೨. ದುತಿಯಪಾರಾಜಿಕಂ

೮೪. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ. ತೇನ ಖೋ ಪನ ಸಮಯೇನ ಸಮ್ಬಹುಲಾ ಸನ್ದಿಟ್ಠಾ ಸಮ್ಭತ್ತಾ ಭಿಕ್ಖೂ ಇಸಿಗಿಲಿಪಸ್ಸೇ ತಿಣಕುಟಿಯೋ ಕರಿತ್ವಾ ವಸ್ಸಂ ಉಪಗಚ್ಛಿಂಸು. ಆಯಸ್ಮಾಪಿ ಧನಿಯೋ ಕುಮ್ಭಕಾರಪುತ್ತೋ ತಿಣಕುಟಿಕಂ ಕರಿತ್ವಾ ವಸ್ಸಂ ಉಪಗಚ್ಛಿ. ಅಥ ಖೋ ತೇ ಭಿಕ್ಖೂ ವಸ್ಸಂವುಟ್ಠಾ ತೇಮಾಸಚ್ಚಯೇನ ತಿಣಕುಟಿಯೋ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಪಟಿಸಾಮೇತ್ವಾ ಜನಪದಚಾರಿಕಂ ಪಕ್ಕಮಿಂಸು. ಆಯಸ್ಮಾ ಪನ ಧನಿಯೋ ಕುಮ್ಭಕಾರಪುತ್ತೋ ತತ್ಥೇವ ವಸ್ಸಂ ವಸಿ, ತತ್ಥ ಹೇಮನ್ತಂ, ತತ್ಥ ಗಿಮ್ಹಂ. ಅಥ ಖೋ ಆಯಸ್ಮತೋ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ಗಾಮಂ ಪಿಣ್ಡಾಯ ಪವಿಟ್ಠಸ್ಸ ತಿಣಹಾರಿಯೋ ಕಟ್ಠಹಾರಿಯೋ ತಿಣಕುಟಿಕಂ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಆದಾಯ ಅಗಮಂಸು. ದುತಿಯಮ್ಪಿ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ತಿಣಞ್ಚ ಕಟ್ಠಞ್ಚ ಸಂಕಡ್ಢಿತ್ವಾ ತಿಣಕುಟಿಕಂ ಅಕಾಸಿ. ದುತಿಯಮ್ಪಿ ಖೋ ಆಯಸ್ಮತೋ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ಗಾಮಂ ಪಿಣ್ಡಾಯ ಪವಿಟ್ಠಸ್ಸ ತಿಣಹಾರಿಯೋ ಕಟ್ಠಹಾರಿಯೋ ತಿಣಕುಟಿಕಂ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಆದಾಯ ಅಗಮಂಸು. ತತಿಯಮ್ಪಿ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ತಿಣಞ್ಚ ಕಟ್ಠಞ್ಚ ಸಂಕಡ್ಢಿತ್ವಾ ತಿಣಕುಟಿಕಂ ಅಕಾಸಿ. ತತಿಯಮ್ಪಿ ಖೋ ಆಯಸ್ಮತೋ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ಗಾಮಂ ಪಿಣ್ಡಾಯ ಪವಿಟ್ಠಸ್ಸ ತಿಣಹಾರಿಯೋ ಕಟ್ಠಹಾರಿಯೋ ತಿಣಕುಟಿಕಂ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಆದಾಯ ಅಗಮಂಸು.

ಅಥ ಖೋ ಆಯಸ್ಮತೋ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ಏತದಹೋಸಿ – ‘‘ಯಾವತತಿಯಕಂ ಖೋ ಮೇ ಗಾಮಂ ಪಿಣ್ಡಾಯ ಪವಿಟ್ಠಸ್ಸ ತಿಣಹಾರಿಯೋ ಕಟ್ಠಹಾರಿಯೋ ತಿಣಕುಟಿಕಂ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಆದಾಯ ಅಗಮಂಸು. ಅಹಂ ಖೋ ಪನ ಸುಸಿಕ್ಖಿತೋ ಅನವಯೋ ಸಕೇ ಆಚರಿಯಕೇ ಕುಮ್ಭಕಾರಕಮ್ಮೇ ಪರಿಯೋದಾತಸಿಪ್ಪೋ. ಯಂನೂನಾಹಂ ಸಾಮಂ ಚಿಕ್ಖಲ್ಲಂ ಮದ್ದಿತ್ವಾ ಸಬ್ಬಮತ್ತಿಕಾಮಯಂ ಕುಟಿಕಂ ಕರೇಯ್ಯ’’ನ್ತಿ! ಅಥ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ಸಾಮಂ ಚಿಕ್ಖಲ್ಲಂ ಮದ್ದಿತ್ವಾ ಸಬ್ಬಮತ್ತಿಕಾಮಯಂ ಕುಟಿಕಂ ಕರಿತ್ವಾ ತಿಣಞ್ಚ ಕಟ್ಠಞ್ಚ ಗೋಮಯಞ್ಚ ಸಂಕಡ್ಢಿತ್ವಾ ತಂ ಕುಟಿಕಂ ಪಚಿ. ಸಾ ಅಹೋಸಿ ಕುಟಿಕಾ ಅಭಿರೂಪಾ ದಸ್ಸನೀಯಾ ಪಾಸಾದಿಕಾ ಲೋಹಿತಿಕಾ [ಲೋಹಿತಕಾ (ಸ್ಯಾ.)], ಸೇಯ್ಯಥಾಪಿ ಇನ್ದಗೋಪಕೋ. ಸೇಯ್ಯಥಾಪಿ ನಾಮ ಕಿಙ್ಕಣಿಕಸದ್ದೋ [ಕಿಙ್ಕಿಣಿಕಸದ್ದೋ (ಸೀ. ಸ್ಯಾ.)] ಏವಮೇವಂ ತಸ್ಸಾ ಕುಟಿಕಾಯ ಸದ್ದೋ ಅಹೋಸಿ.

೮೫. ಅಥ ಖೋ ಭಗವಾ ಸಮ್ಬಹುಲೇಹಿ ಭಿಕ್ಖೂಹಿ ಸದ್ಧಿಂ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅದ್ದಸ ತಂ ಕುಟಿಕಂ ಅಭಿರೂಪಂ ದಸ್ಸನೀಯಂ ಪಾಸಾದಿಕಂ ಲೋಹಿತಿಕಂ. ದಿಸ್ವಾನ ಭಿಕ್ಖೂ ಆಮನ್ತೇಸಿ – ‘‘ಕಿಂ ಏತಂ, ಭಿಕ್ಖವೇ, ಅಭಿರೂಪಂ ದಸ್ಸನೀಯಂ ಪಾಸಾದಿಕಂ ಲೋಹಿತಿಕಂ, ಸೇಯ್ಯಥಾಪಿ ಇನ್ದಗೋಪಕೋ’’ತಿ? ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಭಿಕ್ಖವೇ, ತಸ್ಸ ಮೋಘಪುರಿಸಸ್ಸ ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ಸೋ, ಭಿಕ್ಖವೇ, ಮೋಘಪುರಿಸೋ ಸಬ್ಬಮತ್ತಿಕಾಮಯಂ ಕುಟಿಕಂ ಕರಿಸ್ಸತಿ! ನ ಹಿ ನಾಮ, ಭಿಕ್ಖವೇ, ತಸ್ಸ ಮೋಘಪುರಿಸಸ್ಸ ಪಾಣೇಸು ಅನುದ್ದಯಾ ಅನುಕಮ್ಪಾ ಅವಿಹೇಸಾ ಭವಿಸ್ಸತಿ! ಗಚ್ಛಥೇತಂ, ಭಿಕ್ಖವೇ, ಕುಟಿಕಂ ಭಿನ್ದಥ. ಮಾ ಪಚ್ಛಿಮಾ ಜನತಾ ಪಾಣೇಸು ಪಾತಬ್ಯತಂ ಆಪಜ್ಜಿ. ನ ಚ, ಭಿಕ್ಖವೇ, ಸಬ್ಬಮತ್ತಿಕಾಮಯಾ ಕುಟಿಕಾ ಕಾತಬ್ಬಾ. ಯೋ ಕರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ. ‘‘ಏವಂ, ಭನ್ತೇ’’ತಿ, ಖೋ ತೇ ಭಿಕ್ಖೂ ಭಗವತೋ ಪಟಿಸ್ಸುಣಿತ್ವಾ ಯೇನ ಸಾ ಕುಟಿಕಾ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ತಂ ಕುಟಿಕಂ ಭಿನ್ದಿಂಸು. ಅಥ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ತೇ ಭಿಕ್ಖೂ ಏತದವೋಚ – ‘‘ಕಿಸ್ಸ ಮೇ ತುಮ್ಹೇ, ಆವುಸೋ, ಕುಟಿಕಂ ಭಿನ್ದಥಾ’’ತಿ? ‘‘ಭಗವಾ, ಆವುಸೋ, ಭೇದಾಪೇತೀ’’ತಿ. ‘‘ಭಿನ್ದಥಾವುಸೋ, ಸಚೇ ಧಮ್ಮಸ್ಸಾಮೀ ಭೇದಾಪೇತೀ’’ತಿ.

೮೬. ಅಥ ಖೋ ಆಯಸ್ಮತೋ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ಏತದಹೋಸಿ – ‘‘ಯಾವತತಿಯಕಂ ಖೋ ಮೇ ಗಾಮಂ ಪಿಣ್ಡಾಯ ಪವಿಟ್ಠಸ್ಸ ತಿಣಹಾರಿಯೋ ಕಟ್ಠಹಾರಿಯೋ ತಿಣಕುಟಿಕಂ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಆದಾಯ ಅಗಮಂಸು. ಯಾಪಿ ಮಯಾ ಸಬ್ಬಮತ್ತಿಕಾಮಯಾ ಕುಟಿಕಾ ಕತಾ ಸಾಪಿ ಭಗವತಾ ಭೇದಾಪಿತಾ. ಅತ್ಥಿ ಚ ಮೇ ದಾರುಗಹೇ ಗಣಕೋ ಸನ್ದಿಟ್ಠೋ. ಯಂನೂನಾಹಂ ದಾರುಗಹೇ ಗಣಕಂ ದಾರೂನಿ ಯಾಚಿತ್ವಾ ದಾರುಕುಟಿಕಂ ಕರೇಯ್ಯ’’ನ್ತಿ. ಅಥ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ಯೇನ ದಾರುಗಹೇ ಗಣಕೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ದಾರುಗಹೇ ಗಣಕಂ ಏತದವೋಚ – ‘‘ಯಾವತತಿಯಕಂ ಖೋ ಮೇ, ಆವುಸೋ, ಗಾಮಂ ಪಿಣ್ಡಾಯ ಪವಿಟ್ಠಸ್ಸ ತಿಣಹಾರಿಯೋ ಕಟ್ಠಹಾರಿಯೋ ತಿಣಕುಟಿಕಂ ಭಿನ್ದಿತ್ವಾ ತಿಣಞ್ಚ ಕಟ್ಠಞ್ಚ ಆದಾಯ ಅಗಮಂಸು. ಯಾಪಿ ಮಯಾ ಸಬ್ಬಮತ್ತಿಕಾಮಯಾ ಕುಟಿಕಾ ಕತಾ ಸಾಪಿ ಭಗವತಾ ಭೇದಾಪಿತಾ. ದೇಹಿ ಮೇ, ಆವುಸೋ, ದಾರೂನಿ. ಇಚ್ಛಾಮಿ ದಾರುಕುಟಿಕಂ [ದಾರುಕುಡ್ಡಿಕಂ ಕುಟಿಕಂ (ಸೀ.)] ಕಾತು’’ನ್ತಿ. ‘‘ನತ್ಥಿ, ಭನ್ತೇ, ತಾದಿಸಾನಿ ದಾರೂನಿ ಯಾನಾಹಂ ಅಯ್ಯಸ್ಸ ದದೇಯ್ಯಂ. ಅತ್ಥಿ, ಭನ್ತೇ, ದೇವಗಹದಾರೂನಿ ನಗರಪಟಿಸಙ್ಖಾರಿಕಾನಿ ಆಪದತ್ಥಾಯ ನಿಕ್ಖಿತ್ತಾನಿ. ಸಚೇ ತಾನಿ ದಾರೂನಿ ರಾಜಾ ದಾಪೇತಿ ಹರಾಪೇಥ, ಭನ್ತೇ’’ತಿ. ‘‘ದಿನ್ನಾನಿ, ಆವುಸೋ, ರಞ್ಞಾ’’ತಿ. ಅಥ ಖೋ ದಾರುಗಹೇ ಗಣಕಸ್ಸ ಏತದಹೋಸಿ – ‘‘ಇಮೇ ಖೋ ಸಮಣಾ ಸಕ್ಯಪುತ್ತಿಯಾ ಧಮ್ಮಚಾರಿನೋ ಸಮಚಾರಿನೋ [ಸಮ್ಮಚಾರಿನೋ (ಕ.)] ಬ್ರಹ್ಮಚಾರಿನೋ ಸಚ್ಚವಾದಿನೋ ಸೀಲವನ್ತೋ ಕಲ್ಯಾಣಧಮ್ಮಾ. ರಾಜಾಪಿಮೇಸಂ ಅಭಿಪ್ಪಸನ್ನೋ. ನಾರಹತಿ ಅದಿನ್ನಂ ದಿನ್ನನ್ತಿ ವತ್ತು’’ನ್ತಿ. ಅಥ ಖೋ ದಾರುಗಹೇ ಗಣಕೋ ಆಯಸ್ಮನ್ತಂ ಧನಿಯಂ ಕುಮ್ಭಕಾರಪುತ್ತಂ ಏತದವೋಚ – ‘‘ಹರಾಪೇಥ, ಭನ್ತೇ’’ತಿ. ಅಥ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ತಾನಿ ದಾರೂನಿ ಖಣ್ಡಾಖಣ್ಡಿಕಂ ಛೇದಾಪೇತ್ವಾ ಸಕಟೇಹಿ ನಿಬ್ಬಾಹಾಪೇತ್ವಾ ದಾರುಕುಟಿಕಂ ಅಕಾಸಿ.

