೨. ಅನ್ಧಕಾರವಗ್ಗೋ

೧. ಪಠಮಸಿಕ್ಖಾಪದಂ

೮೩೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭದ್ದಾಯ ಕಾಪಿಲಾನಿಯಾ ಅನ್ತೇವಾಸಿನಿಯಾ ಭಿಕ್ಖುನಿಯಾ ಞಾತಕೋ ಪುರಿಸೋ ಗಾಮಕಾ ಸಾವತ್ಥಿಂ ಅಗಮಾಸಿ ಕೇನಚಿದೇವ ಕರಣೀಯೇನ. ಅಥ ಖೋ ಸಾ ಭಿಕ್ಖುನೀ ತೇನ ಪುರಿಸೇನ ಸದ್ಧಿಂ ರತ್ತನ್ಧಕಾರೇ ಅಪ್ಪದೀಪೇ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೩೯. ‘‘ಯಾ ಪನ ಭಿಕ್ಖುನೀ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೪೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ರತ್ತನ್ಧಕಾರೇತಿ ಓಗ್ಗತೇ ಸೂರಿಯೇ. ಅಪ್ಪದೀಪೇತಿ ಅನಾಲೋಕೇ.

ಪುರಿಸೋ ನಾಮ ಮನುಸ್ಸಪುರಿಸೋ ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ ವಿಞ್ಞೂ ಪಟಿಬಲೋ ಸನ್ತಿಟ್ಠಿತುಂ ಸಲ್ಲಪಿತುಂ.

ಸದ್ಧಿನ್ತಿ ಏಕತೋ. ಏಕೇನೇಕಾತಿ ಪುರಿಸೋ ಚೇವ ಹೋತಿ ಭಿಕ್ಖುನೀ ಚ.

ಸನ್ತಿಟ್ಠೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಸಲ್ಲಪೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಪಾಚಿತ್ತಿಯಸ್ಸ.

ಹತ್ಥಪಾಸಂ ವಿಜಹಿತ್ವಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ. ಯಕ್ಖೇನ ವಾ ಪೇತೇನ ವಾ ಪಣ್ಡಕೇನ ವಾ ತಿರಚ್ಛಾನಗತಮನುಸ್ಸವಿಗ್ಗಹೇನ ವಾ ಸದ್ಧಿಂ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ.

೮೪೧. ಅನಾಪತ್ತಿ ಯೋ ಕೋಚಿ ವಿಞ್ಞೂ ದುತಿಯೋ [ಯಾ ಕಾಚಿ ವಿಞ್ಞೂ ದುತಿಯಾ (ಸ್ಯಾ.)] ಹೋತಿ, ಅರಹೋಪೇಕ್ಖಾ, ಅಞ್ಞವಿಹಿತಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಠಮಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಿಕ್ಖಾಪದಂ

೮೪೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭದ್ದಾಯ ಕಾಪಿಲಾನಿಯಾ ಅನ್ತೇವಾಸಿನಿಯಾ ಭಿಕ್ಖುನಿಯಾ ಞಾತಕೋ ಪುರಿಸೋ ಗಾಮಕಾ ಸಾವತ್ಥಿಂ ಅಗಮಾಸಿ ಕೇನಚಿದೇವ ಕರಣೀಯೇನ. ಅಥ ಖೋ ಸಾ ಭಿಕ್ಖುನೀ – ‘‘ಭಗವತಾ ಪಟಿಕ್ಖಿತ್ತಂ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿತುಂ ಸಲ್ಲಪಿತು’’ನ್ತಿ ತೇನೇವ ಪುರಿಸೇನ ಸದ್ಧಿಂ ಪಟಿಚ್ಛನ್ನೇ ಓಕಾಸೇ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೪೩. ‘‘ಯಾ ಪನ ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೪೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಪಟಿಚ್ಛನ್ನೋ ನಾಮ ಓಕಾಸೋ ಕುಟ್ಟೇನ ವಾ ಕವಾಟೇನ ವಾ ಕಿಲಞ್ಜೇನ ವಾ ಸಾಣಿಪಾಕಾರೇನ ವಾ ರುಕ್ಖೇನ ವಾ ಥಮ್ಭೇನ ವಾ ಕೋತ್ಥಳಿಯಾ ವಾ ಯೇನ ಕೇನಚಿ ಪಟಿಚ್ಛನ್ನೋ ಹೋತಿ.

ಸದ್ಧಿನ್ತಿ ಏಕತೋ. ಏಕೇನೇಕಾತಿ ಪುರಿಸೋ ಚೇವ ಹೋತಿ ಭಿಕ್ಖುನೀ ಚ.

