ಭಿಕ್ಖುನೀವಿಭಙ್ಗೋ

೧. ಪಾರಾಜಿಕಕಣ್ಡಂ (ಭಿಕ್ಖುನೀವಿಭಙ್ಗೋ)

೧. ಪಠಮಪಾರಾಜಿಕಂ

೬೫೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸಾಳ್ಹೋ ಮಿಗಾರನತ್ತಾ ಭಿಕ್ಖುನಿಸಙ್ಘಸ್ಸ ವಿಹಾರಂ ಕತ್ತುಕಾಮೋ ಹೋತಿ. ಅಥ ಖೋ ಸಾಳ್ಹೋ ಮಿಗಾರನತ್ತಾ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚ – ‘‘ಇಚ್ಛಾಮಹಂ, ಅಯ್ಯೇ, ಭಿಕ್ಖುನಿಸಙ್ಘಸ್ಸ ವಿಹಾರಂ ಕಾತುಂ. ದೇಥ ಮೇ ನವಕಮ್ಮಿಕಂ ಭಿಕ್ಖುನಿ’’ನ್ತಿ. ತೇನ ಖೋ ಪನ ಸಮಯೇನ ಚತಸ್ಸೋ ಭಗಿನಿಯೋ ಭಿಕ್ಖುನೀಸು ಪಬ್ಬಜಿತಾ ಹೋನ್ತಿ – ನನ್ದಾ, ನನ್ದವತೀ, ಸುನ್ದರೀನನ್ದಾ, ಥುಲ್ಲನನ್ದಾತಿ. ತಾಸು ಸುನ್ದರೀನನ್ದಾ ಭಿಕ್ಖುನೀ ತರುಣಪಬ್ಬಜಿತಾ ಅಭಿರೂಪಾ ಹೋತಿ ದಸ್ಸನೀಯಾ ಪಾಸಾದಿಕಾ ಪಣ್ಡಿತಾ ಬ್ಯತ್ತಾ ಮೇಧಾವಿನೀ ದಕ್ಖಾ ಅನಲಸಾ, ತತ್ರುಪಾಯಾಯ ವೀಮಂಸಾಯ ಸಮನ್ನಾಗತಾ, ಅಲಂ ಕಾತುಂ ಅಲಂ ಸಂವಿಧಾತುಂ. ಅಥ ಖೋ ಭಿಕ್ಖುನಿಸಙ್ಘೋ ಸುನ್ದರೀನನ್ದಂ ಭಿಕ್ಖುನಿಂ ಸಮ್ಮನ್ನಿತ್ವಾ ಸಾಳ್ಹಸ್ಸ ಮಿಗಾರನತ್ತುನೋ ನವಕಮ್ಮಿಕಂ ಅದಾಸಿ. ತೇನ ಖೋ ಪನ ಸಮಯೇನ ಸುನ್ದರೀನನ್ದಾ ಭಿಕ್ಖುನೀ ಸಾಳ್ಹಸ್ಸ ಮಿಗಾರನತ್ತುನೋ ನಿವೇಸನಂ ಅಭಿಕ್ಖಣಂ ಗಚ್ಛತಿ – ‘‘ವಾಸಿಂ ದೇಥ, ಪರಸುಂ [ಫರಸುಂ (ಸ್ಯಾ. ಕ.)] ದೇಥ, ಕುಠಾರಿಂ [ಕುಧಾರಿಂ (ಕ.)] ದೇಥ, ಕುದ್ದಾಲಂ ದೇಥ, ನಿಖಾದನಂ ದೇಥಾ’’ತಿ. ಸಾಳ್ಹೋಪಿ ಮಿಗಾರನತ್ತಾ ಭಿಕ್ಖುನುಪಸ್ಸಯಂ ಅಭಿಕ್ಖಣಂ ಗಚ್ಛತಿ ಕತಾಕತಂ ಜಾನಿತುಂ. ತೇ ಅಭಿಣ್ಹದಸ್ಸನೇನ ಪಟಿಬದ್ಧಚಿತ್ತಾ ಅಹೇಸುಂ.

ಅಥ ಖೋ ಸಾಳ್ಹೋ ಮಿಗಾರನತ್ತಾ ಸುನ್ದರೀನನ್ದಂ ಭಿಕ್ಖುನಿಂ ದೂಸೇತುಂ ಓಕಾಸಂ ಅಲಭಮಾನೋ ಏತದೇವತ್ಥಾಯ ಭಿಕ್ಖುನಿಸಙ್ಘಸ್ಸ ಭತ್ತಂ ಅಕಾಸಿ. ಅಥ ಖೋ ಸಾಳ್ಹೋ ಮಿಗಾರನತ್ತಾ ಭತ್ತಗ್ಗೇ ಆಸನಂ ಪಞ್ಞಪೇನ್ತೋ – ‘‘ಏತ್ತಕಾ ಭಿಕ್ಖುನಿಯೋ ಅಯ್ಯಾಯ ಸುನ್ದರೀನನ್ದಾಯ ವುಡ್ಢತರಾ’’ತಿ ಏಕಮನ್ತಂ ಆಸನಂ ಪಞ್ಞಪೇಸಿ ‘‘ಏತ್ತಕಾ ನವಕತರಾ’’ತಿ – ಏಕಮನ್ತಂ ಆಸನಂ ಪಞ್ಞಪೇಸಿ. ಪಟಿಚ್ಛನ್ನೇ ಓಕಾಸೇ ನಿಕೂಟೇ ಸುನ್ದರೀನನ್ದಾಯ ಭಿಕ್ಖುನಿಯಾ ಆಸನಂ ಪಞ್ಞಪೇಸಿ, ಯಥಾ ಥೇರಾ ಭಿಕ್ಖುನಿಯೋ ಜಾನೇಯ್ಯುಂ – ‘‘ನವಕಾನಂ ಭಿಕ್ಖುನೀನಂ ಸನ್ತಿಕೇ ನಿಸಿನ್ನಾ’’ತಿ; ನವಕಾಪಿ ಭಿಕ್ಖುನಿಯೋ ಜಾನೇಯ್ಯುಂ – ‘‘ಥೇರಾನಂ ಭಿಕ್ಖುನೀನಂ ಸನ್ತಿಕೇ ನಿಸಿನ್ನಾ’’ತಿ. ಅಥ ಖೋ ಸಾಳ್ಹೋ ಮಿಗಾರನತ್ತಾ ಭಿಕ್ಖುನಿಸಙ್ಘಸ್ಸ ಕಾಲಂ ಆರೋಚಾಪೇಸಿ – ‘‘ಕಾಲೋ, ಅಯ್ಯೇ, ನಿಟ್ಠಿತಂ ಭತ್ತ’’ನ್ತಿ. ಸುನ್ದರೀನನ್ದಾ ಭಿಕ್ಖುನೀ ಸಲ್ಲಕ್ಖೇತ್ವಾ – ‘‘ನ ಬಹುಕತೋ ಸಾಳ್ಹೋ ಮಿಗಾರನತ್ತಾ ಭಿಕ್ಖುನಿಸಙ್ಘಸ್ಸ ಭತ್ತಂ ಅಕಾಸಿ; ಮಂ ಸೋ ದೂಸೇತುಕಾಮೋ. ಸಚಾಹಂ ಗಮಿಸ್ಸಾಮಿ ವಿಸ್ಸರೋ ಮೇ ಭವಿಸ್ಸತೀ’’ತಿ, ಅನ್ತೇವಾಸಿನಿಂ ಭಿಕ್ಖುನಿಂ ಆಣಾಪೇಸಿ – ‘‘ಗಚ್ಛ ಮೇ ಪಿಣ್ಡಪಾತಂ ನೀಹರ. ಯೋ ಚೇ ಮಂ ಪುಚ್ಛತಿ, ‘ಗಿಲಾನಾ’ತಿ ಪಟಿವೇದೇಹೀ’’ತಿ. ‘‘ಏವಂ, ಅಯ್ಯೇ’’ತಿ ಖೋ ಸಾ ಭಿಕ್ಖುನೀ ಸುನ್ದರೀನನ್ದಾಯ ಭಿಕ್ಖುನಿಯಾ ಪಚ್ಚಸ್ಸೋಸಿ.

