೩. ದುಟ್ಠುಲ್ಲವಾಚಾಸಿಕ್ಖಾಪದಂ

೨೮೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಅರಞ್ಞೇ ವಿಹರತಿ. ತಸ್ಸಾಯಸ್ಮತೋ ವಿಹಾರೋ ಅಭಿರೂಪೋ ಹೋತಿ ದಸ್ಸನೀಯೋ ಪಾಸಾದಿಕೋ. ತೇನ ಖೋ ಪನ ಸಮಯೇನ ಸಮ್ಬಹುಲಾ ಇತ್ಥಿಯೋ ಆರಾಮಂ ಆಗಮಂಸು ವಿಹಾರಪೇಕ್ಖಿಕಾಯೋ. ಅಥ ಖೋ ತಾ ಇತ್ಥಿಯೋ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚುಂ – ‘‘ಇಚ್ಛಾಮ ಮಯಂ, ಭನ್ತೇ, ಅಯ್ಯಸ್ಸ ವಿಹಾರಂ ಪೇಕ್ಖಿತು’’ನ್ತಿ. ಅಥ ಖೋ ಆಯಸ್ಮಾ ಉದಾಯೀ ತಾ ಇತ್ಥಿಯೋ ವಿಹಾರಂ ಪೇಕ್ಖಾಪೇತ್ವಾ ತಾಸಂ ಇತ್ಥೀನಂ ವಚ್ಚಮಗ್ಗಂ ಪಸ್ಸಾವಮಗ್ಗಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ ಯಾಚತಿಪಿ ಆಯಾಚತಿಪಿ ಪುಚ್ಛತಿಪಿ ಪಟಿಪುಚ್ಛತಿಪಿ ಆಚಿಕ್ಖತಿಪಿ ಅನುಸಾಸತಿಪಿ ಅಕ್ಕೋಸತಿಪಿ. ಯಾ ತಾ ಇತ್ಥಿಯೋ ಛಿನ್ನಿಕಾ ಧುತ್ತಿಕಾ ಅಹಿರಿಕಾಯೋ ತಾ ಆಯಸ್ಮತಾ ಉದಾಯಿನಾ ಸದ್ಧಿಂ ಉಹಸನ್ತಿಪಿ ಉಲ್ಲಪನ್ತಿಪಿ ಉಜ್ಜಗ್ಘನ್ತಿಪಿ ಉಪ್ಪಣ್ಡೇನ್ತಿಪಿ. ಯಾ ಪನ ತಾ ಇತ್ಥಿಯೋ ಹಿರಿಮನಾ ತಾ ನಿಕ್ಖಮಿತ್ವಾ ಭಿಕ್ಖೂ ಉಜ್ಝಾಪೇನ್ತಿ – ‘‘ಇದಂ, ಭನ್ತೇ, ನಚ್ಛನ್ನಂ ನಪ್ಪತಿರೂಪಂ. ಸಾಮಿಕೇನಪಿ ಮಯಂ ಏವಂ ವುತ್ತಾ ನ ಇಚ್ಛೇಯ್ಯಾಮ, ಕಿಂ ಪನಾಯ್ಯೇನ ಉದಾಯಿನಾ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ಮಾತುಗಾಮಂ ದುಟ್ಠುಲ್ಲಾಹಿ ವಾಚಾಹಿ ಓಭಾಸಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಉದಾಯಿಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಉದಾಯಿ, ಮಾತುಗಾಮಂ ದುಟ್ಠುಲ್ಲಾಹಿ ವಾಚಾಹಿ ಓಭಾಸಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಮಾತುಗಾಮಂ ದುಟ್ಠುಲ್ಲಾಹಿ ವಾಚಾಹಿ ಓಭಾಸಿಸ್ಸಸಿ! ನನು ಮಯಾ, ಮೋಘಪುರಿಸ, ಅನೇಕಪರಿಯಾಯೇನ ವಿರಾಗಾಯ ಧಮ್ಮೋ ದೇಸಿತೋ ನೋ ಸರಾಗಾಯ…ಪೇ… ಕಾಮಪರಿಳಾಹಾನಂ ವೂಪಸಮೋ ಅಕ್ಖಾತೋ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೨೮೪. ‘‘ಯೋ ಪನ ಭಿಕ್ಖು ಓತಿಣ್ಣೋ ವಿಪರಿಣತೇನ ಚಿತ್ತೇನ ಮಾತುಗಾಮಂ ದುಟ್ಠುಲ್ಲಾಹಿ ವಾಚಾಹಿ ಓಭಾಸೇಯ್ಯ ಯಥಾ ತಂ ಯುವಾ ಯುವತಿಂ ಮೇಥುನುಪಸಂಹಿತಾಹಿ, ಸಙ್ಘಾದಿಸೇಸೋ’’ತಿ.