ಸನ್ತಿಟ್ಠೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಸಲ್ಲಪೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಪಾಚಿತ್ತಿಯಸ್ಸ.

೮೪೫. ಅನಾಪತ್ತಿ ಯೋ ಕೋಚಿ ವಿಞ್ಞೂ ದುತಿಯೋ ಹೋತಿ, ಅರಹೋಪೇಕ್ಖಾ, ಅಞ್ಞವಿಹಿತಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.

೩. ತತಿಯಸಿಕ್ಖಾಪದಂ

೮೪೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭದ್ದಾಯ ಕಾಪಿಲಾನಿಯಾ ಅನ್ತೇವಾಸಿನಿಯಾ ಭಿಕ್ಖುನಿಯಾ ಞಾತಕೋ ಪುರಿಸೋ ಗಾಮಕಾ ಸಾವತ್ಥಿಂ ಅಗಮಾಸಿ ಕೇನಚಿದೇವ ಕರಣೀಯೇನ. ಅಥ ಖೋ ಸಾ ಭಿಕ್ಖುನೀ – ‘‘ಭಗವತಾ ಪಟಿಕ್ಖಿತ್ತಂ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿತುಂ ಸಲ್ಲಪಿತು’’ನ್ತಿ ತೇನೇವ ಪುರಿಸೇನ ಸದ್ಧಿಂ ಅಜ್ಝೋಕಾಸೇ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಅಜ್ಝೋಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಅಜ್ಝೋಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಅಜ್ಝೋಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೪೭. ‘‘ಯಾ ಪನ ಭಿಕ್ಖುನೀ ಅಜ್ಝೋಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೪೮. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅಜ್ಝೋಕಾಸೋ ನಾಮ ಅಪ್ಪಟಿಚ್ಛನ್ನೋ ಹೋತಿ ಕುಟ್ಟೇನ ವಾ ಕವಾಟೇನ ವಾ ಕಿಲಞ್ಜೇನ ವಾ ಸಾಣಿಪಾಕಾರೇನ ವಾ ರುಕ್ಖೇನ ವಾ ಥಮ್ಭೇನ ವಾ ಕೋತ್ಥಳಿಯಾ ವಾ, ಯೇನ ಕೇನಚಿ ಅಪ್ಪಟಿಚ್ಛನ್ನೋ ಹೋತಿ.

ಪುರಿಸೋ ನಾಮ ಮನುಸ್ಸಪುರಿಸೋ, ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ, ವಿಞ್ಞೂ ಪಟಿಬಲೋ ಸನ್ತಿಟ್ಠಿತುಂ ಸಲ್ಲಪಿತುಂ.

ಸದ್ಧಿನ್ತಿ ಏಕತೋ. ಏಕೇನೇಕಾತಿ ಪುರಿಸೋ ಚೇವ ಹೋತಿ ಭಿಕ್ಖುನೀ ಚ.

ಸನ್ತಿಟ್ಠೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಸಲ್ಲಪೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಪಾಚಿತ್ತಿಯಸ್ಸ.

ಹತ್ಥಪಾಸಂ ವಿಜಹಿತ್ವಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ. ಯಕ್ಖೇನ ವಾ ಪೇತೇನ ವಾ ಪಣ್ಡಕೇನ ವಾ ತಿರಚ್ಛಾಗತಮನುಸ್ಸವಿಗ್ಗಹೇನ ವಾ ಸದ್ಧಿಂ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ.

೮೪೯. ಅನಾಪತ್ತಿ ಯೋ ಕೋಚಿ ವಿಞ್ಞೂ ದುತಿಯೋ ಹೋತಿ, ಅರಹೋಪೇಕ್ಖಾ, ಅಞ್ಞವಿಹಿತಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತತಿಯಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಸಿಕ್ಖಾಪದಂ

೮೫೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ ನಿಕಣ್ಣಿಕಮ್ಪಿ ಜಪ್ಪೇತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ ನಿಕಣ್ಣಿಕಮ್ಪಿ ಜಪ್ಪಿಸ್ಸತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ ನಿಕಣ್ಣಿಕಮ್ಪಿ ಜಪ್ಪೇತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ರಥಿಕಾಯಪಿ ಬ್ಯೂಹೇಪಿ ಸಿಙ್ಘಾಟಕೇಪಿ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ ನಿಕಣ್ಣಿಕಮ್ಪಿ ಜಪ್ಪಿಸ್ಸತಿ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೫೧. ‘‘ಯಾ ಪನ ಭಿಕ್ಖುನೀ ರಥಿಕಾಯ ವಾ ಬ್ಯೂಹೇ ವಾ ಸಿಙ್ಘಾಟಕೇ ವಾ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ ನಿಕಣ್ಣಿಕಂ ವಾ ಜಪ್ಪೇಯ್ಯ ದುತಿಯಿಕಂ ವಾ ಭಿಕ್ಖುನಿಂ ಉಯ್ಯೋಜೇಯ್ಯ, ಪಾಚಿತ್ತಿಯ’’ನ್ತಿ.

