಾತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.

೩೧೩. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಞ್ಚ ಮಾತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಞ್ಚ ಪಿತುರಕ್ಖಿತಞ್ಚ…ಪೇ… ಸಪರಿದಣ್ಡಞ್ಚ ಸಾರಕ್ಖಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಮೂಲಕಂ ನಿಟ್ಠಿತಂ.

ದುಮೂಲಕಾದೀನಿಪಿ ಏವಮೇವ ಕಾತಬ್ಬಾನಿ.

ಇದಂ ದಸಮೂಲಕಂ

೩೧೪. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ ಭಾತುರಕ್ಖಿತಞ್ಚ ಭಗಿನಿರಕ್ಖಿತಞ್ಚ ಞಾತಿರಕ್ಖಿತಞ್ಚ ಗೋತ್ತರಕ್ಖಿತಞ್ಚ ಧಮ್ಮರಕ್ಖಿತಞ್ಚ ಸಾರಕ್ಖಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಮುಹುತ್ತಿಕಾಚಕ್ಕಂ ನಿಟ್ಠಿತಂ.

೩೧೫. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ…ಪೇ… ಭೋಗವಾಸಿನೀ… ಪಟವಾಸಿನೀ… ಓದಪತ್ತಕಿನೀ… ಓಭಟಚುಮ್ಬಟಾ… ದಾಸೀ ಚ ಭರಿಯಾ ಚ… ಕಮ್ಮಕಾರೀ ಚ ಭರಿಯಾ ಚ… ಧಜಾಹಟಾ… ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೧೬. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಭೋಗವಾಸಿನೀ ಚ…ಪೇ… ಧನಕ್ಕೀತಾ ಚ ಪಟವಾಸಿನೀ ಚ… ಧನಕ್ಕೀತಾ ಚ ಓದಪತ್ತಕಿನೀ ಚ… ಧನಕ್ಕೀತಾ ಚ ಓಭಟಚುಮ್ಬಟಾ ಚ… ಧನಕ್ಕೀತಾ ಚ ದಾಸೀ ಚ ಭರಿಯಾ ಚ… ಧನಕ್ಕೀತಾ ಚ ಕಮ್ಮಕಾರೀ ಚ ಭರಿಯಾ ಚ… ಧನಕ್ಕೀತಾ ಚ ಧಜಾಹಟಾ ಚ… ಧನಕ್ಕೀತಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

೩೧೭. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ ಚ ಭೋಗವಾಸಿನೀ ಚ…ಪೇ… ಛನ್ದವಾಸಿನೀ ಚ ಮುಹುತ್ತಿಕಾ ಚ… ಛನ್ದವಾಸಿನೀ ಚ ಧನಕ್ಕೀತಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.

೩೧೮. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಮುಹುತ್ತಿಕಾ ಚ ಧನಕ್ಕೀತಾ ಚ…ಪೇ… ಮುಹುತ್ತಿಕಾ ಚ ಛನ್ದವಾಸಿನೀ ಚ…ಪೇ… ಮುಹುತ್ತಿಕಾ ಚ ಧಜಾಹಟಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಮೂಲಕಂ ನಿಟ್ಠಿತಂ.

ದುಮೂಲಕಾದೀನಿಪಿ ಏವಮೇವ ಕಾತಬ್ಬಾನಿ.