ತೇನ ಖೋ ಪನ ಸಮಯೇನ ಸಾಳ್ಹೋ ಮಿಗಾರನತ್ತಾ ಬಹಿದ್ವಾರಕೋಟ್ಠಕೇ ಠಿತೋ ಹೋತಿ ಸುನ್ದರೀನನ್ದಂ ಭಿಕ್ಖುನಿಂ ಪಟಿಪುಚ್ಛನ್ತೋ – ‘‘ಕಹಂ, ಅಯ್ಯೇ, ಅಯ್ಯಾ ಸುನ್ದರೀನನ್ದಾ? ಕಹಂ, ಅಯ್ಯೇ, ಅಯ್ಯಾ ಸುನ್ದರೀನನ್ದಾ’’ತಿ? ಏವಂ ವುತ್ತೇ ಸುನ್ದರೀನನ್ದಾಯ ಭಿಕ್ಖುನಿಯಾ ಅನ್ತೇವಾಸಿನೀ ಭಿಕ್ಖುನೀ ಸಾಳ್ಹಂ ಮಿಗಾರನತ್ತಾರಂ ಏತದವೋಚ – ‘‘ಗಿಲಾನಾವುಸೋ; ಪಿಣ್ಡಪಾತಂ ನೀಹರಿಸ್ಸಾಮೀ’’ತಿ. ಅಥ ಖೋ ಸಾಳ್ಹೋ ಮಿಗಾರನತ್ತಾ – ‘‘ಯಮ್ಪಾಹಂ ಅತ್ಥಾಯ [ಯಂಪಾಹಂ (ಸ್ಯಾ.)] ಭಿಕ್ಖುನಿಸಙ್ಘಸ್ಸ ಭತ್ತಂ ಅಕಾಸಿಂ ಅಯ್ಯಾಯ ಸುನ್ದರೀನನ್ದಾಯ ಕಾರಣಾ’’ತಿ ಮನುಸ್ಸೇ ಆಣಾಪೇತ್ವಾ – ‘‘ಭಿಕ್ಖುನಿಸಙ್ಘಂ ಭತ್ತೇನ ಪರಿವಿಸಥಾ’’ತಿ ವತ್ವಾ ಯೇನ ಭಿಕ್ಖುನುಪಸ್ಸಯೋ ತೇನುಪಸಙ್ಕಮಿ. ತೇನ ಖೋ ಪನ ಸಮಯೇನ ಸುನ್ದರೀನನ್ದಾ ಭಿಕ್ಖುನೀ ಬಹಾರಾಮಕೋಟ್ಠಕೇ ಠಿತಾ ಹೋತಿ ಸಾಳ್ಹಂ ಮಿಗಾರನತ್ತಾರಂ ಪತಿಮಾನೇನ್ತೀ. ಅದ್ದಸಾ ಖೋ ಸುನ್ದರೀನನ್ದಾ ಭಿಕ್ಖುನೀ ಸಾಳ್ಹಂ ಮಿಗಾರನತ್ತಾರಂ ದೂರತೋವ ಆಗಚ್ಛನ್ತಂ. ದಿಸ್ವಾನ ಉಪಸ್ಸಯಂ ಪವಿಸಿತ್ವಾ ಸಸೀಸಂ ಪಾರುಪಿತ್ವಾ ಮಞ್ಚಕೇ ನಿಪಜ್ಜಿ. ಅಥ ಖೋ ಸಾಳ್ಹೋ ಮಿಗಾರನತ್ತಾ ಯೇನ ಸುನ್ದರೀನನ್ದಾ ಭಿಕ್ಖುನೀ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಸುನ್ದರೀನನ್ದಂ ಭಿಕ್ಖುನಿಂ ಏತದವೋಚ – ‘‘ಕಿಂ ತೇ, ಅಯ್ಯೇ, ಅಫಾಸು, ಕಿಸ್ಸ ನಿಪನ್ನಾಸೀ’’ತಿ? ‘‘ಏವಞ್ಹೇತಂ, ಆವುಸೋ, ಹೋತಿ ಯಾ ಅನಿಚ್ಛನ್ತಂ ಇಚ್ಛತೀ’’ತಿ. ‘‘ಕ್ಯಾಹಂ ತಂ, ಅಯ್ಯೇ, ನ ಇಚ್ಛಿಸ್ಸಾಮಿ? ಅಪಿ ಚಾಹಂ ಓಕಾಸಂ ನ ಲಭಾಮಿ ತಂ ದೂಸೇತು’’ನ್ತಿ. ಅವಸ್ಸುತೋ ಅವಸ್ಸುತಾಯ ಸುನ್ದರೀನನ್ದಾಯ ಭಿಕ್ಖುನಿಯಾ ಕಾಯಸಂಸಗ್ಗಂ ಸಮಾಪಜ್ಜಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಜರಾದುಬ್ಬಲಾ ಚರಣಗಿಲಾನಾ ಸುನ್ದರೀನನ್ದಾಯ ಭಿಕ್ಖುನಿಯಾ ಅವಿದೂರೇ ನಿಪನ್ನಾ ಹೋತಿ. ಅದ್ದಸಾ ಖೋ ಸಾ ಭಿಕ್ಖುನೀ ಸಾಳ್ಹಂ ಮಿಗಾರನತ್ತಾರಂ ಅವಸ್ಸುತಂ ಅವಸ್ಸುತಾಯ ಸುನ್ದರೀನನ್ದಾಯ ಭಿಕ್ಖುನಿಯಾ ಕಾಯಸಂಸಗ್ಗಂ ಸಮಾಪಜ್ಜನ್ತಂ. ದಿಸ್ವಾನ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಅಯ್ಯಾ ಸುನ್ದರೀನನ್ದಾ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯಿಸ್ಸತೀ’’ತಿ! ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ ಸನ್ತುಟ್ಠಾ ಲಜ್ಜಿನಿಯೋ ಕುಕ್ಕುಚ್ಚಿಕಾ ಸಿಕ್ಖಾಕಾಮಾ ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಸುನ್ದರೀನನ್ದಾ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯಿಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ ಸನ್ತುಟ್ಠಾ ಲಜ್ಜಿನೋ ಕುಕ್ಕುಚ್ಚಕಾ ಸಿಕ್ಖಾಕಾಮಾ ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸುನ್ದರೀನನ್ದಾ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯಿಸ್ಸತೀ’’ತಿ!

ಅಥ ಖೋ ತೇ ಭಿಕ್ಖೂ ಸುನ್ದರೀನನ್ದಂ ಭಿಕ್ಖುನಿಂ ಅನೇಕಪರಿಯಾಯೇನ ವಿಗರಹಿತ್ವಾ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಸುನ್ದರೀನನ್ದಾ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯತೀ’’ತಿ [ಸಾದಿಯೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಭಿಕ್ಖವೇ, ಸುನ್ದರೀನನ್ದಾಯ ಭಿಕ್ಖುನಿಯಾ ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ, ಭಿಕ್ಖವೇ, ಸುನ್ದರೀನನ್ದಾ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಕಾಯಸಂಸಗ್ಗಂ ಸಾದಿಯಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ ಪಸನ್ನಾನಂ ವಾ ಭಿಯ್ಯೋಭಾವಾಯ. ಅಥ ಖ್ವೇತಂ, ಭಿಕ್ಖವೇ, ಅಪ್ಪಸನ್ನಾನಞ್ಚೇವ ಅಪ್ಪಸಾದಾಯ ಪಸನ್ನಾನಞ್ಚ ಏಕಚ್ಚಾನಂ ಅಞ್ಞಥತ್ತಾಯಾ’’ತಿ. ಅಥ ಖೋ ಭಗವಾ ಸುನ್ದರೀನನ್ದಂ ಭಿಕ್ಖುನಿಂ ಅನೇಕಪರಿಯಾಯೇನ ವಿಗರಹಿತ್ವಾ ದುಬ್ಭರತಾಯ ದುಪ್ಪೋಸತಾಯ ಮಹಿಚ್ಛತಾಯ ಅಸನ್ತುಟ್ಠಿತಾಯ [ಅಸನ್ತುಟ್ಠತಾಯ (ಸ್ಯಾ.), ಅಸನ್ತುಟ್ಠಿಯಾ (ಕ.)] ಸಙ್ಗಣಿಕಾಯ ಕೋಸಜ್ಜಸ್ಸ ಅವಣ್ಣಂ ಭಾಸಿತ್ವಾ, ಅನೇಕಪರಿಯಾಯೇನ ಸುಭರತಾಯ ಸುಪೋಸತಾಯ ಅಪ್ಪಿಚ್ಛಸ್ಸ ಸನ್ತುಟ್ಠಸ್ಸ [ಸನ್ತುಟ್ಠಿಯಾ (ಕ.)] ಸಲ್ಲೇಖಸ್ಸ ಧುತಸ್ಸ ಪಾಸಾದಿಕಸ್ಸ ಅಪಚಯಸ್ಸ ವೀರಿಯಾರಮ್ಭಸ್ಸ ವಣ್ಣಂ ಭಾಸಿತ್ವಾ, ಭಿಕ್ಖೂನಂ ತದನುಚ್ಛವಿಕಂ ತದನುಲೋಮಿಕಂ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞಪೇಸ್ಸಾಮಿ ದಸ ಅತ್ಥವಸೇ ಪಟಿಚ್ಚ – ಸಙ್ಘಸುಟ್ಠುತಾಯ, ಸಙ್ಘಫಾಸುತಾಯ, ದುಮ್ಮಙ್ಕೂನಂ ಭಿಕ್ಖುನೀನಂ ನಿಗ್ಗಹಾಯ, ಪೇಸಲಾನಂ ಭಿಕ್ಖುನೀನಂ ಫಾಸುವಿಹಾರಾಯ, ದಿಟ್ಠಧಮ್ಮಿಕಾನಂ ಆಸವಾನಂ ಸಂವರಾಯ, ಸಮ್ಪರಾಯಿಕಾನಂ ಆಸವಾನಂ ಪಟಿಘಾತಾಯ, ಅಪ್ಪಸನ್ನಾನಂ ಪಸಾದಾಯ, ಪಸನ್ನಾನಂ ಭಿಯ್ಯೋಭಾವಾಯ, ಸದ್ಧಮ್ಮಟ್ಠಿತಿಯಾ ವಿನಯಾನುಗ್ಗಹಾಯ. ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೫೭. ‘‘ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಆಮಸನಂ ವಾ ಪರಾಮಸನಂ ವಾ ಗಹಣಂ ವಾ ಛುಪನಂ ವಾ ಪಟಿಪೀಳನಂ ವಾ ಸಾದಿಯೇಯ್ಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ಉಬ್ಭಜಾಣುಮಣ್ಡಲಿಕಾ’’ತಿ.

೬೫೮. ಯಾ ಪನಾತಿ ಯಾ ಯಾದಿಸಾ ಯಥಾಯುತ್ತಾ ಯಥಾಜಚ್ಚಾ ಯಥಾನಾಮಾ ಯಥಾಗೋತ್ತಾ ಯಥಾಸೀಲಾ ಯಥಾವಿಹಾರಿನೀ ಯಥಾಗೋಚರಾ ಥೇರಾ ವಾ ನವಾ ವಾ ಮಜ್ಝಿಮಾ ವಾ, ಏಸಾ ವುಚ್ಚತಿ ಯಾ ಪನಾತಿ.

ಭಿಕ್ಖುನೀತಿ ಭಿಕ್ಖಿಕಾತಿ ಭಿಕ್ಖುನೀ; ಭಿಕ್ಖಾಚರಿಯಂ ಅಜ್ಝುಪಗತಾತಿ ಭಿಕ್ಖುನೀ; ಭಿನ್ನಪಟಧರಾತಿ ಭಿಕ್ಖುನೀ; ಸಮಞ್ಞಾಯ ಭಿಕ್ಖುನೀ; ಪಟಿಞ್ಞಾಯ ಭಿಕ್ಖುನೀ; ಏಹಿ ಭಿಕ್ಖುನೀತಿ ಭಿಕ್ಖುನೀ; ತೀಹಿ ಸರಣಗಮನೇಹಿ ಉಪಸಮ್ಪನ್ನಾತಿ ಭಿಕ್ಖುನೀ; ಭದ್ರಾ ಭಿಕ್ಖುನೀ; ಸಾರಾ ಭಿಕ್ಖುನೀ; ಸೇಖಾ ಭಿಕ್ಖುನೀ; ಅಸೇಖಾ ಭಿಕ್ಖುನೀ; ಸಮಗ್ಗೇನ ಉಭತೋಸಙ್ಘೇನ ಞತ್ತಿಚತುತ್ಥೇನ ಕಮ್ಮೇನ ಅಕುಪ್ಪೇನ ಠಾನಾರಹೇನ ಉಪಸಮ್ಪನ್ನಾತಿ ಭಿಕ್ಖುನೀ. ತತ್ರ ಯಾಯಂ ಭಿಕ್ಖುನೀ ಸಮಗ್ಗೇನ ಉಭತೋಸಙ್ಘೇನ ಞತ್ತಿಚತುತ್ಥೇನ ಕಮ್ಮೇನ ಅಕುಪ್ಪೇನ ಠಾನಾರಹೇನ ಉಪಸಮ್ಪನ್ನಾ, ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅವಸ್ಸುತಾ ನಾಮ ಸಾರತ್ತಾ ಅಪೇಕ್ಖವತೀ ಪಟಿಬದ್ಧಚಿತ್ತಾ.