೮೫೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ರಥಿಕಾ ನಾಮ ರಚ್ಛಾ ವುಚ್ಚತಿ. ಬ್ಯೂಹಂ ನಾಮ ಯೇನೇವ ಪವಿಸನ್ತಿ ತೇನೇವ ನಿಕ್ಖಮನ್ತಿ. ಸಿಙ್ಘಾಟಕೋ ನಾಮ ಚಚ್ಚರಂ ವುಚ್ಚತಿ.

ಸದ್ಧಿನ್ತಿ ಏಕತೋ. ಏಕೇನೇಕಾತಿ ಪುರಿಸೋ ಚೇವ ಹೋತಿ ಭಿಕ್ಖುನೀ ಚ.

ಸನ್ತಿಟ್ಠೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಸಲ್ಲಪೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಪಾಚಿತ್ತಿಯಸ್ಸ.

ನಿಕಣ್ಣಿಕಂ ವಾ ಜಪ್ಪೇಯ್ಯಾತಿ ಪುರಿಸಸ್ಸ ಉಪಕಣ್ಣಕೇ ಆರೋಚೇತಿ, ಆಪತ್ತಿ ಪಾಚಿತ್ತಿಯಸ್ಸ.

ದುತಿಯಿಕಂ ವಾ ಭಿಕ್ಖುನಿಂ ಉಯ್ಯೋಜೇಯ್ಯಾತಿ ಅನಾಚಾರಂ ಆಚರಿತುಕಾಮಾ ದುತಿಯಿಕಮ್ಪಿ ಭಿಕ್ಖುನಿಂ ಉಯ್ಯೋಜೇತಿ, ಆಪತ್ತಿ ದುಕ್ಕಟಸ್ಸ. ದಸ್ಸನೂಪಚಾರಂ ವಾ ಸವನೂಪಚಾರಂ ವಾ ವಿಜಹನ್ತಿಯಾ ಆಪತ್ತಿ ದುಕ್ಕಟಸ್ಸ. ವಿಜಹಿತೇ ಆಪತ್ತಿ ಪಾಚಿತ್ತಿಯಸ್ಸ.

ಹತ್ಥಪಾಸಂ ವಿಜಹಿತ್ವಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ ಆಪತ್ತಿ ದುಕ್ಕಟಸ್ಸ. ಯಕ್ಖೇನ ವಾ ಪೇತೇನ ವಾ ಪಣ್ಡಕೇನ ವಾ ತಿರಚ್ಛಾನಗತಮನುಸ್ಸವಿಗ್ಗಹೇನ ವಾ ಸದ್ಧಿಂ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ.

೮೫೩. ಅನಾಪತ್ತಿ ಯೋ ಕೋಚಿ ವಿಞ್ಞೂ ದುತಿಯೋ ಹೋತಿ, ಅರಹೋಪೇಕ್ಖಾ, ಅಞ್ಞವಿಹಿತಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ನ ಅನಾಚಾರಂ ಆಚರಿತುಕಾಮಾ, ಸತಿ ಕರಣೀಯೇ ದುತಿಯಿಕಂ ಭಿಕ್ಖುನಿಂ ಉಯ್ಯೋಜೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.

