೩. ನಗ್ಗವಗ್ಗೋ

೧. ಪಠಮಸಿಕ್ಖಾಪದಂ

೮೮೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸಮ್ಬಹುಲಾ [ಮಹಾವ. ೩೫೦] ಭಿಕ್ಖುನಿಯೋ ಅಚಿರವತಿಯಾ ನದಿಯಾ ವೇಸಿಯಾಹಿ ಸದ್ಧಿಂ ನಗ್ಗಾ ಏಕತಿತ್ಥೇ ನಹಾಯನ್ತಿ. ವೇಸಿಯಾ ತಾ ಭಿಕ್ಖುನಿಯೋ ಉಪ್ಪಣ್ಡೇಸುಂ – ‘‘ಕಿಂ ನು ಖೋ ನಾಮ ತುಮ್ಹಾಕಂ, ಅಯ್ಯೇ, ದಹರಾನಂ [ದಹರಾನಂ ದಹರಾನಂ (ಸೀ.)] ಬ್ರಹ್ಮಚರಿಯಂ ಚಿಣ್ಣೇನ, ನನು ನಾಮ ಕಾಮಾ ಪರಿಭುಞ್ಜಿತಬ್ಬಾ! ಯದಾ ಜಿಣ್ಣಾ ಭವಿಸ್ಸಥ ತದಾ ಬ್ರಹ್ಮಚರಿಯಂ ಚರಿಸ್ಸಥ. ಏವಂ ತುಮ್ಹಾಕಂ ಉಭೋ ಅತ್ಥಾ ಪರಿಗ್ಗಹಿತಾ ಭವಿಸ್ಸನ್ತೀ’’ತಿ. ಭಿಕ್ಖುನಿಯೋ ವೇಸಿಯಾಹಿ ಉಪ್ಪಣ್ಡಿಯಮಾನಾ ಮಙ್ಕೂ ಅಹೇಸುಂ. ಅಥ ಖೋ ತಾ ಭಿಕ್ಖುನಿಯೋ ಉಪಸ್ಸಯಂ ಗನ್ತ್ವಾ ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಭಿಕ್ಖುನೀನಂ ಸಿಕ್ಖಾಪದಂ ಪಞ್ಞಪೇಸ್ಸಾಮಿ ದಸ ಅತ್ಥವಸೇ ಪಟಿಚ್ಚ – ಸಙ್ಘಸುಟ್ಠುತಾಯ…ಪೇ… ವಿನಯಾನುಗ್ಗಹಾಯ. ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೮೪. ‘‘ಯಾ ಪನ ಭಿಕ್ಖುನೀ ನಗ್ಗಾ ನಹಾಯೇಯ್ಯ, ಪಾಚಿತ್ತಿಯ’’ನ್ತಿ.

೮೮೫. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ನಗ್ಗಾ ನಹಾಯೇಯ್ಯಾತಿ ಅನಿವತ್ಥಾ ವಾ ಅಪಾರುತಾ ವಾ ನಹಾಯತಿ, ಪಯೋಗೇ ದುಕ್ಕಟಂ. ನಹಾನಪರಿಯೋಸಾನೇ ಆಪತ್ತಿ ಪಾಚಿತ್ತಿಯಸ್ಸ.

೮೮೬. ಅನಾಪತ್ತಿ ಅಚ್ಛಿನ್ನಚೀವರಿಕಾಯ ವಾ ನಟ್ಠಚೀವರಿಕಾಯ ವಾ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಠಮಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಸಿಕ್ಖಾಪದಂ

೮೮೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಗವತಾ ಭಿಕ್ಖುನೀನಂ [ಮಹಾವ. ೩೫೧] ಉದಕಸಾಟಿಕಾ ಅನುಞ್ಞಾತಾ ಹೋತಿ. ಛಬ್ಬಗ್ಗಿಯಾ ಭಿಕ್ಖುನಿಯೋ – ‘‘ಭಗವತಾ ಉದಕಸಾಟಿಕಾ ಅನುಞ್ಞಾತಾ’’ತಿ ಅಪ್ಪಮಾಣಿಕಾಯೋ ಉದಕಸಾಟಿಕಾಯೋ ಧಾರೇಸುಂ [ಧಾರೇನ್ತಿ (ಪಾಚಿ. ೫೩೧-೫೪೫)]. ಪುರತೋಪಿ ಪಚ್ಛತೋಪಿ ಆಕಡ್ಢನ್ತಾ ಆಹಿಣ್ಡನ್ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಅಪ್ಪಮಾಣಿಕಾಯೋ ಉದಕಸಾಟಿಕಾಯೋ ಧಾರೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಅಪ್ಪಮಾಣಿಕಾಯೋ ಉದಕಸಾಟಿಕಾಯೋ ಧಾರೇನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಅಪ್ಪಮಾಣಿಕಾಯೋ ಉದಕಸಾಟಿಕಾಯೋ ಧಾರೇಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೮೮. ‘‘ಉದಕಸಾಟಿಕಂ ಪನ ಭಿಕ್ಖುನಿಯಾ ಕಾರಯಮಾನಾಯ ಪಮಾಣಿಕಾ ಕಾರೇತಬ್ಬಾ. ತತ್ರಿದಂ ಪಮಾಣಂ – ದೀಘಸೋ ಚತಸ್ಸೋ ವಿದತ್ಥಿಯೋ, ಸುಗತವಿದತ್ಥಿಯಾ; ತಿರಿಯಂ ದ್ವೇ ವಿದತ್ಥಿಯೋ. ತಂ ಅತಿಕ್ಕಾಮೇನ್ತಿಯಾ ಛೇದನಕಂ ಪಾಚಿತ್ತಿಯ’’ನ್ತಿ.