ಅವಸ್ಸುತೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ.

ಪುರಿಸಪುಗ್ಗಲೋ ನಾಮ ಮನುಸ್ಸಪುರಿಸೋ ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ ವಿಞ್ಞೂ ಪಟಿಬಲೋ ಕಾಯಸಂಸಗ್ಗಂ ಸಮಾಪಜ್ಜಿತುಂ.

ಅಧಕ್ಖಕನ್ತಿ ಹೇಟ್ಠಕ್ಖಕಂ.

ಉಬ್ಭಜಾಣುಮಣ್ಡಲನ್ತಿ ಉಪರಿಜಾಣುಮಣ್ಡಲಂ.

ಆಮಸನಂ ನಾಮ ಆಮಟ್ಠಮತ್ತಂ.

ಪರಾಮಸನಂ ನಾಮ ಇತೋಚಿತೋ ಚ ಸಞ್ಚೋಪನಂ.

ಗಹಣಂ ನಾಮ ಗಹಿತಮತ್ತಂ.

ಛುಪನಂ ನಾಮ ಫುಟ್ಠಮತ್ತಂ.

ಪಟಿಪೀಳನಂ ವಾ ಸಾದಿಯೇಯ್ಯಾತಿ ಅಙ್ಗಂ ಗಹೇತ್ವಾ ನಿಪ್ಪೀಳನಂ ಸಾದಿಯತಿ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಾರಾಜಿಕಾ ಹೋತೀತಿ ಸೇಯ್ಯಥಾಪಿ ನಾಮ ಪುರಿಸೋ ಸೀಸಚ್ಛಿನ್ನೋ ಅಭಬ್ಬೋ ತೇನ ಸರೀರಬನ್ಧನೇನ ಜೀವಿತುಂ, ಏವಮೇವ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಆಮಸನಂ ವಾ ಪರಾಮಸನಂ ವಾ ಗಹಣಂ ವಾ ಛುಪನಂ ವಾ ಪಟಿಪೀಳನಂ ವಾ ಸಾದಿಯನ್ತೀ ಅಸ್ಸಮಣೀ ಹೋತಿ ಅಸಕ್ಯಧೀತಾ. ತೇನ ವುಚ್ಚತಿ ಪಾರಾಜಿಕಾ ಹೋತೀತಿ.

ಅಸಂವಾಸಾತಿ ಸಂವಾಸೋ ನಾಮ ಏಕಕಮ್ಮಂ ಏಕುದ್ದೇಸೋ ಸಮಸಿಕ್ಖತಾ, ಏಸೋ ಸಂವಾಸೋ ನಾಮ. ಸೋ ತಾಯ ಸದ್ಧಿಂ ನತ್ಥಿ, ತೇನ ವುಚ್ಚತಿ ಅಸಂವಾಸಾತಿ.

೬೫೯. ಉಭತೋಅವಸ್ಸುತೇ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಕಾಯೇನ ಕಾಯಂ ಆಮಸತಿ, ಆಪತ್ತಿ ಪಾರಾಜಿಕಸ್ಸ. ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕಾಯಪಟಿಬದ್ಧೇನ ಕಾಯಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

ನಿಸ್ಸಗ್ಗಿಯೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ನಿಸ್ಸಗ್ಗಿಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ನಿಸ್ಸಗ್ಗಿಯೇನ ನಿಸ್ಸಗ್ಗಿಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಕಾಯೇನ ಕಾಯಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

೬೬೦. ಏಕತೋಅವಸ್ಸುತೇ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಕಾಯೇನ ಕಾಯಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಕಾಯೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

೬೬೧. ಉಭತೋಅವಸ್ಸುತೇ ಯಕ್ಖಸ್ಸ ವಾ ಪೇತಸ್ಸ ವಾ ಪಣ್ಡಕಸ್ಸ ವಾ ತಿರಚ್ಛಾನಗತಮನುಸ್ಸವಿಗ್ಗಹಸ್ಸ ವಾ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಕಾಯೇನ ಕಾಯಂ ಆಮಸತಿ, ಆಪತ್ತಿ ಥುಲ್ಲಚ್ಚಯಸ್ಸ. ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

೬೬೨. ಏಕತೋಅವಸ್ಸುತೇ ಅಧಕ್ಖಕಂ ಉಬ್ಭಜಾಣುಮಣ್ಡಲಂ ಕಾಯೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಂ ಆಮಸತಿ, ಆಪತ್ತಿ ದುಕ್ಕಟಸ್ಸ. ಕಾಯಪಟಿಬದ್ಧೇನ ಕಾಯಪಟಿಬದ್ಧಂ ಆಮಸತಿ, ಆಪತ್ತಿ ದುಕ್ಕಟಸ್ಸ.

೬೬೩. ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಿಯಾ, ಅಸಾದಿಯನ್ತಿಯಾ, ಉಮ್ಮತ್ತಿಕಾಯ, ಖಿತ್ತಚಿತ್ತಾಯ, ವೇದನಾಟ್ಟಾಯ, ಆದಿಕಮ್ಮಿಕಾಯಾತಿ.

ಪಠಮಪಾರಾಜಿಕಂ ಸಮತ್ತಂ [ಭಿಕ್ಖುನಿವಿಭಙ್ಗೇ ಸಿಕ್ಖಾಪದಗಣನಾ ಭಿಕ್ಖೂಹಿ§ಅಸಾಧಾರಣವಸೇನ ಪಕಾಸಿತಾತಿ ವೇದಿತಬ್ಬಾ].

೨. ದುತಿಯಪಾರಾಜಿಕಂ

೬೬೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸುನ್ದರೀನನ್ದಾ ಭಿಕ್ಖುನೀ ಸಾಳ್ಹೇನ ಮಿಗಾರನತ್ತುನಾ ಗಬ್ಭಿನೀ ಹೋತಿ. ಯಾವ ಗಬ್ಭೋ ತರುಣೋ ಅಹೋಸಿ ತಾವ ಛಾದೇಸಿ. ಪರಿಪಕ್ಕೇ ಗಬ್ಭೇ ವಿಬ್ಭಮಿತ್ವಾ ವಿಜಾಯಿ. ಭಿಕ್ಖುನಿಯೋ ಥುಲ್ಲನನ್ದಂ ಭಿಕ್ಖುನಿಂ ಏತದವೋಚುಂ – ‘‘ಸುನ್ದರೀನನ್ದಾ ಖೋ, ಅಯ್ಯೇ, ಅಚಿರವಿಬ್ಭನ್ತಾ ವಿಜಾತಾ. ಕಚ್ಚಿ ನೋ ಸಾ ಭಿಕ್ಖುನೀಯೇವ ಸಮಾನಾ ಗಬ್ಭಿನೀ’’ತಿ? ‘‘ಏವಂ, ಅಯ್ಯೇ’’ತಿ. ‘‘ಕಿಸ್ಸ ಪನ ತ್ವಂ, ಅಯ್ಯೇ, ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸಿ ನ ಗಣಸ್ಸ ಆರೋಚೇಸೀ’’ತಿ? ‘‘ಯೋ ಏತಿಸ್ಸಾ ಅವಣ್ಣೋ ಮಯ್ಹೇಸೋ ಅವಣ್ಣೋ, ಯಾ ಏತಿಸ್ಸಾ ಅಕಿತ್ತಿ ಮಯ್ಹೇಸಾ ಅಕಿತ್ತಿ, ಯೋ ಏತಿಸ್ಸಾ ಅಯಸೋ ಮಯ್ಹೇಸೋ ಅಯಸೋ, ಯೋ ಏತಿಸ್ಸಾ ಅಲಾಭೋ ಮಯ್ಹೇಸೋ ಅಲಾಭೋ. ಕ್ಯಾಹಂ, ಅಯ್ಯೇ, ಅತ್ತನೋ ಅವಣ್ಣಂ ಅತ್ತನೋ ಅಕಿತ್ತಿಂ ಅತ್ತನೋ ಅಯಸಂ ಅತ್ತನೋ ಅಲಾಭಂ ಪರೇಸಂ ಆರೋಚೇಸ್ಸಾಮೀ’’ತಿ? ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸ್ಸತಿ ನ ಗಣಸ್ಸ ಆರೋಚೇಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಭಿಕ್ಖೂ [ಯೇ ತೇ ಭಿಕ್ಖೂ…ಪೇ… (?)] ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇತಿ [ಪಟಿಚೋದೇಸಿ… ಆರೋಚೇಸೀತಿ (ಕ.)] ನ ಗಣಸ್ಸ ಆರೋಚೇತೀ’’ತಿ [ಪಟಿಚೋದೇಸಿ… ಆರೋಚೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸ್ಸತಿ ನ ಗಣಸ್ಸ ಆರೋಚೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೬೫. ‘‘ಯಾ ಪನ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಯ್ಯ ನ ಗಣಸ್ಸ ಆರೋಚೇಯ್ಯ, ಯದಾ ಚ ಸಾ ಠಿತಾ ವಾ ಅಸ್ಸ ಚುತಾ ವಾ ನಾಸಿತಾ ವಾ ಅವಸ್ಸಟಾ ವಾ, ಸಾ ಪಚ್ಛಾ ಏವಂ ವದೇಯ್ಯ – ‘ಪುಬ್ಬೇವಾಹಂ, ಅಯ್ಯೇ, ಅಞ್ಞಾಸಿಂ ಏತಂ ಭಿಕ್ಖುನಿಂ ಏವರೂಪಾ ಚ ಏವರೂಪಾ ಚ ಸಾ ಭಗಿನೀತಿ, ನೋ ಚ ಖೋ ಅತ್ತನಾ ಪಟಿಚೋದೇಸ್ಸಂ ನ ಗಣಸ್ಸ ಆರೋಚೇಸ್ಸ’ನ್ತಿ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ವಜ್ಜಪ್ಪಟಿಚ್ಛಾದಿಕಾ’’ತಿ.

೬೬೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಜಾನಾತಿ ನಾಮ ಸಾಮಂ ವಾ ಜಾನಾತಿ, ಅಞ್ಞೇ ವಾ ತಸ್ಸಾ ಆರೋಚೇನ್ತಿ, ಸಾ ವಾ ಆರೋಚೇತಿ.

ಪಾರಾಜಿಕಂ ಧಮ್ಮಂ ಅಜ್ಝಾಪನ್ನನ್ತಿ ಅಟ್ಠನ್ನಂ ಪಾರಾಜಿಕಾನಂ ಅಞ್ಞತರಂ ಪಾರಾಜಿಕಂ ಅಜ್ಝಾಪನ್ನಂ.

ನೇವತ್ತನಾ ಪಟಿಚೋದೇಯ್ಯಾತಿ ನ ಸಯಂ ಚೋದೇಯ್ಯ.