ಇದಂ ದಸಮೂಲಕಂ

೩೧೯. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚ ಭೋಗವಾಸಿನೀ ಚ ಪಟವಾಸಿನೀ ಚ ಓದಪತ್ತಕಿನೀ ಚ ಓಭಟಚುಮ್ಬಟಾ ಚ ದಾಸೀ ಚ ಭರಿಯಾ ಚ ಕಮ್ಮಕಾರೀ ಚ ಭರಿಯಾ ಚ ಧಜಾಹಟಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಮಾತುರಕ್ಖಿತಾಚಕ್ಕಂ ನಿಟ್ಠಿತಂ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪಿತುರಕ್ಖಿತಂ…ಪೇ… ಮಾತಾಪಿತುರಕ್ಖಿತಂ… ಭಾತುರಕ್ಖಿತಂ… ಭಗಿನಿರಕ್ಖಿತಂ … ಞಾತಿರಕ್ಖಿತಂ… ಗೋತ್ತರಕ್ಖಿತಂ… ಧಮ್ಮರಕ್ಖಿತಂ … ಸಾರಕ್ಖಂ… ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ…ಪೇ… ಭೋಗವಾಸಿನೀ, ಪಟವಾಸಿನೀ, ಓದಪತ್ತಕಿನೀ, ಓಭಟಚುಮ್ಬಟಾ, ದಾಸೀ ಚ ಭರಿಯಾ ಚ, ಕಮ್ಮಕಾರೀ ಚ ಭರಿಯಾ ಚ, ಧಜಾಹಟಾ, ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೨೦. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಭೋಗವಾಸಿನೀ ಚ…ಪೇ… ಧನಕ್ಕೀತಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ ಚ ಭೋಗವಾಸಿನೀ ಚ…ಪೇ… ಛನ್ದವಾಸಿನೀ ಚ ಮುಹುತ್ತಿಕಾ ಚ, ಛನ್ದವಾಸಿನೀ ಚ ಧನಕ್ಕೀತಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಮುಹುತ್ತಿಕಾ ಚ ಧನಕ್ಕೀತಾ ಚ…ಪೇ… ಮುಹುತ್ತಿಕಾ ಚ ಛನ್ದವಾಸಿನೀ ಚ, ಮುಹುತ್ತಿಕಾ ಚ ಧಜಾಹಟಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಮೂಲಕಂ ನಿಟ್ಠಿತಂ.

ದುಮೂಲಕಮ್ಪಿ ತಿಮೂಲಕಮ್ಪಿ ಯಾವ ನವಮೂಲಕಂ ಏವಮೇವ ಕಾತಬ್ಬಂ.

ಇದಂ ದಸಮೂಲಕಂ.

೩೨೧. ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಸಪರಿದಣ್ಡಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚ ಭೋಗವಾಸಿನೀ ಚ ಪಟವಾಸಿನೀ ಚ ಓದಪತ್ತಕಿನೀ ಚ ಓಭಟಚುಮ್ಬಟಾ ಚ ದಾಸೀ ಚ ಭರಿಯಾ ಚ ಕಮ್ಮಕಾರೀ ಚ ಭರಿಯಾ ಚ ಧಜಾಹಟಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಸಪರಿದಣ್ಡಾಚಕ್ಕಂ ನಿಟ್ಠಿತಂ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ – ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ ಚ ಛನ್ದವಾಸಿನೀ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ ಚ ಛನ್ದವಾಸಿನೀ ಚ ಭೋಗವಾಸಿನೀ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏವಂ ಉಭತೋವಡ್ಢಕಂ ಕಾತಬ್ಬಂ.

ಪುರಿಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಞ್ಚ ಪಿತುರಕ್ಖಿತಞ್ಚ ಮಾತಾಪಿತುರಕ್ಖಿತಞ್ಚ ಭಾತುರಕ್ಖಿತಞ್ಚ ಭಗಿನಿರಕ್ಖಿತಞ್ಚ ಞಾತಿರಕ್ಖಿತಞ್ಚ ಗೋತ್ತರಕ್ಖಿತಞ್ಚ ಧಮ್ಮರಕ್ಖಿತಞ್ಚ ಸಾರಕ್ಖಞ್ಚ ಸಪರಿದಣ್ಡಞ್ಚ ಬ್ರೂಹಿ – ‘ಹೋಥ ಕಿರ ಇತ್ಥನ್ನಾಮಸ್ಸ ಭರಿಯಾಯೋ ಧನಕ್ಕೀತಾ ಚ ಛನ್ದವಾಸಿನೀ ಚ ಭೋಗವಾಸಿನೀ ಚ ಪಟವಾಸಿನೀ ಚ ಓದಪತ್ತಕಿನೀ ಚ ಓಭಟಚುಮ್ಬಟಾ ಚ ದಾಸೀ ಚ ಭರಿಯಾ ಚ ಕಮ್ಮಕಾರೀ ಚ ಭರಿಯಾ ಚ ಧಜಾಹಟಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಉಭತೋವಡ್ಢಕಂ ನಿಟ್ಠಿತಂ.