೨೮೫. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಓತಿಣ್ಣೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ.

ವಿಪರಿಣತನ್ತಿ ರತ್ತಮ್ಪಿ ಚಿತ್ತಂ ವಿಪರಿಣತಂ, ದುಟ್ಠಮ್ಪಿ ಚಿತ್ತಂ ವಿಪರಿಣತಂ ಮೂಳ್ಹಮ್ಪಿ ಚಿತ್ತಂ ವಿಪರಿಣತಂ. ಅಪಿಚ, ರತ್ತಂ ಚಿತ್ತಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಂ ವಿಪರಿಣತನ್ತಿ.

ಮಾತುಗಾಮೋ ನಾಮ ಮನುಸ್ಸಿತ್ಥೀ, ನ ಯಕ್ಖೀ, ನ ಪೇತೀ, ನ ತಿರಚ್ಛಾನಗತಾ. ವಿಞ್ಞೂ ಪಟಿಬಲಾ ಸುಭಾಸಿತದುಬ್ಭಾಸಿತಂ ದುಟ್ಠುಲ್ಲಾದುಟ್ಠುಲ್ಲಂ ಆಜಾನಿತುಂ.

ದುಟ್ಠುಲ್ಲಾ ನಾಮ ವಾಚಾ ವಚ್ಚಮಗ್ಗಪಸ್ಸಾವಮಗ್ಗಮೇಥುನಧಮ್ಮಪ್ಪಟಿಸಂಯುತ್ತಾ ವಾಚಾ.

ಓಭಾಸೇಯ್ಯಾತಿ ಅಜ್ಝಾಚಾರೋ ವುಚ್ಚತಿ.

ಯಥಾ ತಂ ಯುವಾ ಯುವತಿನ್ತಿ ದಹರೋ ದಹರಿಂ, ತರುಣೋ ತರುಣಿಂ, ಕಾಮಭೋಗೀ ಕಾಮಭೋಗಿನಿಂ.

ಮೇಥುನುಪಸಂಹಿತಾಹೀತಿ ಮೇಥುನಧಮ್ಮಪ್ಪಟಿಸಂಯುತ್ತಾಹಿ.

ಸಙ್ಘಾದಿಸೇಸೋತಿ …ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

ದ್ವೇ ಮಗ್ಗೇ ಆದಿಸ್ಸ ವಣ್ಣಮ್ಪಿ ಭಣತಿ, ಅವಣ್ಣಮ್ಪಿ ಭಣತಿ, ಯಾಚತಿಪಿ, ಆಯಾಚತಿಪಿ, ಪುಚ್ಛತಿಪಿ, ಪಟಿಪುಚ್ಛತಿಪಿ, ಆಚಿಕ್ಖತಿಪಿ, ಅನುಸಾಸತಿಪಿ, ಅಕ್ಕೋಸತಿಪಿ.

ವಣ್ಣಂ ಭಣತಿ ನಾಮ ದ್ವೇ ಮಗ್ಗೇ ಥೋಮೇತಿ ವಣ್ಣೇತಿ ಪಸಂಸತಿ.