ನ ಗಣಸ್ಸ ಆರೋಚೇಯ್ಯಾತಿ ನ ಅಞ್ಞಾಸಂ ಭಿಕ್ಖುನೀನಂ ಆರೋಚೇಯ್ಯ.

ಯದಾ ಚ ಸಾ ಠಿತಾ ವಾ ಅಸ್ಸ ಚುತಾ ವಾತಿ ಠಿತಾ ನಾಮ ಸಲಿಙ್ಗೇ ಠಿತಾ ವುಚ್ಚತಿ. ಚುತಾ ನಾಮ ಕಾಲಙ್ಕತಾ ವುಚ್ಚತಿ. ನಾಸಿತಾ ನಾಮ ಸಯಂ ವಾ ವಿಬ್ಭನ್ತಾ ಹೋತಿ ಅಞ್ಞೇಹಿ ವಾ ನಾಸಿತಾ. ಅವಸ್ಸಟಾ ನಾಮ ತಿತ್ಥಾಯತನಂ ಸಙ್ಕನ್ತಾ ವುಚ್ಚತಿ. ಸಾ ಪಚ್ಛಾ ಏವಂ ವದೇಯ್ಯ – ‘‘ಪುಬ್ಬೇವಾಹಂ, ಅಯ್ಯೇ, ಅಞ್ಞಾಸಿಂ ಏತಂ ಭಿಕ್ಖುನಿಂ ಏವರೂಪಾ ಚ ಏವರೂಪಾ ಚ ಸಾ ಭಗಿನೀ’’ತಿ.

ನೋ ಚ ಖೋ ಅತ್ತನಾ ಪಟಿಚೋದೇಸ್ಸನ್ತಿ ಸಯಂ ವಾ ನ ಚೋದೇಸ್ಸಂ.

ನ ಗಣಸ್ಸ ಆರೋಚೇಸ್ಸನ್ತಿ ನ ಅಞ್ಞಾಸಂ ಭಿಕ್ಖುನೀನಂ ಆರೋಚೇಸ್ಸಂ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಾರಾಜಿಕಾ ಹೋತೀತಿ ಸೇಯ್ಯಥಾಪಿ ನಾಮ ಪಣ್ಡುಪಲಾಸೋ ಬನ್ಧನಾ ಪಮುತ್ತೋ ಅಭಬ್ಬೋ ಹರಿತತ್ಥಾಯ, ಏವಮೇವ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸ್ಸಾಮಿ ನ ಗಣಸ್ಸ ಆರೋಚೇಸ್ಸಾಮೀತಿ ಧುರಂ ನಿಕ್ಖಿತ್ತಮತ್ತೇ ಅಸ್ಸಮಣೀ ಹೋತಿ ಅಸಕ್ಯಧೀತಾ. ತೇನ ವುಚ್ಚತಿ ಪಾರಾಜಿಕಾ ಹೋತೀತಿ.

ಅಸಂವಾಸಾತಿ ಸಂವಾಸೋ ನಾಮ ಏಕಕಮ್ಮಂ ಏಕುದ್ದೇಸೋ ಸಮಸಿಕ್ಖತಾ. ಏಸೋ ಸಂವಾಸೋ ನಾಮ. ಸೋ ತಾಯ ಸದ್ಧಿಂ ನತ್ಥಿ. ತೇನ ವುಚ್ಚತಿ ಅಸಂವಾಸಾತಿ.

೬೬೭. ಅನಾಪತ್ತಿ ‘‘ಸಙ್ಘಸ್ಸ ಭಣ್ಡನಂ ವಾ ಕಲಹೋ ವಾ ವಿಗ್ಗಹೋ ವಾ ವಿವಾದೋ ವಾ ಭವಿಸ್ಸತೀ’’ತಿ ನಾರೋಚೇತಿ, ‘‘ಸಙ್ಘಭೇದೋ ವಾ ಸಙ್ಘರಾಜಿ ವಾ ಭವಿಸ್ಸತೀ’’ತಿ ನಾರೋಚೇತಿ, ‘‘ಅಯಂ ಕಕ್ಖಳಾ ಫರುಸಾ ಜೀವಿತನ್ತರಾಯಂ ವಾ ಬ್ರಹ್ಮಚರಿಯನ್ತರಾಯಂ ವಾ ಕರಿಸ್ಸತೀ’’ತಿ ನಾರೋಚೇತಿ, ಅಞ್ಞಾ ಪತಿರೂಪಾ ಭಿಕ್ಖುನಿಯೋ ಅಪಸ್ಸನ್ತೀ ನಾರೋಚೇತಿ, ನಚ್ಛಾದೇತುಕಾಮಾ ನಾರೋಚೇತಿ, ಪಞ್ಞಾಯಿಸ್ಸತಿ ಸಕೇನ ಕಮ್ಮೇನಾತಿ ನಾರೋಚೇತಿ, ಉಮ್ಮತ್ತಿಕಾಯ…ಪೇ… ಆದಿಕಮ್ಮಿಕಾಯಾತಿ.

ದುತಿಯಪಾರಾಜಿಕಂ ಸಮತ್ತಂ.

೩. ತತಿಯಪಾರಾಜಿಕಂ

೬೬೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಅರಿಟ್ಠಂ ಭಿಕ್ಖುಂ ಗದ್ಧಬಾಧಿಪುಬ್ಬಂ ಅನುವತ್ತತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಅರಿಟ್ಠಂ ಭಿಕ್ಖುಂ ಗದ್ಧಬಾಧಿಪುಬ್ಬಂ ಅನುವತ್ತಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಅರಿಟ್ಠಂ ಭಿಕ್ಖುಂ ಗದ್ಧಬಾಧಿಪುಬ್ಬಂ ಅನುವತ್ತತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಅರಿಟ್ಠಂ ಭಿಕ್ಖುಂ ಗದ್ಧಬಾಧಿಪುಬ್ಬಂ ಅನುವತ್ತಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೬೯. ‘‘ಯಾ ಪನ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರಂ ಅಪ್ಪಟಿಕಾರಂ ಅಕತಸಹಾಯಂ ತಮನುವತ್ತೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಏವಮಸ್ಸ ವಚನೀಯಾ – ‘ಏಸೋ ಖೋ, ಅಯ್ಯೇ, ಭಿಕ್ಖು ಸಮಗ್ಗೇನ ಸಙ್ಘೇನ ಉಕ್ಖಿತ್ತೋ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರೋ ಅಪ್ಪಟಿಕಾರೋ ಅಕತಸಹಾಯೋ, ಮಾಯ್ಯೇ, ಏತಂ ಭಿಕ್ಖುಂ ಅನುವತ್ತೀ’ತಿ. ಏವಞ್ಚ ಸಾ ಭಿಕ್ಖುನೀ ಭಿಕ್ಖುನೀಹಿ ವುಚ್ಚಮಾನಾ ತಥೇವ ಪಗ್ಗಣ್ಹೇಯ್ಯ, ಸಾ ಭಿಕ್ಖುನೀ ಭಿಕ್ಖುನೀಹಿ ಯಾವತತಿಯಂ ಸಮನುಭಾಸಿತಬ್ಬಾ ತಸ್ಸ ಪಟಿನಿಸ್ಸಗ್ಗಾಯ. ಯಾವತತಿಯಂ ಚೇ ಸಮನುಭಾಸಿಯಮಾನಾ ತಂ ಪಟಿನಿಸ್ಸಜ್ಜೇಯ್ಯ, ಇಚ್ಚೇತಂ ಕುಸಲಂ. ನೋ ಚೇ ಪಟಿನಿಸ್ಸಜ್ಜೇಯ್ಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ಉಕ್ಖಿತ್ತಾನುವತ್ತಿಕಾ’’ತಿ.

೬೭೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಸಮಗ್ಗೋ ನಾಮ ಸಙ್ಘೋ ಸಮಾನಸಂವಾಸಕೋ ಸಮಾನಸೀಮಾಯಂ ಠಿತೋ.

ಉಕ್ಖಿತ್ತೋ ನಾಮ ಆಪತ್ತಿಯಾ ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಅಪ್ಪಟಿನಿಸ್ಸಗ್ಗೇ ವಾ [ಅದಸ್ಸನೇನ ವಾ ಅಪ್ಪಟಿಕಮ್ಮೇನ ವಾ ಅಪ್ಪಟಿನಿಸ್ಸಗ್ಗೇನ ವಾ (ಕ.), ಅದಸ್ಸನೇ ವಾ ಅಪ್ಪಟಿಕಮ್ಮೇ ವಾ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ವಾ (?)] ಉಕ್ಖಿತ್ತೋ.

ಧಮ್ಮೇನ ವಿನಯೇನಾತಿ ಯೇನ ಧಮ್ಮೇನ ಯೇನ ವಿನಯೇನ.

ಸತ್ಥುಸಾಸನೇನಾತಿ ಜಿನಸಾಸನೇನ ಬುದ್ಧಸಾಸನೇನ.

ಅನಾದರೋ ನಾಮ ಸಙ್ಘಂ ವಾ ಗಣಂ ವಾ ಪುಗ್ಗಲಂ ವಾ ಕಮ್ಮಂ ವಾ ನಾದಿಯತಿ.

ಅಪ್ಪಟಿಕಾರೋ ನಾಮ ಉಕ್ಖಿತ್ತೋ ಅನೋಸಾರಿತೋ.

ಅಕತಸಹಾಯೋ ನಾಮ ಸಮಾನಸಂವಾಸಕಾ ಭಿಕ್ಖೂ ವುಚ್ಚನ್ತಿ ಸಹಾಯಾ. ಸೋ ತೇಹಿ ಸದ್ಧಿಂ ನತ್ಥಿ, ತೇನ ವುಚ್ಚತಿ ಅಕತಸಹಾಯೋತಿ.

ತಮನುವತ್ತೇಯ್ಯಾತಿ ಯಂದಿಟ್ಠಿಕೋ ಸೋ ಹೋತಿ ಯಂಖನ್ತಿಕೋ ಯಂರುಚಿಕೋ, ಸಾಪಿ ತಂದಿಟ್ಠಿಕಾ ಹೋತಿ ತಂಖನ್ತಿಕಾ ತಂರುಚಿಕಾ.

ಸಾ ಭಿಕ್ಖುನೀತಿ ಯಾ ಸಾ ಉಕ್ಖಿತ್ತಾನುವತ್ತಿಕಾ ಭಿಕ್ಖುನೀ.