೮೮೯. ಉದಕಸಾಟಿಕಾ ನಾಮ ಯಾಯ ನಿವತ್ಥಾ [ನಿವತ್ಥಾಯ (ಸ್ಯಾ.)] ನಹಾಯತಿ.

ಕಾರಯಮಾನಾಯಾತಿ ಕರೋನ್ತಿಯಾ ವಾ ಕಾರಾಪೇನ್ತಿಯಾ ವಾ.

ಪಮಾಣಿಕಾ ಕಾರೇತಬ್ಬಾ. ತತ್ರಿದಂ ಪಮಾಣಂ – ದೀಘಸೋ ಚತಸ್ಸೋ ವಿದತ್ಥಿಯೋ, ಸುಗತವಿದತ್ಥಿಯಾ; ತಿರಿಯಂ ದ್ವೇ ವಿದತ್ಥಿಯೋ. ತಂ ಅತಿಕ್ಕಾಮೇತ್ವಾ ಕರೋತಿ ವಾ ಕಾರಾಪೇತಿ ವಾ, ಪಯೋಗೇ ದುಕ್ಕಟಂ. ಪಟಿಲಾಭೇನ ಛಿನ್ದಿತ್ವಾ ಪಾಚಿತ್ತಿಯಂ ದೇಸೇತಬ್ಬಂ.

೮೯೦. ಅತ್ತನಾ ವಿಪ್ಪಕತಂ ಅತ್ತನಾ ಪರಿಯೋಸಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಅತ್ತನಾ ವಿಪ್ಪಕತಂ ಪರೇಹಿ ಪರಿಯೋಸಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಪರೇಹಿ ವಿಪ್ಪಕತಂ ಅತ್ತನಾ ಪರಿಯೋಸಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ. ಪರೇಹಿ ವಿಪ್ಪಕತಂ ಪರೇಹಿ ಪರಿಯೋಸಾಪೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಅಞ್ಞಸ್ಸತ್ಥಾಯ ಕರೋತಿ ವಾ ಕಾರಾಪೇತಿ ವಾ, ಆಪತ್ತಿ ದುಕ್ಕಟಸ್ಸ. ಅಞ್ಞೇನ ಕತಂ ಪಟಿಲಭಿತ್ವಾ ಪರಿಭುಞ್ಜತಿ, ಆಪತ್ತಿ ದುಕ್ಕಟಸ್ಸ.

೮೯೧. ಅನಾಪತ್ತಿ ಪಮಾಣಿಕಂ ಕರೋತಿ, ಊನಕಂ ಕರೋತಿ, ಅಞ್ಞೇನ ಕತಂ ಪಮಾಣಾತಿಕ್ಕನ್ತಂ ಪಟಿಲಭಿತ್ವಾ ಛಿನ್ದಿತ್ವಾ ಪರಿಭುಞ್ಜತಿ, ವಿತಾನಂ ವಾ ಭೂಮತ್ಥರಣಂ ವಾ ಸಾಣಿಪಾಕಾರಂ ವಾ ಭಿಸಿಂ ವಾ ಬಿಬ್ಬೋಹನಂ ವಾ ಕರೋತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.

೩. ತತಿಯಸಿಕ್ಖಾಪದಂ

೮೯೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಿಸ್ಸಾ ಭಿಕ್ಖುನಿಯಾ ಮಹಗ್ಘೇ ಚೀವರದುಸ್ಸೇ ಚೀವರಂ ದುಕ್ಕಟಂ ಹೋತಿ ದುಸ್ಸಿಬ್ಬಿತಂ. ಥುಲ್ಲನನ್ದಾ ಭಿಕ್ಖುನೀ ತಂ ಭಿಕ್ಖುನಿಂ ಏತದವೋಚ – ‘‘ಸುನ್ದರಂ ಖೋ ಇದಂ ತೇ, ಅಯ್ಯೇ, ಚೀವರದುಸ್ಸಂ; ಚೀವರಞ್ಚ ಖೋ ದುಕ್ಕಟಂ ದುಸ್ಸಿಬ್ಬಿತ’’ನ್ತಿ. ‘‘ವಿಸಿಬ್ಬೇಮಿ, ಅಯ್ಯೇ, ಸಿಬ್ಬಿಸ್ಸಸೀ’’ತಿ? ‘‘ಆಮಾಯ್ಯೇ, ಸಿಬ್ಬಿಸ್ಸಾಮೀ’’ತಿ. ಅಥ ಖೋ ಸಾ ಭಿಕ್ಖುನೀ ತಂ ಚೀವರಂ ವಿಸಿಬ್ಬೇತ್ವಾ ಥುಲ್ಲನನ್ದಾಯ ಭಿಕ್ಖುನಿಯಾ ಅದಾಸಿ. ಥುಲ್ಲನನ್ದಾ ಭಿಕ್ಖುನೀ – ‘‘ಸಿಬ್ಬಿಸ್ಸಾಮಿ ಸಿಬ್ಬಿಸ್ಸಾಮೀ’’ತಿ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತಿ. ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಭಿಕ್ಖುನಿಯಾ ಚೀವರಂ ವಿಸಿಬ್ಬಾಪೇತ್ವಾ ನೇವ ಸಿಬ್ಬಿಸ್ಸತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನಿಯಾ ಚೀವರಂ ವಿಸಿಬ್ಬಾಪೇತ್ವಾ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನಿಯಾ ಚೀವರಂ ವಿಸಿಬ್ಬಾಪೇತ್ವಾ ನೇವ ಸಿಬ್ಬಿಸ್ಸತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೯೩. ‘‘ಯಾ ಪನ ಭಿಕ್ಖುನೀ ಭಿಕ್ಖುನಿಯಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬೇಯ್ಯ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೇಯ್ಯ, ಅಞ್ಞತ್ರ ಚತೂಹಪಞ್ಚಾಹಾ, ಪಾಚಿತ್ತಿಯ’’ನ್ತಿ.

