೪. ಅತ್ತಕಾಮಪಾರಿಚರಿಯಸಿಕ್ಖಾಪದಂ

೨೯೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಸಾವತ್ಥಿಯಂ ಕುಲೂಪಕೋ ಹೋತಿ, ಬಹುಕಾನಿ ಕುಲಾನಿ ಉಪಸಙ್ಕಮತಿ. ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಮತಪತಿಕಾ ಅಭಿರೂಪಾ ಹೋತಿ ದಸ್ಸನೀಯಾ ಪಾಸಾದಿಕಾ. ಅಥ ಖೋ ಆಯಸ್ಮಾ ಉದಾಯೀ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ತಸ್ಸಾ ಇತ್ಥಿಯಾ ನಿವೇಸನಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ. ಅಥ ಖೋ ಸಾ ಇತ್ಥೀ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಂ ಖೋ ತಂ ಇತ್ಥಿಂ ಆಯಸ್ಮಾ ಉದಾಯೀ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ. ಅಥ ಖೋ ಸಾ ಇತ್ಥೀ ಆಯಸ್ಮತಾ ಉದಾಯಿನಾ ಧಮ್ಮಿಯಾ ಕಥಾಯ ಸನ್ದಸ್ಸಿತಾ ಸಮಾದಪಿತಾ ಸಮುತ್ತೇಜಿತಾ ಸಮ್ಪಹಂಸಿತಾ ಆಯಸ್ಮನ್ತಂ ಉದಾಯಿಂ ಏತದವೋಚ – ‘‘ವದೇಯ್ಯಾಥ, ಭನ್ತೇ, ಯೇನ ಅತ್ಥೋ. ಪಟಿಬಲಾ ಮಯಂ ಅಯ್ಯಸ್ಸ ದಾತುಂ ಯದಿದಂ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರ’’ನ್ತಿ.