೮೭. ಅಥ ಖೋ ವಸ್ಸಕಾರೋ ಬ್ರಾಹ್ಮಣೋ ಮಗಧಮಹಾಮತ್ತೋ ರಾಜಗಹೇ ಕಮ್ಮನ್ತೇ ಅನುಸಞ್ಞಾಯಮಾನೋ ಯೇನ ದಾರುಗಹೇ ಗಣಕೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ದಾರುಗಹೇ ಗಣಕಂ ಏತದವೋಚ – ‘‘ಯಾನಿ ತಾನಿ, ಭಣೇ, ದೇವಗಹದಾರೂನಿ ನಗರಪಟಿಸಙ್ಖಾರಿಕಾನಿ ಆಪದತ್ಥಾಯ ನಿಕ್ಖಿತ್ತಾನಿ ಕಹಂ ತಾನಿ ದಾರೂನೀ’’ತಿ? ‘‘ತಾನಿ, ಸಾಮಿ, ದಾರೂನಿ ದೇವೇನ ಅಯ್ಯಸ್ಸ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ದಿನ್ನಾನೀ’’ತಿ. ಅಥ ಖೋ ವಸ್ಸಕಾರೋ ಬ್ರಾಹ್ಮಣೋ ಮಗಧಮಹಾಮತ್ತೋ ಅನತ್ತಮನೋ ಅಹೋಸಿ – ‘‘ಕಥಞ್ಹಿ ನಾಮ ದೇವೋ ದೇವಗಹದಾರೂನಿ ನಗರಪಟಿಸಙ್ಖಾರಿಕಾನಿ ಆಪದತ್ಥಾಯ ನಿಕ್ಖಿತ್ತಾನಿ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ದಸ್ಸತೀ’’ತಿ! ಅಥ ಖೋ ವಸ್ಸಕಾರೋ ಬ್ರಾಹ್ಮಣೋ ಮಗಧಮಹಾಮತ್ತೋ ಯೇನ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ರಾಜಾನಂ ಮಾಗಧಂ ಸೇನಿಯಂ ಬಿಮ್ಬಿಸಾರಂ ಏತದವೋಚ – ‘‘ಸಚ್ಚಂ ಕಿರ, ದೇವೇನ [ಸಚ್ಚಂ ಕಿರ ದೇವ ದೇವೇನ (ಸೀ.)] ದೇವಗಹದಾರೂನಿ ನಗರಪಟಿಸಙ್ಖಾರಿಕಾನಿ ಆಪದತ್ಥಾಯ ನಿಕ್ಖಿತ್ತಾನಿ ಧನಿಯಸ್ಸ ಕುಮ್ಭಕಾರಪುತ್ತಸ್ಸ ದಿನ್ನಾನೀ’’ತಿ? ‘‘ಕೋ ಏವಮಾಹಾ’’ತಿ? ‘‘ದಾರುಗಹೇ ಗಣಕೋ, ದೇವಾ’’ತಿ. ‘‘ತೇನ ಹಿ, ಬ್ರಾಹ್ಮಣ, ದಾರುಗಹೇ ಗಣಕಂ ಆಣಾಪೇಹೀ’’ತಿ. ಅಥ ಖೋ ವಸ್ಸಕಾರೋ ಬ್ರಾಹ್ಮಣೋ ಮಗಧಮಹಾಮತ್ತೋ ದಾರುಗಹೇ ಗಣಕಂ ಬನ್ಧಂ [ಬದ್ಧಂ (ಸೀ.)] ಆಣಾಪೇಸಿ. ಅದ್ದಸ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ದಾರುಗಹೇ ಗಣಕಂ ಬನ್ಧಂ ನಿಯ್ಯಮಾನಂ. ದಿಸ್ವಾನ ದಾರುಗಹೇ ಗಣಕಂ ಏತದವೋಚ – ‘‘ಕಿಸ್ಸ ತ್ವಂ, ಆವುಸೋ, ಬನ್ಧೋ ನಿಯ್ಯಾಸೀ’’ತಿ? ‘‘ತೇಸಂ, ಭನ್ತೇ, ದಾರೂನಂ ಕಿಚ್ಚಾ’’ತಿ. ‘‘ಗಚ್ಛಾವುಸೋ, ಅಹಮ್ಪಿ ಆಗಚ್ಛಾಮೀ’’ತಿ. ‘‘ಏಯ್ಯಾಸಿ, ಭನ್ತೇ, ಪುರಾಹಂ ಹಞ್ಞಾಮೀ’’ತಿ.

೮೮. ಅಥ ಖೋ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ಯೇನ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ನಿವೇಸನಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಯೇನಾಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಧನಿಯಂ ಕುಮ್ಭಕಾರಪುತ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಆಯಸ್ಮನ್ತಂ ಧನಿಯಂ ಕುಮ್ಭಕಾರಪುತ್ತಂ ಏತದವೋಚ – ‘‘ಸಚ್ಚಂ ಕಿರ ಮಯಾ, ಭನ್ತೇ, ದೇವಗಹದಾರೂನಿ ನಗರಪಟಿಸಙ್ಖಾರಿಕಾನಿ ಆಪದತ್ಥಾಯ ನಿಕ್ಖಿತ್ತಾನಿ ಅಯ್ಯಸ್ಸ ದಿನ್ನಾನೀ’’ತಿ? ‘‘ಏವಂ, ಮಹಾರಾಜಾ’’ತಿ. ‘‘ಮಯಂ ಖೋ, ಭನ್ತೇ, ರಾಜಾನೋ ನಾಮ ಬಹುಕಿಚ್ಚಾ ಬಹುಕರಣೀಯಾ, ದತ್ವಾಪಿ ನ ಸರೇಯ್ಯಾಮ; ಇಙ್ಘ, ಭನ್ತೇ, ಸರಾಪೇಹೀ’’ತಿ. ‘‘ಸರಸಿ ತ್ವಂ, ಮಹಾರಾಜ, ಪಠಮಾಭಿಸಿತ್ತೋ ಏವರೂಪಿಂ ವಾಚಂ ಭಾಸಿತಾ – ‘‘ದಿನ್ನಞ್ಞೇವ ಸಮಣಬ್ರಾಹ್ಮಣಾನಂ ತಿಣಕಟ್ಠೋದಕಂ ಪರಿಭುಞ್ಜನ್ತೂ’’ತಿ. ‘‘ಸರಾಮಹಂ, ಭನ್ತೇ. ಸನ್ತಿ, ಭನ್ತೇ, ಸಮಣಬ್ರಾಹ್ಮಣಾ ಲಜ್ಜಿನೋ ಕುಕ್ಕುಚ್ಚಕಾ ಸಿಕ್ಖಾಕಾಮಾ. ತೇಸಂ ಅಪ್ಪಮತ್ತಕೇಪಿ ಕುಕ್ಕುಚ್ಚಂ ಉಪ್ಪಜ್ಜತಿ. ತೇಸಂ ಮಯಾ ಸನ್ಧಾಯ ಭಾಸಿತಂ, ತಞ್ಚ ಖೋ ಅರಞ್ಞೇ ಅಪರಿಗ್ಗಹಿತಂ. ಸೋ ತ್ವಂ, ಭನ್ತೇ, ತೇನ ಲೇಸೇನ ದಾರೂನಿ ಅದಿನ್ನಂ ಹರಿತುಂ ಮಞ್ಞಸಿ! ಕಥಞ್ಹಿ ನಾಮ ಮಾದಿಸೋ ಸಮಣಂ ವಾ ಬ್ರಾಹ್ಮಣಂ ವಾ ವಿಜಿತೇ ವಸನ್ತಂ ಹನೇಯ್ಯ ವಾ ಬನ್ಧೇಯ್ಯ ವಾ ಪಬ್ಬಾಜೇಯ್ಯ ವಾ! ಗಚ್ಛ, ಭನ್ತೇ, ಲೋಮೇನ ತ್ವಂ ಮುತ್ತೋಸಿ. ಮಾಸ್ಸು ಪುನಪಿ ಏವರೂಪಂ ಅಕಾಸೀ’’ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಅಲಜ್ಜಿನೋ ಇಮೇ ಸಮಣಾ ಸಕ್ಯಪುತ್ತಿಯಾ ದುಸ್ಸೀಲಾ ಮುಸಾವಾದಿನೋ. ಇಮೇ ಹಿ ನಾಮ ಧಮ್ಮಚಾರಿನೋ ಸಮಚಾರಿನೋ ಬ್ರಾಹ್ಮಚಾರಿನೋ ಸಚ್ಚವಾದಿನೋ ಸೀಲವನ್ತೋ ಕಲ್ಯಾಣಧಮ್ಮಾ ಪಟಿಜಾನಿಸ್ಸನ್ತಿ! ನತ್ಥಿ ಇಮೇಸಂ ಸಾಮಞ್ಞಂ, ನತ್ಥಿ ಇಮೇಸಂ ಬ್ರಹ್ಮಞ್ಞಂ. ನಟ್ಠಂ ಇಮೇಸಂ ಸಾಮಞ್ಞಂ, ನಟ್ಠಂ ಇಮೇಸಂ ಬ್ರಹ್ಮಞ್ಞಂ. ಕುತೋ ಇಮೇಸಂ ಸಾಮಞ್ಞಂ, ಕುತೋ ಇಮೇಸಂ ಬ್ರಹ್ಮಞ್ಞಂ! ಅಪಗತಾ ಇಮೇ ಸಾಮಞ್ಞಾ, ಅಪಗತಾ ಇಮೇ ಬ್ರಹ್ಮಞ್ಞಾ. ರಾಜಾನಮ್ಪಿ ಇಮೇ ವಞ್ಚೇನ್ತಿ, ಕಿಂ ಪನಞ್ಞೇ ಮನುಸ್ಸೇ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ ಸನ್ತುಟ್ಠಾ ಲಜ್ಜಿನೋ ಕುಕ್ಕುಚ್ಚಕಾ ಸಿಕ್ಖಾಕಾಮಾ ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಧನಿಯೋ ಕುಮ್ಭಕಾರಪುತ್ತೋ ರಞ್ಞೋ ದಾರೂನಿ ಅದಿನ್ನಂ ಆದಿಯಿಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಧನಿಯಂ ಕುಮ್ಭಕಾರಪುತ್ತಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಧನಿಯಂ ಕುಮ್ಭಕಾರಪುತ್ತಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಧನಿಯ, ರಞ್ಞೋ ದಾರೂನಿ ಅದಿನ್ನಂ ಆದಿಯೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ರಞ್ಞೋ ದಾರೂನಿ ಅದಿನ್ನಂ ಆದಿಯಿಸ್ಸಸಿ! ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ ಪಸನ್ನಾನಂ ವಾ ಭಿಯ್ಯೋಭಾವಾಯ; ಅಥಖ್ವೇತಂ, ಮೋಘಪುರಿಸ, ಅಪ್ಪಸನ್ನಾನಞ್ಚೇವ ಅಪ್ಪಸಾದಾಯ ಪಸನ್ನಾನಞ್ಚ ಏಕಚ್ಚಾನಂ ಅಞ್ಞಥತ್ತಾಯಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಪುರಾಣವೋಹಾರಿಕೋ ಮಹಾಮತ್ತೋ ಭಿಕ್ಖೂಸು ಪಬ್ಬಜಿತೋ ಭಗವತೋ ಅವಿದೂರೇ ನಿಸಿನ್ನೋ ಹೋತಿ. ಅಥ ಖೋ ಭಗವಾ ತಂ ಭಿಕ್ಖುಂ ಏತದವೋಚ – ‘‘ಕಿತ್ತಕೇನ ಖೋ ಭಿಕ್ಖು ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಚೋರಂ ಗಹೇತ್ವಾ ಹನತಿ ವಾ ಬನ್ಧತಿ ವಾ ಪಬ್ಬಾಜೇತಿ ವಾ’’ತಿ? ‘‘ಪಾದೇನ ವಾ, ಭಗವಾ, ಪಾದಾರಹೇನ ವಾ’’ತಿ [ಪಾದಾರಹೇನವಾ ಅತಿರೇಕಪಾದೇನವಾತಿ (ಸ್ಯಾ.)]. ತೇನ ಖೋ ಪನ ಸಮಯೇನ ರಾಜಗಹೇ ಪಞ್ಚಮಾಸಕೋ ಪಾದೋ ಹೋತಿ. ಅಥ ಖೋ ಭಗವಾ ಆಯಸ್ಮನ್ತಂ ಧನಿಯಂ ಕುಮ್ಭಕಾರಪುತ್ತಂ ಅನೇಕಪರಿಯಾಯೇನ ವಿಗರಹಿತ್ವಾ ದುಬ್ಭರತಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೮೯. ‘‘ಯೋ ಪನ ಭಿಕ್ಖು ಅದಿನ್ನಂ ಥೇಯ್ಯಸಙ್ಖಾತಂ ಆದಿಯೇಯ್ಯ, ಯಥಾರೂಪೇ ಅದಿನ್ನಾದಾನೇ ರಾಜಾನೋ ಚೋರಂ ಗಹೇತ್ವಾ ಹನೇಯ್ಯುಂ ವಾ ಬನ್ಧೇಯ್ಯುಂ ವಾ ಪಬ್ಬಾಜೇಯ್ಯುಂ ವಾ – ‘ಚೋರೋಸಿ ಬಾಲೋಸಿ ಮೂಳ್ಹೋಸಿ ಥೇನೋಸೀ’ತಿ, ತಥಾರೂಪಂ ಭಿಕ್ಖು ಅದಿನ್ನಂ ಆದಿಯಮಾನೋ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋ’’ತಿ.