೮೯೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಭಿಕ್ಖುನಿಯಾತಿ ಅಞ್ಞಾಯ ಭಿಕ್ಖುನಿಯಾ.

ಚೀವರಂ ನಾಮ ಛನ್ನಂ ಚೀವರಾನಂ ಅಞ್ಞತರಂ ಚೀವರಂ.

ವಿಸಿಬ್ಬೇತ್ವಾತಿ ಸಯಂ ವಿಸಿಬ್ಬೇತ್ವಾ. ವಿಸಿಬ್ಬಾಪೇತ್ವಾತಿ ಅಞ್ಞಂ ವಿಸಿಬ್ಬಾಪೇತ್ವಾ.

ಸಾ ಪಚ್ಛಾ ಅನನ್ತರಾಯಿಕಿನೀತಿ ಅಸತಿ ಅನ್ತರಾಯೇ.

ನೇವ ಸಿಬ್ಬೇಯ್ಯಾತಿ ನ ಸಯಂ ಸಿಬ್ಬೇಯ್ಯ. ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೇಯ್ಯಾತಿ ನ ಅಞ್ಞಂ ಆಣಾಪೇಯ್ಯ.

ಅಞ್ಞತ್ರ ಚತೂಹಪಞ್ಚಾಹಾತಿ ಠಪೇತ್ವಾ ಚತೂಹಪಞ್ಚಾಹಂ. ‘‘ನೇವ ಸಿಬ್ಬಿಸ್ಸಾಮಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರಿಸ್ಸಾಮೀ’’ತಿ ಧುರಂ ನಿಕ್ಖಿತ್ತಮತ್ತೇ ಆಪತ್ತಿ ಪಾಚಿತ್ತಿಯಸ್ಸ.

೮೯೫. ಉಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತಿ, ಅಞ್ಞತ್ರ ಚತೂಹಪಞ್ಚಾಹಾ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ವೇಮತಿಕಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತಿ, ಅಞ್ಞತ್ರ ಚತೂಹಪಞ್ಚಾಹಾ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತಿ, ಅಞ್ಞತ್ರ ಚತೂಹಪಞ್ಚಾಹಾ, ಆಪತ್ತಿ ಪಾಚಿತ್ತಿಯಸ್ಸ.

ಅಞ್ಞಂ ಪರಿಕ್ಖಾರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತಿ, ಅಞ್ಞತ್ರ ಚತೂಹಪಞ್ಚಾಹಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಚೀವರಂ ವಾ ಅಞ್ಞಂ ವಾ ಪರಿಕ್ಖಾರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ಸಿಬ್ಬತಿ ನ ಸಿಬ್ಬಾಪನಾಯ ಉಸ್ಸುಕ್ಕಂ ಕರೋತಿ, ಅಞ್ಞತ್ರ ಚತೂಹಪಞ್ಚಾಹಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ.

೮೯೬. ಅನಾಪತ್ತಿ ಸತಿ ಅನ್ತರಾಯೇ, ಪರಿಯೇಸಿತ್ವಾ ನ ಲಭತಿ, ಕರೋನ್ತೀ ಚತೂಹಪಞ್ಚಾಹಂ ಅತಿಕ್ಕಾಮೇತಿ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ತತಿಯಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಸಿಕ್ಖಾಪದಂ

೮೯೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖುನೀನಂ ಹತ್ಥೇ ಚೀವರಂ ನಿಕ್ಖಿಪಿತ್ವಾ ಸನ್ತರುತ್ತರೇನ ಜನಪದಚಾರಿಕಂ ಪಕ್ಕಮನ್ತಿ. ತಾನಿ ಚೀವರಾನಿ ಚಿರಂ ನಿಕ್ಖಿತ್ತಾನಿ ಕಣ್ಣಕಿತಾನಿ ಹೋನ್ತಿ. ತಾನಿ ಭಿಕ್ಖುನಿಯೋ ಓತಾಪೇನ್ತಿ. ಭಿಕ್ಖುನಿಯೋ ತಾ ಭಿಕ್ಖುನಿಯೋ ಏತದವೋಚುಂ – ‘‘ಕಸ್ಸಿಮಾನಿ, ಅಯ್ಯೇ, ಚೀವರಾನಿ ಕಣ್ಣಕಿತಾನೀ’’ತಿ? ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖುನೀನಂ ಏತಮತ್ಥಂ ಆರೋಚೇಸುಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಭಿಕ್ಖುನೀನಂ ಹತ್ಥೇ ಚೀವರಂ ನಿಕ್ಖಿಪಿತ್ವಾ ಸನ್ತರುತ್ತರೇನ ಜನಪದಚಾರಿಕಂ ಪಕ್ಕಮಿಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನಿಯೋ ಭಿಕ್ಖುನೀನಂ ಹತ್ಥೇ ಚೀವರಂ ನಿಕ್ಖಿಪಿತ್ವಾ ಸನ್ತರುತ್ತರೇನ ಜನಪದಚಾರಿಕಂ ಪಕ್ಕಮನ್ತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನಿಯೋ ಭಿಕ್ಖುನೀನಂ ಹತ್ಥೇ ಚೀವರಂ ನಿಕ್ಖಿಪಿತ್ವಾ ಸನ್ತರುತ್ತರೇನ ಜನಪದಚಾರಿಕಂ ಪಕ್ಕಮಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೯೮. ‘‘ಯಾ ಪನ ಭಿಕ್ಖುನೀ ಪಞ್ಚಾಹಿಕಂ ಸಙ್ಘಾಟಿಚಾರಂ [ಸಙ್ಘಾಟಿವಾರಂ (ಸ್ಯಾ.)] ಅತಿಕ್ಕಾಮೇಯ್ಯ, ಪಾಚಿತ್ತಿಯ’’ನ್ತಿ.