ಭಿಕ್ಖುನೀಹೀತಿ ಅಞ್ಞಾಹಿ ಭಿಕ್ಖುನೀಹಿ. ಯಾ ಪಸ್ಸನ್ತಿ ಯಾ ಸುಣನ್ತಿ ತಾಹಿ ವತ್ತಬ್ಬಾ – ‘‘ಏಸೋ ಖೋ, ಅಯ್ಯೇ, ಭಿಕ್ಖು ಸಮಗ್ಗೇನ ಸಙ್ಘೇನ ಉಕ್ಖಿತ್ತೋ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರೋ ಅಪ್ಪಟಿಕಾರೋ ಅಕತಸಹಾಯೋ. ಮಾಯ್ಯೇ, ಏತಂ ಭಿಕ್ಖುಂ ಅನುವತ್ತೀ’’ತಿ. ದುತಿಯಮ್ಪಿ ವತ್ತಬ್ಬಾ. ತತಿಯಮ್ಪಿ ವತ್ತಬ್ಬಾ. ಸಚೇ ಪಟಿನಿಸ್ಸಜ್ಜತಿ, ಇಚ್ಚೇತಂ ಕುಸಲಂ; ನೋ ಚೇ ಪಟಿನಿಸ್ಸಜ್ಜತಿ, ಆಪತ್ತಿ ದುಕ್ಕಟಸ್ಸ. ಸುತ್ವಾ ನ ವದನ್ತಿ, ಆಪತ್ತಿ ದುಕ್ಕಟಸ್ಸ. ಸಾ ಭಿಕ್ಖುನೀ ಸಙ್ಘಮಜ್ಝಮ್ಪಿ ಆಕಡ್ಢಿತ್ವಾ ವತ್ತಬ್ಬಾ – ‘‘ಏಸೋ ಖೋ, ಅಯ್ಯೇ, ಭಿಕ್ಖು ಸಮಗ್ಗೇನ ಸಙ್ಘೇನ ಉಕ್ಖಿತ್ತೋ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರೋ ಅಪ್ಪಟಿಕಾರೋ ಅಕತಸಹಾಯೋ. ಮಾಯ್ಯೇ, ಏತಂ ಭಿಕ್ಖುಂ ಅನುವತ್ತೀ’’ತಿ. ದುತಿಯಮ್ಪಿ ವತ್ತಬ್ಬಾ. ತತಿಯಮ್ಪಿ ವತ್ತಬ್ಬಾ. ಸಚೇ ಪಟಿನಿಸ್ಸಜ್ಜತಿ, ಇಚ್ಚೇತಂ ಕುಸಲಂ. ನೋ ಚೇ ಪಟಿನಿಸ್ಸಜ್ಜತಿ, ಆಪತ್ತಿ ದುಕ್ಕಟಸ್ಸ. ಸಾ ಭಿಕ್ಖುನೀ ಸಮನುಭಾಸಿತಬ್ಬಾ. ಏವಞ್ಚ ಪನ, ಭಿಕ್ಖವೇ, ಸಮನುಭಾಸಿತಬ್ಬಾ. ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –

೬೭೧. ‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರಂ ಅಪ್ಪಟಿಕಾರಂ ಅಕತಸಹಾಯಂ ತಮನುವತ್ತತಿ, ಸಾ ತಂ ವತ್ಥುಂ ನ ಪಟಿನಿಸ್ಸಜ್ಜತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮನುಭಾಸೇಯ್ಯ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ. ಏಸಾ ಞತ್ತಿ.

‘‘ಸುಣಾತು ಮೇ, ಅಯ್ಯೇ, ಸಙ್ಘೋ. ಅಯಂ ಇತ್ಥನ್ನಾಮಾ ಭಿಕ್ಖುನೀ ಸಮಗ್ಗೇನ ಸಙ್ಘೇನ ಉಕ್ಖಿತ್ತಂ ಭಿಕ್ಖುಂ ಧಮ್ಮೇನ ವಿನಯೇನ ಸತ್ಥುಸಾಸನೇನ ಅನಾದರಂ ಅಪ್ಪಟಿಕಾರಂ ಅಕತಸಹಾಯಂ ತಮನುವತ್ತತಿ. ಸಾ ತಂ ವತ್ಥುಂ ನ ಪಟಿನಿಸ್ಸಜ್ಜತಿ. ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮನುಭಾಸತಿ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ. ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮನುಭಾಸನಾ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ…ಪೇ….

‘‘ಸಮನುಭಟ್ಠಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ತಸ್ಸ ವತ್ಥುಸ್ಸ ಪಟಿನಿಸ್ಸಗ್ಗಾಯ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಞತ್ತಿಯಾ ದುಕ್ಕಟಂ, ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ, ಕಮ್ಮವಾಚಾ ಪರಿಯೋಸಾನೇ ಆಪತ್ತಿ ಪಾರಾಜಿಕಸ್ಸ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಾರಾಜಿಕಾ ಹೋತೀತಿ ಸೇಯ್ಯಥಾಪಿ ನಾಮ ಪುಥುಸಿಲಾ ದ್ವೇಧಾ ಭಿನ್ನಾ ಅಪ್ಪಟಿಸನ್ಧಿಕಾ ಹೋತಿ, ಏವಮೇವ ಭಿಕ್ಖುನೀ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತೀ ಅಸ್ಸಮಣೀ ಹೋತಿ ಅಸಕ್ಯಧೀತಾ. ತೇನ ವುಚ್ಚತಿ ಪಾರಾಜಿಕಾ ಹೋತೀತಿ.

೬೭೨. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಕಮ್ಮೇ ವೇಮತಿಕಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಪಾರಾಜಿಕಸ್ಸ. ಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ ನ ಪಟಿನಿಸ್ಸಜ್ಜತಿ, ಆಪತ್ತಿ ಪಾರಾಜಿಕಸ್ಸ.

ಅಧಮ್ಮಕಮ್ಮೇ ಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಕಮ್ಮೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಕಮ್ಮೇ ಅಧಮ್ಮಕಮ್ಮಸಞ್ಞಾ, ಆಪತ್ತಿ ದುಕ್ಕಟಸ್ಸ.

೬೭೩. ಅನಾಪತ್ತಿ ಅಸಮನುಭಾಸನ್ತಿಯಾ, ಪಟಿನಿಸ್ಸಜ್ಜನ್ತಿಯಾ, ಉಮ್ಮತ್ತಿಕಾಯ…ಪೇ… ಆದಿಕಮ್ಮಿಕಾಯಾತಿ.

ತತಿಯಪಾರಾಜಿಕಂ ಸಮತ್ತಂ.

೪. ಚತುತ್ಥಪಾರಾಜಿಕಂ

೬೭೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಮ್ಪಿ ಸಾದಿಯನ್ತಿ, ಸಙ್ಘಾಟಿಕಣ್ಣಗ್ಗಹಣಮ್ಪಿ ಸಾದಿಯನ್ತಿ, ಸನ್ತಿಟ್ಠನ್ತಿಪಿ, ಸಲ್ಲಪನ್ತಿಪಿ, ಸಙ್ಕೇತಮ್ಪಿ ಗಚ್ಛನ್ತಿ, ಪುರಿಸಸ್ಸಪಿ ಅಬ್ಭಾಗಮನಂ ಸಾದಿಯನ್ತಿ, ಛನ್ನಮ್ಪಿ ಅನುಪವಿಸನ್ತಿ, ಕಾಯಮ್ಪಿ ತದತ್ಥಾಯ ಉಪಸಂಹರನ್ತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಮ್ಪಿ ಸಾದಿಯಿಸ್ಸನ್ತಿ, ಸಙ್ಘಾಟಿಕಣ್ಣಗ್ಗಹಣಮ್ಪಿ ಸಾದಿಯಿಸ್ಸನ್ತಿ, ಸನ್ತಿಟ್ಠಿಸ್ಸನ್ತಿಪಿ, ಸಲ್ಲಪಿಸ್ಸನ್ತಿಪಿ, ಸಙ್ಕೇತಮ್ಪಿ ಗಚ್ಛಿಸ್ಸನ್ತಿ, ಪುರಿಸಸ್ಸಪಿ ಅಬ್ಭಾಗಮನಂ ಸಾದಿಯಿಸ್ಸನ್ತಿ, ಛನ್ನಮ್ಪಿ ಅನುಪವಿಸಿಸ್ಸನ್ತಿ, ಕಾಯಮ್ಪಿ ತದತ್ಥಾಯ ಉಪಸಂಹರಿಸ್ಸನ್ತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯಾ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಮ್ಪಿ ಸಾದಿಯನ್ತಿ, ಸಙ್ಘಾಟಿಕಣ್ಣಗ್ಗಹಣಮ್ಪಿ ಸಾದಿಯನ್ತಿ, ಸನ್ತಿಟ್ಠನ್ತಿಪಿ, ಸಲ್ಲಪನ್ತಿಪಿ, ಸಙ್ಕೇತಮ್ಪಿ ಗಚ್ಛನ್ತಿ, ಪುರಿಸಸ್ಸಪಿ ಅಬ್ಭಾಗಮನಂ ಸಾದಿಯನ್ತಿ, ಛನ್ನಮ್ಪಿ ಅನುಪವಿಸನ್ತಿ, ಕಾಯಮ್ಪಿ ತದತ್ಥಾಯ ಉಪಸಂಹರನ್ತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯಾತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಮ್ಪಿ ಸಾದಿಯಿಸ್ಸನ್ತಿ, ಸಙ್ಘಾಟಿಕಣ್ಣಗ್ಗಹಣಮ್ಪಿ ಸಾದಿಯಿಸ್ಸನ್ತಿ, ಸನ್ತಿಟ್ಠಿಸ್ಸನ್ತಿಪಿ, ಸಲ್ಲಪಿಸ್ಸನ್ತಿಪಿ, ಸಙ್ಕೇತಮ್ಪಿ ಗಚ್ಛಿಸ್ಸನ್ತಿ, ಪುರಿಸಸ್ಸಪಿ ಅಬ್ಭಾಗಮನಂ ಸಾದಿಯಿಸ್ಸನ್ತಿ, ಛನ್ನಮ್ಪಿ ಅನುಪವಿಸಿಸ್ಸನ್ತಿ, ಕಾಯಮ್ಪಿ ತದತ್ಥಾಯ ಉಪಸಂಹರಿಸ್ಸನ್ತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೭೫. ‘‘ಯಾ ಪನ ಭಿಕ್ಖುನೀ ಅವಸ್ಸುತಾ ಅವಸ್ಸುತಸ್ಸ ಪುರಿಸಪುಗ್ಗಲಸ್ಸ ಹತ್ಥಗ್ಗಹಣಂ ವಾ ಸಾದಿಯೇಯ್ಯ, ಸಙ್ಘಾಟಿಕಣ್ಣಗ್ಗಹಣಂ ವಾ ಸಾದಿಯೇಯ್ಯ, ಸನ್ತಿಟ್ಠೇಯ್ಯ ವಾ, ಸಲ್ಲಪೇಯ್ಯ ವಾ, ಸಙ್ಕೇತಂ ವಾ ಗಚ್ಛೇಯ್ಯ, ಪುರಿಸಸ್ಸ ವಾ ಅಬ್ಭಾಗಮನಂ ಸಾದಿಯೇಯ್ಯ, ಛನ್ನಂ ವಾ ಅನುಪವಿಸೇಯ್ಯ, ಕಾಯಂ ವಾ ತದತ್ಥಾಯ ಉಪಸಂಹರೇಯ್ಯ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ಅಟ್ಠವತ್ಥುಕಾ’’ತಿ.