ಅವಣ್ಣಂ ಭಣತಿ ನಾಮ ದ್ವೇ ಮಗ್ಗೇ ಖುಂಸೇತಿ ವಮ್ಭೇತಿ ಗರಹತಿ.

ಯಾಚತಿ ನಾಮ ದೇಹಿ ಮೇ, ಅರಹಸಿ ಮೇ ದಾತುನ್ತಿ.

ಆಯಾಚತಿ ನಾಮ ಕದಾ ತೇ ಮಾತಾ ಪಸೀದಿಸ್ಸತಿ, ಕದಾ ತೇ ಪಿತಾ ಪಸೀದಿಸ್ಸತಿ, ಕದಾ ತೇ ದೇವತಾಯೋ ಪಸೀದಿಸ್ಸನ್ತಿ, ಕದಾ [ಕದಾ ತೇ (ಸ್ಯಾ.)] ಸುಖಣೋ ಸುಲಯೋ ಸುಮುಹುತ್ತೋ ಭವಿಸ್ಸತಿ, ಕದಾ ತೇ ಮೇಥುನಂ ಧಮ್ಮಂ ಲಭಿಸ್ಸಾಮೀತಿ.

ಪುಚ್ಛತಿ ನಾಮ ಕಥಂ ತ್ವಂ ಸಾಮಿಕಸ್ಸ ದೇಸಿ, ಕಥಂ ಜಾರಸ್ಸ ದೇಸೀತಿ?

ಪಟಿಪುಚ್ಛತಿ ನಾಮ ಏವಂ ಕಿರ ತ್ವಂ ಸಾಮಿಕಸ್ಸ ದೇಸಿ, ಏವಂ ಜಾರಸ್ಸ ದೇಸೀತಿ.

ಆಚಿಕ್ಖತಿ ನಾಮ ಪುಟ್ಠೋ ಭಣತಿ – ‘‘ಏವಂ ದೇಹಿ. ಏವಂ ದೇನ್ತಾ ಸಾಮಿಕಸ್ಸ ಪಿಯಾ ಭವಿಸ್ಸಸಿ ಮನಾಪಾ ಚಾ’’ತಿ.

ಅನುಸಾಸತಿ ನಾಮ ಅಪುಟ್ಠೋ ಭಣತಿ – ‘‘ಏವಂ ದೇಹಿ. ಏವಂ ದೇನ್ತಾ ಸಾಮಿಕಸ್ಸ ಪಿಯಾ ಭವಿಸ್ಸತಿ ಮನಾಪಾ ಚಾ’’ತಿ.

ಅಕ್ಕೋಸತಿ ನಾಮ ಅನಿಮಿತ್ತಾಸಿ, ನಿಮಿತ್ತಮತ್ತಾಸಿ, ಅಲೋಹಿತಾಸಿ, ಧುವಲೋಹಿತಾಸಿ, ಧುವಚೋಳಾಸಿ, ಪಗ್ಘರನ್ತೀಸಿ, ಸಿಖರಣೀಸಿ, ಇತ್ಥಿಪಣ್ಡಕಾಸಿ, ವೇಪುರಿಸಿಕಾಸಿ, ಸಮ್ಭಿನ್ನಾಸಿ, ಉಭತೋಬ್ಯಞ್ಜನಾಸೀತಿ.