೮೯೯. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಪಞ್ಚಾಹಿಕಂ ಸಙ್ಘಾಟಿಚಾರಂ ಅತಿಕ್ಕಾಮೇಯ್ಯಾತಿ ಪಞ್ಚಮಂ ದಿವಸಂ ಪಞ್ಚ ಚೀವರಾನಿ ನೇವ ನಿವಾಸೇತಿ ನ ಪಾರುಪತಿ ನ ಓತಾಪೇತಿ, ಪಞ್ಚಮಂ ದಿವಸಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

೯೦೦. ಪಞ್ಚಾಹಾತಿಕ್ಕನ್ತೇ ಅತಿಕ್ಕನ್ತಸಞ್ಞಾ, ಆಪತ್ತಿ ಪಾಚಿತ್ತಿಯಸ್ಸ. ಪಞ್ಚಾಹಾತಿಕ್ಕನ್ತೇ ವೇಮತಿಕಾ, ಆಪತ್ತಿ ಪಾಚಿತ್ತಿಯಸ್ಸ. ಪಞ್ಚಾಹಾತಿಕ್ಕನ್ತೇ ಅನತಿಕ್ಕನ್ತಸಞ್ಞಾ, ಆಪತ್ತಿ ಪಾಚಿತ್ತಿಯಸ್ಸ.

ಪಞ್ಚಾಹಾನತಿಕ್ಕನ್ತೇ ಅತಿಕ್ಕನ್ತಸಞ್ಞಾ, ಆಪತ್ತಿ ದುಕ್ಕಟಸ್ಸ. ಪಞ್ಚಾಹಾನತಿಕ್ಕನ್ತೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಪಞ್ಚಾಹಾನತಿಕ್ಕನ್ತೇ ಅನತಿಕ್ಕನ್ತಸಞ್ಞಾ, ಅನಾಪತ್ತಿ.

೯೦೧. ಅನಾಪತ್ತಿ ಪಞ್ಚಮಂ ದಿವಸಂ ಪಞ್ಚ ಚೀವರಾನಿ ನಿವಾಸೇತಿ ವಾ ಪಾರುಪತಿ ವಾ ಓತಾಪೇತಿ ವಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.

೫. ಪಞ್ಚಮಸಿಕ್ಖಾಪದಂ

೯೦೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಪಿಣ್ಡಾಯ ಚರಿತ್ವಾ ಅಲ್ಲಚೀವರಂ ಪತ್ಥರಿತ್ವಾ ವಿಹಾರಂ ಪಾವಿಸಿ. ಅಞ್ಞತರಾ ಭಿಕ್ಖುನೀ ತಂ ಚೀವರಂ ಪಾರುಪಿತ್ವಾ ಗಾಮಂ ಪಿಣ್ಡಾಯ ಪಾವಿಸಿ. ಸಾ ನಿಕ್ಖಮಿತ್ವಾ ಭಿಕ್ಖುನಿಯೋ ಪುಚ್ಛಿ – ‘‘ಅಪಾಯ್ಯೇ, ಮಯ್ಹಂ ಚೀವರಂ ಪಸ್ಸೇಯ್ಯಾಥಾ’’ತಿ? ಭಿಕ್ಖುನಿಯೋ ತಸ್ಸಾ ಭಿಕ್ಖುನಿಯಾ ಏತಮತ್ಥಂ ಆರೋಚೇಸುಂ. ಅಥ ಖೋ ಸಾ ಭಿಕ್ಖುನೀ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಮಯ್ಹಂ ಚೀವರಂ ಅನಾಪುಚ್ಛಾ ಪಾರುಪಿಸ್ಸತೀ’’ತಿ! ಅಥ ಖೋ ಸಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಭಿಕ್ಖುನಿಯಾ ಚೀವರಂ ಅನಾಪುಚ್ಛಾ ಪಾರುಪಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಭಿಕ್ಖುನಿಯಾ ಚೀವರಂ ಅನಾಪುಚ್ಛಾ ಪಾರುಪತೀತಿ [ಪಾರುಪೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಭಿಕ್ಖುನಿಯಾ ಚೀವರಂ ಅನಾಪುಚ್ಛಾ ಪಾರುಪಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೦೩. ‘‘ಯಾ ಪನ ಭಿಕ್ಖುನೀ ಚೀವರಸಙ್ಕಮನೀಯಂ ಧಾರೇಯ್ಯ, ಪಾಚಿತ್ತಿಯ’’ನ್ತಿ.

೯೦೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಚೀವರಸಙ್ಕಮನೀಯಂ ನಾಮ ಉಪಸಮ್ಪನ್ನಾಯ ಪಞ್ಚನ್ನಂ ಚೀವರಾನಂ ಅಞ್ಞತರಂ ಚೀವರಂ ತಸ್ಸಾ ವಾ ಅದಿನ್ನಂ ತಂ ವಾ ಅನಾಪುಚ್ಛಾ ನಿವಾಸೇತಿ ವಾ ಪಾರುಪತಿ ವಾ, ಆಪತ್ತಿ ಪಾಚಿತ್ತಿಯಸ್ಸ.

೯೦೫. ಉಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ ಚೀವರಸಙ್ಕಮನೀಯಂ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ವೇಮತಿಕಾ ಚೀವರಸಙ್ಕಮನೀಯಂ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ. ಉಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ ಚೀವರಸಙ್ಕಮನೀಯಂ ಧಾರೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಅನುಪಸಮ್ಪನ್ನಾಯ ಚೀವರಸಙ್ಕಮನೀಯಂ ಧಾರೇತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ.