‘‘ನ ಖೋ ತೇ, ಭಗಿನಿ, ಅಮ್ಹಾಕಂ ದುಲ್ಲಭಾ ಯದಿದಂ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾ. ಅಪಿಚ, ಯೋ ಅಮ್ಹಾಕಂ ದುಲ್ಲಭೋ ತಂ ದೇಹೀ’’ತಿ. ‘‘ಕಿಂ, ಭನ್ತೇ’’ತಿ? ‘‘ಮೇಥುನಧಮ್ಮ’’ನ್ತಿ. ‘‘ಅತ್ಥೋ, ಭನ್ತೇ’’ತಿ? ‘‘ಅತ್ಥೋ, ಭಗಿನೀ’’ತಿ. ‘‘ಏಹಿ, ಭನ್ತೇ’’ತಿ, ಓವರಕಂ ಪವಿಸಿತ್ವಾ ಸಾಟಕಂ ನಿಕ್ಖಿಪಿತ್ವಾ ಮಞ್ಚಕೇ ಉತ್ತಾನಾ ನಿಪಜ್ಜಿ. ಅಥ ಖೋ ಆಯಸ್ಮಾ ಉದಾಯೀ ಯೇನ ಸಾ ಇತ್ಥೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ – ‘‘ಕೋ ಇಮಂ ವಸಲಂ ದುಗ್ಗನ್ಧಂ ಆಮಸಿಸ್ಸತೀ’’ತಿ, ನಿಟ್ಠುಹಿತ್ವಾ ಪಕ್ಕಾಮಿ. ಅಥ ಖೋ ಸಾ ಇತ್ಥೀ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಲಜ್ಜಿನೋ ಇಮೇ ಸಮಣಾ ಸಕ್ಯಪುತ್ತಿಯಾ ದುಸ್ಸೀಲಾ ಮುಸಾವಾದಿನೋ. ಇಮೇ ಹಿ ನಾಮ ಧಮ್ಮಚಾರಿನೋ ಸಮಚಾರಿನೋ ಬ್ರಹ್ಮಚಾರಿನೋ ಸಚ್ಚವಾದಿನೋ ಸೀಲವನ್ತೋ ಕಲ್ಯಾಣಧಮ್ಮಾ ಪಟಿಜಾನಿಸ್ಸನ್ತಿ! ನತ್ಥಿ ಇಮೇಸಂ ಸಾಮಞ್ಞಂ ನತ್ಥಿ ಇಮೇಸಂ ಬ್ರಹ್ಮಞ್ಞಂ, ನಟ್ಠಂ ಇಮೇಸಂ ಸಾಮಞ್ಞಂ ನಟ್ಠಂ ಇಮೇಸಂ ಬ್ರಹ್ಮಞ್ಞಂ, ಕುತೋ ಇಮೇಸಂ ಸಾಮಞ್ಞಂ ಕುತೋ ಇಮೇಸಂ ಬ್ರಹ್ಮಞ್ಞಂ, ಅಪಗತಾ ಇಮೇ ಸಾಮಞ್ಞಾ ಅಪಗತಾ ಇಮೇ ಬ್ರಹ್ಮಞ್ಞಾ. ಕಥಞ್ಹಿ ನಾಮ ಸಮಣೋ ಉದಾಯೀ ಮಂ ಸಾಮಂ ಮೇಥುನಧಮ್ಮಂ ಯಾಚಿತ್ವಾ, ‘ಕೋ ಇಮಂ ವಸಲಂ ದುಗ್ಗನ್ಧಂ ಆಮಸಿಸ್ಸತೀ’’ತಿ ನಿಟ್ಠುಹಿತ್ವಾ ಪಕ್ಕಮಿಸ್ಸತಿ! ಕಿಂ ಮೇ ಪಾಪಕಂ ಕಿಂ ಮೇ ದುಗ್ಗನ್ಧಂ, ಕಸ್ಸಾಹಂ ಕೇನ ಹಾಯಾಮೀ’’ತಿ? ಅಞ್ಞಾಪಿ ಇತ್ಥಿಯೋ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಅಲಜ್ಜಿನೋ ಇಮೇ ಸಮಣಾ ಸಕ್ಯಪುತ್ತಿಯಾ ದುಸ್ಸೀಲಾ ಮುಸಾವಾದಿನೋ…ಪೇ… ಕಥಞ್ಹಿ ನಾಮ ಸಮಣೋ ಉದಾಯೀ ಇಮಿಸ್ಸಾ ಸಾಮಂ ಮೇಥುನಧಮ್ಮಂ ಯಾಚಿತ್ವಾ, ‘ಕೋ ಇಮಂ ವಸಲಂ ದುಗ್ಗನ್ಧಂ ಆಮಸಿಸ್ಸತೀ’ತಿ ನಿಟ್ಠುಹಿತ್ವಾ ಪಕ್ಕಮಿಸ್ಸತಿ! ಕಿಂ ಇಮಿಸ್ಸಾ ಪಾಪಕಂ ಕಿಂ ಇಮಿಸ್ಸಾ ದುಗ್ಗನ್ಧಂ, ಕಸ್ಸಾಯಂ ಕೇನ ಹಾಯತೀ’’ತಿ? ಅಸ್ಸೋಸುಂ ಖೋ ಭಿಕ್ಖೂ ತಾಸಂ ಇತ್ಥೀನಂ ಉಜ್ಝಾಯನ್ತೀನಂ ಖಿಯ್ಯನ್ತೀನಂ ವಿಪಾಚೇನ್ತೀನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ಮಾತುಗಾಮಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸಿಸ್ಸತೀ’’ತಿ!

ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಉದಾಯಿಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಉದಾಯಿ, ಮಾತುಗಾಮಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಮಾತುಗಾಮಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸಿಸ್ಸಸಿ! ನನು ಮಯಾ, ಮೋಘಪುರಿಸ, ಅನೇಕಪರಿಯಾಯೇನ ವಿರಾಗಾಯ ಧಮ್ಮೋ ದೇಸಿತೋ ನೋ ಸರಾಗಾಯ…ಪೇ… ಕಾಮಪರಿಳಾಹಾನಂ ವೂಪಸಮೋ ಅಕ್ಖಾತೋ? ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೨೯೧. ‘‘ಯೋ ಪನ ಭಿಕ್ಖು ಓತಿಣ್ಣೋ ವಿಪರಿಣತೇನ ಚಿತ್ತೇನ ಮಾತುಗಾಮಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸೇಯ್ಯ – ‘ಏತದಗ್ಗಂ, ಭಗಿನಿ, ಪಾರಿಚರಿಯಾನಂ ಯಾ ಮಾದಿಸಂ ಸೀಲವನ್ತಂ ಕಲ್ಯಾಣಧಮ್ಮಂ ಬ್ರಹ್ಮಚಾರಿಂ ಏತೇನ ಧಮ್ಮೇನ ಪರಿಚರೇಯ್ಯಾತಿ ಮೇಥುನುಪಸಂಹಿತೇನ’, ಸಙ್ಘಾದಿಸೇಸೋ’’ತಿ.