ಏವಞ್ಚಿದಂ ಭಗವತಾ ಭಿಕ್ಖೂನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೯೦. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ರಜಕತ್ಥರಣಂ ಗನ್ತ್ವಾ ರಜಕಭಣ್ಡಿಕಂ ಅವಹರಿತ್ವಾ ಆರಾಮಂ ಹರಿತ್ವಾ ಭಾಜೇಸುಂ. ಭಿಕ್ಖೂ ಏವಮಾಹಂಸು – ‘‘ಮಹಾಪುಞ್ಞತ್ಥ ತುಮ್ಹೇ, ಆವುಸೋ. ಬಹುಂ ತುಮ್ಹಾಕಂ ಚೀವರಂ ಉಪ್ಪನ್ನ’’ನ್ತಿ. ‘‘ಕುತೋ ಆವುಸೋ, ಅಮ್ಹಾಕಂ ಪುಞ್ಞಂ, ಇದಾನಿ ಮಯಂ ರಜಕತ್ಥರಣಂ ಗನ್ತ್ವಾ ರಜಕಭಣ್ಡಿಕಂ ಅವಹರಿಮ್ಹಾ’’ತಿ. ‘‘ನನು, ಆವುಸೋ, ಭಗವತಾ ಸಿಕ್ಖಾಪದಂ ಪಞ್ಞತ್ತಂ. ಕಿಸ್ಸ ತುಮ್ಹೇ, ಆವುಸೋ, ರಜಕಭಣ್ಡಿಕಂ ಅವಹರಿತ್ಥಾ’’ತಿ? ‘‘ಸಚ್ಚಂ, ಆವುಸೋ, ಭಗವತಾ ಸಿಕ್ಖಾಪದಂ ಪಞ್ಞತ್ತಂ. ತಞ್ಚ ಖೋ ಗಾಮೇ, ನೋ ಅರಞ್ಞೇ’’ತಿ. ‘‘ನನು, ಆವುಸೋ, ತಥೇವೇತಂ ಹೋತಿ. ಅನನುಚ್ಛವಿಕಂ, ಆವುಸೋ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತುಮ್ಹೇ, ಆವುಸೋ, ರಜಕಭಣ್ಡಿಕಂ ಅವಹರಿಸ್ಸಥ! ನೇತಂ, ಆವುಸೋ, ಅಪ್ಪಸನ್ನಾನಂ ವಾ ಪಸಾದಾಯ ಪಸನ್ನಾನಂ ವಾ ಭಿಯ್ಯೋಭಾವಾಯ; ಅಥಖ್ವೇತಂ, ಆವುಸೋ, ಅಪ್ಪಸನ್ನಾನಞ್ಚೇವ ಅಪ್ಪಸಾದಾಯ ಪಸನ್ನಾನಞ್ಚ ಏಕಚ್ಚಾನಂ ಅಞ್ಞಥತ್ತಾಯಾ’’ತಿ. ಅಥ ಖೋ ತೇ ಭಿಕ್ಖೂ ಛಬ್ಬಗ್ಗಿಯೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಛಬ್ಬಗ್ಗಿಯೇ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ರಜಕತ್ಥರಣಂ ಗನ್ತ್ವಾ ರಜಕಭಣ್ಡಿಕಂ ಅವಹರಿತ್ಥಾ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸಾ, ಅನನುಲೋಮಿಕಂ ಅಪ್ಪಟಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ರಜಕಭಣ್ಡಿಕಂ ಅವಹರಿಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ ಪಸನ್ನಾನಂ ವಾ ಭಿಯ್ಯೋಭಾವಾಯ; ಅಥ ಖ್ವೇತಂ, ಮೋಘಪುರಿಸಾ, ಅಪ್ಪಸನ್ನಾನಞ್ಚೇವ ಅಪ್ಪಸಾದಾಯ ಪಸನ್ನಾನಞ್ಚ ಏಕಚ್ಚಾನಂ ಅಞ್ಞಥತ್ತಾಯಾ’’ತಿ. ಅಥ ಖೋ ಭಗವಾ ಛಬ್ಬಗ್ಗಿಯೇ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ದುಬ್ಭರತಾಯ…ಪೇ… ವೀರಿಯಾರಮ್ಭಸ್ಸ ವಣ್ಣಂ ಭಾಸಿತ್ವಾ ಭಿಕ್ಖೂನಂ ತದನುಚ್ಛವಿಕಂ ತದನುಲೋಮಿಕಂ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ…ಪೇ… ‘‘ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೯೧. ‘‘ಯೋ ಪನ ಭಿಕ್ಖು ಗಾಮಾ ವಾ ಅರಞ್ಞಾ ವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯೇಯ್ಯ, ಯಥಾರೂಪೇ ಅದಿನ್ನಾದಾನೇ ರಾಜಾನೋ ಚೋರಂ ಗಹೇತ್ವಾ ಹನೇಯ್ಯುಂ ವಾ ಬನ್ಧೇಯ್ಯುಂ ವಾ ಪಬ್ಬಾಜೇಯ್ಯುಂ ವಾ – ‘ಚೋರೋಸಿ ಬಾಲೋಸಿ ಮೂಳ್ಹೋಸಿ ಥೇನೋಸೀ’ತಿ, ತಥಾರೂಪಂ ಭಿಕ್ಖು ಅದಿನ್ನಂ ಆದಿಯಮಾನೋ ಅಯಮ್ಪಿ ಪಾರಾಜಿಕೋ ಹೋತಿ ಅಸಂವಾಸೋ’’ತಿ.

೯೨. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಗಾಮೋ ನಾಮ ಏಕಕುಟಿಕೋಪಿ ಗಾಮೋ, ದ್ವಿಕುಟಿಕೋಪಿ ಗಾಮೋ, ತಿಕುಟಿಕೋಪಿ ಗಾಮೋ, ಚತುಕುಟಿಕೋಪಿ ಗಾಮೋ, ಸಮನುಸ್ಸೋಪಿ ಗಾಮೋ, ಅಮನುಸ್ಸೋಪಿ ಗಾಮೋ, ಪರಿಕ್ಖಿತ್ತೋಪಿ ಗಾಮೋ, ಅಪರಿಕ್ಖಿತ್ತೋಪಿ ಗಾಮೋ, ಗೋನಿಸಾದಿನಿವಿಟ್ಠೋಪಿ ಗಾಮೋ, ಯೋಪಿ ಸತ್ಥೋ ಅತಿರೇಕಚತುಮಾಸನಿವಿಟ್ಠೋ ಸೋಪಿ ವುಚ್ಚತಿ ಗಾಮೋ.

ಗಾಮೂಪಚಾರೋ ನಾಮ ಪರಿಕ್ಖಿತ್ತಸ್ಸ ಗಾಮಸ್ಸ ಇನ್ದಖೀಲೇ [ಇನ್ದಖಿಲೇ (ಕ.)] ಠಿತಸ್ಸ ಮಜ್ಝಿಮಸ್ಸ ಪುರಿಸಸ್ಸ ಲೇಡ್ಡುಪಾತೋ, ಅಪರಿಕ್ಖಿತ್ತಸ್ಸ ಗಾಮಸ್ಸ ಘರೂಪಚಾರೇ ಠಿತಸ್ಸ ಮಜ್ಝಿಮಸ್ಸ ಪುರಿಸಸ್ಸ ಲೇಡ್ಡುಪಾತೋ.

ಅರಞ್ಞಂ ನಾಮ ಠಪೇತ್ವಾ ಗಾಮಞ್ಚ ಗಾಮೂಪಚಾರಞ್ಚ ಅವಸೇಸಂ ಅರಞ್ಞಂ ನಾಮ.

ಅದಿನ್ನಂ ನಾಮಂ ಯಂ ಅದಿನ್ನಂ ಅನಿಸ್ಸಟ್ಠಂ ಅಪರಿಚ್ಚತ್ತಂ ರಕ್ಖಿತಂ ಗೋಪಿತಂ ಮಮಾಯಿತಂ ಪರಪರಿಗ್ಗಹಿತಂ. ಏತಂ ಅದಿನ್ನಂ ನಾಮ.

ಥೇಯ್ಯಸಙ್ಖಾತನ್ತಿ ಥೇಯ್ಯಚಿತ್ತೋ ಅವಹರಣಚಿತ್ತೋ.

ಆದಿಯೇಯ್ಯಾತಿ ಆದಿಯೇಯ್ಯ ಹರೇಯ್ಯ ಅವಹರೇಯ್ಯ ಇರಿಯಾಪಥಂ ವಿಕೋಪೇಯ್ಯ ಠಾನಾ ಚಾವೇಯ್ಯ ಸಙ್ಕೇತಂ ವೀತಿನಾಮೇಯ್ಯ.

ಯಥಾರೂಪಂ ನಾಮ ಪಾದಂ ವಾ ಪಾದಾರಹಂ ವಾ ಅತಿರೇಕಪಾದಂ ವಾ.

ರಾಜಾನೋ ನಾಮ ಪಥಬ್ಯಾರಾಜಾ ಪದೇಸರಾಜಾ ಮಣ್ಡಲಿಕಾ ಅನ್ತರಭೋಗಿಕಾ ಅಕ್ಖದಸ್ಸಾ ಮಹಾಮತ್ತಾ, ಯೇ ವಾ ಪನ ಛೇಜ್ಜಭೇಜ್ಜಂ ಕರೋನ್ತಾ ಅನುಸಾಸನ್ತಿ. ಏತೇ ರಾಜಾನೋ ನಾಮ.

ಚೋರೋ ನಾಮ ಯೋ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ. ಏಸೋ ಚೋರೋ ನಾಮ.

ಹನೇಯ್ಯುಂ ವಾತಿ ಹತ್ಥೇನ ವಾ ಪಾದೇನ ವಾ ಕಸಾಯ ವಾ ವೇತ್ತೇನ ವಾ ಅಡ್ಢದಣ್ಡಕೇನ ವಾ ಛೇಜ್ಜಾಯ ವಾ ಹನೇಯ್ಯುಂ.

ಬನ್ಧೇಯ್ಯುಂ ವಾತಿ ರಜ್ಜುಬನ್ಧನೇನ ವಾ ಅನ್ದುಬನ್ಧನೇನ ವಾ ಸಙ್ಖಲಿಕಬನ್ಧನೇನ ವಾ ಘರಬನ್ಧನೇನ ವಾ ನಗರಬನ್ಧನೇನ ವಾ ಗಾಮಬನ್ಧನೇನ ವಾ ನಿಗಮಬನ್ಧನೇನ ವಾ ಬನ್ಧೇಯ್ಯುಂ, ಪುರಿಸಗುತ್ತಿಂ ವಾ ಕರೇಯ್ಯುಂ.

ಪಬ್ಬಾಜೇಯ್ಯುಂ ವಾತಿ ಗಾಮಾ ವಾ ನಿಗಮಾ ವಾ ನಗರಾ ವಾ ಜನಪದಾ ವಾ ಜನಪದಪದೇಸಾ ವಾ ಪಬ್ಬಾಜೇಯ್ಯುಂ.

ಚೋರೋಸಿ ಬಾಲೋಸಿ ಮೂಳ್ಹೋಸಿ ಥೇನೋಸೀತಿ ಪರಿಭಾಸೋ ಏಸೋ.

ತಥಾರೂಪಂ ನಾಮ ಪಾದಂ ವಾ ಪಾದಾರಹಂ ವಾ ಅತಿರೇಕಪಾದಂ ವಾ.

ಆದಿಯಮಾನೋತಿ ಆದಿಯಮಾನೋ ಹರಮಾನೋ ಅವಹರಮಾನೋ ಇರಿಯಾಪಥಂ ವಿಕೋಪಯಮಾನೋ ಠಾನಾ ಚಾವಯಮಾನೋ ಸಙ್ಕೇತಂ ವೀತಿನಾಮಯಮಾನೋ.

ಅಯಮ್ಪೀತಿ ಪುರಿಮಂ ಉಪಾದಾಯ ವುಚ್ಚತಿ.

ಪಾರಾಜಿಕೋ ಹೋತೀತಿ ಸೇಯ್ಯಥಾಪಿ ನಾಮ ಪಣ್ಡುಪಲಾಸೋ ಬನ್ಧನಾ ಪವುತ್ತೋ [ಹರಿತತ್ತಾಯ (ಸೀ. ಸ್ಯಾ.)] ಅಭಬ್ಬೋ ಹರಿತತ್ಥಾಯ [ಹರಿತತ್ತಾಯ (ಸೀ. ಸ್ಯಾ.)], ಏವಮೇವ ಭಿಕ್ಖು ಪಾದಂ ವಾ ಪಾದಾರಹಂ ವಾ ಅತಿರೇಕಪಾದಂ ವಾ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯಿತ್ವಾ ಅಸ್ಸಮಣೋ ಹೋತಿ ಅಸಕ್ಯಪುತ್ತಿಯೋ. ತೇನ ವುಚ್ಚತಿ – ‘ಪಾರಾಜಿಕೋ ಹೋತೀ’ತಿ.

ಅಸಂವಾಸೋತಿ ಸಂವಾಸೋ ನಾಮ ಏಕಕಮ್ಮಂ ಏಕುದ್ದೇಸೋ ಸಮಸಿಕ್ಖತಾ. ಏಸೋ ಸಂವಾಸೋ ನಾಮ. ಸೋ ತೇನ ಸದ್ಧಿಂ ನತ್ಥಿ. ತೇನ ವುಚ್ಚತಿ – ‘ಅಸಂವಾಸೋ’ತಿ.

೯೩. ಭೂಮಟ್ಠಂ ಥಲಟ್ಠಂ ಆಕಾಸಟ್ಠಂ ವೇಹಾಸಟ್ಠಂ ಉದಕಟ್ಠಂ ನಾವಟ್ಠಂ ಯಾನಟ್ಠಂ ಭಾರಟ್ಠಂ ಆರಾಮಟ್ಠಂ ವಿಹಾರಟ್ಠಂ ಖೇತ್ತಟ್ಠಂ ವತ್ಥುಟ್ಠಂ ಗಾಮಟ್ಠಂ ಅರಞ್ಞಟ್ಠಂ ಉದಕಂ ದನ್ತಪೋಣಂ [ದನ್ತಪೋನಂ (ಸೀ. ಕ.)] ವನಪ್ಪತಿ ಹರಣಕಂ ಉಪನಿಧಿ ಸುಙ್ಕಘಾತಂ ಪಾಣೋ ಅಪದಂ ದ್ವಿಪದಂ ಚತುಪ್ಪದಂ ಬಹುಪ್ಪದಂ ಓಚರಕೋ ಓಣಿರಕ್ಖೋ ಸಂವಿದಾವಹಾರೋ ಸಙ್ಕೇತಕಮ್ಮಂ ನಿಮಿತ್ತಕಮ್ಮನ್ತಿ.

೯೪. ಭೂಮಟ್ಠಂ ನಾಮ ಭಣ್ಡಂ ಭೂಮಿಯಂ ನಿಕ್ಖಿತ್ತಂ ಹೋತಿ ನಿಖಾತಂ ಪಟಿಚ್ಛನ್ನಂ. ಭೂಮಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಕುದಾಲಂ ವಾ ಪಿಟಕಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ತತ್ಥ ಜಾತಕಂ ಕಟ್ಠಂ ವಾ ಲತಂ ವಾ ಛಿನ್ದತಿ, ಆಪತ್ತಿ ದುಕ್ಕಟಸ್ಸ. ತತ್ಥ ಪಂಸುಂ ಖಣತಿ ವಾ ಬ್ಯೂಹತಿ [ವಿಯೂಹತಿ (ಸ್ಯಾ.)] ವಾ ಉದ್ಧರತಿ ವಾ, ಆಪತ್ತಿ ದುಕ್ಕಟಸ್ಸ. ಕುಮ್ಭಿಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಅತ್ತನೋ ಭಾಜನಂ ಪವೇಸೇತ್ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಅತ್ತನೋ ಭಾಜನಗತಂ ವಾ ಕರೋತಿ ಮುಟ್ಠಿಂ ವಾ ಛಿನ್ದತಿ, ಆಪತ್ತಿ ಪಾರಾಜಿಕಸ್ಸ. ಸುತ್ತಾರುಳ್ಹಂ ಭಣ್ಡಂ ಪಾಮಙ್ಗಂ ವಾ ಕಣ್ಠಸುತ್ತಕಂ ವಾ ಕಟಿಸುತ್ತಕಂ ವಾ ಸಾಟಕಂ ವಾ ವೇಠನಂ ವಾ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕೋಟಿಯಂ ಗಹೇತ್ವಾ ಉಚ್ಚಾರೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಘಂಸನ್ತೋ ನೀಹರತಿ, ಆಪತ್ತಿ ಥುಲ್ಲಚ್ಚಯಸ್ಸ. ಅನ್ತಮಸೋ ಕೇಸಗ್ಗಮತ್ತಮ್ಪಿ ಕುಮ್ಭಿಮುಖಾ ಮೋಚೇತಿ, ಆಪತ್ತಿ ಪಾರಾಜಿಕಸ್ಸ. ಸಪ್ಪಿಂ ವಾ ತೇಲಂ ವಾ ಮಧುಂ ವಾ ಫಾಣಿತಂ ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಏಕೇನ ಪಯೋಗೇನ ಪಿವತಿ, ಆಪತ್ತಿ ಪಾರಾಜಿಕಸ್ಸ. ತತ್ಥೇವ ಭಿನ್ದತಿ ವಾ ಛಡ್ಡೇತಿ ವಾ ಝಾಪೇತಿ ವಾ ಅಪರಿಭೋಗಂ ವಾ ಕರೋತಿ, ಆಪತ್ತಿ ದುಕ್ಕಟಸ್ಸ.