೫. ಪಞ್ಚಮಸಿಕ್ಖಾಪದಂ

೮೫೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಅಞ್ಞತರಸ್ಸ ಕುಲಸ್ಸ ಕುಲೂಪಿಕಾ ಹೋತಿ ನಿಚ್ಚಭತ್ತಿಕಾ. ಅಥ ಖೋ ಸಾ ಭಿಕ್ಖುನೀ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ತಂ ಕುಲಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಾಮಿ. ತಸ್ಸ ಕುಲಸ್ಸ ದಾಸೀ ಘರಂ ಸಮ್ಮಜ್ಜನ್ತೀ ತಂ ಆಸನಂ ಭಾಜನನ್ತರಿಕಾಯ ಪಕ್ಖಿಪಿ. ಮನುಸ್ಸಾ ತಂ ಆಸನಂ ಅಪಸ್ಸನ್ತಾ ತಂ ಭಿಕ್ಖುನಿಂ ಏತದವೋಚುಂ – ‘‘ಕಹಂ ತಂ, ಅಯ್ಯೇ, ಆಸನ’’ನ್ತಿ? ‘‘ನಾಹಂ ತಂ, ಆವುಸೋ, ಆಸನಂ ಪಸ್ಸಾಮೀ’’ತಿ. ‘‘ದೇಥಾಯ್ಯೇ, ತಂ ಆಸನ’’ನ್ತಿ ಪರಿಭಾಸಿತ್ವಾ ನಿಚ್ಚಭತ್ತಂ ಪಚ್ಛಿನ್ದಿಂಸು. ಅಥ ಖೋ ತೇ ಮನುಸ್ಸಾ ಘರಂ ಸೋಧೇನ್ತಾ ತಂ ಆಸನಂ ಭಾಜನನ್ತರಿಕಾಯ ಪಸ್ಸಿತ್ವಾ ತಂ ಭಿಕ್ಖುನಿಂ ಖಮಾಪೇತ್ವಾ ನಿಚ್ಚಭತ್ತಂ ಪಟ್ಠಪೇಸುಂ. ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಮಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಮತೀತಿ [ಪಕ್ಕಮೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ ಭಿಕ್ಖುನೀ ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಮಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೫೫. ‘‘ಯಾ ಪನ ಭಿಕ್ಖುನೀ ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಆಸನೇ ನಿಸೀದಿತ್ವಾ ಸಾಮಿಕೇ ಅನಾಪುಚ್ಛಾ ಪಕ್ಕಮೇಯ್ಯ, ಪಾಚಿತ್ತಿಯ’’ನ್ತಿ.

೮೫೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಪುರೇಭತ್ತಂ ನಾಮ ಅರುಣುಗ್ಗಮನಂ ಉಪಾದಾಯ ಯಾವ ಮಜ್ಝನ್ಹಿಕಾ.

ಕುಲಂ ನಾಮ ಚತ್ತಾರಿ ಕುಲಾನಿ – ಖತ್ತಿಯಕುಲಂ, ಬ್ರಾಹ್ಮಣಕುಲಂ, ವೇಸ್ಸಕುಲಂ, ಸುದ್ದಕುಲಂ. ಉಪಸಙ್ಕಮಿತ್ವಾತಿ ತತ್ಥ ಗನ್ತ್ವಾ.

ಆಸನಂ ನಾಮ ಪಲ್ಲಙ್ಕಸ್ಸ ಓಕಾಸೋ ವುಚ್ಚತಿ. ನಿಸೀದಿತ್ವಾತಿ ತಸ್ಮಿಂ ನಿಸೀದಿತ್ವಾ.

ಸಾಮಿಕೇ ಅನಾಪುಚ್ಛಾ ಪಕ್ಕಮೇಯ್ಯಾತಿ ಯೋ ತಸ್ಮಿಂ ಕುಲೇ ಮನುಸ್ಸೋ ವಿಞ್ಞೂ ತಂ ಅನಾಪುಚ್ಛಾ ಅನೋವಸ್ಸಕಂ ಅತಿಕ್ಕಾಮೇನ್ತಿಯಾ ಆಪತ್ತಿ ಪಾಚಿತ್ತಿಯಸ್ಸ. ಅಜ್ಝೋಕಾಸೇ ಉಪಚಾರಂ ಅತಿಕ್ಕಾಮೇನ್ತಿಯಾ ಆಪತ್ತಿ ಪಾಚಿತ್ತಿಯಸ್ಸ.

೮೫೭. ಅನಾಪುಚ್ಛಿತೇ ಅನಾಪುಚ್ಛಿತಸಞ್ಞಾ ಪಕ್ಕಮತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ವೇಮತಿಕಾ ಪಕ್ಕಮತಿ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ಆಪುಚ್ಛಿತಸಞ್ಞಾ ಪಕ್ಕಮತಿ, ಆಪತ್ತಿ ಪಾಚಿತ್ತಿಯಸ್ಸ.

ಪಲ್ಲಙ್ಕಸ್ಸ ಅನೋಕಾಸೇ ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ಅನಾಪುಚ್ಛಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ಆಪುಚ್ಛಿತಸಞ್ಞಾ, ಅನಾಪತ್ತಿ.

೮೫೮. ಅನಾಪತ್ತಿ ಆಪುಚ್ಛಾ ಗಚ್ಛತಿ, ಅಸಂಹಾರಿಮೇ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಞ್ಚಮಸಿಕ್ಖಾಪದಂ ನಿಟ್ಠಿತಂ.