೯೦೬. ಅನಾಪತ್ತಿ ಸಾ ವಾ ದೇತಿ, ತಂ ವಾ ಆಪುಚ್ಛಾ ನಿವಾಸೇತಿ ವಾ ಪಾರುಪತಿ ವಾ, ಅಚ್ಛಿನ್ನಚೀವರಿಕಾಯ, ನಟ್ಠಚೀವರಿಕಾಯ, ಆಪದಾಸು, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಪಞ್ಚಮಸಿಕ್ಖಾಪದಂ ನಿಟ್ಠಿತಂ.

೬. ಛಟ್ಠಸಿಕ್ಖಾಪದಂ

೯೦೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾಯ ಭಿಕ್ಖುನಿಯಾ ಉಪಟ್ಠಾಕಕುಲಂ ಥುಲ್ಲನನ್ದಂ ಭಿಕ್ಖುನಿಂ ಏತದವೋಚ – ‘‘ಭಿಕ್ಖುನಿಸಙ್ಘಸ್ಸ, ಅಯ್ಯೇ, ಚೀವರಂ ದಸ್ಸಾಮಾ’’ತಿ. ಥುಲ್ಲನನ್ದಾ ಭಿಕ್ಖುನೀ – ‘‘ತುಮ್ಹೇ ಬಹುಕಿಚ್ಚಾ ಬಹುಕರಣೀಯಾ’’ತಿ ಅನ್ತರಾಯಂ ಅಕಾಸಿ. ತೇನ ಖೋ ಪನ ಸಮಯೇನ ತಸ್ಸ ಕುಲಸ್ಸ ಘರಂ ಡಯ್ಹತಿ. ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಅಮ್ಹಾಕಂ ದೇಯ್ಯಧಮ್ಮಂ ಅನ್ತರಾಯಂ ಕರಿಸ್ಸತಿ! ಉಭಯೇನಾಮ್ಹ ಪರಿಬಾಹಿರಾ [ಪರಿಹೀನಾ (ಸೀ.)], ಭೋಗೇಹಿ ಚ ಪುಞ್ಞೇನ ಚಾ’’ತಿ. ಅಸ್ಸೋಸುಂ ಖೋ ಭಿಕ್ಖುನಿಯೋ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಗಣಸ್ಸ ಚೀವರಲಾಭಂ ಅನ್ತರಾಯಂ ಕರಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಗಣಸ್ಸ ಚೀವರಲಾಭಂ ಅನ್ತರಾಯಂ ಅಕಾಸೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಗಣಸ್ಸ ಚೀವರಲಾಭಂ ಅನ್ತರಾಯಂ ಕರಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೦೮. ‘‘ಯಾ ಪನ ಭಿಕ್ಖುನೀ ಗಣಸ್ಸ ಚೀವರಲಾಭಂ ಅನ್ತರಾಯಂ ಕರೇಯ್ಯ, ಪಾಚಿತ್ತಿಯ’’ನ್ತಿ.

೯೦೯. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಗಣೋ ನಾಮ ಭಿಕ್ಖುನಿಸಙ್ಘೋ ವುಚ್ಚತಿ.

ಚೀವರಂ ನಾಮ ಛನ್ನಂ ಚೀವರಾನಂ ಅಞ್ಞತರಂ ಚೀವರಂ ವಿಕಪ್ಪನುಪಗಂ ಪಚ್ಛಿಮಂ.

ಅನ್ತರಾಯಂ ಕರೇಯ್ಯಾತಿ ‘‘ಕಥಂ ಇಮೇ ಚೀವರಂ ನ [ಇಮಂ ಚೀವರಂ (ಕ.)] ದದೇಯ್ಯು’’ನ್ತಿ ಅನ್ತರಾಯಂ ಕರೋತಿ, ಆಪತ್ತಿ ಪಾಚಿತ್ತಿಯಸ್ಸ. ಅಞ್ಞಂ ಪರಿಕ್ಖಾರಂ ಅನ್ತರಾಯಂ ಕರೋತಿ, ಆಪತ್ತಿ ದುಕ್ಕಟಸ್ಸ. ಸಮ್ಬಹುಲಾನಂ ಭಿಕ್ಖುನೀನಂ ವಾ ಏಕಭಿಕ್ಖುನಿಯಾ ವಾ ಅನುಪಸಮ್ಪನ್ನಾಯ ವಾ ಚೀವರಂ ವಾ ಅಞ್ಞಂ ವಾ ಪರಿಕ್ಖಾರಂ ಅನ್ತರಾಯಂ ಕರೋತಿ, ಆಪತ್ತಿ ದುಕ್ಕಟಸ್ಸ.

೯೧೦. ಅನಾಪತ್ತಿ ಆನಿಸಂಸಂ ದಸ್ಸೇತ್ವಾ ನಿವಾರೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಛಟ್ಠಸಿಕ್ಖಾಪದಂ ನಿಟ್ಠಿತಂ.