೨೯೨. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಓತಿಣ್ಣೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ.

ವಿಪರಿಣತನ್ತಿ ರತ್ತಮ್ಪಿ ಚಿತ್ತಂ ವಿಪರಿಣತ್ತಂ, ದುಟ್ಠಮ್ಪಿ ಚಿತ್ತಂ ವಿಪರಿಣತಂ, ಮೂಳ್ಹಮ್ಪಿ ಚಿತ್ತಂ ವಿಪರಿಣತಂ. ಅಪಿಚ, ರತ್ತಂ ಚಿತ್ತಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಂ ವಿಪರಿಣತನ್ತಿ.

ಮಾತುಗಾಮೋ ನಾಮ ಮನುಸ್ಸಿತ್ಥೀ, ನ ಯಕ್ಖೀ, ನ ಪೇತೀ, ನ ತಿರಚ್ಛಾನಗತಾ. ವಿಞ್ಞೂ ಪಟಿಬಲಾ ಸುಭಾಸಿತದುಬ್ಭಾಸಿತಂ ದುಟ್ಠಲ್ಲಾದುಟ್ಠುಲ್ಲಂ ಆಜಾನಿತುಂ.

ಮಾತುಗಾಮಸ್ಸ ಸನ್ತಿಕೇತಿ ಮಾತುಗಾಮಸ್ಸ ಸಾಮನ್ತಾ, ಮಾತುಗಾಮಸ್ಸ ಅವಿದೂರೇ.

ಅತ್ತಕಾಮನ್ತಿ ಅತ್ತನೋ ಕಾಮಂ ಅತ್ತನೋ ಹೇತುಂ ಅತ್ತನೋ ಅಧಿಪ್ಪಾಯಂ ಅತ್ತನೋ ಪಾರಿಚರಿಯಂ.

ಏತದಗ್ಗನ್ತಿ ಏತಂ ಅಗ್ಗಂ ಏತಂ ಸೇಟ್ಠಂ ಏತಂ ಮೋಕ್ಖಂ ಏತಂ ಉತ್ತಮಂ ಏತಂ ಪವರಂ.

ಯಾತಿ ಖತ್ತಿಯೀ [ಖತ್ತಿಯಾ (ಸ್ಯಾ.)] ವಾ ಬ್ರಾಹ್ಮಣೀ ವಾ ವೇಸ್ಸೀ ವಾ ಸುದ್ದೀ ವಾ.

ಮಾದಿಸನ್ತಿ ಖತ್ತಿಯಂ ವಾ ಬ್ರಾಹ್ಮಣಂ ವಾ ವೇಸ್ಸಂ ವಾ ಸುದ್ದಂ ವಾ.

ಸೀಲವನ್ತನ್ತಿ ಪಾಣಾತಿಪಾತಾ ಪಟಿವಿರತಂ, ಅದಿನ್ನಾದಾನಾ ಪಟಿವಿರತಂ, ಮುಸಾವಾದಾ ಪಟಿವಿರತಂ.

ಬ್ರಹ್ಮಚಾರಿನ್ತಿ ಮೇಥುನಧಮ್ಮಾ ಪಟಿವಿರತಂ.

ಕಲ್ಯಾಣಧಮ್ಮೋ ನಾಮ ತೇನ ಚ ಸೀಲೇನ ತೇನ ಚ ಬ್ರಹ್ಮಚರಿಯೇನ ಕಲ್ಯಾಣಧಮ್ಮೋ ಹೋತಿ.

ಏತೇನ ಧಮ್ಮೇನಾತಿ ಮೇಥುನಧಮ್ಮೇನ.

ಪರಿಚರೇಯ್ಯಾತಿ ಅಭಿರಮೇಯ್ಯ.

ಮೇಥುನುಪಸಂಹಿತೇನಾತಿ ಮೇಥುನಧಮ್ಮಪ್ಪಟಿಸಂಯುತ್ತೇನ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೨೯೩. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಇತ್ಥೀ ಚ ಹೋತಿ ವೇಮತಿಕೋ…ಪೇ… ಪಣ್ಡಕಸಞ್ಞೀ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಪಣ್ಡಕೋ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಪಣ್ಡಕೋ ಚ ಹೋತಿ ವೇಮತಿಕೋ…ಪೇ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ದುಕ್ಕಟಸ್ಸ.