೯೫. ಥಲಟ್ಠಂ ನಾಮ ಭಣ್ಡಂ ಥಲೇ ನಿಕ್ಖಿತ್ತಂ ಹೋತಿ. ಥಲಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೯೬. ಆಕಾಸಟ್ಠಂ ನಾಮ ಭಣ್ಡಂ ಆಕಾಸಗತಂ ಹೋತಿ. ಮೋರೋ ವಾ ಕಪಿಞ್ಜರೋ ವಾ ತಿತ್ತಿರೋ ವಾ ವಟ್ಟಕೋ ವಾ, ಸಾಟಕಂ ವಾ ವೇಠನಂ ವಾ ಹಿರಞ್ಞಂ ವಾ ಸುವಣ್ಣಂ ವಾ ಛಿಜ್ಜಮಾನಂ ಪತತಿ. ಆಕಾಸಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಗಮನಂ ಉಪಚ್ಛಿನ್ದತಿ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೯೭. ವೇಹಾಸಟ್ಠಂ ನಾಮ ಭಣ್ಡಂ ವೇಹಾಸಗತಂ ಹೋತಿ. ಮಞ್ಚೇ ವಾ ಪೀಠೇ ವಾ ಚೀವರವಂಸೇ ವಾ ಚೀವರರಜ್ಜುಯಾ ವಾ ಭಿತ್ತಿಖಿಲೇ ವಾ ನಾಗದನ್ತೇ ವಾ ರುಕ್ಖೇ ವಾ ಲಗ್ಗಿತಂ ಹೋತಿ, ಅನ್ತಮಸೋ ಪತ್ತಾಧಾರಕೇಪಿ. ವೇಹಾಸಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೯೮. ಉದಕಟ್ಠಂ ನಾಮ ಭಣ್ಡಂ ಉದಕೇ ನಿಕ್ಖಿತ್ತಂ ಹೋತಿ. ಉದಕಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ನಿಮುಜ್ಜತಿ ವಾ ಉಮ್ಮುಜ್ಜತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ತತ್ಥ ಜಾತಕಂ ಉಪ್ಪಲಂ ವಾ ಪದುಮಂ ವಾ ಪುಣ್ಡರೀಕಂ ವಾ ಭಿಸಂ ವಾ ಮಚ್ಛಂ ವಾ ಕಚ್ಛಪಂ ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೯೯. ನಾವಾ ನಾಮ ಯಾಯ ತರತಿ. ನಾವಟ್ಠಂ ನಾಮ ಭಣ್ಡಂ ನಾವಾಯ ನಿಕ್ಖಿತ್ತಂ ಹೋತಿ. ‘‘ನಾವಟ್ಠಂ ಭಣ್ಡಂ ಅವಹರಿಸ್ಸಾಮೀ’’ತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ನಾವಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಬನ್ಧನಂ ಮೋಚೇತಿ, ಆಪತ್ತಿ ದುಕ್ಕಟಸ್ಸ. ಬನ್ಧನಂ ಮೋಚೇತ್ವಾ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಉದ್ಧಂ ವಾ ಅಧೋ ವಾ ತಿರಿಯಂ ವಾ ಅನ್ತಮಸೋ ಕೇಸಗ್ಗಮತ್ತಮ್ಪಿ ಸಙ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ.

೧೦೦. ಯಾನಂ ನಾಮ ವಯ್ಹಂ ರಥೋ ಸಕಟಂ ಸನ್ದಮಾನಿಕಾ. ಯಾನಟ್ಠಂ ನಾಮ ಭಣ್ಡಂ ಯಾನೇ ನಿಕ್ಖಿತ್ತಂ ಹೋತಿ. ಯಾನಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಯಾನಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೦೧. ಭಾರೋ ನಾಮ ಸೀಸಭಾರೋ ಖನ್ಧಭಾರೋ ಕಟಿಭಾರೋ ಓಲಮ್ಬಕೋ. ಸೀಸೇ ಭಾರಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಖನ್ಧಂ ಓರೋಪೇತಿ, ಆಪತ್ತಿ ಪಾರಾಜಿಕಸ್ಸ. ಖನ್ಧೇ ಭಾರಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕಟಿಂ ಓರೋಪೇತಿ, ಆಪತ್ತಿ ಪಾರಾಜಿಕಸ್ಸ. ಕಟಿಯಾ ಭಾರಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಹತ್ಥೇನ ಗಣ್ಹಾತಿ, ಆಪತ್ತಿ ಪಾರಾಜಿಕಸ್ಸ. ಹತ್ಥೇ ಭಾರಂ ಥೇಯ್ಯಚಿತ್ತೋ ಭೂಮಿಯಂ ನಿಕ್ಖಿಪತಿ, ಆಪತ್ತಿ ಪಾರಾಜಿಕಸ್ಸ. ಥೇಯ್ಯಚಿತ್ತೋ ಭೂಮಿತೋ ಗಣ್ಹಾತಿ, ಆಪತ್ತಿ ಪಾರಾಜಿಕಸ್ಸ.

೧೦೨. ಆರಾಮೋ ನಾಮ ಪುಪ್ಫಾರಾಮೋ ಫಲಾರಾಮೋ. ಆರಾಮಟ್ಠಂ ನಾಮ ಭಣ್ಡಂ ಆರಾಮೇ ಚತೂಹಿ ಠಾನೇಹಿ ನಿಕ್ಖಿತ್ತಂ ಹೋತಿ – ಭೂಮಟ್ಠಂ ಥಲಟ್ಠಂ, ಆಕಾಸಟ್ಠಂ, ವೇಹಾಸಟ್ಠಂ. ಆರಾಮಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ತತ್ಥ ಜಾತಕಂ ಮೂಲಂ ವಾ ತಚಂ ವಾ ಪತ್ತಂ ವಾ ಪುಪ್ಫಂ ವಾ ಫಲಂ ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಆರಾಮಂ ಅಭಿಯುಞ್ಜತಿ, ಆಪತ್ತಿ ದುಕ್ಕಟಸ್ಸ. ಸಾಮಿಕಸ್ಸ ವಿಮತಿಂ ಉಪ್ಪಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಸಾಮಿಕೋ ನ ಮಯ್ಹಂ ಭವಿಸ್ಸತೀತಿ ಧುರಂ ನಿಕ್ಖಿಪತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಸಾಮಿಕಂ ಪರಾಜೇತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಪರಜ್ಜತಿ, ಆಪತ್ತಿ ಥುಲ್ಲಚ್ಚಯಸ್ಸ.

೧೦೩. ವಿಹಾರಟ್ಠಂ ನಾಮ ಭಣ್ಡಂ ವಿಹಾರೇ ಚತೂಹಿ ಠಾನೇಹಿ ನಿಕ್ಖಿತ್ತಂ ಹೋತಿ – ಭೂಮಟ್ಠಂ, ಥಲಟ್ಠಂ, ಆಕಾಸಟ್ಠಂ, ವೇಹಾಸಟ್ಠಂ. ವಿಹಾರಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ವಿಹಾರಂ ಅಭಿಯುಞ್ಜತಿ, ಆಪತ್ತಿ ದುಕ್ಕಟಸ್ಸ. ಸಾಮಿಕಸ್ಸ ವಿಮತಿಂ ಉಪ್ಪಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಸಾಮಿಕೋ ನ ಮಯ್ಹಂ ಭವಿಸ್ಸತೀತಿ ಧುರಂ ನಿಕ್ಖಿಪತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಸಾಮಿಕಂ ಪರಾಜೇತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಪರಜ್ಜತಿ, ಆಪತ್ತಿ ಥುಲ್ಲಚ್ಚಯಸ್ಸ.

೧೦೪. ಖೇತ್ತಂ ನಾಮ ಯತ್ಥ ಪುಬ್ಬಣ್ಣಂ ವಾ ಅಪರಣ್ಣಂ ವಾ ಜಾಯತಿ. ಖೇತ್ತಟ್ಠಂ ನಾಮ ಭಣ್ಡಂ ಖೇತ್ತೇ ಚತೂಹಿ ಠಾನೇಹಿ ನಿಕ್ಖಿತ್ತಂ ಹೋತಿ – ಭೂಮಟ್ಠಂ, ಥಲಟ್ಠಂ, ಆಕಾಸಟ್ಠಂ, ವೇಹಾಸಟ್ಠಂ. ಖೇತ್ತಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ, ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ತತ್ಥ ಜಾತಕಂ ಪುಬ್ಬಣ್ಣಂ ವಾ ಅಪರಣ್ಣಂ ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಖೇತ್ತಂ ಅಭಿಯುಞ್ಜತಿ, ಆಪತ್ತಿ ದುಕ್ಕಟಸ್ಸ. ಸಾಮಿಕಸ್ಸ ವಿಮತಿಂ ಉಪ್ಪಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಸಾಮಿಕೋ ನ ಮಯ್ಹಂ ಭವಿಸ್ಸತೀತಿ ಧುರಂ ನಿಕ್ಖಿಪತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಸಾಮಿಕಂ ಪರಾಜೇತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಪರಜ್ಜತಿ, ಆಪತ್ತಿ ಥುಲ್ಲಚ್ಚಯಸ್ಸ. ಖಿಲಂ ವಾ ರಜ್ಜುಂ ವಾ ವತಿಂ ವಾ ಮರಿಯಾದಂ ವಾ ಸಙ್ಕಾಮೇತಿ, ಆಪತ್ತಿ ದುಕ್ಕಟಸ್ಸ. ಏಕಂ ಪಯೋಗಂ ಅನಾಗತೇ, ಆಪತ್ತಿ ಥುಲ್ಲಚ್ಚಯಸ್ಸ. ತಸ್ಮಿಂ ಪಯೋಗೇ ಆಗತೇ, ಆಪತ್ತಿ ಪಾರಾಜಿಕಸ್ಸ.

೧೦೫. ವತ್ಥು ನಾಮ ಆರಾಮವತ್ಥು ವಿಹಾರವತ್ಥು. ವತ್ಥುಟ್ಠಂ ನಾಮ ಭಣ್ಡಂ ವತ್ಥುಸ್ಮಿಂ ಚತೂಹಿ ಠಾನೇಹಿ ನಿಕ್ಖಿತ್ತಂ ಹೋತಿ – ಭೂಮಟ್ಠಂ, ಥಲಟ್ಠಂ, ಆಕಾಸಟ್ಠಂ, ವೇಹಾಸಟ್ಠಂ. ವತ್ಥುಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ವತ್ಥುಂ ಅಭಿಯುಞ್ಜತಿ, ಆಪತ್ತಿ ದುಕ್ಕಟಸ್ಸ. ಸಾಮಿಕಸ್ಸ ವಿಮತಿಂ ಉಪ್ಪಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಸಾಮಿಕೋ ನ ಮಯ್ಹಂ ಭವಿಸ್ಸತೀತಿ ಧುರಂ ನಿಕ್ಖಿಪತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಸಾಮಿಕಂ ಪರಾಜೇತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಪರಜ್ಜತಿ, ಆಪತ್ತಿ ಥುಲ್ಲಚ್ಚಯಸ್ಸ. ಖೀಲಂ ವಾ ರಜ್ಜುಂ ವಾ ವತಿಂ ವಾ ಪಾಕಾರಂ ವಾ ಸಙ್ಕಾಮೇತಿ, ಆಪತ್ತಿ ದುಕ್ಕಟಸ್ಸ. ಏಕಂ ಪಯೋಗಂ ಅನಾಗತೇ ಆಪತ್ತಿ ಥುಲ್ಲಚ್ಚಯಸ್ಸ. ತಸ್ಮಿಂ ಪಯೋಗೇ ಆಗತೇ ಆಪತ್ತಿ ಪಾರಾಜಿಕಸ್ಸ.

೧೦೬. ಗಾಮಟ್ಠಂ ನಾಮ ಭಣ್ಡಂ ಗಾಮೇ ಚತೂಹಿ ಠಾನೇಹಿ ನಿಕ್ಖಿತ್ತಂ ಹೋತಿ – ಭೂಮಟ್ಠಂ, ಥಲಟ್ಠಂ, ಆಕಾಸಟ್ಠಂ, ವೇಹಾಸಟ್ಠಂ. ಗಾಮಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೦೭. ಅರಞ್ಞಂ ನಾಮ ಯಂ ಮನುಸ್ಸಾನಂ ಪರಿಗ್ಗಹಿತಂ ಹೋತಿ, ತಂ ಅರಞ್ಞಂ. ಅರಞ್ಞಟ್ಠಂ ನಾಮ ಭಣ್ಡಂ ಅರಞ್ಞೇ ಚತೂಹಿ ಠಾನೇಹಿ ನಿಕ್ಖಿತ್ತಂ ಹೋತಿ – ಭೂಮಟ್ಠಂ, ಥಲಟ್ಠಂ, ಆಕಾಸಟ್ಠಂ, ವೇಹಾಸಟ್ಠಂ. ಅರಞ್ಞಟ್ಠಂ ಭಣ್ಡಂ ಅವಹರಿಸ್ಸಾಮೀತಿ ಥೇಯ್ಯಚಿತ್ತೋ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ತತ್ಥ ಜಾತಕಂ ಕಟ್ಠಂ ವಾ ಲತಂ ವಾ ತಿಣಂ ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೦೮. ಉದಕಂ ನಾಮ ಭಾಜನಗತಂ ವಾ ಹೋತಿ ಪೋಕ್ಖರಣಿಯಾ ವಾ ತಳಾಕೇ ವಾ. ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಅತ್ತನೋ ಭಾಜನಂ ಪವೇಸೇತ್ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಉದಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಅತ್ತನೋ ಭಾಜನಗತಂ ಕರೋತಿ, ಆಪತ್ತಿ ಪಾರಾಜಿಕಸ್ಸ. ಮರಿಯಾದಂ ಭಿನ್ದತಿ, ಆಪತ್ತಿ ದುಕ್ಕಟಸ್ಸ. ಮರಿಯಾದಂ ಭಿನ್ದಿತ್ವಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಉದಕಂ ನಿಕ್ಖಾಮೇತಿ, ಆಪತ್ತಿ ಪಾರಾಜಿಕಸ್ಸ. ಅತಿರೇಕಮಾಸಕಂ ವಾ ಊನಪಞ್ಚಮಾಸಕಂ ವಾ ಅಗ್ಘನಕಂ ಉದಕಂ ನಿಕ್ಖಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಮಾಸಕಂ ವಾ ಊನಮಾಸಕಂ ವಾ ಅಗ್ಘನಕಂ ಉದಕಂ ನಿಕ್ಖಾಮೇತಿ, ಆಪತ್ತಿ ದುಕ್ಕಟಸ್ಸ.

೧೦೯. ದನ್ತಪೋಣಂ ನಾಮ ಛಿನ್ನಂ ವಾ ಅಚ್ಛಿನ್ನಂ ವಾ. ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೧೦. ವನಪ್ಪತಿ ನಾಮ ಯೋ ಮನುಸ್ಸಾನಂ ಪರಿಗ್ಗಹಿತೋ ಹೋತಿ ರುಕ್ಖೋ ಪರಿಭೋಗೋ. ಥೇಯ್ಯಚಿತ್ತೋ ಛಿನ್ದತಿ, ಪಹಾರೇ ಪಹಾರೇ ಆಪತ್ತಿ ದುಕ್ಕಟಸ್ಸ. ಏಕಂ ಪಹಾರಂ ಅನಾಗತೇ, ಆಪತ್ತಿ ಥುಲ್ಲಚ್ಚಯಸ್ಸ. ತಸ್ಮಿಂ ಪಹಾರೇ ಆಗತೇ, ಆಪತ್ತಿ ಪಾರಾಜಿಕಸ್ಸ.