೨೮೬. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ವಚ್ಚಮಗ್ಗಂ ಪಸ್ಸಾವಮಗ್ಗಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ ಯಾಚತಿಪಿ ಆಯಾಚತಿಪಿ ಪುಚ್ಛತಿಪಿ ಪಟಿಪುಚ್ಛತಿಪಿ ಆಚಿಕ್ಖತಿಪಿ ಅನುಸಾಸತಿಪಿ ಅಕ್ಕೋಸತಿಪಿ, ಆಪತ್ತಿ ಸಙ್ಘಾದಿಸೇಸಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ವಚ್ಚಮಗ್ಗಂ ಪಸ್ಸಾವಮಗ್ಗಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಂಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ವಚ್ಚಮಗ್ಗಂ ಪಸ್ಸಾವಮಗ್ಗಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ವಚ್ಚಮಗ್ಗಂ ಪಸ್ಸಾವಮಗ್ಗಂ ಠಪೇತ್ವಾ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ವಚ್ಚಮಗ್ಗಂ ಪಸ್ಸಾವಮಗ್ಗಂ ಠಪೇತ್ವಾ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ವಚ್ಚಮಗ್ಗಂ ಪಸ್ಸಾವಮಗ್ಗಂ ಠಪೇತ್ವಾ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯಪಟಿಬದ್ಧಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯಪಟಿಬದ್ಧಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯಪಟಿಬದ್ಧಂ ಆದಿಸ್ಸ ವಣ್ಣಮ್ಪಿ ಭಣತಿ ಅವಣ್ಣಮ್ಪಿ ಭಣತಿ…ಪೇ… ಅಕ್ಕೋಸತಿಪಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

೨೮೭. ಅನಾಪತ್ತಿ ಅತ್ಥಪುರೇಕ್ಖಾರಸ್ಸ, ಧಮ್ಮಪುರೇಕ್ಖಾರಸ್ಸ, ಅನುಸಾಸನಿಪುರೇಕ್ಖಾರಸ್ಸ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ವಿನೀತವತ್ಥುಉದ್ದಾನಗಾಥಾ

ಲೋಹಿತಂ ಕಕ್ಕಸಾಕಿಣ್ಣಂ, ಖರಂ ದೀಘಞ್ಚ ವಾಪಿತಂ;

ಕಚ್ಚಿ ಸಂಸೀದತಿ ಮಗ್ಗೋ, ಸದ್ಧಾ ದಾನೇನ ಕಮ್ಮುನಾತಿ.

ವಿನೀತವತ್ಥು

೨೮೮. ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ನವರತ್ತಂ ಕಮ್ಬಲಂ ಪಾರುತಾ ಹೋತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ಲೋಹಿತಂ ಖೋ ತೇ, ಭಗಿನೀ’’ತಿ. ಸಾ ನ ಪಟಿವಿಜಾನಿ. ‘‘ಆಮಾಯ್ಯ, ನವರತ್ತೋ ಕಮ್ಬಲೋ’’ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ ‘‘ಭಗವತಾ ಸಿಕ್ಖಾಪದಂ ಪಞ್ಞತ್ತಂ, ಕಚ್ಚಿ ನು ಖೋ ಅಹಂ ಸಙ್ಘಾದಿಸೇಸಂ ಆಪತ್ತಿಂ ಆಪನ್ನೋ’’ತಿ? ಭಗವತೋ ಏತಮತ್ಥಂ ಆರೋಚೇಸಿ. ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಖರಕಮ್ಬಲಂ ಪಾರುತಾ ಹೋತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ಕಕ್ಕಸಲೋಮಂ ಖೋ ತೇ, ಭಗಿನೀ’’ತಿ. ಸಾ ನ ಪಟಿವಿಜಾನಿ. ‘‘ಆಮಾಯ್ಯ, ಖರಕಮ್ಬಲಕೋ’’ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ನವಾವುತಂ ಕಮ್ಬಲಂ ಪಾರುತಾ ಹೋತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ಆಕಿಣ್ಣಲೋಮಂ ಖೋ ತೇ, ಭಗಿನೀ’’ತಿ. ಸಾ ನ ಪಟಿವಿಜಾನಿ. ‘‘ಆಮಾಯ್ಯ, ನವಾವುತೋ ಕಮ್ಬಲೋ’’ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಖರಕಮ್ಬಲಂ ಪಾರುತಾ ಹೋತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ಖರಲೋಮಂ ಖೋ ತೇ, ಭಗಿನೀ’’ತಿ. ಸಾ ನ ಪಟಿವಿಜಾನಿ. ‘‘ಆಮಾಯ್ಯ, ಖರಕಮ್ಬಲಕೋ’’ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಪಾವಾರಂ [ದೀಘಪಾವಾರಂ (ಸ್ಯಾ.)] ಪಾರುತಾ ಹೋತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ದೀಘಲೋಮಂ ಖೋ ತೇ, ಭಗಿನೀ’’ತಿ. ಸಾ ನ ಪಟಿವಿಜಾನಿ. ‘‘ಆಮಾಯ್ಯ, ಪಾವಾರೋ’’ [ದೀಘಪಾವಾರೋ (ಸ್ಯಾ.)] ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