ಪುರಿಸೋ ಚ ಹೋತಿ…ಪೇ… ತಿರಚ್ಛಾನಗತೋ ಚ ಹೋತಿ ತಿರಚ್ಛಾನಗತಸಞ್ಞೀ…ಪೇ… ವೇಮತಿಕೋ ಇತ್ಥಿಸಞ್ಞೀ… ಪಣ್ಡಕಸಞ್ಞೀ… ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ತಿರಚ್ಛಾನಗತಸ್ಸ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ದುಕ್ಕಟಸ್ಸ.

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಸನ್ತಿಕೇ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಾಸತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ….

೨೯೪. ಅನಾಪತ್ತಿ ‘‘ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರೇನ ಉಪಟ್ಠಹಾ’’ತಿ ಭಣತಿ, ಉಮ್ಮತ್ತಕಸ್ಸ ಆದಿಕಮ್ಮಿಕಸ್ಸಾತಿ.

ವಿನೀತವತ್ಥುಉದ್ದಾನಗಾಥಾ

ಕಥಂ ವಞ್ಝಾ ಲಭೇ ಪುತ್ತಂ, ಪಿಯಾ ಚ ಸುಭಗಾ ಸಿಯಂ;

ಕಿಂ ದಜ್ಜಂ ಕೇನುಪಟ್ಠೇಯ್ಯಂ, ಕಥಂ ಗಚ್ಛೇಯ್ಯಂ ಸುಗ್ಗತಿನ್ತಿ.

ವಿನೀತವತ್ಥು

೨೯೫. ತೇನ ಖೋ ಪನ ಸಮಯೇನ ಅಞ್ಞತರಾ ವಞ್ಝಾ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕಥಾಹಂ, ಭನ್ತೇ, ವಿಜಾಯೇಯ್ಯ’’ನ್ತಿ? ‘‘ತೇನ ಹಿ, ಭಗಿನಿ, ಅಗ್ಗದಾನಂ ದೇಹೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ವಿಜಾಯಿನೀ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕಥಾಹಂ, ಭನ್ತೇ, ಪುತ್ತಂ ಲಭೇಯ್ಯ’’ನ್ತಿ? ‘‘ತೇನ ಹಿ, ಭಗಿನಿ, ಅಗ್ಗದಾನಂ ದೇಹೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕಥಾಹಂ, ಭನ್ತೇ, ಸಾಮಿಕಸ್ಸ ಪಿಯಾ ಅಸ್ಸ’’ನ್ತಿ? ‘‘ತೇನ ಹಿ, ಭಗಿನಿ, ಅಗ್ಗದಾನಂ ದೇಹೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕಥಾಹಂ, ಭನ್ತೇ, ಸುಭಗಾ ಅಸ್ಸ’’ನ್ತಿ? ‘‘ತೇನ ಹಿ, ಭಗಿನಿ, ಅಗ್ಗದಾನಂ ದೇಹೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕ್ಯಾಹಂ, ಭನ್ತೇ, ಅಯ್ಯಸ್ಸ ದಜ್ಜಾಮೀ’’ತಿ? ‘‘ಅಗ್ಗದಾನಂ, ಭಗಿನೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕೇನಾಹಂ, ಭನ್ತೇ, ಅಯ್ಯಂ ಉಪಟ್ಠೇಮೀ’’ತಿ? ‘‘ಅಗ್ಗದಾನೇನ, ಭಗಿನೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಕುಲೂಪಕಂ ಭಿಕ್ಖುಂ ಏತದವೋಚ – ‘‘ಕಥಾಹಂ,

ಭನ್ತೇ, ಸುಗತಿಂ ಗಚ್ಛೇಯ್ಯ’’ನ್ತಿ? ‘‘ತೇನ ಹಿ, ಭಗಿನಿ, ಅಗ್ಗದಾನಂ ದೇಹೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ಅತ್ತಕಾಮಪಾರಿಚರಿಯಸಿಕ್ಖಾಪದಂ ನಿಟ್ಠಿತಂ ಚತುತ್ಥಂ.