೧೧೧. ಹರಣಕಂ ನಾಮ ಅಞ್ಞಸ್ಸ ಹರಣಕಂ ಭಣ್ಡಂ. ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಸಹಭಣ್ಡಹಾರಕಂ ಪದಸಾ ನೇಸ್ಸಾಮೀತಿ ಪಠಮಂ ಪಾದಂ ಸಙ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಸಙ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ. ಪತಿತಂ ಭಣ್ಡಂ ಗಹೇಸ್ಸಾಮೀತಿ ಪಾತಾಪೇತಿ, ಆಪತ್ತಿ ದುಕ್ಕಟಸ್ಸ. ಪತಿತಂ ಭಣ್ಡಂ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೧೨. ಉಪನಿಧಿ ನಾಮ ಉಪನಿಕ್ಖಿತ್ತಂ ಭಣ್ಡಂ. ದೇಹಿ ಮೇ ಭಣ್ಡನ್ತಿ ವುಚ್ಚಮಾನೋ ನಾಹಂ ಗಣ್ಹಾಮೀತಿ ಭಣತಿ, ಆಪತ್ತಿ ದುಕ್ಕಟಸ್ಸ. ಸಾಮಿಕಸ್ಸ ವಿಮತಿಂ ಉಪ್ಪಾದೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಸಾಮಿಕೋ ನ ಮಯ್ಹಂ ದಸ್ಸತೀತಿ ಧುರಂ ನಿಕ್ಖಿಪತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಸಾಮಿಕಂ ಪರಾಜೇತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಂ ಚರನ್ತೋ ಪರಜ್ಜತಿ, ಆಪತ್ತಿ ಥುಲ್ಲಚ್ಚಯಸ್ಸ.

೧೧೩. ಸುಙ್ಕಘಾತಂ ನಾಮ ರಞ್ಞಾ ಠಪಿತಂ ಹೋತಿ ಪಬ್ಬತಖಣ್ಡೇ ವಾ ನದೀತಿತ್ಥೇ ವಾ ಗಾಮದ್ವಾರೇ ವಾ – ‘ಅತ್ರ ಪವಿಟ್ಠಸ್ಸ ಸುಙ್ಕಂ ಗಣ್ಹನ್ತೂ’ತಿ. ತತ್ರ ಪವಿಸಿತ್ವಾ ರಾಜಗ್ಗಂ [ರಾಜಗ್ಘಂ (ಸೀ. ಸ್ಯಾ.)] ಭಣ್ಡಂ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಪಠಮಂ ಪಾದಂ ಸುಙ್ಕಘಾತಂ ಅತಿಕ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ. ಅನ್ತೋಸುಙ್ಕಘಾತೇ ಠಿತೋ ಬಹಿಸುಙ್ಕಘಾತಂ ಪಾತೇತಿ, ಆಪತ್ತಿ ಪಾರಾಜಿಕಸ್ಸ. ಸುಙ್ಕಂ ಪರಿಹರತಿ, ಆಪತ್ತಿ ದುಕ್ಕಟಸ್ಸ.

೧೧೪. ಪಾಣೋ ನಾಮ ಮನುಸ್ಸಪಾಣೋ ವುಚ್ಚತಿ. ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಪದಸಾ ನೇಸ್ಸಾಮೀತಿ ಪಠಮಂ ಪಾದಂ ಸಙ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಸಙ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ.

ಅಪದಂ ನಾಮ ಅಹಿ ಮಚ್ಛಾ. ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೧೫. ದ್ವಿಪದಂ ನಾಮ ಮನುಸ್ಸಾ, ಪಕ್ಖಜಾತಾ. ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಪದಸಾ ನೇಸ್ಸಾಮೀತಿ ಪಠಮಂ ಪಾದಂ ಸಙ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಸಙ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ.

೧೧೬. ಚತುಪ್ಪದಂ ನಾಮ – ಹತ್ಥೀ ಅಸ್ಸಾ ಓಟ್ಠಾ ಗೋಣಾ ಗದ್ರಭಾ ಪಸುಕಾ. ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಪದಸಾ ನೇಸ್ಸಾಮೀತಿ ಪಠಮಂ ಪಾದಂ ಸಙ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ದುತಿಯಂ ಪಾದಂ ಸಙ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ತತಿಯಂ ಪಾದಂ ಸಙ್ಕಾಮೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಚತುತ್ಥಂ ಪಾದಂ ಸಙ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ.

೧೧೭. ಬಹುಪ್ಪದಂ ನಾಮ – ವಿಚ್ಛಿಕಾ ಸತಪದೀ ಉಚ್ಚಾಲಿಙ್ಗಪಾಣಕಾ. ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ. ಪದಸಾ ನೇಸ್ಸಾಮೀತಿ ಸಙ್ಕಾಮೇತಿ, ಪದೇ ಪದೇ ಆಪತ್ತಿ ಥುಲ್ಲಚ್ಚಯಸ್ಸ. ಪಚ್ಛಿಮಂ ಪಾದಂ ಸಙ್ಕಾಮೇತಿ, ಆಪತ್ತಿ ಪಾರಾಜಿಕಸ್ಸ.

೧೧೮. ಓಚರಕೋ ನಾಮ ಭಣ್ಡಂ ಓಚರಿತ್ವಾ ಆಚಿಕ್ಖತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ತಂ ಭಣ್ಡಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ.

ಓಣಿರಕ್ಖೋ ನಾಮ ಆಹಟಂ ಭಣ್ಡಂ ಗೋಪೇನ್ತೋ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಥೇಯ್ಯಚಿತ್ತೋ ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

ಸಂವಿದಾವಹಾರೋ ನಾಮ ಸಮ್ಬಹುಲಾ ಸಂವಿದಹಿತ್ವಾ ಏಕೋ ಭಣ್ಡಂ ಅವಹರತಿ, ಆಪತ್ತಿ ಸಬ್ಬೇಸಂ ಪಾರಾಜಿಕಸ್ಸ.

೧೧೯. ಸಙ್ಕೇತಕಮ್ಮಂ ನಾಮ ಸಙ್ಕೇತಂ ಕರೋತಿ – ‘‘ಪುರೇಭತ್ತಂ ವಾ ಪಚ್ಛಾಭತ್ತಂ ವಾ ರತ್ತಿಂ ವಾ ದಿವಾ ವಾ ತೇನ ಸಙ್ಕೇತೇನ ತಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ತೇನ ಸಙ್ಕೇತೇನ ತಂ ಭಣ್ಡಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ. ತಂ ಸಙ್ಕೇತಂ ಪುರೇ ವಾ ಪಚ್ಛಾ ವಾ ತಂ ಭಣ್ಡಂ ಅವಹರತಿ, ಮೂಲಟ್ಠಸ್ಸ ಅನಾಪತ್ತಿ. ಅವಹಾರಕಸ್ಸ ಆಪತ್ತಿ ಪಾರಾಜಿಕಸ್ಸ.

೧೨೦. ನಿಮಿತ್ತಕಮ್ಮಂ ನಾಮ ನಿಮಿತ್ತಂ ಕರೋತಿ. ಅಕ್ಖಿಂ ವಾ ನಿಖಣಿಸ್ಸಾಮಿ ಭಮುಕಂ ವಾ ಉಕ್ಖಿಪಿಸ್ಸಾಮಿ ಸೀಸಂ ವಾ ಉಕ್ಖಿಪಿಸ್ಸಾಮಿ, ತೇನ ನಿಮಿತ್ತೇನ ತಂ ಭಣ್ಡಂ ಅವಹರಾತಿ, ಆಪತ್ತಿ ದುಕ್ಕಟಸ್ಸ. ತೇನ ನಿಮಿತ್ತೇನ ತಂ ಭಣ್ಡಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ. ತಂ ನಿಮಿತ್ತಂ ಪುರೇ ವಾ ಪಚ್ಛಾ ವಾ ತಂ ಭಣ್ಡಂ ಅವಹರತಿ, ಮೂಲಟ್ಠಸ್ಸ ಅನಾಪತ್ತಿ. ಅವಹಾರಕಸ್ಸ ಆಪತ್ತಿ ಪಾರಾಜಿಕಸ್ಸ.

೧೨೧. ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ತಂ ಮಞ್ಞಮಾನೋ ತಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ತಂ ಮಞ್ಞಮಾನೋ ಅಞ್ಞಂ ಅವಹರತಿ, ಮೂಲಟ್ಠಸ್ಸ ಅನಾಪತ್ತಿ. ಅವಹಾರಕಸ್ಸ ಆಪತ್ತಿ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಅಞ್ಞಂ ಮಞ್ಞಮಾನೋ ತಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಅಞ್ಞಂ ಮಞ್ಞಮಾನೋ ಅಞ್ಞಂ ಅವಹರತಿ, ಮೂಲಟ್ಠಸ್ಸ ಅನಾಪತ್ತಿ. ಅವಹಾರಕಸ್ಸ ಆಪತ್ತಿ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಸ್ಸ ಪಾವದ – ‘ಇತ್ಥನ್ನಾಮೋ ಇತ್ಥನ್ನಾಮಸ್ಸ ಪಾವದತು – ಇತ್ಥನ್ನಾಮೋ ಇತ್ಥನ್ನಾಮಂ ಭಣ್ಡಂ ಅವಹರತೂ’’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಇತರಸ್ಸ ಆರೋಚೇತಿ, ಆಪತ್ತಿ ದುಕ್ಕಟಸ್ಸ. ಅವಹಾರಕೋ ಪಟಿಗ್ಗಣ್ಹಾತಿ, ಮೂಲಟ್ಠಸ್ಸ ಆಪತ್ತಿ ಥುಲ್ಲಚ್ಚಯಸ್ಸ. ಸೋ ತಂ ಭಣ್ಡಂ ಅವಹರತಿ, ಆಪತ್ತಿ ಸಬ್ಬೇಸಂ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಸ್ಸ ಪಾವದ – ‘ಇತ್ಥನ್ನಾಮೋ ಇತ್ಥನ್ನಾಮಸ್ಸ ಪಾವದತು – ಇತ್ಥನ್ನಾಮೋ ಇತ್ಥನ್ನಾಮಂ ಭಣ್ಡಂ ಅವಹರತೂ’’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಅಞ್ಞಂ ಆಣಾಪೇತಿ, ಆಪತ್ತಿ ದುಕ್ಕಟಸ್ಸ. ಅವಹಾರಕೋ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಸೋ ತಂ ಭಣ್ಡಂ ಅವಹರತಿ, ಮೂಲಟ್ಠಸ್ಸ ಅನಾಪತ್ತಿ. ಆಣಾಪಕಸ್ಸ ಚ ಅವಹಾರಕಸ್ಸ ಚ ಆಪತ್ತಿ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಗನ್ತ್ವಾ ಪುನ ಪಚ್ಚಾಗಚ್ಛತಿ – ‘‘ನಾಹಂ ಸಕ್ಕೋಮಿ ತಂ ಭಣ್ಡಂ ಅವಹರಿತು’’ನ್ತಿ. ಸೋ ಪುನ ಆಣಾಪೇತಿ – ‘‘ಯದಾ ಸಕ್ಕೋಸಿ ತದಾ ತಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ತಂ ಭಣ್ಡಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಆಣಾಪೇತ್ವಾ ವಿಪ್ಪಟಿಸಾರೀ ನ ಸಾವೇತಿ – ‘‘ಮಾ ಅವಹರೀ’’ತಿ. ಸೋ ತಂ ಭಣ್ಡಂ ಅವಹರತಿ, ಆಪತ್ತಿ ಉಭಿನ್ನಂ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಆಣಾಪೇತ್ವಾ ವಿಪ್ಪಟಿಸಾರೀ ಸಾವೇತಿ – ‘‘ಮಾ ಅವಹರೀ’’ತಿ. ಸೋ ‘‘ಆಣತ್ತೋ ಅಹಂ ತಯಾ’’ತಿ, ತಂ ಭಣ್ಡಂ ಅವಹರತಿ, ಮೂಲಟ್ಠಸ್ಸ ಅನಾಪತ್ತಿ. ಅವಹಾರಕಸ್ಸ ಆಪತ್ತಿ ಪಾರಾಜಿಕಸ್ಸ.

ಭಿಕ್ಖು ಭಿಕ್ಖುಂ ಆಣಾಪೇತಿ – ‘‘ಇತ್ಥನ್ನಾಮಂ ಭಣ್ಡಂ ಅವಹರಾ’’ತಿ, ಆಪತ್ತಿ ದುಕ್ಕಟಸ್ಸ. ಸೋ ಆಣಾಪೇತ್ವಾ ವಿಪ್ಪಟಿಸಾರೀ ಸಾವೇತಿ – ‘‘ಮಾ ಅವಹರೀ’’ತಿ. ಸೋ ‘‘ಸಾಧೂ’’ತಿ [ಸುಟ್ಠೂತಿ (ಕ.)]? ಓರಮತಿ, ಉಭಿನ್ನಂ ಅನಾಪತ್ತಿ.

೧೨೨. ಪಞ್ಚಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ಪಾರಾಜಿಕಸ್ಸ – ಪರಪರಿಗ್ಗಹಿತಞ್ಚ ಹೋತಿ, ಪರಪರಿಗ್ಗಹಿತಸಞ್ಞೀ ಚ, ಗರುಕೋ ಚ ಹೋತಿ ಪರಿಕ್ಖಾರೋ, ಪಞ್ಚಮಾಸಕೋ ವಾ ಅತಿರೇಕಪಞ್ಚಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೨೩. ಪಞ್ಚಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ಥುಲ್ಲಚ್ಚಯಸ್ಸ – ಪರಪರಿಗ್ಗಹಿತಞ್ಚ ಹೋತಿ, ಪರಪರಿಗ್ಗಹಿತಸಞ್ಞೀ ಚ, ಲಹುಕೋ ಚ ಹೋತಿ ಪರಿಕ್ಖಾರೋ, ಅತಿರೇಕಮಾಸಕೋ ವಾ ಊನಪಞ್ಚಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ಥುಲ್ಲಚ್ಚಯಸ್ಸ.

೧೨೪. ಪಞ್ಚಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ದುಕ್ಕಟಸ್ಸ. ಪರಪರಿಗ್ಗಹಿತಞ್ಚ ಹೋತಿ, ಪರಪರಿಗ್ಗಹಿತಸಞ್ಞೀ ಚ, ಲಹುಕೋ ಚ ಹೋತಿ ಪರಿಕ್ಖಾರೋ, ಮಾಸಕೋ ವಾ ಊನಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ದುಕ್ಕಟಸ್ಸ.

