೨. ಕಾಯಸಂಸಗ್ಗಸಿಕ್ಖಾಪದಂ

೨೬೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಉದಾಯೀ ಅರಞ್ಞೇ ವಿಹರತಿ. ತಸ್ಸಾಯಸ್ಮತೋ ವಿಹಾರೋ ಅಭಿರೂಪೋ ಹೋತಿ ದಸ್ಸನೀಯೋ ಪಾಸಾದಿಕೋ, ಮಜ್ಝೇಗಬ್ಭೋ, ಸಮನ್ತಾಪರಿಯಾಗಾರೋ, ಸುಪಞ್ಞತ್ತಂ ಮಞ್ಚಪೀಠಂ ಭಿಸಿಬಿಮ್ಬೋಹನಂ, ಪಾನೀಯಂ ಪರಿಭೋಜನೀಯಂ ಸುಪಟ್ಠಿತಂ, ಪರಿವೇಣಂ ಸುಸಮ್ಮಟ್ಠಂ. ಬಹೂ ಮನುಸ್ಸಾ ಆಯಸ್ಮತೋ ಉದಾಯಿಸ್ಸ ವಿಹಾರಪೇಕ್ಖಕಾ ಆಗಚ್ಛನ್ತಿ. ಅಞ್ಞತರೋಪಿ ಬ್ರಾಹ್ಮಣೋ ಸಪಜಾಪತಿಕೋ ಯೇನಾಯಸ್ಮಾ ಉದಾಯೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಉದಾಯಿಂ ಏತದವೋಚ – ‘‘ಇಚ್ಛಾಮ ಮಯಂ ಭೋತೋ ಉದಾಯಿಸ್ಸ ವಿಹಾರಂ ಪೇಕ್ಖಿತು’’ನ್ತಿ. ‘‘ತೇನ ಹಿ, ಬ್ರಾಹ್ಮಣ, ಪೇಕ್ಖಸ್ಸೂ’’ತಿ, ಅವಾಪುರಣಂ [ಅಪಾಪುರಣಂ (ಸ್ಯಾ.)] ಆದಾಯ ಘಟಿಕಂ ಉಗ್ಘಾಟೇತ್ವಾ ಕವಾಟಂ ಪಣಾಮೇತ್ವಾ ವಿಹಾರಂ ಪಾವಿಸಿ. ಸೋಪಿ ಖೋ ಬ್ರಾಹ್ಮಣೋ ಆಯಸ್ಮತೋ ಉದಾಯಿಸ್ಸ ಪಿಟ್ಠಿತೋ ಪಾವಿಸಿ. ಸಾಪಿ ಖೋ ಬ್ರಾಹ್ಮಣೀ ತಸ್ಸ ಬ್ರಾಹ್ಮಣಸ್ಸ ಪಿಟ್ಠಿತೋ ಪಾವಿಸಿ. ಅಥ ಖೋ ಆಯಸ್ಮಾ ಉದಾಯೀ ಏಕಚ್ಚೇ ವಾತಪಾನೇ ವಿವರನ್ತೋ ಏಕಚ್ಚೇ ವಾತಪಾನೇ ಥಕೇನ್ತೋ ಗಬ್ಭಂ ಅನುಪರಿಗನ್ತ್ವಾ ಪಿಟ್ಠಿತೋ ಆಗನ್ತ್ವಾ ತಸ್ಸಾ ಬ್ರಾಹ್ಮಣಿಯಾ ಅಙ್ಗಮಙ್ಗಾನಿ ಪರಾಮಸಿ. ಅಥ ಖೋ ಸೋ ಬ್ರಾಹ್ಮಣೋ ಆಯಸ್ಮತಾ ಉದಾಯಿನಾ ಸದ್ಧಿಂ ಪಟಿಸಮ್ಮೋದಿತ್ವಾ ಅಗಮಾಸಿ. ಅಥ ಖೋ ಸೋ ಬ್ರಾಹ್ಮಣೋ ಅತ್ತಮನೋ ಅತ್ತಮನವಾಚಂ ನಿಚ್ಛಾರೇಸಿ – ‘‘ಉಳಾರಾ ಇಮೇ ಸಮಣಾ ಸಕ್ಯಪುತ್ತಿಯಾ ಯೇ ಇಮೇ ಏವರೂಪೇ ಅರಞ್ಞೇ ವಿಹರನ್ತಿ. ಭವಮ್ಪಿ ಉದಾಯೀ ಉಳಾರೋ ಯೋ ಏವರೂಪೇ ಅರಞ್ಞೇ ವಿಹರತೀ’’ತಿ.