೬೭೬. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅವಸ್ಸುತಾ ನಾಮ ಸಾರತ್ತಾ ಅಪೇಕ್ಖವತೀ ಪಟಿಬದ್ಧಚಿತ್ತಾ.

ಅವಸ್ಸುತೋ ನಾಮ ಸಾರತ್ತೋ ಅಪೇಕ್ಖವಾ ಪಟಿಬದ್ಧಚಿತ್ತೋ.

ಪುರಿಸಪುಗ್ಗಲೋ ನಾಮ ಮನುಸ್ಸಪುರಿಸೋ, ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ ವಿಞ್ಞೂ ಪಟಿಬಲೋ ಕಾಯಸಂಸಗ್ಗಂ ಸಮಾಪಜ್ಜಿತುಂ.

ಹತ್ಥಗ್ಗಹಣಂ ವಾ ಸಾದಿಯೇಯ್ಯಾತಿ ಹತ್ಥೋ ನಾಮ ಕಪ್ಪರಂ ಉಪಾದಾಯ ಯಾವ ಅಗ್ಗನಖಾ. ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಉಬ್ಭಕ್ಖಕಂ ಅಧೋಜಾಣುಮಣ್ಡಲಂ ಗಹಣಂ ಸಾದಿಯತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಸಙ್ಘಾಟಿಕಣ್ಣಗ್ಗಹಣಂ ವಾ ಸಾದಿಯೇಯ್ಯಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ನಿವತ್ಥಂ ವಾ ಪಾರುತಂ ವಾ ಗಹಣಂ ಸಾದಿಯತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಸನ್ತಿಟ್ಠೇಯ್ಯ ವಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಸಲ್ಲಪೇಯ್ಯ ವಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಸಙ್ಕೇತಂ ವಾ ಗಚ್ಛೇಯ್ಯಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸೇನ – ‘‘ಇತ್ಥನ್ನಾಮಂ ಓಕಾಸಂ [ಇದಂ ಪದಂ ಅಟ್ಠಕಥಾಯಂ ನ ದಿಸ್ಸತಿ] ಆಗಚ್ಛಾ’’ತಿ – ವುತ್ತಾ ಗಚ್ಛತಿ. ಪದೇ ಪದೇ ಆಪತ್ತಿ ದುಕ್ಕಟಸ್ಸ. ಪುರಿಸಸ್ಸ ಹತ್ಥಪಾಸಂ ಓಕ್ಕನ್ತಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸ.

ಪುರಿಸಸ್ಸ ವಾ ಅಬ್ಭಾಗಮನಂ ಸಾದಿಯೇಯ್ಯಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸಸ್ಸ ಅಬ್ಭಾಗಮನಂ ಸಾದಿಯತಿ, ಆಪತ್ತಿ ದುಕ್ಕಟಸ್ಸ. ಹತ್ಥಪಾಸಂ ಓಕ್ಕನ್ತಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸ.

ಛನ್ನಂ ವಾ ಅನುಪವಿಸೇಯ್ಯಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಯೇನ ಕೇನಚಿ ಪಟಿಚ್ಛನ್ನಂ ಓಕಾಸಂ ಪವಿಟ್ಠಮತ್ತೇ ಆಪತ್ತಿ ಥುಲ್ಲಚ್ಚಯಸ್ಸ.

ಕಾಯಂ ವಾ ತದತ್ಥಾಯ ಉಪಸಂಹರೇಯ್ಯಾತಿ ಏತಸ್ಸ ಅಸದ್ಧಮ್ಮಸ್ಸ ಪಟಿಸೇವನತ್ಥಾಯ ಪುರಿಸಸ್ಸ ಹತ್ಥಪಾಸೇ ಠಿತಾ ಕಾಯಂ ಉಪಸಂಹರತಿ, ಆಪತ್ತಿ ಥುಲ್ಲಚ್ಚಯಸ್ಸ.

ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ.

ಪಾರಾಜಿಕಾ ಹೋತೀತಿ ಸೇಯ್ಯಥಾಪಿ ನಾಮ ತಾಲೋ ಮತ್ಥಕಚ್ಛಿನ್ನೋ ಅಭಬ್ಬೋ ಪುನ ವಿರುಳ್ಹಿಯಾ ಏವಮೇವ ಭಿಕ್ಖುನೀ ಅಟ್ಠಮಂ ವತ್ಥುಂ ಪರಿಪೂರೇನ್ತೀ ಅಸ್ಸಮಣೀ ಹೋತಿ ಅಸಕ್ಯಧೀತಾ. ತೇನ ವುಚ್ಚತಿ ಪಾರಾಜಿಕಾ ಹೋತೀತಿ.

೬೭೭. ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಿಯಾ, ಅಸಾದಿಯನ್ತಿಯಾ, ಉಮ್ಮತ್ತಿಕಾಯ, ಖಿತ್ತಚಿತ್ತಾಯ, ವೇದನಾಟ್ಟಾಯ, ಆದಿಕಮ್ಮಿಕಾಯಾತಿ.

ಚತುತ್ಥಪಾರಾಜಿಕಂ ಸಮತ್ತಂ.

ಉದ್ದಿಟ್ಠಾ ಖೋ, ಅಯ್ಯಾಯೋ, ಅಟ್ಠ ಪಾರಾಜಿಕಾ ಧಮ್ಮಾ. ಯೇಸಂ ಭಿಕ್ಖುನೀ ಅಞ್ಞತರಂ ವಾ ಅಞ್ಞತರಂ ವಾ ಆಪಜ್ಜಿತ್ವಾ ನ ಲಭತಿ ಭಿಕ್ಖುನೀಹಿ ಸದ್ಧಿಂ ಸಂವಾಸಂ, ಯಥಾ ಪುರೇ ತಥಾ ಪಚ್ಛಾ, ಪಾರಾಜಿಕಾ ಹೋತಿ ಅಸಂವಾಸಾ. ತತ್ಥಾಯ್ಯಾಯೋ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ದುತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ತತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ಪರಿಸುದ್ಧೇತ್ಥಾಯ್ಯಾಯೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

ಭಿಕ್ಖುನಿವಿಭಙ್ಗೇ ಪಾರಾಜಿಕಕಣ್ಡಂ ನಿಟ್ಠಿತಂ.

೨. ಸಙ್ಘಾದಿಸೇಸಕಣ್ಡಂ (ಭಿಕ್ಖುನೀವಿಭಙ್ಗೋ)

೧. ಪಠಮಸಙ್ಘಾದಿಸೇಸಸಿಕ್ಖಾಪದಂ

ಇಮೇ ಖೋ ಪನಾಯ್ಯಾಯೋ ಸತ್ತರಸ ಸಙ್ಘಾದಿಸೇಸಾ

ಧಮ್ಮಾ ಉದ್ದೇಸಂ ಆಗಚ್ಛನ್ತಿ.

೬೭೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೋ ಉಪಾಸಕೋ ಭಿಕ್ಖುನಿಸಙ್ಘಸ್ಸ ಉದೋಸಿತಂ [ಉದ್ದೋಸಿತಂ (ಸೀ. ಸ್ಯಾ.)] ದತ್ವಾ ಕಾಲಙ್ಕತೋ ಹೋತಿ. ತಸ್ಸ ದ್ವೇ ಪುತ್ತಾ ಹೋನ್ತಿ – ಏಕೋ ಅಸ್ಸದ್ಧೋ ಅಪ್ಪಸನ್ನೋ, ಏಕೋ ಸದ್ಧೋ ಪಸನ್ನೋ. ತೇ ಪೇತ್ತಿಕಂ ಸಾಪತೇಯ್ಯಂ ವಿಭಜಿಂಸು. ಅಥ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏತದವೋಚ – ‘‘ಅಮ್ಹಾಕಂ ಉದೋಸಿತೋ, ತಂ ಭಾಜೇಮಾ’’ತಿ. ಏವಂ ವುತ್ತೇ ಸೋ ಸದ್ಧೋ ಪಸನ್ನೋ ತಂ ಅಸ್ಸದ್ಧಂ ಅಪ್ಪಸನ್ನಂ ಏತದವೋಚ – ‘‘ಮಾಯ್ಯೋ, ಏವಂ ಅವಚ. ಅಮ್ಹಾಕಂ ಪಿತುನಾ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ. ದುತಿಯಮ್ಪಿ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏತದವೋಚ – ‘‘ಅಮ್ಹಾಕಂ ಉದೋಸಿತೋ, ತಂ ಭಾಜೇಮಾ’’ತಿ. ಅಥ ಖೋ ಸೋ ಸದ್ಧೋ ಪಸನ್ನೋ ತಂ ಅಸ್ಸದ್ಧಂ ಅಪ್ಪಸನ್ನಂ ಏತದವೋಚ – ‘‘ಮಾಯ್ಯೋ, ಏವಂ ಅವಚ. ಅಮ್ಹಾಕಂ ಪಿತುನಾ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ. ತತಿಯಮ್ಪಿ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏತದವೋಚ – ‘‘ಅಮ್ಹಾಕಂ ಉದೋಸಿತೋ, ತಂ ಭಾಜೇಮಾ’’ತಿ. ಅಥ ಖೋ ಸೋ ಸದ್ಧೋ ಪಸನ್ನೋ – ‘‘ಸಚೇ ಮಯ್ಹಂ ಭವಿಸ್ಸತಿ, ಅಹಮ್ಪಿ ಭಿಕ್ಖುನಿಸಙ್ಘಸ್ಸ ದಸ್ಸಾಮೀ’’ತಿ – ತಂ ಅಸ್ಸದ್ಧಂ ಅಪ್ಪಸನ್ನಂ ಏತದವೋಚ – ‘‘ಭಾಜೇಮಾ’’ತಿ. ಅಥ ಖೋ ಸೋ ಉದೋಸಿತೋ ತೇಹಿ ಭಾಜೀಯಮಾನೋ ತಸ್ಸ ಅಸ್ಸದ್ಧಸ್ಸ ಅಪ್ಪಸನ್ನಸ್ಸ ಪಾಪುಣಾತಿ [ಪಾಪುಣಿ (ಸ್ಯಾ.)]. ಅಥ ಖೋ ಸೋ ಅಸ್ಸದ್ಧೋ ಅಪ್ಪಸನ್ನೋ ಭಿಕ್ಖುನಿಯೋ ಉಪಸಙ್ಕಮಿತ್ವಾ ಏತದವೋಚ – ‘‘ನಿಕ್ಖಮಥಾಯ್ಯೇ, ಅಮ್ಹಾಕಂ ಉದೋಸಿತೋ’’ತಿ.