೧೨೫. ಛಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ಪಾರಾಜಿಕಸ್ಸ. ನ ಚ ಸಕಸಞ್ಞೀ, ನ ಚ ವಿಸ್ಸಾಸಗ್ಗಾಹೀ, ನ ಚ ತಾವಕಾಲಿಕಂ, ಗರುಕೋ ಚ ಹೋತಿ ಪರಿಕ್ಖಾರೋ, ಪಞ್ಚಮಾಸಕೋ ವಾ ಅತಿರೇಕಪಞ್ಚಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ. ಫನ್ದಾಪೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಠಾನಾ ಚಾವೇತಿ, ಆಪತ್ತಿ ಪಾರಾಜಿಕಸ್ಸ.

೧೨೬. ಛಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ಥುಲ್ಲಚ್ಚಯಸ್ಸ. ನ ಚ ಸಕಸಞ್ಞೀ, ನ ಚ ವಿಸ್ಸಾಸಗ್ಗಾಹೀ, ನ ಚ ತಾವಕಾಲಿಕಂ, ಲಹುಕೋ ಚ ಹೋತಿ ಪರಿಕ್ಖಾರೋ ಅತಿರೇಕಮಾಸಕೋ ವಾ ಊನಪಞ್ಚಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ಥುಲ್ಲಚ್ಚಯಸ್ಸ.

೧೨೭. ಛಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ದುಕ್ಕಟಸ್ಸ. ನ ಚ ಸಕಸಞ್ಞೀ, ನ ಚ ವಿಸ್ಸಾಸಗ್ಗಾಹೀ, ನ ಚ ತಾವಕಾಲಿಕಂ, ಲಹುಕೋ ಚ ಹೋತಿ ಪರಿಕ್ಖಾರೋ, ಮಾಸಕೋ ವಾ ಊನಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ದುಕ್ಕಟಸ್ಸ.

೧೨೮. ಪಞ್ಚಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ದುಕ್ಕಟಸ್ಸ. ನ ಚ ಪರಪರಿಗ್ಗಹಿತಂ ಹೋತಿ, ಪರಪರಿಗ್ಗಹಿತಸಞ್ಞೀ ಚ, ಗರುಕೋ ಚ ಹೋತಿ ಪರಿಕ್ಖಾರೋ, ಪಞ್ಚಮಾಸಕೋ ವಾ ಅತಿರೇಕಪಞ್ಚಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ದುಕ್ಕಟಸ್ಸ.

೧೨೯. ಪಞ್ಚಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ದುಕ್ಕಟಸ್ಸ. ನ ಚ ಪರಪರಿಗ್ಗಹಿತಂ ಹೋತಿ, ಪರಪರಿಗ್ಗಹಿತಸಞ್ಞೀ ಚ, ಲಹುಕೋ ಚ ಹೋತಿ ಪರಿಕ್ಖಾರೋ, ಅತಿರೇಕಮಾಸಕೋ ವಾ ಊನಪಞ್ಚಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ದುಕ್ಕಟಸ್ಸ.

೧೩೦. ಪಞ್ಚಹಿ ಆಕಾರೇಹಿ ಅದಿನ್ನಂ ಆದಿಯನ್ತಸ್ಸ ಆಪತ್ತಿ ದುಕ್ಕಟಸ್ಸ. ನ ಚ ಪರಪರಿಗ್ಗಹಿತಂ ಹೋತಿ, ಪರಪರಿಗ್ಗಹಿತಸಞ್ಞೀ ಚ, ಲಹುಕೋ ಚ ಹೋತಿ ಪರಿಕ್ಖಾರೋ, ಮಾಸಕೋ ವಾ ಊನಮಾಸಕೋ ವಾ, ಥೇಯ್ಯಚಿತ್ತಞ್ಚ ಪಚ್ಚುಪಟ್ಠಿತಂ ಹೋತಿ. ಆಮಸತಿ, ಆಪತ್ತಿ ದುಕ್ಕಟಸ್ಸ. ಫನ್ದಾಪೇತಿ, ಆಪತ್ತಿ ದುಕ್ಕಟಸ್ಸ. ಠಾನಾ ಚಾವೇತಿ, ಆಪತ್ತಿ ದುಕ್ಕಟಸ್ಸ.

೧೩೧. ಅನಾಪತ್ತಿ ಸಸಞ್ಞಿಸ್ಸ, ವಿಸ್ಸಾಸಗ್ಗಾಹೇ, ತಾವಕಾಲಿಕೇ, ಪೇತಪರಿಗ್ಗಹೇ, ತಿರಚ್ಛಾನಗತಪರಿಗ್ಗಹೇ, ಪಂಸುಕೂಲಸಞ್ಞಿಸ್ಸ, ಉಮ್ಮತ್ತಕಸ್ಸ, (ಖಿತ್ತಚಿತ್ತಸ್ಸ ವೇದನಾಟ್ಟಸ್ಸ) [(ಖಿತ್ತಚಿತ್ತಸ್ಸ ವೇದನಾಟ್ಟಸ್ಸ) ಕತ್ಥಚಿ ನತ್ಥಿ] ಆದಿಕಮ್ಮಿಕಸ್ಸಾತಿ.

ಅದಿನ್ನಾದಾನಮ್ಹಿ ಪಠಮಭಾಣವಾರೋ ನಿಟ್ಠಿತೋ.

ವಿನೀತವತ್ಥುಉದ್ದಾನಗಾಥಾ

ರಜಕೇಹಿ ಪಞ್ಚ ಅಕ್ಖಾತಾ, ಚತುರೋ ಅತ್ಥರಣೇಹಿ ಚ;

ಅನ್ಧಕಾರೇನ ವೇ ಪಞ್ಚ, ಪಞ್ಚ ಹಾರಣಕೇನ ಚ.

ನಿರುತ್ತಿಯಾ ಪಞ್ಚ ಅಕ್ಖಾತಾ, ವಾತೇಹಿ ಅಪರೇ ದುವೇ;

ಅಸಮ್ಭಿನ್ನೇ ಕುಸಾಪಾತೋ, ಜನ್ತಗ್ಗೇನ [ಜನ್ತಾಘರೇನ (ಸ್ಯಾ.)] ಸಹಾ ದಸ.

ವಿಘಾಸೇಹಿ ಪಞ್ಚ ಅಕ್ಖಾತಾ, ಪಞ್ಚ ಚೇವ ಅಮೂಲಕಾ;

ದುಬ್ಭಿಕ್ಖೇ ಕುರಮಂಸಞ್ಚ [ಕೂರಮಂಸಞ್ಚ (ಸ್ಯಾ.)], ಪೂವಸಕ್ಖಲಿಮೋದಕಾ.

ಛಪರಿಕ್ಖಾರಥವಿಕಾ, ಭಿಸಿವಂಸಾ ನ ನಿಕ್ಖಮೇ;

ಖಾದನೀಯಞ್ಚ ವಿಸ್ಸಾಸಂ, ಸಸಞ್ಞಾಯಪರೇ ದುವೇ.

ಸತ್ತ ನಾವಹರಾಮಾತಿ, ಸತ್ತ ಚೇವ ಅವಾಹರುಂ;

ಸಙ್ಘಸ್ಸ ಅವಹರುಂ ಸತ್ತ, ಪುಪ್ಫೇಹಿ ಅಪರೇ ದುವೇ.

ತಯೋ ಚ ವುತ್ತವಾದಿನೋ, ಮಣಿ ತೀಣಿ ಅತಿಕ್ಕಮೇ;

ಸೂಕರಾ ಚ ಮಿಗಾ ಮಚ್ಛಾ, ಯಾನಞ್ಚಾಪಿ ಪವತ್ತಯಿ.

ದುವೇ ಪೇಸೀ ದುವೇ ದಾರೂ, ಪಂಸುಕೂಲಂ ದುವೇ ದಕಾ;

ಅನುಪುಬ್ಬವಿಧಾನೇನ, ತದಞ್ಞೋ ನ ಪರಿಪೂರಯಿ.

ಸಾವತ್ಥಿಯಾ ಚತುರೋ ಮುಟ್ಠೀ, ದ್ವೇ ವಿಘಾಸಾ ದುವೇ ತಿಣಾ;

ಸಙ್ಘಸ್ಸ ಭಾಜಯುಂ ಸತ್ತ, ಸತ್ತ ಚೇವ ಅಸ್ಸಾಮಿಕಾ.

ದಾರುದಕಾ ಮತ್ತಿಕಾ ದ್ವೇ ತಿಣಾನಿ;

ಸಙ್ಘಸ್ಸ ಸತ್ತ ಅವಹಾಸಿ ಸೇಯ್ಯಂ;

ಸಸ್ಸಾಮಿಕಂ ನ ಚಾಪಿ ನೀಹರೇಯ್ಯ;

ಹರೇಯ್ಯ ಸಸ್ಸಾಮಿಕಂ ತಾವಕಾಲಿಕಂ.

ಚಮ್ಪಾ ರಾಜಗಹೇ ಚೇವ, ವೇಸಾಲಿಯಾ ಚ ಅಜ್ಜುಕೋ;

ಬಾರಾಣಸೀ ಚ ಕೋಸಮ್ಬೀ, ಸಾಗಲಾ ದಳ್ಹಿಕೇನ ಚಾತಿ.

ವಿನೀತವತ್ಥು

೧೩೨. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ರಜಕತ್ಥರಣಂ ಗನ್ತ್ವಾ ರಜಕಭಣ್ಡಿಕಂ ಅವಹರಿಂಸು. ತೇಸಂ ಕುಕ್ಕುಚ್ಚಂ ಅಹೋಸಿ – ‘‘ಭಗವತಾ ಸಿಕ್ಖಾಪದಂ ಪಞ್ಞತ್ತಂ. ಕಚ್ಚಿ ನು ಖೋ ಮಯಂ ಪಾರಾಜಿಕಂ ಆಪತ್ತಿಂ ಆಪನ್ನಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಆಪತ್ತಿಂ ತುಮ್ಹೇ, ಭಿಕ್ಖವೇ, ಆಪನ್ನಾ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ರಜಕತ್ಥರಣಂ ಗನ್ತ್ವಾ ಮಹಗ್ಘಂ ದುಸ್ಸಂ ಪಸ್ಸಿತ್ವಾ ಥೇಯ್ಯಚಿತ್ತಂ ಉಪ್ಪಾದೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ – ‘‘ಭಗವತಾ ಸಿಕ್ಖಾಪದಂ ಪಞ್ಞತ್ತಂ, ಕಚ್ಚಿ ನು ಖೋ ಅಹಂ ಪಾರಾಜಿಕಂ ಆಪತ್ತಿಂ ಆಪನ್ನೋ’’ತಿ? ಭಗವತೋ ಏತಮತ್ಥಂ ಆರೋಚೇಸಿ. ‘‘ಅನಾಪತ್ತಿ, ಭಿಕ್ಖು, ಚಿತ್ತುಪ್ಪಾದೇ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ರಜಕತ್ಥರಣಂ ಗನ್ತ್ವಾ ಮಹಗ್ಘಂ ದುಸ್ಸಂ ಪಸ್ಸಿತ್ವಾ ಥೇಯ್ಯಚಿತ್ತೋ ಆಮಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ರಜಕತ್ಥರಣಂ ಗನ್ತ್ವಾ ಮಹಗ್ಘಂ ದುಸ್ಸಂ ಪಸ್ಸಿತ್ವಾ ಥೇಯ್ಯಚಿತ್ತೋ ಫನ್ದಾಪೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ರಜಕತ್ಥರಣಂ ಗನ್ತ್ವಾ ಮಹಗ್ಘಂ ದುಸ್ಸಂ ಪಸ್ಸಿತ್ವಾ ಥೇಯ್ಯಚಿತ್ತೋ ಠಾನಾ ಚಾವೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೩೩. ತೇನ ಖೋ ಪನ ಸಮಯೇನ ಅಞ್ಞತರೋ ಪಿಣ್ಡಚಾರಿಕೋ ಭಿಕ್ಖು ಮಹಗ್ಘಂ ಉತ್ತರತ್ಥರಣಂ ಪಸ್ಸಿತ್ವಾ ಥೇಯ್ಯಚಿತ್ತಂ ಉಪ್ಪಾದೇಸಿ…ಪೇ… ಥೇಯ್ಯಚಿತ್ತೋ ಆಮಸಿ…ಪೇ… ಥೇಯ್ಯಚಿತ್ತೋ ಫನ್ದಾಪೇಸಿ…ಪೇ… ಥೇಯ್ಯಚಿತ್ತೋ ಠಾನಾ ಚಾವೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೩೪. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದಿವಾ ಭಣ್ಡಂ ಪಸ್ಸಿತ್ವಾ ನಿಮಿತ್ತಂ ಅಕಾಸಿ – ‘ರತ್ತಿಂ ಅವಹರಿಸ್ಸಾಮೀ’ತಿ. ಸೋ ತಂ ಮಞ್ಞಮಾನೋ ತಂ ಅವಹರಿ…ಪೇ… ತಂ ಮಞ್ಞಮಾನೋ ಅಞ್ಞಂ ಅವಹರಿ…ಪೇ… ಅಞ್ಞಂ ಮಞ್ಞಮಾನೋ ತಂ ಅವಹರಿ…ಪೇ… ಅಞ್ಞಂ ಮಞ್ಞಮಾನೋ ಅಞ್ಞಂ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದಿವಾ ಭಣ್ಡಂ ಪಸ್ಸಿತ್ವಾ ನಿಮಿತ್ತಂ ಅಕಾಸಿ – ‘‘ರತ್ತಿಂ ಅವಹರಿಸ್ಸಾಮೀ’’ತಿ. ಸೋ ತಂ ಮಞ್ಞಮಾನೋ ಅತ್ತನೋ ಭಣ್ಡಂ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಅಞ್ಞಸ್ಸ ಭಣ್ಡಂ ಹರನ್ತೋ ಸೀಸೇ ಭಾರಂ ಥೇಯ್ಯಚಿತ್ತೋ ಆಮಸಿ…ಪೇ… ಥೇಯ್ಯಚಿತ್ತೋ ಫನ್ದಾಪೇಸಿ…ಪೇ… ಥೇಯ್ಯಚಿತ್ತೋ ಖನ್ಧಂ ಓರೋಪೇಸಿ…ಪೇ… ಖನ್ಧೇ ಭಾರಂ ಥೇಯ್ಯಚಿತ್ತೋ ಆಮಸಿ…ಪೇ… ಥೇಯ್ಯಚಿತ್ತೋ ಫನ್ದಾಪೇಸಿ…ಪೇ… ಥೇಯ್ಯಚಿತ್ತೋ ಕಟಿಂ ಓರೋಪೇಸಿ…ಪೇ… ಕಟಿಯಾ ಭಾರಂ ಥೇಯ್ಯಚಿತ್ತೋ ಆಮಸಿ…ಪೇ… ಥೇಯ್ಯಚಿತ್ತೋ ಫನ್ದಾಪೇಸಿ…ಪೇ… ಥೇಯ್ಯಚಿತ್ತೋ ಹತ್ಥೇನ ಅಗ್ಗಹೇಸಿ…ಪೇ… ಹತ್ಥೇ ಭಾರಂ ಥೇಯ್ಯಚಿತ್ತೋ ಭೂಮಿಯಂ ನಿಕ್ಖಿಪಿ…ಪೇ… ಥೇಯ್ಯಚಿತ್ತೋ ಭೂಮಿತೋ ಅಗ್ಗಹೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೩೫. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಅಜ್ಝೋಕಾಸೇ ಚೀವರಂ ಪತ್ಥರಿತ್ವಾ ವಿಹಾರಂ ಪಾವಿಸಿ. ಅಞ್ಞತರೋ ಭಿಕ್ಖು – ‘ಮಾಯಿದಂ ಚೀವರಂ ನಸ್ಸೀ’ತಿ, ಪಟಿಸಾಮೇಸಿ. ಸೋ ನಿಕ್ಖಮಿತ್ವಾ ತಂ ಭಿಕ್ಖುಂ ಪುಚ್ಛಿ – ‘‘ಆವುಸೋ, ಮಯ್ಹಂ ಚೀವರಂ ಕೇನ ಅವಹಟ’’ನ್ತಿ? ಸೋ ಏವಮಾಹ – ‘‘ಮಯಾ ಅವಹಟ’’ನ್ತಿ. ‘‘ಸೋ ತಂ ಆದಿಯಿ, ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ…. ಭಗವತೋ ಏತಮತ್ಥಂ ಆರೋಚೇಸಿ. ‘‘ಕಿಂಚಿತ್ತೋ ತ್ವಂ, ಭಿಕ್ಖೂ’’ತಿ? ‘‘ನಿರುತ್ತಿಪಥೋ ಅಹಂ, ಭಗವಾ’’ತಿ. ‘‘ಅನಾಪತ್ತಿ, ಭಿಕ್ಖು, ನಿರುತ್ತಿಪಥೇ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪೀಠೇ ಚೀವರಂ ನಿಕ್ಖಿಪಿತ್ವಾ. ಪೀಠೇ ನಿಸೀದನಂ ನಿಕ್ಖಿಪಿತ್ವಾ… ಹೇಟ್ಠಾಪೀಠೇ ಪತ್ತಂ ನಿಕ್ಖಿಪಿತ್ವಾ ವಿಹಾರಂ ಪಾವಿಸಿ. ಅಞ್ಞತರೋ ಭಿಕ್ಖು – ‘‘ಮಾಯಂ ಪತ್ತೋ ನಸ್ಸೀ’’ತಿ ಪಟಿಸಾಮೇಸಿ. ಸೋ ನಿಕ್ಖಮಿತ್ವಾ ತಂ ಭಿಕ್ಖುಂ ಪುಚ್ಛಿ – ‘‘ಆವುಸೋ, ಮಯ್ಹಂ ಪತ್ತೋ ಕೇನ ಅವಹಟೋ’’ತಿ? ಸೋ ಏವಮಾಹ – ‘‘ಮಯಾ ಅವಹಟೋ’’ತಿ. ‘‘ಸೋ ತಂ ಆದಿಯಿ, ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ನಿರುತ್ತಿಪಥೇ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ವತಿಯಾ ಚೀವರಂ ಪತ್ಥರಿತ್ವಾ ವಿಹಾರಂ ಪಾವಿಸಿ. ಅಞ್ಞತರಾ ಭಿಕ್ಖುನೀ – ‘ಮಾಯಿದಂ ಚೀವರಂ ನಸ್ಸೀ’ತಿ ಪಟಿಸಾಮೇಸಿ. ಸಾ ನಿಕ್ಖಮಿತ್ವಾ ತಂ ಭಿಕ್ಖುನಿಂ ಪುಚ್ಛಿ – ‘‘ಅಯ್ಯೇ, ಮಯ್ಹಂ ಚೀವರಂ ಕೇನ ಅವಹಟ’’ನ್ತಿ? ಸಾ ಏವಮಾಹ – ‘‘ಮಯಾ ಅವಹಟ’’ನ್ತಿ. ‘‘ಸಾ ತಂ ಆದಿಯಿ, ಅಸ್ಸಮಣೀಸಿ ತ್ವ’’ನ್ತಿ. ತಸ್ಸಾ ಕುಕ್ಕುಚ್ಚಂ ಅಹೋಸಿ. ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಅನಾಪತ್ತಿ, ಭಿಕ್ಖವೇ, ನಿರುತ್ತಿಪಥೇ’’ತಿ.