೬. ಛಟ್ಠಸಿಕ್ಖಾಪದಂ

೮೫೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದತಿಪಿ ಅಭಿನಿಪಜ್ಜತಿಪಿ. ಮನುಸ್ಸಾ ಥುಲ್ಲನನ್ದಂ ಭಿಕ್ಖುನಿಂ ಹಿರೀಯಮಾನಾ ಆಸನೇ ನೇವ ಅಭಿನಿಸೀದನ್ತಿ ನ ಅಭಿನಿಪಜ್ಜನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದಿಸ್ಸತಿಪಿ ಅಭಿನಿಪಜ್ಜಿಸ್ಸತಿಪೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದಿಸ್ಸತಿಪಿ ಅಭಿನಿಪಜ್ಜಿಸ್ಸತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದತಿಪಿ ಅಭಿನಿಪಜ್ಜತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದಿಸ್ಸತಿಪಿ ಅಭಿನಿಪಜ್ಜಿಸ್ಸತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೬೦. ‘‘ಯಾ ಪನ ಭಿಕ್ಖುನೀ ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಆಸನೇ ಅಭಿನಿಸೀದೇಯ್ಯ ವಾ ಅಭಿನಿಪಜ್ಜೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೬೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಪಚ್ಛಾಭತ್ತಂ ನಾಮ ಮಜ್ಝನ್ಹಿಕೇ ವೀತಿವತ್ತೇ ಯಾವ ಅತ್ಥಙ್ಗತೇ ಸೂರಿಯೇ.

ಸಾಮಿಕೇ ಅನಾಪುಚ್ಛಾತಿ ಯೋ ತಸ್ಮಿಂ ಕುಲೇ ಮನುಸ್ಸೋ ಸಾಮಿಕೋ ದಾತುಂ, ತಂ ಅನಾಪುಚ್ಛಾ.

ಆಸನಂ ನಾಮ ಪಲ್ಲಙ್ಕಸ್ಸ ಓಕಾಸೋ ವುಚ್ಚತಿ.

ಅಭಿನಿಸೀದೇಯ್ಯಾತಿ ತಸ್ಮಿಂ ಅಭಿನಿಸೀದತಿ, ಆಪತ್ತಿ ಪಾಚಿತ್ತಿಯಸ್ಸ.

ಅಭಿನಿಪಜ್ಜೇಯ್ಯಾತಿ ತಸ್ಮಿಂ ಅಭಿನಿಪಜ್ಜತಿ, ಆಪತ್ತಿ ಪಾಚಿತ್ತಿಯಸ್ಸ.

೮೬೨. ಅನಾಪುಚ್ಛಿತೇ ಅನಾಪುಚ್ಛಿತಸಞ್ಞಾ ಆಸನೇ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ವೇಮತಿಕಾ ಆಸನೇ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ಆಪುಚ್ಛಿತಸಞ್ಞಾ ಆಸನೇ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

೮೬೩. ಅನಾಪತ್ತಿ ಆಪುಚ್ಛಾ ಆಸನೇ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಧುವಪಞ್ಞತ್ತೇ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಛಟ್ಠಸಿಕ್ಖಾಪದಂ ನಿಟ್ಠಿತಂ.

೭. ಸತ್ತಮಸಿಕ್ಖಾಪದಂ

೮೬೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖುನಿಯೋ ಕೋಸಲೇಸು ಜನಪದೇ ಸಾವತ್ಥಿಂ ಗಚ್ಛನ್ತಿಯೋ ಸಾಯಂ ಅಞ್ಞತರಂ ಗಾಮಂ ಉಪಗನ್ತ್ವಾ ಅಞ್ಞತರಂ ಬ್ರಾಹ್ಮಣಕುಲಂ ಉಪಸಙ್ಕಮಿತ್ವಾ ಓಕಾಸಂ ಯಾಚಿಂಸು. ಅಥ ಖೋ ಸಾ ಬ್ರಾಹ್ಮಣೀ ತಾ ಭಿಕ್ಖುನಿಯೋ ಏತದವೋಚ – ‘‘ಆಗಮೇಥ, ಅಯ್ಯೇ, ಯಾವ ಬ್ರಾಹ್ಮಣೋ ಆಗಚ್ಛತೀ’’ತಿ. ಭಿಕ್ಖುನಿಯೋ – ‘‘ಯಾವ ಬ್ರಾಹ್ಮಣೋ ಆಗಚ್ಛತೀ’’ತಿ ಸೇಯ್ಯಂ ಸನ್ಥರಿತ್ವಾ ಏಕಚ್ಚಾ ನಿಸೀದಿಂಸು ಏಕಚ್ಚಾ ನಿಪಜ್ಜಿಂಸು. ಅಥ ಖೋ ಸೋ ಬ್ರಾಹ್ಮಣೋ ರತ್ತಿಂ ಆಗನ್ತ್ವಾ ತಂ ಬ್ರಾಹ್ಮಣಿಂ ಏತದವೋಚ – ‘‘ಕಾ ಇಮಾ’’ತಿ? ‘‘ಭಿಕ್ಖುನಿಯೋ, ಅಯ್ಯಾ’’ತಿ. ‘‘ನಿಕ್ಕಡ್ಢಥ ಇಮಾ ಮುಣ್ಡಾ ಬನ್ಧಕಿನಿಯೋ’’ತಿ, ಘರತೋ ನಿಕ್ಕಡ್ಢಾಪೇಸಿ. ಅಥ ಖೋ ತಾ ಭಿಕ್ಖುನಿಯೋ ಸಾವತ್ಥಿಂ ಗನ್ತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಸೇಯ್ಯಂ ಸನ್ಥರಿತ್ವಾ ಅಭಿನಿಸೀದಿಸ್ಸನ್ತಿಪಿ ಅಭಿನಿಪಜ್ಜಿಸ್ಸನ್ತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಸೇಯ್ಯಂ ಸನ್ಥರಿತ್ವಾ ಅಭಿನಿಸೀದನ್ತಿಪಿ ಅಭಿನಿಪಜ್ಜನ್ತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಸೇಯ್ಯಂ ಸನ್ಥರಿತ್ವಾ ಅಭಿನಿಸೀದಿಸ್ಸನ್ತಿಪಿ ಅಭಿನಿಪಜ್ಜಿಸ್ಸನ್ತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೬೫. ‘‘ಯಾ ಪನ ಭಿಕ್ಖುನೀ ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ ಸಾಮಿಕೇ ಅನಾಪುಚ್ಛಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದೇಯ್ಯ ವಾ ಅಭಿನಿಪಜ್ಜೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೬೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ವಿಕಾಲೋ ನಾಮ ಅತ್ಥಙ್ಗತೇ ಸೂರಿಯೇ ಯಾವ ಅರುಣುಗ್ಗಮನಾ.