ಪುರಿಸಸ್ಸ ಮಾತಾ ಭಿಕ್ಖುಂ ಪಹಿಣತಿ…ಪೇ… ಪುರಿಸಸ್ಸ ಪಿತಾ ಭಿಕ್ಖುಂ ಪಹಿಣತಿ…ಪೇ… ಪುರಿಸಸ್ಸ ಮಾತಾಪಿತರೋ ಭಿಕ್ಖುಂ ಪಹಿಣನ್ತಿ…ಪೇ… ಪುರಿಸಸ್ಸ ಭಾತಾ ಭಿಕ್ಖುಂ ಪಹಿಣತಿ…ಪೇ… ಪುರಿಸಸ್ಸ ಭಗಿನೀ ಭಿಕ್ಖುಂ ಪಹಿಣತಿ…ಪೇ… ಪುರಿಸಸ್ಸ ಞಾತಕಾ ಭಿಕ್ಖುಂ ಪಹಿಣನ್ತಿ…ಪೇ… ಪುರಿಸಸ್ಸ ಗೋತ್ತಾ ಭಿಕ್ಖುಂ ಪಹಿಣನ್ತಿ…ಪೇ… ಪುರಿಸಸ್ಸ ಸಹಧಮ್ಮಿಕಾ ಭಿಕ್ಖುಂ ಪಹಿಣನ್ತಿ…ಪೇ….

ಪುರಿಸಸ್ಸ ಪೇಯ್ಯಾಲೋ ವಿತ್ಥಾರೇತಬ್ಬೋ.

ಉಭತೋವಡ್ಢಕಂ ಯಥಾ ಪುರಿಮನಯೋ ತಥೇವ ವಿತ್ಥಾರೇತಬ್ಬಂ.

೩೨೨. ಮಾತುರಕ್ಖಿತಾಯ ಮಾತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಮಾತುರಕ್ಖಿತಾಯ ಮಾತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ…ಪೇ… ಭೋಗವಾಸಿನೀ, ಪಟವಾಸಿನೀ, ಓದಪತ್ತಕಿನೀ, ಓಭಟಚುಮ್ಬಟಾ, ದಾಸೀ ಚ ಭರಿಯಾ ಚ, ಕಮ್ಮಕಾರೀ ಚ ಭರಿಯಾ ಚ, ಧಜಾಹಟಾ, ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೨೩. ಮಾತುರಕ್ಖಿತಾಯ ಮಾತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚ…ಪೇ… ಧನಕ್ಕೀತಾ ಚ ಭೋಗವಾಸಿನೀ ಚ, ಧನಕ್ಕೀತಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

೩೨೪. ಮಾತುರಕ್ಖಿತಾಯ ಮಾತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ ಚ ಭೋಗವಾಸಿನೀ ಚ…ಪೇ… ಛನ್ದವಾಸಿನೀ ಚ ಮುಹುತ್ತಿಕಾ ಚ, ಛನ್ದವಾಸಿನೀ ಚ ಧನಕ್ಕೀತಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.

೩೨೫. ಮಾತುರಕ್ಖಿತಾಯ ಮಾತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಮುಹುತ್ತಿಕಾ ಚ ಧನಕ್ಕೀತಾ ಚ…ಪೇ… ಮುಹುತ್ತಿಕಾ ಚ ಛನ್ದವಾಸಿನೀ ಚ…ಪೇ… ಮುಹುತ್ತಿಕಾ ಚ ಧಜಾಹಟಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಮೂಲಕಂ ನಿಟ್ಠಿತಂ.