೧೩೬. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ವಾತಮಣ್ಡಲಿಕಾಯ ಉಕ್ಖಿತ್ತಂ ಸಾಟಕಂ ಪಸ್ಸಿತ್ವಾ ಸಾಮಿಕಾನಂ ದಸ್ಸಾಮೀತಿ, ಅಗ್ಗಹೇಸಿ. ಸಾಮಿಕಾ ತಂ ಭಿಕ್ಖುಂ ಚೋದೇಸುಂ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಕಿಂಚಿತ್ತೋ ತ್ವಂ ಭಿಕ್ಖೂ’’ತಿ? ‘‘ಅಥೇಯ್ಯಚಿತ್ತೋ ಅಹಂ, ಭಗವಾ’’ತಿ. ಅನಾಪತ್ತಿ, ಭಿಕ್ಖು, ಅಥೇಯ್ಯಚಿತ್ತಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ವಾತಮಣ್ಡಲಿಕಾಯ ಉಕ್ಖಿತ್ತಂ ವೇಠನಂ ಪಸ್ಸಿತ್ವಾ ‘ಪುರೇ ಸಾಮಿಕಾ ಪಸ್ಸನ್ತೀ’ತಿ ಥೇಯ್ಯಚಿತ್ತೋ ಅಗ್ಗಹೇಸಿ. ಸಾಮಿಕಾ ತಂ ಭಿಕ್ಖುಂ ಚೋದೇಸುಂ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೩೭. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸುಸಾನಂ ಗನ್ತ್ವಾ ಅಭಿನ್ನೇ ಸರೀರೇ ಪಂಸುಕೂಲಂ ಅಗ್ಗಹೇಸಿ. ತಸ್ಮಿಞ್ಚ ಸರೀರೇ ಪೇತೋ ಅಧಿವತ್ಥೋ ಹೋತಿ. ಅಥ ಖೋ ಸೋ ಪೇತೋ ತಂ ಭಿಕ್ಖುಂ ಏತದವೋಚ – ‘‘ಮಾ, ಭನ್ತೇ, ಮಯ್ಹಂ ಸಾಟಕಂ ಅಗ್ಗಹೇಸೀ’’ತಿ. ಸೋ ಭಿಕ್ಖು ಅನಾದಿಯನ್ತೋ ಅಗಮಾಸಿ. ಅಥ ಖೋ ತಂ ಸರೀರಂ ಉಟ್ಠಹಿತ್ವಾ ತಸ್ಸ ಭಿಕ್ಖುನೋ ಪಿಟ್ಠಿತೋ ಪಿಟ್ಠಿತೋ ಅನುಬನ್ಧಿ. ಅಥ ಖೋ ಸೋ ಭಿಕ್ಖು ವಿಹಾರಂ ಪವಿಸಿತ್ವಾ ದ್ವಾರಂ ಥಕೇಸಿ. ಅಥ ಖೋ ತಂ ಸರೀರಂ ತತ್ಥೇವ ಪರಿಪತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ನ ಚ, ಭಿಕ್ಖವೇ, ಅಭಿನ್ನೇ ಸರೀರೇ ಪಂಸುಕೂಲಂ ಗಹೇತಬ್ಬಂ. ಸೋ ಗಣ್ಹೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೧೩೮. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಙ್ಘಸ್ಸ ಚೀವರೇ ಭಾಜೀಯಮಾನೇ ಥೇಯ್ಯಚಿತ್ತೋ ಕುಸಂ ಸಙ್ಕಾಮೇತ್ವಾ ಚೀವರಂ ಅಗ್ಗಹೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೩೯. ತೇನ ಖೋ ಪನ ಸಮಯೇನ ಆಯಸ್ಮಾ ಆನನ್ದೋ ಜನ್ತಾಘರೇ ಅಞ್ಞತರಸ್ಸ ಭಿಕ್ಖುನೋ ಅನ್ತರವಾಸಕಂ ಅತ್ತನೋ ಮಞ್ಞಮಾನೋ ನಿವಾಸೇಸಿ. ಅಥ ಖೋ ಸೋ ಭಿಕ್ಖು ಆಯಸ್ಮನ್ತಂ ಆನನ್ದಂ ಏತದವೋಚ – ‘‘ಕಿಸ್ಸ ಮೇ ತ್ವಂ, ಆವುಸೋ ಆನನ್ದ, ಅನ್ತರವಾಸಕಂ ನಿವಾಸೇಸೀ’’ತಿ? ‘‘ಸಕಸಞ್ಞೀ ಅಹಂ, ಆವುಸೋ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನಾಪತ್ತಿ, ಭಿಕ್ಖವೇ, ಸಕಸಞ್ಞಿಸ್ಸಾ’’ತಿ.

೧೪೦. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಗಿಜ್ಝಕೂಟಾ ಪಬ್ಬತಾ ಓರೋಹನ್ತಾ ಸೀಹವಿಘಾಸಂ ಪಸ್ಸಿತ್ವಾ ಪಚಾಪೇತ್ವಾ ಪರಿಭುಞ್ಜಿಂಸು. ತೇಸಂ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖವೇ, ಸೀಹವಿಘಾಸೇ’’ತಿ.

ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಗಿಜ್ಝಕೂಟಾ ಪಬ್ಬತಾ ಓರೋಹನ್ತಾ ಬ್ಯಗ್ಘವಿಘಾಸಂ ಪಸ್ಸಿತ್ವಾ… ದೀಪಿವಿಘಾಸಂ ಪಸ್ಸಿತ್ವಾ… ತರಚ್ಛವಿಘಾಸಂ ಪಸ್ಸಿತ್ವಾ… ಕೋಕವಿಘಾಸಂ ಪಸ್ಸಿತ್ವಾ ಪಚಾಪೇತ್ವಾ ಪರಿಭುಞ್ಜಿಂಸು. ತೇಸಂ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖವೇ, ತಿರಚ್ಛಾನಗತಪರಿಗ್ಗಹೇ’’ತಿ.

೧೪೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಙ್ಘಸ್ಸ ಓದನೇ ಭಾಜೀಯಮಾನೇ – ‘ಅಪರಸ್ಸ ಭಾಗಂ ದೇಹೀ’ತಿ ಅಮೂಲಕಂ ಅಗ್ಗಹೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ಆಪತ್ತಿ ಸಮ್ಪಜಾನಮುಸಾವಾದೇ ಪಾಚಿತ್ತಿಯಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಙ್ಘಸ್ಸ ಖಾದನೀಯೇ ಭಾಜಿಯಮಾನೇ… ಸಙ್ಘಸ್ಸ ಪೂವೇ ಭಾಜಿಯಮಾನೇ… ಸಙ್ಘಸ್ಸ ಉಚ್ಛುಮ್ಹಿ ಭಾಜಿಯಮಾನೇ… ಸಙ್ಘಸ್ಸ ತಿಮ್ಬರೂಸಕೇ ಭಾಜಿಯಮಾನೇ – ‘ಅಪರಸ್ಸ ಭಾಗಂ ದೇಹೀ’ತಿ ಅಮೂಲಕಂ ಅಗ್ಗಹೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ…. ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ಆಪತ್ತಿ ಸಮ್ಪಜಾನಮುಸಾವಾದೇ ಪಾಚಿತ್ತಿಯಸ್ಸಾ’’ತಿ.

೧೪೨. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದುಬ್ಭಿಕ್ಖೇ ಓದನೀಯಘರಂ ಪವಿಸಿತ್ವಾ ಪತ್ತಪೂರಂ ಓದನಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದುಬ್ಭಿಕ್ಖೇ ಸೂನಘರಂ [ಸೂನಾಘರಂ (ಸೀ. ಸ್ಯಾ)] ಪವಿಸಿತ್ವಾ ಪತ್ತಪೂರಂ ಮಂಸಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದುಬ್ಭಿಕ್ಖೇ ಪೂವಘರಂ ಪವಿಸಿತ್ವಾ ಪತ್ತಪೂರಂ ಪೂವಂ ಥೇಯ್ಯಚಿತ್ತೋ ಅವಹರಿ…ಪೇ… ಪತ್ತಪೂರಾ ಸಕ್ಖಲಿಯೋ ಥೇಯ್ಯಚಿತ್ತೋ ಅವಹರಿ…ಪೇ… ಪತ್ತಪೂರೇ ಮೋದಕೇ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೪೩. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದಿವಾ ಪರಿಕ್ಖಾರಂ ಪಸ್ಸಿತ್ವಾ ನಿಮಿತ್ತಂ ಅಕಾಸಿ – ‘‘ರತ್ತಿಂ ಅವಹರಿಸ್ಸಾಮೀ’’ತಿ. ಸೋ ತಂ ಮಞ್ಞಮಾನೋ ತಂ ಅವಹರಿ…ಪೇ… ತಂ ಮಞ್ಞಮಾನೋ ಅಞ್ಞಂ ಅವಹರಿ…ಪೇ… ಅಞ್ಞಂ ಮಞ್ಞಮಾನೋ ತಂ ಅವಹರಿ…ಪೇ… ಅಞ್ಞಂ ಮಞ್ಞಮಾನೋ ಅಞ್ಞಂ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ದಿವಾ ಪರಿಕ್ಖಾರಂ ಪಸ್ಸಿತ್ವಾ ನಿಮಿತ್ತಂ ಅಕಾಸಿ – ‘‘ರತ್ತಿಂ ಅವಹರಿಸ್ಸಾಮೀ’’ತಿ. ಸೋ ತಂ ಮಞ್ಞಮಾನೋ ಅತ್ತನೋ ಪರಿಕ್ಖಾರಂ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ಆಪತ್ತಿ ದುಕ್ಕಟಸ್ಸಾ’’ತಿ.

೧೪೪. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪೀಠೇ ಥವಿಕಂ ಪಸ್ಸಿತ್ವಾ – ‘‘ಇತೋ ಗಣ್ಹನ್ತೋ ಪಾರಾಜಿಕೋ ಭವಿಸ್ಸಾಮೀ’’ತಿ ಸಹ ಪೀಠಕೇನ ಸಙ್ಕಾಮೇತ್ವಾ ಅಗ್ಗಹೇಸಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಙ್ಘಸ್ಸ ಭಿಸಿಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೪೫. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಚೀವರವಂಸೇ ಚೀವರಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ವಿಹಾರೇ ಚೀವರಂ ಅವಹರಿತ್ವಾ – ‘‘ಇತೋ ನಿಕ್ಖಮನ್ತೋ ಪಾರಾಜಿಕೋ ಭವಿಸ್ಸಾಮೀ’’ತಿ ವಿಹಾರಾ ನ ನಿಕ್ಖಮಿ…ಪೇ… ಭಗವತೋ ಏತಮತ್ಥಂ ಆರೋಚೇಸುಂ. ‘‘ನಿಕ್ಖಮಿ [ನಿಕ್ಖಮೇಯ್ಯ (ಸೀ. ಸ್ಯಾ.)] ವಾ ಸೋ, ಭಿಕ್ಖವೇ, ಮೋಘಪುರಿಸೋ ನ ವಾ ನಿಕ್ಖಮಿ [ನಿಕ್ಖಮೇಯ್ಯ (ಸೀ. ಸ್ಯಾ.)], ಆಪತ್ತಿ ಪಾರಾಜಿಕಸ್ಸಾ’’ತಿ.