ಏವಂ ವುತ್ತೇ ಸಾ ಬ್ರಾಹ್ಮಣೀ ತಂ ಬ್ರಾಹ್ಮಣಂ ಏತದವೋಚ – ‘‘ಕುತೋ ತಸ್ಸ ಉಳಾರತ್ತತಾ! ಯಥೇವ ಮೇ ತ್ವಂ ಅಙ್ಗಮಙ್ಗಾನಿ ಪರಾಮಸಿ ಏವಮೇವ ಮೇ ಸಮಣೋ ಉದಾಯೀ ಅಙ್ಗಮಙ್ಗಾನಿ ಪರಾಮಸೀ’’ತಿ. ಅಥ ಖೋ ಸೋ ಬ್ರಾಹ್ಮಣೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಲಜ್ಜಿನೋ ಇಮೇ ಸಮಣಾ ಸಕ್ಯಪುತ್ತಿಯಾ ದುಸ್ಸೀಲಾ ಮುಸಾವಾದಿನೋ. ಇಮೇ ಹಿ ನಾಮ ಧಮ್ಮಚಾರಿನೋ ಸಮಚಾರಿನೋ ಬ್ರಹ್ಮಚಾರಿನೋ ಸಚ್ಚವಾದಿನೋ ಸೀಲವನ್ತೋ ಕಲ್ಯಾಣಧಮ್ಮಾ ಪಟಿಜಾನಿಸ್ಸನ್ತಿ! ನತ್ಥಿ ಇಮೇಸಂ ಸಾಮಞ್ಞಂ ನತ್ಥಿ ಇಮೇಸಂ ಬ್ರಹ್ಮಞ್ಞಂ, ನಟ್ಠಂ ಇಮೇಸಂ ಸಾಮಞ್ಞಂ ನಟ್ಠಂ ಇಮೇಸಂ ಬ್ರಹ್ಮಞ್ಞಂ, ಕುತೋ ಇಮೇಸಂ ಸಾಮಞ್ಞಂ ಕುತೋ ಇಮೇಸಂ ಬ್ರಹ್ಮಞ್ಞಂ, ಅಪಗತಾ ಇಮೇ ಸಾಮಞ್ಞಾ ಅಪಗತಾ ಇಮೇ ಬ್ರಹ್ಮಞ್ಞಾ. ಕಥಞ್ಹಿ ನಾಮ ಸಮಣೋ ಉದಾಯೀ ಮಮ ಭರಿಯಾಯ ಅಙ್ಗಮಙ್ಗಾನಿ ಪರಾಮಸಿಸ್ಸತಿ! ನ ಹಿ ಸಕ್ಕಾ ಕುಲಿತ್ಥೀಹಿ ಕುಲಧೀತಾಹಿ ಕುಲಕುಮಾರೀಹಿ ಕುಲಸುಣ್ಹಾಹಿ ಕುಲದಾಸೀಹಿ ಆರಾಮಂ ವಾ ವಿಹಾರಂ ವಾ ಗನ್ತುಂ. ಸಚೇ [ಸಚೇ ಹಿ (ಸ್ಯಾ.)] ಕುಲಿತ್ಥಿಯೋ ಕುಲಧೀತರೋ [ಕುಲಧೀತಾಯೋ (ಸೀ. ಸ್ಯಾ.)] ಕುಲಕುಮಾರಿಯೋ ಕುಲಸುಣ್ಹಾಯೋ ಕುಲದಾಸಿಯೋ ಆರಾಮಂ ವಾ ವಿಹಾರಂ ವಾ ಗಚ್ಛೇಯ್ಯುಂ, ತಾಪಿ ಸಮಣಾ ಸಕ್ಯಪುತ್ತಿಯಾ ದೂಸೇಯ್ಯು’’ನ್ತಿ!