ಏವಂ ವುತ್ತೇ ಥುಲ್ಲನನ್ದಾ ಭಿಕ್ಖುನೀ ತಂ ಪುರಿಸಂ ಏತದವೋಚ – ‘‘ಮಾಯ್ಯೋ, ಏವಂ ಅವಚ, ತುಮ್ಹಾಕಂ ಪಿತುನಾ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ. ‘‘ದಿನ್ನೋ ನ ದಿನ್ನೋ’’ತಿ ವೋಹಾರಿಕೇ ಮಹಾಮತ್ತೇ ಪುಚ್ಛಿಂಸು. ಮಹಾಮತ್ತಾ ಏವಮಾಹಂಸು – ‘‘ಕೋ, ಅಯ್ಯೇ, ಜಾನಾತಿ ಭಿಕ್ಖುನಿಸಙ್ಘಸ್ಸ ದಿನ್ನೋ’’ತಿ? ಏವಂ ವುತ್ತೇ ಥುಲ್ಲನನ್ದಾ ಭಿಕ್ಖುನೀ ತೇ ಮಹಾಮತ್ತೇ ಏತದವೋಚ – ‘‘ಅಪಿ ನಾಯ್ಯೋ [ಅಪಿ ನ್ವಯ್ಯಾ (ಸ್ಯಾ.), ಅಪಿ ನಾಯ್ಯೋ (ಕ.)] ತುಮ್ಹೇಹಿ ದಿಟ್ಠಂ ವಾ ಸುತಂ ವಾ ಸಕ್ಖಿಂ ಠಪಯಿತ್ವಾ ದಾನಂ ದಿಯ್ಯಮಾನ’’ನ್ತಿ? ಅಥ ಖೋ ತೇ ಮಹಾಮತ್ತಾ – ‘‘ಸಚ್ಚಂ ಖೋ ಅಯ್ಯಾ ಆಹಾ’’ತಿ ತಂ ಉದೋಸಿತಂ ಭಿಕ್ಖುನಿಸಙ್ಘಸ್ಸ ಅಕಂಸು. ಅಥ ಖೋ ಸೋ ಪುರಿಸೋ ಪರಾಜಿತೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಅಸ್ಸಮಣಿಯೋ ಇಮಾ ಮುಣ್ಡಾ ಬನ್ಧಕಿನಿಯೋ. ಕಥಞ್ಹಿ ನಾಮ ಅಮ್ಹಾಕಂ ಉದೋಸಿತಂ ಅಚ್ಛಿನ್ದಾಪೇಸ್ಸನ್ತೀ’’ತಿ! ಥುಲ್ಲನನ್ದಾ ಭಿಕ್ಖುನೀ ಮಹಾಮತ್ತಾನಂ ಏತಮತ್ಥಂ ಆರೋಚೇಸಿ. ಮಹಾಮತ್ತಾ ತಂ ಪುರಿಸಂ ದಣ್ಡಾಪೇಸುಂ. ಅಥ ಖೋ ಸೋ ಪುರಿಸೋ ದಣ್ಡಿತೋ ಭಿಕ್ಖುನೂಪಸ್ಸಯಸ್ಸ ಅವಿದೂರೇ ಆಜೀವಕಸೇಯ್ಯಂ ಕಾರಾಪೇತ್ವಾ ಆಜೀವಕೇ ಉಯ್ಯೋಜೇಸಿ – ‘‘ಏತಾ ಭಿಕ್ಖುನಿಯೋ ಅಚ್ಚಾವದಥಾ’’ತಿ.

ಥುಲ್ಲನನ್ದಾ ಭಿಕ್ಖುನೀ ಮಹಾಮತ್ತಾನಂ ಏತಮತ್ಥಂ ಆರೋಚೇಸಿ. ಮಹಾಮತ್ತಾ ತಂ ಪುರಿಸಂ ಬನ್ಧಾಪೇಸುಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಪಠಮಂ ಭಿಕ್ಖುನಿಯೋ ಉದೋಸಿತಂ ಅಚ್ಛಿನ್ದಾಪೇಸುಂ, ದುತಿಯಂ ದಣ್ಡಾಪೇಸುಂ, ತತಿಯಂ ಬನ್ಧಾಪೇಸುಂ. ಇದಾನಿ ಘಾತಾಪೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಉಸ್ಸಯವಾದಿಕಾ ವಿಹರಿಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಉಸ್ಸಯವಾದಿಕಾ ವಿಹರತೀತಿ. ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಉಸ್ಸಯವಾದಿಕಾ ವಿಹರಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೭೯. ‘‘ಯಾ ಪನ ಭಿಕ್ಖುನೀ ಉಸ್ಸಯವಾದಿಕಾ ವಿಹರೇಯ್ಯ ಗಹಪತಿನಾ ವಾ ಗಹಪತಿಪುತ್ತೇನ ವಾ ದಾಸೇನ ವಾ ಕಮ್ಮಕಾರೇನ [ಕಮ್ಮಕರೇನ (ಸೀ. ಸ್ಯಾ.)] ವಾ ಅನ್ತಮಸೋ ಸಮಣಪರಿಬ್ಬಾಜಕೇನಾಪಿ, ಅಯಂ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೬೮೦. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಉಸ್ಸಯವಾದಿಕಾ ನಾಮ ಅಡ್ಡಕಾರಿಕಾ ವುಚ್ಚತಿ.

ಗಹಪತಿ ನಾಮ ಯೋ ಕೋಚಿ ಅಗಾರಂ ಅಜ್ಝಾವಸತಿ.

ಗಹಪತಿಪುತ್ತೋ ನಾಮ ಯೇ ಕೇಚಿ ಪುತ್ತಭಾತರೋ.

ದಾಸೋ ನಾಮ ಅನ್ತೋಜಾತೋ ಧನಕ್ಕೀತೋ ಕರಮರಾನೀತೋ.

ಕಮ್ಮಕಾರೋ ನಾಮ ಭಟಕೋ ಆಹತಕೋ.

ಸಮಣಪರಿಬ್ಬಾಜಕೋ ನಾಮ ಭಿಕ್ಖುಞ್ಚ ಭಿಕ್ಖುನಿಞ್ಚ ಸಿಕ್ಖಮಾನಞ್ಚ ಸಾಮಣೇರಞ್ಚ ಸಾಮಣೇರಿಞ್ಚ ಠಪೇತ್ವಾ ಯೋ ಕೋಚಿ ಪರಿಬ್ಬಾಜಕಸಮಾಪನ್ನೋ.

ಅಡ್ಡಂ ಕರಿಸ್ಸಾಮೀತಿ ದುತಿಯಂ ವಾ ಪರಿಯೇಸತಿ ಗಚ್ಛತಿ ವಾ, ಆಪತ್ತಿ ದುಕ್ಕಟಸ್ಸ. ಏಕಸ್ಸ ಆರೋಚೇತಿ, ಆಪತ್ತಿ ದುಕ್ಕಟಸ್ಸ. ದುತಿಯಸ್ಸ ಆರೋಚೇತಿ, ಆಪತ್ತಿ ಥುಲ್ಲಚ್ಚಯಸ್ಸ. ಅಡ್ಡಪರಿಯೋಸಾನೇ ಆಪತ್ತಿ ಸಙ್ಘಾದಿಸೇಸಸ್ಸ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸನ್ತಿ ಸಙ್ಘೋವ ತಸ್ಸಾ ಆಪತ್ತಿಯಾ ಮಾನತ್ತಂ ದೇತಿ ಮೂಲಾಯ ಪಟಿಕಸ್ಸತಿ ಅಬ್ಭೇತಿ, ನ ಸಮ್ಬಹುಲಾ ನ ಏಕಾ ಭಿಕ್ಖುನೀ. ತೇನ ವುಚ್ಚತಿ ‘‘ಸಙ್ಘಾದಿಸೇಸೋ’’ತಿ. ತಸ್ಸೇವ ಆಪತ್ತಿನಿಕಾಯಸ್ಸ ನಾಮಕಮ್ಮಂ ಅಧಿವಚನಂ. ತೇನಪಿ ವುಚ್ಚತಿ ‘‘ಸಙ್ಘಾದಿಸೇಸೋ’’ತಿ.

೬೮೧. ಅನಾಪತ್ತಿ ಮನುಸ್ಸೇಹಿ ಆಕಡ್ಢೀಯಮಾನಾ ಗಚ್ಛತಿ, ಆರಕ್ಖಂ ಯಾಚತಿ, ಅನೋದಿಸ್ಸ ಆಚಿಕ್ಖತಿ, ಉಮ್ಮತ್ತಿಕಾಯ…ಪೇ… ಆದಿಕಮ್ಮಿಕಾಯಾತಿ.

ಪಠಮಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಙ್ಘಾದಿಸೇಸಸಿಕ್ಖಾಪದಂ

೬೮೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ವೇಸಾಲಿಯಂ ಅಞ್ಞತರಸ್ಸ ಲಿಚ್ಛವಿಸ್ಸ ಪಜಾಪತಿ ಅತಿಚಾರಿನೀ ಹೋತಿ. ಅಥ ಖೋ ಸೋ ಲಿಚ್ಛವಿ ತಂ ಇತ್ಥಿಂ ಏತದವೋಚ – ‘‘ಸಾಧು ವಿರಮಾಹಿ, ಅನತ್ಥಂ ಖೋ ತೇ ಕರಿಸ್ಸಾಮೀ’’ತಿ. ಏವಮ್ಪಿ ಸಾ ವುಚ್ಚಮಾನಾ ನಾದಿಯಿ. ತೇನ ಖೋ ಪನ ಸಮಯೇನ ವೇಸಾಲಿಯಂ ಲಿಚ್ಛವಿಗಣೋ ಸನ್ನಿಪತಿತೋ ಹೋತಿ ಕೇನಚಿದೇವ ಕರಣೀಯೇನ. ಅಥ ಖೋ ಸೋ ಲಿಚ್ಛವಿ ತೇ ಲಿಚ್ಛವಯೋ ಏತದವೋಚ – ‘‘ಏಕಂ ಮೇ, ಅಯ್ಯೋ, ಇತ್ಥಿಂ ಅನುಜಾನಾಥಾ’’ತಿ. ‘‘ಕಾ ನಾಮ ಸಾ’’ತಿ? ‘‘ಮಯ್ಹಂ ಪಜಾಪತಿ ಅತಿಚರತಿ, ತಂ ಘಾತೇಸ್ಸಾಮೀ’’ತಿ. ‘‘ಜಾನಾಹೀ’’ತಿ. ಅಸ್ಸೋಸಿ ಖೋ ಸಾ ಇತ್ಥೀ – ‘‘ಸಾಮಿಕೋ ಕಿರ ಮಂ ಘಾತೇತುಕಾಮೋ’’ತಿ. ವರಭಣ್ಡಂ ಆದಾಯ ಸಾವತ್ಥಿಂ ಗನ್ತ್ವಾ ತಿತ್ಥಿಯೇ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ. ತಿತ್ಥಿಯಾ ನ ಇಚ್ಛಿಂಸು ಪಬ್ಬಾಜೇತುಂ. ಭಿಕ್ಖುನಿಯೋ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ. ಭಿಕ್ಖುನಿಯೋಪಿ ನ ಇಚ್ಛಿಂಸು ಪಬ್ಬಾಜೇತುಂ. ಥುಲ್ಲನನ್ದಂ ಭಿಕ್ಖುನಿಂ ಉಪಸಙ್ಕಮಿತ್ವಾ ಭಣ್ಡಕಂ ದಸ್ಸೇತ್ವಾ ಪಬ್ಬಜ್ಜಂ ಯಾಚಿ. ಥುಲ್ಲನನ್ದಾ ಭಿಕ್ಖುನೀ ಭಣ್ಡಕಂ ಗಹೇತ್ವಾ ಪಬ್ಬಾಜೇಸಿ.