೧೪೬. ತೇನ ಖೋ ಪನ ಸಮಯೇನ ದ್ವೇ ಭಿಕ್ಖೂ ಸಹಾಯಕಾ ಹೋನ್ತಿ. ಏಕೋ ಭಿಕ್ಖು ಗಾಮಂ ಪಿಣ್ಡಾಯ ಪಾವಿಸಿ. ದುತಿಯೋ ಭಿಕ್ಖು ಸಙ್ಘಸ್ಸ ಖಾದನೀಯೇ ಭಾಜೀಯಮಾನೇ ಸಹಾಯಕಸ್ಸ ಭಾಗಂ ಗಹೇತ್ವಾ ತಸ್ಸ ವಿಸ್ಸಸನ್ತೋ ಪರಿಭುಞ್ಜಿ. ಸೋ ಜಾನಿತ್ವಾ ತಂ ಚೋದೇಸಿ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಕಿಂ ಚಿತ್ತೋ ತ್ವಂ, ಭಿಕ್ಖೂ’’ತಿ? ‘‘ವಿಸ್ಸಾಸಗ್ಗಾಹೋ ಅಹಂ, ಭಗವಾ’’ತಿ. ‘‘ಅನಾಪತ್ತಿ, ಭಿಕ್ಖು, ವಿಸ್ಸಾಸಗ್ಗಾಹೇ’’ತಿ.

೧೪೭. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಚೀವರಕಮ್ಮಂ ಕರೋನ್ತಿ. ಸಙ್ಘಸ್ಸ ಖಾದನೀಯೇ ಭಾಜೀಯಮಾನೇ ಸಬ್ಬೇಸಂ ಪಟಿವಿಸಾ ಆಹರಿತ್ವಾ ಉಪನಿಕ್ಖಿತ್ತಾ ಹೋನ್ತಿ. ಅಞ್ಞತರೋ ಭಿಕ್ಖು ಅಞ್ಞತರಸ್ಸ ಭಿಕ್ಖುನೋ ಪಟಿವಿಸಂ ಅತ್ತನೋ ಮಞ್ಞಮಾನೋ ಪರಿಭುಞ್ಜಿ. ಸೋ ಜಾನಿತ್ವಾ ತಂ ಚೋದೇಸಿ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಕಿಂಚಿತ್ತೋ ತ್ವಂ, ಭಿಕ್ಖೂ’’ತಿ? ‘‘ಸಕಸಞ್ಞೀ ಅಹಂ, ಭಗವಾ’’ತಿ. ‘‘ಅನಾಪತ್ತಿ, ಭಿಕ್ಖು, ಸಕಸಞ್ಞಿಸ್ಸಾ’’ತಿ.

ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಚೀವರಕಮ್ಮಂ ಕರೋನ್ತಿ. ಸಙ್ಘಸ್ಸ ಖಾದನೀಯೇ ಭಾಜಿಯಮಾನೇ ಅಞ್ಞತರಸ್ಸ ಭಿಕ್ಖುನೋ ಪತ್ತೇನ ಅಞ್ಞತರಸ್ಸ ಭಿಕ್ಖುನೋ ಪಟಿವಿಸೋ ಆಹರಿತ್ವಾ ಉಪನಿಕ್ಖಿತ್ತೋ ಹೋತಿ. ಪತ್ತಸಾಮಿಕೋ ಭಿಕ್ಖು ಅತ್ತನೋ ಮಞ್ಞಮಾನೋ ಪರಿಭುಞ್ಜಿ. ಸೋ ಜಾನಿತ್ವಾ ತಂ ಚೋದೇಸಿ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಸಕಸಞ್ಞಿಸ್ಸಾ’’ತಿ.

೧೪೮. ತೇನ ಖೋ ಪನ ಸಮಯೇನ ಅಮ್ಬಚೋರಕಾ ಅಮ್ಬಂ ಪಾತೇತ್ವಾ ಭಣ್ಡಿಕಂ ಆದಾಯ ಅಗಮಂಸು. ಸಾಮಿಕಾ ತೇ ಚೋರಕೇ ಅನುಬನ್ಧಿಂಸು. ಚೋರಕಾ ಸಾಮಿಕೇ ಪಸ್ಸಿತ್ವಾ ಭಣ್ಡಿಕಂ ಪಾತೇತ್ವಾ ಪಲಾಯಿಂಸು. ಭಿಕ್ಖೂ ಪಂಸುಕೂಲಸಞ್ಞಿನೋ ಪಟಿಗ್ಗಹಾಪೇತ್ವಾ ಪರಿಭುಞ್ಜಿಂಸು. ಸಾಮಿಕಾ ತೇ ಭಿಕ್ಖೂ ಚೋದೇಸುಂ – ‘‘ಅಸ್ಸಮಣಾತ್ಥ ತುಮ್ಹೇ’’ತಿ. ತೇಸಂ ಕುಕ್ಕುಚ್ಚಂ ಅಹೋಸಿ…ಪೇ… ಭಗವತೋ ಏತಮತ್ಥಂ ಆರೋಚೇಸುಂ. ‘‘ಕಿಂಚಿತ್ತಾ ತುಮ್ಹೇ, ಭಿಕ್ಖವೇ’’ತಿ? ‘‘ಪಂಸುಕೂಲಸಞ್ಞಿನೋ ಮಯಂ, ಭಗವಾ’’ತಿ. ‘‘ಅನಾಪತ್ತಿ, ಭಿಕ್ಖವೇ, ಪಂಸುಕೂಲಸಞ್ಞಿಸ್ಸಾ’’ತಿ.

ತೇನ ಖೋ ಪನ ಸಮಯೇನ ಜಮ್ಬುಚೋರಕಾ… ಲಬುಜಚೋರಕಾ… ಪನಸಚೋರಕಾ… ತಾಲಪಕ್ಕಚೋರಕಾ… ಉಚ್ಛುಚೋರಕಾ… ತಿಮ್ಬರೂಸಕಚೋರಕಾ ತಿಮ್ಬರೂಸಕೇ ಉಚ್ಚಿನಿತ್ವಾ ಭಣ್ಡಿಕಂ ಆದಾಯ ಅಗಮಂಸು. ಸಾಮಿಕಾ ತೇ ಚೋರಕೇ ಅನುಬನ್ಧಿಂಸು. ಚೋರಕಾ ಸಾಮಿಕೇ ಪಸ್ಸಿತ್ವಾ ಭಣ್ಡಿಕಂ ಪಾತೇತ್ವಾ ಪಲಾಯಿಂಸು. ಭಿಕ್ಖೂ ಪಂಸುಕೂಲಸಞ್ಞಿನೋ ಪಟಿಗ್ಗಹಾಪೇತ್ವಾ ಪರಿಭುಞ್ಜಿಂಸು. ಸಾಮಿಕಾ ತೇ ಭಿಕ್ಖೂ ಚೋದೇಸುಂ – ‘‘ಅಸ್ಸಮಣಾತ್ಥ ತುಮ್ಹೇ’’ತಿ. ತೇಸಂ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖವೇ, ಪಂಸುಕೂಲಸಞ್ಞಿಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಮ್ಬಚೋರಕಾ ಅಮ್ಬಂ ಪಾತೇತ್ವಾ ಭಣ್ಡಿಕಂ ಆದಾಯ ಅಗಮಂಸು. ಸಾಮಿಕಾ ತೇ ಚೋರಕೇ ಅನುಬನ್ಧಿಂಸು. ಚೋರಕಾ ಸಾಮಿಕೇ ಪಸ್ಸಿತ್ವಾ ಭಣ್ಡಿಕಂ ಪಾತೇತ್ವಾ ಪಲಾಯಿಂಸು. ಭಿಕ್ಖೂ – ‘ಪುರೇ ಸಾಮಿಕಾ ಪಸ್ಸನ್ತೀ’ತಿ, ಥೇಯ್ಯಚಿತ್ತಾ ಪರಿಭುಞ್ಜಿಂಸು. ಸಾಮಿಕಾ ತೇ ಭಿಕ್ಖೂ ಚೋದೇಸುಂ – ‘‘ಅಸ್ಸಮಣಾತ್ಥ ತುಮ್ಹೇ’’ತಿ. ತೇಸಂ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತುಮ್ಹೇ, ಭಿಕ್ಖವೇ, ಆಪನ್ನಾ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಜಮ್ಬುಚೋರಕಾ… ಲಬುಜಚೋರಕಾ… ಪನಸಚೋರಕಾ… ತಾಲಪಕ್ಕಚೋರಕಾ… ಉಚ್ಛುಚೋರಕಾ… ತಿಮ್ಬರೂಸಕಚೋರಕಾ ತಿಮ್ಬರೂಸಕೇ ಉಚ್ಚಿನಿತ್ವಾ ಭಣ್ಡಿಕಂ ಆದಾಯ ಅಗಮಂಸು. ಸಾಮಿಕಾ ತೇ ಚೋರಕೇ ಅನುಬನ್ಧಿಂಸು. ಚೋರಕಾ ಸಾಮಿಕೇ ಪಸ್ಸಿತ್ವಾ ಭಣ್ಡಿಕಂ ಪಾತೇತ್ವಾ ಪಲಾಯಿಂಸು. ಭಿಕ್ಖೂ – ‘ಪುರೇ ಸಾಮಿಕಾ ಪಸ್ಸನ್ತೀ’ತಿ, ಥೇಯ್ಯಚಿತ್ತಾ ಪರಿಭುಞ್ಜಿಂಸು. ಸಾಮಿಕಾ ತೇ ಭಿಕ್ಖೂ ಚೋದೇಸುಂ – ‘‘ಅಸ್ಸಮಣಾತ್ಥ ತುಮ್ಹೇ’’ತಿ. ತೇಸಂ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತುಮ್ಹೇ, ಭಿಕ್ಖವೇ, ಆಪನ್ನಾ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಙ್ಘಸ್ಸ ಅಮ್ಬಂ ಥೇಯ್ಯಚಿತ್ತೋ ಅವಹರಿ… ಸಙ್ಘಸ್ಸ ಜಮ್ಬುಂ… ಸಙ್ಘಸ್ಸ ಲಬುಜಂ… ಸಙ್ಘಸ್ಸ ಪನಸಂ… ಸಙ್ಘಸ್ಸ ತಾಲಪಕ್ಕಂ… ಸಙ್ಘಸ್ಸ ಉಚ್ಛುಂ… ಸಙ್ಘಸ್ಸ ತಿಮ್ಬರೂಸಕಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

೧೪೯. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪುಪ್ಫಾರಾಮಂ ಗನ್ತ್ವಾ ಓಚಿತಂ ಪುಪ್ಫಂ ಪಞ್ಚಮಾಸಗ್ಘನಕಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು, ಆಪನ್ನೋ ಪಾರಾಜಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪುಪ್ಫಾರಾಮಂ ಗನ್ತ್ವಾ ಪುಪ್ಫಂ ಓಚಿನಿತ್ವಾ ಪಞ್ಚಮಾಸಗ್ಘನಕಂ ಥೇಯ್ಯಚಿತ್ತೋ ಅವಹರಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಆಪತ್ತಿಂ ತ್ವಂ, ಭಿಕ್ಖು ಆಪನ್ನೋ ಪಾರಾಜಿಕ’’ನ್ತಿ.

೧೫೦. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಾಮಕಂ ಗಚ್ಛನ್ತೋ ಅಞ್ಞತರಂ ಭಿಕ್ಖುಂ ಏತದವೋಚ – ‘‘ಆವುಸೋ, ತುಯ್ಹಂ ಉಪಟ್ಠಾಕಕುಲಂ ವುತ್ತೋ ವಜ್ಜೇಮೀ’’ತಿ. ಸೋ ಗನ್ತ್ವಾ ಏಕಂ ಸಾಟಕಂ ಆಹರಾಪೇತ್ವಾ ಅತ್ತನಾ ಪರಿಭುಞ್ಜಿ. ಸೋ ಜಾನಿತ್ವಾ ತಂ ಚೋದೇಸಿ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ನ ಚ, ಭಿಕ್ಖವೇ, ವುತ್ತೋ ವಜ್ಜೇಮೀತಿ ವತ್ತಬ್ಬೋ. ಯೋ ವದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಾಮಕಂ ಗಚ್ಛತಿ. ಅಞ್ಞತರೋ ಭಿಕ್ಖು ತಂ ಭಿಕ್ಖುಂ ಏತದವೋಚ – ‘‘ಆವುಸೋ, ಮಯ್ಹಂ ಉಪಟ್ಠಾಕಕುಲಂ ವುತ್ತೋ ವಜ್ಜೇಹೀ’’ತಿ. ಸೋ ಗನ್ತ್ವಾ ಯುಗಸಾಟಕಂ ಆಹರಾಪೇತ್ವಾ ಏಕಂ ಅತ್ತನಾ ಪರಿಭುಞ್ಜಿ, ಏಕಂ ತಸ್ಸ ಭಿಕ್ಖುನೋ ಅದಾಸಿ. ಸೋ ಜಾನಿತ್ವಾ ತಂ ಚೋದೇಸಿ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ನ ಚ, ಭಿಕ್ಖವೇ, ವುತ್ತೋ ವಜ್ಜೇಹೀತಿ ವತ್ತಬ್ಬೋ. ಯೋ ವದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಾಮಕಂ ಗಚ್ಛನ್ತೋ ಅಞ್ಞತರಂ ಭಿಕ್ಖುಂ ಏತದವೋಚ – ‘‘ಆವುಸೋ, ತುಯ್ಹಂ ಉಪಟ್ಠಾಕಕುಲಂ ವುತ್ತೋ ವಜ್ಜೇಮೀ’’ತಿ. ಸೋಪಿ ಏವಮಾಹ – ‘‘ವುತ್ತೋ ವಜ್ಜೇಹೀ’’ತಿ. ಸೋ ಗನ್ತ್ವಾ ಆಳ್ಹಕಂ ಸಪ್ಪಿಂ ತುಲಂ ಗುಳಂ ದೋಣಂ ತಣ್ಡುಲಂ ಆಹರಾಪೇತ್ವಾ ಅತ್ತನಾ ಪರಿಭುಞ್ಜಿ. ಸೋ ಜಾನಿತ್ವಾ ತಂ ಚೋದೇಸಿ – ‘‘ಅಸ್ಸಮಣೋಸಿ ತ್ವ’’ನ್ತಿ. ತಸ್ಸ ಕುಕ್ಕುಚ್ಚಂ ಅಹೋಸಿ…ಪೇ… ‘‘ಅನಾಪತ್ತಿ, ಭಿಕ್ಖು, ಪಾರಾಜಿಕಸ್ಸ. ನ ಚ, ಭಿಕ್ಖವೇ, ವುತ್ತೋ ವಜ್ಜೇಮೀತಿ ವತ್ತಬ್ಬೋ, ನ ಚ ವುತ್ತೋ ವಜ್ಜೇಹೀತಿ ವತ್ತಬ್ಬೋ. ಯೋ ವದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.