ಅಸ್ಸೋಸುಂ ಖೋ ಭಿಕ್ಖು ತಸ್ಸ ಬ್ರಾಹ್ಮಣಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉದಾಯೀ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉದಾಯಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಉದಾಯಿಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಉದಾಯಿ, ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜಿಸ್ಸಸಿ! ನನು ಮಯಾ, ಮೋಘಪುರಿಸ, ಅನೇಕಪರಿಯಾಯೇನ ವಿರಾಗಾಯ ಧಮ್ಮೋ ದೇಸಿತೋ ನೋ ಸರಾಗಾಯ…ಪೇ… ಕಾಮಪರಿಳಾಹಾನಂ ವೂಪಸಮೋ ಅಕ್ಖಾತೋ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೨೭೦. ‘‘ಯೋ ಪನ ಭಿಕ್ಖು ಓತಿಣ್ಣೋ ವಿಪರಿಣತೇನ ಚಿತ್ತೇನ ಮಾತುಗಾಮೇನ ಸದ್ಧಿಂ ಕಾಯಸಂಸಗ್ಗಂ ಸಮಾಪಜ್ಜೇಯ್ಯ ಹತ್ಥಗ್ಗಾಹಂ ವಾ ವೇಣಿಗ್ಗಾಹಂ ವಾ ಅಞ್ಞತರಸ್ಸ ವಾ ಅಞ್ಞತರಸ್ಸ ವಾ ಅಙ್ಗಸ್ಸ ಪರಾಮಸನಂ, ಸಙ್ಘಾದಿಸೇಸೋ’’ತಿ.

೨೭೧. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಓತಿಣ್ಣೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ.

ವಿಪರಿಣತನ್ತಿ ರತ್ತಮ್ಪಿ ಚಿತ್ತಂ ವಿಪರಿಣತಂ. ದುಟ್ಠಮ್ಪಿ ಚಿತ್ತಂ ವಿಪರಿಣತಂ. ಮೂಳ್ಹಮ್ಪಿ ಚಿತ್ತಂ ವಿಪರಿಣತಂ. ಅಪಿಚ, ರತ್ತಂ ಚಿತ್ತಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಂ ವಿಪರಿಣತನ್ತಿ.

ಮಾತುಗಾಮೋ ನಾಮ ಮನುಸ್ಸಿತ್ಥೀ, ನ ಯಕ್ಖೀ ನ ಪೇತೀ, ನ ತಿರಚ್ಛಾನಗತಾ. ಅನ್ತಮಸೋ ತದಹುಜಾತಾಪಿ ದಾರಿಕಾ, ಪಗೇವ ಮಹತ್ತರೀ.

ಸದ್ಧಿನ್ತಿ ಏಕತೋ.

ಕಾಯಸಂಸಗ್ಗಂ ಸಮಾಪಜ್ಜೇಯ್ಯಾತಿ ಅಜ್ಝಾಚಾರೋ ವುಚ್ಚತಿ.

ಹತ್ಥೋ ನಾಮ ಕಪ್ಪರಂ ಉಪಾದಾಯಂ ಯಾವ ಅಗ್ಗನಖಾ.