ಕುಲಂ ನಾಮ ಚತ್ತಾರಿ ಕುಲಾನಿ – ಖತ್ತಿಯಕುಲಂ, ಬ್ರಾಹ್ಮಣಕುಲಂ, ವೇಸ್ಸಕುಲಂ ಸುದ್ದಕುಲಂ. ಉಪಸಙ್ಕಮಿತ್ವಾತಿ ತತ್ಥ ಗನ್ತ್ವಾ.

ಸಾಮಿಕೇ ಅನಾಪುಚ್ಛಾತಿ ಯೋ ತಸ್ಮಿಂ ಕುಲೇ ಮನುಸ್ಸೋ ಸಾಮಿಕೋ ದಾತುಂ, ತಂ ಅನಾಪುಚ್ಛಾ.

ಸೇಯ್ಯಂ ನಾಮ ಅನ್ತಮಸೋ ಪಣ್ಣಸನ್ಥಾರೋಪಿ. ಸನ್ಥರಿತ್ವಾತಿ ಸಯಂ ಸನ್ಥರಿತ್ವಾ. ಸನ್ಥರಾಪೇತ್ವಾತಿ ಅಞ್ಞಂ ಸನ್ಥರಾಪೇತ್ವಾ. ಅಭಿನಿಸೀದೇಯ್ಯಾತಿ ತಸ್ಮಿಂ ಅಭಿನಿಸೀದತಿ, ಆಪತ್ತಿ ಪಾಚಿತ್ತಿಯಸ್ಸ. ಅಭಿನಿಪಜ್ಜೇಯ್ಯಾತಿ ತಸ್ಮಿಂ ಅಭಿನಿಪಜ್ಜತಿ, ಆಪತ್ತಿ ಪಾಚಿತ್ತಿಯಸ್ಸ.

೮೬೭. ಅನಾಪುಚ್ಛಿತೇ ಅನಾಪುಚ್ಛಿತಸಞ್ಞಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ವೇಮತಿಕಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ. ಅನಾಪುಚ್ಛಿತೇ ಆಪುಚ್ಛಿತಸಞ್ಞಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

ಆಪುಚ್ಛಿತೇ ಅನಾಪುಚ್ಛಿತಸಞ್ಞಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಆಪುಚ್ಛಿತೇ ಆಪುಚ್ಛಿತಸಞ್ಞಾ, ಅನಾಪತ್ತಿ.

೮೬೮. ಅನಾಪತ್ತಿ ಆಪುಚ್ಛಾ ಸೇಯ್ಯಂ ಸನ್ಥರಿತ್ವಾ ವಾ ಸನ್ಥರಾಪೇತ್ವಾ ವಾ ಅಭಿನಿಸೀದತಿ ವಾ ಅಭಿನಿಪಜ್ಜತಿ ವಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಸತ್ತಮಸಿಕ್ಖಾಪದಂ ನಿಟ್ಠಿತಂ.