೭. ಸತ್ತಮಸಿಕ್ಖಾಪದಂ

೯೧೧. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭಿಕ್ಖುನಿಸಙ್ಘಸ್ಸ ಅಕಾಲಚೀವರಂ ಉಪ್ಪನ್ನಂ ಹೋತಿ. ಅಥ ಖೋ ಭಿಕ್ಖುನಿಸಙ್ಘೋ ತಂ ಚೀವರಂ ಭಾಜೇತುಕಾಮೋ ಸನ್ನಿಪತಿ. ತೇನ ಖೋ ಪನ ಸಮಯೇನ ಥುಲ್ಲನನ್ದಾಯ ಭಿಕ್ಖುನಿಯಾ ಅನ್ತೇವಾಸಿನಿಯೋ ಭಿಕ್ಖುನಿಯೋ ಪಕ್ಕನ್ತಾ ಹೋನ್ತಿ. ಥುಲ್ಲನನ್ದಾ ಭಿಕ್ಖುನೀ ತಾ ಭಿಕ್ಖುನಿಯೋ ಏತದವೋಚ – ‘‘ಅಯ್ಯೇ, ಭಿಕ್ಖುನಿಯೋ ಪಕ್ಕನ್ತಾ, ನ ತಾವ ಚೀವರಂ ಭಾಜೀಯಿಸ್ಸತೀ’’ತಿ. ಚೀವರವಿಭಙ್ಗಂ ಪಟಿಬಾಹಿ. ಭಿಕ್ಖುನಿಯೋ ನ ತಾವ ಚೀವರಂ ಭಾಜೀಯಿಸ್ಸತೀತಿ ಪಕ್ಕಮಿಂಸು [ವಿಪಕ್ಕಮಿಂಸು (ಸ್ಯಾ.)]. ಥುಲ್ಲನನ್ದಾ ಭಿಕ್ಖುನೀ ಅನ್ತೇವಾಸಿನೀಸು ಭಿಕ್ಖುನೀಸು ಆಗತಾಸು ತಂ ಚೀವರಂ ಭಾಜಾಪೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹತೀತಿ [ಪಟಿಬಾಹೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೧೨. ‘‘ಯಾ ಪನ ಭಿಕ್ಖುನೀ ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹೇಯ್ಯ, ಪಾಚಿತ್ತಿಯ’’ನ್ತಿ.

೯೧೩. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಧಮ್ಮಿಕೋನಾಮ ಚೀವರವಿಭಙ್ಗೋ ಸಮಗ್ಗೋ ಭಿಕ್ಖುನಿಸಙ್ಘೋ ಸನ್ನಿಪತಿತ್ವಾ ಭಾಜೇತಿ.

ಪಟಿಬಾಹೇಯ್ಯಾತಿ ಕಥಂ ಇಮಂ ಚೀವರಂ ನ ಭಾಜೇಯ್ಯಾತಿ [ಚೀವರಂ ಭಾಜೇಯ್ಯಾತಿ (ಕ.)] ಪಟಿಬಾಹತಿ, ಆಪತ್ತಿ ಪಾಚಿತ್ತಿಯಸ್ಸ.

೯೧೪. ಧಮ್ಮಿಕೇ ಧಮ್ಮಿಕಸಞ್ಞಾ ಪಟಿಬಾಹತಿ, ಆಪತ್ತಿ ಪಾಚಿತ್ತಿಯಸ್ಸ. ಧಮ್ಮಿಕೇ ವೇಮತಿಕಾ ಪಟಿಬಾಹತಿ, ಆಪತ್ತಿ ದುಕ್ಕಟಸ್ಸ. ಧಮ್ಮಿಕೇ ಅಧಮ್ಮಿಕಸಞ್ಞಾ ಪಟಿಬಾಹತಿ, ಅನಾಪತ್ತಿ. ಅಧಮ್ಮಿಕೇ ಧಮ್ಮಿಕಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಿಕೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಿಕೇ ಅಧಮ್ಮಿಕಸಞ್ಞಾ, ಅನಾಪತ್ತಿ.

೯೧೫. ಅನಾಪತ್ತಿ ಆನಿಸಂಸಂ ದಸ್ಸೇತ್ವಾ ಪಟಿಬಾಹತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಸತ್ತಮಸಿಕ್ಖಾಪದಂ ನಿಟ್ಠಿತಂ.

೮. ಅಟ್ಠಮಸಿಕ್ಖಾಪದಂ

೯೧೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ನಟಾನಮ್ಪಿ ನಟಕಾನಮ್ಪಿ ಲಙ್ಘಕಾನಮ್ಪಿ ಸೋಕಜ್ಝಾಯಿಕಾನಮ್ಪಿ [ಸೋಕಸಾಯಿಕಾನಮ್ಪಿ (ಸೀ.)] ಕುಮ್ಭಥೂಣಿಕಾನಮ್ಪಿ [ಕುಮ್ಭಥುಣಿಕಾನಮ್ಪಿ (ಕ.)] ಸಮಣಚೀವರಂ ದೇತಿ – ‘‘ಮಯ್ಹಂ ಪರಿಸತಿ [ಪರಿಸತಿಂ (ಸೀ.)] ವಣ್ಣಂ ಭಾಸಥಾ’’ತಿ. ನಟಾಪಿ ನಟಕಾಪಿ ಲಙ್ಘಕಾಪಿ ಸೋಕಜ್ಝಾಯಿಕಾಪಿ ಕುಮ್ಭಥೂಣಿಕಾಪಿ ಥುಲ್ಲನನ್ದಾಯ ಭಿಕ್ಖುನಿಯಾ ಪರಿಸತಿ ವಣ್ಣಂ ಭಾಸನ್ತಿ – ‘‘ಅಯ್ಯಾ ಥುಲ್ಲನನ್ದಾ ಬಹುಸ್ಸುತಾ ಭಾಣಿಕಾ ವಿಸಾರದಾ ಪಟ್ಟಾ ಧಮ್ಮಿಂ ಕಥಂ ಕಾತುಂ; ದೇಥ ಅಯ್ಯಾಯ, ಕರೋಥ ಅಯ್ಯಾಯಾ’’ತಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ, ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಅಗಾರಿಕಸ್ಸ ಸಮಣಚೀವರಂ ದಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಅಗಾರಿಕಸ್ಸ ಸಮಣಚೀವರಂ ದೇತೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಅಗಾರಿಕಸ್ಸ ಸಮಣಚೀವರಂ ದಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೧೭. ‘‘ಯಾ ಪನ ಭಿಕ್ಖುನೀ ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಮಣಚೀವರಂ ದದೇಯ್ಯ, ಪಾಚಿತ್ತಿಯ’’ನ್ತಿ.

೯೧೮. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಅಗಾರಿಕೋ ನಾಮ ಯೋ ಕೋಚಿ ಅಗಾರಂ ಅಜ್ಝಾವಸತಿ.