ವೇಣೀ ನಾಮ ಸುದ್ಧಕೇಸಾ ವಾ, ಸುತ್ತಮಿಸ್ಸಾ ವಾ, ಮಾಲಾಮಿಸ್ಸಾ ವಾ, ಹಿರಞ್ಞಮಿಸ್ಸಾ ವಾ, ಸುವಣ್ಣಮಿಸ್ಸಾ ವಾ, ಮುತ್ತಾಮಿಸ್ಸಾ ವಾ, ಮಣಿಮಿಸ್ಸಾ ವಾ.

ಅಙ್ಗಂ ನಾಮ ಹತ್ಥಞ್ಚ ವೇಣಿಞ್ಚ ಠಪೇತ್ವಾ ಅವಸೇಸಂ ಅಙ್ಗಂ ನಾಮ.

೨೭೨. ಆಮಸನಾ, ಪರಾಮಸನಾ, ಓಮಸನಾ, ಉಮ್ಮಸನಾ, ಓಲಙ್ಘನಾ, ಉಲ್ಲಙ್ಘನಾ, ಆಕಡ್ಢನಾ, ಪತಿಕಡ್ಢನಾ, ಅಭಿನಿಗ್ಗಣ್ಹನಾ, ಅಭಿನಿಪ್ಪೀಳನಾ, ಗಹಣಂ, ಛುಪನಂ.

ಆಮಸನಾ ನಾಮ ಆಮಟ್ಠಮತ್ತಾ.

ಪರಾಮಸನಾ ನಾಮ ಇತೋಚಿತೋ ಚ ಸಂಚೋಪನಾ.

ಓಮಸನಾ ನಾಮ ಹೇಟ್ಠಾ ಓರೋಪನಾ.

ಉಮ್ಮಸನಾ ನಾಮ ಉದ್ಧಂ ಉಚ್ಚಾರಣಾ.

ಓಲಙ್ಘನಾ ನಾಮ ಹೇಟ್ಠಾ ಓನಮನಾ.

ಉಲ್ಲಙ್ಘನಾ ನಾಮ ಉದ್ಧಂ ಉಚ್ಚಾರಣಾ.

ಆಕಡ್ಢನಾ ನಾಮ ಆವಿಞ್ಛನಾ [ಆವಿಞ್ಜನಾ (ಸೀ. ಸ್ಯಾ.)].

ಪತಿಕಡ್ಢನಾ ನಾಮ ಪತಿಪ್ಪಣಾಮನಾ.

ಅಭಿನಿಗ್ಗಣ್ಹನಾ ನಾಮ ಅಙ್ಗಂ ಗಹೇತ್ವಾ ನಿಪ್ಪೀಳನಾ.

ಅಭಿನಿಪ್ಪೀಳನಾ ನಾಮ ಕೇನಚಿ ಸಹ ನಿಪ್ಪೀಳನಾ.

ಗಹಣಂ ನಾಮ ಗಹಿತಮತ್ತಂ.

ಛುಪನಂ ನಾಮ ಫುಟ್ಠಮತ್ತಂ.

