೪. ಚತುತ್ಥಸಿಕ್ಖಾಪದಂ

೮೫೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ ನಿಕಣ್ಣಿಕಮ್ಪಿ ಜಪ್ಪೇತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ ನಿಕಣ್ಣಿಕಮ್ಪಿ ಜಪ್ಪಿಸ್ಸತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ ನಿಕಣ್ಣಿಕಮ್ಪಿ ಜಪ್ಪೇತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ ನಿಕಣ್ಣಿಕಮ್ಪಿ ಜಪ್ಪಿಸ್ಸತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೫೧. ‘‘ಯಾ ಪನ ಭಿಕ್ಖುನೀ ರಥಿಕಾಯ ವಾ ಬ್ಯೂಹೇ ವಾ ಸಿಙ್ಘಾಟಕೇ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ ನಿಕಣ್ಣಿಕಂ ವಾ ಜಪ್ಪೇಯ್ಯ ದುತಿಯಿಕಂ ವಾ ಭಿಕ್ಖುನಿಂ ಉಯ್ಯೋಜೇಯ್ಯ, ಪಾಚಿತ್ತಿಯ’’ನ್ತಿ.

೮೫೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ರಥಿಕಾ ನಾಮ ರಚ್ಛಾ ವುಚ್ಚತಿ. ಬ್ಯೂಹಂ ನಾಮ ಯೇನೇವ ಪವಿಸನ್ತಿ ತೇನೇವ ನಿಕ್ಖಮನ್ತಿ. ಸಿಙ್ಘಾಟಕೋ ನಾಮ ಚಚ್ಚರಂ ವುಚ್ಚತಿ.

ಪುರಿಸೋ ನಾಮ ಮನುಸ್ಸಪುರಿಸೋ ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ ವಿಞ್ಞೂ ಪಟಿಬಲೋ ಸನ್ತಿಟ್ಠಿತುಂ ಸಲ್ಲಪಿತುಂ.

ಸದ್ಧಿನ್ತಿ ಏಕತೋ. ಏಕೇನೇಕಾತಿ ಪುರಿಸೋ ಚೇವ ಹೋತಿ ಭಿಕ್ಖುನೀ ಚ.

ಸನ್ತಿಟ್ಠೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಸಲ್ಲಪೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಪಾಚಿತ್ತಿಯಸ್ಸ.

ನಿಕಣ್ಣಿಕಂ ವಾ ಜಪ್ಪೇಯ್ಯಾತಿ ಪುರಿಸಸ್ಸ ಉಪಕಣ್ಣಕೇ ಆರೋಚೇತಿ, ಆಪತ್ತಿ ಪಾಚಿತ್ತಿಯಸ್ಸ.

ದುತಿಯಿಕಂ ವಾ ಭಿಕ್ಖುನಿಂ ಉಯ್ಯೋಜೇಯ್ಯಾತಿ ಅನಾಚಾರಂ ಆಚರಿತುಕಾಮಾ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇತಿ, ಆಪತ್ತಿ ದುಕ್ಕಟಸ್ಸ. ದಸ್ಸನೂಪಚಾರಂ ವಾ ಸವನೂಪಚಾರಂ ವಾ ವಿಜಹನ್ತಿಯಾ ಆಪತ್ತಿ ದುಕ್ಕಟಸ್ಸ. ವಿಜಹಿತೇ ಆಪತ್ತಿ ಪಾಚಿತ್ತಿಯಸ್ಸ.

ಹತ್ಥಪಾಸಂ ವಿಜಹಿತ್ವಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ ಆಪತ್ತಿ ದುಕ್ಕಟಸ್ಸ. ಯಕ್ಖೇನ ವಾ ಪೇತೇನ ವಾ ಪಣ್ಡಕೇನ ವಾ ತಿರಚ್ಛಾನಗತಮನುಸ್ಸವಿಗ್ಗಹೇನ ವಾ ಸದ್ಧಿಂ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ.

೮೫೩. ಅನಾಪತ್ತಿ ಯೋ ಕೋಚಿ ವಿಞ್ಞೂ ದುತಿಯೋ ಹೋತಿ, ಅರಹೋಪೇಕ್ಖಾ, ಅಞ್ಞವಿಹಿತಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ನ ಅನಾಚಾರಂ ಆಚರಿತುಕಾಮಾ, ಸತಿ ಕರಣೀಯೇ ದುತಿಯಿಕಂ ಭಿಕ್ಖುನಿಂ ಉಯ್ಯೋಜೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.