೨. ದುತಿಯಸಿಕ್ಖಾಪದಂ

೮೪೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಭದ್ದಾಯ ಕಾಪಿಲಾನಿಯಾ ಅನ್ತೇವಾಸಿನಿಯಾ ಭಿಕ್ಖುನಿಯಾ ಞಾತಕೋ ಪುರಿಸೋ ಗಾಮಕಾ ಸಾವತ್ಥಿಂ ಅಗಮಾಸಿ ಕೇನಚಿದೇವ ಕರಣೀಯೇನ. ಅಥ ಖೋ ಸಾ ಭಿಕ್ಖುನೀ – ‘‘ಭಗವತಾ ಪಟಿಕ್ಖಿತ್ತಂ ರತ್ತನ್ಧಕಾರೇ ಅಪ್ಪದೀಪೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿತುಂ ಸಲ್ಲಪಿತು’’ನ್ತಿ ತೇನೇವ ಪುರಿಸೇನ ಸದ್ಧಿಂ ಪಟಿಚ್ಛನ್ನೇ ಓಕಾಸೇ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪಿ. ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪೀ’’ತಿ…ಪೇ… ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠತಿಪಿ ಸಲ್ಲಪತಿಪೀತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ, ಭಿಕ್ಖವೇ, ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠಿಸ್ಸತಿಪಿ ಸಲ್ಲಪಿಸ್ಸತಿಪಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –

೮೪೩. ‘‘ಯಾ ಪನ ಭಿಕ್ಖುನೀ ಪಟಿಚ್ಛನ್ನೇ ಓಕಾಸೇ ಪುರಿಸೇನ ಸದ್ಧಿಂ ಏಕೇನೇಕಾ ಸನ್ತಿಟ್ಠೇಯ್ಯ ವಾ ಸಲ್ಲಪೇಯ್ಯ ವಾ, ಪಾಚಿತ್ತಿಯ’’ನ್ತಿ.

೮೪೪. ಯಾ ಪನಾತಿ ಯಾ ಯಾದಿಸಾ…ಪೇ… ಭಿಕ್ಖುನೀತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ.

ಪಟಿಚ್ಛನ್ನೋ ನಾಮ ಓಕಾಸೋ ಕುಟ್ಟೇನ ವಾ ಕವಾಟೇನ ವಾ ಕಿಲಞ್ಜೇನ ವಾ ಸಾಣಿಪಾಕಾರೇನ ವಾ ರುಕ್ಖೇನ ವಾ ಥಮ್ಭೇನ ವಾ ಕೋತ್ಥಳಿಯಾ ವಾ ಯೇನ ಕೇನಚಿ ಪಟಿಚ್ಛನ್ನೋ ಹೋತಿ.

ಪುರಿಸೋ ನಾಮ ಮನುಸ್ಸಪುರಿಸೋ ನ ಯಕ್ಖೋ ನ ಪೇತೋ ನ ತಿರಚ್ಛಾನಗತೋ ವಿಞ್ಞೂ ಪಟಿಬಲೋ ಸನ್ತಿಟ್ಠಿತುಂ ಸಲ್ಲಪಿತುಂ.

ಸದ್ಧಿನ್ತಿ ಏಕತೋ. ಏಕೇನೇಕಾತಿ ಪುರಿಸೋ ಚೇವ ಹೋತಿ ಭಿಕ್ಖುನೀ ಚ.

ಸನ್ತಿಟ್ಠೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ತಿಟ್ಠತಿ, ಆಪತ್ತಿ ಪಾಚಿತ್ತಿಯಸ್ಸ.

ಸಲ್ಲಪೇಯ್ಯ ವಾತಿ ಪುರಿಸಸ್ಸ ಹತ್ಥಪಾಸೇ ಠಿತಾ ಸಲ್ಲಪತಿ, ಆಪತ್ತಿ ಪಾಚಿತ್ತಿಯಸ್ಸ.

ಹತ್ಥಪಾಸಂ ವಿಜಹಿತ್ವಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ. ಯಕ್ಖೇನ ವಾ ಪೇತೇನ ವಾ ಪಣ್ಡಕೇನ ವಾ ತಿರಚ್ಛಾನಗತಮನುಸ್ಸವಿಗ್ಗಹೇನ ವಾ ಸದ್ಧಿಂ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಆಪತ್ತಿ ದುಕ್ಕಟಸ್ಸ.

೮೪೫. ಅನಾಪತ್ತಿ ಯೋ ಕೋಚಿ ವಿಞ್ಞೂ ದುತಿಯೋ ಹೋತಿ, ಅರಹೋಪೇಕ್ಖಾ, ಅಞ್ಞವಿಹಿತಾ ಸನ್ತಿಟ್ಠತಿ ವಾ ಸಲ್ಲಪತಿ ವಾ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.