೮. ಅಟ್ಠಮಸಿಕ್ಖಾಪದಂ

೮೬೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭದ್ದಾಯ ಕಾಪಿಲಾನಿಯಾ ಅನ್ತೇವಾಸಿನೀ ಭಿಕ್ಖುನೀ ಭದ್ದಂ ಕಾಪಿಲಾನಿಂ ಸಕ್ಕಚ್ಚಂ ಉಪಟ್ಠೇತಿ. ಭದ್ದಾ ಕಾಪಿಲಾನೀ ಭಿಕ್ಖುನಿಯೋ ಏತದವೋಚ – ‘‘ಅಯಂ ಮಂ, ಅಯ್ಯೇ, ಭಿಕ್ಖುನೀ ಸಕ್ಕಚಂ ಉಪಟ್ಠೇತಿ, ಇಮಿಸ್ಸಾಹಂ ಚೀವರಂ ದಸ್ಸಾಮೀ’’ತಿ. ಅಥ ಖೋ ಸಾ ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇಸಿ – ‘‘ಅಹಂ ಕಿರಾಯ್ಯೇ, ಅಯ್ಯಂ ನ ಸಕ್ಕಚ್ಚಂ ಉಪಟ್ಠೇಮಿ, ನ ಕಿರ ಮೇ ಅಯ್ಯಾ ಚೀವರಂ ದಸ್ಸತೀ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇತೀತಿ [ಉಜ್ಝಾಪೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೭೦. ‘‘ಯಾ ಪನ ಭಿಕ್ಖುನೀ ದುಗ್ಗಹಿತೇನ ದೂಪಧಾರಿತೇನ ಪರಂ ಉಜ್ಝಾಪೇಯ್ಯ, ಪಾಚಿತ್ತಿಯ’’ನ್ತಿ.

೮೭೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ದುಗ್ಗಹಿತೇನಾತಿ ಅಞ್ಞಥಾ ಗಹಿತೇನ [ಉಗ್ಗಹಿತೇನ (ಕ.)].

ದೂಪಧಾರಿತೇನಾತಿ ಅಞ್ಞಥಾ ಉಪಧಾರಿತೇನ.

ಪರನ್ತಿ ಉಪಸಮ್ಪನ್ನಂ ಉಜ್ಝಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

೮೭೨. ಉಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ ಉಜ್ಝಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ವೇಮತಿಕಾ ಉಜ್ಝಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ ಉಜ್ಝಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಅನುಪಸಮ್ಪನ್ನಂ ಉಜ್ಝಾಪೇತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ.

೮೭೩. ಅನಾಪತ್ತಿ ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಅಟ್ಠಮಸಿಕ್ಖಾಪದಂ ನಿಟ್ಠಿತಂ.

೯. ನವಮಸಿಕ್ಖಾಪದಂ

೮೭೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅತ್ತನೋ ಭಣ್ಡಕಂ ಅಪಸ್ಸನ್ತಿಯೋ ಚಣ್ಡಕಾಳಿಂ ಭಿಕ್ಖುನಿಂ ಏತದವೋಚುಂ – ‘‘ಅಪಾಯ್ಯೇ, ಅಮ್ಹಾಕಂ, ಭಣ್ಡಕಂ ಪಸ್ಸೇಯ್ಯಾಸೀ’’ತಿ? ಚಣ್ಡಕಾಳೀ ಭಿಕ್ಖುನೀ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಹಮೇವ ನೂನ ಚೋರೀ, ಅಹಮೇವ ನೂನ ಅಲಜ್ಜಿನೀ, ಯಾ ಅಯ್ಯಾಯೋ ಅತ್ತನೋ ಭಣ್ಡಕಂ ಅಪಸ್ಸನ್ತಿಯೋ ತಾ ಮಂ ಏವಮಾಹಂಸು – ‘ಅಪಾಯ್ಯೇ, ಅಮ್ಹಾಕಂ ಭಣ್ಡಕಂ ಪಸ್ಸೇಯ್ಯಾಸೀ’ತಿ? ಸಚಾಹಂ, ಅಯ್ಯೇ, ತುಮ್ಹಾಕಂ ಭಣ್ಡಕಂ ಗಣ್ಹಾಮಿ, ಅಸ್ಸಮಣೀ ಹೋಮಿ, ಬ್ರಹ್ಮಚರಿಯಾ ಚವಾಮಿ, ನಿರಯಂ ಉಪಪಜ್ಜಾಮಿ; ಯಾ ಪನ ಮಂ ಅಭೂತೇನ ಏವಮಾಹ ಸಾಪಿ ಅಸ್ಸಮಣೀ ಹೋತು, ಬ್ರಹ್ಮಚರಿಯಾ ಚವತು, ನಿರಯಂ ಉಪಪಜ್ಜತೂ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಚಣ್ಡಕಾಳೀ ಅತ್ತಾನಮ್ಪಿ ಪರಮ್ಪಿ ನಿರಯೇನಪಿ ಬ್ರಹ್ಮಚರಿಯೇನಪಿ ಅಭಿಸಪಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಅತ್ತಾನಮ್ಪಿ ಪರಮ್ಪಿ ನಿರಯೇನಪಿ ಬ್ರಹ್ಮಚರಿಯೇನಪಿ ಅಭಿಸಪತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಅತ್ತಾನಮ್ಪಿ ಪರಮ್ಪಿ ನಿರಯೇನಪಿ ಬ್ರಹ್ಮಚರಿಯೇನಪಿ ಅಭಿಸಪಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೭೫. ‘‘ಯಾ ಪನ ಭಿಕ್ಖುನೀ ಅತ್ತಾನಂ ವಾ ಪರಂ ವಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪೇಯ್ಯ, ಪಾಚಿತ್ತಿಯ್ಯ’’ನ್ತಿ.