ಸಙ್ಘಾದಿಸೇಸೋತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೨೭೩. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ ಭಿಕ್ಖು ಚ. ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ ಓಮಸತಿ ಉಮ್ಮಸತಿ ಓಲಙ್ಘೇತಿ ಉಲ್ಲಙ್ಘೇತಿ ಆಕಡ್ಢತಿ ಪತಿಕಡ್ಢತಿ ಅಭಿನಿಗ್ಗಣ್ಹಾತಿ ಅಭಿನಿಪ್ಪೀಳೇತಿ ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಇತ್ಥೀ ಚ ಹೋತಿ ವೇಮತಿಕೋ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಇತ್ಥೀ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಇತ್ಥೀ ಚ ಹೋತಿ ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಇತ್ಥೀ ಚ ಹೋತಿ ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಪಣ್ಡಕೋ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಪಣ್ಡಕೋ ಚ ಹೋತಿ ವೇಮತಿಕೋ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ಪಣ್ಡಕೋ ಚ ಹೋತಿ ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ಪಣ್ಡಕೋ ಚ ಹೋತಿ ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ಪಣ್ಡಕೋ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪಣ್ಡಕಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ಪುರಿಸೋ ಚ ಹೋತಿ ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪುರಿಸಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ಪುರಿಸೋ ಚ ಹೋತಿ ವೇಮತಿಕೋ…ಪೇ… ಪುರಿಸೋ ಚ ಹೋತಿ ತಿರಚ್ಛಾನಗತಸಞ್ಞೀ… ಪುರಿಸೋ ಚ ಹೋತಿ ಇತ್ಥಿಸಞ್ಞೀ… ಪುರಿಸೋ ಚ ಹೋತಿ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಪುರಿಸಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ತಿರಚ್ಛಾನಗತೋ ಚ ಹೋತಿ ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ತಿರಚ್ಛಾನಗತಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ತಿರಚ್ಛಾನಗತೋ ಚ ಹೋತಿ ವೇಮತಿಕೋ…ಪೇ… ತಿರಚ್ಛಾನಗತೋ ಚ ಹೋತಿ ಇತ್ಥಿಸಞ್ಞೀ… ತಿರಚ್ಛಾನಗತೋ ಚ ಹೋತಿ ಪಣ್ಡಕಸಞ್ಞೀ… ತಿರಚ್ಛಾನಗತೋ ಚ ಹೋತಿ. ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ತಿರಚ್ಛಾನಗತಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ.

ಏಕಮೂಲಕಂ ನಿಟ್ಠಿತಂ.

೨೭೪. ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ.

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ವೇಮತಿಕೋ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ.

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಪಣ್ಡಕಸಞ್ಞೀ…ಪೇ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ.

ದ್ವೇ ಪಣ್ಡಕಾ ದ್ವಿನ್ನಂ ಪಣ್ಡಕಾನಂ ಪಣ್ಡಕಸಞ್ಞೀ ಸಾರತ್ತೋ ಚ ಭಿಕ್ಖು ಚ ನಂ ದ್ವಿನ್ನಂ ಪಣ್ಡಕಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ.

ದ್ವೇ ಪಣ್ಡಕಾ ದ್ವಿನ್ನಂ ಪಣ್ಡಕಾನಂ ವೇಮತಿಕೋ…ಪೇ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಪಣ್ಡಕಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ದ್ವೇ ಪುರಿಸಾ ದ್ವಿನ್ನಂ ಪುರಿಸಾನಂ ಪುರಿಸಸಞ್ಞೀ ಸಾರತ್ತೋ ಚ ಭಿಕ್ಖು ಚ ನಂ ದ್ವಿನ್ನಂ ಪುರಿಸಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ದ್ವೇ ಪುರಿಸಾ ದ್ವಿನ್ನಂ ಪುರಿಸಾನಂ ವೇಮತಿಕೋ…ಪೇ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ… ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಪುರಿಸಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ದ್ವೇ ತಿರಚ್ಛಾನಗತಾ ದ್ವಿನ್ನಂ ತಿರಚ್ಛಾನಗತಾನಂ ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ತಿರಚ್ಛಾನಗತಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ದ್ವೇ ತಿರಚ್ಛಾನಗತಾ ದ್ವಿನ್ನಂ ತಿರಚ್ಛಾನಗತಾನಂ ವೇಮತಿಕೋ…ಪೇ… ಇತ್ಥಿಸಞ್ಞೀ… ಪಣ್ಡಕಸಞ್ಞೀ … ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ತಿರಚ್ಛಾನಗತಾನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

೨೭೫. ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ.

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ವೇಮತಿಕೋ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ.

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಇತ್ಥೀ ಚ ಪುರಿಸೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ.

ಇತ್ಥೀ ಚ ಪುರಿಸೋ ಚ ಉಭಿನ್ನಂ ವೇಮತಿಕೋ…ಪೇ… ಪಣ್ಡಕಸಞ್ಞೀ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಇತ್ಥೀ ಚ ತಿರಚ್ಛಾನಗತೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ.