ದುಮೂಲಕಮ್ಪಿ ತಿಮೂಲಕಮ್ಪಿ ಯಾವ ನವಮೂಲಕಂ ಏವಮೇವ ಕಾತಬ್ಬಂ.

ಇದಂ ದಸಮೂಲಕಂ

೩೨೬. ಮಾತುರಕ್ಖಿತಾಯ ಮಾತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚ ಭೋಗವಾಸಿನೀ ಚ ಪಟವಾಸಿನೀ ಚ ಓದಪತ್ತಕಿನೀ ಚ ಓಭಟಚುಮ್ಬಟಾ ಚ ದಾಸೀ ಚ ಭರಿಯಾ ಚ ಕಮ್ಮಕಾರೀ ಚ ಭರಿಯಾ ಚ ಧಜಾಹಟಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಮಾತುಚಕ್ಕಂ ನಿಟ್ಠಿತಂ.

ಪಿತುರಕ್ಖಿತಾಯ ಪಿತಾ ಭಿಕ್ಖುಂ ಪಹಿಣತಿ…ಪೇ… ಮಾತಾಪಿತುರಕ್ಖಿತಾಯ ಮಾತಾಪಿತರೋ ಭಿಕ್ಖುಂ ಪಹಿಣನ್ತಿ… ಭಾತುರಕ್ಖಿತಾಯ ಭಾತಾ ಭಿಕ್ಖುಂ ಪಹಿಣತಿ… ಭಗಿನಿರಕ್ಖಿತಾಯ ಭಗಿನೀ ಭಿಕ್ಖುಂ ಪಹಿಣತಿ… ಞಾತಿರಕ್ಖಿತಾಯ ಞಾತಕಾ ಭಿಕ್ಖುಂ ಪಹಿಣನ್ತಿ… ಗೋತ್ತರಕ್ಖಿತಾಯ ಗೋತ್ತಾ [ಸಗೋತ್ತಾ (?)] ಭಿಕ್ಖುಂ ಪಹಿಣನ್ತಿ… ಧಮ್ಮರಕ್ಖಿತಾಯ ಸಹಧಮ್ಮಿಕಾ ಭಿಕ್ಖುಂ ಪಹಿಣನ್ತಿ… ಸಾರಕ್ಖಾಯ ಯೇನ ಪರಿಗ್ಗಹಿತಾ ಹೋತಿ ಸೋ ಭಿಕ್ಖುಂ ಪಹಿಣತಿ… ಸಪರಿದಣ್ಡಾಯ ಯೇನ ದಣ್ಡೋ ಠಪಿತೋ ಹೋತಿ ಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಸಪರಿದಣ್ಡಾಯ ಯೇನ ದಣ್ಡೋ ಠಪಿತೋ ಹೋತಿ ಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ…ಪೇ… ಭೋಗವಾಸಿನೀ… ಪಟವಾಸಿನೀ… ಓದಪತ್ತಕಿನೀ… ಓಭಟಚುಮ್ಬಟಾ… ದಾಸೀ ಚ ಭರಿಯಾ ಚ… ಕಮ್ಮಕಾರೀ ಚ ಭರಿಯಾ ಚ… ಧಜಾಹಟಾ… ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೨೭. ಸಪರಿದಣ್ಡಾಯ ಯೇನ ದಣ್ಡೋ ಠಪಿತೋ ಹೋತಿ ಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚ…ಪೇ… ಧನಕ್ಕೀತಾ ಚ ಭೋಗವಾಸಿನೀ ಚ… ಧನಕ್ಕೀತಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

೩೨೮. ಸಪರಿದಣ್ಡಾಯ ಯೇನ ದಣ್ಡೋ ಠಪಿತೋ ಹೋತಿ ಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ ಚ ಭೋಗವಾಸಿನೀ ಚ…ಪೇ… ಛನ್ದವಾಸಿನೀ ಚ ಮುಹುತ್ತಿಕಾ ಚ… ಛನ್ದವಾಸಿನೀ ಚ ಧನಕ್ಕೀತಾ ಚಾ’’’ ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.