೮೭೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅತ್ತಾನನ್ತಿ ಪಚ್ಚತ್ತಂ. ಪರನ್ತಿ ಉಪಸಮ್ಪನ್ನಂ. ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪತಿ, ಆಪತ್ತಿ ಪಾಚಿತ್ತಿಯಸ್ಸ.

೮೭೭. ಉಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ವೇಮತಿಕಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪತಿ, ಆಪತ್ತಿ ಪಾಚಿತ್ತಿಯಸ್ಸ.

ತಿರಚ್ಛಾನಯೋನಿಯಾ ವಾ ಪೇತ್ತಿವಿಸಯೇನ ವಾ ಮನುಸ್ಸದೋಭಗ್ಗೇನ ವಾ ಅಭಿಸಪತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಂ ಅಭಿಸಪತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ.

೮೭೮. ಅನಾಪತ್ತಿ ಅತ್ಥಪುರೇಕ್ಖಾರಾಯ, ಧಮ್ಮಪುರೇಕ್ಖಾರಾಯ, ಅನುಸಾಸನಿಪುರೇಕ್ಖಾರಾಯ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ನವಮಸಿಕ್ಖಾಪದಂ ನಿಟ್ಠಿತಂ.

೧೦. ದಸಮಸಿಕ್ಖಾಪದಂ

೮೭೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಚಣ್ಡಕಾಳೀ ಭಿಕ್ಖುನೀ ಭಿಕ್ಖುನೀಹಿ ಸದ್ಧಿಂ ಭಣ್ಡಿತ್ವಾ ಅತ್ತಾನಂ ವಧಿತ್ವಾ ವಧಿತ್ವಾ ರೋದತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಚಣ್ಡಕಾಳೀ ಅತ್ತಾನಂ ವಧಿತ್ವಾ ವಧಿತ್ವಾ ರೋದಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಅತ್ತಾನಂ ವಧಿತ್ವಾ ವಧಿತ್ವಾ ರೋದತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಚಣ್ಡಕಾಳೀ ಭಿಕ್ಖುನೀ ಅತ್ತಾನಂ ವಧಿತ್ವಾ ವಧಿತ್ವಾ ರೋದಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೮೦. ‘‘ಯಾ ಪನ ಭಿಕ್ಖುನೀ ಅತ್ತಾನಂ ವಧಿತ್ವಾ ವಧಿತ್ವಾ ರೋದೇಯ್ಯ, ಪಾಚಿತ್ತಿಯ’’ನ್ತಿ.

೮೮೧. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅತ್ತಾನನ್ತಿ ಪಚ್ಚತ್ತಂ. ವಧಿತ್ವಾ ವಧಿತ್ವಾ ರೋದತಿ, ಆಪತ್ತಿ ಪಾಚಿತ್ತಿಯಸ್ಸ. ವಧತಿ ನ ರೋದತಿ, ಆಪತ್ತಿ ದುಕ್ಕಟಸ್ಸ. ರೋದತಿ ನ ವಧತಿ, ಆಪತ್ತಿ ದುಕ್ಕಟಸ್ಸ.

೮೮೨. ಅನಾಪತ್ತಿ ಞಾತಿಬ್ಯಸನೇನ ವಾ ಭೋಗಬ್ಯಸನೇನ ವಾ ರೋಗಬ್ಯಸನೇನ ವಾ ಫುಟ್ಠಾ ರೋದತಿ ನ ವಧತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದಸಮಸಿಕ್ಖಾಪದಂ ನಿಟ್ಠಿತಂ.

ಅನ್ಧಕಾರವಗ್ಗೋ ದುತಿಯೋ.