ಇತ್ಥೀ ಚ ತಿರಚ್ಛಾನಗತೋ ಚ ಉಭಿನ್ನಂ ವೇಮತಿಕೋ…ಪೇ… ಪಣ್ಡಕಸಞ್ಞೀ… ಪುರಿಸಸಞ್ಞೀ … ತಿರಚ್ಛಾನಗತಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಪಣ್ಡಕೋ ಚ ಪುರಿಸೋ ಚ ಉಭಿನ್ನಂ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಪಣ್ಡಕೋ ಚ ಪುರಿಸೋ ಚ ಉಭಿನ್ನಂ ವೇಮತಿಕೋ…ಪೇ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ಪಣ್ಡಕೋ ಚ ತಿರಚ್ಛಾನಗತೋ ಚ ಉಭಿನ್ನಂ ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ.

ಪಣ್ಡಕೋ ಚ ತಿರಚ್ಛಾನಗತೋ ಚ ಉಭಿನ್ನಂ ವೇಮತಿಕೋ…ಪೇ… ಪುರಿಸಸಞ್ಞೀ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ಪುರಿಸೋ ಚ ತಿರಚ್ಛಾನಗತೋ ಚ ಉಭಿನ್ನಂ ಪುರಿಸಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ಪುರಿಸೋ ಚ ತಿರಚ್ಛಾನಗತೋ ಚ ಉಭಿನ್ನಂ ವೇಮತಿಕೋ…ಪೇ… ತಿರಚ್ಛಾನಗತಸಞ್ಞೀ… ಇತ್ಥಿಸಞ್ಞೀ… ಪಣ್ಡಕಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ.

ದುಮೂಲಕಂ ನಿಟ್ಠಿತಂ.

೨೭೬. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ …ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ನಿಸ್ಸಗ್ಗಿಯೇನ ಕಾಯಂ ಆಮಸತಿ ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ನಿಸ್ಸಗ್ಗಿಯೇನ ಕಾಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ನಿಸ್ಸಗ್ಗಿಯೇನ ಕಾಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಇತ್ಥಿಯಾ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ದ್ವಿನ್ನಂ ಇತ್ಥೀನಂ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಭಿಕ್ಖು ಚ ನಂ ಉಭಿನ್ನಂ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಭಿಕ್ಖುಪೇಯ್ಯಾಲೋ ನಿಟ್ಠಿತೋ.

೨೭೭. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಂ ಆಮಸತಿ ಪರಾಮಸತಿ ಓಮಸತಿ ಉಮ್ಮಸತಿ ಓಲಙ್ಘೇತಿ ಉಲ್ಲಙ್ಘೇತಿ ಆಕಡ್ಢತಿ ಪತಿಕಡ್ಢತಿ ಅಭಿನಿಗ್ಗಣ್ಹಾತಿ ಅಭಿನಿಪ್ಪೀಳೇತಿ ಗಣ್ಹಾತಿ ಛುಪತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಸಙ್ಘಾದಿಸೇಸಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಂ ಆಮಸನ್ತಿ ಪರಾಮಸನ್ತಿ ಓಮಸನ್ತಿ ಉಮ್ಮಸನ್ತಿ ಓಲಙ್ಘೇನ್ತಿ ಉಲ್ಲಙ್ಘೇನ್ತಿ ಆಕಡ್ಢನ್ತಿ ಪತಿಕಡ್ಢನ್ತಿ ಅಭಿನಿಗ್ಗಣ್ಹನ್ತಿ ಅಭಿನಿಪ್ಪೀಳೇನ್ತಿ ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ಸಙ್ಘಾದಿಸೇಸಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಸಙ್ಘಾದಿಸೇಸೇನ ದುಕ್ಕಟಸ್ಸ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ಕಾಯೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ಥುಲ್ಲಚ್ಚಯಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಥುಲ್ಲಚ್ಚಯೇನ ದುಕ್ಕಟಸ್ಸ…ಪೇ….