೩೨೯. ಸಪರಿದಣ್ಡಾಯ ಯೇನ ದಣ್ಡೋ, ಠಪಿತೋ ಹೋತಿ ಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಮುಹುತ್ತಿಕಾ ಚ ಧನಕ್ಕೀತಾ ಚ…ಪೇ… ಮುಹುತ್ತಿಕಾ ಚ ಛನ್ದವಾಸಿನೀ ಚ…ಪೇ… ಮುಹುತ್ತಿಕಾ ಚ ಧಜಾಹಟಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಏಕಮೂಲಕಂ ನಿಟ್ಠಿತಂ.

ದುಮೂಲಕಮ್ಪಿ ತಿಮೂಲಕಮ್ಪಿ ಯಾವ ನವಮೂಲಕಂ ಏವಮೇವ ಕಾತಬ್ಬಂ.

ಇದಂ ದಸಮೂಲಕಂ

೩೩೦. ಸಪರಿದಣ್ಡಾಯ ಯೇನ ದಣ್ಡೋ ಠಪಿತೋ ಹೋತಿ ಸೋ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋತು ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚ ಭೋಗವಾಸಿನೀ ಚ ಪಟವಾಸಿನೀ ಚ ಓದಪತ್ತಕಿನೀ ಚ ಓಭಟಚುಮ್ಬಟಾ ಚ ದಾಸೀ ಚ ಭರಿಯಾ ಚ ಕಮ್ಮಕಾರೀ ಚ ಭರಿಯಾ ಚ ಧಜಾಹಟಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ದಣ್ಡಠಪಿತಚಕ್ಕಂ ನಿಟ್ಠಿತಂ.

ಮಾತುರಕ್ಖಿತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋಮಿ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಮಾತುರಕ್ಖಿತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋಮಿ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ…ಪೇ… ಭೋಗವಾಸಿನೀ… ಪಟವಾಸಿನೀ… ಓದಪತ್ತಕಿನೀ… ಓಭಟಚುಮ್ಬಟಾ… ದಾಸೀ ಚ ಭರಿಯಾ ಚ… ಕಮ್ಮಕಾರೀ ಚ ಭರಿಯಾ ಚ… ಧಜಾಹಟಾ… ಮುಹುತ್ತಿಕಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ನಿಕ್ಖೇಪಪದಾನಿ.

೩೩೧. ಮಾತುರಕ್ಖಿತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋಮಿ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಛನ್ದವಾಸಿನೀ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಮಾತುರಕ್ಖಿತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋಮಿ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ ಚ ಭೋಗವಾಸಿನೀ ಚ…ಪೇ… ಧನಕ್ಕೀತಾ ಚ ಪಟವಾಸಿನೀ ಚ…ಪೇ… ಧನಕ್ಕೀತಾ ಚ ಮುಹುತ್ತಿಕಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಖಣ್ಡಚಕ್ಕಂ.

೩೩೨. ಮಾತುರಕ್ಖಿತಾ ಭಿಕ್ಖುಂ ಪಹಿಣತಿ – ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಬ್ರೂಹಿ – ‘ಹೋಮಿ ಇತ್ಥನ್ನಾಮಸ್ಸ ಭರಿಯಾ ಛನ್ದವಾಸಿನೀ ಚ ಭೋಗವಾಸಿನೀ ಚ…ಪೇ… ಛನ್ದವಾಸಿನೀ ಚ ಮುಹುತ್ತಿಕಾ ಚ… ಛನ್ದವಾಸಿನೀ ಚ ಧನಕ್ಕೀತಾ ಚಾ’’’ತಿ. ಪಟಿಗ್ಗಣ್ಹಾತಿ ವೀಮಂಸತಿ ಪಚ್ಚಾಹರತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಬದ್ಧಚಕ್ಕಂ ಮೂಲಂ ಸಂಖಿತ್ತಂ.