೨೮೯. ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಖೇತ್ತಂ ವಪಾಪೇತ್ವಾ ಆಗಚ್ಛತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ವಾಪಿತಂ ಖೋ ತೇ, ಭಗಿನೀ’’ತಿ? ಸಾ ನ ಪಟಿವಿಜಾನಿ. ‘‘ಆಮಾಯ್ಯ, ನೋ ಚ ಖೋ ಪಟಿವುತ್ತ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪರಿಬ್ಬಾಜಿಕಂ ಪಟಿಪಥೇ ಪಸ್ಸಿತ್ವಾ ಸಾರತ್ತೋ ತಂ ಪರಿಬ್ಬಾಜಿಕಂ ಏತದವೋಚ – ‘‘ಕಚ್ಚಿ, ಭಗಿನಿ, ಮಗ್ಗೋ ಸಂಸೀದತೀ’’ತಿ? ಸಾ ನ ಪಟಿವಿಜಾನಿ. ‘‘ಆಮ ಭಿಕ್ಖು, ಪಟಿಪಜ್ಜಿಸ್ಸಸೀ’’ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಾರತ್ತೋ ಅಞ್ಞತರಂ ಇತ್ಥಿಂ ಏತದವೋಚ – ‘‘ಸದ್ಧಾಸಿ ತ್ವಂ, ಭಗಿನಿ. ಅಪಿಚ, ಯಂ ಸಾಮಿಕಸ್ಸ ದೇಸಿ ತಂ ನಾಮ್ಹಾಕಂ ದೇಸೀ’’ತಿ. ‘‘ಕಿಂ, ಭನ್ತೇ’’ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಾರತ್ತೋ ಅಞ್ಞತರಂ ಇತ್ಥಿಂ ಏತದವೋಚ – ‘‘ಸದ್ಧಾಸಿ ತ್ವಂ, ಭಗಿನಿ. ಅಪಿಚ, ಯಂ ಅಗ್ಗದಾನಂ ತಂ ನಾಮ್ಹಾಕಂ ದೇಸೀ’’ತಿ. ‘‘ಕಿಂ, ಭನ್ತೇ, ಅಗ್ಗದಾನ’’ನ್ತಿ? ‘‘ಮೇಥುನಧಮ್ಮ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಕಮ್ಮಂ ಕರೋತಿ. ಅಞ್ಞತರೋ ಭಿಕ್ಖು ಸಾರತ್ತೋ ತಂ ಇತ್ಥಿಂ ಏತದವೋಚ – ‘‘ತಿಟ್ಠ, ಭಗಿನಿ, ಅಹಂ ಕರಿಸ್ಸಾಮೀತಿ…ಪೇ… ನಿಸೀದ, ಭಗಿನಿ, ಅಹಂ ಕರಿಸ್ಸಾಮೀತಿ…ಪೇ… ನಿಪಜ್ಜ, ಭಗಿನಿ, ಅಹಂ ಕರಿಸ್ಸಾಮೀ’’ತಿ. ಸಾ ನ ಪಟಿವಿಜಾನಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ದುಟ್ಠುಲ್ಲವಾಚಾಸಿಕ್ಖಾಪದಂ ನಿಟ್ಠಿತಂ ತತಿಯಂ.