೨೭೮. ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ ಪರಾಮಸತಿ…ಪೇ… ಗಣ್ಹಾತಿ ಛುಪತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸನ್ತಿ ಪರಾಮಸನ್ತಿ…ಪೇ… ಗಣ್ಹನ್ತಿ ಛುಪನ್ತಿ, ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಂ ಆಮಸತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಂ ಆಮಸನ್ತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಂ ಆಮಸನ್ತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸನ್ತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸನ್ತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಹೋತಿ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥೀ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ…ಪೇ….

ದ್ವೇ ಇತ್ಥಿಯೋ ದ್ವಿನ್ನಂ ಇತ್ಥೀನಂ ಇತ್ಥಿಸಞ್ಞೀ ಸಾರತ್ತೋ ಚ. ಇತ್ಥಿಯೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸನ್ತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

ಇತ್ಥೀ ಚ ಪಣ್ಡಕೋ ಚ ಉಭಿನ್ನಂ ಇತ್ಥಿಸಞ್ಞೀ ಸಾರತ್ತೋ ಚ. ಉಭೋ ಚ ನಂ ಭಿಕ್ಖುಸ್ಸ ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸನ್ತಿ. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದ್ವಿನ್ನಂ ದುಕ್ಕಟಾನಂ…ಪೇ….

೨೭೯. ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ಸಙ್ಘಾದಿಸೇಸಸ್ಸ.

ಸೇವನಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಆಪತ್ತಿ ದುಕ್ಕಟಸ್ಸ.

ಸೇವನಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ.

ಸೇವನಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ.

ಮೋಕ್ಖಾಧಿಪ್ಪಾಯೋ ಕಾಯೇನ ವಾಯಮತಿ, ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ.

ಮೋಕ್ಖಾಧಿಪ್ಪಾಯೋ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ.

ಮೋಕ್ಖಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ.

ಮೋಕ್ಖಾಧಿಪ್ಪಾಯೋ ನ ಚ ಕಾಯೇನ ವಾಯಮತಿ, ನ ಚ ಫಸ್ಸಂ ಪಟಿವಿಜಾನಾತಿ, ಅನಾಪತ್ತಿ.

೨೮೦. ಅನಾಪತ್ತಿ ಅಸಞ್ಚಿಚ್ಚ, ಅಸತಿಯಾ, ಅಜಾನನ್ತಸ್ಸ, ಅಸಾದಿಯನ್ತಸ್ಸ, ಉಮ್ಮತ್ತಕಸ್ಸ, ಖಿತ್ತಚಿತ್ತಸ್ಸ, ವೇದನಾಟ್ಟಸ್ಸ, ಆದಿಕಮ್ಮಿಕಸ್ಸಾತಿ.

ವಿನೀತವತ್ಥುಉದ್ದಾನಗಾಥಾ

ಮಾತಾ ಧೀತಾ ಭಗಿನೀ ಚ, ಜಾಯಾ ಯಕ್ಖೀ ಚ ಪಣ್ಡಕೋ;

ಸುತ್ತಾ ಮತಾ ತಿರಚ್ಛಾನಾ, ದಾರುಧಿತಲಿಕಾಯ ಚ.

ಸಮ್ಪೀಳೇ ಸಙ್ಕಮೋ ಮಗ್ಗೋ, ರುಕ್ಖೋ ನಾವಾ ಚ ರಜ್ಜು ಚ;

ದಣ್ಡೋ ಪತ್ತಂ ಪಣಾಮೇಸಿ, ವನ್ದೇ ವಾಯಮಿ ನಚ್ಛುಪೇತಿ.