ಪರಿಬ್ಬಾಜಕೋ ನಾಮ ಭಿಕ್ಖುಞ್ಚ ಸಾಮಣೇರಞ್ಚ ಠಪೇತ್ವಾ ಯೋ ಕೋಚಿ ಪರಿಬ್ಬಾಜಕಸಮಾಪನ್ನೋ.

ಪರಿಬ್ಬಾಜಿಕಾ ನಾಮ ಭಿಕ್ಖುನಿಞ್ಚ ಸಿಕ್ಖಮಾನಞ್ಚ ಸಾಮಣೇರಿಞ್ಚ ಠಪೇತ್ವಾ ಯಾ ಕಾಚಿ ಪರಿಬ್ಬಾಜಿಕಸಮಾಪನ್ನಾ.

ಸಮಣಚೀವರಂ ನಾಮ ಕಪ್ಪಕತಂ ವುಚ್ಚತಿ. ದೇತಿ, ಆಪತ್ತಿ ಪಾಚಿತ್ತಿಯಸ್ಸ.

೯೧೯. ಅನಾಪತ್ತಿ ಮಾತಾಪಿತೂನಂ ದೇತಿ, ತಾವಕಾಲಿಕಂ ದೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ಅಟ್ಠಮಸಿಕ್ಖಾಪದಂ ನಿಟ್ಠಿತಂ.

೯. ನವಮಸಿಕ್ಖಾಪದಂ

೯೨೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾಯ ಭಿಕ್ಖುನಿಯಾ ಉಪಟ್ಠಾಕಕುಲಂ ಥುಲ್ಲನನ್ದಂ ಭಿಕ್ಖುನಿಂ ಏತದವೋಚ – ‘‘ಸಚೇ ಮಯಂ, ಅಯ್ಯೇ, ಸಕ್ಕೋಮ, ಭಿಕ್ಖುನಿಸಙ್ಘಸ್ಸ ಚೀವರಂ ದಸ್ಸಾಮಾ’’ತಿ. ತೇನ ಖೋ ಪನ ಸಮಯೇನ ವಸ್ಸಂವುಟ್ಠಾ ಭಿಕ್ಖುನಿಯೋ ಚೀವರಂ ಭಾಜೇತುಕಾಮಾ ಸನ್ನಿಪತಿಂಸು. ಥುಲ್ಲನನ್ದಾ ಭಿಕ್ಖುನೀ ತಾ ಭಿಕ್ಖುನಿಯೋ ಏತದವೋಚ – ‘‘ಆಗಮೇಥ, ಅಯ್ಯೇ, ಅತ್ಥಿ ಭಿಕ್ಖುನಿಸಙ್ಘಸ್ಸ ಚೀವರಪಚ್ಚಾಸಾ’’ತಿ. ಭಿಕ್ಖುನಿಯೋ ಥುಲ್ಲನನ್ದಂ ಭಿಕ್ಖುನಿಂ ಏತದವೋಚುಂ – ‘‘ಗಚ್ಛಾಯ್ಯೇ, ತಂ ಚೀವರಂ ಜಾನಾಹೀ’’ತಿ. ಥುಲ್ಲನನ್ದಾ ಭಿಕ್ಖುನೀ ಯೇನ ತಂ ಕುಲಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತೇ ಮನುಸ್ಸೇ ಏತದವೋಚ – ‘‘ದೇಥಾವುಸೋ, ಭಿಕ್ಖುನಿಸಙ್ಘಸ್ಸ ಚೀವರ’’ನ್ತಿ. ‘‘ನ ಮಯಂ, ಅಯ್ಯೇ, ಸಕ್ಕೋಮ ಭಿಕ್ಖುನಿಸಙ್ಘಸ್ಸ ಚೀವರಂ ದಾತು’’ನ್ತಿ. ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನೀನಂ ಏತಮತ್ಥಂ ಆರೋಚೇಸಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಾಮೇಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಾಮೇತೀತಿ [ಅತಿಕ್ಕಾಮೇಸೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಾಮೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೨೧. ‘‘ಯಾ ಪನ ಭಿಕ್ಖುನೀ ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಾಮೇಯ್ಯ, ಪಾಚಿತ್ತಿಯ’’ನ್ತಿ.

೯೨೨. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ದುಬ್ಬಲಚೀವರಪಚ್ಚಾಸಾ ನಾಮ ‘‘ಸಚೇ ಮಯಂ ಸಕ್ಕೋಮ, ದಸ್ಸಾಮ ಕರಿಸ್ಸಾಮಾ’’ತಿ ವಾಚಾ ಭಿನ್ನಾ ಹೋತಿ.

ಚೀವರಕಾಲಸಮಯೋ ನಾಮ ಅನತ್ಥತೇ ಕಥಿನೇ ವಸ್ಸಾನಸ್ಸ ಪಚ್ಛಿಮೋ ಮಾಸೋ, ಅತ್ಥತೇ ಕಥಿನೇ ಪಞ್ಚ ಮಾಸಾ.

ಚೀವರಕಾಲಸಮಯಂ ಅತಿಕ್ಕಾಮೇಯ್ಯಾತಿ ಅನತ್ಥತೇ ಕಥಿನೇ ವಸ್ಸಾನಸ್ಸ ಪಚ್ಛಿಮಂ ದಿವಸಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ. ಅತ್ಥತೇ ಕಥಿನೇ ಕಥಿನುದ್ಧಾರದಿವಸಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

೯೨೩. ದುಬ್ಬಲಚೀವರೇ ದುಬ್ಬಲಚೀವರಸಞ್ಞಾ ಚೀವರಕಾಲಸಮಯಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ. ದುಬ್ಬಲಚೀವರೇ ವೇಮತಿಕಾ ಚೀವರಕಾಲಸಮಯಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ. ದುಬ್ಬಲಚೀವರೇ ಅದುಬ್ಬಲಚೀವರಸಞ್ಞಾ ಚೀವರಕಾಲಸಮಯಂ ಅತಿಕ್ಕಾಮೇತಿ, ಅನಾಪತ್ತಿ.