ಅಥ ಖೋ ಸೋ ಲಿಚ್ಛವಿ ತಂ ಇತ್ಥಿಂ ಗವೇಸನ್ತೋ ಸಾವತ್ಥಿಂ ಗನ್ತ್ವಾ ಭಿಕ್ಖುನೀಸು ಪಬ್ಬಜಿತಂ ದಿಸ್ವಾನ ಯೇನ ರಾಜಾ ಪಸೇನದಿ ಕೋಸಲೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ರಾಜಾನಂ ಪಸೇನದಿಂ ಕೋಸಲಂ ಏತದವೋಚ – ‘‘ಪಜಾಪತಿ ಮೇ, ದೇವ, ವರಭಣ್ಡಂ ಆದಾಯ ಸಾವತ್ಥಿಂ ಅನುಪ್ಪತ್ತಾ. ತಂ ದೇವೋ ಅನುಜಾನಾತೂ’’ತಿ. ‘‘ತೇನ ಹಿ, ಭಣೇ, ವಿಚಿನಿತ್ವಾ ಆಚಿಕ್ಖಾ’’ತಿ. ‘‘ದಿಟ್ಠಾ, ದೇವ, ಭಿಕ್ಖುನೀಸು ಪಬ್ಬಜಿತಾ’’ತಿ. ‘‘ಸಚೇ, ಭಣೇ, ಭಿಕ್ಖುನೀಸು ಪಬ್ಬಜಿತಾ, ನ ಸಾ ಲಬ್ಭಾ ಕಿಞ್ಚಿ ಕಾತುಂ. ಸ್ವಾಕ್ಖಾತೋ ಭಗವತಾ ಧಮ್ಮೋ, ಚರತು ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ. ಅಥ ಖೋ ಸೋ ಲಿಚ್ಛವಿ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಚೋರಿಂ ಪಬ್ಬಾಜೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತಸ್ಸ ಲಿಚ್ಛವಿಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಚೋರಿಂ ಪಬ್ಬಾಜೇಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಚೋರಿಂ ಪಬ್ಬಾಜೇತೀತಿ [ಪಬ್ಬಾಜೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಚೋರಿಂ ಪಬ್ಬಾಜೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೬೮೩. ‘‘ಯಾ ಪನ ಭಿಕ್ಖುನೀ ಜಾನಂ ಚೋರಿಂ ವಜ್ಝಂ ವಿದಿತಂ ಅನಪಲೋಕೇತ್ವಾ ರಾಜಾನಂ ವಾ ಸಙ್ಘಂ ವಾ ಗಣಂ ವಾ ಪೂಗಂ ವಾ ಸೇಣಿಂ ವಾ ಅಞ್ಞತ್ರ ಕಪ್ಪಾ ವುಟ್ಠಾಪೇಯ್ಯ, ಅಯಮ್ಪಿ ಭಿಕ್ಖುನೀ ಪಠಮಾಪತ್ತಿಕಂ ಧಮ್ಮಂ ಆಪನ್ನಾ ನಿಸ್ಸಾರಣೀಯಂ ಸಙ್ಘಾದಿಸೇಸ’’ನ್ತಿ.

೬೮೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಜಾನಾತಿ ನಾಮ ಸಾಮಂ ವಾ ಜಾನಾತಿ ಅಞ್ಞೇ ವಾ ತಸ್ಸಾ ಆರೋಚೇನ್ತಿ, ಸಾ ವಾ ಆರೋಚೇತಿ.

ಚೋರೀ ನಾಮ ಯಾ ಪಞ್ಚಮಾಸಕಂ ವಾ ಅತಿರೇಕಪಞ್ಚಮಾಸಕಂ ವಾ ಅಗ್ಘನಕಂ ಅದಿನ್ನಂ ಥೇಯ್ಯಸಙ್ಖಾತಂ ಆದಿಯತಿ, ಏಸಾ ಚೋರೀ ನಾಮ.

ವಜ್ಝಾ ನಾಮ ಯಂ ಕತ್ವಾ ವಜ್ಝಪ್ಪತ್ತಾ ಹೋತಿ.

ವಿದಿತಾ ನಾಮ ಅಞ್ಞೇಹಿ ಮನುಸ್ಸೇಹಿ ಞಾತಾ ಹೋತಿ ‘‘ವಜ್ಝಾ ಏಸಾ’’ತಿ.

ಅನಪಲೋಕೇತ್ವಾತಿ ಅನಾಪುಚ್ಛಾ.

ರಾಜಾ ನಾಮ ಯತ್ಥ ರಾಜಾ ಅನುಸಾಸತಿ, ರಾಜಾ ಅಪಲೋಕೇತಬ್ಬೋ.

ಸಙ್ಘೋ ನಾಮ ಭಿಕ್ಖುನಿಸಙ್ಘೋ ವುಚ್ಚತಿ, ಭಿಕ್ಖುನಿಸಙ್ಘೋ ಅಪಲೋಕೇತಬ್ಬೋ.

ಗಣೋ ನಾಮ ಯತ್ಥ ಗಣೋ ಅನುಸಾಸತಿ, ಗಣೋ ಅಪಲೋಕೇತಬ್ಬೋ.

ಪೂಗೋ ನಾಮ ಯತ್ಥ ಪೂಗೋ ಅನುಸಾಸತಿ, ಪೂಗೋ ಅಪಲೋಕೇತಬ್ಬೋ.

ಸೇಣಿ ನಾಮ ಯತ್ಥ ಸೇಣಿ ಅನುಸಾಸತಿ, ಸೇಣಿ ಅಪಲೋಕೇತಬ್ಬೋ.

ಅಞ್ಞತ್ರ ಕಪ್ಪಾತಿ ಠಪೇತ್ವಾ ಕಪ್ಪಂ. ಕಪ್ಪಂ ನಾಮ ದ್ವೇ ಕಪ್ಪಾನಿ – ತಿತ್ಥಿಯೇಸು ವಾ ಪಬ್ಬಜಿತಾ ಹೋತಿ ಅಞ್ಞಾಸು ವಾ ಭಿಕ್ಖುನೀಸು ಪಬ್ಬಜಿತಾ. ಅಞ್ಞತ್ರ ಕಪ್ಪಾ ‘‘ವುಟ್ಠಾಪೇಸ್ಸಾಮೀ’’ತಿ ಗಣಂ ವಾ ಆಚರಿನಿಂ ವಾ ಪತ್ತಂ ವಾ ಚೀವರಂ ವಾ ಪರಿಯೇಸತಿ, ಸೀಮಂ ವಾ ಸಮ್ಮನ್ನತಿ, ಆಪತ್ತಿ ದುಕ್ಕಟಸ್ಸ. ಞತ್ತಿಯಾ ದುಕ್ಕಟಂ. ದ್ವೀಹಿ ಕಮ್ಮವಾಚಾಹಿ ಥುಲ್ಲಚ್ಚಯಾ. ಕಮ್ಮವಾಚಾಪರಿಯೋಸಾನೇ ಉಪಜ್ಝಾಯಾಯ ಆಪತ್ತಿ ಸಙ್ಘಾದಿಸೇಸಸ್ಸ. ಗಣಸ್ಸ ಚ ಆಚರಿನಿಯಾ ಚ ಆಪತ್ತಿ ದುಕ್ಕಟಸ್ಸ.

ಅಯಮ್ಪೀತಿ ಪುರಿಮಂ ಉಪಾದಾಯ ವುಚ್ಚತಿ.

ಪಠಮಾಪತ್ತಿಕನ್ತಿ ಸಹ ವತ್ಥುಜ್ಝಾಚಾರಾ ಆಪಜ್ಜತಿ ಅಸಮನುಭಾಸನಾಯ.

ನಿಸ್ಸಾರಣೀಯನ್ತಿ ಸಙ್ಘಮ್ಹಾ ನಿಸ್ಸಾರೀಯತಿ.

ಸಙ್ಘಾದಿಸೇಸನ್ತಿ…ಪೇ… ತೇನಪಿ ವುಚ್ಚತಿ ಸಙ್ಘಾದಿಸೇಸೋತಿ.

೬೮೫. ಚೋರಿಯಾ ಚೋರಿಸಞ್ಞಾ ಅಞ್ಞತ್ರ ಕಪ್ಪಾ ವುಟ್ಠಾಪೇತಿ, ಆಪತ್ತಿ ಸಙ್ಘಾದಿಸೇಸಸ್ಸ. ಚೋರಿಯಾ ವೇಮತಿಕಾ ಅಞ್ಞತ್ರ ಕಪ್ಪಾ ವುಟ್ಠಾಪೇತಿ, ಆಪತ್ತಿ ದುಕ್ಕಟಸ್ಸ. ಚೋರಿಯಾ ಅಚೋರಿಸಞ್ಞಾ ಅಞ್ಞತ್ರ ಕಪ್ಪಾ ವುಟ್ಠಾಪೇತಿ, ಅನಾಪತ್ತಿ. ಅಚೋರಿಯಾ ಚೋರಿಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಚೋರಿಯಾ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಚೋರಿಯಾ ಅಚೋರಿಸಞ್ಞಾ, ಅನಾಪತ್ತಿ.

೬೮೬. ಅನಾಪತ್ತಿ ಅಜಾನನ್ತೀ ವುಟ್ಠಾಪೇತಿ, ಅಪಲೋಕೇತ್ವಾ ವುಟ್ಠಾಪೇತಿ, ಕಪ್ಪಕತಂ ವುಟ್ಠಾಪೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಙ್ಘಾದಿಸೇಸಸಿಕ್ಖಾಪದಂ ನಿಟ್ಠಿತಂ.