ವಿನೀತವತ್ಥು

೨೮೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಮಾತುಯಾ ಮಾತುಪೇಮೇನ ಆಮಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ – ‘‘ಭಗವತಾ ಸಿಕ್ಖಾಪದಂ ಪಞ್ಞತ್ತಂ, ಕಚ್ಚಿ ನು ಖೋ ಅಹಂ ಸಙ್ಘಾದಿಸೇಸಂ ಆಪತ್ತಿಂ ಆಪನ್ನೋ’’ತಿ? ಭಗವತೋ ಏತಮತ್ಥಂ ಆರೋಚೇಸಿ. ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಧೀತುಯಾ ಧೀತುಪೇಮೇನ ಆಮಸಿ…ಪೇ… ಭಗಿನಿಯಾ ಭಗಿನಿಪೇಮೇನ ಆಮಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪುರಾಣದುತಿಯಿಕಾಯ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಯಕ್ಖಿನಿಯಾ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪಣ್ಡಕಸ್ಸ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸುತ್ತಿತ್ಥಿಯಾ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಮತಿತ್ಥಿಯಾ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ತಿರಚ್ಛಾನಗತಿತ್ಥಿಯಾ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದಾರುಧೀತಲಿಕಾಯ ಕಾಯಸಂಸಗ್ಗಂ ಸಮಾಪಜ್ಜಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

೨೮೨. ತೇನ ಖೋ ಪನ ಸಮಯೇನ ಸಮ್ಬಹುಲಾ ಇತ್ಥಿಯೋ ಅಞ್ಞತರಂ ಭಿಕ್ಖುಂ ಸಮ್ಪೀಳೇತ್ವಾ ಬಾಹಾಪರಮ್ಪರಾಯ ಆನೇಸುಂ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಸಾದಿಯಿ ತ್ವಂ, ಭಿಕ್ಖೂ’’ತಿ? ‘‘ನಾಹಂ, ಭಗವಾ, ಸಾದಿಯಿ’’ನ್ತಿ. ‘‘ಅನಾಪತ್ತಿ, ಭಿಕ್ಖೂ, ಅಸಾದಿಯನ್ತಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಅಭಿರೂಳ್ಹಂ ಸಙ್ಕಮಂ ಸಾರತ್ತೋ ಸಞ್ಚಾಲೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಂ ಪಟಿಪಥೇ ಪಸ್ಸಿತ್ವಾ ಸಾರತ್ತೋ ಅಂಸಕೂಟೇನ ಪಹಾರಂ ಅದಾಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಅಭಿರೂಳ್ಹಂ ರುಕ್ಖಂ ಸಾರತ್ತೋ ಸಞ್ಚಾಲೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಅಭಿರೂಳ್ಹಂ ನಾವಂ ಸಾರತ್ತೋ ಸಞ್ಚಾಲೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಗಹಿತಂ ರಜ್ಜುಂ ಸಾರತ್ತೋ ಆವಿಞ್ಛಿ [ಆವಿಞ್ಜಿ (ಸೀ. ಸ್ಯಾ.)]. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ಗಹಿತಂ ದಣ್ಡಂ ಸಾರತ್ತೋ ಆವಿಞ್ಛಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಾರತ್ತೋ ಇತ್ಥಿಂ ಪತ್ತೇನ ಪಣಾಮೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಯಾ ವನ್ದನ್ತಿಯಾ ಸಾರತ್ತೋ ಪಾದಂ ಉಚ್ಚಾರೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಸಙ್ಘಾದಿಸೇಸ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಇತ್ಥಿಂ ಗಹೇಸ್ಸಾಮೀತಿ ವಾಯಮಿತ್ವಾ ನ ಛುಪಿ.

ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಙ್ಘಾದಿಸೇಸಸ್ಸ; ಆಪತ್ತಿ ದುಕ್ಕಟಸ್ಸಾ’’ತಿ.

ಕಾಯಸಂಸಗ್ಗಸಿಕ್ಖಾಪದಂ ನಿಟ್ಠಿತಂ ದುತಿಯಂ.