ಅದುಬ್ಬಲಚೀವರೇ ದುಬ್ಬಲಚೀವರಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅದುಬ್ಬಲಚೀವರೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅದುಬ್ಬಲಚೀವರೇ ಅದುಬ್ಬಲಚೀವರಸಞ್ಞಾ, ಅನಾಪತ್ತಿ.

೯೨೪. ಅನಾಪತ್ತಿ ಆನಿಸಂಸಂ ದಸ್ಸೇತ್ವಾ ನಿವಾರೇತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ನವಮಸಿಕ್ಖಾಪದಂ ನಿಟ್ಠಿತಂ.

೧೦. ದಸಮಸಿಕ್ಖಾಪದಂ

೯೨೫. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರೇನ ಉಪಾಸಕೇನ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ. ಸೋ ತಸ್ಸ ವಿಹಾರಸ್ಸ ಮಹೇ ಉಭತೋಸಙ್ಘಸ್ಸ ಅಕಾಲಚೀವರಂ ದಾತುಕಾಮೋ ಹೋತಿ. ತೇನ ಖೋ ಪನ ಸಮಯೇನ ಉಭತೋಸಙ್ಘಸ್ಸ ಕಥಿನಂ ಅತ್ಥತಂ ಹೋತಿ. ಅಥ ಖೋ ಸೋ ಉಪಾಸಕೋ ಸಙ್ಘಂ ಉಪಸಙ್ಕಮಿತ್ವಾ ಕಥಿನುದ್ಧಾರಂ ಯಾಚಿ. ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಕಥಿನಂ ಉದ್ಧರಿತುಂ. ಏವಞ್ಚ ಪನ ಭಿಕ್ಖವೇ ಕಥಿನಂ ಉದ್ಧರಿತಬ್ಬಂ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೯೨೬. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಕಥಿನಂ ಉದ್ಧರೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಕಥಿನಂ ಉದ್ಧರತಿ. ಯಸ್ಸಾಯಸ್ಮತೋ ಖಮತಿ ಕಥಿನಸ್ಸ ಉದ್ಧಾರೋ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಉಬ್ಭತಂ ಸಙ್ಘೇನ ಕಥಿನಂ, ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೯೨೭. ಅಥ ಖೋ ಸೋ ಉಪಾಸಕೋ ಭಿಕ್ಖುನಿಸಙ್ಘಂ ಉಪಸಙ್ಕಮಿತ್ವಾ ಕಥಿನುದ್ಧಾರಂ ಯಾಚಿ. ಥುಲ್ಲನನ್ದಾ ಭಿಕ್ಖುನೀ – ‘‘ಚೀವರಂ ಅಮ್ಹಾಕಂ ಭವಿಸ್ಸತೀ’’ತಿ ಕಥಿನುದ್ಧಾರಂ ಪಟಿಬಾಹಿ. ಅಥ ಖೋ ಸೋ ಉಪಾಸಕೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭಿಕ್ಖುನಿಯೋ ಅಮ್ಹಾಕಂ ಕಥಿನುದ್ಧಾರಂ ನ ದಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖುನಿಯೋ ತಸ್ಸ ಉಪಾಸಕಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹಿಸ್ಸತೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹತೀತಿ [ಪಟಿಬಾಹೀತಿ (ಕ.)]? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹಿಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೯೨೮. ‘‘ಯಾ ಪನ ಭಿಕ್ಖುನೀ ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹೇಯ್ಯ, ಪಾಚಿತ್ತಿಯ’’ನ್ತಿ.

೯೨೯. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಧಮ್ಮಿಕೋ ನಾಮ ಕಥಿನುದ್ಧಾರೋ ಸಮಗ್ಗೋ ಭಿಕ್ಖುನಿಸಙ್ಘೋ ಸನ್ನಿಪತಿತ್ವಾ ಉದ್ಧರತಿ.

ಪಟಿಬಾಹೇಯ್ಯಾತಿ ‘‘ಕಥಂ ಇದಂ ಕಥಿನಂ ನ ಉದ್ಧರೇಯ್ಯಾ’’ತಿ [ಕಥಿನಂ ಉದ್ಧರೇಯ್ಯಾತಿ (ಕ.)] ಪಟಿಬಾಹತಿ, ಆಪತ್ತಿ ಪಾಚಿತ್ತಿಯಸ್ಸ.

೯೩೦. ಧಮ್ಮಿಕೇ ಧಮ್ಮಿಕಸಞ್ಞಾ ಪಟಿಬಾಹತಿ, ಆಪತ್ತಿ ಪಾಚಿತ್ತಿಯಸ್ಸ. ಧಮ್ಮಿಕೇ ವೇಮತಿಕಾ ಪಟಿಬಾಹತಿ, ಆಪತ್ತಿ ದುಕ್ಕಟಸ್ಸ. ಧಮ್ಮಿಕೇ ಅಧಮ್ಮಿಕಸಞ್ಞಾ ಪಟಿಬಾಹತಿ, ಅನಾಪತ್ತಿ. ಅಧಮ್ಮಿಕೇ ಧಮ್ಮಿಕಸಞ್ಞಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಿಕೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ. ಅಧಮ್ಮಿಕೇ ಅಧಮ್ಮಿಕಸಞ್ಞಾ, ಅನಾಪತ್ತಿ.

೯೩೧. ಅನಾಪತ್ತಿ ಅನಿಸಂಸಂ ದಸ್ಸೇತ್ವಾ ಪಟಿಬಾಹತಿ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದಸಮಸಿಕ್ಖಾಪದಂ ನಿಟ್ಠಿತಂ.

ನಗ್ಗವಗ್ಗೋ ತತಿಯೋ.